1, 2. ¿Ambeski euajpintskua ka andichisï uétarhinchajki?

ENGA Adani perfektuepka, niáraspti kʼamanharhintani ka indeni jimbo nóteru úsptia irekani para méntkisï nijtu imeri uájpecha. Jimboka Adani uékaparinisï no kurhandirapka jatsispti para maiampintani imeri tsípikua jingoni ka uarhini. Joperu imeri uájpechaksï no kulpa jatsispti (Rom. 5:12, 14). ¿Joperu Jeoba úpirini úni ambe ma para euajpintani kʼuiripuni uarhikueri ka pekadueri? Jo. Enga Adani na pekaripkia, Jeoba sánhani arhispti xarhatani ambe enga úpiringa para pʼímutaantani Adani uájpechani pekadueri ka uarhikueri (Gén. 3:15). Enga na niárapiringia tiempu Jeoba axapirindi imeri Uájpani auandarhu uératini “para íntspini imeri tsípikuani para uánikuechani piántani” o euajpiantani (Mar. 10:45; Juanu 6:51).

² ¿Ambeski euajpintskua? Karakata Griegecha jimbo, jindesti ambe enga Jesusi maiampika para euajpintani ambe enga Adani tsïtapka (1 Kor. 15:22). ¿Andichisï uétarhinchajki? Jimboka eska na uandenga Moisesiri Lei, Jeoba erokuarhisïrendi eska maiampinhapiringa “tsípikua, tsípikua jimbo” (Éx. 21:23, 24). Adani nóteru perfektuesptia. Ísï jimbo, para ísï úni eska Jeoba na kurhajkuarhipka, Jesusi jatsispti para íntspini imeri tsípikuani enga perfektuepka (Rom. 5:17). Ini ambe úparini, niárasïndi jindeeni “Táti para Méntkisï” iáminduecheri engaksï xáni mintsikajka euajpintskuani (Is. 9:6; Rom. 3:23, 24).

3. Eska na uandajka Juanu 14:31 ka 15:13, ¿andisï uékapi Jesusi íntspini imeri tsípikua perfektuni juchantsïni jimbo?

³ Jesusi uékaspti íntspini imeri tsípikuani jimboka kánikua xénchasïnga Táti jémbani ka ístu juchantsïni (arhinta je Juanu 14:31; 15:13). Inde mismu uékperakua úspti eska no méni jurajkupiringa Táti jémbani asta uarhikuarhu jamberi ka eska úpiringa ambe enga Táti jémba uékenga. Ka indeni ambe jimbo niárasti ísï úkuarhini eska Tata Diosï na eratsetini japka para  kʼuiripuecha ka ístu para Echeri. Ini jorhenguarhikua jimbochi exeni jauaka andisï Tata Diosï jurajkupi eska tata Jesukristu no sési kánhapiringa ka uándikunhani. Ístuchi exeaka Bibliaeri karariri ejemplu ma enga kánikua jukaparharenga euajpintskuani. Ka últimu, exenchi jauaka na engachi juchajtu uáka diosmaiamukua íntspintani imani ambe jimbo enga Jesusi ka Jeoba úka juchantsïni jimbo ka na engachi uáka sánderu jukaparharani.

4. Uandanta je néna uarhispi tata Jesukristu.

⁴ Ju je eranhaskani na enga nitamakuarhipka tata Jesukristu últimu jurhiatikua jimbo ixú Echerirhu. Nájkiruka Jesusi úpiringa úraani uánikua ánjelichani paraksï kuájchakuni, jurajkuspti eskaksï Roma anapu sondaduecha jupikapiringa ka no sési kámani (Mat. 26:52-54; Juanu 18:3; 19:1). Kʼuikirhisptiksï látigu ma jingoni enga pʼikurhienga kʼuiripetani. Tátsekua, chkariksï ma páraspti nájkiruka ima iurhiri uéparhani japka. Tata Jesukristu uénaspti antsikuni chkarini asta jima jamberi nani enga uándikunhapiringa. Joperu tátsekua, sondaduechaksï acheetini ma arhispti eska jarhuatapiringa Jesusini imani chkarini páni (Mat. 27:32, TNM). Engaksï na niárapkia jima engaksï uándikupiringa, sondaduechaksï chándukuspti ka chájkuni, ka imeri kʼuétsapikua jimbo, imeri kʼuiripeta sánderu mítakuarhixapti jima engaksï chátapka. Engaksï tata Jesukristueri amiguecha ka amamba uerani japka ka no sési pʼikuarherani, Judea anapu juramutichaksï teresmarhuxapti tata Jesukristuni (Luk. 23:32-38; Juanu 19:25, TNM). Ióni jarhaspti no úni uarhini. Enga ísï cháparhakata japka, úkua jukanchaxapti jirejtani, ísï jimbo, imeri mintsita ka pulmonichaksï jatsispti para kánikua ánchikuarhini. Míteparini eska no jurajkuspka Jeobani, kómarhispti. Tátsekua tʼénksataspti ka uarhispti (Mar. 15:37; Luk. 23:46; Juanu 10:17, 18; 19:30). ¡Xáni enga kómu uarhipka tata Jesukristu, kánikua pʼameraparini ka iatsitakuarhu!

5. Para tata Jesukristu, ¿ambe sánderu no sési jarhaspi ka eska na enga uándikunhapka?

⁵ Joperu para tata Jesukristu sánderu no sési jarhaspti ambe enga jimbo uándikunhapka ka eska na enga uándikunhapka. Arhisptiksï eska no sési ambe uandaspka Tata Diosïri ambe ka imeri nombriri (Mat. 26:64-66). Tata Jesukristu kánikua no sési pʼikuarherasïrendi imani ambe jimbo enga uándikunhapiringa, jimbokaksï kʼuiripuecha arhisïrenga eska no sési ambe uandaspka Tata Diosïri ambe ka erokuarhixapti paraka Táti jémba úpiringa ambe ma para ima no ísï uarhipiringa eska no sési úri ma (Mat. 26:38, 39, 42). ¿Andisï Jeoba jurajkupi paraka imeri Uájpa xáni no sési kánhapiringa ka uándikunhani? Ju je exeni tanimu ambe.

6. ¿Andisï jatsipi para tata Jesukristu chkarirhu ma cháparhatakata uarhini?

⁶ Uénani jámani, tata Jesukristu jatsispti para cháparhatanhani paraka judiuechani nóteru no sési nikuapiringia (Gal. 3:10, 13). Niáraspti no sési nikuani jimbokaksï aiatspespka kurhajchani Tata Diosïri Leini, joperuksï no ísï úspti. Ka imecheri kʼamanharhintskua jimbo enga Adani kéritaapka (Rom. 5:12). Lei enga Tata Diosï íntsaapka Israeli anapuechani, uandasïrendi eska enga kʼuiripu ma no sési jásï ambe úpiringa enga jimbo jatsipiringa para uándikunhani, eska jatsipiringa para ísï úkuarhini ka ménisïksï chkarirhu ma cháparhataasïrendi (Deut. 21:22, 23; 27:26). * Ísï jimbo, enga tata Jesukristu cháparhatanhapka chkarirhu ma, marhuakusïrendi imani mismu iretani enga no jiókuarhipka imani.

7. ¿Ambe máteru ambe jimbo jurajkuspi Tata Diosï paraka imeri Uájpa no sési nitamakuarhipiringa?

 ⁷ Tsimani úni jámani, Tata Diosï jurajkuspti eska imeri Uájpa no sési kánhapiringa para prepararini para ima K’éri Saserdotini. Tata Jesukristu úspti exeni na enga úkua jukaka kurhajchani Tata Diosïni enga ma kʼérati tsʼéjkukuechani jatsiajka. Xáni no sési pʼikuarheraspti enga jamberi jatsipka para “ueparini ka mískuarhiparini” kómarhini Tata Diosïni. Tata Jesukristu kánikua no sési pʼikuastanhaspti, jimbosï míteti néna jarhuataani imechani engaksï tsʼéjkunhajka. Kánikuachi agradesidu jarhaska enga Jeoba imani erakuka para K’éri Saserdotini “engajtsïni uáka pʼamojkuni juchantsïni engachi xáni débilika” (Ebr. 2:17, 18; 4:14-16; 5:7-10).

8. ¿Ambe máteru jimbo jurajkuspi Tata Diosï eska tata Jesukristu tsʼéjkunhapiringa mámaru ambe jimbo?

⁸ Tanimu úni jámani, Jeoba jurajkuspti Jesusini eskaksï kánikua no sési kámapiringa para mókuntani arini kurhamarhikuani enga xáni juparhakueka: ¿Uáksï kʼuiripuecha no méni jurajkuni Jeobani nájkirukaksï kʼérati tsʼéjkukuechani jatsiauaka? Noambakiti uandasïndi eska nómbe, jimboka uandasïnga eskachi interesi jimbosï marhuakujka Tata Diosïni. Ístu, eratsesïndi eskachi no xénchasïnga Jeobani májkueni eska Adani (Job 1:9-11; 2:4, 5). Jeoba seguru jarhaspti eska Jesusi no méni jurajkupiringa, ísï jimbosï jurajkupti eska uánikua tsʼéjkukuechani jatsiapiringa asta uarhikuarhu jamberi. Ísï úparini, xarhataspti eska Noambakiti chkuanderari máeska.

9. ¿Náki ejemplujtsïni íntskuski apostuli Juanu?

⁹ Míteni ambe enga arhikuekajka euajpintskua, úsïndi eskaksï uánikua kristianuecha sánderu mintsikaaka Tata Diosïni. Ka seguirixatiksï aianhpini nájkirukaksï no sési kánhajka ka iónisïksï tekaantastia tsʼéjkukuechani. Ju je exeni apostuli Juanueri ejempluni. Ima aianhpispti jurhimbikueri ambe tata Jesukristueri ka euajpintskueri, jamberi jukari 60 uéxurhinisï. Apostuli Juanu sáno 100 uéxurhini jatirisptia enga Roma anapu juramuti ísï exenga komueska no sési úri ma, jimboka uandantasïrenga “Diosïri uandakuani” ka “aianhpini Jesukristueri ambe”, ka indeni ambe jimbo, isla de Patmosiksï ónhaspti (Jaŋ. 1:9). ¡Ambakiti ejemplujtsïni ma íntskusti jimboka kánikua mintsikaspka Jeobani ka tekaantani!

10. Imani libruecha jimbo enga apostuli Juanu karaaka, ¿néna xarhataspi eska jukaparharasïrenga euajpintskuani?

¹⁰ Imani libruecha jimbo enga Juanu karaka, uandasïndi na enga xáni xénchajka Jesusini ka na enga xáni jukaparharajka euajpintskuani. Imani libruecha jimbo, jukari 100 uelta uandasïndi euajpintskueri ambe o na engajtsïni marhuachejka. Por ejemplu, karaspti: “Enga nema pekadu uáka, jarhasti ma engajtsïni kuájpijka Diosï Tátini japarini, ka jindesti Jesukristu enga jurhimbitku újka” (1 Juanu 2:1, 2). Ístu, apostuli Juanu xarhataspti na enga xáni jukaparhakueka “uandantani Jesukristueri ambe” (Jaŋ. 19:10). Xarharasïndi eska apostuli Juanu kánikua jukaparharasïrenga euajpintskuani. ¿Nénachi uá juchajtu májkueni úni?

11. ¿Ambejtsïni jarhuata parachi no úni imani ambe enga no sési jaka?

¹¹ Ju je jánguarhintani no imani ambe úni enga no sési jaka. Engachi meru jukaparharaska euajpintskuani, nóchi jámaaka eratseni: “Ji uáka úni imani ambe enga no sési jaka ka tátsekua arhiani eskajtsïni puáchentaaka”. Sánderu sési uandaakachi: “Ji no uáka indeni ambe enga no sési jaka, jimboka Jeoba ka Jesusi uánikua ambe úskia jíndeni jimbo”.  Ístuchi uáka kurhakuni Jeobani eskajtsïni uinhapikua íntskuaka ka mintsita jingoni kurhakuni: “Asïjtsïni jurajku eskachi terongutanhaaka” (Mat. 6:13).

12. ¿Nénachi uá úni ambe enga arhijka 1 Juanu 3:16-18?

¹² Ju je xénchaani juchari erachichani. Engachi ísï újka xarhatanchi jarhasïnga eskachi jukaparharasïnga euajpintskuani, jimboka Jesusi no solu juchantsïni jimbojkusï uarhika sino ístu juchari erachicha jimbo. Ka ústi indeni ambe jimboka kánikua xénchaasïnga (arhinta je 1 Juanu 3:16-18). Na engachi kaajka juchari erachichani xarhatasïndi eskachi xénchaasïnga (Efes. 4:29, 31–5:2). Jarhuataasïngachi engaksï pʼamenchani jarhajka o engaksï no sési nitamakuarhini jarhajka, komu desastresi naturalesi ambe jimbo. Joperu ¿nénachi jámaa enga erachi ma úska ambe ma o uandaska ambe ma engajtsïni no sési pʼikuastaaka?

13. ¿Andichisï jatsi para puátspintani?

¹³ ¿Jatanhekuasïnchi imechani engajtsïni no sési pʼikuastajka? (Lev. 19:18). Enga ísïka, ju je úni ambe enga ari konseju arhijka: “Sési kámbera je máteru ka máteruni jingoni ka pʼamojperantsï ka ístu puátsperanta je máteru ka máteruni jingoni ísï eskaksïni Diosï na puáchintaka Kristuni jimbo” (Efes. 5:32). Méntkisï engachi puákuntaska erachini ma xarhatakunchi jauaka juchari Táti auandarhu anapuni eskachi jukaparharasïnga euajpintskuani. ¿Nénachi uá sánderu jukaparharani euajpintskuani?

14. ¿Ambejtsïni jarhuata sánderu jukaparharani euajpintskuani?

¹⁴ Ju je agradeserikuni Jeobani euajpintskuani jimbo. Joanna, pirenchi ma enga 83 uéxurhini jatirikia ka enga India irekaka, uandasïndi: “Eratsesïnga eska kánikua jukaparhakueska euajpintskueri ambe uandani juchiti kómarhikuecharhu ka diosmaiamukua íntspintani indeni jimbo”. Engachi kómarhini jauaka Jeobani, ju je eratsentani imani ambe engachi no sési úka imani jurhiatikua jimbo, ka ju je kurhakuni eskajtsïni puáchintaaka. Joperu engachi sánderu k’éri ambe no sési úka, ju je kurhakuani orhejtsïkutichani eskajtsïni jarhuataaka. Imajtsïni kurhajchaati, ka uékperakua jingoni konsejujtsïni íntskuati Biblia jingoni. Ístuksï kómarhikua uáti juchantsïni jingoni parakajtsïni Jeoba puáchintaaka tata Jesukristueri uarhikua jimbo parakachi ménderu sési pájperantaaka Jeobani jingoni (Sant. 5:14-16).

15. ¿Andichisï jatsi para arhutani tiempu para arhintani ka eratsentani euajpintskueri ambe?

¹⁵ Ju je eratsentani euajpintskueri ambe. Pirenchi ma enga 73 uéxurhini jatirikia ka enga arhinhajka Rajamani, uandasïndi: “Engani  arhintajka na enga xáni no sési kánhapka tata Jesukristu, uerasïnga”. Juchajtuchi úpiringa kánikua no sési pʼikuarherani engachi eratsentajka na enga xáni no sési nitamakuarhipka Tata Diosïri Uájpa. Joperu engachi sánderu eratsentaaka ambe enga úpka tata Jesukristu juchantsïni jimbo sánderuchi xénchaaka imani ka imeri Táti jémbani. Parachi úni ísï úni, ¿andichisï no sánderu jorhenguarhijki euajpintskueri ambe juchari jorhenguarhikuarhu?

16. ¿Nénajtsïni marhuachesïni jorhendaani máteruechani euajpintskueri ambe? (Exe je imajenini enga uénakuarhu jaka i rebistarhu).

¹⁶ Ju je jorhendaani máteruechani euajpintskueri ambe. Méni engachi uandontskuarhekuauaka máteruechani euajpintskueri ambe, sánderuchi jukaparharasïnga. Ambakiti publikasionichanchi jatsiaska para jorhentpini andisï Jesusi jatsipi para juchantsïni jimbo uarhini. Por ejemplu, uákachi úrani jorhenguarhikua 4 enga arhinhajka “¿Néski tata Jesukristu?”, foietueri Ambakiti ambe enga Tata Diosïrika. O ístu, uákachi úrani kapitulu 5 librueri ¿Ambejtsïni jorhendasïni Biblia?, enga arhinhajka “Euajpintskua, sánderu ambakiti regalu Tata Diosïri”. Ka sánderuchi jukaparharasïnga euajpintskuani engachi mándani uéxurhini nirajka miántani tata Jesukristueri uarhikuani ka engachi tsípikua jingoni pʼímarhiajka máteruechani paraksï májkueni úni. ¡Xáni enga k’éri kóntperata máeka engajtsïni Jeoba íntskuka sésikua parachi jorhendaani máteruechani imeri Uájperi ambe!

17. ¿Andisï euajpintskua sánderu ambakiti intsïmperata máe enga Tata Diosï íntsaaka kʼuiripuechani?

¹⁷ Seguruchi jarhaska eskachi jatsiska para mámaru ambe jimbo jukaparharani euajpintskuani ka agradesidu pʼikuarherani. Euajpintskua jimbo, úsïngachi ambakiti pájperakua ma jatsini Jeoba jingoni nájkirukachi kʼamanharhintstika. Euajpintskua jimbo, kʼamajkunhaati iámindu ambe enga Noambakiti xáni újka (1 Juanu 3:8). Ístu niáraati ísï úkuarhini eska Tata Diosï na uékenga uénakuarhu, eska Echeri niáraaka paraisu máeni ka eskachi iáminduecha xénchaaka ka marhuakuni. Ísï jimbo, ju je exeni pauani pauani nénachi uá xarhatani eskachi agradesidu jarhaska euajpintskua jimbo, sánderu ambakiti intsïmperakua ma enga Tata Diosï íntsaaka kʼuiripuechani.