¿Mítespijtsï?
¿Andiksïsï Dabidiiri ejersiturhu imeecha japi engaksï no israeliteepka?
DABIDIIRI ejersiturhuksï jarhaspti achamasïicha engaksï no israeliteepka. pori ejemplu, Sélek enga ammoniteepka, Uríasi enga ititeepka ka Itmá enga moabiteepka (1 Crón. 11:39, 41, 46). a Ístuksï jarhaspti “keretiteecha, peletiteecha ka guititeecha” (2 Sam. 15:18). Jamberiksï keretiteecha ka peletiteecha parientiipti filisteuecha jingoni (Ezeq. 25:16). Ka guititeechaksï Gati irekaspti, ireta ma jimbo enga filisteuecheriipka (Jos. 13:2, 3; 1 Sam. 6:17, 18).
¿Andisï jurajkupi Dabidi eskaksï máteru iretarhu anapuecha japiringa imeeri ejersiturhu? Jimboka seguru jarhaspka eskaksï no méni jurajkupiringa ka menusia Tata Diosï Jeobani. Pori ejemplu The New Interpreter’s Dictionary of the Bible, uandasïndi: “Jiáni enga Dabidi juramutiipka ka xáni no sési nitamakuarhini, keretiteecha ka peletiteechaksï no méni jurajkuspti”. ¿Nénachi míteski ini ambe? “Engaksï iámindu Israeli anapu achamasïicha jurajkupka rei Dabidini paraksï nirani chúxapani achamasïni ma enga arhinhenka Seba”, keretiteecha ka peletiteechaksï no méni jurajkuspti Dabidini ka jarhuatasptiksï kʼamajkuni Sebani ka imeechani engaksï imani jingoniipka (2 Sam. 20:1, 2, 7). Ma jurhiani, Adoníasi enga Dabidiri uájpeepka uékasïreendi reini. Ka keretiteecha ka peletiteechaksï no jurajkuspti Dabidini ka jarhuatasptiksï paraka Salomóni niárapiringa jindeeni jimbanhi rei, jimbokaksï mítespka eska Tata Diosï Jeoba imani erakuspka (1 Rey. 1:24-27, 38, 39).
Máteru achamasï enga no méni jurajkupka Dabidini jindeespti Ittái enga guititeepka. Ima ka imeeri 600 sondaduechaksï jarhuataspti Dabidini jiáni enga Absalóni, siempri Dabidiiri uájpa ma, nóteru uékapkia kurhajchani taati jémbani ka támisï jánhaastaspti israeliteechani paraksï rei úni. Dabidi arhispti Ittáini eska no jatsispka para imani jimbo uarhipeni jimboka uérakua anapuespka. Joperu Ittái arhispti reini: “¡Jeobani jimbokenisï arhini jaka, imani Tata Diosïni jimbo enga tsípiti jaka, ka juchiiti tatani jimbo enga reiika, eska chiiti jántspiri jima jauaka nani enga jauaka juchiiti tata enga reiika, reiini jingoni jauati ia sea para tsípiti jarhani o para uarhini!” (2 Sam. 15:6, 18-21).
Ittái no méni jurajkuspti Dabidini, imani reini enga Tata Diosï Jeoba erakupka.
Nájkirukaksï keretiteecha, peletiteecha ka guititeecha no Israeli anapuepka, mítesptiksï eska Jeobasï jindeepka Tata Diosï jurhimbiti ka kánikuaksï janhanharhisïreendi Dabidini jimbokaksï mítespka eska Tata Diosïiri erakukateespka. Jimbosï Dabidi kánikua agradesidu pʼikuarhereendi imani achamasïicha jingoni engaksï no méni jurajkupka.
a Tata Diosïiri lei ma enga Deuteronomio 23:3-6 jimbo jaka, uandasïreendi eskaksï ammoniteecha ka moabiteecha no úpiringa ísï marhuakuni Tata Diosïni eska israelita ma. Jimboksïsï no iámindu ambe ueendi úni, joperuksï jurajkuasïreendi parakaksï imeecha jingoni japiringa o eskaksï jima irekapiringa. Parajtsï sánderu ambe míteni, uaakajtsï exeni libruni Perspicacia para comprender las Escrituras, ka jirinha je jima enga arhijka “Ammonitas”, ka tátsekua subtitulurhu “Se casan con israelitas”.
