1. ¿Néna uékasïni Tata Diosï Jeoba eskachi jindeuaka?

 TEMUNGURHIRI ma kánikua tsípisïndi enga imeecheeri charhaku andajpenujka. Kánikuaksï xénchasïndi, joperuksï no uékasïndi eska méntkisï charhaku máeuaka. Pori ejemplu, kánikuaksï uandanhiapirindi enga i charhaku no kʼéni japiringa. Májkueni úkuarhisïndi, Tata Diosï Jeoba kánikua tsípisïndi engajtsïni exejka eskachi ueenaskia jorhenguarhini imeeri ambe, joperu no uékasïndi eskachi méntkisï ísï eratseaka o jámani ‘komueska charhaku’ ma (1 Kor. 3:1). Sánderu sési, ima uékasïndi eskachi kristianu máeuaka enga ‘ísï eratseaka eskaksï kʼératiicha’ (1 Kor. 14:20).

2. ¿Náki kurhamarhikuechanchi mókuantaua?

² Ini jorhenguarhikua jimbochi mókuantani jauaka ini kurhamarhikuechani: ¿ambe arhikuekasïni kristianu máeni enga ísï eratsejka eskaksï kʼératiicha?, ¿ambechi jatsiski para úni parachi kristianu máeni enga eratsekua jukariika?, ¿andisï xáni jukaparhakue sánderu sési jorhenguarhini Biblieri ambe enga ísïika komueska tʼirekua enga xaxanhajka ka andichisï no jatsi para mintsinharhikuarhini?

¿AMBE ARHIKUEKASÏNI KRISTIANU MÁENI ENGA ÍSÏ ERATSEJKA ESKAKSÏ KʼÉRATIICHA?

3. ¿Ambe arhikuekasïni Bibliarhu kristianu máeni enga ísï eratsejka eskaksï kʼératiicha?

³ Enga Bibliarhu uandajka “ísï eratsi je eskaksï kʼératiicha”, no imeechanisï arhikuekaani jati engaksï sánderu jatiriikia. Uandakua griegu enga ísï tradusirikuarhijka komueska “kʼératiicha” ístu uaati arhikuekani nema enga “jánhaskatiika” (1 Kor. 2:6). a Niárasïngachi kristianu máeni enga ísï eratsejka eskaksï kʼératiicha engachi sánderu sési pájperajkia Tata Diosï Jeoba jingoni ka nóchi imani ambe jingontku pakarani engachi ueenani jámani jorhenguarhipka. ¿I ambe arhikuekasïni eskachi nóteru ambe ma uaakia? Nómbe. Sánderu sési, jatsiskachi  para seguiriini jánguarhintani sánderu sési pájperani Tata Diosï jingoni (1 Tim. 4:15). ¿Joperu nénachi mítesïni eska kristianu ma eratsekua jukariiskia nájkiruka sapichku jauaka o jatiriinia?

4. ¿Ambe úsïni kristianu ma enga ísï eratsejkia eskaksï kʼératiicha?

⁴ ¿Ambe úsïni kristianu ma enga ísï eratsejkia eskaksï kʼératiicha? Kurhajchasïndi Tata Diosï Jeobani, ísï úsïndi eska ima na juramujka ka no imani ambejku úni ambe enga ima sési exeaka. Ka nájkiruka no perfektueka ka ménisï no sési ambe úni, jánguarhintasïndi ísï irekani ka ísï eratseni eska Tata Diosï Jeoba na uéjka. Ísï jimbo, pauani pauani jánguarhintasïndi ísï eratseni eska Tata Diosï Jeoba ka mójtakurhini, enga ísï terukuntajka komueska jimbanhi xukuparhakua jukantani (Éfes. 4:​22-24). Jorhenguarhisti néna úrani Tata Diosï Jeobaeri lei ma ka ístu prinsipiu ma ka jimbosï no uétarhinchajti kʼéri lista ma enga arhiaka ambe enga jatsika para úni ka ambe nómbe. Ka enga na eratsejkia ambe enga uaaka, jánguarhintasïndi ísï úni (1 Kor. 9:​26, 27).

5. ¿Ambeksï úpirini úkuarhinchani ima kristianuecha engaksï ísï eratsejka eska sapi ma? (Éfesu 4:​14, 15).

⁵ Joperu ima kristianuecha engaksï ísïika eskaksï sapiicha, uaatiksï sóntku jakajkuni ambe engaksï “kʼuiripuecha jorhentpijka engaksï sési mítekuka néna támisï jánhastpini”. Jamberiksï jakajkuati imani ambe enga no ísïika o ambe engaksï apostateecha uandajka (arhinta je Éfesu 4:​14, 15). b Oksï enbidia pákuani máteruechani, méntku uékani jarhani arhirperani máteruechani jingoni, sóntku ikiani oksï no úni pʼíngukuarhini ka no sési jásï ambeksï niátani (1 Kor. 3:3).

6. ¿Andichisï uandajki eska kristianu ma enga niárajkia eratsekua jukariini ísïiska komueska sapi ma enga kʼuiripeni jarhajka asta niárani kʼériini? (Ístu exe je imajenini).

⁶ Imani kristianuni enga niárajkia eratsekua jukariini, Biblia ísï terukutantasïndi komueska sapi ma enga kʼuiripeni jarhajka astaka na niárajkia kʼériini. ¿No ísïiski eska sapi ma uétarhinchasïnga eska kʼéri ma jarhuataaka jimboka uánikua ambe no míteska? Pori ejemplu, naandi ma jupijtasïndi imeeri nanaka sapichuni para xanharu jimbo parhikuni. Ka enga na kʼépani jarhajkia, jamberi jurajkujtia para jandiajku parhikuni, joperu miátantasïndi eska jatsiska para jiniani ka ixúani eraani para exeni eska no ma karru jurhani jauaka ante de parhikuni. Ka enga na kʼéjkia, úsïndia jandiajku exeni ambesï uaa. Májkueniisti kristianu ma jingoni. Ima enga no ísï eratsejka eskaksï kʼératiicha, uétarhinchasïndi eska kristianu ma enga eratsekua jukariikia méntku jarhuatani jauaka para no no sési ambe úni, sino imani ambe enga sési jaka. Joperu  kristianu ma enga ísï eratsejkia eskaksï kʼératiicha, sési eratsentasïndi ambe engaksï Bibliarhu anapu prinsipiuecha arhijka para míteni na exesïni ambe ma Tata Diosï Jeoba ka ísï ambakiti ambe erakusïndi úni.

7. Ima kristianuecha engaksï ísï eratsejkia eskaksï kʼératiicha, ¿uétarhinchasïnksï jarhuajperata?

⁷ Ka ima kristianuecha engaksï ísï eratsejkia eskaksï kʼératiicha, ¿útasïksï uétarhinchasïni jarhuajperata? Jo, imeechajtuksï uétarhinchasïndi eska nema jarhuatauaka. Joperu no májkueni eska ima kristianuecha engaksï no eratsekua jukariika, jimbokaksï iicha méntkisï erokuarhini jarhasïnga eskaksï máteruecha arhiauaka ambe engaksï jatsika para úni. Joperu kristianu ma enga ísï eratsejkia eskaksï kʼératiicha, sési úraasïndi imani konsejuechani engaksï íntsaajka ima erachiicha engaksï sánderu mítekuka, ka ístu sési mítesti eska jatsiska para “miákuarhini jarhani ambe enga uaaka” (Gal. 6:5).

8. ¿Andiksïsï no májkuenii iámindu kristianuecha engaksï ísï eratsejka eska kʼératiicha?

⁸ Ísï eska kʼuiripu ma na no májkueni jáxeka eska máteru, nóksï iámindu kristianuecha engaksï ísï eratsejka eskaksï kʼératiicha májkueni járhati kualidadiichani jatsiasti. Pori ejemplu, jarhastiksï máru engaksï jánhaskatiika, máteruecha engaksï kánikua balori jukaka, máru engaksï kánikua intsïmpitiika ka máteruecha engaksï kurhangutspijka. Ka úpirindiksï tsimani kristianuecha ménderueni exeni ambe ma, ka no nema no sési úxati jimbokaksï Bibliarhu jupindaskuarhisïnga ka imeecheeri konsiensia no no sési pʼikuastaasïndi. Enga i ambe úkuarhijka, nóksï no sési exesïndi ambe enga erakujka úni máteru, sánderu sési, jánguarhintasïndiksï sési pájperani (Rom. 14:10; 1 Kor. 1:10).

¿AMBECHI JATSISKI PARA ÚNI PARACHI KRISTIANU MÁENI ENGA ÍSÏ ERATSEJKA ESKAKSÏ KʼÉRATIICHA?

9. ¿Úsïni kristianu ma ísï eratseni eskaksï kʼératiicha enga na tiempu nitamajkia ka andichisï ísï uandajki?

⁹ ¿A no eska tiempu jingoni sapi ma niárasïnga kʼéni? Joperu no ma kristianu niárasïndi ísï eratseni eskaksï kʼératiicha nájkiruka ióni nitamajkia. Pori ejemplu, Korintu anapu erachiichaksï jiókuarhispti ambakiti aianhperakuani, itsï atakuarhisptiksï, intsïnhasptiksï espiritu santu ka uánikua ambeksï jorhenguarhispti apostoli Pablueri ambe (Úku. 18:​8-11). Joperu ísï tátsekua engaksï na itsï atakuarhipkia, máruksï seguirixapti ísï eratseni o jámani eska sapi ma (1 Kor. 3:2). ¿Ambechi uaa úni parachi no májkueni úkuarhinchani?

10. ¿Ambechi jatsiski para úni parachi kristianu máeni enga ísï eratsejka eskaksï kʼératiicha? (Judasï 20).

¹⁰ Parachi niárani ísï eratseni eskaksï kʼératiicha, orhetachi jatsiska para tsitini ísï eratseni eskaksï kʼératiicha. Imeecha engaksï méntkisï ísï uéjka jámani eskaksï sapiicha nóksï méni niárasïndi kristianu máeni enga ísï eratsejka eskaksï kʼératiicha (Prov. 1:22). Nóchi uékasïnga ísïini eska ima kʼuiripuecha engaksï kʼériikia ka nóksï ambe ma uékani úni, soluksï erokuarhini jarhani eskaksï imeeri taatiicha arhiauaka ambe úni. Sánderu sési, jatsiskachi para jandiajku miákuarhini eskachi jatsiska para sánderu sési pájperani Tata Diosï Jeoba jingoni (arhinta je Judasï 20). Engajtsï exejka eskajtsï útasï kueratanchaxaka ísï eratseni eskaksï kʼératiicha, kurhaku je Tata Diosï Jeobani eskaksïni jarhuataaka tsitini indeni ambe úni ka ístu eskaksïni íntskuaka uinhapikua parajtsï ísï úni (Filip. 2:13).

11. ¿Nénajtsïni jarhuatasïni Tata Diosï Jeoba parachi kristianu máeni enga ísï eratsejka eska kʼuiripu kʼéri ma? (Éfesu 4:​11-13).

¹¹ Tata Diosï Jeobajtsïni no jandiajku jurajkusïndi, imajtsïni jarhuatasïndi parachi ísï eratseni eska kʼuiripu kʼéri ma. íntskusïndijtsïni jarhuajperateechani parachi úni jánhastiicheni. Intsaasïndijtsïni orhejtsïkutiichani ka jorhentpirichani kúnguarhikuarhu engajtsïni jarhuatajka “astakachi na eratsekua jukariuakia ísï eska kʼuiripu ma enga kʼériikia ka astakachi na ísïiuakia eska Kristu” (arhinta je Éfesu 4:​11-13). Ístujtsïni íntskusïndi imeeri espiritu santu engajtsïni jarhuatajka ‘májkueni eratseni eska Kristu’ (1 Kor. 2:​14-16). Ístu kararkuarhiasti tʼámu Ebanjeliuechani engajtsïni jarhuatajka sánderu sési míteni ambe enga úpka Jesúsi enga Echerirhu jámani japka. Engachi jánguarhintaska májkueni eratseni, jámani ka uandani ísï eska Jesúsi, niáraakachi kristianu máeni enga ísï eratsejka eska kʼuiripu kʼéri ma.

 KÁNIKUA JUKAPARHAKUESTI TʼIREKUA ENGA XAXANHAJKA

12. ¿Ambeeski enga ma orhetku “ueenajka jorhenguarhini Kristueri ambe”?

¹² Parachi ísï eratseni eska kʼuiripu kʼéri ma, nóchi solu jatsiska para imani ambe jingoni pakarani “ambe enga ma orheta ueenajka jorhenguarhini Kristueri ambe”. Máru ambe engachi orhetku ueenajka jorhenguarhini jindeesti eskachi jatsiska para móantani, mintsikani Tata Diosïni, itsï atakuarhini ka jakajkuni eska jauaka tsíntskua (Ebr. 6:​1, 2). Iámindu kristianu jatsisti para míteni indeni ambe. Jimbosï apostoli Pedru indeni ambe arhiapti jiáni enga uánikua kʼuiripuechani uandontskuarhekuapka Pentekostesi jimbo (Úku. 2:​32-35, 38). Kánikua jukaparhakuesti eskachi jakajkuaka indeni ambe parachi úni Kristueri chúxapatiini. Asta Pablu jamberi uandaspti eska no jakajkuni tsíntskueri ambe ísïiska komueska no jakajkuni iámindu ambe engachi jakajkujka kristianuecha (1 Kor. 15:​12-14). Joperuchi no jatsiska para eratseni eskachi indeni ambejkusï jatsika para jorhenguarhini.

13. ¿Ambechi jatsiski para úni parachi marhuatani indeni tʼirekuani enga xaxanhajka? (Ebreu 5:14; ístu exea je imajeniichani).

¹³ Ístuchi jatsiska tʼirekua enga xaxanhajka enga jindeeka Tata Diosï Jeobaeri leicha ka ístu prinsipiuecha engaksï Bibliarhu jaka. I ambejtsïni jarhuatasïndi parachi míteni na enga eratsejka Tata Diosï Jeoba. Parajtsïni i ambe marhuacheni jatsiskachi para arhintani Bibliani, eratsentani ka jánguarhintani ísï úni eskachi na jorhenguarhiaka. Inde ambejtsïni jarhuataati imani ambe erakuni úni enga Tata Diosï Jeoba jaiapanhintajka (arhinta je Ebreu 5:14). c

14. ¿Néna jarhuataaspi Pablu Korintu anapu kristianuechani paraksï ísï eratseni eskaksï kʼératiicha?

¹⁴ Ima kristianuecha engaksï ísï eratsejka eskaksï sapiicha, nóksï jánhaskani jarhasïndi ambe úni jiáni enga Bibliarhu no uandajka ambemindusï ma jatsi para úni. Jimboksïsï máru újti ambe engaksï uéjka. Ka máteruechaksï uékasïndi eska juramukua ma jauaka ka jini no uétarhini jarhani. Pori ejemplu, peekaksï Korintu anapu kristianuecha arhipka Pabluni eska juramukua ma uaxastapiringa enga uandapiringa sinksï úpirini arhani o nómbe imani tʼirekuani engaksï diosï úkatechani kéjtsïtakuauenga. Enbesi de arhiani ambe engaksï jatsipka para úni, Pablu arhiaspti eskaksï úpiringa úni ambe engaksï imeecha uékapiringa, joperu no imani ambe enga tátsekua no sési pʼikuastaani japiringia. Pablu uánikua Bibliarhu anapu prinsipiuechani úraaspti  para indeni ambe kurhangutaraani paraksï no tátsekua no sési pʼikuarherani jarhania ka paraksï ístu no nemani no sési úrani (1 Kor. 8:​4, 7-9). Pablu jorhendaaxapti Korintu anapu kristianuechani eskaksï jatsipka para jandiajku exeni ambe úni, enbesi deksï erokuarhini jarhani eskaksï máteruecha arhiapiringa ambe úni oksï lei ma uékani jarhani exentani.

15. ¿Apostoli Pablu néna jarhuataaspi ebreuechani paraksï jánguarhintani jarhani kristianu máeni enga ísï eratsejka eskaksï kʼératiicha?

¹⁵ Ambe enga apostoli Pablu arhiapka imani kristianuechani engaksï Ebreu uandeenga, ístuchi jorhenguarhisïnga máteru ambe. Máruksï nóteru jánguarhintasptia sánderu sési pájperani Tata Diosï Jeobani jingoni, jimbosï Pablu arhiapti: “Chájtsï ménderu jatsiska para lechi arhani ka no indeni tʼirekuani enga jindeeka para xaxani” (Ebr. 5:12). Nóksï jorhenguarhixapti nijtuksï uékeni jakajkuni jimbanhi ambe enga Tata Diosï Jeoba jorhendaani japka kúnguarhikuani úraparini (Prov. 4:18). Pori ejemplu, uánikua judiuecha engaksï kristianuepkia útasïksï afuersa uékasïreendi eska ísï úkuarhipiringa eska Moisésiiri Lei na uandeenga nájkiruka ma 30 uéxurhini nitamapkia enga Kristueri uarhikuani jimbo inde Lei nóteru marhuauengia (Rom. 10:4; Titu 1:10). ¿A no eskaksï ióni tiempu jatsispka paraksï indeni ambe kurhanguni? Jimbosï apostoli Pablu uékeendi indeni karta jimbo jarhuataani sési kurhanguni indeni ambe enga ísïika ka enga kánikua jukaparhakueka. Ima kristianuechaksï indeeni jásï tʼirekuaksïsï uétarhinchani japti parakaksï úpiringa kurhanguni eska iásï sánderu sési jarhaspkia na engaksï kómarhienga Tata Diosï Jeobani, ka ístu inde ambe jarhuataapirindi paraksï no chéni ka seguiriinksï jarhani aianhpini nájkirukaksï máteru judiuecha no sési kaapiringa (Ebr. 10:​19-23).

JU JE NO MINTSINHARHIKUARHINI

16. ¿Ambechi no jatsiski para uandani, sánderu sési, ambechi jatsiski para úni?

¹⁶ Ísï jimbo nóchi jatsiska para uandani eskachi ísï eratsesïngia komueska kʼuiripu kʼéri ma, sánderu sési, jatsiskachi para seguiriini jarhani jánguarhintani sánderu sési pájperani Tata Diosï Jeoba jingoni (1 Kor. 10:12). Jimbosï xáni jukaparhakueti eskachi méntku exekuarhini jauaka parachi míteni sinchi seguirixaki sánderu mintsikani Tata Diosï Jeobani (2 Kor. 13:5).

17. ¿Ambejtsïni jorhendasïni karta enga Pablu Kolosasi anapuechani karakuapka para jánguarhintani eratsekua jukariini?

¹⁷ Enga Pablu Kolosasi anapuechani karakuapka, arhiaspti na enga xáni jukaparhakuepka eskaksï ísï eratsepiringa komueskaksï kʼératiicha ka nóksï méni jurajkuni ísï úni. Ka nájkirukaksï ima kristianuecha  ísï úni japkia, arhiaspti eskaksï kánikua xéparini jámapiringa paraka no nema támisï jánhastaapiringa (Kol. 2:​6-10). Ka Epafrasi kánikua sési míteaspti Kolosasi anapuechani, jimbosï mintsita jingoni kómarhijpikuauendi parakaksï imeecha ‘méntkisï uíuinhasï japiringa ísï komueska ima kʼuiripuecha engaksï eratsekua jukariika’ (Kol. 4:12). ¿Ambejtsïni jorhendasïni inde ambe? Eska Pablu ka Epafrasi, sésiksï mítetixapka eska uétarhisïnga kánikua jánguarhintani ka jurajkuni eskajtsïni Tata Diosï Jeoba jarhuataaka parachi úni ísï eratseni komueska kʼuiripu kʼéri ma. Imeechaksï uékasïreendi eskaksï Kolosasi anapuecha eratsekua jukariipiringa nájkirukaksï ménisï úkua jukanchapiringa.

18. ¿Ambe úpirini úkuarhini kristianu ma jingoni enga ísï eratsejkia eskaksï kʼératiicha? (Ístu exe je imajenini).

¹⁸ Kristianu ma uaati xáni jarharini Tata Diosï Jeobani ka nóteru no sési pʼikuarherania jiáni enga no sési ambe úska ka nijtu uékani móantani para Tata Diosï puákuntani. Jimbosï Pablu arhiapti ebreuechani eskaksï jingontku jámapiringa paraksï no no sési ambe úni ka tátsekua Tata Diosï Jeoba nóteru méni jaiapanheantania. Joperu xáni sési engaksï ebreuecha jaiapanherantani japka Tata Diosï Jeobani (Ebr. 6:​4-9). ¿Ka ambe úkuarhisïni iásï imeecha jingoni engaksï ióni nóteru aianhpiengia oksï petanhantani kúnguarhikuarhu joperu engaksï tátsekua móantajka? Jimbokaksï kaxumbikua xarhatasïnga ka móantanksï, xarhatasïndiksï eskaksï no ísïiska eska ima kʼuiripuecha enga Pablu uandaapka. Joperuksï kʼóru jatsisïndi para jiókuarhini imani jarhuajperatani enga Tata Diosï Jeoba íntsaajka jiáni engaksï kʼuanhatsentajka kúnguarhikuarhu (Ezeq. 34:​15, 16). Jimboksïsï orhejtsïkutiicha arhijti erachini ma enga eratsekua jukariika eska jarhuatauaka paraksï ménderu sési pájperantani Tata Diosï Jeobani jingoni.

19. ¿Ambechi jatsiski para jánguarhintani úni?

¹⁹ Enga chá jánguarhintani jaka ísï eratseni eska kʼuiripu kʼéri ma, asï jurajku je ísï úni. Jánguarhintani ja je sánderu sési jorhenguarhini jurhimbikua ambe enga Bibliarhu jaka enga ísïika komueska tʼirekua enga xaxanhajka, ka ístu jánguarhinta je pauani pauani ísï eratseni eska Tata Diosï Jeoba na eratsejka. Ka engajtsï eratsekua jukariikia, jánguarhinta je méntkisï xarhatani indeni ambe.