Diksionariu ma uandasïndi eska jurarini arhikuekasïnga “uandani eska meru uaaka ambe ma o aiatspeni ambe ma Tata Diosïni testigu úraparini [...] ima amberi enga uandaka o aiatspeni”. Nema uaati karani ambe enga aiatspeka o uandaparini.

Máruksï uandasïndi eska no sési jarhaska jurarini, jimboka Jesúsi uandaspka: “Asï jáma je aiatspeni [...]. sino arhijpiakajtsï: ʻjoʼ o ʻnoʼ, jimboka engajtsï sánderu ambe uandaaka, Noambakitini jimboesïngia” (Mat. 5:33-37). Ísïisti, Jesúsi mítespti eska Moisésiri Lei kurhakuasïreenga israelitecha eskaksï ménichanisï juraripiringa ka eskaksï Tata Diosïri marhuaricha jurarispka ménichanisï (Gén. 14:22, 23; Éx. 22:10, 11). Ka ístu, mítespti eska Tata Diosïjtu niáraspka jurarini (Ebr. 6:13-17). Ísï jimbo, Jesúsi no uandaxapti eska no sési jarhaska jurarini. Sánderu sési, xarhataxapti eska no sési japiringa ísku jatini jurarini o ambe ma jimbo enga no jukaparhakuepiringa. Méntkisïchi jatsiska para úni ambe engachi uandaaka, jimboka Tata Diosï Jeoba indeni ambesï uéjka.

Jiájkani, ¿ambejtsï uaa úni engajtsï arhinhaaka eskajtsï jurariuaka ambe ma jimbo? Orheta, seguru ja je eskajtsï uaaka ísï úni, engajtsï no seguru jauaka, sánderu sésiuati eskajtsï no jurariuaka. Tata Diosïri Karakatajtsïni arini konsejuni íntskusïndi: “Sánderu sésiisti eskari no aiatspeaka ambe ma ka eska engari aiatspeaka ambe ma ka nóri ísï úni” (Ecl. 5:5). Tátsekua, exe je ambe enga uandajka Biblieri prinsipiuecha engaksï imeeri ambe uandajka engajtsï jimbo uéjka jurarini. Ka tátsekua ísï ú je eskaksïni na arhiaka chaari konsiensia enga Bibliani jimbo jorhendaka jaka. ¿Nákiskiksï máru Biblieri prinsipiuecha engaksï íri ambe uandajka?

Máru juramentuechaksï terukuntasïndi imani ambe jingoni enga Tata Diosï uéjka. Pori ejemplu, engaksï Jeobaeri testiguecha tembuchajka, aiatsperasïndiksï ambe ma. Nobiuechaksï aiatsperasïndi Tata Diosïni testigu úraparini ka ístu máteruechani japarini eskaksï kánikua uékperaaka, sési kámberani ka eskaksï janhanharperaaka engaksï jamberi tsimarhani májku kʼéri irekani jauaka Echerirhu. (Máteru nobiuechaksï jamberi no meru indeni ambeksï uandaati, peruksï aiatsperasïndi ambe ma Tata Diosïni japarini). Tátsekuaksï arhinhasïndi eskaksï temungurhirisïngia ka eskaksï jatsiska para méntkisï ísï irekani (Gén. 2:24; 1 Kor. 7:39). Ambe engaksï temungurhiricha aiatsperajka sési jarhasti ka terukuntasïndi imani ambe jingoni enga Tata Diosï uéjka.

Máru juramentuechaksï no terukuntasïndi imani ambe jingoni enga Tata Diosï uéjka. Pori ejemplu, kristianuechaksï no jurarisïndi paraksï kuájpini paisini ma armechani úrapariani o eskaksï nóteru mintsikaakia Tata Diosïni. Engaksï ísï úpiringa nóksï kurhajchani japirindi Tata Diosïri juramukuechani. Jimbokaksï kristianuecha “nóteru parhakpini anapueskia”, nóksï inchamukusïndi uarhiperakuarhisï (Juanu 15:19; Is. 2:4; Sant. 1:27).

 Ménichantsïni juchaari konsiensia arhiati sinchi uaa juramentu ma. Ménichani, kristianu ma jatsiati para sési eratsentani konsejuni enga Jesúsi íntspipka para íntskuntani “Sésarini ambe enga Sésaririika, ka [Tata] Diosïni ambe enga [Tata] Diosïriika” antesi de juramentu ma úni (Luk. 20:25).

Ju je eratsentani eska erachi ma uékasïnga siudadanu úkuarhini paisi ma jimbo o pasaporti ma petani ka mítesïndi eska para úni indeni ambe, jatsiska para jurarini eska sési marhuakuaka paisini. Enga inde juramentu no terukuntaaka Tata Diosïri lei jingoni, imeeri konsiensia enga Biblia jimbo jorhendakata jaka, no jurajkupirindi úni indeni juramentuni. Jamberiksï juramuticha úpirindi mójtakuni máru ambe enga jimbo erachiri konsiensia jiárhitapiringa jurarini.

Enga juramentu ma mójtakurhiska para sési marhuakuni paisini ma, uaati terukuntani imani ambe jingoni enga Roma 13:1 uandajka: “Janhanharhia je imeechani engaksï juramukua jatsika”. Ísï jimbo, kristianu ma úpirindi exeni eska no no sési jarhaska jurarini ambe ma jimbo engajtsïni Tata Diosï juramuchika para ísï úni.

Ístu kánikua jukaparhakuesti eska ma kurhajchaaka konsiensiani jiáni enga arhinhaaka eska jatsiska para jurarini úraparini ambe ma o úparini ambe ma. Ióntki, Roma anapuecha ka esitecha imeecheri espadechanksï úraasïreendi paraksï juramentu ma úni ka guerrarhu anapu diosïnksï uinhapikua kurhakusïreendi paraksï xarhatani eska ambe engaksï uandeenga mintsinharhikuespka. Grieguechaksï jájkichani tarhataasïreendi auandarhisï engaksï juramentu ma ueenga. Ísïksï xarhatani jarhasïreendi eska jarhaspka nema enga uinhapitipka ka enga exeni jarheenga ambe engaksï uandeenga ka úni ka eskaksï jatsispka para imani kuenta íntskuntani.

Ísïisti, Tata Diosï Jeobaeri marhuari ma no úpirindi juramentu ma úraparini símbolu ma enga paisirhu úrakuarhejka ka enga no jurhimbiti relijioniriika ka engaksï kʼuiripuecha kómarhijka. Joperu, ¿ambe jatsiski para úni enga uandajpanhaska para testigueni jusgadurhu ma ka arhinhani eska Bibliarhu peeraaka imeeri jájkini para jurarini eska jurhimbitku uandantaaka? Enga i ambe úkuarhiska, jamberi eratseati eska sési jarhaska ísï úni, jimboka Tata Diosïri Karakata uandasïnga eskaksï jarhaspka Tata Diosïri marhuaricha engaksï úpka ambe ma paraksï juramentu ma úni (Gén. 24:2, 3, 9; 47:29-31). Engachi eratseska indeni ambe úni, kánikua jukaparhakuesti eskachi miántaaka eskachi Tata Diosïni japarinchi jurarixaka ka eskachi jurhimbitku uandantaaka. Ísï jimbo, jatsiskachi para seguru jarhani eskachi jurhimbitku uandantaaka ambe engachi kurhamarhinhaaka.

Jimbokachi kánikua jukaparharasïnga sési pájperani Tata Diosï jingoni, jatsiskachi para kómarhini ka sési eratsentani ante dechi jurarini ambe ma. Uékasïngachi seguru jarhani eska ambe engachi jurariuaka, no no sési pʼikuastaaka juchaari konsiensiani ka eska terukuntaaka Biblieri prinsipiuecha jingoni. Ka engachi juramentu ma úska, ju je jánguarhintani ísï úni (1 Ped. 2:12).