SEMANA 19
Ambechi uaa úni parachi sánderu mintsikani eska jimbanhi parhakpini ma jauaka
“Enga ima [Tata Diosï Jeoba] uandajka ambe ma, ¿andi no ísï úsïni?” (NÚM. 23:19).
PIREKUA 142 Ju je tsípikua jingoni erokuarhini
AMBE ENGACHI EXEAKA a
1, 2. ¿Ambechi jatsiski para úni engachi jamberi erokuarhini jaka eska jimbanhi parhakpini janoaka?
KÁNIKUACHI agradesidu jarhaska Tata Diosï Jeoba jingoni, jimboka aiatspeska eska jimbanhi parhakpini ma juaaka, nani enga jurhimbitku jánhaaka (2 Ped. 3:13). Nájkirukachi no míteka káni juua jimbanhi parhakpini, ambe enga iápurisï úkuarhini jaka xarhatasïndi eska nóteru xáni ióni kuerataxakaia paraka ísï úkuarhiaka (Mat. 24:32-34, 36; Uku. 1:7).
2 Iáminduechachi jatsiska para sánderu mintsikani eska jimbanhi parhakpini ma jauaka, no arhiparini engachi ióni páni jakaia Jeobaeri testigueni. ¿Andi? Jimboka nájkirukachi ióni páni jauaka marhuakuni Tata Diosïni, úpiringachi ueenani nóteru mintsikania ambe engajtsïni ima aiachika. Asta apostoli Pablu uandaspti eska nóteru xáni mintsikani, pekadu máeska engajtsïni “méntku jauenani jarhajka uékani terongutani” (Ebr. 12:1). Parachi no indeni ambe úkuarhinchani, jatsiskachi para pʼindeni someni exeani jarhani pruebechani engaksï xarhatajka eska Tata Diosï Jeoba, no ióni jimbo juaakia jimbanhi parhakpini ma (Ebr. 11:1).
3. ¿Ambechi exeni jaua ini jorhenguarhikua jimbo?
3 Ini jorhenguarhikua jimbo, exenchi jauaka tanimu ambe engajtsïni jarhuataaka mintsikani eska Tata Diosï Jeoba juaaka jimbanhi parhakpini ma: 1) eratsentani euajpintskuani, 2) eratsentani na enga xáni uinhapitiika Tata Diosï Jeoba ka 3) imani ambe úni engajtsïni jarhuataaka sánderu andarhierani Tata Diosïni. Ístuchi exeaka na engajtsïni jarhuatajka sánderu mintsikani ambe enga Tata Diosï Jeoba arhipka Abakukini. Peru orheta, ju je exeni andichisï jatsi para sánderu mintsikani eska jimbanhi parhakpini ma jauaka.
ANDICHISÏ JATSI PARA XARHATANI ESKACHI KÁNIKUA MINTSIKASÏNGA
4. ¿Kánchi jatsiski para xarhatani eskachi mintsikasïnga eska jimbanhi parhakpini ma jauaka?
4 Pauani pauanchi jatsiska para xarhatani na engachi xáni mintsikajka. Pori ejemplu, jatsiskachi para exeni néksï jindeua juchaari amiguecha, ambe jingonchi tsípikuarhia, nani jamberichi niua eskuelarhu, né jingonchi tembuchaa o uambuchaa, sinchi kánguarhiaua sapiichani o nómbe ka ambechi ánchikuarhia. Úpiringachi kurhamarhikuarhini: “¿Ambe xarhatani jarhasïni imani ambe jingoni engani erakujka úni? ¿Xarhatasïni eskani jakajkusïnga eska i parhakpini no ióni jimbo kʼamaraakia ka eska Tata Diosï juaaka jimbanhi parhakpini ma? ¿O májkueni ambe úsïni eskaksï kʼuiripuecha engaksï eratsejka eska no jauaka jimbanhi parhakpini ma?” (Mat. 6:19, 20; Luk. 12:16-21). Engachi jánguarhintaska sánderu mintsikani eska jimbanhi parhakpini axuterku jarhaskia, ambakiti ambechi erakuaka úni.
5, 6. Engachi no sési nitamakuarhini jarhajka, ¿andichisï jatsi para sánderu mintsikani eska Tata Diosï juaaka jimbanhi parhakpini ma? Uandanta je ejemplu ma.
5 Ístuchi jatsiska para xarhatani eskachi mintsikasïnga eska jimbanhi parhakpini ma jauaka engachi no sési kánhani jarhajka, engachi kʼéri pʼamenchakua ma pʼirajka o ambe uéjki engajtsïni úpiringa no sési pʼikuastani. Jamberichi ueenakuarhu eratsejka eskachi uaaka orhepani uérani. Joperu enga uandanhiata ióndajka nitamani, ísï eska na úkuarhijka sáno méntkisï, uétarhiati eskachi kánikua mintsikaaka eska jimbanhi parhakpini ma jauaka, parachi úni tekaantani ka seguiriini tsípikua jingoni marhuakuni Tata Diosï Jeobani (Rom. 12:12; 1 Ped. 1:6, 7).
6 Engachi no sési nitamakuarhini jarhajka, úpiringachi eratseni eska Tata Diosï Jeoba no méni juaaka jimbanhi parhakpinini. Engachi niáraska ísï eratseni, ¿arhikuekasïni eskachi nóteru mintsikasïngia imani? Nómbe. Ju je exeni ejemplu ma. Enga pauani pauani janini jarhajka, úpiringachi eratseni eska jurhiata nóteru uéraakia. Peru jurhiata méntkisï uérasïndi. Sáno májkueni, engachi kánikua kómu pʼikuarherani jarhajka, úpiringachi eratseni eska jimbanhi parhakpini no méni niáraaka. Joperu engachi kánikua mintsikaska Tata Diosïni, seguruchi jauaka eska ambe enga ima uandajka, méntkisï úkuarhisïnga (Sal. 94:3, 14, 15; Ebr. 6:17-19). Mintsikani eska ísï úkuarhiaka, jarhuataatijtsïni sánderu jánguarhintani Tata Diosï Jeobani marhuakuni ka orheta peerani.
7. ¿Ambechi no jatsiski para eratseni?
7 Parachi úni aianhpini, ístuchi jatsiska para kánikua mintsikani eska jimbanhi parhakpini ma jauaka. Engachi uandontskuarhekuajka kʼuiripuechani jimbanhi parhakpiniiri enga Tata Diosï no ióni jimbo juaaka, uánikua kʼuiripuechaksï eratsesïndi eska inde ambe no méni niáraka ísï úkuarhini (Mat. 24:14; Ezeq. 33:32). Joperuchi no jatsiska para májkueni eratseni eska ima kʼuiripuecha engaksï no jakajkujka ini ambe. Parachi no niárani ísï eratseni, jatsiskachi para jánguarhintani seguiriini mintsikani eska ambe engajtsïni Tata Diosï aiachika ísï úkuarhiaka. Ju je exeni tanimu ambe engajtsïni jarhuataaka indeni ambe úni.
EUAJPINTSKUANI ERATSENTANI
8, 9. Engachi eratsentaska euajpintskuani, ¿néna úsïni eskachi sánderu mintsikaaka eska jimbanhi parhakpini ma jauaka?
8 Ma ambe engachi uaaka úni parachi sánderu mintsikani eska jimbanhi parhakpini ma jauaka, jindeesti eratsentani euajpintskuani. Euajpintskua, jarhuatasïndijtsïni seguru jarhani eska ambe enga Tata Diosï aiatspejka ísï úkuarhiaka. Uétarhisïndi eskachi tiempu arhutaaka parachi eratsentani ambe enga xáni úka Tata Diosï Jeoba parajtsïni euajpintani ka andisï ísï ú. Ísïchi sánderu seguru jauaka eska Tata Diosï Jeoba uaaka eska ambakiti parhakpini ma jauaka, nani engachi uaaka irekani para méntkisï. ¿Andichisï ísï uandajki?
9 Ju je eratsentani ambe enga xáni úka Tata Diosï Jeoba parajtsïni euajpintani. Ima jurajkuspti eska imeeri máechakua Uájpa, enga imeeri sánderu ambakiti amigueka, Echerirhu jupiringa para ísï andajpenuni komueska kʼuiripu ma enga perfektuepka. Enga Jesúsi ixú japka, kánikua no sési nitamakuarhispti ka ístu kómu uarhispti. Ísïisti, Tata Diosï Jeoba kánikua maiampisti parajtsïni euajpintani. Ima kánikua xénchpesïndi, ísï jimbo, no méni jurajkupirindi eska imeeri Uájpa xáni kómu nitamakuarhipiringa parachi jucha ma ratujku sési irekani (Juanu 3:16; 1 Ped. 1:18, 19). Jimboka Tata Diosï Jeoba kánikua maiampiska, ima uaati eskachi uaaka irekani para méntkisï jimbanhi parhakpinirhu.
ERATSENTANI NA ENGA XÁNI UINHAPITIIKA TATA DIOSÏ JEOBA
10. Ísï eska na arhijka Efesu 3:20, ¿ambe úsïni úni Tata Diosï Jeoba?
10 Máteru ambe engachi uaaka úni parachi mintsikani eska jimbanhi parhakpini ma jauaka, jindeesti eratsentani na enga xáni uinhapitiika Tata Diosï Jeoba. Ima uinhapikua jatsisti para ísï úni eska ima na aiatspejka. Ísïisti, kʼuiripuechachi úpiringa eratseni eskachi no méni uaaka irekani para méntkisï jimbanhi parhakpinirhu ma. Peru, jimboka ima jindeeska Tata Diosï enga Iámindu ambe újka Úni, mémindu aiatspesïndi ambe engachi kʼuiripuecha no méni úpiringa úni (Job 42:2; Mar. 10:27). ¡Jimbojtsïnisï újti xáni ambakiti ambe aiachini! (Arhinta je Efesu 3:20).
11. Uanda je ma ambe enga Tata Diosï Jeoba aiatspeka ka enga niáraka ísï úkuarhini (exe je rekuadruni “ Máru ambe enga Tata Diosï aiatspeka ka enga niáraka ísï úkuarhini”).
11 Ju je eratsentani máru ambe enga Tata Diosï Jeoba aiakuapka imeeri ióntki anapu marhuariichani ka enga ísï xarhareenga enajki no méni úpirini ísï úkuarhini. Arhispti Abraánini ka Sarani eskaksï kánguarhipiringa sapini ma, nájkirukaksï jatiriipkia (Gén. 17:15-17). Ístu aiakuspti Abraánini eskaksï imeeri desendientiicha Kanaáni irekapiringa. Joperu israeliteecha, engaksï Abraániiri desendientiipka, iónksï jántspispti Ejiptu ka jamberiksï niárapti eratseni eska no méni úkuarhipiringa ambe enga Jeoba aiakupka Abraánini. Joperu niáraspti ísï úkuarhini. Uánikua uéxurhini tátsekua, Tata Diosï Jeoba arhispti Elisabetini eska kánguarhipiringa sapini ma nájkiruka jatiripkia. Ístu aiakuspti Maríani eska ima kánguarhipiringa Tata Diosïiri Uájpani nájkiruka útasï uátsïipka. I ambe kumpliripirindi ambe enga Tata Diosï Jeoba aiatspipka jardini de Edénirhu uánikua uéxurhini antesi (Gén. 3:15).
12. Ísï eska na arhijka Josué 23:14 ka Isaías 55:10, 11, ¿ambeerichi uaa seguru jarhani Tata Diosï Jeobaeri uinhapikueri ambe?
12 Engachi eratsentajka iámindu ambe enga Tata Diosï Jeoba aiatspipka ka ambe enga xáni úka para ísï úni, exesïngachi na enga xáni uinhapitiika ima. I ambe úsïndi eskachi sánderu mintsikaaka eska ima uaaka úni eska jimbanhi parhakpini ma jauaka (arhinta je Josué 23:14; Isaías 55:10, 11). Ístuchi uaaka máteruechani jarhuataani kurhanguni eska Tata Diosï meru uaaka eska jimbanhi parhakpini ma jauaka ka eska i ambe no tsánharhikua máeska ni ambe ma engachi ísku jatini újtsïkuarheni jaka. Enga Tata Diosï Jeoba uandapka eska jimbanhi auanda ma japiringa ka jimbanhi echeri ma, i ambe uandaspti: ‘I uandakuechaksï mintsinharhikuesti ka jurhimbikuenksï’ (Jaŋ. 21:1, 5).
IMANI AMBE ÚNI ENGAJTSÏNI ANDARHITERAAKA TATA DIOSÏNI
TÁNGUARHIKUECHA
¿Nénajtsïni jarhuatasïni i ambe sánderu mintsikani ambe engajtsïni Tata Diosï aiachijka? (Exea je párrafu 13).
13. ¿Nénajtsïni jarhuatasïni tánguarhikuecha sánderu mintsikani ambe engajtsïni Tata Diosï aiachini jaka?
13 Máteru ambe engajtsïni jarhuatajka sánderu mintsikani eska jimbanhi parhakpini ma jauaka, jindeesti imani ambe úni engajtsïni andarhiteraaka Tata Diosïni. Pori ejemplu, ju je eratsentani na engajtsïni xáni jarhuatajka tánguarhikuecha. Anna, b enga ióni marhuakukia Tata Diosïni tiempu kompletueri, uandantasïndi: “Tánguarhikuechajtsïni jarhuatasïndi sánderu mintsikani ambe engajtsïni Tata Diosï aiachini jaka. Ka nájkiruka ima enga arhijtsïkpini jauaka no xáni ambakiti jorhentpiri máeuaka o no uandani imani ambe engani ji no míteka, méntkisï kurhaasïnga ambe ma engareni jarhuatajka sánderu sési kurhanguni Bibliani ka ísï úsïnga sánderuni mintsikani Tata Diosïni”. Ístu, tánguarhikuecharhuchi kurhauasïnga komentariuechani engajtsïni jarhuatajka sánderu mintsikani ambe engajtsïni Tata Diosï aiachijka (Rom. 1:11, 12; 10:17).
AIANHPINI
¿Nénajtsïni jarhuatasïni i ambe sánderu mintsikani ambe engajtsïni Tata Diosï aiachijka? (Exea je párrafu 14).
14. ¿Aianhpini nénajtsïni jarhuatasïni sánderu mintsikani ambe engajtsïni Tata Diosï aiachini jaka?
14 Ístu, uérani aianhpini jarhuatasïndijtsïni sánderu mintsikani ambe engajtsïni Tata Diosï aiachini jaka (Ebr. 10:23). Barbara, enga jukari 70 uéxurhini páni jakaia Jeobaeri testigueni, uandasïndi: “Aianhpini, kánikuarini jarhuatasïndi mintsikani ambe engajtsïni Tata Diosï aiachijka. Sánderuni mintsikasïnga Tata Diosïni engani sánderuni uandontskuarhekuajka kʼuiripuechani Tata Diosï Jeobaeri ambe ka ima ambeeri enga ima aiatspejka enga xáni ambakiti ambeeka”.
JANDIAJKU JORHENGUARHINI BIBLIERI AMBEY
¿Nénajtsïni jarhuatasïni i ambe sánderu mintsikani ambe engajtsïni Tata Diosï aiachijka? (Exea je párrafu 15).
15. ¿Nénajtsïni jarhuatasïni sánderu mintsikani engachi jandiajku jorhenguarhijka Biblieri ambe? (Ístu exea je imajeniichani).
15 Ju je exeni máteru ambe engajtsïni jarhuatajka sánderu mintsikani ambe engajtsïni Tata Diosï aiachijka: jandiajku jorhenguarhini Biblieri ambe. Susan uandasïndi eska kánikua jarhuatasïnga orariu ma jatsini para Bibliani jorhenguarhini. Ima uandantasïndi: “Dominguechani prepararikuarhisïnga rebista Aianhpiri jingoni enga máteru semana jimbo exenhaaka. Ka lunesï ka martesï, prepararikuarhisïnga tánguarhikua jingoni enga entre semana jimbo úkuarhijka. Ka máteru jurhiatikuecha jimbo jorhenguarhisïnga ambe ma engani uékajka sánderu sési míteni”. Jimboka Susan méntkisï ísï úsïnga, jarhuatasïndi para sánderu mintsikani Tata Diosïni. Ka Ireneni enga ióni páni jakaia marhuani Beteli nani enga Jeobaeri testiguecheri ánchikuarhita exenhajka, kánikua jarhuatasïndi Biblieri profesiechani jorhenguarhiani para sánderu mintsikani ambe enga Tata Diosï aiatspejka. Ima uandasïndi: “Ískuni pakarasïnga engani exejka na engaksï kumplirikuarhijka Tata Diosï Jeobaeri profesiecha”. c
“MERU NIÁRAATI ÍSÏ ÚKUARHINI”
16. ¿Andichisï míti eska ambe enga Tata Diosï Jeoba arhipka Abakukini ístu jindeeska para jucha? (Ebreu 10:36, 37).
16 Máru Tata Diosï Jeobaeri marhuariichaksï ióni páxatiia erokuarhini eska i parhakpini kʼamaraaka. Kʼuiripuechaksï úpirindi ísï exeni enajki ióndani jaki ísï úkuarhini. Peru Tata Diosï Jeoba kurhangusïndi na engaksï pʼikuarherajka imeeri marhuariicha, jimbosï aiakupti profeta Abakukini: “Útasï kuerataxa[ti] paraka niáraaka ima tiempu enga uaxastakata jaka jánhaskakueri ambe, ka i ambe sóntku niáraati ísï úkuarhini ka no ísku ambeesti. Nájkiruka sáni sáni ióndapiringa, ¡jingontku ja! Meru niáraati ísï úkuarhini. ¡No ióndaati janoni!” (Hab. 2:3). ¿I uandakuechaksï jindeespi solu para Abakuki o ístujtsïni uinhaperantasïni juchantsïni? Tata Diosï Jeoba, úrasti apostoli Pabluni para inde mismu ambe arhiani imani kristianuechani engaksï erokuarhini jaka eska janoaka jimbanhi parhakpini (arhinta je Ebreu 10:36, 37). Ka nájkirukachi ísï pʼikuarheraaka eska Tata Diosï Jeoba ióndaxaka, ju je miántani eska ima ambe enga ima aiatspejka “meru niáraa[ka] ísï úkuarhini. ¡No ióndaati janoni!”.
17. ¿Ambe úspi pirenchi ma para ísï úni eska Tata Diosï Jeoba na arhipka Abakukini?
17 Uánikua kristianuechaksï ísï úxati eska Tata Diosï Jeoba na arhipka Abakukini ka jingontkuksï jarhasti desde iónisïa. Ju je exeni ambe enga nitamakuarhika pirenchi Louise enga ueenapka marhuakuni Tata Diosï Jeobani 1939 jimbo. Ima uandantasïndi: “Eratsesïreenga eska Armajedoni niárapiringa ante de ji 18 jatiriini. Peru no ísï úkuarhispti. Ambe engareni jarhuataka iámindu ini tiempu jimbo, jindeesti imeecheri ambe arhintani engaksï kánikua tekaantapka komu Noé, Abraáni, José ka máteru Tata Diosï Jeobaeri marhuariicha engaksï jatsipka para erokuarhini astakaksï intsïnhapiringa ambe engaksï aiaminhapka. Mintsikani eska ísï úkuarhiaka eska Tata Diosï na aiatspejka, kánikuarini jarhuatasïndi jíndeni ka ístu máteruechani seguru jarhani eska jimbanhi parhakpini axuterku jarhaskia”. Seguru eskaksï imeecha engaksï desde iónisï marhuakukia Tata Diosï Jeobani, májkueni eratsesïnga eska i pirenchi.
18. ¿Kueraakata ambe nénajtsïni jarhuatasïni mintsikani eska Tata Diosï Jeoba juaaka jimbanhi parhakpinini?
18 Ísïisti, nótkichi úxaka exeni jimbanhi parhakpinini, peru ambe engachi kʼóru újka exeni jindeesti jóskuechani, anhatapuechani animaliichani ka kʼuiripuechani. Ka nájkiruka inde ambe no méntkisï japka, iásï no nema uaati uandani eska inde ambe no jarhaska. Jarhastiksï jimboka Tata Diosï Jeoba kuerauaska (Gén. 1:1, 26, 27). Májkueni, juchaari Tata Diosï aiatspesti eska jauaka jimbanhi parhakpini ma ka ima kumpliriuati ambe enga uandakia. Uaakachi irekani para méntkisï ka nóteruchi pʼamenchaakia. Ísï jimbo, uaakachi seguru jarhani eska Tata Diosï Jeoba juaaka jimbanhi parhakpinini jiáni enga ima uandakia (Is. 65:17; Jaŋ. 21:3, 4).
19. ¿Ambe ka ambechi uaa úni parachi sánderu mintsikani ambe engajtsïni Tata Diosï aiachijka?
19 Enga jamberi niáraaka jimbanhi parhakpini, ju je seguiriini mintsikani eska jimbanhi parhakpini ma jauaka. Ju je eratsentani ambe enga xáni úka Tata Diosï Jeoba parajtsïni euajpintani, ju je eratsentani na enga xáni uinhapitiika Tata Diosï Jeoba ka ju je imani ambe úni engajtsïni andarhiteraaka imani. Engachi iámindu ini ambe úska, uaakachi imeecha jingoni jarhani engaksï “[Tata] Diosïni mintsikaparini ka tekaantskua jingoni pʼi[rajka] indeni ambe engaksï aiaminhapka” (Ebr. 6:11, 12; Rom. 5:5).
PIREKUA 139 ¿Eranhaskasïndi jimbanhi parhakpinini?
a Iásï, uánikua kʼuiripuechaksï no jakajkusïndi eska Tata Diosï Jeoba jimbanhi parhakpini ma juaaka. Ísïksï exesïndi enajki solu sési jásï kuentu máe. Peruchi jucha seguru jarhaska eska iámindu ambe enga Tata Diosï Jeoba aiatspejka niáraaka ísï úkuarhini. Ka parachi seguiriini mintsikani eska ísï úkuarhiaka, jatsiskachi para úni ambe ma. Ini jorhenguarhikua jimbo, exeakachi ambe engachi uaaka úni.
b Mójtakurhistiksï máru nombriicha.
c Índice de las publicaciones Watch Tower jimbo, incha je jima enga arhijka “Profecía” parajtsï uánikua artikuluechani exeani engaksï Biblieri profesiecheri ambe uandajka. Pori ejemplu, exe je artikuluni “Lo que Jehová predice se cumple sin falta”, enga uéraka rebistarhu La Atalaya 1 de eneru 2008 jimbo.
