1. ¿Nénaksï pʼikuarherasïni máru engaksï uérajka aianhpini? (Ístu exe je imajenini).

 TATA DIOSÏ JEOBAERI marhuariichachi aianhpisïnga jimbokachi xénchasïnga juchaari Taati auandarhu anapuni ka uékasïngachi eskaksï kʼuiripuecha míteaka. Uánikua erachiichaksï tsitisïndi aianhpini, joperu máteruecha no xáni. ¿Andi? Máruksï chésïndi uandontskuarheni máteruecha jingoni ka nóksï xáni mintsinharhikuarhisïndi. Máteruechaksï no tsitisïni ísku jatini nirani pʼorhembiani kʼuiripuechani. Ka máteruechaksï chésïndi eskaksï kʼuiripuecha no uékaaka kurhajchaani. Ka máteruechaksï arhinhasïndi eskaksï no jatsiska para arhirperani jarhani máteruechani jingoni. Iámindu imeechaksï xénchasïndi Tata Diosï Jeobani, joperuksï úkua jukanchasïndi ambakiti aianhperakueri ambe aianguani imani kʼuiripuechani engaksï no míteajka. Joperu, jimbokaksï míteska eska kánikua jukaparhakueska i ánchikuarhita, nirasïndiksï aianhpini. ¡Tata Diosï Jeoba kánikua sési pʼikuarherasïndi imeecha jingoni!

2. ¿Andijtsïsï no jatsi para no sési pʼikuarherani engajtsï úkua jukanchajka tsípikua jingoni aianhpini?

² ¿Ka chaia? ¿Úkuajtsï jukanchasïni tsípikua jingoni aianhpini? Engajtsï ménichani ísï pʼikuarherajka, asï no sési pʼikuarhera je. Jamberi inde ambe xarhatajti eskajtsï kaxumbitiiska. Jamberijtsï no uéjka eskaksïni máteruecha exeaka ojtsï arhirperata ambe jatsini nema jingoni. Ísïisti, no nema sési pʼikuarherasïndi enga kʼuiripu ísï no uéjka kurhaani, ka sánderia jimbokachi jucha jarhuataanisï uéjka. Joperu chaari Taati auandarhu anapu sési mítesti ambe engajtsï úkua jukanchani jarhajka ka uékasïndiksïni jarhuatani (Is. 41:13). Ini jorhenguarhikua jimbochi exeni jauaka sinko ambe engaksïni uaaka jarhuatani parajtsï no no sési pʼikuarherani ka parajtsï sánderu tsípikua jingoni aianhpini.

ESKAKSÏNI TATA DIOSÏIRI UANDAKUA UINHAPERANTAAKA

3. ¿Ambe uinhaperantaspi Jeremíasini para úni aianhpini?

³ Tata Diosïiri uandakua méntkisï uinhaperaantaspti imeeri marhuariichani  paraksï úni kumpliriini imeecheeri ánchikuarhitani. Ju je exeni profeta Jeremíasiiri ejempluni. Enga Tata Diosï Jeoba axapka paraka nipiringa aianhpini, ima chéspti ka uandaspti: “Ji no jorhenaska uandani. Solu tumbi máeska” (Jer. 1:6). ¿Ambe jarhuataspi paraka nóteru chépiringia? Tata Diosïiri uandakua uinhaperantaspti. Uandaspti: “Joperu imeri uandakuechaksï ísïspti [...] komueska chpiri ma enga juchiti únicharhu tixarani japka ka nóteruni úspkia pínasku pakarani” (Jer. 20:​8, 9). Jimeesïsï enga Jeremíasi aianhpienga no fásiliispti, joperu ambe enga jatsipka para uandantani, uinhaperantaspti paraka úpiringa úni imeeri ánchikuarhitani.

4. ¿Nénajtsïni jarhuatasïni arhintani ka eratsentani Tata Diosïiri Uandakuani? (Kolosasi 1:​9, 10).

⁴ Ístujtsïni Tata Diosïiri Uandakua uinhaperantasïndi juchantsïni. Enga apostoli Pablu karakuapka Kolosasi anapu kristianuechani, arhiaspti eska míteni ambe enga meru ísïika úpiringa jarhuataani paraksï ísï jámani “eska Tata Diosï Jeoba na jaiapanhentajka” ka paraksï méntkisï “ambakiti ambe úni” (arhinta je Kolosasi 1:​9, 10). Ka inde ambe arhikuekasïndi aianhpini ambakiti aianhperakuani. Jo, arhintani Tata Diosïiri Uandakuani ka eratsentani, jarhuataatijtsïni sánderu mintsikani Tata Diosï Jeobani ka sánderu kurhanguni andisï xáni jukaparhakue aianhpini Reinueri ambe.

5. ¿Ambejtsïni jarhuataa parachi sánderu marhuatani Bibliani?

⁵ Parachi sánderu marhuatani Tata Diosïiri Uandakuani, nóchi jatsiska para uiriikuarhu arhintani, nijtu arisku sáni jorhenguarhini o eratsentani. Pori ejemplu, engajtsï exentaaka tekstu ma engajtsï no kurhanguaka, jirinhanta je ambe enga arhikuekajka jimini Índice de las publicaciones Watch Tower o Jarhuajperata paraksï Jeobaeri testiguecha estudiarini, enbesi dejtsï ísku exeni. Engajtsï arhutaska tiempu parajtsï meru jorhenguarhini, sánderujtsï mintsikaaka Tata Diosïiri Uandakuani (1 Tes. 5:21). Ka engajtsï sánderu mintsikaaka Bibliani, sánderujtsï tsípikua jingoni aianguauaka máteruechani ambe engajtsï arhintaaka.

SÉSI PREPARARIKUARHI JE PARAJTSÏ NIRANI AIANHPINI

6. ¿Andichisï jatsi para sési prepararikuarhini para nirani aianhpini?

⁶ Engajtsï sési prepararikuarhiska parajtsï nirani aianhpini, sánderujtsï sési pʼikuarheraaka engajtsï uandontskuarheaka kʼuiripuecha jingoni. Jesúsi preparariuaspti imeeri chúxapatiichani ante deksï nirani aianhpini (Luk. 10:​1-11). Ka jimbokaksï ísï úspka eska Jesúsi na jorhendaapka, kánikuaksï tsípispti imani ambe jimbo engaksï úpka (Luk. 10:17).

7. ¿Nénajtsï úpirini prepararikuarhini parajtsï nirani aianhpini? (Ístu exe je imajenini).

 ⁷ ¿Nénajtsï uaa prepararikuarhini parajtsï nirani aianhpini? Eratsi je nénajtsï úpirini uandontskuarhekuani kʼuiripuechani jurhimbikueri ambe. Ístu sési japirindi eskajtsï exepiringa ambe enga sánderu uandajka kʼuiripu engajtsïni uérachijka kʼumanchikuarhu ka ambechi úpirini arhiani. Ka engachi na uandontskuarheni jauakia, nóchi chéni jauaka, sino tsípikua jingonchi uandontskuarhekuauaka ka sésichi káuaka.

8. ¿Andiksïsï kristianuecha ísïi eskaksï jatakuecha engaksï kʼuerekua jingoni úkata jaka?

⁸ Apostoli Pablu ejemplu ma úraspti para xarhatani ambe engachi jatsika para úni aianhpikuarhu. Uandaspti: “Jucha ísïiska komueska jatakua ambe enga kʼuerekua jingoni úkata jaka jimbokachi ini ambe jatsiska enga xáni kánikua jukaparhaka” (2 Kor. 4:7). Joperu, ¿ambeeski inde ambe enga xáni kánikua jukaparhakueka? Jindeesti aianhpini Reinueri ambe enga jarhuatauaka kʼuiripuechani paraksï tsípiti pakarani (2 Kor. 4:1). ¿Ka ambeeskiksï jatakuecha engaksï kʼuerekua jingoni úkata jaka? Jucheeskachi Tata Diosïiri marhuariicha engachi aianhpijka ambakiti aianhperakuani. Jiáni enga Pablu irekapka, imeecha engaksï ambe ma ataranteenga porhechiicha jimboksï pásïreendi imani ambe enga jukaparhakuepka, komu tʼirekua, binu ka sentabu. Ini jurhiatikuecha jimbo, Tata Diosï Jeobajtsïni jukaparhakua ambe íntskusti: aianhpini ambakiti aianhperakuani. Imeeri jarhuajperata jingoni, jatsisïngachi uinhapikua parachi úni iápurisï aianhpini ambakiti aianhperakuani.

KURHAKU JE TATA DIOSÏ JEOBANI ESKAKSÏNI ÍNTSKUAKA BALORI

9. ¿Ambejtsïni jarhuataa parachi no jámani chérhiani kʼuiripuechani ochi chéni eskajtsïni no uékaaka kurhajchani? (Ístu exe je imajenini).

⁹ Jamberichi ménisï chérhiajka kʼuiripuechani ochi chéni eskajtsïni no uékaaka kurhajchani. ¿Ambechi uaa úni parachi no ísï pʼikuarherani? Ju je eratsentani ambe engaksï kómarhipka apostoliicha jiáni engaksï arhinhapka eskaksï nóteru aianhpepiringia. Enbesi deksï chéni ka nóteruksï uandantania, imeechaksï kurhakuspti Tata Diosï Jeobani eska jarhuataapiringa paraksï seguiriini “no sáni chéparini” uandantani Tata Diosïiri uandakueri ambe, ka ima jirejiresï mókukuantaspti (Úku. 4:​18, 29, 31). Engachi chérhiajka kʼuiripuechani, ju je juchajtu májkueni úni eska imeecha. Jo, ju je kurhakuni Tata Diosï Jeobani eskajtsïni jarhuataaka parachi no chérhiani ka eskachi xarhatakuauaka eskachi xénchaasïnga.

10. ¿Nénajtsïni jarhuatasïni Tata Diosï Jeoba parachi úni aianhpini? (Isaías 43:​10-12).

 ¹⁰ Tata Diosï Jeobajtsïni erakusti parachi imeeri Testigueni (arhinta je Isaíasi 43:​10-12). Ka aiachistijtsïni eskajtsïni jarhuataaka parachi no chéni. Ju je exeni tʼámu ambe enga úrajka parajtsïni jarhuatani. Ma ambe jindeesti eska Jesúsi juchantsïni jingoni jarhasïnga engachi aianhpini jámani jarhajka ambakiti aianhperakuani (Mat. 28:​18-20). Ístu, Tata Diosï Jeoba ánjeliichani erakuasti parajtsïni jarhuataani (Apok. 14:6). Máteru ambe jindeesti eskajtsïni Tata Diosï Jeoba íntskusïnga imeeri espiritu santu parajtsïni jarhuatani miántani ambe engachi jorhenguarhikia (Juanu 14:​25, 26). Ka últimu, Tata Diosï Jeobajtsïni íntsaasïndi erachiichani ka pirenchiichani parajtsïni pámbetani. Ka Tata Diosïiri jarhuajperata jimbo ka ístu juchaari erachiicheeri jimbo, uaakachi no sáni chéparini aianhpini.

JU JE JÁNGUARHINTANI JIRINHAANTANI KʼUIRIPUECHANI KA NO KUATANTANI

11. ¿Ambechi úpirini úni parachi sánderu uánikua kʼuiripuechani aianguani Tata Diosïiri ambe? (Ístu exe je imajenini).

¹¹ ¿Kómu pʼikuarherasïntsï engajtsï kasi no nemani exentajka kʼumanchikuecharhu? Enga ísïika, kurhamarhikuarhi je: “¿Naniksï niki? ¿Ánchikuarhinksï niki oksï jingoni ákua niki piáni?” (Úku. 16:13). Jiájkani, úpiringajtsï xanharuecha jimbo aianhpini. Erachi ma enga Joshua arhinhajka uandantasïndi: “Kánikuarini marhuachesïndi aianhpini jiáni engani xanharu jimbo nirani jauaka parani merkadurhu niárani, plasa ma jimbo o jimeesïsï engaksï uánikua tiendeecha jaka ka estasionamientuecharhu”. Imeeri témba jingoni enga Bridgeti arhinhajka, uánikua kʼuiripuechanksï exeantasïndi kʼumanchikuecharhu jiáni engaksï xatiniichani nirajka aianhpini ka dominguechani teruxutinisï (Éfes. 5:​15, 16).

12. ¿Nénachi uaa míteni ambeksï jakajkusïni kʼuiripuecha ka ambe enga uandanhiatajka?

¹² Engaksï kʼuiripuecha no káni uékajka kurhaani ambe engachi aianhpijka, ju je exeni ambeksï jakajkusïni o ambe uandanhiataasïni. Joshua ka Bridget, úrasïndiksï kurhamarhikuani enga trataduecharhu jaka paraksï ueenani uandontskuarheni kʼuiripuecha jingoni. Pori ejemplu, engaksï íntspijka trataduni ¿Nájtsï exesïni cha Bibliani?, arhiasïndiksï: “Máruksï kʼuiripuecha eratsesïndi eska Bibliani Tata Diosï kararkuarhiska ka máteruechaksï no májkueni uandasïndi. Ka cháia, ¿nájtsï uandapirini?”. Ka ísïksï ueenasïndi uandontskuarheni kʼuiripuecha jingoni.

13. ¿Nénachi uaa sési pʼikuarherani ka tsípikua jingoni aianhpini nájkirukajtsïni no nema uékaaka kurhajchani? (Proverbios 27:11).

 ¹³ Engajtsïni no nema uékaska kurhajchani aianhpikuarhu, no arhikuekasïndi eskajtsïni no sési nicheska. ¿Andi? Jimboka para Tata Diosï Jeoba ka imeeri Uájpa, sánderu jukaparhakuesti eskachi uaaka ambe engajtsïni imeecha kurhachejka: aianhpini ambakiti aianhperakuani (Úku. 10:42). Ísï jimbo, ju je no jukari uandanhiani engachi no nemani aianguaka o engajtsïni nema no ueekaaka kurhajchani. Uaakachi sési pʼikuarherani jimbokachi míteska eskachi jánguarhintaxaka sési pʼikuastani Tata Diosï Jeobani (arhinta je Proverbios 27:11).

14. ¿Nénachi pʼikuarherasïni enga aianhpiri ma exentajka nemani enga uéjka jorhenguarhini jurhimbikueri ambe ka andichisï ísï pʼikuarherajki?

¹⁴ Juchajtuchi kánikua tsípisïnga engaksï erachiicha o pirenchiicha újka uandontskuarheni nemani jingoni Tata Diosïiri ambe. Rebista Aianhpiri ísï terukutantasïndi juchaari ánchikuarhitani komueska sapini ma jirinhantani enga tsïnchetini jámani jaka ka uánikuechaksï uétarhisïndi paraksï iápurisï jirinhantani. Enga sapi na xarhantajkia, no solu ima tsípisïndi enga exentajka, sino iáminduecha engaksï xáni jámani japka jirinhantani. Májkueniisti, uánikuechaksï uétarhisïndi para jarhuatani nemani Jesúsiiri chúxapati úkuarhini. Iáminduechachi uétarhisïnga parachi iápurisï nirani aianhpini ka iáminduechachi tsípisïnga enga nema ueenajkia nirani tánguarhikuecharhu.

MIÁ JE NA ENGACHI XÁNI XÉNCHPEJKA

15. ¿Nénajtsïni uaa jarhuatani Mateu 22:​37-39 parachi sánderu tsípikua jingoni aianhpini? (Ístu exe je imajenini enga ueenakuarhu jaka).

¹⁵ Engachi jánguarhintaska exeni na engachi xáni xénchajka Tata Diosï Jeobani ka ístu kʼuiripuechani, jarhuataatijtsïni sánderu tsípikua jingoni aianhpini (arhinta je Mateu 22:​37-39). Eranhaska je na enga xáni tsípijka Tata Diosï engajtsïni exejka aianhpini jarhani ka na engaksï xáni tsípijka kʼuiripuecha engaksï ueenajka míteni Biblieri ambe. Asï mirikurhi je eskaksï tsípiti pakaraaka imeecha engaksï jorhenguarhiaka jurhimbikuani (Juanu 6:40; 1 Tim. 4:16).

16. Nájkirukachi no uaaka uérani kʼumanchikuarhu, ¿nénachi uaa tsípikua jingoni aianhpini? Uandanta je ejemplu ma.

¹⁶ ¿Nójtsï úsïni uérani kʼumanchikuarhu? Jimajkani, jánguarhinta je exeni ambejtsï uaa úni parajtsï xarhatani eskajtsï xénchasïnga Tata Diosï Jeobani ka ístu kʼuiripuechani. Samuel ka Dania, nóksï úxapti uérani pandemia COVID-19 jimbo.  Indeni tiempu jimbo, imeechaksï telefonu jimbo aianhpisïreendi, karteechanksï uaasïreendi ka Zoom jimboksï jorhentpisïreendi Biblieri ambe. Ka jimboka Samuel kánseri kámasïreenga, ima klinikarhu nirasïreendi ka jima jánguarhintasïreendi aianhpini. Ima uandantasïndi: “Engari problema ma jatsijka, niárasïngari kuatarani, kánikua uandanhiani ka ístu ménisïri kueratasïnga mintsikani Tata Diosïni. Jimbochisï jatsika para marhuakuni Tata Diosï Jeobani jimbokajtsïni jarhuatasïnga tsípini pʼikuarherani”. Ka ístu jiánisï, Diana kuarhatsespti ka tanimu kutsï no úspti jámani. Ka jatsispti para seisi kutsï siia de rueda jimbo jámani. Ima uandantasïndi: “Jánguarhintaspkia ambe engani xáni úpiringa úni. Aianguspka imani enfermerani engareni nireenga exeni, ístu imeechani engaksï nireenga ambe ma atarantani juchiniu. Ka telefonu jimbo aiangusïreenga Biblieri ambe uarhiitini ma enga ánchikuarhienga nani enga ima ambe ataranhantajka engaksï doktoriicha úrajka”. Nájkirukaksï ini ambe nitamakuarhini japka Samuel ka Diana, imeechaksï kánikua jánguarhintaspti para marhuakuni Tata Diosïni ka inde ambe jarhuataaspti kánikua sési pʼikuarherani.

17. ¿Nénajtsïni jarhuataa ísï úni eskachi na jorhenguarhikia?

¹⁷ Kánikuajtsïni marhuacheati ísï úni eskachi na jorhenguarhikia. Mándani ambe enga i jorhenguarhikua uandajka, ísïisti eska ima ambe engachi úrajka para úmantani. Engachi na iámindu ambe jatsikujkia, ¿a no eska tʼirekua kánikua áspisïnga? Ísï jimbo, engachi jánguarhintaska iámindu ambe ísï úni eskachi na jorhenguarhikia, nóteruchi no sési pʼikuarheraakia ka sánderuchi tsípikua jingoni aianhpiaka.