1. ¿Andichisï komentarijki tánguarhikuecharhu?

 ¿ANDICHISÏ nirajki tánguarhikuecharhu? Ma ambe ka enga sánderu jukaparhakueka engachi jimbo nirajka tánguarhikuecharhu, jindeesti jimbokachi uékasïnga kʼéri ambe arhini Tata Diosï Jeobani (Sal. 26:12; 111:1). Ka ístu, engachi no sési nitamakuarhini jarhajka, tánguarhikuecharhuchi uinhaperperantasïnga (1 Tes. 5:11). Ísï jimbo, engachi komentarijka tánguarhikuecharhu, indeni tsimani ambechi úni jarhasïnga.

2. ¿Na jatinchi úsïni komentariini tánguarhikuecharhu?

² Mándani semanachi úsïnga komentariini tánguarhikuecharhu. Pori ejemplu, fini de semanachi úsïnga komentariini engachi jorhenguarhini jarhajka rebista Aianhpiri jingoni. Ka tánguarhikuarhu enga entre semana jimbo úkuarhijka, úsïngachi komentariini partirhu “Jukaparhakua ambe” ka “Biblieri jorhenguarhikua kúnguarhikua jingoni” ka ístu imani partiicharhu engachi arhinhajka eskachi uaaka komentariini.

3. a) ¿Andichisï ménichani no újki komentariini? b) ¿Nénajtsïni jarhuatasïni ambe enga arhijka Ebreu 10:24, 25?

³ Iáminduechachi uékasïnga kʼéri ambe arhini Tata Diosï Jeobani juchaari komentariuecha jingoni ka uinhaperaantani máteruechani. Peru jarhasti máru ambe engachi jimbo no újka ísï úni, komueska engachi kánikua chéjka engachi jamberi no újka komentariini o engachi someni tarhatajka jájki ka nóchi iámindu komentariuechani intsïnhaani. Engachi ísï úkuarhinchajka, kánikuajtsïni jarhuataati ambe enga apostoli Pablu karakuapka Ebreuechani. Enga ima uandani japka na enga xáni jukaparhakueka tánguarhikuecharhu nirani, arhiaspti eskaksï jatsispka para sánderu ʻuinhaperperantani máteru ka máteruni jingoniʼ (arhinta je Ebreu 10:24, 25). Engachi méntkisï miáska eskachi uaaka uinhaperaantani máteruechani  nájkirukachi no xáni kʼéri komentariu ma íntspiaka, nóchi xáni chéaka jájki tarhatani. Ka engachi no uaaka komentariini xáni eskachi xáni uékapiringa, sésichi pʼikuarheraaka engaksï máteruechajtu uaaka komentariini (1 Ped. 3:8).

4. ¿Náki tanimu ambechi exeni jaua ini jorhenguarhikua jimbo?

⁴ Ini jorhenguarhikua jimbo, orhetachi exeaka ambechi uaa úni parachi uinhaperperantani engachi kúnguarhikuarhu ma jauaka enga no xáni kʼéaka, engaksï namunitku erachiicha jarhajka ka engachi újka uánikua xanhari komentariini. Tátsekuachi exeni jauaka ambechi uaa úni engachi kúnguarhikua ma jimbo jauaka enga kʼéaka, nani engaksï uánikua erachiicha jarhajka engaksï uéjka komentariini, ka últimu exeni jauakachi nénachi jatsiski para komentariini parachi meru uinhaperaantani máteruechani.

5. ¿Ambechi jatsiski para úni parachi uinhaperperantani engachi namunitu erachiicha jauaka kúnguarhikuarhu?

⁵ Grupurhu ma o kúnguarhikuarhu ma enga no xáni kʼéjka, nóksï uánikua erachiicha jarhasïndi engaksï uaaka komentariini para jarhuatani imani enga nitamatarajka parti ma tánguarhikuarhu. Ménichani, erachi jatsisïndi para erokuarhini sáni paraka nema tarhataaka jájki. Enga i ambe úkuarhijka, erachiichaksï kuatantasïndi tánguarhikuarhu ka ísïksï no uinhaperperantasïndi. ¿Ambechi uaa úni enga i ambe úkuarhiska? Ju je jingontku jarhani parachi uánikua xanhari komentariini, ísïchi jarhuataani jauaka máteruechani paraksï sánderu komentariini.

6, 7. ¿Ambejtsï uaa úni parajtsï no xáni chéni komentariini?

⁶ Uánikua erachiichaksï chésïndi engaksï eratsejka eskaksï jatsiska para komentariini. Enga chá ísï pʼikuarherajka, ¿andijtsïsï no exejki ambe engaksïni uaaka jarhuatani parajtsï no xáni chéni komentariini ka ísïjtsï úni uinhaperaantani máteruechani?

⁷ Ambe ma engaksïni uaaka jarhuatani, jindeesti ménderu exeani máru konsejuechani engaksï jaka rebisteecharhu Aianhpiri. b Ma konseju jindeesti eskachi jatsiska para sési prepararikuarhini (Prov. 21:5). Enga chá sánderu sési jorhenguarhiska informasionini, sánderu fásiliuati eskajtsï tarhataaka jájki parajtsï komentariini. Máteru ambe engajtsï uaaka úni, jindeesti no xáni uánikua ambe uandani (Prov. 15:23; 17:27). Engajtsï no xáni uánikua ambe uandaaka nójtsï xáni chéaka. Ístu, erachiichaksï sánderu fásili kurhanguati komentariu ma enga no xáni kʼéaka ka eska komentariu ma enga uánikua puntuechani uandauaka. Enga chá imani ambe uandaska enga chá jorhenguarhika, máteruechaksï exeati eska chá sési prepararikuarhiska ka eskajtsï sési kurhanguska informasionini.

8. ¿Na exesïni Tata Diosï Jeoba engachi jucha jánguarhintajka komentariini?

⁸ Enga chá újkia ma o tsimani xanharisï komentariini, joperujtsï útasï chéni pʼikuarherani nájkirukajtsï úkia máru ambe engaksï i konsejuecha arhijka, ¿ambejtsï uaa úni? Miá je eska Tata Diosï Jeoba kánikua jukaparharasïnga na engajtsï xáni jánguarhintajka komentariini (Luk. 21:1-4). Peru ima no erokuarhisïndi eskajtsï chá imani ambe uaaka engajtsï no újka úni (Filip. 4:5). Ísï jimbo, exe je ambe engajtsï uaaka úni, jánguarhinta je ísï úni ka kurhaku je Tata Diosï Jeobani eskaksïni jarhuataaka no xáni chéni. Orhetajtsï uaaka komentariu ma íntspini enga no xáni kʼéaka.

9. ¿Ambe úpirini úkuarhini kúnguarhikua ma jimbo enga kʼéjka?

⁹ Enga chaari kúnguarhikuarhu uánikua erachiicha jaka, jamberijtsï ménichani no ma komentariu intsïnhajka jimbokaksï uánikua erachiicha jarhaska engaksï uéjka komentariini. Ju je eratsentani ambe enga úkuarhinchapka Daniela,  pirenchi ma enga kánikua tsitijka komentariini. c Ima uandasïndi eska kʼéri ambe arhisïnga Tata Diosï Jeobani enga komentarijka, eska uinhaperaantasïnga máteruechani ka eska inde ambe jarhuatasïnga no mirikurhini jurhimbikua ambe enga Biblia jorhentpijka. Joperu enga ueenapka marhuani kúnguarhikuarhu ma enga kʼépka, nóteru xáni uánikua komentariuechani intsïnhaasïreendia ka ménichani, ni máechakua. Ima uandantasïndi: “Kánikua no sési pʼikuarherasïreenga, ísï pʼikuarherasïreenga enajkini pribilejiu ma euanhantapi. Engaksïni uánikua xanhari no íntskujka komentariu ma, niárasïngari eratseni eskaksï uékani ísï úni jarhasïnga”.

10. ¿Ambejtsï uaa úni parajtsï úni komentariini tánguarhikuecharhu?

¹⁰ ¿Ménisïjtsï niáraski ísï pʼikuarherani eska Daniela? Enga ísïika, jamberijtsï eratsejka eska sánderu sésiiska nóteru tarhatania jájki para komentariini ka solu kurhaani jarhania. Joperu seguirii je jánguarhintani. ¿Ambejtsï uaa úni? Uaakajtsï uánikua komentariuechani preparariuani. Engajtsï ísï úska, uaakajtsï náki uéjki párrafurhu komentariini. Ka engajtsï prepararikuarhini jauaka rebista Aianhpiri jingoni, eratsenta je na enga mándani párrafu terukuntajka jorhenguarhikueri tema jingoni, ísïjtsï uaaka indeni ambe komentariini. Ístujtsï uaaka imani párrafuecha jingoni prepararikuarhini engaksï Biblieri jurhimbikua ambe uandajka enga úkua jukajka kurhanguni (1 Kor. 2:10). Sáno méntkisï indeni párrafuecha jimbo, nóksï uánikua erachiicha tarhatasïndi jájki, jimboka sánderu úkua jukasïnga para eksplikariini. Engaksï uánikua tánguarhikuecha nitamaakia, ka chá útasï no intsïnhani jarhani komentariu ma nájkirukajtsï úkia eskaksï i konsejuecha na uandajka, ¿ambejtsï uaa úni? Ante de ueenani tánguarhikua, uaakajtsï arhini erachini enga nitamataraaka jorhenguarhikuani nanijtsï tsitipirini komentariu ma íntspini.

11. Eska na arhijka Filipusʌ 2:4, ¿ambechi uaa úni?

¹¹ (Arhinta je Filipusʌ 2:4). Tata Diosïiri jarhuajperata jingoni, apostoli Pablu arhiaspti kristianuechani eskaksï pendienti paapiringa máteruechani. ¿Nénachi uaa ísï úni tánguarhikuecharhu eska i konseju na arhijka? Engachi miántaska eskaksï máteruechajtu uékasïnga komentariini.

12. ¿Ambechi uaa úni parachi uinhaperaantani máteruechani tánguarhikuecharhu? (Ístu exe je fotuni).

¹² Ju je eratsentani ini ambe, engachi juchaari amiguecha jingoni jarhajka nóchi juchajku uandani jarhasïnga, sino jurajkuasïngachi eskaksï  imeechajtu uandaaka ambe ma, ¿no ísïiski? Ka tánguarhikuecharhujtu sáno májkuenisti. Juchachi uékasïnga eskaksï uánikua erachiicha komentariuaka. Ka ma ambe engachi uaaka úni parachi uinhaperaantani juchaari erachiichani, jindeesti jurajkuani eskaksï imeechajtu uandaaka ambe engaksï jakajkujka (1 Kor. 10:24). Ju je exeni ambe engachi uaaka úni parakaksï uánikuecha komentariuaka.

13. ¿Ambechi uaa úni parakaksï ístu máteru erachiicha uaaka komentariini?

¹³ Ma ambe engachi uaaka úni jindeesti eskaksï juchaari komentariuecha no xáni kʼéaka, engachi ísï úska jauati tiempu paraksï ístu máteru erachiicha komentariini. Orhejtsïkutiicha ka ístu máteru Testiguecha engaksï ióni páni jakaia marhuakuni Tata Diosïni, uaatiksï ambakiti ejemplu ma íntspini engaksï ísï úska. Ístuchi no jatsiska para méntku iámindu puntuechani uandaani engaksï párrafurhu ma jauaka. Enga chá uandaska iámindu ambe enga párrafurhu jaka, máteruechaksï nóteru ambe ma uaatiia komentariini. Pori ejemplu, i párrafu tsimani konsejuechani íntspiasïndi, eskaksï juchaari komentariuecha no xáni kʼéraaka ka eskachi no uandauaka iámindu puntuechani engaksï párrafurhu ma jauaka. Engajtsï chá orheta intsïnhaska komentariu i párrafueri, uaakajtsï máechakua konsejuerku uandani enga i párrafu arhijka.

14. Engachi exeni jauaka namuni xanharichi tarhataa jájki para komentariini, ¿ambechi jatsiski para eratseni? (Ístu exea je fotuechani).

¹⁴ Engachi exeni jauaka namuni xanharichi tarhataa jájki parachi komentariu ma intsïnhani, ístuchi jatsiska para eratseni eskaksï máteruechajtu uékaaka komentariini. Engachi jucha someni tarhatani jauaka jájki, jamberi ima erachi enga jorhenguarhikuani nitamatarani jauaka, ísï pʼikuarheraati enajkijtsïni jatsi para uánikua komentariuechani íntskuani nájkirukaksï máteruecha nótki komentariini jauaka. Ístu, engachi ísï úska, máteruechaksï nóteru uékapirindia komentariini (Ecl. 3:7).

15. a) Engachi no intsïnhaska komentariu ma tánguarhikuarhu, ¿ambechi no jatsiski para úni? b) ¿Ambe ka ambe jatsiski para exeni ima erachi enga uaani jarhajka kurhamarhikuechani? (Exe je rekuadruni “ Néna nitamatarani parti ma engaksï erachiicha jatsijka para komentariini”).

¹⁵ Engaksï uánikua erachiicha tarhatajka jájki  paraksï komentariini, jamberichi jucha no uaaka xáni komentariini eskachi na uékapiringa, ka jamberi niárapirindi kʼamakurhini tánguarhikua ka juchachi no ma komentariu íntspini. Ísïisti, inde ambejtsïni no sési pʼikuastapirindi, joperu ju je no jámani ikiani (Ecl. 7:9).

16. ¿Ambechi uaa úni parachi uinhaperaantani imeechani engaksï komentariijka?

¹⁶ Nájkirukachi no uaaka xáni komentariini eskachi na uékapiringa, méntkisïchi uaaka jingontku kurhaani engaksï máteruecha komentariuaka ka enga na kʼamakurhiakia tánguarhikua, felisitariuani. Jamberi ima ambakiti ambe engachi arhiauaka, májkueni uinhaperantauati erachiichani eska ima ambe engachi uékani japka komentariini (Prov. 10:21). Engachi felisitariuajka máteruechani, ístuchi uinhaperaantasïnga.

17. a) ¿Ambeksï uaa úni taatiicha? b) Seguni eska na uandajka bideu, ¿náki tʼámu ambejtsïni jarhuataa sési preparariini komentariu ma? (Ístu exe je notani).

¹⁷ ¿Ambe máteru ambechi uaa úni parachi uinhaperperantani tánguarhikuecharhu? Enga chá kaajka sapiichani, jarhuataa je paraksï imani komentariuecha jingoni prepararikuarhini engaksï uaaka íntspiani (Mat. 21:16). Máru tánguarhikuecharhu, ima ambe exenhasïndi enga delikaduejka, komu problemeecha engaksï temungurhiriicha jatsiajka o néna no niátani ikichakueni jásï ambe, nájkiruka i ambe exenhani jauaka, sapiichaksï uaati komentariini ma o tsimani párrafuecharhisï. Ístu, uaakajtsï jarhuataani chaari sapiichani, paraksï kurhanguni andiksïsï no uaa intsïnhani  komentariu ma méni engaksï imeecha tarhataaka jájki. Enga chá aianguaska ini ambe chaari sapiichani, imeechaksï no kómu pʼikuarheraati enga máteru nema intsïnhaska komentariu ka imeecha nómbe (1 Tim. 6:18). d

18. ¿Ambechi uaa úni parachi no jukari uandani juchaari ambe engachi komentariu ma íntspini jauaka? (Proverbios 27:2).

¹⁸ Iáminduechachi uékasïnga ambakiti komentariuechani íntspiani engaksï kʼéri ambe arhiaka Tata Diosï Jeobani ka engaksï uinhaperantauaka juchaari erachiichani (Prov. 25:11). Nájkirukachi ménichani uaaka komentariini ambe ma engachi jucha nitamakuarhika, nóchi jatsiska para jukari uandani juchaari ambe (arhinta je Proverbios 27:2; 2 Kor. 10:18). Sánderu sési, jatsiskachi para Tata Diosï Jeobaeri ambe uandani, imeeri Karakateeri ambe ka imeeri kúnguarhikueri ambe (Jaŋ. 4:11). Peru enga párrafueri kurhamarhikua ma jindeuaka para uandantani ambe engachi jucha nitamakuarhika, uaakachi ísï úni. Máteru párrafu jimbo exeakachi ejemplu ma.

19. a) ¿Ambechi uaa úni engachi pendienti paaska máteruechani tánguarhikuecharhu? (Roma 1:11, 12). b) ¿Chá andisï tsitijki komentariini tánguarhikuecharhu?

¹⁹ Nájkiruka no jaka ambe ma enga uandajka na engachi jatsika para komentariini tánguarhikuecharhu, iáminduechachi uaaka jánguarhintani parakaksï juchaari komentariuecha uinhaperantauaka máteruechani. Para máru erachiicha i ambe arhikuekati eskaksï jatsiska para sánderu komentariini ka para máteruecha eskaksï sési pʼikuarheraaka imani komentariuecha jingoni engaksï intsïnhaaka ka ístu eskaksï sési pʼikuarheraaka engaksï máteruecha ístu uékaaka komentariini. Engachi pendienti paaska máteruechani tánguarhikuecharhu, iáminduechachi uinhaperperantaaka (arhinta je Roma 1:11, 12).