1, 2. ¿Ambe úkuarhispi antede Jesusi últimu ambe uandani jiáni enga cháparhakata japka?

14 de nisán uéxurhini 33 jimbo. Ísï tátsekua engaksï na uandapkia chkuanderakua ambe Jesusiri ka uándikutarkuarhinksï, teresmarhusptiksï imecha engaksï ikiakuenga Jesusini, no sésiksï kámaspti ka cháparhatasptiksï chkarirhu ma. Engaksï imeri jájkicha ka jantsiricha cháparhatakata japka, méni enga jirejtenga ka uandani kánikua pʼamerasïrendi. Joperu no pínasku pakaraspti jimboka jukaparhakua ambe jatsispka para uandani.

² Ju je exeni ambe enga uandapka Jesusi jiáni enga cháparhatakata japka chkarirhu ka ambe engachi uáka jorhenguarhini ima amberi (Mat. 17:5).

3. ¿Néchani arhikuekaxapi Jesusi enga uandapka: “Táti, puákuanta”?

³ Ambe enga Jesusi uandapka. Enga na cháparhatakata japkia, Jesusi kurhakuspti Jeobani: “Táti, puákuanta”. ¿Néchani arhikuekaaxapi? Ambe enga Jesusi sánderu tátsekua uandapka uátijtsïni jarhuatani míteni: Nóksï mítesti “ambe engaksï úni jaka” (Luk. 23:33, 34). Jamberi Roma anapu soldaduechani arhikuekani japti engaksï chájkupka ka chándukuni. Imaksï no mítespti né enga meru jindeepka Jesusi. Jamberi ístu máru imani kʼuiripuechani arhikuekani japti engaksï uékenga paraksï Jesusini uándikuni, joperu engaksï tátsekua niárapka mintsikani Jesusini (Uku. 2:36-38). Jesusi no jurajkuspti eska imani ambe jimbo enga úminhapka jatanhetspipiringa ka ikiani pakarani (1 Ped. 2:23). Sánderu sési, kurhakuspti Jeobani eska puákuantapiringa  imechani engaksï uándikuni japka.

4. ¿Ambejtsïni jorhendaspi Jesusi enga puákuantapka imecha engaksï ikiakuenga?

⁴ Ambe engachi jorhenguarhijka. Májkueni eska Jesusi, juchajtuchi jatsiska para puákuantani máteruechani (Kol. 3:13). Jamberi máru kʼuiripuecha —asta juchari familiaricha—úpirindijtsïni no sési kámani jimbokaksï no kurhangusïnga ambe engachi jakajkujka ka na engachi ikekajka. Jamberijtsïni chkuanderakua ambe jauatacheati, máteruechani japarintsïni kʼurhatsetani, publikasionichantsïni karukucheani o astajtsïni arhini eskajtsïni no sési ambe úchiaka. Enbesdechi jatanhekuani, uákachi kurhakuni Jeobani eska jarhuatauaka parakaksï jiókuarhiaka jurhimbikueri ambe (Mat. 5:44, 45). Ménisï úkua jukasïndi puátspintani, ka sánderia engachi no sési kánhajka. Joperu, engachi ikiani pakaraska ka jatanhetspini, juchajkuminduchi no sési úkuarhini jauaka. Pirenchi ma uandasïndi: “Puákuantani máteruechani no arhikuekasïndi eskani sési exesïnga ambe engaksï újka o eskani tsitisïnga parajtsïni no sési kámani; sánderu sési arhikuekasïndi eskani no jatanhekuani pakarasïnga” (Sal. 37:8). Engachi puátspintajka, úsïndi eskachi no ikiani pakaraka imani ambe jimbo engachi úminhajka (Efes. 4:31, 32).

5. ¿Ambe aiakuspi Jesusi no sési úrini ma enga imeri máekanda jimbo japka, ka andisï i ambe aiakupi?

⁵ Ambe enga Jesusi uandapka. Ístu, Jesusi jingonksï cháparhatanhaspti tsimani no sési úricha. Uénani jámani imechajtuksï teresmarhuspti (Mat. 27:44). Peru tátsekua máechakua kuenta íntskukuarhespti eska Jesusi “no ma ambe no sési úspka” (Luk. 23:40, 41). Joperu ístu; xarhataspti eska jakajkusïrenga eska Jesusi tsíntapiringa ka eska niárapiringa Reini. Arhispti: “Jesusi miárini engari chíti reinurhu inchaaka” (Luk. 23:42, TNM). Xarharasïrendi eska meru mintsikasïrenga Tata Diosïni, Jesusi arhispti: “Jíkeni sési jimbomindusï arhini jaka iásï: jíndeni jingoniri jauaka Paraisurhu”, no Reinurhu (Luk. 23:43, TNM). Enga arhipka “jíndeni jingoniri jauaka paraisurhu” arhikuekasïndi eska Jesusimindusï aiakuni japka. Jesusi úspi ini ambe aiakuni no sési úrini jiáni enga uarhini japkia jimboka mítespka eska imeri Táti jémba pʼamojpitispka (Sal. 103:8).

6. ¿Ambechi jorhenguarhisïndi ima amberi enga Jesusi arhipka no sési úrini?

⁶ Ambe engachi jorhenguarhijka. Jesusi xarhatasïndi na enga jásïka imeri Táti (Ebr. 1:3). Jeobajtsïni uékasïndi puáchentani ka pʼamojperakua xarhatacheni engachi no sési pʼikuarheraska imani no sési jásï ambe jimbo engachi ióntki úpka ka engachi mintsikaska tata Jesukristueri uarhikuani (1 Juanu 1:7). Joperu ¿ambechi uá úni engachi ménisï úkua jukanchaska jakajkuni eskajtsïni Jeoba puáchintaaka imani ambe jimbo engachi ióntki úpka? Ju je eratseni ini ambe: antede uarhini, Jesusi pʼamojperakua xarhatakuspti no sési úrini ma enga jiáni uénapka mintsikani, ¿na xáni sánderu Jeoba pʼamojperakua xarhatakuaua imeri ambakiti marhuarichani engaksï jánguarhintajka kurhajchani? (Sal. 51:1; 1 Juanu 2:1, 2).

7. Ísï eska na arhijka Juanu 19:26, 27, ¿Jesusi ambe arhispi Mariani ka Juanuni?

⁷ Ambe enga uandapka Jesusi (arhinta je Juanu 19:26, 27). Jesusi uékasïrendi eska imeri nándi, enga jamberi tsïndipkia, jatsipiringa ambe enga uétarhinchapiringa. Enga Jesusi uarhipiringia, imeri ermanu jémbeechaksï úpirini kéndani amambani. Joperuksï imecha péringa nótki Jesusiri chúxapatipka. Jimajkani, ¿né jarhuatapirini Mariani paraka no jurajkupiringa Jeobani? Juanu ambakiti apostuli máespti ka Jesusiri sánderu ambakiti amigu. Para  Jesusi, imecha engaksï marhuakuenga Jeobani ísïsptiksï komueska imeri familia (Mat. 12:46-50). Jimboka xénchasïrenga amambani ka uandanhiani imani jimbo, Jesusi mintsikaspti Juanuni paraka ima kuidaripiringa, jimboka mítespka eska ima jarhuatapiringa paraka seguiripiringa Jeobani marhuakuni. Arhispti Mariani: “Exe chíti uátsïtini” ka tátsekua arhispti Juanuni: “Exe chíti nándini”. Jiáni uératini, Maria isï exespti Juanuni komueska imeri uájpa ma ka Juanu isï kuidarispti Mariani komueska imeri amamba. Jesusi kánikua uékperakua xarhatakuspti imani uarhiitini enga xáni xénchperakua jingoni kuidaripka desde jiáni enga andajpenupka ka enga iásï jima japka enga uándikunhapiringa.

8. ¿Ambechi jorhenguarhisïni ima amberi enga Jesusi arhipka Mariani ka Juanuni?

 ⁸ Ambe engachi jorhenguarhijka. Jamberichi uáka sánderu sési pájperani kúnguarhikuarhu anapuecha jingoni eska juchari familia jingoni. Uátijtsïni máru parienticha no sési kámani o astajtsïni jurajkuni. Peru, ísï eska Jesusi na aiatspika, engachi no jurajkuaka Jeobani ka imeri kúnguarhikuani, “100 uelta sánderu ambechi intsïnaaka” ka eska ima ambe engachi tsïtaaka. Uánikuaksï niáraati ísïni para jucha komueska juchari uájpecha, juchari nándicha o juchari táticha (Mar. 10:29, 30). ¿Nénachi pʼikuarherasïni familia ma jimbo jarhani enga májku kʼéri jaka jimbokaksï iáminduecha mintsikasïnga ka xénchani Jeobani ka erachichani? (Kol. 3:14; 1 Ped. 2:17).

9. ¿Ambejtsïni jorhendasïni ambe enga Jesusi uandapka Mateu 27:46 jimbo?

⁹ Ambe enga Jesusi uandapka. Antede Jesusi uarhini, uinhachaparini uandaspti: “Juchiti Diosï, juchiti Diosï, ¿andisïrini ísï jurajku?” (Mat. 27:46). Biblia no uandasïndi andisï Jesusi ini ambe uandapi. Joperu ju je exeni ambe engajtsïni jorhendajka. Primeru enga ísï uandapka kumplirixapti ambe enga arhijka Salmo 22:1. * Ístu, xarharasïndi eska Jeoba no “tsirindakua” ma jatsikuspka para kuájchakuni imeri Uájpani (Job 1:10). Jesusi kurhanguspti eska Jeoba jurajkuspka imeri ikiatspiticheri jájki jimbo para xarhatani eska mintsikasïrenga Jeobani asta uarhikuarhu jamberi, nóteru ma kʼuiripu jarhasti enga xáni no sési kánhaka eska Jesusi. Ka ístu, ini uandakuecha jingoni xarhataspti eska no ma ambe úspka enga jimbo jatsipka para uándikunhani.

10. ¿Ambechi jorhenguarhisïndi ima amberi enga Jesusi arhipka táti jémbani?

¹⁰ Ambe engachi jorhenguarhijka. Ma ambe engachi jorhenguarhijka, jindesti eskachi no jatsiska para erokuarhini eskajtsïni Jeoba kuájchakuaka engachi tsʼéjkukuechani jatsiauaka. Májkueni eska Jesusi jatsiskachi para listu jarhani parachi no méni jurajkuni Jeobani asta uarhikuarhu jamberi enga niárapiringa ísï úkuarhini (Mat. 16:24, 25). Joperuchi míteska eska Tata Diosï no jurajkuaka eskachi jukari tsʼéjkunhaaka engachi jamberi nóteru uákia tekaantani (1 Kor. 10:13). Ístuchi jorhenguarhisïnga eska májkueni eska Jesusi, jamberichi juchajtu niáraaka no sési kánhani (1 Ped. 2:19, 20). Engajtsïni máteruecha no sési kámajka no jindesti jimbokachi no sési ambe niátaska, sino jimbokachi no parhakpinirhu anapueska ka jimbokachi aianhpisïnga jurhimbikueri ambe (Juanu 17:14; 1 Ped. 4:15, 16). Jesusi kurhangusïrendi andisï Jeoba jurajkuni japi eska no sési nitamakuarhipiringa. Joperu, máru Jeobaeri ambakiti marhuaricha engaksï no sési nitamakuarhika kurhamarhikuaristiksï andisï Jeoba jurajkupi eskaksï ísï nitamakuarhipiringa (Hab. 1:3). Jimboka Jeoba pʼamojpitiska ka tekantstiini, kurhangukuasïndi eska no jindeesïnga jimbokaksï no mintsinharhisïnga imani sino eskaksï uétarhinchasïnga eska ima uinhaperantauaka (2 Kor. 1:3, 4).

11. ¿Andisï Jesusi uandapi ambe enga arhijka Juanu 19:28?

¹¹ Ambe enga Jesusi uandapka (arhinta je Juanu 19:28). ¿Andisï Jesusi uandapi eska kʼarhichaxapka? Paraka úkuarhipiringa ambe enga Salmo 22:15 uandajka, arhisïndi: “Juchiti uinhapikua ísï kʼarhisti komueska na kʼarhijka kʼamukua ma echeriri; juchiti katamba mákurhisïndi juchiti tsintsirhicharhu”. Ístu jimboka cháparhakata jarhaspka, ka enga xáni no sési  kánhapka, indeni jimbosï kʼarhichani japti, ka uétarhinchaxapti eska nema jarhuatapiringa paraka nóteru kʼarhichapiringia.

12. ¿Ambechi jorhenguarhisïndi enga Jesusi uandapka eska kʼarhichaxapka?

¹² Ambe engachi jorhenguarhijka. Jesusi no eratsespti eska no sési jarhaska uandani na enga pʼikuarherani jarhajka ma ka juchajtuchi no jatsipiringa para ísï eratseni. Kásichi no pʼindeska aianguani máteruechani ambe engachi uétarhinchani jarhajka. Joperu engachi ménisï uétarhinchani jauaka ambe ma, ju je jarhuajperata kurhajkuarhini. Por ejemplu, engachi jatirikia ochi pʼamenchani jarhani, jamberichi arhiaka amiguni ma parajtsïni nirani pámbitani piáni ambe ma o eskajtsïni niuaka pámbitani engachi doktori jingoni niuaka. Engachi chkéni pʼikuarherani jauaka, jamberichi kurhakuaka orhejtsïkutini ma o ambakiti erachini ma eskajtsïni kurhajchaaka o eskajtsïni arhiaka ambe ma engajtsïni uinhaperantaaka (Prov. 12:25). Ju je miáni eskajtsïni juchari erachicha xénchasïnga ka eskajtsïni uékasïnga jarhuatani “jiáni engachi uandanhiatechani jatsiajka” (Prov. 17:17). Joperu engachi jucha no aianguauaka, imechaksï no míteati engachi jarhuajperata uétarhinchani jauaka.

13. ¿Ambe ka ambe úspi Jesusi enga ísï no jurajkupka Jeobani asta uarhikuarhu jamberi?

¹³ Ambe enga Jesusi uandapka. 14 de nisán, xatini komu tresisï, Jesusi uandaspti: “¡Úkata jarhasti iámindu ambe!” (Juanu 19:30). Sánititu antede uarhini, Jesusi mítespti eska úspka iámindu ambe enga Jeoba uékenga. ¿Ambe ka ambe úspi enga ísï no méni jurajkupka Jeobani asta uarhikuarhu jamberi? Orheta xarhataspti eska Noambakiti chkuanderari máeska, jimboka xarhataspka eska kʼuiripu perfektu ma uáka no méni jurajkuni Tata Diosïni nájkiruka Noambakiti jánguarhintajka tsʼéjkuni. Máteru ambe, íntspispti imeri tsípikuani parajtsïni euajpintani. Ka enga isï uarhipka, úspti eskaksï kʼuiripuecha úpiringa ambakiti pájperakua ma jatsini Jeoba jingoni ka únksï irekani para méntkisï nájkirukaksï kʼamanharintstika. Ka últimu, Jesusi xarhataspti eska Jeoba ambakiti juramuti máeska ka pímbinhajkuntasti táti jémbeeri arhinhakuani.

14. Uanda je nénachi jatsiski para irekani pauani pauani.

¹⁴ Ambe engachi jorhenguarhijka. Ju je eratsetini jarhani pauani pauani no méni jurajkuni Jeobani. Ju je exeni ambe enga uandapka erachi Maxwell Friend, enga jorhentpiripka Bibliaeri Jorhentperakuarhu Galaadiri enga Watchtoweririka. Kʼéri tánguarhikua internasionaliru ma, imeri arhijtsïkperatarhu enga uandenga eskachi no méni jatsiska para jurajkuni Jeobani erachi ini ambe uandaspti: “Asï jurajku para pauani ambe engari iásï uáka úni o uandani. ¿Segururi jarhaski eskari tsípiti jauaka pauani? Mejori pauani pauani ísï ireka enajki i jindee últimu jurhiatikua parari xarhatani eskari jukanchaska irekani para méntkisï”. Ísï eska na uandapka erachi, ju je isï irekani pauani pauani enajki i jindee últimu jurhiatikua parachi sési marhuakuni Jeobani. Engachi ísï úska, nájkirukachi niáraka uarhini, uákachi arhini Jeobani: “Úska na engani xáni úka úni, parakeni no méni jurajkuni, parani xarhatani eska Noambakiti chkuanderari máeska ka parani xarhatani eskari ambakiti juramuti máeska ka pímbinhajkuntani chíti arhinhakuani”.

15. Eska na arhijka Lukasʌ 23:46, ¿amberi seguru jarhaspi Jesusi?

¹⁵ Ambe enga uandapka Jesusi (arhinta je Lukasʌ 23:46). Mintsikaparini Jesusi uandaspti: “¡Táti, ji chíti jájkicharhu patsasïnga juchiti  espirituni!”. Jesusi mítespti eska imeri tsípikua Jeobaeri jájkicha jimbo jarhaspka ka seguru jarhaspti eska imeri táti miápiringa imani.

16. ¿Ambechi jorhenguarhisïni Joshuari ejemplueri?

¹⁶ Ambe engachi jorhenguarhijka. Jatsiskachi para Jeobaeri jájki jimbo jurajkuni juchari tsípikuani. Ka para indeni ambe úni, jatsiskachi para iámu juchari mintsita jingoni mintsikani. Ju je eratseni Joshuari ejemplu erachi ma enga 15 jatiripka ka enga kʼéri pʼamenchakua ma kámenga. Ima no jiókuarhiaspti tratamientuechani enga Tata Diosï no jaiapanheantajka. Antede uarhini, arhispti amambani: “Jeobaeri jájkichani jimbo jarhaska. Uákakeni seguru arhini i ambe eskarini Jeoba tsítantaaka. Ima mítesti ambe engani eratsejka ka na engani pʼikuarherajka ka eskani meru xénchasïnga”. * Iáminduechachi jatsipiringa para kurhamarhikuarhini: “Engani tsʼéjkukua ma jatsiaka ka engani jamberi niárapiringa uarhini, ¿no jurajkua Jeobani ka mintsika eskarini Jeoba no mirikurhiaka ka eskarini tsítantaaka?”.

17, 18. ¿Ambechi jorhenguarhiski? (Ístu exe je rekuadruni “ ¿Ambechi jorhenguarhisïni ima amberi enga Jesusi uandapka antede uarhini?”).

¹⁷ Últimu ambe enga Jesusi uandapka ambakiti ambejtsïni jorhendasïndi. Miátantasïndijtsïni eskachi jatsiska para puákuantani máteruechani ka mintsikani eskajtsïni Jeoba puáchentaaka. Kʼéri kóntperata máesti jatsiani erachichani ka pirenchichani engajtsïni jarhuatajka. Joperu, engachi jarhuajperata uétarhinchani jauaka jatsiskachi para kurhajkuarhini. Míteskachi eskajtsïni Jeoba jarhuataaka tekaantani na uéjki jásï tsʼéjkukua ma. Kurhangusïngachi eska kánikua jukaparhakueska pauani pauani ísï irekani enajki i jindee últimu jurhiatikua parachi xarhatakuni Jeobani eskachi no méni jurajkuaka ka seguruchi jarhaska eskajtsïni Jeoba tsítantaaka engachi niáraka uarhini.

¹⁸ Engachi úska iámindu ambe engachi jorhenguarhika, ísïchi úni jauaka eska Jeoba na uandapka imeri Uájperi ambe: “Kurhajcha je” (Mat. 17:5).