SEMANA 18
Ju je exeni ambe engachi uaaka úni parachi sánderu marhuakuni Tata Diosïni
“Méntku jauena eratseni ini ambe, ka mintsita jingoni ísï ú, paraka xarharaaka iáminduechani japarini eskari seguirixaka para orhepani” (1 TIM. 4:15).
PIREKUA 84 Ju je marhuani nani enga uétarhiaka
AMBE ENGACHI EXEAKA a
1. ¿Ambechi uaa úni parachi sánderu sési marhuakuni Tata Diosïni?
KRISTIANUECHACHI kánikua xénchasïnga Tata Diosï Jeobani ka uékasïngachi marhuakuni xáni eskachi xáni uaaka. Ka para ísï úni jatsiskachi para exeni ambechi uaa úni parachi sánderu sési marhuakuni imani, komu sánderu ambakiti kristianu máeni, sánderu sési úni ambe ma ka exeni na engachi uaaka jarhuataani máteruechani.
2. ¿Andichisï jatsipirini para exeni ambechi uaa úni parachi sánderu marhuakuni Tata Diosïni ka jánguarhintani ísï úni?
2 ¿Andichisï jatsi para exeni ambechi uaa úni parachi sánderu marhuakuni Tata Diosïni ka jánguarhintani ísï úni? Jimbokachi uékasïnga jaiapanherantani juchaari Taatini enga kánikua xénchpetiika. Ima kánikua sési pʼikuarherasïndi engachi úrajka ambe engachi jorhenaka úni parachi imani marhuakuni. Ístuchi uékasïnga sánderu ambakiti kristianu máeni parachi úni jarhuataani máteru erachichani (1 Tes. 4:9, 10). No arhiparini na engachi xáni tiempu páni jakaia jurhimbikuarhu, iáminduechachi jatsiska para jánguarhintani sánderu ambakiti kristianu máeni. Ju je exeni nénachi uaa ísï úni.
3. ¿Pablu náki konsejuechani íntskuaspi Timoteuni? (1 Timoteo 4:12-16).
3 Timoteu tumbiispti enga apostoli Pablu karakupka primeru kartani enga imeeri nombri jukaka, peru ima orhejtsïkutisptia ka uánikua ambe jorhenguarhisptia úni. Joperu útasï Pablu arhispti eska seguiripiringa jánguarhintani sánderu sési marhuakuni Tata Diosïni (arhinta je 1 Timoteo 4:12-16). Engachi eratsentaska ambe enga Pablu arhipka Timoteuni, exeakachi eska pʼímarhispka paraka sánderu sési úpiringa tsimani ambe. Orheta, eska xarhataapiringa kualidadichani komu xénchperakua, mintsikani Tata Diosïni ka pímbinhasïini. Ka máteru ambe, eska sánderu sési arhintapiringa máteruechani japarini, konseju íntspini ka jorhentpini. Ini jorhenguarhikua jimbo exeakachi Timoteueri ejempluni ka na engajtsïni jarhuatajka sánderu sési marhuakuni Tata Diosïni engachi eratsetini jarhajka úni imani ambe engachi uaaka úni. Ístuchi exeaka ambechi uaa úni parachi sánderu marhuakuni Tata Diosïni.
JU JE SÁNDERU AMBAKITI KRISTIANU MÁENI
4. Eska na arhijka Filipusʌ 2:19-22, ¿andisï xáni úrapi Tata Diosï Jeoba Timoteuni?
4 ¿Andisï Timoteu xáni sési marhuakupi Tata Diosï Jeobani? Jimboka ambakiti kualidadichani jatsiaspka (arhinta je Filipusʌ 2:19-22). Ambe enga Pablu uandapka Timoteueri ambe, exesïngachi eska ima kaxumbitispka, sési marhuakusïreenga Tata Diosïni, ánchikuarhirini ka mintsinharhikueni. Xénchperakua jingoni kaasïreendi erachichani ka meru uandanhiasïreendi imeechani jimbo. Jimbosï Pablu kánikua xéncheendi ka mintsikasïreendi eska úpiringa úni náki uéjki ánchikuarhita ma (1 Kor. 4:17). Engachi juchajtu xarhataaska kualidadichani enga Tata Diosï Jeoba jaiapanheantajka, imajtsïni sánderu xénchaati ka sánderujtsïni úraati kúnguarhikuarhu (Sal. 25:9; 138:6).
Eratsi je kualidadi ma engajtsï uékapiringa sánderu sési xarhatani. (Exe je párrafuechani 5 ka 6).
5. a) ¿Nénachi uaa míteni náki kualidadichanchi jatsiski para sánderu sési xarhataani? b) ¿Ambe úxaki pirenchi enga imajenirhu xarharajka para xarhatani eska kurhangutspisïnga?
5 Ju je eratsentani ambechi uaa úni. Ju je kómarhini Tata Diosï Jeobani parajtsïni jarhuatani míteni náki kualidadichanchi uaa sánderu sési xarhataani. Ju je erakuni kualidadini ma ka jánguarhintani xarhatani. ¿Uétarhinchasïnchi sánderu kurhangukuani máteruechani ka jarhuataani? ¿Jatsipirinchi para sánderu sési pájperani máteruecha jingoni ka puákuantani? Engachi no seguru jaka, uaakachi kurhamarhini amiguni ma eskajtsïni arhiaka na engajtsïni exejka (Prov. 27:6).
6. ¿Nénachi uaa sánderu sési xarhatani kualidadi ma?
6 Ju je jánguarhintani úni ambe engachi eratsetini jaka. ¿Néna? Ju je jánguarhintani jirinhantani sánderu informasioni ima kualidadiri engachi uéjka xarhatani. Pori ejemplu, engachi exeska eskachi uétarhinchasïnga mintsita jingoni puákuantani máteruechani, kánikuajtsïni jarhuatapirindi arhintani Bibliarhu ka eratsentani imeecheri ambe engaksï mintsita jingoni puátspentapka ka ístu imeecheri engaksï no ísï úpka. Ju je eratsentani Jesúsiri ejempluni. Ima puákuantaspti kʼuiripuechani (Luk. 7:47, 48). Jesúsi exesïreendi ambe engaksï kʼuiripuecha ueenga úni, peruksï fariseuecha no sáni jukaparharaasïreendi (Luk. 18:9). Engachi na eratsentakia ini ejempluechani, ju je kurhamarhikuarhini: “¿Ná exeasïni máteruechani? ¿Náki kualidadichani exekuasïni?”. Engachi úkua jukanchajka puákuntani nemani, ju je lista ma úni iámindu ima kualidadicheri enga ima kʼuiripu xarhataajka ka kurhamarhikuarhinchi: “¿Néna exejki Jesúsi? ¿Puákuntapirini?”. Engachi ísï jorhenguarhiska, jarhuataatijtsïni parachi ménderueni eratseni. Orhetachi jamberi úkua jukanchaaka puákuntani nemani engajtsïni no sési ambe úchika. Peru engachi jánguarhintaska uaakachi mintsita jingoni puátspentani.
JU JE IMANI AMBE JORHENGUARHINI ÚNI ENGA MARHUAUAKA
Jorhenguarhi je néna arreglarini ambe ma Kʼumanchikua Reinuerirhu. (Exe je párrafu 7). d
7. ¿Néna úraaxaki Tata Diosï Jeoba imeechani engaksï jorhenaka úni ambe ma? (Proverbios 22:29).
7 Máteru ambe engachi uaaka úni, jindeesti jorhenguarhini úni ambe ma. Pori ejemplu, eratseanta je iámindu erachichani engaksï konstruksionirhu marhuajka, engaksï Betelichani uaajka, Kʼumanchikuechani para Kʼéri tánguarhikuecha ka Kʼumanchikua Reinuerichani. Uánikua í erachichaksï jorhenguarhisti úni ambe ma jimboka máteru erachichaksï jorhendaaspka. Eska na xarharajka imajenicharhu erachicha ka pirenchichaksï jorhenguarhixati na engaksï uaaka kuidariuani Kʼumanchikuechani para Kʼéri tánguarhikuecha ka kʼumanchikua Reinuerichani. Ini ambe jingoni Tata Diosï Jeoba “enga méntkisï jindeeka Rei” ka Jesúsi, “Rei reicheri”, úraaxatiksï ini kʼuiripuechani paraksï kʼérati ánchikuarhitechani uaani (1 Tim. 1:17; 6:15; arhinta je Proverbios 22:29). Uékasïngachi kánikua ánchikuarhini ka úrani ambe engachi jorhenaka úni parachi kʼéri ambe arhini Tata Diosï Jeobani ka no parachi jucha kʼéramakuarhini (Juanu 8:54).
8. ¿Neechajtsïni uaa jarhuatani exeni ambechi uaa sánderu sési úni?
8 Ju je eratsentani ambechi uaa úni. ¿Ambechi úpirini sánderu sési úni? Ju je uandontskuarheni kúnguarhikuarhu anapu orhejtsïkuticha jingoni ka engachi uaaka sirkuitueri orhejtsïkuti jingoni parakajtsïni arhiaka néna sánderu sési úni ambe ma. Pori ejemplu, engajtsïni arhiska eskachi uaaka sánderu sési arhijtsïkpini o jorhentpini, úpiringachi kurhamarhiani nanichi meru jatsiski para sánderu sési úni indeni ambe. Ka tátsekua, ju je jánguarhintani ísï úni. ¿Néna?
9. ¿Ambechi uaa úni parachi jorhenguarhini sési úni ambe ma?
9 Ju je jánguarhintani úni ambe engachi eratsetini jaka. Ju je eratsentani eskachi uékasïnga ambakiti jorhentpiri máeni. Uaakachi jorhenguarhini ambe enga arhijka foietu Ju je sánderu sési arhintani ka jorhentpini. Ka ante dechi nitamatarani parti ma tánguarhikuarhu enga entre semana jimbo úkuarhijka, úpiringachi arhini erachini ma enga sánderu mítekuka eskajtsïni kurhajchaaka ka arhintsïni ambechi uaa sánderu sési úni. Engachi tiempu jingoni prepararikuarhiska, sánderuchi ambakiti jorhentpiricheuaka ka máteruechaksï exeati eskachi ánchikuarhiriska ka mintsinharhikueni (Prov. 21:5; 2 Kor 8:22).
10. Uanda je ejemplu ma ambe engachi uaaka úni parachi sánderu sési úni ambe ma.
10 Ka engachi uéjka úni ambe ma engachi no újka sési úni, ju je seguirini jánguarhintani parachi jorhenguarhini sési úni indeni ambe. Ju je exeni erachi Garryri ejempluni. Ima kánikua úkua jukanchasïreendi arhintani, uandasïndi eska kánikua kʼuratsesïreenga tánguarhikuecharhu arhintani. Peru ima seguirispti jánguarhintani sánderu sési arhintani. Erachicheri jarhuajperata jingoni ka publikasionicheri, iásï erachi nitamataraasïndi arhijtsïkperatechani tánguarhikuecharhu ka ístu kʼérati tánguarhikuecharhu.
11. Ísï eska Timoteueri ejemplu, ¿ambejtsïni jarhuataa parachi intsïnhaani sánderu ánchikuarhitechani?
11 ¿Timoteu niáraspi sési arhijtsïkpini ka ambakiti jorhentpiri máeni? Biblia no uandasïndi. Peru ambe engachi kʼóru míteka, jindeesti eska úspka ambe enga Pablu arhipka. Timoteu sánhani arhispti sánderu sési úni ambe ma ka ísï úspti sési úni imeeri ánchikuarhitani (2 Tim. 3:10). Májkueni eska Timoteu, engachi juchajtu jánguarhintaska sánderu sési úni ambe ma, listuchi jauaka parachi máteru ánchikuarhitechani intsïnhaani.
JU JE EXENI AMBECHI UAA ÚNI MÁTERUECHANI JIMBO
12. ¿Nénaksïni jarhuataskia máteruecha?
12 ¡Kánikuachi sési pʼikuarherasïnga engajtsïni máteruecha jarhuatajka! Pori ejemplu, engachi ospitalicharhu jarhajka, kánikuajtsïni uinhaperantasïndi engajtsïni erachicha pʼorhembijka engaksï Grupurhu jaka engaksï jarhuataajka Testiguechani engaksï uétarhinchajka Tratamientu ma o engajtsïni pʼorhembijka ima erachicha engaksï pʼorhembiajka imeechani engaksï pʼamenchani jarhajka. O engachi no sési nitamakuarhini jarhajka, kánikuachi sési pʼikuarherantasïnga engajtsïni orhejtsïkuti ma kurhajchajka ka uinhaperantajka. Ka engachi uétarhinchajka eskajtsïni nema jarhuataaka jorhentpini Biblieri ambe, kánikuajtsïni jarhuatasïndi prekursoricha engaksï eksperiensierika parajtsïni pámbetani ka arhini ambechi uaa úni parachi sési jorhentpini. Jesúsi uandaspti: “Sánderu sésiisti intsïmpini, ka eska intsïmbinhani” (Uku. 20:35). Iámindu i erachichaksï sési pʼikuarherasïndi engajtsïni jarhuatajka ka juchajtuchi uaaka májkueni pʼikuarherani engachi jarhuajpeska. Engachi uéjka ísï marhuakuni Tata Diosï Jeobani o máteru ambe úparini, ¿ambejtsïni jarhuataa parachi úni ísï úni?
13. Engachi eratsetini jauaka úni ambe ma, ¿ístuchi ambe jatsiski para eratseni?
13 Ju je sési eratsetini jarhani ambe engachi meru uéjka úni. Jamberichi úpiringa eratseni: “Uékapiringa sánderu jarhuajpeni kúnguarhikuarhu”. Peruchi jamberi úkua jukanchaaka exeni nénachi uaa ísï úni ka nichi uaa kuenta íntskukuarheni sinchi meru jarhuajpexaki. Ísï jimbo, sánderu sési jarhasti eskachi meru eratseaka ambe engachi uéjka úni. Úpiringachi karani ambe engachi uéjka úni ka ístu ambe engachi uaaka para ísï úni.
14. Engachi eratsetini jauaka úni ambe ma, ¿andisï uétarhia ménisï mójtakuni ambe ma?
14 Engachi eratsetini jauaka úni ambe ma, ménichani uétarhiati eskachi mójtakuaka ambe ma. ¿Andi? Jimbokachi no míteska ambe enga úkuarhiaka. Pori ejemplu, apostoli Pablu jarhuajpespti paraka Tesalonika kúnguarhikua ma japiringa ka jamberi ueendi pakarani ma tiempu para jarhuataani erachichani. Joperu imeeri ikiatspitichaksï úspti eska uéakuntapiringa jima uératini (Uku. 17:1-5, 10). Enga Tesalonika pakarapiringa, kúnguarhikua úpirindi no sési úkuarhinchani. Peru Pablu no chkétakuarhispti. Sánderu sési, úspti ambe enga úpiringa úni ka sánderu tátsekua Timoteuni axaspti paraka jarhuataapiringa erachichani mintsikani Tata Diosïni (1 Tes. 3:1-3). Kánikuaksï sési pʼikuarherapti Tesalonika anapuecha enga Timoteu uékapka nirani jima enga uétarhini japka.
15. Enga mójtakurhiska ambe ma, ¿ambe uaa úkuarhini imani ambe jingoni engachi eratsetini japka úni? Uandanta je ejemplu ma.
15 Ambe enga Pablu nitamanchapka Tesalonika, ambakiti ambejtsïni jorhendasïndi. Jamberichi eratsetini japka úni ambe ma parachi marhuakuni Tata Diosïni, joperu ma repentku mójtakurhini ambe ma ka nóteruchi únia ísï úni (Ecl. 9:11). ¿Ambechi uaa úni? Uaakachi máteru ambe úni. I ambeksïsï úpti Ted ka Hiedi. Pʼamenchasptiksï ka nóteruksï úsptia Beteli marhuani. Peru jimbokaksï kánikua xénchasïreenga Tata Diosï Jeobani, jánguarhintasptiksï máteru ambe úni paraksï marhuakuni. Orhetaksï prekursori regulari úkuarhispti, tátsekuaksï prekursori espesialisptia ka Tedinksï jorhendaspti paraka jarhuatapiringa sirkuitueri orhejtsïkutini. Peru tátsekua mójtakuarhispti na engaksï xáni jatiricha úpiringa jindeeni sirkuitueri orhejtsïkuti ka Ted ka Hiedi exesptiksï eskaksï nóteru úpiringia ísï marhuani. Nájkirukaksï ueenakuarhu chkétakuarhipka sáni, mítesptiksï eskaksï úpiringa máteru ambe úni paraksï marhuakuni Tata Diosïni. Ted uandasïndi: “Jorhenguarhiskachi eska jarhaska uánikua máteru ambe engachi uaaka úni para marhuakuni Tata Diosï Jeobani”.
16. ¿Ambejtsïni jorhendasïni Galasia 6:4?
16 Nóchi míteska ambe uaa úkuarhini juchaari tsípikua jingoni. Ísï jimbo, jukaparhakuesti eskachi miáuaka eska Tata Diosï Jeobajtsïni jukaparharasïnga peru no imani pribilejiuechani jimbo engachi jatsiajka. Ístuchi no jatsiska para terukutantani ambe engaksï máteruecha újka imani ambe jingoni engachi jucha újka. Hiedi uandasïndi: “Engachi terukukuarhintaska máteruecha jingoni, nóchi sési pʼikuarheraaka” (arhinta je Galasia 6:4). Ísï jimbo, uaakachi jirinhakuntani néna engachi uaaka sánderu sési marhuakuni Tata Diosï Jeobani ka jarhuataani máteruechani. b
17. ¿Ambechi uaa úni engachi uéjka sánderu marhuakuni Tata Diosïni?
17 Engachi arisku sáni irekaska ka engachi jánguarhintaska no kántspeni, uaakachi aiakukuarheni parachi sánderu ánchikuarhitechani intsïnhaani Tata Diosïri kúnguarhikuarhu. Ju je eratsentani ambechi uaa úni iásï engajtsïni jarhuataaka para ísï úni eskachi na eratsetini jaka. Pori ejemplu, engajtsï chá uéjka prekursori regularini, ¿úpirintsï marhuani ma tiempu komu prekursori auksiliari? O, engajtsï uékani jaka orhejtsïkutiri jarhuajpirini, ¿úpirintsï sánderu aianhpini, pʼorhembiani kúnguarhikuarhu anapu erachichani engaksï jatirikia o engaksï pʼamenchani jaka? Iámindu ambe engajtsï uaaka jorhenguarhini iásï, jarhuataatiksïni parajtsï máteru ánchikuarhitechani jatsiani sánderu orhepatini. Jánguarhinta je sési úni imani ambe engajtsï eratsetini jaka parajtsï marhuakuni Tata Diosï Jeobani (Rom. 12:11).
Imani ambe eratsi je úni engajtsï uaaka úni. (Exe je párrafu 18). e
18. ¿Ambechi jorhenguarhisïni Beverleyri ejemplu jingoni? (Ístu exe je imajenini).
18 Na uéjkichi xáni jatirinia uaakachi exeni ambechi uaa úni parachi marhuakuni Tata Diosï Jeobani ka ísï úni. Ísï úspti pirenchi ma enga Beverley arhinhajka ka enga 75 jatirikia. Pʼamenchakua ma jimbo no úsïreendi sési xanharani. Peru ima kánikua uékaxapti jarhuajpeni pʼímarperakuechani etsakuani para Miántskua. ¿Ambe úspi? Exespti ambe enga úpiringa úni ka enga ísï úpka kánikua sési pʼikuarheraspti. Ka inde ambe jarhuataaspti máteruechani parakaksï sánderu aianhpipiringa. Xarharasïndi eska Tata Diosï Jeoba kánikua jukaparharasïnga na engaksï xáni jánguarhintajka erachicha engaksï jatirikia nájkirukaksï uánikua ambe nóteru újkia úni (Sal. 71:17, 18).
19. ¿Ambe ka ambechi uaa úni parachi sánderu sési marhuakuni Tata Diosïni?
19 Ju je imani ambe eratsetini jarhani úni engachi uaaka úni. Ka jánguarhintani imani kualidadichani xarhataani enga Tata Diosï Jeoba jaiapanheantajka ka imani ambe jorhenguarhini engajtsïni jarhuataaka parakajtsïni Tata Diosï ka imeeri kúnguarhikua sánderu úraaka. Ka ju je exeni ambe ka ambechi uaa úni parachi jarhuataani erachichani. c Engachi úska ini ambe, Tata Diosï Jeobajtsïni újchakuraati ka ísï eska Timoteuni, máteruechaksï exeati eskachi sési marhuakuxaka Tata Diosïni (1 Tim. 4:15).
PIREKUA 38 Jeobakini xénchasïndi
a Timoteu kánikua jorhenaspti aianhpini ambakiti aianhperakuani. Joperu apostoli Pablu pʼímarhispti paraka seguiripiringa sánderu sési marhuakuni Tata Diosïni. Timoteu úspti ambe enga Pablu arhipka ka niáraspti sési marhuakuni Tata Diosï Jeobani ka úspti jarhuataani erachichani. ¿Chá ísïiski eska Timoteu? ¿Uékaxakijtsï sánderu marhuakuni Tata Diosïni ka erachichani? Seguru eska jo. Jiájkani, ¿ambeksïni jarhuataa parajtsï ísï úni? ¿Ambejtsï jatsiski para exeni engajtsï eratsetini jauakia úni ambe ma ka nénajtsï uaa ísï úni eskajtsï na eratsetini jaka?
b Exe je subtituluni “Servir donde se necesita ayuda”, librurhu Organizados para hacer la voluntad de Jehová, kapitulu 10, párrafuecha 6 a 9.
c Exe je jorhenguarhikua 60 librurhu Tsípikua jingoni ireka je enga arhinhajka “Seguiri je sánderu andarhierani Jeobani”.
d AMBE ENGAKSÏ XARHATAKA IMAJENICHA: Erachi ma jorhendaaxati tsimani pirenchichani paraksï arreglarintani ambe ma ka imeechaksï ísï úxati eskaksï na jorhendanhaka.
e AMBE ENGAKSÏ XARHATAKA IMAJENICHA: Pirenchi ma enga no újka uérani imeo, telefonu jimbo aianhpixati ka pʼímarhixati kʼuiripuni ma para Miántskuarhu nirani.
