Antede Jesusi uarhini, ¿andisï uandapi imani ambe enga Dabidi uandapka Salmo 22:1 jimbo?

Seguni ambe enga arhijka Mateu 27:46, Jesusi ini ambe uandaspti antede uarhini: “Juchiti Diosï, juchiti Diosï, ¿andisïrini ísï jurajku?”. Ísï úparini, Jesusi úspti ambe enga Dabidi tʼuini uandapkia Salmo 22:1 jimbo (Mar. 15:34). Jesusi no uandaspti ini ambe jimboka no sési pʼikuarherani japiringa enga Jeoba jurajkupka o jimboka nóteru mintsikapiringia Tata Diosïni. Ima sési mítetixapti eska jatsispka para uarhini ka uékaspti ísï úni (Mat. 16:21; 20:28). Ístu, mítespti eska Jeoba no kuájchakupiringa jiáni enga uarhipiringa (Job 1:10). Ísï, Jeoba jurajkuspti eska Jesusi xarhatakupiringa eska no méni jurajkupiringa nájkiruka xáni no sési uarhipiringa (Mar. 14:35, 36).

Jiájkani, ¿andisï Jesusi uandaapi inde uandakuechani? Nóchi uáka uandani andisï meru ísï uandapi, joperu ju je exeni máru ambe enga jimbo ísï uandapka. *

Indeni uandakuecha jingoni, jamberi Jesusi arhikuekani japti eska Jeoba no ma ambe úpiringa paraka no uándikunhapiringa. Imajtsïni euajpintapirindi, joperu Jeoba no jarhuatapirindi para Jesusi ísï úni. Ima kʼuiripu máespti ka jatsispti para “uarhini iáminduechani jimbo” (Ebr. 2:9).

Jamberi Jesusi máru uandakuechani úraapti engaksï Salmo 22 jimbo jaka paraksï kʼuiripuecha miántani iámu salmuni. Imani tiempu jimbo, judiuechaksï memoria jimbo jorhenguarhiasïrendi  uánikua salmuechani. Ísï jimbo, engaksï miátanhantenga ambe enga arhijka ma bersikulu, imaksï miántasïrendia iámu salmuni. Enga Jesusi ini ambe uékenga úni, jimajkani jarhuataxapti Judea anapuechani engaksï imeri chúxapatipka paraksï miántani iámu imani profesiechani engaksï imeri uarhikueri ambe uandenga ka engaksï ini salmuni jimbo jaka (Sal. 22:7, 8, 15, 16, 18, 24). Ístu, kʼamarhukuni jámani i salmueri kʼéri ambe arhisïndi Jeobani ka uandasïndi eska ima Juramutiska iámu parhakpinirhu (Sal. 22:27-31).

Enga Jesusi Dabidiri uandakuechani úrani japka, jamberi xarhatani japti eska ima no ma ambe no sési úspka. Antede uándikunhani, Jesusi jatsispti para tekaantani jimbokaksï no ísï jusgarispka eska lei na uandenga ka jimbokaksï arhispka eska no sési ambe uandaspka Tata Diosïri ambe (Mat. 26:65, 66). Jirejiresïksï jusgarispti ka chúrikua ka no ísï eska lei na uandenga (Mat. 26:59; Mar. 14:56-59). Enga Jesusi uandapka, “Juchiti Diosï, juchiti Diosï, ¿andisïrini ísï jurajku?”, uékani japti xarhatakuani máteruechani eska no no sési úri máespka paraka isï uándikunhapiringa.

Ístu, Jesusi úpti miátantaani máteruechani eska nájkiruka Dabidi enga karaka ini salmuni no sési nitamakuarhini japka no arhikuekasïrenga eska Jeoba nóteru jaiapanhentasïrengia. Dabidi mintsikasïrendi Jeobani, jimboka enga inde kurhamarhikuani úpka, ima uandaspti eska mintsikasïrenga eska Jeoba úsïnga pʼímutantaani imeri marhuarichani ka Jeoba seguirispti újchakurani Dabidini (Sal. 22:23, 24, 27). Ka sáno májkueni, enga Jesusi, Dabidi Uájpa no sési nitamakuarhini japka chkarirhu, no arhikuekasïrendi eska Jeoba nóteru jaiapanhentasïrengia (Mat. 21:9).

Ístu, Jesusi uékapti xarhatani eska no sési pʼikuarheraxapka enga Jeoba nóteru kuájchakuni japkia paraka ima úpiringa xarhatakuni eska no méni jurajkupiringa. Engaksï Adani ka Eba nóteru kurhajchapkia Tata Diosïni, uétarhispti eska tata Jesukristu no sési kánhapiringa ka uándikunhani. Joperu Jeoba no indeni ambesï eratsetini japti uénani jámani. Jesusi no ma ambe úspti enga no sési japka, joperu jatsispti para no sési kánhani ka uarhini para mókukuntani Noambakitini ka maiampintani euajpintskuani ka parakaksï kʼuiripuecha ménderu úpiringa imani ambe jatsini enga Adani tsïtapka (Mar. 8:31; 1 Ped. 2:21-24). I ambe úpirindi ísï úkuarhini solu enga Tata Diosï no kuájchakupiringa Jesusini ka i jindeespti primeru xanhari enga no kuájchakupka.

Jamberi ístu Jesusi ísï uandapti para jarhuataani imeri chúxapatichani exeni andisï Jeoba jurajkupi paraka ima ísï uarhipiringa. * Jesusi mítespti eska enga ísï uándikunhapiringa chkarirhu ma jimbo komueska no sési úri ma, úpiringa úni eskaksï uánikuecha nóteru uékapiringia chúxapani (1 Kor. 1:23). Joperu engaksï imeri chúxapaticha exepiringa ambe enga jimbo uarhipka Jesusi, úpirindiksï kurhanguni andisï ísï úpi (Gal. 3:13, 14). Jiájkani nóteruksï ísï exepirindia komu no sési úri ma, sino komueska imecheri Pʼímutantspiti.

Ambe uéjki jimbo Jesusi ísï uandani, ima mítespti eska enga uarhipiringa chkari ma jimbo, ima ísï úxapti eska Jeoba na uékenga. Ísï tátsekua enga indeni ambe uandapka, uandaspti: “Úkata jarhastia” (Juanu 19:30; Luk. 22:37). Ísïsti, Jeoba no jatsispti para kuájchakuni ma ratu paraka ima úpiringa úni iámindu ambe enga jimbo jupka Echerirhu. Ístu, i ambe úspti eska ísï úkuarhipiringa ambe enga xáni karakata jaka Jesusiri ambe “Moisesiri lei jimbo ka ístu uandajtsïkpiticheri karakatecharhu ka salmuecharhu” (Luk. 24:44).