1. ¿Ambechi jatsiski para úni iámindu kristianuecha?

¿TSITIPIRINCHI uiriini karrerarhu ma jimbo engachi exejka eska úkua jukaska ka sánderia engachi pʼamenchani jauaka ochi kuataratini jarhani? Jamberi nómbe. Peru apostuli Pablu uandaspti eskachi iáminduecha uiriixaka karrerarhu ma jimbo (Ebr. 12:1). No arhiparini na engachi xáni jatirika o na engachi xáni uinhapika, iáminduchi jatsiska para tekaantani kʼamarukuarhu jamberi engachi uéjka jatsini ambe engajtsïni Jeoba aiachijka (Mat. 24:13).

2. ¿Andisï Pablu úpi uandani ambe enga 2 Timoteo 4:7, 8 uandajka?

² Pablu úspti íri ambe uandani jimboka ima kʼamaraspkia karrerani (arhinta je 2 Timoteo 4:7, 8). ¿Peru náki karrerani arhikuekaxapi Pablu?

3. ¿Nákiski i karrera enga Pablu uandapka?

³ Para jukaparhakua ambe jorhentpini, ménisï Pablu úraaspti komu ejemplu imani chʼanakuechani engaksï ióntki Gresia úkuarhienga (1 Kor. 9:25-27; 2 Tim. 2:5). Pablu, someni terukutantaspti kristianueri irekua, karrera ma jingoni (1 Kor. 9:24; Filip. 2:16). Kʼuiripu ma uénasïndi ini karrerarhu uiriini enga aiakukuarhejka Jeobani ka itsï atakuarhini (1 Ped. 3:21). Ka jiáni andasïndi enga Jeoba íntskujka tsípikua para méntkisï (Mat. 25:31-34, 46; 2 Tim. 4:8).

4. ¿Ambechi exea ini jorhenguarhikua jimbo?

⁴ Kristianuecheri irekua, uánikua ambe jimbo sáno májkuenisti kʼéri karrera ma jingoni. Ju je exeni tanimu ambe. Orheta, jatsiskachi para imani xanharu jimbo jámani enga sési jaka. Tsimani úni jámani, jatsiskachi para méntkisï eratseni jarhani eskachi kʼamaraaka karrerani. Ka tanimu úni jámani, jatsiskachi para orhepani uérakuani uandanhiatechani.

5. ¿Náki xanharu jimbochi jatsiski para jámani ka andi?

⁵ Paraksï úni andani karrerani, imecha engaksï uiriijka jatsistiksï para imani xanharu jimbo nirani engaksï arhinhajka. Májkueni, parachi úni intsïnhani tsípikua para méntkisï, jatsiskachi para imani xanharu jimbo jámani enga sési jaka o ísï irekani eska Tata Diosï na juramujka (Uku. 20:24; 1 Ped. 2:21). Peru Noambakiti ka imecha engaksï májkueni újka eska ima, uékasïndiksï eskachi jurajkuaka Tata Diosïni ka eskachi imecha jingoni jámaaka (1 Ped. 4:4). Teresmarhusïndijtsïni na engachi irekajka jucha ka uandasïndiksï eska sánderu sésiska ísï irekani eska imecha jimbokaksï úsïnga ambe engaksï imecha uéjka. Peru inde ambe no ísïsti (2 Ped. 2:19).

6. ¿Ambechi jorhenguarhisïni imeri ambe enga Briani nitamakuarhipka?

⁶ Enga nema uéjka imani xanharu jimbo nirani nani engaksï Satanasiri chúxapaticha nirani jaka, sóntku kuenta íntskukuarhiati eska no ísïska eska ima na eratsenga sino eska Satanasiri jántspiri úkuarhiaka (Rom. 6:16). Ju je exeni ambe enga nitamakuarhipka erachi ma enga Brian arhinhajka. Enga ima tataka sapichu máepka, táti jembechaksï jánguarhintaspti jorhendani para ima ísï irekani eska Biblia na uandajka. Peru jiáni enga ima tumbi máepkia, nóteru seguru jarhasptia eska ísï irekani, jarhuatapiringa para ima tsípikua jingoni irekani. Ísï jimbo, erakuspti ísï irekani eska imecha engaksï újka ambe enga Satanasi uéjka. Brian uandasïndi: “No eratsesïrenga eska xáni uékani úni ambe engani ji uékenga, úpiringa úni eskani xáni pʼindepiringa droguechani úraani”. Sánhani arhispti droguechani úraani, kauini jámani ka ísku jándikua ambe niátani. Brian ístu uandasïndi: “Sánhani arhispka imani droguechani úraani engaksï sánderu no sési útspijka ka tátsekua nóteruni úsïrenguia jurajkuani. Asta niáraspka droga ambe atarantani parani úni kauikua ka droga ambe piáni”. Tátsekua, eratsespti ísï irekani eska Jeoba na juramujka. Mójtakuspti imeri irekua ka itsï atakuarhispti 2001 jimbo. Iásï, ísï irekaxatia eska na jatsika para irekani kristianu ma ka tsípikua jingoni. *

7. Eska na arhijka Mateu 7:13, 14, ¿náki tsimani xanharuechaksï jarhaski?

⁷ Kánikua jukaparhakuesti eskachi imani xanharuni erakuaka enga sési jaka. Noambakiti uékasïndi eskachi jurajkuaka xanharuni enga no kórhuraka enga tsípikuarhu pájpijka ka eskachi imani xanharu jimbo niuaka enga kórhuraka nani enga sáno iámindu kʼuiripu nirani jaka. Ini xanharu jimbo nirani, sánderu fásilisti peru tsïnchikuarhu pájpisïndi (arhinta je Mateu 7:13, 14). Engachi no uéjka eskajtsïni támisï paaka imecha engaksï no újka ambe enga Jeoba juramujka, jatsiskachi para mintsikani Jeobani ka kurhajchani.

8. ¿Ambeksï úsïni imecha engaksï uiriini jarhajka engaksï niárajka téksarhutani ka kuarhatseni?

⁸ Imecha engaksï karrerarhu ma jimbo uiriini jaka, méntkisïksï orhepani ísï eraani jarhasïndi paraksï no téksarhutani. Peru úpirindiksï posurhu ma atastani o jamberi nema no uékaparini apindukuani. Engaksï kuarhatsejka, jauarasïndiksï ka ménderuksï uéntasïndi uiriini. Nóksï masi arhisïndi eratseni andiksïsï téksarhuta, sánderu sési, uékasïndiksï karrerani kʼamarani ka andani ambe engaksï intsïnhaaka.

9. ¿Ambechi jatsiska para úni engachi niáraska téksarhutani?

⁹ Ini karrera jimbo engachi kristianuecha nirani jaka, jamberichi someni téksarhutaaka ambe ma jimbo engachi uandaaka o no sési úni, o jimboka erachi ma no sési ambe uáka ka no sésijtsïni pʼikuastani. Nóchi jatsiska para no sési exeni ini ambe, jimbokachi iáminduecha kʼamanharhintstiska ka imani xanharu jimbochi uiriixaka enga no kórhuraka ka enga tsípikuarhu pájpijka. Ísï jimbo, ménisïchi no úsïnga sési pájperani máteruecha jingoni. Pablu uandaspti eskajtsïni ménisï juchari erachicha niáraaka no sési pʼikuastani (Kol. 3:13). Peru ju je no imantku ambe eratseni ambe engachi no sési exeka, sino kóntperatani engachi intsïnhaaka. Engachi kuarhatseska, ju je jauarani ka ménderu uéntani uiriini. Ju je no kuarhatsetini pakarani, no sési pʼikuarheraparini ni uandauandamiparini jimbokachi ísï no uáka kʼamarani karrerani ni andani kóntperatani. Ka jamberichi úpiringa ójkutaani imechani engaksï jánguarhintani jaka uiriini imani xanharu jimbo enga tsípikuarhu pájpijka.

10. ¿Ambechi jatsiski para úni parachi no ójkutaani máteruechani?

¹⁰ Engachi no uéjka ójkutaani juchari erachichani engaksï ístu uiriini jaka kristianuecheri karrera jimbo, nóchi jatsiska para uékani eska iámindu ambe ísï úkuarhiaka eskachi jucha na uéjka (Rom. 14:13, 19-21; 1 Kor. 8:9, 13). Méntku ménderuenisti karrera ma jimbo. Kʼuiripuechaksï uiriisïndi jimbokaksï uékasïnga imechajku andani. Nóksï uandanhiasïndi máteruecha jimbo. Ísï jimbo, jánguarhintasïndiksï máteruechani kénditaani paraksï imecha orhepani niárani. Peru juchachi no uékasïnga andaani juchari erachichani (Gal. 5:26; 6:4). Ambe engachi uéjka, jindesti máteruechani jarhuataani parakaksï andaaka ini karrerani ka májkueni eska jucha, jatsinksï tsípikua para méntkisï. Jimbochisï jánguarhintajka úni ambe enga Pablu uandapka, eskachi  no solu pendienti paaka juchari ambe jimbo, “sino ístu pendienti páni para máteruecha” (Filip. 2:4).

11. ¿Ambeksï méntku eratseni jarhasïni imecha engaksï uiriijka ka andi?

¹¹ Imecha engaksï uiriijka nóksï solu orhepanisï eraani jarasïndi, ístuksï méntku eratseni jarhasïndi kʼamarani karrerani. Ka nájkirukaksï no újka exeni nani enga kʼamarajka karrera, eranhaskasïndiksï jiáni engaksï kʼamaraaka ka intsïnhanksï ambe engaksï andaaka. I ambe jarhuataasïndi paraksï no kuatantani.

12. ¿Ambe aiatspesïni Jeoba uékperakua jimbo?

¹² Uékperakua jimbo, Jeoba aiatspesïndi eska iámindu imecha engaksï kʼamaraaka ini karrerani intsïnhaakaksï tsípikua para méntkisï, auandarhu o Paraisurhu ixú Echerirhu. Bibliajtsïni arhisïndi máru ambe engachi jimbo újka míteni nénaeua inde kóntperata. Jimbochisï újka eranhaskani nénaeua inde xáni sési jásï irekua. Engachi sánderu eratseni jauaka ambe engajtsïni Jeoba aiachejka, sánderuchi jánguarhintaaka parachi no téksarhutani imani ambe jingoni engajtsïni uáka ójkutani parachi karrerani kʼamarani.

13. ¿Náki jarhuajperatachi jatsiski jucha engaksï máteru kʼuiripuecha no jatsika?

¹³ Ióntki jini Gresia, imecha engaksï karrerarhu ma uirienga, jatsisïrendiksï para jánguarhintani nájkirukaksï kuatarapiringa ka pʼamerhikuarheni. Peru ambe engaksï imecha uénga, jindespti mintsikani ambe engaksï arhistaminhenga ka imecheri uinhapikuani. Májkueni eska imechani, juchajtuchi arhistaminhasïnga parachi uiriini ini karrera jimbo o ísï irekani eska Jeoba na juramujka. Peru juchachi jatsiska sánderu ambakiti jarhuajperata ma: Jeobajtsïni íntskusïndi uinhapikua enga no méni kʼamakurhijka. Engachi imani mintsikaska, imajtsïni aiachesïndi eskajtsïni jarhuataaka ka eskajtsïni sánderu uinhapiti uáka (1 Ped. 5:10).

14. ¿Nénajtsïni jarhuatasïni 2 Korintu 12:9, 10, parachi orhepani uérakuani uandanhiatechani?

¹⁴ Apostuli Pablu jatsispti para uánikua ambe tekaantani. No solu tekaantaspti engaksï máteruecha no sési arhienga ka no sésiksï kámani, ístu, ménisï ísï pʼikuarherasïrendi enajki nóteru jatsipia uinhapikua ka kʼéri mískuarhita ma jatsispti imeri kuerpurhu komueska chekamikua ma (2 Kor. 12:7). Peru inde ambe no úspti eska nóteru uékapiringuia marhuakuni Tata Diosïni, sánderu sési, úraspti indeni ambe para xarhatani eska mintsikasïrenga Jeobani (arhinta je 2 Korintu 12:9, 10). Ini ambe jimbo, Jeoba méntkisï jarhuataspti.

15. ¿Ambechi uá pʼikuarherani engachi májkueni úska eska apostuli Pablu?

¹⁵ Májkueni eska apostuli Pabluni, jamberi juchajtuchi niáraaka no sési kánhani imani ambe jimbo engachi jakajkujka. Ka jamberichi jatsiaka para orhepani uérani pʼamenchakua ma jimbo o engachi kuataratini pʼikuarherajka. Peru méni engachi uandanhiata ma jatsiaka ka májkueni úni eska apostuli Pablu, uákachi pʼikuarherani na engajtsïni Jeoba xáni xénchajka ka jarhuatani.

16. ¿Ambeksï uá úni imecha jamberi engaksï pʼamenchakua ambe kánguarhijka?

¹⁶ Ka imecha engaksï no újka jauarani o engaksï siia de rueda jimbo jámajka oksï nóteru uinhajtarhania oksï no úni exeni, ¿uáksï marhuakuni Jeobani imecha jingoni engaksï sapichku jaka ka nóksï pʼamenchani? Jo. Uánikua erachicha engaksï jatirikia ka máteruecha engaksï pʼamenchani jaka, uiriixatiksï ini karrera jimbo enga tsípikuarhu pájpijka, peru no imecheri uinhapikua jimbo, sino imani uinhapikua jimbo enga Jeoba íntsaajka. Telefonu jimboksï kurhaasïndi tánguarhikuechani o Interneti jimboksï exeani. Úsïndiksï ánchikuarhitani para disipuluechani uáni, engaksï aianguajka Tata Diosïri ambe familiarichani, doktorichani ka enfermerechani.

17. ¿Ambe pʼikuarherasïni Jeoba imani erachicha jimbo engaksï nóteru újkia uánikua ambe úni?

¹⁷ Ju je no méni jurajkuni eskajtsïni no sési pʼikuastaaka ambe engachi nóteru újkia úni para  Jeobani marhuakuni ni eratseni eskachi nóteru uákia uiriini ini xanharu jimbo enga tsípikuarhu pájpijka. Jeobajtsïni xénchasïndi jimbokachi imani mintsikasïnga ka imani ambe jimbo engachi xáni úkia para imani marhuakuni. Jiáni engachi ini ambe nitamakuarhini jarhajka, sánderuchi uétarhinchasïnga Jeobaeri jarhuajperata ka imajtsïni no méni jurajkuati (Sal. 9:10). Sánderu sési, imajtsïni sánderu andarheraati. Ju je exeni ambe enga uandajka pirenchi ma enga uinhamu pʼamenchani jaka: “Jimbokani sánhani arhixaka sánderu uinhamu jarhani, nóteruni úsïnguia xáni uandontskuarhekuani máteruechani Tata Diosïri ambe. Peruni míteska eska ambe engani újka nájkiruka no kʼéri ambeuaka, sési pʼikuastasïnga Jeobani. Inde úsïndi eskani tsípikua jingoni irekaaka”. Engachi kómu pʼikuarherani jauaka, ju je miántani eska Jeoba juchantsïni jingoni jarhaska. Ka ju je eratsentani ambe enga Pablu nitamakuarhipka ka ini ambe enga ima karapka: “Ísï jimbosïni xáni tsípijka engani debili pʼikuarherajka [...], jimboka jimajkani engani ji debili pʼikuarherajka, jimajkanimindusï sánderu uinhapitijka” (2 Kor. 12:10).

18. ¿Ambeksï nitamakuarhesïni máru enga kánikua úkua jukaka?

¹⁸ Máru engaksï uiriini jaka ini xanharu jimbo enga tsípikuarhu pájpijka, máteru jásï uandanhiataksï jatsisti. Íksï ambakiti Jeobaeri marhuarichaksï jatsiasti uandanhiatechani engaksï máteruecha no újka exeni ni kurhanguni, komu kánikua kómu pʼikuarherani jarhani o méntkisï iámindu ambe jimbo uandanhiani jarhani. ¿Andisï xáni úkua jukajki ambe engaksï i erachicha nitamakuarhini jaka? Jimboka enga nema kuarhajkujka o siia de ruedasi jimbo jámani, iáminduechaksï exesïndi ambe enga nitamakuarhini jaka ka jamberiksï uékani jarhuatani. Peru no nema exesïndi ambe engaksï nitamakuarhini jarhajka imecha engaksï jukari kómu pʼikuarherajka o engaksï méntkisï iámindu ambe jimbo uandanhiani jarhajka. Imechajtuksï májkueni no sési pʼikuarherasïndi eska imecha engaksï kuarhajkujka, peru jamberi imechani no nema uékperakua jingoni jarhuataajti ísï eskaksï na uétarhinchajka.

19. ¿Ambejtsïni jorhendasïni Mefibosetiri ejemplu?

¹⁹ Engachi nóteru újkia uánikua ambe úni, ochi ísï pʼikuarherani enajkijtsïni no nema kurhanguchejki, ambe enga Mefiboseti nitamakuarhipka uátijtsïni uinhaperantani (2 Sam. 4:4). Ima no solu jatsispti para tekaantani imeri kʼéri pʼamenchakua jimbo, sino ístu tekaantaspti enga rei Dabidi no sési kámapka. Nájkiruka Mefiboseti no jirinhakuarhiapka imani uandanhiatechani, no jurajkuspti eska indeni ambe jimbo, méntkisï kómu pʼikuarheraparini jámapiringa. Sánderu sési, kánikua jukaparharasïrendi ambakiti ambe enga jatsipka. Jukaparharasïrendi enga antesi rei Dabidi sési kámapka (2 Sam. 9:6-10). Ísï jimbo, jiáni enga rei Dabidi no sési kámapka, Mefiboseti jánguarhintaspti kurhanguni andisï ísï úpi. No jurajkuspti eska no sési pʼikuastapiringa ambe enga  rei Dabidi úpka ni uandapi eska Jeobaeri kulpespka. Sánderu sési, Mefiboseti jánguarhintaspti jarhuatani reini enga Jeoba erakupka (2 Sam. 16:1-4; 19:24-30). Jeoba úspti eska Bibliarhu karakata pakarapiringa Mefibosetiri ambakiti ejemplu parachi ambakiti ambe jorhenguarhini (Rom. 15:4).

20. ¿Ambeksï nitamakuarhesïni máru engaksï méntkisï kánikua uandanhiani jarhajka peru amberiksï uá seguru jarhani?

²⁰ Ima erachicha engaksï méntkisï uandanhiani jarhajka, kánikuaksï chésïndi ka no sésiksï pʼikuarherani engaksï máteru kʼuiripuecha jingoni jarhajka. Jamberiksï no sési pʼikuarherajti xáni uánikua kʼuiripuecha jingoni jarhani, peruksï útasï nirasïndi tánguarhikuecharhu ka kʼéri tánguarhikuecharhu. Úkua jukanchasïndiksï uandontskuarheni imecha jingoni engaksï no míteaka peruksï útasï uérasïndi aianhpini. Engachi ini ambe nitamakuarhini jaka, nóchi juchajkueska, uánikua kʼuiripu sáno májkueni jásï ambe nitamakuarhisïndi. Ju je miáni eska Jeoba kánikua sési pʼikuarherasïnga engachi mintsita jingoni jánguarhintajka imani marhuakuni. Engachi no kuatantani jaka, xarhatasïndi eskajtsïni Jeoba újchakurasïnga ka íntskuntsïni uinhapikua engachi xáni uétarhinchajka * (Filip. 4:6, 7; 1 Ped. 5:7). Engachi marhuakuni jaka Jeobani nájkirukachi pʼamenchakua ma kámajka ochi nóteru únia uánikua ambe úni, uákachi seguru jarhani eska inde ambe kánikua sési pʼikuastasïnga Jeobani.

21. ¿Ambechi uá úni Jeobaeri jarhuajperata jingoni?

²¹ Eskachi na exekia, jarhasti máru ambe enga no májkuenika karrera ma jingoni ka ima karrera enga Pablu uandapka. Karrerecha engaksï ióntki úkuarhienga, ma kʼuiripujkusï andendi. Peru ini karrera jimbo engachi kristianuecha uiriini jaka, iámindu imecha engaksï no méni jurajkuaka ini xanharu, intsïnhaatiksï tsípikua para méntkisï (Juanu 3:16). Ióntki anapu karrerecha jimbo, iáminduecha engaksï uirienga jatsisptiksï para uinhapiti jarhani ka no pʼamenchani. Enga no ísïpiringa, jamberiksï no úpirindi andani. Peru uánikua juchachi nóteru úsïnguia uánikua ambe úni ochi pʼamenchakua ma kámani, peruchi útasï tekaantaxaka (2 Kor. 4:16). Jeobaeri jarhuajperata jingoni, iáminduchi uiriiuaka ini karrerarhu astakachi kʼamaraaka.