Engani uátsïpkia, sánhani arhispka jarharini Jeobani. Ísï exesïrenga enajkiksï juchiti kompanieruecha uánikua ambe uéni úni, ka jíjtuni májkueni uékasïrenga úni. Ísï pʼikuarherasïrenga eska ambe engajtsïni juchiti táticha arhienga ka ambe enga Biblia uandajka, no sáni jurajpisïnga úni ambe ma, ka eska kánikua úkua jukaska Jeobani marhuakuni. Méntkisï jakajkuska eska Jeoba jarhaska, joperuni uénaspkia nóteru sési pájperani imani jingoni.

No méni jurajkuspka nóteru aianhpinia, joperuni no jánguarhintasïrenga sési aianhpini. No prepararikuarhisïrenga parani aianhpini nirani, ísï jimbo úkua jukanchasïrenga uénani ka seguirini uandontskuarheni kʼuiripuecha jingoni. Ka indeni ambe jimbo no jatsispka néni nirani pʼorhembintani ka ni néni Bibliaeri ambe jorhendani ka nóteruni tsitisïrengia nirani aianhpini, iámindu inde ambe úspti eskani nóteru uékapiringia nirani aianhpini. Kurhamarhikuarhisïrenga: “¿Néna úsïni nema i ambe úni mándani semana ka mándani kutsï?”.

Engani 17 jatiripkia, uékasïrengia támu irekania, ísï jimbo Australia niraspka irekani. Juchiti tátichaksï kánikua uandanhiaspti, joperuksï mintsikasïrendi eskani jima seguiripiringa Jeobani marhuakuani.

 Jini Australia, sánderuni nóteru marhuakusïrengia Jeobani. Kási no nirasïrenga tánguarhikuecharhu ka imani uátsïcha ka tumbiicha jingoni kúnguarhisïrenga engaksï ístu ma chúrikua  tánguarhikuarhu nireenga ka máteru chúrikua jimbo uéranksï kauini ka jimesïsïksï nirani enga uarhakua ambe japiringa. Engani miántajka i ambe, kuenta íntskukuarhisïnga eskani támu parhakpinirhu jarhaspka ka ístu jurhimbikuarhu, joperuni no nani sési pʼikuarherasïrenga.

Ma tsimani uéxurhini ísï tátsekua, mítespka pirenchini ma enga úpka eskani eratsentapiringa ambe engani úni japka juchiti tsípikua jingoni. Kʼumanchikuarhu ma irekaspka nani engaksï sinko pirenchicha irekapka ka pʼímarhispkachi sirkuitueri orhejtsïkutini ka imeri témbani Tamarani, paraksï juchantsïni jingoni pakarani ma semana. Enga jamberi erachi kúnguarhikuarhu anapu ambe exeni jarhenga, Tamara juchantsïni jingoni jarhasïrendi ka májku kʼérichi kánikua tsípikuarhisïrenga. Kánikua tsitispka i ambe, no jakajkusïrenga eska kʼuiripu ma enga kánikua marhuakujka Jeobani xáni kaxumbitiipiringa ka xáni sési pʼikuarherakuarhini imani jingoni jarhani.

Tamara kánikua tsípikua jingoni jámasïrendi. Tsitisïrendi jurhimbikuani ka aianhpini ka úsïrendi eskaksï máteruecha májkueni pʼikuarherapiringa. Tsípikua jingoni irekaspti, jimboka ambakiti ambe íntskuxapka Jeobani, joperuni ji nómbe jimbokani no jánguarhintasïrenga Jeobani marhuakuni. Na enga jámenga úspti eskani jíjtuni májkueni uékapiringa jámani. Imeri ambakiti ejemplurini jukaparhakua ambe miátantaspti: Jeoba uékasïndi eskachi iáminduecha “tsípikua jingoni” marhuakuaka ka “tsípikua jingoni uinhachaparini” (Sal. 100:2).

Uékasïrenga májkueni tsípikua jingoni jámani eska Tamara, joperuni jatsispka para máru ambe mójtakuni juchiti irekuarhu. Sánhani arhispka mójtakuni ambe ma. Uénaspka prepararikuarhini parani aianhpini nirani ka ménichani prekursora auksiliari úkuarhisïrenga. I amberini jarhuataspti parani no xáni chéni ka seguru pʼikuarherani. Jimbokani sánderu úrasïrenga Bibliani sánderu sési pʼikuarherasïrenga. Ka ísï no ióni jimbo prekursora auksiliari úkuarhispka mándani kutsï.

Uénaspka amiguechani jatsiani engaksï mámaru jatiripka engaksï ambakiti pájperakua ma jatsipka Jeobani jingoni ka engaksï tsípikua jingoni marhuakuenga.  Imecheri ejemplurini jarhuataspti exeni ambe sánderu jukaparhakua ambespi juchiti tsípikuarhu ka parani pʼindeni jorhenguarhini Bibliaeri ambe. Méni engani uérenga aianhpini, sánderuni tsitisïrenga ka tátsekua niáraspka prekursora regularini. Nóteruni méni xáni tsípixapkia ka sési pʼikuarherani kúnguarhikuarhu.

Ísï ma uéxurhini tátsekua mítespka Alexini, ambakiti erachini ma enga sési kámpienga ka enga xénchenga Jeobani ka tsitini aianhpini. Orhejtsïkutiri jarhuajpirispti ka seisi uéxurhini páxaptia marhuani komu prekursori. Ístu niraspti Malaiu, nani enga sánderu aianhpiricha uétarhini japka. Jima úspti misioneruecha jingoni jarhani engaksï ambakiti ejemplu ma íntskupka ka engaksï jarhuatapka para orheta peerani Tata Diosïri Reinuni.

Alex ka ji tembuperaspkachi 2003 jimbo ka májku kʼérichi seguirixaka marhuani komu prekursoricha. Uánikua ambakiti ambechi jorhenguarhiskia ka Jeobajtsïni mámaru ambe jimbo újchakurasti.

Uéxurhini 2009 jimbo pʼímarhinhaspkachi parachi ísï marhuani komueska misionerucha jini Timor Oriental paisi sapichu ma enga Indonesia no iauani jaka. Ískuchi pakaraspka, joperuchi ístu tsípixapka ka chéni. Sinko kutsï jimbo Dili niáraspkachi enga ima paisiri kapitalika.

Jatsispkachi para uánikua ambe jimbo pʼindeni: jima anapu pʼindekuechani, idioma, tʼirekua ka na enga irenhapka jima. Engachi aianhpini jámenga, míteaspkachi uánikuechani engaksï no jatsikuarheripka, engaksï no uánikua ambe jorhenapka ka engaksï kánikua no sési kánhenga. Ístuchi uánikuechani míteaspka engaksï guerra jimbo ka atajperakua jimbo pʼíndirichani pakataapka ka engaksï ístu no sési pʼikuarherenga. *

¡Kánikuajtsïni sési nichesïrendi aianhpikuarhu! Ma jurhiatikua, mítespka Maríani nanaka sapichu ma  enga 13 uéxurhini jatiripka ka enga kánikua kómu pʼikuarherani japka. * Máru uéxurhini nitamasptia enga imeri amamba uarhipka ka kási no exesïrendi imeri táti jémbani. Ísï eska uánikua sapiicha engaksï imeeni jatiripka, María no mítespti ambe enga úpiringa imeri tsípikuarhu. Miásïnga eskarini ma xanhari ueparini aianguspka na enga pʼikuarherani japka. Joperuni ji no sáni kurhangukuspka jimbokani nótkini sési uandasïrenga jima anapu idiomani. Ísï jimbo kómarhispka Jeobani ka kurhakuspka eskarini jarhuatapiringa sési pʼikuastantani. Jimajkani uénaspka Bibliaeri karakatechani máru arhikuantani. Máru uéxurhini tátsekua exespka na enga jurhimbikua mójtakupka Maríeri tsípikuani, na enga jásïpka ka na enga jámenga. Itsï atakuarhisptia ka iásï jorhendaaxaptia máru kʼuiripuechani Bibliaeri ambe. Kʼéri familia ma jatsisti Jeobaeri kúnguarhikuarhu ka sési pʼikuarherasïndi jima jarhani.

Ísïsti Jeoba kánikua újchakuraxati aianhpikuani jini Timor Oriental. Nájkirukaksï uánikua erachicha ka pirenchicha nótki 10 uéxurhini páni jaka engaksï itsï atakuarhika, uánikuechaksï prekursoristia, orhejtsïkuticheri jarhuajpiricha o orhejtsïkuticha. Máteruechaksï imani Ofisinecha jimbo marhuaxati nani enga Tradusirinhaajka publikasionicha ka jarhuajpisïndiksï para tradusiriuani publikasionichani imani idiomecha jimbo enga imani lugari jimbo uandanhajka. Kánikua sési pʼikuarherasïrenga kurhauani engaksï pireni jarhenga tánguarhikuecharhu, exeni na engaksï xáni tsípini jarhenga ka ístu exeni na engaksï Jeobaeri amigu úkuarhini japka.

Kánikuachi ménderueni irekaska Timor Oriental ka eska Australia, joperuchi no nani úpiringa sánderu tsípikua jingoni irekani. Ménichanchi autobusi sapirhaticharhu jatasïrenga nani engaksï kʼuiripuecha junguani jarhengia engaksï nireenga kurucha kʼarhiri ambe piáni ka kánikua berdura ambe merkadurhu uératini. Máru jurhiatikuecha jimbo nirasïrengachi Bibliaeri ambe jorhentpini kʼumanchikua sapirhaticharhu engaksï kánikua aparhikuarhienga, pisu echeririspti ka tsíkatechaksï uirhiiparini jámani jarhasïrendi jimesïsï. Nájkirukachi ménichani ísï úkua jukanchenga, someni eratsesïrenga: “¡Kánikua ambakiti ambesti ixú jarhani!”.

Engani miántajka ióntki anapu ambe, kánikua agradeserikuasïnga juchiti tátichani engajtsïni jánguarhintaka jorhendani Jeobaeri ambe ka jarhuatantsïni asta jiáni jamberi engani ji no xáni jánguarhintenga Jeobani marhuakuni. Ambe enga Proverbios 22:6 uandajka niárasti ísï úkuarhini juchiti tsípikuarhu. Juchiti tátichaksï kánikua sési pʼikuarherasïndi Alex ka jíndeni jimbo kánikuaksï tsípisïndi exeni na engajtsïni Jeoba úrani jaka. 2016 uératini, marhuaxakachi komu sirkuitueri orhejtsïkuti nani enga Australasia anapu Beteli exejka ánchikuarhitani.

No jakajkusïnga eskani antesi no tsitisïrenga aianhpini, jimbokani ¡iásï kánikua tsitisïngia! Kuenta íntskukuarheska eska ma meru jiáni úsïnga tsípikua jingoni irekani, enga iámu mintsita jingoni marhuakujka Jeobani, no arhiparini náki uandanhiatechani jatsiaua. Kánikua tsípikua jingoni irekaska arini últimu 18 uéxurhini jimbo engani Alexini jingoni májku kʼéri marhuakuni jaka Jeobani. Iásï exesïnga eska ísïska ambe enga Dabidi arhipka Jeobani enga uandapka: “Iáminduecha engaksï tʼungini jimbo kuájchakukuarhijka tsípinksï jauati: méntkisïksï uinhachani jauati xáni tsípini [...], ka imecha engaksï xénchajka chíti arhinhakuani tsípiatiksï tʼungini jimbo” (Sal. 5:11).