1. ¿Nákiiski inde paraisu enga Echerirhu jaka, ka ambeksï uékasïni úni imeecha engaksï jimini jaka?

 ECHERIRHU paraisu ma jarhasti nani engaksï kʼuiripuecha tsípikua jingoni irekani jaka ka ambakiti ambeksï úni jarhani. Indeni paraisu jimbo uánikua kʼuiripuechaksï pínandikua jatsisti ka nóksï uékasïndi kéndikuni jimini ambe uéjki úkuarhini jarhani, ka ístuksï uékasïndi eskaksï uánikua kʼuiripuecha indeni paraisurhu jauaka. ¿Ambechi arhikuekaxaki indeni paraisu jingoni? Tata Diosïiri iretanchisï arhikuekani jaka. a

2. ¿Andijtsïnisï no ísku pakatajki enga Tata Diosï paraisu ma jatsika Echerirhu?

² Nájkiruka ini parhakpini jimbo kʼuiripuechaksï no xénchperajka, no sési ambeksï újka ka peligru jarhani, nójtsïni ísku pakatasïndi enga Tata Diosï Jeoba paraisu ma jatsika Echerirhu nani engachi kánikua pínandikua jatsika (1 Juanu 5:19; Apok. 12:12). Imajtsïni xénchasïndi ka mítesti na engajtsïni xáni no sési úchijka Noambakitiiri parhakpini, jimbojtsïnisï pájti indeni paraisurhu parachi jucha úni sési marhuakuni, indeni paraisu jimbochi ísï jarhasïnga komueska tsïtsïki ma enga jardinirhu tsipajka. Biblia uandasïndi eska inde paraisu ísïiska komueska ima lugari engachi újka kuájchakukuarhini ka komueska jardini ma enga xuxunhandeka (Is. 4:6; 58:11). Ka jimboka Tata Diosï Jeoba újchakuraasïnga indeni kʼuiripuechani engaksï indeni paraisurhu jaka, sésiksï pʼikuarherasïndi ka nóksï ambe ma jimbo chésïndi nájkiruka ini últimu jurhiatikuechani jimbo xáni úkua jukaka (Is. 54:14; 2 Tim. 3:1).

3. Ambe enga Isaías kapitulu 65 uandajka, ¿néna kumplirikuarhiskia ma xanhari?

³ Isaías kapitulu 65 jimbo, Tata Diosï Jeoba uandasïndi na engaksï irekapiringa kʼuiripuecha imeeri ireta jimbo enga ísïika komueska paraisu ma. Ambe enga profeta Isaíasi uandapka ueenaspti  kumplirikuarhini 537 jimbo a. de J., indeni jurhiatikuechani jimbo, ima judiuecha engaksï móantapka uéakuntasptiksï Babilonia ka kʼuanhatsentasptiksï imeecheeri ireta jimbo. Ka jimboka Tata Diosï Jeoba újchakuraaspka ka jarhuataani, imeechaksï ménderu sési jájkuntaspti Jerusalénini enga xáni no sési pakarapka, ístuksï ménderu úntaspti templuni paraksï Israeli anapuecha ísï kómarhini Tata Diosïni eska ima na jaiapanhintajka (Is. 51:11; Zac. 8:3).

4. ¿Néna kumplirikuarhixaki iásï ambe enga uandajka Isaías kapitulu 65?

⁴ Isaíasiri profesia ístu kumplirikuarhixati ini jurhiatikuecha jimbo. Uéxurhini 1919 jimbo ueenasti, jiáni engaksï Tata Diosïiri marhuariicha uéakuntapka Kʼéri Babilonia jimbo. Jiáni uératini, Tata Diosïiri ireta enga ísïika komueska paraisu ma, sánhani arhixati sánderu etsakuarhini iámu parhakpinirhu. Ima erachiicha engaksï ióntki tsípikua jingoni uandantapka Reinueri ambe, uánikua kúnguarhikuechanksï uaxastaaspti. Ka jimboksïsï uánikua acheetiicha ka uarhiitiicha engaksï antesi no sési kámpienga ka ísku jándikua ambeksï úni, niárasptiksï mójtakurhini ka sésiksï marhuakuni Tata Diosï Jeobani. Jo, mójtakurhistiksï “enga ísïika komueska xukuparhakua ambe jukantani, indeni jimbanhi jángua jingoni enga Tata Diosï kueraaka ka enga ísï terukuntajka eska Tata Diosï na uéjka” (Éfes. 4:24). Ka ístu uánikua ima ambe enga Isaías uandapka, jimbanhi parhakpinirhu úkuarhiati. Ka nájkirukachi jatsiaka para erokuarhini, iásïchi jucha exexakaia máru ambe enga Isaíasi uandapka. Ju je exeni na engajtsïni xáni marhuachejka indeni paraisurhu jarhani ka ístu andichisï jatsi para no méni jurajkuni.

KÓNTPERATEECHA ENGACHI TATA DIOSÏIRI IRETARHU JATSIAJKA

5. Eska Isaías 65:13 na uandajka, ¿náki kóntperateechanchi jatsiasïni Tata Diosïiri iretarhu?

⁵ Sésichi pʼikuarherantasïnga ka uíuinhasïchi jarhasïnga. Isaíasi uandasïndi na enga xáni ménderueniika Tata Diosïiri iretarhu jarhani ka eska uérakua (arhinta je Isaías 65:13). Tata Diosï Jeoba íntskuasïndi imeeri iretarhu anapuechani ambe engaksï xáni uétarhinchajka, pori ejemplu, íntskuasïndi imeeri espiritu santu, Bibliani ka ístu jorhendaasïndi imeeri ambe enga ísï terukuntajka komueska tʼireraani, itsïmataani ka jarhuataani paraksï sési pʼikuarherani (terukutanta je Apokalipsisi 22:17 jingoni). Joperu méntku ménderuenksï irekasïndi imeecha engaksï no jaka Tata Diosïiri iretarhu. Imeechaksï kʼarhimasïndi, kʼarhichasïndi ka kʼuratsetakuarhisïndiksï jimbokaksï no ma ambe jatsiska ambe engajtsïni Tata Diosï Jeoba xáni íntskujka juchantsïni (Amós 8:11).

6. ¿Nákiiski inde tʼirekua enga Joel 2:​21-24 uandajka, ambe arhikuekasïni ka nénajtsïni marhuachesïni?

⁶ Profesia ma jimbo, Joeli uandaspti eska Tata Diosï Jeoba kánikua tʼirekua íntskupiringa imeeri iretani. Imani tʼirekua íntskupirindi engaksï israeliteecha sánderu uétarhinchapiringa komueska semiia ambe, binu ka aseiti de oliba (Joel 2:​21-24). Ka no indeni ambejku íntskuapirindi, sino ístu jorhendaapirindi imeeri ambe. ¿Ka néna májkueni úsïni iásï? Jurajkuchistijtsïni Bibliani, íntskuasïndijtsïni publikasioniichani, pájina ma internetirhu, tánguarhikuechani ka kʼérati tánguarhikuechani. Ini ambe jingoni, ísïisti enajkichi sési tʼirejki pauani pauani parachi úni sési jarhani ka uíuinhasï.

7. ¿Andisï juchaari mintsita xáni sési pʼikuarherajki? (Isaías 65:14).

⁷ Tsípikua jingonchi irekasïnga ka sésichi pʼikuarherasïnga. Kristianuechachi mintsita jingoni diosmaiamukua arhisïnga Tata Diosïni ka jimbochisï uinhachajka xáni tsípini pʼikuarherani (arhinta je Isaías 65:14). ¿Andisï juchaari mintsita xáni sési pʼikuarherajki? Jimbokachi Tata Diosïiri Karakatarhu exentasïnga jurhimbikua ambe ka imani ambe enga Tata Diosï aiatspeka. Tata Jesukristueri uarhikuani jimbo, ambakiti ambechi erokuarhixaka. ¡Iáminduechachi kánikua tsípikua jingoni uandontskuarhesïnga ini xáni ambakiti ambeeri! (Sal. 34:8; 133:​1-3).

8. ¿Náki tsimani ambe sánderu xarhatasïni Tata Diosïiri ireta?

⁸ Tata Diosïiri ireta májku kʼéri jarhasti ka iáminduechaksï kánikua xénchperasïndi ka ini tsimani ambeksïsï sánderu xarhatajti. I jásï uékperakuajtsïni jarhuatasïndi exeni na engachi  irekaaka jimbanhi parhakpinirhu. Ísïisti, iásïchi xénchperasïngia ka májku kʼérichi jarhaska, joperu jiánchi sánderu sési xarhataakia ini ambe (Kol. 3:14). Pirenchi ma uandantasïndi na enga pʼikuarherapka enga míteapka Jeobaeri testiguechani. Ima uandantasïndi: “Ji no mítespka néna tsípikua jingoni irekani, ni sikiera juchiiti familia jingoni. Ka jiáni engani míteapka Testiguechani, exespka ambe enga arhikuekajka sési jimbo xénchpeni”. Ísï jimbo, imeecha engaksï uéjka tsípikua jingoni irekani ka sésiksï pʼikuarherani, jatsistiksï para Tata Diosïiri iretarhu jarhani enga ísïika komueska paraisu ma. Ambe uéjki uandanhani juchaari ambe, Tata Diosï Jeoba ka ístu iámindu imeeri marhuariicha, jaiapanhentasïndijtsïni ka sési ambeksï uandasïndi juchaari ambe (Is. 65:15).

9. ¿Ambe uaa Tata Diosï imani ambe jingoni engajtsïni no sési pʼikuastajka? (Isaías 65:​16, 17).

⁹ Agustuchi jarhasïnga ka nóchi xáni uandanhiasïnga. Isaías 65:14 uandasïndi eska imeecha engaksï no uéjka Tata Diosïiri iretarhu jarhani uinhachaakaksï “xáni no sési pʼikuarherani” ka ueraatiksï jimbokaksï “kánikua no sési pʼikuarheraaka”. ¿Joperuksï néna irekaa Tata Diosïiri marhuariicha? ¿Ambe úkuarhia imani ambe jingoni enga no sési pʼikuastaajka? Exe je ambe enga aiatspejka Tata Diosï Jeoba: Mirikurhiauaka “ióntki anapu uandanhiatechani; nóteruni exeani jauakia” (arhinta je Isaías 65:​16, 17). Ima uaati eskaksï problemeecha nóteru jauakia ka uaati eskachi nóteru miáuakia imani ambe engajtsïni no sési pʼikuastajka.

10. ¿Andijtsïsï uandapirini chá eska kóntperata máeska erachiicha jingoni jarhani? (Ístu exe je fotuni).

¹⁰ ¿Ka no ísïiski eskachi agustu jarhasïnga tánguarhikuecharhu ka no ma ambe jimbochi uandanhiani? Jo, engachi tánguarhikuecharhu jarhajka, mirikurhisïngachi ambe enga xáni úkuarhini jaka parhakpinirhu. ¿Ambechi uaa úni parachi seguiriini sési pʼikuarherani Tata Diosïiri iretarhu? Jatsiskachi para jánguarhintani indeni kualidadiichani jatsiani engajtsïni espiritu santu jarhuatajka xarhataani, pori ejemplu, xénchpeni, kánikua tsípini, pínandikua jatsini, ambakiti kʼuiripueni, ka sési kámpini (Gal. 5:​22, 23). ¿A no eska kʼéri kóntperata máeska Tata Diosï Jeobaeri iretarhu jarhani? Engachi no méni jurajkuska imeeri iretani enga ísïika komueska paraisu ma, uaakachi exeni na enga Tata Diosï sési sési kumpliriuaka ambe enga ima aiatspeka, eska “jimbanhi auanda ma uáka ka jimbanhi echeri ma”.

11. ¿Nénachi pʼikuarherasïni Tata Diosïiri iretarhu jarhani enga ísïika komueska paraisu ma? (Isaías 65:​18, 19).

¹¹ Agradesiduchi jarhaska ka sésichi pʼikuarhenhisïnga. Isaíasi tátsekua uandaspti eskachi Tata Diosïiri marhuariicha uánikua ambe jatsiska enga újka eskachi sési pʼikuarheraaka ka tsípikua jingonchi irekani. Ini paraisu jimbo engachi jucha jaka Tata Diosï Jeoba ústi (arhinta je Isaías 65:​18, 19). Jimbojtsïnisï Tata Diosï juchantsïni úrajti parachi jarhuataani máteru kʼuiripuechani jurajkuani parhakpini anapu organisasioniichani engaksï ísïika komueska desiertu ma ka paraksï inchani Tata Diosïiri iretarhu enga ísïika komueska  itsï ambanharhi exentani desierturhu. Kánikuachi sési pʼikuarherasïnga engachi míteka jurhimbikuani ka jimbochisï uéjka aianguani máteruechani indeni kóntperateechani (Jer. 31:12).

12. ¿Nénajtsï pʼikuarherasïni engajtsï arhintajka Isaías 65:​20-24, ka andijtsïsï ísï pʼikuarherajki?

¹² Jucha engachi irekani jaka Tata Diosïiri iretarhu, kánikuachi agradesidu jarhaska ka kánikuachi tsípixaka imani ambe jimbo engachi erokuarhini jaka. ¡Eranhaska je ambe engajtsï xáni uaaka úni ka exeni jimbanhi parhakpinirhu! Biblia uandasïndi: “Jima, nóteruksï andajpenuatia charhakuecha paraksï namunitu jurhiatikuajku irekani; nijtuksï uarhia ima kʼuiripuecha engaksï jatiriikia ka nótkiksï sési irekuarhini jarhani”. Ka ístu uandasïndi eskaksï kʼuiripuecha uaauaka “kʼumanchikuechani ka jimaksï irekaati; ka niáraatiksï ubasï jatsikuni ka akuatiksï frutani”. Ístu, “nóksï ísku xáni ánchikuarhiati” jimboka Tata Diosï Jeoba újchakurauaka. Ima aiakuasïndi imeeri marhuariichani eskaksï nóteru ísku irekani jauakia pori irekani, ka jarhuatauati paraksï nóteru ambe ma jimbo chénia ka uaati eskaksï sési pʼikuarhinheaka. Ante de imeechaksï uandajpani Tata Diosïni, ima tʼuini míteatiia ambe engaksï uétarhinchani jaka ka íntsauati iámindu kʼuiripuechani “ambe engaksï uétarhinchajka” (Is. 65:​20-24; Sal. 145:16).

13. ¿Néna xarhatasïni Isaías 65:​25, na engaksï mójtakurhijka kʼuiripuecha engaksï ueenajka marhuakuni Tata Diosï Jeobani?

¹³ Pínandikuachi jatsisïnga ka nóchi chésïnga. Espiritu santu uánikua kʼuiripuechani jarhuataastia jimbokaksï antesi ísï jámasïreenga komueska animali ikiminharhi ma ka iásïksï kánikua mójtakurhistia (arhinta je Isaías 65:25). Pori ísï uandani, iásïksï ísïistia komueska kabaiu ma enga mansueka jimbokaksï úsïngia pʼíngukuarhini (Rom. 12:2; Éfes. 4:​22-24). Ísïisti, Tata Diosïiri marhuariichachi no perfektueska ka jimbochisï ménisï no sési ambe újka. Joperu Tata Diosï Jeoba kʼéri milagru ma ústi jimbokajtsïni jarhuatasïnga parachi ‘iámindu jásï kʼuiripuecha’ májku kʼéri jarhani, xénchperani ka sésichi pájperani (Titu 2:11). Ka ini ambe imajkusï úpirini úni Tata Diosï enga iámindu ambe újka úni.

14. ¿Néna xarhatasïni erachiiri eksperiensia eska ísïiska ambe enga Isaías 65:25 uandajka?

¹⁴ ¿Andi úsïni nema xáni mójtakurhini? Jo, ka ari eksperiensia xarhatasïndi eska ísïiska. Acheeti ma enga 20 uéxurhini jatiriipka, kánikua no sési jámasïreendi ka ísku jándi máespti. Uánikua xanhari ónhakata jarhaspti jimboka karruechani sïpaasïreenga ka ístu uánikua ambe no sési niátani. Ka puru uarhipentkusï uékeendi. Joperu enga ueenapka kurhaani ambemindusï jorhentpijki Biblia ka tánguarhikuecharhu nirani Testiguecha jingoni, exentaspti ambe ma enga kánikua jukaparhakueka: Tata Diosïiri iretani enga ísïika komueska paraisu ma. Enga inde kʼuiripu na itsï atakuarhipkia, eratsentasïreendi eska meru ísïiska ambe enga Isaías 65:25 uandajka, jimboka ima ióntki ísï jámasïreenga komueska leoni apejpiti ma, joperu iásï ísï jámasïndia komueska karichi sapichu ma.

15. ¿Andichisï uéjki jarhuataani máteruechani paraksï Tata Diosïiri iretarhu jarhani, ka nénachi uaa ísï úni?

¹⁵ Isaías 65:13 ísï ueenasïndi: “I ambesï uandajti Tata Jeoba kʼéri juramuti”. Ka bersikulu 25 ísï kʼamarasïndi: “Ísï uandasïndi Tata Diosï Jeoba”. Jo, ambe engajtsïni ima aiachijka, méntkisï ísï úkuarhisïndi (Is. 55:​10, 11). Tata Diosïiri ireta meru jarhasti, ima ústi eska kumplirikuarhipiringa ambe enga uandapkia indeni ireteeri ambe. Nájkiruka parhakpinirhu xáni no sési jánhaskuarhika, Tata Diosï Jeoba ústi eska japiringa ireta ma, nani engachi kánikua sési pʼikuarherajka, nóchi chéni ka ístuchi pínandikua jatsini (Sal. 72:7). Ini ambe jimbochisï jatsika para jarhuataani uánikua kʼuiripuechani parakaksï imeechajtu kuenta úkuarhiaka Tata Diosïiri familia jingoni, ka uaakachi ísï úni engachi jarhuataaska paraksï Jesúsiiri chúxapatiini (Mat. 28:​19, 20).

NÉNACHI UAA JARHUATAANI KʼUIRIPUECHANI PARAKSÏ TATA DIOSÏIRI PARAISURHU JARHANI

16. ¿Andiksïsï máteru kʼuiripuecha uéjki Tata Diosïiri iretarhu jarhani?

¹⁶ Engachi májkueni jámaska eska Tata Diosï Jeoba, iáminduechachi uaaka jarhuajpeni sáni paraka Tata Diosïiri iretarhu sési pʼikuarherakuarhiaka ka eska sánderu uánikua kʼuiripu uékaaka jimini  jarhani. Tata Diosï Jeoba no nemani antsikupasïndi paraka imeeri iretarhu jauaka, sánderu sési, sési kámasïndi kʼuiripuni paraka uekaaka “andarhierani” (Juanu 6:44; Jer. 31:3). Imeecha engaksï jorhenguarhijka Tata Diosï Jeobaeri ambe ka ambakiti mintsita maksï jatani, uékasïndiksï sánderu jorhenguarhini na enga jásïika Tata Diosï Jeoba. Jimajkani, ¿náki kualidadiichajtsïni jarhuataa paraksï kʼuiripuecha uékani andarhierani Tata Diosïiri iretani?

17. ¿Ambechi uaa úni paraksï kʼuiripuecha uékani andarhierani Tata Diosïiri iretani?

¹⁷ Engaksï kʼuiripuecha exeaka eskachi sési kaasïnga erachiichani ka xénchaani, imeechaksï uékaati andarhierani Tata Diosïiri iretani enga ísïika komueska paraisu ma. Uékasïngachi eskaksï ima kʼuiripuecha engaksï juchantsïni jingoni niuaka tánguarhikuarhu májkueni uandaaka eska Korintu anapuecha engaksï jamberi nípka tánguarhikuecharhu ka uandanksï: “Sési jimbo Tata Diosï chánksïni jingoni jarhasti” (1 Kor. 14:​24, 25; Zac. 8:23). Jimbosï xáni jukaparhakueti eskachi ísï uaaka eska ari konseju na uandajka: “Jánguarhinta je sési pájperani iáminduecha jingoni” (1 Tes. 5:13).

18. ¿Ambe jarhuataua kʼuiripuechani paraksï uékani Tata Diosïiri iretarhu jarhani?

¹⁸ Ístuchi jatsiska para méntkisï jánguarhintani ísï exeani juchaari erachiichani eska Tata Diosï Jeoba na exeajka. Ka jimbochisï jatsika para jánguarhintani exeni eskaksï ambakiti kʼuiripueska ka no imani ambe engaksï no újka sési úni jimboka i ambe kʼamakurhiaka. Engachi ménisï no kurhangutsperaska erachi o pirenchi ma jingoni, uékperakuajtsïni jarhuataati sési peentani indeni ambe jimbokachi ísï úni jauaka eska ari konseju na uandajka: “Sési kámbera je, xénchpera je ka pʼamojpera je, ka mintsita jingoni puátsperanta je” (Éfes. 4:32). Ima kʼuiripuecha engaksï uéjka paraksï sési kánhani, sánderuksï uékaati Tata Diosïiri iretarhu jarhani engaksï indeni ambe exeaka. b

 JU JE MÉNTKISÏ TATA DIOSÏ JEOBAERI IRETARHU JARHANI

19. a) ¿Ambeksï uandasïni máru engaksï kʼuanhatsentaka Tata Diosïiri iretarhu? (Exe je rekuadruni “ Jurajkusptiksï joperuksï kʼuanhatsentasti”). b) ¿Ambechi jatsiski parachi jánguarhintani úni? (Ístu exe je imajenini).

¹⁹ Kánikua sési pʼikuarherakuarhesti Tata Diosïiri iretarhu jarhani enga ísïika komueska paraisu ma. Iásï sánderu sési jáxestia eska antesi, sánderuksï uánikua erachiicha jarhastia. Diosmaiamukuachi arhisïnga Tata Diosï Jeobani enga úka eska i paraisu japiringa. Imeecha engaksï uéjka ménderu uíuinhasï pʼikuarherani, tsípikua jingoni irekani, agustu jarhani ka no chéni, jatsistiksï para ini iretarhu jarhani ka nóksï méni jurajkuni. Joperu ju je xéparini jámani jimboka Noambakiti jánguarhintaxaka parajtsïni támisï páni ka uékasïndi eskachi jurajkuaka Tata Diosïiri iretani enga xáni ambakiti ambeeka (1 Ped. 5:8; Apok. 12:9). Ju je no jurajkuni eskajtsïni andaaka. Ju je kánikua jánguarhintani paraka Tata Diosïiri ireta méntkisï sési eraakuarhiaka, pímbinhasï ka pínandikua jingoni.