1. ¿Ambe uandaspi tumbi sapichu ma para xarhatani na enga xáni mintsikajka eska jauaka tsíntskua?

 TUMBI sapichu ma enga Matthew arhinhajka kʼéri pʼamenchakua ma kámasïndi ka someni operarinhastia. Enga ima siete uéxurhini jatiripka, ima ka imeeri familia exexaptiksï programani JW Broadcasting^®. Enga na kʼamarani japkia, imeechaksï exespti bideuni kústakua jingoni enga xarharajka na engaksï erachiicha eroantani jarhajka imeechani engaksï uarhiranchaaka. b Enga na kʼamakurhipkia, Matthew andarhieraaspti taati jémbeechani, jupijkuaspti ka arhiaspti: “Mama ka papa, ¿exeskijtsïa eska engani uarhiaka uaaka tsíntani? Uaakajtsïni erontani jarhani. Iámindu ambe sési uéraati”. ¿Úsïntsï eranhaskani na engaksï pʼikuarherapka imeeri taati jémbeecha engaksï exepka na enga imeecheri sapi xáni mintsikeenga tsíntskuani? Matthew meru jakajkusïndi eskaksï uarhiriicha tsíntaaka.

2, 3. ¿Andisï sési jaki eskachi eratsentaaka eska jauaka tsíntskua?

² Mémindu eratsentani eska jauaka tsíntskua, kánikuajtsïni jarhuataati (Juanu 5:28, 29). ¿Andi? Jimbokachi no míteska ambechi uaa úkuarhinchani pauani. Úpiringachi uinhamu pʼamenchani ochi ma repentku uarhiranchani nemani (Ecl. 9:11; Sant. 4:13, 14). Mintsikani eska jauaka tsíntskua, jarhuataatijtsïni parachi tekaantani engachi indeni ambe nitamakuarhini jauaka (1 Tes. 4:13). Tata Diosïiri Karakatajtsïni aiachisïndi eska juchaari Taati auandarhu anapu kánikuajtsïni sési míteska ka eskajtsïni kánikua xénchasïnga (Luk. 12:7). Ka jimbokajtsïni kánikua sési míteska imajtsïni uaati tsítantani ísï eskachi jucha na jásïika ka uaati eskachi miántaaka juchaari ambe. Ka jimbokajtsïni xáni xénchasïnga aiachisïndijtsïni eskachi uaaka irekani para méntkisï. Nájkirukachi uarhiaka imajtsïni tsítantaati.

³ Ini jorhenguarhikua jimbo exeakachi andichisï uaa mintsikani eska jauaka tsíntskua. Ístu engachi jorhenguarhiska ambe enga xáni úkuarhipka jiáni enga uandanhapka i ambe: “Chiiti mimiti tsíntaati”, jarhuataatijtsïni parachi sánderu mintsikani eska ísï úkuarhiaka ambe engajtsïni Tata Diosï aiachika (Juanu 11:23). Ka últimu, exeakachi  ambe engachi uaaka úni parachi sánderu jakajkuni eskaksï uarhiriicha tsíntaaka.

4. ¿Ambeerichi jatsiski para seguru jarhani engajtsïni nema aiachiska ambe ma? Uanda je ejemplu ma.

⁴ Parachi úni mintsikani eska nema uaaka ambe engajtsïni aiachika, uétarhisïndi eskachi seguru jauaka eska ima uékasïnga ísï úni ka eska jatsiska uinhapikua, o eska uaaka ísï úni. Ju je eratsentani ini ejempluni. Eranhaska je eska uinhamu janisïnga ka eska juchaari kʼumanchikua no sési pakarasïnga. Ka amigu májtsïni arhisïndi: “Jarhuataakakini chiiti kʼumanchikua úntani”. Míteskachi eska ima sési jimbo uandaxaka ka eskajtsïni meru uékaxaka jarhuatani. Ístu, míteskachi eskajtsïni ima uaaka jarhuataani, jimboka ima jorhenaska konstruksioniiri ambe ka jatsiasti erramienteechani engaksï uétarhijka. Ísï jimbo, uaakachi mintsikani eska ima ísï uaaka eska na uandakia. ¿Peruchi uaa mintsikani eska Tata Diosï tsítantauaka uarhiriichani? ¿Meru uékasïni Tata Diosï ísï úni ka jatsiski uinhapikua para indeni ambe úni?

5, 6. ¿Andichisï seguru jaki eska Tata Diosï Jeoba meru uékasïnga tsítaantani imeechani engaksï uarhikia?

⁵ ¿Tata Diosï Jeoba uékasïni tsítaantani uarhiriichani? Jo. Ima úspti eskaksï uánikua achamasïicha engaksï Bibliani karaka uandapiringa tsíntskueri ambe (Is. 26:19; Os. 13:14; Jaŋ. 20:11, 12; Apoc. 20:13, TNM). Ka enga Tata Diosï Jeoba aiatspejka ambe ma, meru ísï úsïndi (Jos. 23:14). Tata Diosï mintsita jingoni uékaxati tsítaantani imeechani engaksï uarhikia. ¿Andichisï ísï uandajki?

⁶ Ju je eratsentani ambe enga uandapka Jobu. Ima seguru jarhaspti eska, enga uarhipiringa, Tata Diosï Jeoba kánikua tsitipiringa ménderu exentani (Job 14:14, 15, nota). Ka Tata Diosï májkueni pʼikuarherasïndi imeeri marhuariicha jimbo engaksï uarhikia. Uékaxati tsítaantani ka eskaksï nóteru pʼamenchaakia ka eskaksï tsípikua jingoni irekaaka. ¿Ka ambe úkuarhia iámindu imani kʼuiripuecha jingoni engaksï no andajkuarhika míteni Tata Diosï Jeobaeri ambe? Juchaari Taati enga xáni xénchpetiika ístu uékasïndi tsítaantani (Hech. 24:15, TNM). Ima uékasïndi eskaksï imeecha niáraaka jindeeni imeeri amiguecha ka eskaksï irekaaka para méntkisï Echerirhu (Juanu 3:16). Xarharasïndi eska Tata Diosï Jeoba meru uékasïnga tsítaantani uarhiriichani.

7, 8. ¿Andichisï seguru jaki eska Tata Diosï Jeoba jatsiska uinhapikua para tsítaantani uarhiriichani?

⁷ ¿Tata Diosï Jeoba jatsiski uinhapikua para tsítaantani uarhiriichani? Jo. Ima jindeesti “enga iámindu ambe újka úni” (Jaŋ. 1:8). Uaati andani náki uéjki enemiguni, asta uarhikuani jamberi (1 Kor. 15:26). Míteni ini ambe kánikuajtsïni uinhaperantasïndi ka sési pʼikuastantani. Ju je exeni ambe enga nitamakuarhipka pirenchi Emma Arnold. Ima ka imeeri familia kánikuaksï no sési nitamakuarhispti enga Segunda Guerra Mundiali úkuarhipka. Imeeri uájpa nanaka, uánikuechani uarhiranchaaspti jima engaksï nasiicha afuersa ánchitauenga kʼuiripuechani. Ka para uinhaperantani imeeri uájpani, Emma arhispti: “Engaksï uarhiriicha no úpiringa tsíntani, inde ambe arhikuekapirindi eska uarhikua sánderu uinhapitiiska eska Tata Diosï, peru inde ambe no ísïisti”. Jiájkani, no nema jarhasti enga sánderu uinhapitiika eska Tata Diosï Jeoba. Ima ústi eska tsípikua jauaka, ísï jimbo ima jatsisti uinhapikua para tsípikua íntsaantani imeechani engaksï uarhikia.

⁸ Máteru ambe engachi jimbo míteka eska Tata Diosï Jeoba uaaka tsítaantani uarhiriichani, jindeesti jimboka ima iámindu ambe miásïnga. Biblia uandasïndi eska ima nombri jatsikuaska iámindu jóskuechani (Is. 40:26). Tata Diosï Jeoba miáuasïndi iámindu imani kʼuiripuechani engaksï uarhikia (Job 14:13; Luk. 20:37, 38). Ima úsïndi iámindu ambe miántani imeecheri enga tsítantauaka, komu na engaksï jásïipka ka na engaksï jámeenga, ka ístu na engaksï irekapka ka ambe engaksï nitamakuarhipka.

9. ¿Chá andisï seguru jaki eskaksï uarhiriicha tsíntaaka?

⁹ Eskachi na exekia, uaakachi seguru jarhani eskaksï uarhiriicha tsíntaaka jimbokachi míteska  eska Tata Diosï Jeoba uékasïnga tsítaantani ka eska jatsiska uinhapikua para ísï úni. Máteru ambe engachi jimbo seguru jaka eska Tata Diosï tsítantauaka uarhiriichani, jindeesti jimboka ima tsítaantaspka máru kʼuiripuechani. Imani jurhiatikuecha jimbo enga Biblia karanhapka, Tata Diosï Jeoba íntsaaspti uinhapikua máru achamasïichani, komu tata Jesukristuni para tsítaantani uarhiriichani. Juanu kapitulu 11 uandasïndi eska Jesúsi tsítantaspka uarhirini ma, ju je jorhenguarhini indeeri ambe.

10. ¿Ambe úkuarhisïni enga Jesúsi aianhpini jámani jarhajka máteru ladu riu Jordánirhu ka enga tsimani jurhiatikua pakarajka Betania uératini, ka ambe eratsesïni úni? (Juanu 11:1-3).

¹⁰ (Arhinta je Juanu 11:1-3). Jesúsi jatsiaspti máru amiguechani engaksï Betania irekapka: Lásaru ka imeeri tsimani pirembeecha, María ka Marta (Luk. 10:38-42). Enga na kʼamarani japkia uéxurhini 32, Lásaru pʼamenchasïndi ka imeeri pirembeechaksï kánikua uandanhiasïndi. Ka uandakuaksï axakusïndi Jesúsini, enga máteru ladu jimbo jaka riu Jordánirhu, ka para jima niárani Betania uératini tsimani jurhiatikua pásïndi (Juanu 10:40). Jamberi Lásaru jiáni uarhijti enga Jesúsi aiangunhajka eska ima pʼamenchaxaka. Nájkiruka Jesúsi mítejkia eska imeeri amigu uarhiskia, ima eratsesïndi útasï tsimani jurhiatikua pakarani jima enga jaka ante de Betania nirani. Ísï jimbo, enga na niárajkia, Lásaru tʼuini tʼámu jurhiatikua páni jarhasïndia uarhirini. Jesúsi uékasïndi úni ambe ma para jarhuataani imeeri amiguechani ka ístu para kʼéri ambe arhini Tata Diosïni (Juanu 11:4, 6, 11, 17).

11. ¿Ambejtsïni jorhendasïni i ambe enga úkuarhipka parachi ambakiti amigu máeni?

¹¹ Ini ambe jingoni enga úkuarhipka jorhenguarhisïngachi eskachi jatsiska para ambakiti amigu máeni. Engaksï María ka Marta uandakua axakupka Jesúsini, nóksï arhispti eska nipiringa Betania. Imeechaksï nomasi arhispti eska imeeri amigu jémba enga ima xáni xéncheenga pʼamenchaxapka (Juanu 11:3). Enga Lásaru uarhipkia, Jesúsi úpirindi tsítantani desde jima uératini enga japka. Joperu ima niraspti Betania para María ka Marta jingoni jarhani, engaksï imeeri amigaechepka. ¿Chá jatsiski amiguni ma engaksïni uékajka jarhuatani nájkirukajtsï chá no kurhakuaka? Enga ísïika, segurujtsï jarhaska eskaksïni ima jarhuataaka jiáni engajtsï uandanhiateechani jatsiauaka (Prov. 17:17). Engachi májkueni jámaska eska Jesúsi, ambakiti amigu máeuakachi. Ju je seguiriini exeni ambe enga úkuarhipka ísï tátsekua.

12. ¿Jesúsi ambe aiakuspi Martani, ka andisï Marta úpirini mintsikani eska Jesúsi úpiringa úni ambe enga aiakupka? (Juanu 11:23-26).

¹² (Arhinta je Juanu 11:23-26). Enga Marta mítejkia eska Jesúsi nóteru iauani jarhaskia para Betania niárani, ima sóntku nirasïndi exeni ka arhisïndi: “Tata, engari tʼu ixú japiringa, juchiiti mimi no uarhipirindi” (Juanu 11:21). Ísïisti eska Jesúsi úpiringa ambakerantani Lásaruni, joperu ima sánderu kʼéri ambe uékaxapti úni. Jesúsi aiakusïndi Martani: “Chiiti mimiti tsíntaati”. Ístu, paraka Marta sánderu mintsikaaka eska imeeri mimiti tsíntaaka, Jesúsi arhisïndi: “Ji jindeeska tsíntskua ka tsípikua”. Ísïisti, Tata Diosï íntskusti uinhapikua Jesúsini para tsítaantani uarhiriichani. Asta jiáni jamberi, Jesúsi tsítantasptia nanaka sapichuni ma enga nótki ióni páni japka enga uarhipka ka tumbini ma, enga jamberi ima mismu jurhiatikua jimbo tsítantapka enga uarhipka (Luk.  7:11-15; 8:49-55). Peru, ¿úpirini tsítantani nemani enga tʼámu jurhiatikua páni japkia uarhirini ka enga imeeri kuerpu úndapkia tereni?

13. Eska na uandajka Juanu 11:32-35, ¿na pʼikuarherasïni Jesúsi enga exejka Maríani ka máteruechani ueranksï jarhani? (Ístu exe je dibujuni).

¹³ (Arhinta je Juanu 11:32-35). Ju je eranhaskani ambe enga úkuarhipka. María, máteru Lásarueri piremba, andarhierasïndi Jesúsini ka májkueni ambe arhisïndi eska Marta: “Tata, engari tʼu ixú japiringa, no uarhipirindi juchiiti mimi”. María ka máteruecha engaksï imeecha jingoni jaka kánikuaksï no sési pʼikuarheraxati. Enga Jesúsi exeajka eskaksï imeecha ueraxaka, imajtu kánikua no sési pʼikuarherasïndi. Jimboka pʼamojkuasïnga imeeri amigu jémbeechani, ístu uerasïndi. Ima sési mítesti na enga pʼikuarherakuarhijka uarhiranchani nemani ka seguru eska uékaxakaia úni ambe ma paraksï imeecha nóteru no sési pʼikuarherania.

14. ¿Ambejtsïni jorhendasïni Tata Diosï Jeobaeri ambe na enga Jesúsi pʼikuarherapka enga exepka eska María ueraxapka?

¹⁴ Na enga pʼikuarherapka Jesúsi enga exepka eska María ueraxapka, jorhendasïndijtsïni eska Tata Diosï Jeobajtsïni kánikua pʼamojkusïnga. ¿Andichisï ísï uandajki? Jimboka eskachi na exekia máteru jorhenguarhikua jimbo, Jesúsi májkueni eratsesïndi ka májkueni pʼikuarherasïndi eska imeeri Taati (Juanu 12:45). Jimajkani, engachi arhintani jarhajka eska Jesúsi ueraspka enga exepka eskaksï imeeri amiguecha xáni no sési pʼikuarheraxapka, jorhendasïndijtsïni eskajtsïni ístu Tata Diosï Jeoba kánikua pʼamojkusïnga engachi jucha uerani jarhajka jimbokachi kánikua no sési nitamakuarhini jarhasïnga (Sal. 56:8). Míteni ini ambe úsïndi eskachi jucha sánderu uékaaka andarhierani juchaari Tata Diosïni enga xáni xénchpetiika.

15. Eska na uandajka Juanu 11:41-44, ¿ambe úkuarhisïni jima enga Lásaru jatsinhantapka? (Ístu exe je dibujuni).

¹⁵ (Arhinta je Juanu 11:41-44). Enga Jesúsi niárajkia jima enga Lásaru jatsinhantajka uandasïndi eskaksï kénditaaka tsakapuni enga míkatini jaka tumbani. Peru Marta arhisïndi eska kuerpu no sési jájkundeni jakaia. Ka Jesúsi arhisïndi: “¿Andi no jíkeni arhiskia eska engari jakajkuska, exeakari na enga xáni kʼéri ambeeka Diosï?” (Juanu 11:39, 40). Tátsekua Jesúsi auandarhu ísï eranchesïndi ka iáminduechani japarini kómarhikua ma úsïndi. Uékasïndi eska Tata Diosï Jeoba kʼéri ambe arhinhaaka imani ambe jimbo  enga uaaka. Ka tátsekua uinhachaparini uandasïndi: “Lásaru, juni uéntani”. Ka Lásaru uéntasïndi tumbarhu. Máruksï no úsïndi jakajkuni ambe enga Jesúsi úka (exe je nota de estudio enga Juan 11:17, TNM jimbo jaka).

16. Ambe enga uandajka Juanu kapitulu 11, ¿nénajtsïni jarhuatasïni sánderu mintsikani eskaksï uarhiriicha tsíntaaka?

¹⁶ Ambe enga uandajka Juanu kapitulu 11 jarhuatasïndijtsïni parachi jucha sánderu mintsikani eskaksï uarhiriicha tsíntaaka. Ju je miántani eska Jesúsi aiakuspka Martani: “Chiiti mimiti tsíntaati” (Juanu 11:23). Májkueni eska imeeri Taati jémba, Jesúsi uékasïndi tsítaantani uarhiriichani ka uaati ísï úni. Enga uerapka, xarhatasïndi eska mintsita jingoni uékasïnga kénditani uarhikuani ka eskaksï kʼuiripuecha nóteru kómu pʼikuarherakia indeni ambe jimbo. Ka enga Jesúsi tsítantapka Lásaruni, ménderu xarhataspti eska jatsiska uinhapikua para tsítaantani uarhiriichani. Ístu, ju je eratsentani ambe enga Jesúsi miátantapka Martani enga arhipka: “¿Andi no jíkeni arhiskia eska engari jakajkuska, exeakari na enga xáni kʼéri ambeeka Diosï?” (Juanu 11:40). Uánikua ambe jarhasti engachi jimbo uaaka jakajkuni eska Tata Diosï Jeoba tsítantauaka uarhiriichani. Peru ¿ambechi uaa úni parachi sánderu jakajkuni eska meru ísï úkuarhiaka?

17. ¿Ambechi jatsipirini para úni engachi arhintani jauaka ima kʼuiripuecheeri enga Biblia uandajka eskaksï tsíntaspka?

¹⁷ Ju je arhintani ka eratsentani imeecheri engaksï ióntki tsíntapka. Biblia uandasïndi ochu kʼuiripuecheeri engaksï tsíntapka ixú Echerirhu. c ¿Andichisï no jánguarhintajki sánderu sési jorhenguarhini imeecheri ambe? Engachi jorhenguarhini jauaka, ju je no mirikurhini eskaksï inde kʼuiripuecha, acheetiicha, uarhiitiicha ka sapiicha, meruksï irekaspka. Ju je jánguarhintani exeni ambe engachi uaaka jorhenguarhini. Ka ju je eratsentani na enga mándani ejemplu xarhatajka eska Tata Diosï meru  uékasïnga tsítaantani uarhiriichani ka eska uaaka ísï úni. Ka sánderu jukaparhakua ambe, ju je eratsentani Jesúsiiri tsíntskueri ambe. Imanksï uánikua kʼuiripuecha exespti enga ima na tsíntapkia. Ka enga ima ísï tsíntapka, jarhuatasïndijtsïni seguru jarhani eska sánderu orhepani uarhiriichaksï tsíntaaka (1 Kor. 15:3-6, 20-22).

18. ¿Ambechi uaa úni paraksï pirekuecha engaksï tsíntskueri ambe uandajka uaakajtsïni uinhaperantani ka sési pʼikuastantani? (Ístu exe je notani).

¹⁸ Ju je kurhauani, eratseantani ka pireani, pirekuechani engaksï tsíntskueri ambe uandajka (Efes. 5:19). d Íksï pirekuecha úsïndi eskachi sánderu mintsikaaka eska jauaka tsíntskua. Ísï jimbo, kánikua sési jauati eskachi familieri jorhenguarhikuarhu kurhauauaka, pireani ka eskachi uandontskuarheaka ambe engajtsïni jorhendajka ambe engaksï i pirekuecha uandajka. Uaakachi jorhenguarhiani memoria jimbo ka parakajtsïni mintsitarhu niáracheaka uétarhisïndi eskachi eratsentaaka ambe engaksï uandajka. Engachi ísï úska, jiáni engachi úkuarhinchaska ambe ma engachi jimbo úpiringa uarhini o engachi uarhiranchaska nemani, Tata Diosï Jeobaeri uinhapikuajtsïni jarhuataati parachi úni miátantani íni pirekuechani. I ambejtsïni uinhaperantaati ka sési pʼikuastantani.

19. ¿Ambechi uaa eranhaskani engachi eratsentani jauaka tsíntskueri ambe? (Exe je rekuadruni “ ¿Ambejtsï kurhamarhiapirini?”).

¹⁹ Ju je eranhaskani ambe enga úkuarhiaka. Tata Diosï Jeoba ústi eskachi jucha uaaka eranhaskani na engachi irekaaka jimbanhi parhakpinirhu. Pirenchi ma uandasïndi: “Ióni pakarasïnga eranhaskani na engachi irekaaka jimbanhi parhakpinirhu, astani jamberi sïpiruani jarhasïngia rosaliichani Paraisurhu”. Ju je eranhaskani na engachi sési pʼikuarheraaka míteani ambakiti kʼuiripuechani enga Biblia uandaajka. ¿Nénchi uékaxakia míteni? ¿Ambechi kurhamarhipirini? Ju je eranhaskani ambe enga úkuarhiaka engachi ménderu exeantauakia imeechani engachi uarhiranchaaka. Ístu, ju je eratsentani ambe engachi orhetku arhiauaka, na engachi xáni tsípikua jingoni kamajchakuauaka ka na engachi xáni sési pʼikuarheraaka engachi ménderu exeantauakia.

20. ¿Ambechi jatsiski para seguiriini úni?

²⁰ Kánikuachi agradesidu jarhaska Tata Diosï Jeoba jingoni jimbokajtsïni aiachisïnga eska tsítantauaka uarhiriichani. Ka seguruchi jarhaska eska ima uékasïnga tsítaantani ka eska uaaka ísï úni. Ísïisti enajkijtsïni arhini jaki: “Imeecha engari uarhiranchaaka tsíntaatiksï”. Ju je seguiriini sánderu mintsikani eskaksï uarhiriicha tsíntaaka. Engachi ísï úska, sánderuchi andarhieraaka Tata Diosï Jeobani, imani engajtsïni aiachini jaka ini xáni ambakiti ambe.