1. ¿Ambe exesïni Jeoba imecheri engaksï imani marhuakujka?

¡KÁNIKUACHI tsípisïnga míteni eska Jeoba “sési pʼikuarherasïnga imeri ireta jingoni”! (Sal. 149:4). Jeoba exeasïndi juchari ambakiti kualidadichani, ístu exesïndi ambe engachi xáni uáka úni ka jarhuatasïndijtsïni para jucha imeri amigueni. Engachi no méni jurajkuaka imani, ima méntkisï juchantsïni jingoni jauati (Juanu 6:44).

2. ¿Andiksïsï máru erachicha no seguru jarhajki eska Jeoba xénchaasïnga?

² Jamberi nema úpirindi uandani: “Ji míteska eska Jeoba xénchasïnga iámu imeri iretani. Joperu ji, ¿néna seguru jarhaski eskarini xénchasïnga?”. ¿Andiksïsï máru erachicha ini ambe kurhamarhikuarhijki? Ju je exeni ambe enga uandajka Oksana, * enga sapichuetini kánikua no sési nitamakuarhipka: “Engani itsï atakuarhipka ka prekursora úkuarhini, kánikua sési pʼikuarherasïrenga. Joperu 15 uéxurhini tátsekua, uénaspka imani ambe miántani engani no sési nitamakuarhipka. Niáraspka ísï eratseni eskarini Jeoba nóteru jaiapanhentasïrengia ka eskani no jukanchasïrenga parareni ima xénchani”. Máteru prekursora enga Yua arhinhajka ka enga ístu no sési nitamakuarhipka enga sapichuepka, uandantasïndi: “Aiakukuarhespka Jeobani jimbokani uékasïrenga eska ima sési pʼikuarherapiringa, joperu seguru jarhaspka eskarini Jeoba no méni xénchapiringa”.

3. ¿Náki kurhamarhikuechanchi mókuantaua ini jorhenguarhikua jimbo?

³ Májkueni eska i tsimani ambakiti pirenchicha, juchajtuchi úpiringa kánikua xénchani Jeobani joperuchi úkua jukanchani seguru jarhani eskajtsïni Jeoba xénchasïnga. Ini jorhenguarhikua jimbo, mókuantauakachi ini tsimani kurhamarhikuechani: ¿andichisï jatsi para seguru jarhani eskajtsïni Jeoba xénchasïnga? ka ¿ambechi uá úni engachi ísï pʼikuarheraaka eskajtsïni Jeoba no xénchasïnga?

4. ¿Andisï xáni no sési jaki eratseni eskajtsïni Jeoba no xénchasïnga?

⁴ Engachi seguru jauaka eskajtsïni Jeoba xénchasïnga, jánguarhintaakachi para sánderu sési marhuakuni nájkirukachi uandanhiatechani jatsiauaka. Joperu engachi no seguru jauaka, nóchi xáni uinhapiti jauaka (Prov. 24:10). Ka engachi chketakuarhiska, ka nóteru seguru jarhania eskajtsïni Jeoba xénchasïnga, nóchi uáka kuájpikuarhini engajtsïni Noambakiti uékaaka no sési ambe úchini (Efes. 6:16).

5. ¿Ambeksï úkuarhinchasïni máru erachicha engaksï eratsejka eska Tata Diosï no xénchasïnga?

⁵ Máru ambakiti erachichaksï uénaspti ísï eratseni eska Jeoba no xénchaasïnga ka ísï jimbo, nóteruksï xáni mintsikasïndia. Orhejtsïkuti ma enga James arhinhajka, uandantasïndi: “Nájkirukani Beteli japka ka sési pʼikuarherani máteru kúnguarhikua jimbo marhuani enga máteru idiomeripka, joperu no seguru jarhaspka eska Jeoba jiókuarhisïrenga ambe engani ji uénga. Niáraspka kurhamarhikuarhini sini Jeoba kurhaaueni juchiti kómarhikuechani”. Eva enga ístu tiempu kompletueri marhuani jaka, uandantasïndi: “Kuenta íntskukuarhispka eska kánikua no sésiska no seguru jarhani eskajtsïni Jeoba xénchasïnga, jimboka inde ambe úsïnga eskachi nóteru tsípikua jingoni marhuakuakia Jeobani ka nijtuchi jánguarhintani imani ambe úni enga Jeoba uékajka”. Ka Michael enga orhejtsïkutika ka prekursori regulari, uandantasïndi: “Engari eratsejka eska Jeoba no uandanhiasïnga tʼungini jimbo, sánhani arhisïngari jarharini”.

6. ¿Ambechi uá úni engachi uénaaka eratseni eskajtsïni Tata Diosï no xénchasïnga?

⁶ Ambe engaksï i erachicha uandantajka, jarhuatasïndijtsïni kurhanguni eska no sési jarhaska eratseni eskajtsïni Tata Diosï no xénchasïnga. Ka, ¿ambechi uá úni engachi uénaaka eratseni eskajtsïni Tata Diosï no xénchasïnga? Ju je kurhakuni Jeobani eskajtsïni íntskuaka imeri pínandikua ka eska kuájchakuaka juchari mintsitani ka eratsekuani parachi no xáni uandanhiani (Sal. 139:23; nota; Filip. 4:6, 7). Ka ju je miántani eskaksï jarhaska máteru erachicha engaksï ístu jánguarhintani jaka paraksï no ísï eratseni eska Jeoba no xénchaasïnga. Máru ióntki anapu Jeobaeri marhuarichaksï niáraspti ísï pʼikuarherani. Ju je exeni ambechi uá jorhenguarhini apostuli Pablueri ambe.

7. ¿Náki uandanhiatechani jatsiaspi Pablu?

⁷ ¿Xáni uánikua ambechi jatsiski para úni engachi jamberi ísï pʼikuarherajka enajkichi no uá  úni? Apostuli Pablu májkueni pʼikuarheraspti. Ima uandaspti eska no uandanhiaxapka májku kúnguarhikua jimbo, sino iápuru anapu kúnguarhikuechani jimbo (2 Kor. 11:23-28). ¿Kʼéri pʼamenchakuachi ma kámasïni enga újka eskachi no sési pʼikuarheraaka? Pablu kʼéri uandanhiata ma jatsispti, enga ísïpka komueska chekamikua ma, jamberi pʼamenchakua máepti (2 Kor. 12:7-10). ¿Ménisïchi no sési pʼikuarherasïni imani ambe jimbo engachi no sési újka? Pablujtu uánikua xanhari niáraspti ísï pʼikuarherani. Uandaspti eska méntkisï no sési pʼikuarherasïrenga jimboka jatsispka para jánguarhintani imani ambe úni enga sési jaka (Rom. 7:21-24).

8. ¿Ambe jarhuataspti Pabluni paraka seguiripiringa marhuakuni Jeobani nájkiruka uandanhiatechani jatsiapka?

⁸ Nájkiruka iámindu ini ambe nitamakuarhinchapka, Pablu seguirispti marhuakuni Jeobani. ¿Ambe jarhuataspi para ísï úni? Nájkiruka no mirikurhienga ambe enga no sési uénga, mintsikasïrendi euajpintskuani. Ístu mítespti eska Jesusi aiatspespka eska “nákinterku nema enga imani jakajkuaka”, jatsiaka tsípikua para méntkisï (Juanu 3:16; Rom. 6:23). Uákachi seguru jarhani eska Pablu mintsikasïrenga euajpintskuani. Ístu, mintsikasïrendi eska Jeoba uékasïnga puákuantani imechani jamberi engaksï kʼéri pekadu ma úka ka no sésiksï pʼikuarherani indeni ambe jimbo engaksï úka (Sal. 86:5).

9. ¿Ambejtsïni jorhendasïni ambe enga Pablu uandapka ixú Galasia 2:20 jimbo?

⁹ Pablu mintsikasïrendi eska Tata Diosï kánikua xénchasïrenga jimboka axaspka Jesusini para uarhini imani jimbo. Ju je exeni na enga ambakiti uandakuechani jingoni kʼamarhukujka Galasia 2:20 (arhinta je). Pablu uandaspti: “Diosïri Uájpani engareni xáni kánikua uékajka ka enga tsípikua íntspika jíndeni jimbo”. Pablu no ísï eratsesïrendi eska jukari no sési úrispka paraka Tata Diosï nóteru xénchapiringia. No uandaspti: “Kurhangusïnga eska Jeoba xénchaasïnga juchiti erachichani, joperu jíndeni, norini méni uáti xénchani”. Asta miátantaspti i ambe Roma anapuechani: ‘Kristu uarhisti juchantsïni jimbo engachi útasï pekadoripka’ (Rom. 5:8). Tata Diosïri xénchperakua no méni kʼamakurhisïndi.

10. ¿Ambejtsïni jorhendasïni Roma 8:38, 39?

¹⁰ (Arhinta je Roma 8:38, 39). Pablu seguru jarhaspti na enga xáni uinhapitika Tata Diosïri uékperakua. Karaspti eska no ma ambe “uáka úni eskajtsïni Diosï nóteru uékaaka”. Ima mítespti na enga Jeoba xáni tekaakuantapka ireta Israeli anapuechani. Ístu mítespti na enga xáni pʼamojperakua xarhatakupka imani. Enga Pablu ísï uandapka, ini ambesï arhikuekani japti:  “Enga Jeoba axaka imeri Uájpani para uarhini jíndeni jimbo, ¿andisïni no uá seguru jarhani eskarini Jeoba xénchasïnga?” (Rom. 8:32).

11. Nájkiruka Pablu uánikua ambe no sési úpka, ísï eska na uandajka 1 Timoteo 1:12-15, ¿andisï seguru japi eska Tata Diosï xénchasïrenga?

¹¹ (Arhinta je 1 Timoteo 1:12-15). Seguru eska Pablu ménichanisï no sési pʼikuarherenga imani ambe jimbo enga antesi úpka. Ima uandaspti eska ima jindeespka “sánderu kʼéri” pekadori jimboka antede míteni jurhimbikuani, uánikua iretecha jimbo no sési kaaspka kristianuechani. Ónhatarkuarhiaspti ka jurajkuspti parakaksï máteruecha uándikunhapiringa (Uku. 26:10, 11). Eranhaska je eska Pablu apoiarispka paraksï uándikuni temungurhirini ma engaksï kristianuepka ka tátsekua niárani míteni imecheri uájpani ma. ¿Néna pʼikuarherapirini? Pablu pʼamondakuarhisïrendi imani ambe jimbo enga no sési úpka. Mítespti eska no úpiringa mójtakuni imani ambe enga antesi úpka. Joperu seguru jarhaspti eska Kristu uarhispka imani jimbo, jimbosï úpti ísï karani: “Peru Diosïri kóntperatani jimbo, andajkuarhiska ísï jindeeni eskani na jindeekia” (1 Kor. 15:3, 10). ¿Ambechi jorhenguarhisïni? Eskachi jatsiska para seguru jarhani eska Kristu uarhiska mándani arhini juchantsïni jimbo ka indeni jimbochisï újka ambakiti pájperakua ma jatsini Jeoba jingoni (Uku. 3:19). Ambe enga jukaparhakueka para Tata Diosï, jindeesti ambe engachi uáka iásï ka sánderu orhepati, no imani ambe engachi ióntki no sési úpka nájkirukachi Jeobaeri testiguepkia o nótkambe (Is. 1:18).

12. Eska na arhijka 1 Juanu 3:19, 20, ¿ambechi jatsiski para úni engachi niáraska ísï pʼikuarherani eskachi no ma ambe marhuasïnga o eskachi no jukanchaska eskachi xénchanhaaka?

¹² Ménichanisï juchari mintsitajtsïni úpirindi ísï jakajkutarani eskachi no ma ambe marhuasïnga o eskachi no jukanchaska eskachi xénchanhaaka (arhinta je 1 Juanu 3:19, 20).  Ísï jimbo, jamberichi niáraaka eratseni eska tata Jesukristueri uarhikua no uáka maiampini juchari pekaduechani. Engachi niáraska ísï eratseni, ju je miáni eska “Diosï sánderu kʼéris[ka] ka eska juchari mintsita”. Nájkirukachi ísï pʼikuarheraaka eska juchari Táti auandarhu anapu nójtsïni xénchasïnga ka nijtsïni puáchentani, imajtsïni xénchasïndi ka puáchentasïndijtsïni. Jatsiskachi para meru jakajkuni eskajtsïni Tata Diosï xénchasïnga. Ka parachi ísï úni, jatsiskachi para pauani pauani jorhenguarhini imeri Karakatani, méntkisï kómarhini jarhani ka ístu erachicha jingoni jarhani. Ju je exeni andiksïsï xáni jukaparhakue i tanimu ambe.

13. ¿Nénajtsïni jarhuatasïni Tata Diosïri Karakateri ambe jorhenguarhini? (Ístu exe je rekuadruni “ Néna jarhuataasïni Tata Diosïri Karakata”).

¹³ Tata Diosïri Karakateri ambe jorhenguarhini pauani pauani. Engachi ísï úska, sánderuchi sési míteaka na enga jásï kʼuiripueka Tata Diosï ka niáraakachi exeni na engajtsïni xáni xénchajka. Engachi pauani pauani eratsentaska Tata Diosïri Karakatani, jarhuataatijtsïni parachi imani ambe eratseni enga sési jaka (2 Tim. 3:16). Orhejtsïkuti ma enga Kevin arhinhajka, enga ísï pʼikuarherenga enajki no ma ambe jukaparhapi, uandantasïndi: “Engani arhintajka ka eratsentani Salmo 103, jarhuatasïndireni exeni néna enga Jeoba exejka ambe ma ka na engareni Jeoba exejka”. Eva engachi parrafurhu 5 uandaka, uandasïndi: “Enga kʼamarajkia ma jurhiatikua, eratsentani pakarasïnga néna enga Jeoba exejka ambe ma. Inde ambe úsïndi eskani sési pʼikuarhinhiaka juchiti mintsitarhu ka úsïndi eskani sánderuni mintsikaaka Tata Diosïni”.

14. ¿Nénajtsïni jarhuatasïni kómarhikua?

¹⁴ Méntku kómarhini jarhani Tata Diosïni (1 Tes. 5:17). Engachi uénajka amigu úkuarhini nemeri, somenchi uandontskuarhesïnga imani jingoni ka aiangukuarhesïngachi ambe ma. Májkuenisti para Tata Jeobani jingoni. Engachi aiangukuarhijka na engachi pʼikuarhinhijka ka na engachi eratsejka ka ambe engajtsïni uandanhiatajka, xarhatasïngachi eskachi mintsikasïnga imani ka eskachi mítesïnga eskajtsïni xénchasïnga (Sal. 94:17-19; 1 Juanu 5:14, 15). Yua engachi parrafurhu dosi uandaka, uandasïndi: “Engani kómarhikuarhijka Tata Jeobani, jánguarhintasïnga no imani ambejku aiangukuarhini engani imani jurhiatikua jimbo nitamakuarhika, sánderu sési, uénhikuarhesïnga ka aiangukuarhesïnga ambe engani meru pʼikuarhinhijka. Enbesi de ísï exeni komu patronini ma, sánhani arhiska ísï exeni komu Táti ma enga kánikua xénchaajka imeri uájpechani”. (Exe je rekuadruni “¿Arhintaskijtsïa?”).

15. ¿Néna xarhatasïni Jeoba eska uandanhiasïnga mándani juchantsïni jimbo?

¹⁵ Juchari erachichani jingoni jarhani. Imaksï intsïmperata máesti Tata Jeobaeri (Sant. 1: 17). Juchari Táti auandarhu anapu xarhatasïndi eska pendienti pásïnga juchantsïni jimbo, jimbokajtsïni íntskuska erachichani ka pirenchichani enga ísïka eska juchari familia engajtsïni méntkisï xénchani jarhajka (Prov. 17:17). Enga apostuli Pablu Kolosasi anapuechani karakuapka, uandaaspti máru kristianuechani engaksï uinhaperantapka ka sési pʼikuastantani (Kol. 4:10, 11). Tata Jesukristu niáraspti uétarhinchani jarhuajperata ka kánikua jukaparharaspti ka agradeserini engaksï imeri amigu jémbecha jarhuatapka, komu ánjelicha ka kʼuiripuecha (Luk. 22:28, 43).

16. ¿Nénajtsïni jarhuatasïni juchari erachicha parachi sánderu sési pájperani Jeoba jingoni?

¹⁶ ¿Kurhakuasïnchi jarhuajperata juchari erachichani ka jiókuarhisïnchi? Aiangukuarhini erachini ma ambe engajtsïni uandanhiatajka no arhikuekasïndi eskachi debiliska. Sánderu sési, kuájchakukua máesïndi. Ju je eratsentani ambe enga uandajka James engachi parrafurhu 5 uandaka: “Imani amiguechani jatsiani engaksï ambakiti pájperakua ma jatsika Jeobani jingoni, kánikuajtsïni jarhuatasïndi. Engani no sési ambe eratsejka, imechajtsïni tekaantskua jingoni kurhajchasïndi ka miátantasïndijtsïni eskajtsïni xénchasïnga. Imechani jimbo exesïnga eskarini Jeoba xénchasïnga ka eska uandanhiasïnga jíndeni jimbo”. ¡Kánikua jukaparhakuesti eskachi ambakiti amiguechani jatsiauaka kúnguarhikuarhu!

17, 18. ¿Nénchi jatsiski para kasu úkuni ka andi?

¹⁷ Satanasi uékasïndi eskachi nóteru jánguarhintaakia ka eskachi nóteru uákia ambe enga sési jaka. Uékasïndi eskachi ísï eratseaka eskajtsïni Jeoba no xénchasïnga ka eskachi no jukanchaska parajtsïni ima pʼímutantani. Peru inde ambe no ísïsti.

¹⁸ Jeobajtsïni xénchasïndi ka kánikua jukaparharasïndi mándani arhini imeri marhuarichani. Engachi kurhajchaska, méntkisïchi imeri uékperakuarhu jauaka ísï eska Jesusi (Juanu 15:10). Ísï jimbo, nóchi kasu úkuaka Satanasini ni juchari mintsitani engajtsïni uékaaka ísï exerani eskajtsïni Jeoba no xénchasïnga. Sánderu sési, Jeobanchi kasu úkuaka enga ambakiti ambe exejka mándani arhini juchari ambe. Ju je seguru jarhani eska Jeoba kánikua sési pʼikuarherasïnga imeri ireta jingoni ka chánksïni jingontu.