1, 2. ¿Náki ejemplujtsïni jarhuatasïni kurhanguni ambe enga arhikuekajka 1 Pedru 2:21?

JU JE ERATSENI eskachi grupu ma jingoni niraxaka jimesïsï enga niebi jaka ka peligru jarhani. Kʼuiripu ma jingonchi niraxaka enga sési miiuka ka enga imeri jantsiricha jingontsïni rastruechani jurajkuchipani jaka. Ma repentkuchi nóteru exesïngia, joperuchi no chérakuarhisïnga. Iámu grupuchi jánguarhintasïnga imeri rastruni chúngumani.

² Sáno májkueni, kristianu jurhimbitichachi jimesï jámaxaka enga kánikua peligru jaka ini parhakpinirhu. Joperujtsïni Jeoba íntskusti imeri Uájpani tata Jesukristuni, parakachi ísï jámaaka eska ‘ima na jámapka’ (1 Ped. 2:21). Seguni eska na uandajka libru ma enga Bibliaeri ambe uandajka, Pedru terukutantaxapti Jesusini kʼuiripuni ma jingoni enga máteruechani orhekupajka ka májkueni eska ima kʼuiripu enga grupuni orhekupani japka, Jesusijtu jurajkusti rastruni nani engachi ísï uáka chúngumani. Peru, ¿ambe arhikuekasïni jimesïsï atastani enga Jesusi nika?, ¿andichisï jatsi para ísï úni? ka ¿nénachi uá ísï úni?

3. ¿Ambe arhikuekasïni jimesïsï atastani enga nema nika?

³ ¿Ambe arhikuekasïni jimesïsï atastani enga nema nika? Bibliarhu, uandakuecha xanharani ka jantsiri arhikuekasïndiksï ambe enga úka nema imeri tsípikuarhu (Gén. 6:9; Prov. 4:26). Kʼuiripueri ejemplu úpirindi ísïni komueska rastru enga imeri jantsiricha jimbo jurajkupajka, ísï jimbo jimesïsï atastani enga kʼuiripu ma nika arhikuekasïndi májkueni jámani eska ima.

4. ¿Ambe arhikuekasïni jimesïsï atastani enga Jesusi nika?

⁴ Jimajkani, ¿ambe arhikuekasïni jimesïsï atastani enga Jesusi nika? Arhikuekasïndi májkueni jámani eska ima. Karakatarhu enga i jorhenguarhikua pʼitakata jaka, apostuli Pedru, Jesusiri  ambakiti ejemplueri uandaspti na enga ima tekaantaapka uandanhiatechani. Peru uánikua máteru Jesusiri ejempluecha jarhasti engachi úpiringa chúngumani (1 Ped. 2:18-25). Ambe enga úpka ka uandani imeri tsípikuarhu, ejemplu máesti para jucha.

5. Uandanta je andichisï uá ísï jámani eska Jesusi na jámapka nájkirukachi kʼamanharhintstika.

⁵ ¿Nájkirukachi kʼamanharhintstika uáchi ísï jámani eska Jesusi na jámapka? Jo. Ju je eratsentani eska apostuli Pedru no uandaspka eskachi meru ísï úpiringa eska Jesusi, sino eskachi jánguarhintapiringa xáni eskachi xáni úpiringa. Engachi ísï úska, ísïchi úni jauaka eska apostuli Juanu uandapka “ísï jámani eska” Jesusi “na jámapka” (1 Juanu 2:6).

6, 7. ¿Andichisï uá sési pájperani Jeobani jingoni engachi ísï jámaska eska Jesusi na jámapka?

⁶ Engachi májkueni jámaaka eska Jesusi, ambakiti pájperakuachi ma niáraaka jatsini Jeobani jingoni. ¿Andichisï ísï uandajki? Jimbokajtsïni Jesusi ambakiti ejemplu ma jurajkuchispka parachi ísï irekani eska Tata Diosï na jaiapanhintajka (Juanu 8:29). Jeoba kánikua sési pʼikuarheraati engachi ísï jámaska eska Jesusi na jámapka. Ístuchi seguru jarhaska eska Jeoba andarhierauaka imechani engaksï jánguarhintajka imeri amigueni (Sant. 4:8).

⁷ Tsimani úni jámani, Jesusi meru ísï úspti eska imeri Táti jémba na úpka. Ísï jimbosï úpti uandani: “Ima engareni exeka jíndeni, exesti Diosï Tátini” (Juanu 14:9). Engachi májkueni jámajka eska Jesusi ka májkueni kámpini, ísïchi úni jarhasïnga eska Jeoba. Por ejemplu, uékperakua jingoni jarhuataspti kʼuiripuni ma enga lepra pʼamenchenga ka kurhangukuspti uarhiitini ma enga kʼéri pʼamenchakua ma kámenga ka kánikua p’amojkuaspti imechani engaksï uarhirakuarhipka nemani (Mar. 1:40, 41; 5:25-34; Juanu 11:33-35). Engachi sánderu jánguarhintaska ísï jámani eska Jeoba, sánderuchi sési pájperaaka imani jingoni.

8. Uanda je andichisï uá juchajtu “andani parhakpinini” engachi májkueni úska eska Jesusi.

 ⁸ Engachi májkueni úska eska Jesusi nóchi jurajkuaka eskajtsïni i parhakpini ójkutaaka. Últimu chúrikua jimbo enga Jesusi ixú Echerirhu japka, úspti uandani: “Ji andaska parhakpinini” (Juanu 16:33). Ambe enga arhikuekani japka, jindeesti eska parhakpini anapu ambe, no úspka eska úpiringa o eratseni o ísï jámani eska parhakpini anapuecha. Ima jánguarhintaspti para no mirikurhini eska jurhaspka ixú Echerirhu: Para pímbinhajkuntani Jeobaeri nombrini. ¿Ka juchaia ambechi uá úni? Uánikua ambe jarhasti engajtsïni úpiringa ójkutani. Joperu engachi jucha jánguarhintaska imani ambe úni enga Jeoba uékajka májkueni eska Jesusi, juchajtuchi uáka májkueni “andani parhakpinini” (1 Juanu 5:5).

9. ¿Ambechi jatsiski para úni parachi no kéndikuni imani xanharurhu enga pájpijka tsípikuarhu enga jindeeka para méntkisï?

⁹ Engachi ísï jámaska eska Jesusi na jámapka, uákachi irekani para méntkisï. Enga tumbi jatsikuarheri ma kurhamarhipka Jesusini ambe jatsispi para úni para irekani para méntkisï, ima arhispti: “Júrini chúxapuni” (Mat. 19:16-21). Jesusi i ambe arhiaspti máru judiuechani engaksï no jakajkuenga eska ima Kristuespka: “Juchiti karichichajtsïni [...] chúxapusïndi, ka jí íntsaasïnga tsípikua para méntkisï” (Juanu 10:24-29). Ka Nikodemuni enga Sanedrinirhu japka enga uékenga míteni ambe enga Jesusi jorhentpienga, arhispti eskaksï iámindu imecha engaksï imani mintsikapiringa jatsipirindiksï tsípikua para méntkisï (Juanu 3:16). Engachi ísï úska eska Jesusi na jorhentpipka imeri uandakuecha jimbo ka imeri úkuecha jimbo, xarhatanchi jauaka eskachi mintsikasïnga imani ka nóchi kéndikuni jauaka imani xanharurhu enga pájpijka tsípikuarhu enga jindeeka para méntkisï (Mat. 7:14).

10. ¿Ambechi jatsiski para úni parachi sánderu sési míteni Jesusini? (Juanu 17:3).

¹⁰ Parachi úni seguirini ísï jámani eska Jesusi na jámapka, orhetachi jatsiska para míteni (arhinta je Juanu 17:3). Imani míteni arhikuekasïndi seguirini jarhani jorhenguarhini imeri ambe. Por ejemplu, na enga jásïka, na enga eratsejka ka imeri juramukuechani. Iá sea engachi ióni páni jakaia marhuakuni Jeobani o nótki xáni, jatsiskachi para jánguarhintani seguirini jarhani míteni Jeobani ka imeri Uájpani.

11. ¿Ambeksï arhisïni tʼámu Ebanjeliuecha?

¹¹ Jeobajtsïni kánikua xénchasïndi, ísï jimbosï Karakata jurajkuati tʼámu Ebanjeliuechani parachi jucha sánderu míteni imeri Uájpani. Íksï Ebanjeliuecha uandantasïndi tata Jesukristueri irekueri ka imeri aianhpikueri ambe. Ístu ambe enga úka, ambe enga uandaka ka na enga p’ikuarherenga. I tʼámu libruechajtsïni jarhuatasïndi eratsentani Jesusiri ejempluni  (Ebr. 12:3). Ícha jimbochi exesïnga na enga jámenga Jesusi. Engachi jucha niáraska jorhenguarhiani ini Ebanjeliuechani, uákachi sánderu sési míteni Jesusini ka uákachi ísï jámani eska ima na jámapka.

12. ¿Ambechi uá úni parajtsïni sánderu marhuacheni ima ambe engachi arhintaaka Ebanjeliuecharhu?

¹² Parakajtsïni marhuacheaka ambe engachi arhintajka Ebanjeliuecharhu no solu uétarhisïndi arhiantani, sino ístu arhutani tiempu parachi sési jorhenguarhini ka eratsentani ambe engachi arhintajka (terukutanta je Josué 1:8 jingoni). Ju je exeni tsimani ambe engajtsïni jarhuataaka parachi eratsentani ka úni ambe engachi arhintaaka Ebanjeliuecharhu.

13. ¿Ambechi uá úni parachi eranhaskani ambe engachi arhintani jauaka Ebanjeliuecharhu?

¹³ Orheta, ju je eranhaskani ambe engachi arhintani jaka Ebanjeliuecharhu. Ju je juchari eratsekuani úrani parachi exeni, kurhaani ka pʼikuarherani ambe enga úkuarhini japka imani tiempuni jimbo. Ístujtsïni kánikua jarhuataati jirinhantani informasioni publikasionicharhu engajtsïni Jeobaeri kúnguarhikua íntsaajka. Ka exenchi ambe enga arhijka antesi ka ístu tátsekua ima amberi engachi jorhenguarhini jaka. Ju je sánderu informasioni jirinhantani kʼuiripuecheri, lugaricheri ka ístu ima amberi enga úkuarhini japka jiájkanisï. Engachi arhintani jauaka ambe ma engaksï máteru Ebanjeliuecharhu jimbo uandajka, ju je terukutantani ka jamberichi uáka jorhenguarhini ambe ma enga karari ma uandapka ka máteru nómbe.

14, 15. ¿Ambechi jatsiski para úni parachi ísï úni eskaksï na arhijka Ebanjeliuecha?

¹⁴ Tsimani úni jámani, jatsiskachi para ísï úni eskaksï na uandajka Ebanjeliuecha (Juanu 13:17). Engachi na sési jorhenguarhiakia ambe enga arhijka Ebanjeliu ma, ju je kurhamarhikuarhini: “¿Amberini jorhendasïni i ambe? ¿Néna úpirini úrani parani jarhuataani máteruechani?”. Tátsekua ju je eratseni néni úpirini jarhuatani i ambe engachi arhintaka ka jiáni enga sési jauaka, ju je iatsitakuarhu ka uékperakua jingoni aianguni ambe engachi jorhenguarhika.

 ¹⁵ Ju je exeni ejemplu ma engajtsïni jarhuataaka ísï úni eskaksï na uandajka inde tsimani konsejuecha. Orhetachi exeaka ambe enga Biblia uandajka uarhiiti tsïndiri enga pobripka enga Jesusi exepka templurhu.

16. Uanda je ambe enga uandajka Markusʌ 12:41 eska úkuarhixapka.

¹⁶ Eranhaskani ima ambe engachi arhintani jauaka (arhinta je Markusʌ 12:41). Ju je eranhaskani ambe enga úkuarhini japka. 11 de nisanisti uéxurhini 33 jimbo ka nóteru jamberi ma semana kueratasïndia para Jesusi uándikuanhani ka relijioniri anapu orhejtsïkutichaksï no jurajkusïndi para aianhpini ka tsʼéjkuxatiksï Jesusini. Máteruechaksï kurhamarhisti né sésikua íntskuski para imani ambe úni ka máteruechaksï kurhamarhikuechani úkuaxati parakaksï chkuanderakua jimbo jupikaaka (Mar. 11:27-33; 12:13-34). Tátsekua Jesusi máteru nani ísï nirasïndi templurhu, jamberi jima enga ísï mítekateka komueska nanakecheri patiu. Úsïndi exeni nani engaksï kʼuiripuecha tumina jatsirajka patiurhu. Uaxakasïndi ka uénasïndi exeni kʼuiripuni sentabu jatsirani jarhani ka ístu jatsikuarherichani engaksï uánikua monedechani jatsirani jaka. Jamberi Jesusi no iauani jati ka úni jati kurhaani na engaksï kurhakuarhini jaka monedecha.

17. ¿Ambe úspi uarhiiti tsïndi pobri enga Markusʌ 12:42 uandajka?

¹⁷ (Arhinta je Markusʌ 12:42). Tátsekua, Jesusi exesïndi uarhiiti tsïndini ma enga xáni pobrika (Luk. 21:2). Kánikua úkua jukanchajti, jamberi no jatsiti sentabu ni para úni nitamakuarhini. Joperu jima andaparhakusïndi engaksï kʼuiripuecha tumina jatsirajka ka jánguarhintasïndi paraka no nema exeaka ka tsimani moneda sapirhatichani jatsiraasïndi engaksï no jamberi kurhaakuarhijka engaksï andanhierajka. Joperu Jesusi k’oru mítesïndi na enga xáni jatsirajka, tsimani leptonichani. Imani tiempuecha jimbo, íksï jindeespti monedecha engaksï no xáni jukaparhapka, no jamberi andangusïrendi ni ma pájarituni ma piáni enga sánderu no jukaparhapka para tʼireni.

18. Seguni eska na arhijka Markusʌ 12:43, 44, ¿ambe uandaspi Jesusi ima amberi enga uarhiiti tsïndi íntspipka?

¹⁸ (Arhinta je Markusʌ 12:43, 44). Jesusi ísku pakarasïndi exeparini ambe enga újka uarhiiti tsïndi enga xáni pobrika. Ísï jimbo, uandajpaasïndi imeri chúxapatichani ka arhiasïndi: “Inde uarhiiti tsïndi enga xáni pobrika, sánderu kánikua jatsiras[ti] ka eska iáminduecha”. Tátsekua arhiasïndi: “Jimboka iáminduecha [ka sánderu imecha engaksï rikueka] imanisï jatsirajka engaksï sobrarinchenga, peru inde uarhiiti nájkiruka xáni pobrika, jatsirasti iámindu eska xáni jatsikuarhipka para nitamakuarhitarani”. Indeni jurhiatikua jimbo enga inde ambakiti uarhiiti iámu sentabu jatsirapka enga xáni kámani japka, xarhataspti eska mintsikasïrenga eska Jeoba kuidaripiringa (Sal. 26:3).

19. ¿Ambechi uá jorhenguarhini ima amberi enga Jesusi uandapka uarhiiti tsïndiri enga pobripka?

¹⁹ Ísï úni eskachi na jorhenguarhijka. Ju je kurhamarhikuarhini: “¿Amberini jorhendasïni ima ambe enga Jesusi uandapka uarhiiti tsïndiri enga pobripka?”. Ju je eratsentani imeri ambe. Ima uékapirindi sánderu ambe íntskuni Jeobani. Joperu íntskuspti na enga xáni úpka; sánderu ambakiti ambe íntskuspti Jeobani. Ka Jesusi mítespti eska inde ambe enga ima íntspipka, kánikua jukaparhakua ambespka para imeri Táti. Í ambejtsïni ambakiti ambe jorhendasïndi: eska Jeoba kánikua jaiapanhentasïnga engachi sánderu ambakiti ambe íntskuaka, eskachi marhuakuaka iámu juchari mintsita ka tsípikua jingoni (Mat. 22:37; Kol. 3: 23). Jeoba sési pʼikuarherasïndi engachi jánguarhintajka íntskuni xáni eskachi xáni uáka. Ka engachi úrajka juchari tiempu ka juchari uinhapikua para imani k’éri ambe arhini, por ejemplu aianhpikuarhu ka engachi nirajka tánguarhikuecharhu.

20. ¿Nénachi uá úrani ambe engachi jorhenguarhika uarhiiti tsïndiri enga pobripka? Uandanta je ejemplu ma.

²⁰ ¿Nénachi uá úrani ambe engachi jorhenguarhika ima uarhiitiri enga tsïndipka? Ju je eratsentani nénachi uá jarhuataani máteruechani engachi arhiaska eska Jeoba jaiapanhentasïnga ima ambe engaksï úni jaka. Úpiringachi eratseni pirenchini ma enga jatirikia ka enga no sési pʼikuarherajka jimboka nóteru úsïngia xáni ambe úni eska na uénga aianhpikuarhu. O ístuchi úpiringa eratseni erachini ma enga pʼamenchani jaka ka enga nóteru újkia nirani iámindu tánguarhikuecharhu ka enga ini ambe jimbo no sési pʼikuarherajka. Uákachi jarhuataani engachi arhiaska ambe ma enga uinhaperantauaka (Efes. 4:29). Ju je aianguani ambe engachi jorhenguarhika ima uarhiitiri enga tsïndipka ka enga kánikua pobripka. Engachi aianguaska i ambe imaksï miántaati eska Jeoba kánikua jukaparharasïnga ambe engaksï ima úni jaka (Prov. 15:23; 1 Tes. 5:11). Engachi felisitariuaska máteruechani imani ambe jimbo engaksï úni jaka, nájkirukaksï ima ísï exeaka eska sántku ambeska, májkuenchi úni jauaka eska tata Jesukristu.

21. ¿Ambejtsï eratsetixaki úni?

²¹ Kánikuachi sési pʼikuarherasïnga míteni eska Ebanjeliuechaksï uánikua ambe uandasïnga Jesusiri ambe parachi juchajtu májkueni jámani. Sési japirindi eskachi jucha jánguarhintapiringa jorhenguarhini o juchari familia jingoni ambe engaksï Ebanjeliuecha arhijka. Peru para i ambejtsïni marhuacheni, jatsiskachi para eranhaskani ambe enga úkuarhini japka jiáni ka eskachi uáka ambe engachi jorhenguarhiaka. Aparte dechi úni ambe enga Jesusi úpka, ístu kánikua jukaparhakuesti kurhaani ambe enga uandapka. Máteru jorhenguarhikua jimbo, exeakachi ambechi uá jorhenguarhini ima amberi enga Jesusi uandapka jiáni enga chaparhatakata japka.