JUKARI uandanhiani jarhani uaati úni eskachi niáraaka no sési pʼikuarherani (Prov. 12:25). ¿Ménisïjtsï niáraski ísï pʼikuarherani? ¿Ísïjtsï pʼikuarherasïni enajkijtsï meru nóteru uaaia? Enga ísïika, nójtsï chájkusï ísï pʼikuarherajka. Uánikuechachi kuidarixaka nemani enga pʼamenchani jaka, uarhiranchanchi nemani, no sésichi úkuarhinchani desastre naturali ma jimbo, ochi nitamakuarhini ambe ma jimbo engachi ísï exejka enajkichi nóteru uaaia orhepani uérani. ¿Ambejtsïni uaa jarhuatani parachi no jukari uandanhiani jarhani? a

Rei Dabidiri ejemplujtsïni uaati jarhuatani parachi no jukari uandanhiani jarhani. Ima uánikua no sési ambe nitamakuarhispti ka asta sáno uarhispti (1 Sam. 17:34, 35; 18:10, 11). ¿Ambe úspi para no jukari uandanhiani jarhani? ¿Nénachi uaa májkueni úni eska ima?

Dabidi uánikua problemechani jatsiaspti. Ju je exeni ambe enga úkuarhipka enga rei Saúlini sïpakuarhikuni japka jimboka ima uékasïreenga uándikuni. Enga Dabidi ka imeeri sontaduecha kʼuanhatsentapka guerrarhu ma uératini, exesptiksï eska imeecheri ikiatspiticha sïpakuaspkaksï ambe engaksï jatsikuarhepka, kurhirakuasptiksï kʼumanchikuechani ka paasptiksï imeecheri familiechani. ¿Ambe úspi Dabidi? Biblia uandantasïndi: “Dabidi ka imeeri sontaduechaksï pʼíaraspti kánikua uerani. Xánksï uéraspti engaksï jamberi nóteru ueengia uerani”. Joperu ístu, ima achamasïcha enga Dabidi mintsinharhiauenga, uandasïreendiksï “eskaksï tsakapkuerapiringa” (1 Sam. 30:1-6). Dabidi tanimu kʼérati uandanhiatechani jatsiaspti: imeeri familia úpirindi no sési ambe úkuarhinchani, imeeri sontaduechaksï arhispti eskaksï uándikupiringa ka rei Saúlijtu uékasïreendi uándikuni. ¿Úsïntsï eranhaskani na enga xáni uandanhiani japka Dabidi?

Peru, ¿ambe úspi Dabidi? Jirejiresï “kurhakuspti Jeobani imeeri Tata Diosïni eska uinhaperantapiringa”. ¿Ka néna ísï úspi? Dabidi pʼindespti kómarhini Tata Diosï Jeobani para jarhuajperata kurhakuni ka eratsentasïreendi na enga jarhuatapkia ióntki (1 Sam. 17:37; Sal. 18:2, 6). Dabidi mítespti eska uétarhinchasïreenga eska Tata Diosï jarhuatapiringa. Ísï jimbo, kurhamarhispti ambe enga jatsipka para úni. Enga Tata Diosï Jeoba na mókukuntapkia Dabidini, ima jirejiresï úspti ambe enga arhipka. Ka indeni ambe jimbo Tata Diosï újchakuraspti Dabidini ka imeeri sontaduechani ka ísïksï úspti juánguani imeecheri familiechani ka ambe engaksï imeecha jatsikuarhepka (1 Sam. 30:7-9, 18, 19). ¿Exeskijtsï tanimu ambe enga Dabidi úpka? Kómarhispti Tata Diosï Jeobani para jarhuajperata kurhakuni, eratsentaspti na enga jarhuatapkia Tata Diosï ka úspti ambe enga ima arhipka. ¿Nénachi uaa májkueni úni eska Dabidi?

1. Kómarhiakachi Tata Diosïni. Engachi ueenaka uandanhiani jarhani, uaakachi kómarhini Tata Diosï Jeobani parakajtsïni jarhuataka míteni ambe úni. Engachi aiangukuarhiaka iámindu ambe engajtsïni uandanhiatajka, sésichi pʼikuarherantaaka. Ka engachi no uaaka iámindu ambe aiangukuarhini, uaakachi kómarhikua sapichu ma úni. Méni engachi arhijka Tata Diosï Jeobani eskajtsïni jarhuataaka, xarhatanchi jarhasïnga eskachi májkueni mintsikasïnga eska Dabidi. Ima uandaspti: “Tata Diosï Jeoba jindeesti juchiiti kʼerenda, juchiiti uinhapikua, juchiiti pʼímutantspiti. Juchiiti Tata Diosï jindeesti juchiiti kʼerenda nani engani ji kuájchakukuarhijka” (Sal. 18:2). ¿Meru marhuasïni kómarhini Tata Diosïni? Prekursora ma enga Kahlia arhinhajka uandasïndi:  “Engani na kómarhijkia Tata Diosïni nóteruni xáni uandanhiasïngia. Kómarhikuarini jarhuatasïndi parani ísï eratseni eska Tata Diosï Jeoba ka para sánderuni mintsikani imani. Ísïisti, kómarhikua ambakiti regalu máesti Tata Diosïri engajtsïni jarhuatajka no xáni uandanhiani jarhani”.

2. Eratsentaakachi. Engajtsï miántajka ambe engajtsï ióntki nitamakuarhika, ¿miásïntsï ambe ma engajtsï no úpiringa orhepani uérani engaksïni Tata Diosï no jarhuatapiringa? Engachi eratsentajka na enga Tata Diosï Jeoba jarhuatapka imeeri marhuarichani ka na engajtsïni jarhuatajka juchantsïntu, sánderuchi mintsikasïnga imani ka sésichi pʼikuarherantasïnga (Sal. 18:17-19). Orhejtsïkuti ma enga Joshua arhinhajka, uandasïndi: “Karakata jatsiaska iámindu imani kómarhikuechani engareni Tata Diosï mókuchiantaka. Ísï úsïnga miántani ambe engani kurhakupka ka na engareni ima íntskupka ambe engani meru uétarhinchani japka”. Engachi eratsentajka ambe enga xáni úkia Tata Diosï Jeoba juchantsïni jimbo, uinhapikuarhintasïngachi parachi seguirini jánguarhintani jarhani no xáni uandanhiani.

3. Uaakachi ambe ma. Ante de erakuni ambe engachi uaaka engachi nitamakuarhini jauaka ambe ma, uaakachi Bibliani arhintani jimboka jimini jarhaska sánderu ambakiti jarhuajperata (Sal. 19:7, 11). Uánikuechaksï exestia eska engaksï jirinhantaska informasioni bersikulueri ma, sánderuksï sési mítesïndi na enga marhuakuauaka imeecheri tsípikuarhu. Jarrod, enga orhejtsïkutiika uandasïndi: “Engani sánderu informasioni jirinhantajka bersikulueri ma, sánderuni sési kurhangusïnga. Ka inde amberini jarhuatasïndi kurhanguni ambe engareni Tata Diosï Jeoba uéjka arhini, ambe engareni arhijka mintsitarhurini niárachesïndi ka jánguarhintasïnga úni ambe enga ima jaiapanhentajka”. Engachi Bibliarhu jirinhantaska Tata Diosï Jeobaeri jarhuajperatani ka kurhajchani imeeri juramukuechani, jarhuataatijtsïni parachi no xáni uandanhiani jarhani.

Dabidi sési mítespti eska para no jukari uandanhiani jarhani, uétarhinchasïreenga eska Tata Diosï Jeoba jarhuatapiringa. Ka jimboka kánikua jukaparharasïreenga na enga ima jarhuateenga, ini ambe uandaspti: “Tata Diosïri uinhapikua jingoni úsïnga kʼéri barda ma jimbo karhanharhikuni”. Ka ístu uandaspti: “Tata Diosï jurhimbiti úsïndi eskani ménderu uinhapikuarhintaaka” (Sal. 18:29, 32). Jamberichi eratseaka eskaksï juchaari uandanhiatecha ísïiska komueska bardecha engachi no uaaka karhanharhikuani, peruchi uaaka orhepani uérani Tata Diosï Jeobaeri jarhuajperata jingoni. Engachi kómarhiska Tata Diosïni parajtsïni jarhuatani, engachi eratsentaska iámindu ambe enga xáni úkia juchantsïni jimbo ka engachi ísï úska ambe ma eska ima na uékajka, uaakachi seguru jarhani eskajtsïni íntskuaka uinhapikua ka jánhaskakua parachi no jukari uandanhiani jarhani.