1. ¿Ambe úkuarhixapi enga Jesúsi imeeri primeru milagru úpka?

 JU JE miántani ambe enga úkuarhipka enga kʼamarani japkia uéxurhini 29, jiáni enga Jesúsi apenasi ueenani japka aianhpini. Ima, imeeri amamba María ka máru imeeri chúxapatiichaksï tembuchakuarhu ma niraspti Kaná, ireta ma jimbo enga Nasareti norterhisï japka nani enga Jesúsi tʼarhexepka. María kánikua sési pájperasïreendi nobiuecheeri familiecha jingoni ka jamberi jarhuajpeni japti tembuchakuarhu. Peru jamberi jimboka sánderu uánikua kʼuiripu nirasïnga tembuchakuarhu, binu kʼamakurhisïndi ka inde ambe úpirindi eskaksï nobiuecha ka imeecheri familiecha kʼuratsekua jingoni pakarapiringa. b María sóntku nirasïndi andarhierani Jesúsini ka arhisïndi eska nóteru jarhaskia binu (Juanu 2:1-3). ¿Ambe úsïni Jesúsi? Ambe ma enga ísku pakataajka iáminduechani, úsïndi eska itsï “ambakiti binu” úkuarhintaaka (Juanu 2:9, 10).

2, 3. a) ¿Néna úraspti Jesúsi imeeri uinhapikuani? b) ¿Andisï xáni sésii eskachi jorhenguarhiaka ima milagruecheeri ambe enga Jesúsi uaapka?

² Jesúsi uaaspti máteru uánikua milagruechani enga Echerirhu jámani japka. c Úraspti imeeri uinhapikua para jarhuataani uánikua kʼuiripuechani. Pori ejemplu, ma xanhari ma 5,000 acheetiichani tʼireraaspti ka máteru xanhari 4,000. Ini tsimani milagruecha jingoni enga uaapka, jamberi jukari 27,000 kʼuiripuechani tʼireraapti, kuenta úpariani uarhiti ka sapiichani engaksï jima japka (Mat. 14:15-21; 15:32-38). Inde tsimani xanhari jimbo, Jesúsi ístu ambakeraantaspti imeechani engaksï pʼamenchani japka (Mat. 14:14; 15:30, 31).  Seguru eskaksï iámindu kʼuiripuecha ísku pakarapka engaksï exepka, eska Jesúsi milagruechani uaaspka para tʼireraani ka ambakeraantani.

³ Uánikua ambechi uaaka jorhenguarhini ima milagruecheeri ambe enga Jesúsi uaapka. Ini jorhenguarhikua jimbo exeni jauakachi na engajtsïni i milagruecha jarhuataaka sánderu mintsikani Tata Diosïni. Ístuchi exeaka nénachi uaa májkueni kaxumbitiini ka pʼamojpitiini eska Jesúsi enga ini milagruechani uaapka.

4. ¿Neecherichi uaa jorhenguarhini engachi jorhenguarhiska ima milagruecheeri ambe enga Jesúsi uaapka?

⁴ Milagruecha enga Jesúsi uaapka, uánikua ambejtsïni jorhendasïndi imeeri ambe peru ístu imeeri Taatiiri ambe, jimboka imasï íntskupka uinhapikua para Jesúsi milagruechani uaani. Ukuecha 10:38 ari ambe uandasïndi Jesúsiiri: “Diosï míndas[ti] [...] espiritu santuni jimbo ka imeeri uinhapikuani jimbo. Ka ima jámasïreendi ambakiti ambe úni, ka ambakeraantani iámindu pʼamenchatiichani enga noambakiti minguarhiatini jatsiapka, jimboka Diosï imani jingoniispka”. Ka imani ambe jingoni enga Jesúsi úpka ka uandani, xarhataspti eska májkueni ambe pʼikuarherasïreenga ka eratseni eska Taati jémba ka milagruecha jingoni enga uaapka, xarhataspti eska i ambe ísïiska (Juanu 14:9). Ju je exeni tanimu ambe engachi uaaka jorhenguarhini ima milagruecheeri enga Jesúsi uaapka ka na engajtsïni jarhuataaka sánderu mintsikani Tata Diosïni.

5. ¿Ambe úspi eska Jesúsi milagruechani uaapiringa? (Mateu 20:30-34).

⁵ Primeru, Jesúsi ka imeeri Taati jémbajtsïni kánikua xénchasïndi. Enga Jesúsi Echerirhu jámani japka, xarhataspti na enga xáni xénchauenga kʼuiripuechani, jimbosï úrapti imeeri uinhapikuani para milagruechani uaani ka para jarhuataani kʼuiripuechani. Ma xanhari tsimani acheetiicha engaksï no ueenga exeni, uinhachaparinksï kurhakuspti eska jarhuataapiringa (arhinta je Mateu 20:30-34). Biblia uandasïndi eska Jesúsi “pʼamojkuasp[ka]” ka úspti eskaksï éskantapiringa. Uandakua griegu enga ixú tradusirikuarhijka “pʼamojpeni” arhikuekasïndi kánikua pʼamojpeni. Jesúsi pʼamojpesïreendi jimboka kánikua xénchaasïreenga kʼuiripuechani, ístu i ambe úspti eska tʼireraapiringa imeechani engaksï no jatsikuarhienga tʼirekua ka eska tsinapiringa acheetini ma enga lepra pʼamencheenga (Mat. 15:32; Mar. 1:41). Ísï jimbo, seguruchi jarhaska eskajtsïni Tata Diosï Jeoba enga ʻkánikua kóntpijkaʼ ka imeeri Uájpa kánikuajtsïni xénchasïnga ka no sésiksï pʼikuarherasïndi engachi no sési nitamakuarhini jarhajka (Luk. 1:78; 1 Ped. 5:7). Ka uékaxatiksïa kʼamajkuani problemechani engaksï kʼuiripuecha jatsiajka.

6. ¿Jesúsi ambe úsïni úni imani uinhapikua jingoni enga Tata Diosï íntskuka?

⁶ Segundu, Tata Diosï uinhapikua íntskusti Jesúsini para kʼamajkuani iámindu problemechani enga kʼuiripu jatsiajka. Jarhastiksï problemecha engachi jucha no méni úpiringa sési peuantani. Peru imani milagruecha jingoni enga Jesúsi uaapka, xarhataspti eska ima kʼóru úsïnga ísï úni. Pori ejemplu, jatsisti uinhapikua para kʼamajkuni imani ambe enga újka eskaksï kʼuiripuecha no sési nitamakuarhiaka. Ima uaati kʼamajkuni pekaduni engachi jukaraka, pʼamenchakuechani ka uarhikuani enga pekadu jimbo jaka (Mat. 9:1-6; Rom. 5:12, 18, 19). Jesúsiiri milagruechaksï xarhatasïndi eska ima uaaka ambakeraantani kʼuiripuechani ‘mámaru jásï pʼamenchakuecheeri’ ka asta tsítaantani uarhiriichani (Mat. 4:23; Juanu 11:43, 44). Ístu, jatsisti uinhapikua para anhaxustani tarhiatani enga uinhamu tarhiani jauaka ka ístu para andaani no sési járhati espirituechani (Mar. 4:37-39; Luk. 8:2). ¿A no eskajtsïni kánikua sési pʼikuastasïnga míteni eska Tata Diosï Jeoba kánikua uinhapikua íntskuska imeeri Uájpani?

7, 8. a) ¿Ambeerichi uaa seguru jarhani imani milagruecha jimbo enga Jesúsi uaapka? b) ¿Náki milagrujtsï uékaxakiia exeni?

⁷ Terseru, uaakachi seguru jarhani eska Tata Diosïiri Reinu uaaka eska úkuarhiaka ambe engajtsïni Tata Diosï aiachika. Milagruecha enga  Jesúsi uaapka enga kʼuiripu máepka, xarhatastiksï ambe enga xáni uaaka sánderu orhepatini komu Juramuti Tata Diosïiri Reinuerirhu. Eranhaska je na engaksï irekaakia kʼuiripuecha no ióni jimbo enga Kristu juramuni jauakia Echerirhu. Ima uaati eskachi nóteru pʼamenchaakia jimboka kénditauaka pʼamenchakuechani enga xáni no sési pʼikuastaajka kʼuiripuechani (Is. 33:24; 35:5, 6; Jaŋ. 21:3, 4). Ístu, méntkisïchi jatsiaka tʼirekua ka nóteruchi no sési nitamakuarhiakia desastresi naturaliicha jimbo (Is. 25:6; Mar. 4:41). Ka kánikuachi sési pʼikuarheraaka eroantani imeechani engachi uarhiranchaaka jiáni engaksï tsíntaakia (Juanu 5:28, 29). Engajtsï eratsentajka jimbanhi parhakpinini, ¿náki milagrujtsï uékaxakiia exeni?

⁸ Enga Jesúsi milagruechani uaapka, tsimani kualidadiichani xarhataaspti engachi juchajtu jatsika para xarhataani: kaxumbitiini ka pʼamojpeni. Ju je exeani tsimani ejempluechani. Ueenakachi exeni ambe enga úkuarhipka tembuchakuarhu ma enga Kaná úkuarhipka.

9. ¿Andisï Jesúsi milagru ma úpi tembuchakuarhu ma enga Kaná úkuarhipka? (Juanu 2:6-10).

⁹ (Arhinta je Juanu 2:6-10). Enga tembuchakuarhu nóteru japkia binu, ¿Jesúsi jatsispi para úni ambe ma? Nómbe. No ma profesia uandasïreendi eska Mesíasi jatsispka para binu úni milagru ma jimbo. Peru eratsenta je ini ambe, nájtsï pʼikuarherapirini chá enga inde ambe úkuarhipiringa chaari bodarhu. Jamberi Jesúsi eratsentapti eskaksï nobiuecheeri familiariicha kʼuratsekua jingoni pakarapiringa, ka sánderia nobiuecha ka jimboka pʼamojkuaspka, jarhuataaspti. Jimbosï  úpti milagruni engachi ueenakuarhu uandaka ini jorhenguarhikua jimbo. 390 litru itsï (103 galoni) ambakiti binu úntaspti. ¿Ka andisï xáni káni úpi? Jamberiksï úpirindi máteru xanhari jimbo úrani o atarantanksï imani binuni enga pakarapka para jarhuataani imeechani engaksï apenasi tembuperapka. ¡Seguru eskaksï nobiuecha kánikua agradesidu japka!

10. Uanda je máru ambe enga Jesúsi úpka enga Juanu kapitulu 2 uandajka (ístu exe je dibujuni).

¹⁰ Ju je exeni máru ambe enga Jesúsi úpka, enga Juanu kapitulu 2 uandajka. ¿Exeskijtsï né uiniraantaspi itsï, itsï jatakuechani? No Jesúsi ísï úspti. Jimboka no uékasïreenga eskaksï kʼuiripuecha exepiringa, jántspiriichani arhiaspti eskaksï uiniraantapiringa (bersikuluecha 6 ka 7). Ka enga Jesúsi na úpkia milagruni, ¿ima niraspi tsʼémutani binuni tembuchakua úrini? Nómbe. Ima jántspiriichani arhiaspti eskaksï nipiringa sáni pákuni (bersikulu 8). Ka Jesúsi no tarhataspti kopani iáminduechani japarini ka uandani: “¡Tsʼému je ini xáni ambakiti binu engani úka!”.

11. ¿Ambechi jorhenguarhisïni indeni milagru jingoni enga Jesúsi úpka?

¹¹ ¿Ambechi jorhenguarhisïni indeni milagru jingoni enga Jesúsi úpka? Eskachi jatsiska para kaxumbitiini. Jesúsi no kʼéramakuarhispti enga itsïni, binu úntapka. Ima no méni kʼéramakuarhisïreendi imani ambe jimbo enga ueenga. Sánderu sési, kaxumbitiispti ka méntkisï kʼéri ambe arhisïreendi imeeri Taati jémbani ka uandasïreendi eska imani jimbosï ueenga úni ambe ma (Juanu 5:19, 30; 8:28). Engachi májkueni úska eska Jesúsi, kaxumbitiuakachi ka nóchi jámaka kʼéri ambe exekuarhini imani ambe jimbo engachi uaaka. No arhiparini ambe engachi úni jauaka para marhuakuni Tata Diosï Jeobani, ju je no kʼéramakuarhini, sánderu sési ju je kʼéri ambe arhini Tata Diosïni engachi marhuakuni jaka (Jer. 9:23, 24). Ima jukanchasti eskachi kʼéri ambe arhiaka, jimbokachi no ma ambe úpiringa úni engajtsïni ima no jarhuatapiringa (1 Kor. 1:26-31).

12. ¿Ambe máteru ambechi uaa úni parachi májkueni kaxumbitiini eska Jesúsi? Uanda je ejemplu ma.

¹² Ju je exeni máteru ambe engachi uaaka úni parachi májkueni kaxumbitiini eska Jesúsi. Ju je eranhaskani eska orhejtsïkuti ma, kánikua jarhuatasïnga orhejtsïkutiiri jarhuajpirini ma enga sapichku jaka para prepararini imeeri primeru arhijtsïkperatani. Ka indeni ambe jimbo, tumbi kánikua sési nitamatarasïndi arhijtsïkperatani ka kúnguarhikuarhu anapuechaksï kánikua tsitisïndi. Enga kʼamakurhijkia tánguarhikua, nema arhisïndi orhejtsïkutini: “Tumbi kánikua sési arhijtsïkpisti, ¿a no?”. ¿Eranhaskasïntsï orhejtsïkutini arhini: “Jo, ji jarhuataska”? ¿O kaxumbikua jingoni uandaa: “Jo kánikua sési nitamatarasti”? Kʼuiripu ma enga kaxumbitiika, no uétarhinchasïndi eska sési exenhaaka imani ambe jimbo enga újka máteruecha jimbo. Ima sési pʼikuarherasïndi, jimboka mítetixaka eska Tata Diosï Jeoba exesïnga ka eska jukaparharasïnga ambe enga újka (terukutanta je Mateu 6:2-4; Ebr. 13:16 jingoni). Tata Diosï Jeoba kánikua sési pʼikuarherasïndi enga exejka eskachi uékasïnga májkueni kaxumbitiini eska Jesúsi (1 Ped. 5:6).

13. ¿Ambe exesïni Jesúsi enga Naíni inchaakuni japkia ka ambe úsïni? (Lukasʌ 7:11-15).

¹³ (Arhinta je Lukasʌ 7:11-15). Enga Jesúsi tsimani uéxurhini páni japkia aianhpi, Naíni niraspti. Inde ireta Galilea jarhaspti ka Sunemi no iauani pakarasïreendi, nani enga 900 uéxurhini antesi, Eliseu tsítantapka uarhiti tsïndiiri uájpani ma (2 Rey. 4:32-37). Enga Jesúsi inchaakuni japkia Naíni, exespti eskaksï kʼuiripuecha uarhirini ma páxapka jatsintani. Kʼuiripu kánikua kómu pʼikuarheraxapti, jimboka uarhiti tsïndi ma, uarhiranchaspka imeeri máechakua uájpani. Peru uarhiiti no jandiajku jarhaspti; uánikua kʼuiripu iretarhu anapu pámbetaxapti. Jesúsi pʼínguaspti imani kʼuiripuechani engaksï uarhirini páni japka jatsintani ka úsïndi ambe ma para jarhuatani  uarhiitini enga kánikua no sési pʼikuarherani japka: tsítantasïndi imeeri uájpani. I primeru kʼuiripuesti enga Jesúsi tsítantapka ima tanimu kʼuiripuecheeri engaksï Ebanjeliuecha uandajka.

14. Uanda je máru ambe enga Jesúsi úpka enga Lukasʌ kapitulu 7 arhijka (ístu exe je dibujuni).

¹⁴ Ju je exeni máru ambe enga Jesúsi úpka jiáni ka enga Lukasʌ kapitulu 7 jimbo uandajka. Ju je exeni ambe enga xáni úkuarhipka. Orheta, Jesúsi ʻexespti uarhiitiniʼ ka tátsekua “lástima úspti” o kánikua pʼamojkuspti (bersikulu 13). Jamberi Jesúsi exepti eska uarhiiti uepaxapka enga nirani japka uájpani jatsintani. Ka ambe enga Jesúsi exepka mintsita atakuspti. Ima no solu pʼamojkuspti indeni uarhiitini, sino úspti ambe ma para jarhuatani. Ka iátsitakuarhu arhipti: “Ásteru ueraia”. Peru Jesúsi no solu ini ambe arhispti uarhiitini, ístu tsítantaspti imeeri uájpani ka “íntskuntaspti” (bersikuluecha 14 ka 15).

15. ¿Ambechi jorhenguarhisïni ini milagru jingoni enga Jesúsi úpka?

¹⁵ ¿Ambechi jorhenguarhisïni ini milagru jingoni enga Jesúsi úpka? Eskachi jatsiska para pʼamojkuani imeechani engaksï uarhiranchaka nemani. Ísïisti, juchachi no úsïnga tsítaantani uarhiriichani ísï eska Jesúsi na úpka uarhiti tsïndiiri uájpa jingoni. Peru ambe engachi kʼóru uaaka úni jindeesti pʼamojkuani imeechani engaksï uarhiranchaka nemani. Parachi ísï úni, orhetachi jatsiska para jingontku exeni ambe engaksï uétarhinchajka ka tátsekuachi jánguarhintani imani ambe uandani ka úni enga jarhuatauaka ka enga sési pʼikuastantauaka (Prov. 17:17; 2 Kor. 1:3, 4; 1 Ped. 3:8). d Engachi arhiaska máru ambe ka engachi úska ambe ma para jarhuataani, kánikuachi sési pʼikuastantauaka.

16. ¿Ambechi jorhenguarhisïni eksperiensieri enga párrafurhu jaka? (Exe je fotuni enga xarhatajka ambe enga úkuarhipka).

¹⁶ Ju je exeni ambe enga úkuarhipka ma xanhari tánguarhikuarhu ma. Enga pirenhani japka pirekua ma enga tsíntskueri ambe uandajka, pirenchi ma exespti eska máteru pirenchi ueraxapka, ka jindeespti jimboka nótki xáni ióniispka enga imeeri nanaka sapichu uarhipka. I pirenchi mítespti eska nanaka sapichueri amamba no sési nitamakuarhixapka, jimbosï sóntku nípti andarhierani, kamajchakuspti ka márkuksï  pirespti astaka pirekua kʼamarapka. Nanaka sapichueri amamba miásïndi eska jiáni, meru pʼikuarheraspka na engaksï xáni xéncheenga erachiicha. Kánikua sési pʼikuarheraxapti enga nípka tánguarhikuarhu. Ima uandantasïndi: “Mítespka eska tánguarhikuarhu, erachiichajtsïni kánikua uinhaperantapiringa”. Uaakachi seguru jarhani eska Tata Diosï Jeoba exesïnga ka eska jukaparharasïnga ambe engachi xáni újka parachi xarhatani eskachi pʼamojkuasïnga imeechani engaksï uarhiranchaka nemani ka engaksï “kómu pʼikuarherani jarhajka” (Sal. 34:18).

17. ¿Ambejtsïni jorhendasïni milagruecha enga Jesúsi uaapka?

¹⁷ Jorhenguarhini ima milagruecheeri ambe enga Jesúsi uaapka, úsïndi eskachi sánderu mintsikaaka Tata Diosïni. Ambe engaksï Ebanjeliuecha uandajka iiri ambe, jorhendasïndijtsïni eskajtsïni Tata Diosï Jeoba ka Jesúsi kánikua xénchasïnga. Ístu, eska Jesúsi jatsiska uinhapikua para kʼamajkuani iámindu uandanhiateechani engaksï kʼuiripuecha jatsiajka ka eskachi uaaka seguru jarhani eska no ióni jimbo, Tata Diosïiri Reinu uaaka eska ísï úkuarhiaka ambe engajtsïni Tata Diosï aiachika. Ístujtsïni jarhuatasïndi exeni ambe engachi uaaka úni parachi májkueni jámani eska Jesúsi. ¿Andijtsïsï no jorhenguarhiajki máteru milagruechani enga Jesúsi uaapka engajtsï familieri jorhenguarhikua jatsiaka o engajtsï jandiajku jorhenguarhini jauaka? Jánguarhinta je exeni ambe engaksïni jorhendajka Jesúsiiri milagruecha ka aiangua je máteruechani iiri ambe. Engajtsï ísï úska, uaakajtsï ambakiti ambeeri uandontskuarheni máteruecha jingoni (Rom. 1:11, 12).

18. ¿Ambechi exea máteru jorhenguarhikua jimbo?

¹⁸ Últimu uéxurhini enga Jesúsi aianhpini jámapka, tsítantaspti últimu kʼuiripuni ima tanimu kʼuiripuecheeri enga Biblia uandajka eska tsítantaspka. Joperu i kánikua ménderueniispti: tsítantaspti imeeri amiguni ma enga tʼámu jurhiatikua páni japkia enga uarhipka. ¿Ambechi uaa jorhenguarhini i milagrueri ambe ka ambechi uaa úni parachi mintsikani eska jauaka tsíntskua? Máteru jorhenguarhikua jimbochi exeaka ini ambe.