1. ¿Primeru siglurhu anapue erachiichaksï néna úsïreeni ambe ma?

 MÉNTKISÏ enga Tata Diosï Jeoba ánchikuarhita ma íntskuajka imeeri marhuariichani, erokuarhisïndi eskaksï sési uaaka (1 Kor. 14:33). Pori ejemplu, ima uékasïndi eska iámu parhakpinirhu mítekuarhiaka ambakiti aianhperakua (Mat. 24:14). Ka para ísï úkuarhini, Jesúsini arhisti para orhejtsïkuni ini ánchikuarhitani. Ka Jesúsi ústi eska iámindu ambe sési úkuarhini jauaka. Primeru siglurhu, Jerusalénksï apostoliicha jarhaspti ka máru orhejtsïkutiicha engaksï uandeenga na enga úkuarhipiringa ambe ma paraksï kúnguarhikuecha ísï úni (Úku. 15:2; 16:4). Iámindu kúnguarhikuecharhuksï erakuasïreendi erachiicha paraksï orhejtsïkutiini ka paraksï aianguani máteru erachiichani na engaksï úpiringa ambe ma (Úku. 14:23). Ka jimbokaksï erachiicha kurhandirasïreenga, “kúnguarhikuarhu anapuechaksï sánderu jakajkusïreendia ka pauani pauani sánderuksï uániixaptia” (Úku. 16:5).

2. Uéxurhini 1919 uératini, ¿Tata Diosï Jeoba néna jarhuataxaki ka jorhendani imeeri iretani?

² Ini jurhiatikuechani jimbo, Tata Diosï Jeoba seguiriixati arhini imeeri iretani néna úni ambe ma. Uéxurhini 1919 uératini, Jesúsi ueenaspti úraani namunitu erachiichani engaksï erakukateeka paraksï exeni néna aianhpini iápurisï ka paraksï jorhendaani Tata Diosïiri ambe imeeri chúxapatiichani (Luk. 12:42). a Ka xarharaxati eska Tata Diosï Jeoba újchakuraxaka ánchikuarhitani engaksï i erachiicha úni jaka (Is. 60:22; 65:​13, 14).

3, 4. a) ¿Náki ejemplu xarhatasïni eska marhuasïnga sési úni ambe ma? b) ¿Ambechi exea ini jorhenguarhikua jimbo?

³ Engachi no mítepiringa néna úni ambe ma, nóchi úpiringa úni  indeni ánchikuarhitani engajtsïni Jesúsi jurajkuchika (Mat. 28:​19, 20). Pori ejemplu, engajtsïni kúnguarhikuarhu no arhipiringa nanichi nipirini aianhpini, erachiichachi nani uéjkisï aianhpepiringa ka jamberichi mapurkisï méntku úndapiringa aianhpini ka máteru naniisï nómbe. ¿Chá uandapirini máteru ambe enga xarhatajka na enga marhuajka sési úni ambe ma?

⁴ Ini jurhiatikuecha jimbo, tata Jesukristu ísï organisariixati Tata Diosïiri iretani eska na úpka imeeri chúxapatiicha jingoni jiáni enga Echerirhu japka. Ini jorhenguarhikua jimbochi exeni jauaka nénachi májkueni jatsiski para úni eska Jesúsi ka exeni jauakachi na enga Tata Diosïiri iretani ísï úni jaka, ístuchi exeni jauaka ambe engachi uaaka úni para xarhatani eskachi mintsikasïnga Tata Diosï Jeobaeri kúnguarhikuani.

JUCHAARI KÚNGUARHIKUA ÍSÏ ÚSÏNDI ESKA JESÚSI NA ÚPKA

5. ¿Tata Diosïiri kúnguarhikua néna májkueni úsïni eska Jesúsi? (Juanu 8:28).

⁵ Jesúsi májkueni uandasïreendi ka úni eska imeeri Taati auandarhu anapu. Májkueni, Tata Diosï Jeobaeri kúnguarhikua Bibliarhu jupindaskuarhisïndi para konseju íntspini ka para jorhentpini (arhinta je Juanu 8:28; 2 Tim. 3:​16, 17). Ístujtsïni méntku miátantani jarhasïndi eskachi arhintaaka Bibliani ka eskachi ísï uaaka eskachi na jorhenguarhijka. ¿Nénajtsïni marhuachesïni ísï úni eska i konseju na uandajka?

6. ¿Nénajtsïni marhuachesïni Biblieri ambe jorhenguarhini?

⁶ Biblieri ambe jorhenguarhini juchaari publikasionicha jingoni kánikuajtsïni marhuachesïndi. Pori ejemplu, jarhuatasïndijtsïni parachi terukutantani ambe enga Biblia jorhentpijka imani ambe jingoni engajtsïni Tata Diosïiri kúnguarhikua arhijka eskachi uaaka. Engachi exejka eska inde ambe Bibliarhu pʼitakata jarhaska, úsïndi eskachi sánderu mintsikaaka Tata Diosïiri kúnguarhikuani (Rom. 12:2).

7. ¿Ambe aianhpispi Jesúsi, ka néna májkueni úsïni Tata Diosï Jeobaeri kúnguarhikua?

⁷ Jesúsi aianhpispti “ambakiti aianhperakua Tata Diosïiri Reinueri” (Luk. 4:​43, 44). Ka arhiaspti imeeri chúxapatiichani eskaksï májkueni úpiringa (Luk. 9:​1, 2; 10:​8, 9). Ini jurhiatikuecha jimbo, iámindu imeecha engaksï Tata Diosï Jeobaeri kúnguarhikuarhu jaka, aianhpisïndiksï Reinueri ambe nani uéjkisïksï irekani o náki uéjkiksï responsabilidadi ma jatsini Tata Diosïiri kúnguarhikuarhu.

8. ¿Náki k’éri kóntperatachi jatsiski?

⁸ K’éri kóntperata máesti uandontskuarhekuani kʼuiripuechani Tata Diosïiri Reinueri ambe. Ka no né uéjkini úsïndi ísï úni. Pori ejemplu enga Jesúsi Echerirhu japka, no jurajkuaspti demoniuechani paraksï imeeri ambe uandantani (Luk. 4:41). Ini jurhiatikuechani jimbo paraka kʼuiripu ma uaaka Jeobaeri testiguecha jingoni aianhpini, orheta jatsisti para úni máru ambe. ¿Nénachi uaa xarhatani eskachi jukaparharasïnga indeni k’éri kóntperatani enga jindeeka aianhpini? Engachi méntkisï jánguarhintaska uandontskuarhekuani kʼuiripuechani Tata Diosïiri ambe ísï eska Jesúsi na úpka ka enga ísï terukuntajka komueska ikarani ka itsï jatsikuni ima semiiani engachi kʼuiripueri mintsitarhu ikarajka (Mat. 13:​3, 23; 1 Kor. 3:6).

9. ¿Ambe úski Tata Diosïiri kúnguarhikua para mítetarpini na enga arhinhajka Tata Diosï?

⁹ Jesúsi uandantaspti na enga arhinhajka Tata Diosï. Ma xanhari ísï kómarhispti imeeri Taati auandarhu anapuni: “Ji aianguaskia na engari arhinhajka” (Juanu 17:26). Ka Tata Diosï Jeobaeri kúnguarhikua májkueni úsïndi, jimboka jánguarhintasïnga paraksï kʼuiripuecha míteni na enga arhinhajka Tata Diosï, ka ambe enga sánderu úrajka para ísï úni jindeesti Traducción del Nuevo Mundo enga jakaia iámu o ma parti jimbo jukari 270 idiomecha jimbo. Ini Biblia jimbo ménderu jukanharhisti Tata Diosïiri nombri jima enga ueenakuarhu jukanharhipka. Apendise A4 ka A5, uandantasïndi sánderu ambe  andiksïsï ménderu jatsikunta Tata Diosïiri nombrini. Ka apendise C enga Biblia de estudio jimbo jaka, uánikua ambe uandasïndi andisï 237 xanhari jukanharhi Tata Diosïiri nombri Karakateecharhu engaksï Griegu jimbo jaka.

10. ¿Ambejtsïni jorhendasïni Myanmar anapu uarhiitiiri eksperiensia?

¹⁰ Májkueni eska Jesúsi, uékasïngachi uáni kʼuiripuecha aianguani na enga arhinhajka Tata Diosï. Jini Myanmar, Jeobaeri testigu ma jorhendaspti uarhiitini ma enga 67 uéxurhini jatiripkia na enga arhinhajka Tata Diosï Jeoba. Inde ambe mintsitarhu niárakuspti ka ueenaspti uerani ka uandani: “I primeru xanhariisti engani kurhaaka na enga arhinhajka Tata Diosï. [...] No méni kurhaaxapka xáni ambakiti ambe”. I eksperiensiajtsïni exerasïndi na enga xáni jukaparhakueka aianguani kʼuiripuechani na enga arhinhajka Tata Diosï, jimboka úsïnga mójtakuni kʼuiripueri tsípikuani.

JU JE SEGUIRIINI XARHATANI ESKACHI MINTSIKASÏNGA TATA DIOSÏIRI KÚNGUARHIKUANI

11. ¿Nénaksï uaa xarhatani orhejtsïkutiicha eskaksï mintsikasïnga Tata Diosïiri kúnguarhikuani? (Ístu exea je fotuechani).

¹¹ ¿Nénaksï uaa xarhatani orhejtsïkutiicha eskaksï mintsikasïnga Tata Diosïiri kúnguarhikuani? Orhejtsïkutiichaksï jingontku arhiantasïndi instruksioniichani ka jánguarhintasïndiksï ísï úni. Pori ejemplu, indeechaksï arhinhasïndi néna nitamatarani tánguarhikua ma ka ístu neechaksï uaa kómarhikua ma úni ka na engaksï jatsika para úni, joperuksï ístu jatsisti para kuidariuani Kristueri karichiichani. Engaksï orhejtsïkutiicha jánguarhintajka ísï úni eska Tata Diosïiri kúnguarhikua na arhiajka, erachiichaksï exesïndi eska Tata Diosï Jeoba xénchaasïnga ka eska exeani jarhasïnga.

12. a) ¿Andichisï jatsi para ísï úni eskajtsïni na arhijka orhejtsïkutiicha? (Ebreu 13:​7, 17). b) ¿Andichisï jatsi para ambakiti ambe exekuani orhejtsïkutiichani?

¹² Engajtsïni orhejtsïkutiicha arhiaka para úni ambe ma, sánderu sésiisti eskachi tsípikua jingoni kurhajchauaka. Ísïksï ima sánderu sési uaati imeecheeri ánchikuarhitani. Bibliajtsïni arhisïndi eskachi kurhajchauaka ka janhanharhiani imeechani engajtsïni orhechepajka (arhinta je Ebreu 13:​7, 17). No méntkisï fásiliuati jimbokaksï orhejtsïkutiicha no perfektueska. Joperu ju je miáni eska engachi sánderu arhiska no sési ambe exekuani enbesi de sési jásï ambe, meruchi imani ambe úni japiringa engaksï juchaari ikiatspitiicha uéjka eskachi uaaka. ¿Andichisï ísï uandajki? Jimboka engachi no sési eratseska orhejtsïkutiicheri ambe, nóteruchi mintsikaakia Tata Diosïiri kúnguarhikuani ka meru indeni ambeksïsï uékajti imeecha. ¿Ambejtsïni jarhuataa exeni ambe engaksï xáni chkuanderajka imeecha engajtsïni ikiachejka ka parachi no jakajkukuani?

ASÏ JURAJKU JE ESKAKSÏNI TÁMISÏ JÁNHASTAAKA PARAJTSÏ NÓTERU MINTSIKANIA

13. ¿Nénaksï uékasïni juchaari ikiatspitiicha eskachi exeaka Tata Diosïiri kúnguarhikuani?

¹³ Imeecha engajtsïni ikiachejka, uandasïndiksï eska ambakiti ambe enga Tata Diosïiri kúnguarhikua újka no sési jarhaska. Pori ejemplu, Biblia jorhentpisïndi eska Tata Diosï Jeoba uékasïnga eskaksï imeeri marhuariicha sési jásï jámaaka, no ikichakueni jásï ambe niátaaka ka sési kómarhini Tata Diosïni. Ístu uandasïndi eska enga ima kʼuiripu enga ikichakueni jásï ambe niátani jarhajka ka no moántani, jatsisti para petanhantani kúnguarhikuarhu (1 Kor. 5:​11-13; 6:​9, 10). Ka jimbokachi kurhajchaasïnga ini juramukuechani, juchaari ikiatspitiichajtsïni arhisïndi eskachi iámindu ambe no sési exesïnga, eskachi no pʼamojpesïnga ka eskachi eratsesïnga eskachi jucha kʼóru iámu ambe sési úsïnga.

14. ¿Né ueenasïni chkuanderakua ambe uandani Tata Diosïiri kúnguarhikueri ambe?

¹⁴ Ju je miáni néjtsïnisï meru uéjki no sési úchini. Satanási enga jindeeka “chkuandereecheeri taati jémba”, imasï chkuanderakua ambe uandani jarhajti Tata Diosïiri kúnguarhikueri ambe (Juanu  8:44; Gén. 3:​1-5). Ka nójtsïni ísku pakatasïndi enga úraajka máru kʼuiripuechani paraksï iápurisï uandaani jarhani indeni chkuanderakuechani jimboka primeru siglu jimbo májkueni úspka.

15. ¿Ambeksï úkuspi relijioniiri orhejtsïkutiicha Jesúsini ka imeeri chúxapatiichani?

¹⁵ Jesúsi, Tata Diosï Uájpeespti ka perfektueni, ka kʼérati milagruechani uaasïreendi, joperu Satanási úraaspti máru kʼuiripuechani paraksï chkuanderakua ambe uandani imeeri ambe. Pori ejemplu, relijioniiri orhejtsïkutiichaksï arhiasïreendi kʼuiripuechani eska Jesúsi demoniuecheri juramutini jimbosï ueenga “petarpiantani demoniuechani” (Mar. 3:22). Tátsekua enga Jesúsi jusgarinhani japka, relijioniiri orhejtsïkutiichaksï uandaspti eska no sési ambe uandaspka Tata Diosïiri ambe ka úsptiksï eskaksï kʼuiripuecha kurhajkuarhipiringa eskaksï uándikupiringa (Mat. 27:20). Tátsekua engaksï tata Jesukristueri chúxapatiicha ueenapka aianhpini, imeecheeri ikiatspitiichaksï mámaru ambe arhiaspti “imeechani engaksï no judiuepka parakaksï no jakajkukuapiringa erachiichani” ka parakaksï no sési kaapiringa (Úku. 14:​2, 19). La Atalaya del 1 de disiembri de 1998 anapu ísï uandasïreendi ini tekstueri ambe Úkuecha 14:​2, eskaksï ima judiuecha engaksï ikiakuauenga kristianuechani, nóksï uékaspka jiókuarhini ambakiti aianhperakuani ka ístu eskaksï ueenaspka iápurisï uandani chkuanderakua ambe parakaksï máteru nasionirhu anapuecha no kurhajchaapiringa kristianuechani.

16. ¿Ambechi jatsiski para miáni engachi chkuanderakua ambe kurhauaka?

¹⁶ Satanási “enga támisï jánhastaani jaka iámindu imeechani engaksï echerirhu irekani jaka”, méntkisï chkuanderani jarhasïndi (Apok. 12:9). Ísï jimbo, engachi no sési jásï ambe kurhaaska Tata Diosïiri kúnguarhikueri ambe o imani erachiicheeri ambe engaksï orhejtsïkujka, ju je miáni ambe engaksï Tata Diosïiri ikiatspitiicha úkuka Jesúsini ka imeeri chúxapatiichani  primeru siglurhu. Biblia tʼuini uandasptia eskaksï kʼuiripuecha ísï no sési kaapiringa Jeobaeri testiguechani ka chkuanderakua ambeksï jauatakuani (Mat. 5:​11, 12). Joperu nójtsïni uaati támisï jánhastani engachi sési mítetini jauaka nésï ueenajki chkuanderakua ambe uandani ka jirejiresïchi kuájchakukuarhiaka. ¿Ambechi jatsiski para úni parachi kuájchakukuarhini?

17. ¿Ambechi jatsipirini para úni engachi niáraska chkuanderakua ambe kurhaani? (2 Timoteu 1:13; ístu exe je rekuadruni “ ¿Ménisïchi niáraski kurhaani chkuanderakua ambe? Ambechi jatsiski para úni”).

¹⁷ Ju je no jakajkuni indeni chkuanderakua ambe. Apostoli Pablujtsïni arhistia ambe engachi jatsika para úni engachi niáraska indeeni jásï ambe kurhaani. 1 Timoteu 1:​3, 4 uandasïndi: Eskachi “no jámaaka kurhandini ísku uandantskua ambe”. Ka Timoteuni ísï arhispti: “Tʼu ísku kurhandi indeni uandantskuechani engaksï no sési ambe uandajka Tata Diosïiri ambe” (1 Timoteu 4:7). Pori ejemplu, enga sapi ma kʼarhantajka ambe ma, jamberi jirejiresï inchachajti, joperu kʼuiripu ma enga kʼériikia, no méni ísï úpirindi jimboka míteska nani enga kʼarhantaka ka eska no sési úkuaka. Májkueni, juchachi no kurhauasïnga imani chkuanderakuechani engajtsïni no sési úchijka, sánderu sési, indeni ambakiti uandakuechankuchisï kurhauajka engaksï jurhimbitiika (arhinta je 2 Timoteu 1:13).

18. ¿Nénachi uaa xarhatani eskachi mintsikasïnga Tata Diosï Jeobaeri kúnguarhikuani?

¹⁸ Ini jorhenguarhikua jimbo, tanimu ambechi exeska eska Tata Diosïiri kúnguarhikua májkueni úsïnga eska Jesúsi, joperu no inde ambejkuesti. Eskajtsï na jorhenguarhipani jauaka Biblieri ambe uaakajtsï exeani máteru ejempluecha. Seguirii je jarhuataani erachiichani paraksï sánderu mintsikani Tata Diosïiri kúnguarhikuani ka méntkisï jánguarhinta je sési marhuakuni Tata Diosï Jeobani ka asï jurajku je eskaksïni ambe ma jarharitaaka Tata Diosïiri kúnguarhikuarhu enga ima úrajka para úni ambe enga uéjka (Sal. 37:28). ¿A no eska k’éri kóntperata máeska marhuakuni Tata Diosï Jeobani imeeri kúnguarhikuarhu nani engachi iáminduecha xénchperajka ka ísï úni eskajtsïni ima na arhijka? ¡Ju je méntkisï jukaparharani indeni kóntperatani!