1. ¿Náki kʼéri kóntperatachi jatsiski?

KʼÉRI kóntperata máesti Jeobaeri kúnguarhikuarhu jarhani. Tsípikua jingonchi marhuakusïnga Jeobani juchari erachicha ka pirenchicha jingoni. Peru, ¿náki ánchikuarhitachi úsïni kúnguarhikuarhu mándani arhini?

2. ¿Náki ejemplu úraspi apostuli Pablu uánikua imeri kartecharhu enga espiritu santu jimbo karaapka?

² Uánikua kartecha jimbo enga apostuli Pablu karaapka espiritu santu jimbo, ejemplu ma úraspti parajtsïni uánikua ambe jorhendani íri ambe. Uandaspti eska kúnguarhikua ísïska komueska kʼuiripueri kuerpu ka eska kúnguarhikuarhu anapuechaksï ísïska komueska kuerpueri particha (Rom. 12:4-8; 1 Kor. 12:12-27; Efes. 4:16).

3. ¿Ambechi exea ini jorhenguarhikua jimbo?

³ Ini jorhenguarhikua jimbo, tanimu ambechi exeaka imani ejemplueri enga apostuli Pablu úrapka. Orheta, exeakachi eskachi mándani arhini jukaparhakueska Jeobaeri kúnguarhikuarhu. * Ístu, jorhenguarhiakachi ambechi uá úni parachi míteni náki ánchikuarhitachi úsïni kúnguarhikuarhu. Ka últimu, exeakachi andichisï méntkisï jatsi para imani ánchikuarhitani úni jarhani engajtsïni Jeoba íntskuka.

4. ¿Ambechi jorhenguarhisïni Roma 12:4, 5 jimbo?

⁴ Ambe engachi orheta jorhenguarhijka i ejemplueri enga Pablu úrapka, jindesti eskachi mándani arhini jukaparhakueska Jeobaeri familiarhu. Enga Pablu imani ejempluni úrapka, uandaspti: “Juchari kuerpu jukaasti jájkichani ka jantsirichani ka éskuechani ka mámaru ambe, peru no iámindu kuerpurhu anapu ambe májku ambe úsïndi. Ka ístu jucha nájkirukachi uánikueka, májku kuerpueskachi Kristuni jingoni, ka májku úkuarhintstixakachi máteru ka máteruni jingoni” (Rom. 12:4, 5). Ambe enga Pablu arhikuekani japka, jindesti eskachi no iáminduecha májku ánchikuarhita úsïnga kúnguarhikuarhu, peruchi iáminduecha jukaparhakueska.

5. ¿Náki “intsïmperakua” peeraski Jeoba kúnguarhikuecharhu?

⁵ Engachi kurhaajka eska nema jukaparhakueska kúnguarhikuarhu, jamberichi jirejiresï eratseajka imechani engaksï kúnguarhikuani orhejtsïkujka (1 Tes. 5:12; Ebr. 13:17). Ísïsti eska Jeoba, tata Jesukristuni úraparini, peeraaska kúnguarhikuecharhu achamasïchani engaksï “intsïmperakua” máeka (Efes. 4:8, TNM). I achamasïchaksï imechesti engaksï jaka Grupurhu enga Orhejtsïkuajka iámindu kúnguarhikuechani ka imecheri jarhuajpiricha, imecha engaksï Grupurhu jaka engaksï Betelini ma Orhejtsïkujka, sirkuitueri orhejtsïkuticha, imecha engaksï arhistatspijka Bibliaeri jorhentperakuecharhu, kúnguarhikuarhu anapu orhejtsïkuticha ka orhejtsïkuticheri jarhuajpiricha. Iámindu i erachichaksï espiritu santu jimbo intsïnhasïndi ánchikuarhita ma paraksï kuidariuani Jeobaeri karichichani engaksï xáni jukaparhakueka ka paraka kúnguarhikua sési jauaka (1 Ped. 5:2, 3).

6. Eska na uandajka 1 Tesalonika 2:6-8, ¿ambeksï jánguarhintasïni úni ima erachicha engaksï espiritu santu jimbo intsïnhajka ánchikuarhita ma kúnguarhikuarhu?

⁶ Erachichaksï espiritu santu jimbo intsïnhasïndi mámaru jásï ánchikuarhita ambe kúnguarhikuarhu. Ísï eskaksï jájkicha, jantsiricha ka máteru particha kuerpueri na uánikua ambe újka paraka iámu kuerpu sési jauaka, erachichaksï mámaru ambe úsïndi paraka kúnguarhikua sési jauaka. Nóksï uékasïndi eskaksï imecha kʼéri ambe exenhaaka, sánderu sési, jánguarhintasïndiksï sési pʼikuastaani erachichani ka uinhaperantaani (arhinta je 1 Tesalonika 2:6-8). Kánikuachi jukaparharasïnga enga Jeoba peeraaka kúnguarhikuarhu ini ambakiti erachichani engaksï orheta peerajka máteruecheri ambe ka eska imecheri ambe.

7. ¿Náki kóntperatechanksï jatsiasïni prekursoricha ka misioneruecha?

⁷ Jamberiksï juchari kúnguarhikuecharhu jati misioneruecha, prekursori espesialicha o regularicha. Iámu parhakpinirhu, jarhastiksï erachicha ka pirenchicha engaksï kʼamakʼamasï jámajka aianhpini ka Jesusiri chúxapatichani uáni. Ini ambe úparini, uánikuechanksï jarhuataastia Jesusiri chúxapati úkuarhini. Nájkirukaksï sáno iámindu i erachicha no uánikua ambe jatsikuarheka, Jeoba uánikua kóntperatechani íntsaastia (Mar. 10:29, 30). ¿A no eskachi kánikua jukaparharasïnga engaksï i erachicha kúnguarhikuarhu jaka?

8. ¿Andisï Jeoba jukaparharajki mándani aianhpirini?

⁸ Peru, ¿solu ima erachicha engaksï orhejtsïkujka kúnguarhikuani ka engaksï kʼamakʼamasï marhuakujka Jeobani, jindeskiksï engaksï jukaparhakueka Jeobaeri kúnguarhikuarhu? Nómbe. Para Jeoba ka para kúnguarhikua, iámindu aianhpirichaksï kánikua jukaparhakuesti (Rom. 10:15; 1 Kor. 3:6-9). Ka i ambe ísïsti, jimboka ambe enga sánderu jukaparhakueka para kúnguarhikua, jindesti Kristueri chúxapatichani  uáni (Mat. 28:19, 20; 1 Tim. 2:4). Iámindu kúnguarhikuarhu anapu aianhpirichaksï, ia sea engaksï itsï atakuarhikia o nómbe, jánguarhintasïndiksï Kristueri chúxapatichani uáni ka eska i ambe sánderu jukaparhakua ambeuaka imecheri irekuarhu (Mat. 24:14).

9. ¿Andichisï jukaparharaajki pirenchichani?

⁹ ¿Ka ambechi uá uandani pirenchicheri ambe? Jeoba kánikua jukaparharasïndi ambe engaksï pirenchicha újka kúnguarhikuarhu. Jeoba kánikua jukaparharaasïndi pirenchichani engaksï sési marhuakuni jaka, komu imechani engaksï uambuchatikia, uátsïchani, nándichani ka tsïndichani. Biblia ambakiti ambe uandasïndi uánikua nanakecheri engaksï jaiapanherantapka Tata Diosïni jimbokaksï jánhastispka, mintsikasïrendiksï Jeobani, nóksï chésïrendi, intsimpitisptiksï, ambakiti ambeksï úsïrendi ka tsípikua jingonksï marhuakusïrendi (Luk. 8:2, 3; Uku. 16:14, 15; Rom. 16:3, 6; Filip. 4:3; Ebr. 11:11, 31, 35). Kúnguarhikuecharhuksï jarhasti pirenchicha engaksï ini ambe xarhatajka. Kánikuachi jukaparharasïnga engaksï i járhati pirenchicha jaka kúnguarhikuarhu.

10. ¿Andichisï jukaparharaajki erachichani engaksï jatirikia?

¹⁰ Ístu, kóntperata máesti jatsiani uánikua erachichani engaksï jatirikia. Máruksï ióni páxatia sési marhuakuni Jeobani. Ka jamberiksï máteruecha nótki xáni ióni páni jati engaksï Jeobaeri ambe míteka. Peru jamberiksï iáminduecha úkua jukanchani jati pʼamenchakua ambe jimbo ka jimboksïsï nóteru xáni újtia jarhuajpini kúnguarhikuarhu ni aianhpikuarhu. Nájkiruka ísïka, jánguarhintasïndiksï aianhpini na engaksï xáni uáka ka ístuksï jánguarhintasïndi jarhuataani ka arhistakuani máteruechani. ¡Ka uánikua ambechi jorhenguarhisïnga imecheri ambe! Ísïsti, Jeoba kánikua jukaparharaasïndi ka ístu jucha (Prov. 16:31).

11, 12. ¿Nénaksïni jarhuatasïni ambe engaksï újka kúnguarhikuarhu anapu uátsïcha ka tumbiicha?

¹¹ Ístu, ju je sáni eratsentani uátsïcheri ka tumbiicheri ambe. Para imecha kánikua úkua jukasti orhepani uérakuani tsʼéjkukuechani i parhakpiniri nani enga Noambakiti juramuni jaka (1 Juanu 5:19). Peru kánikuajtsïni sési pʼikuastasïndi exeani engaksï mókuntajka tánguarhikuecharhu, engaksï uérajka aianhpini  ka engaksï no chéjka kuájpini ambe engaksï jakajkujka. Uátsïcha ka tumbiicha, chájtsï kánikua jukaparhakueska Jeobaeri kúnguarhikuarhu (Sal. 8:2).

¹² Peru para máru erachicha ka pirenchicha, úkua jukasïndi jakajkuni eskaksï jarhuajpisïnga kúnguarhikuarhu. Ju je exeni ambejtsïni jarhuataa míteni náki ánchikuarhitachi úsïni kúnguarhikuarhu.

13, 14. ¿Andiksïsï máru úpirini eratseni eskaksï no ma ambe úsïnga úni para kúnguarhikuani jarhuatani?

¹³ Pablueri ejemplu, ístujtsïni jorhendasïndi eskaksï uánikuecha úkua jukanchasïnga eratseni eskaksï jukaparhakueska kúnguarhikuarhu. Pablu karaspti: “Jimboka enga jantsiri uandapiringa: ‘Ji nóteruni kuerpurhu anapueska jimbokani no jindeska jájki’, ¿ísï jimbo nóteru kuerpurhu anapuepirini? Ka enga kutsïkua uandapiringa: ‘Ji nóteruni kuerpurhu anapueska jimbokani no jindeska éskua’, ¿ísï jimbo nóteru kuerpurhu anapuepirini?” (1 Kor. 12:15, 16). ¿Ambechi jorhenguarhisïni?

¹⁴ Engachi terukukuarhintaaka máteru erachicha jingoni, jamberichi no uáka exeni eskachi jukaparhakueska. Máru erachichaksï sési jorhentpisïndi, sésiksï úsïndi ambe ma, oksï sési orhejtsïkuni kúnguarhikuani. Ka jamberichi eratsejka eskachi jucha no xáni sési úsïnga ambe ma eska imecha. Inde ambe xarhatasïndi eskachi kaxumbitiska ka eskachi miásïnga eskachi no iámindu ambe úsïnga úni (Filip. 2:3). Peru ju je jingontku jámani. Engachi méntkisï terukukuarhintaska imecha jingoni engaksï ísï mítekateka eskaksï sési úsïnga ambe ma, niáraakachi kánikua no sési pʼikuarherani. Ísï eska na uandapka Pablu, jamberichi eratseaka eskachi no ma ambe úsïnga úni para kúnguarhikuani jarhuatani. ¿Ambejtsïni jarhuataa parachi no ísï pʼikuarherani?

15. Eska na uandajka 1 Korintu 12:4-11, ¿ambechi jatsiski para miáni?

¹⁵ Ju je ini ambe eratseni: Jeoba íntsaaspti máru primeru siglurhu anapu kristianuechani espiritu santueri uinhapikua paraksï mámaru ambe úni (arhinta je 1 Korintu 12:4-11). Nájkiruka Jeoba úpka eskaksï no iáminduecha  májkueni ambe úpiringa, iáminduechaksï jukaparhakuespti. Ísïsti eskachi iásï nóteru intsïnhaskia espiritu santueri uinhapikua para milagruechani uáni, peru no mójtakurhixati ambe enga jimini uandajka. Jamberichi no iáminduecha májkueni ambe újka úni, peru Jeobajtsïni iáminduechani jukaparharasïndi.

16. ¿Ambe uandaspi apostuli Pablu eskachi jatsiska para úni?

¹⁶ Enbesi dechi máteru erachicha jingoni terukukuarhintani jarhani, ju je úni ambe enga Pablu uandapka: “Ísï jimbo, uétarhisïndi eskajtsï mándani arhini exekuarhiaka na engajtsï jámani jaka, parajtsï úni mándani arhini sési pʼikuarherani chári ambe jimbojku ka no máterueri ambe jimbo” (Gal. 6:4).

17. ¿Nénajtsïni marhuachia úni ambe enga Pablu uandapka?

¹⁷ Engachi úska ambe enga Pablu uandaka ka engachi jánguarhintaaka exeni ambe engachi újka, jamberichi uénaaka exeni eskachi úsïnga úni ambe ma engaksï máteruecha no újka úni. Por ejemplu, jamberi kúnguarhikuarhu anapu orhejtsïkuti ma no újti xáni sési arhijtsïkpini eska máteruecha, peru kʼóru jarhuataasïndi kʼuiripuechani paraksï Jesusiri chúxapatini. O jamberi no xáni sési újti ambe ma ísï eskaksï máteru orhejtsïkuticha, peru kʼóru ísï mítekateni eska uékpitiska ka orhejtsïkuti máeni engaksï erachicha újka andarhierani paraksï Bibliaeri konseju ma kurhakuni. O jamberi ísï mítekateni eska sési kaasïnga iáminduechani (Ebr. 13:2, 16). Engachi sési mítetini jauakia ambe engachi újka sési úni, sésichi pʼikuarheraaka imani ambe jimbo engachi kúnguarhikuarhu újka. Ka ístu, nóchi enbidia pʼikuarheraaka imani ambe jimbo engaksï máteruecha sési újka ka jucha nómbe.

18. ¿Nénachi uá sánderu sési jorhentpini?

¹⁸ Náki uéjkichi ánchikuarhita úni kúnguarhikuarhu, iáminduechachi jatsiska para jánguarhintani sánderu sési marhuakuni Jeobani ka sánderu sési jorhentpini. Ka parachi ísï úni, Jeoba imeri kúnguarhikuani úrasïndi parajtsïni jorhendani. Por ejemplu, tánguarhikuecharhu engaksï entre semana úkuarhijka, jorhenguarhisïngachi nénachi uá sánderu sési aianhpini. ¿Jánguarhintaxakichi úni ambe engachi jima jorhenguarhijka?

19. ¿Ambechi uá úni parachi nirani Jorhentperakuarhu para Eianhpiricha Reinueri?

¹⁹ Máteru ambakiti ambe engachi jatsika parachi sánderu sési jorhentpini, jindesti Jorhentperakua para Eianhpiricha Reinueri, ka úsïndiksï nirani ini jorhentperakuarhu erachicha ka pirenchicha engaksï kʼamakʼamasï marhuakuni jaka Jeobani ka engaksï 23 a 65 jatirikia. ¿Ísïchi exesïni enajkichi jucha no méni uá nirani indeni jorhentperakuarhu? Enbesi dechi uánikua ambe eratseni engachi jimbo no uáka nirani, ju je eratseni ambe engachi jimbo uékapiringa nirani. Tátsekua, ju je eratseni ambe engachi úpiringa úni parachi nirani indeni jorhentperakuarhu. Jeobaeri jarhuajperata jingoni ka engachi jánguarhintaska, uákachi ambe engachi no méni eratsepka úni.

20. ¿Ambejtsïni jorhendasïni Roma 12:6-8?

²⁰ Ka tanimu úni jámani, ístuchi jorhenguarhisïnga máteru ambe Pablueri ejemplu jingoni, ixú jarhasti Roma 12:6-8 (arhinta je). Ixú Pablu ménderu uandasïndi eskachi iáminduecha mámaru ambe úsïnga úni kúnguarhikuarhu. Peru ístu uandasïndi eskachi jatsiska para úrani ambe engachi mándani arhini jorhenaka úni para sési pʼikuastaani ka uinhaperataani kúnguarhikuarhu anapuechani.

21, 22. ¿Ambechi jorhenguarhisïni ambe engaksï nitamakuarhika Roberto ka Felipe?

²¹ Ju je exeni ambe enga nitamakuarhipka  erachi ma enga Roberto arhinhajka. * Enga na marhuapkia máteru paisicharhu, pʼímarhinhaspti para marhuani imani Beteli jimbo nani enga ima anapueka. Nájkiruka arhinhapka eska no móskunhaxapka jimboka no sési ambe úpiringa, ima uandaspti: “Uánikua kutsï jimbo, kánikua kómu pʼikuarheraspka jimbokani eratsesïrenga eskani no úspka sési úni juchiti ánchikuarhitani. Astani niáraspka eratseni uéntani Beteli”. ¿Néna úspi ménderu sési pʼikuarherantani? Orhejtsïkuti ma miátantaspti eska ambe engachi antesi uénga Jeobaeri kúnguarhikuarhu, jarhuatasïngajtsïni parachi iásï sánderu sési úni jimbanhi ánchikuarhita ma engachi intsïnhajka. Roberto kurhanguspti eska nóteru jatsispkia para eratseni ambe enga antesi uénga sino ambe enga iásï úpiringa úni.

²² Erachi Felipe Epíscopo sáno májkueni jásï ambe nitamakuarhispti. Ima erachi ka témba, 1956 jimboksï niraspti Galaadiri Jorhentperakuarhu ka erachi sirkuitueri orhejtsïkutispti jini Bolivia. Uéxurhini 1964 jimbo, tataka sapichuksï ma kánguarhispti. Felipe uandantaspti: “Kánikuachi úkua jukanchaspka jurajkuni imani ánchikuarhitani. Ma uéxurhini jámaspka kómu pʼikuarherani. Peru Jeobaeri jarhuajperata jingoni, nóteruni ísï pʼikuarheraspkia ka jánguarhintaspka parani ambakiti táti máeni”. ¿Májkuenchi pʼikuarherasïni eska Roberto o Felipe? ¿No sésichi pʼikuarheraxaki jimbokachi nóteru úxakaia ánchikuarhita ma Jeobaeri kúnguarhikuarhu ísï eska antesi? Enga ísïka, uákachi sési pʼikuarherani engachi eratseska ambe engachi iáiasï újka úni para Jeobani marhuakuni ka ístu erachichani. Ju je méntkisï ánchikuarhini Jeobaeri kúnguarhikuarhu ka jarhuataani máteruechani imani ambe jingoni engachi jorhenaka úni. Ka sésichi pʼikuarheraaka engachi uinhaperantauaka kúnguarhikuarhu anapuechani.

23. a) ¿Para ambechi uá arhutani tiempu? b) ¿Ambechi exea máteru jorhenguarhikua jimbo?

²³ Jeoba, kánikua jukaparharaasïndi imeri marhuarichani. Ima uékasïndi eskachi imeri familia jingoni kuenta úkuarhiaka. Engachi arhutaska tiempu para exeni néna uinhaperantaani juchari erachichani ka jánguarhintanchi ísï úni, uákachi míteni nákiski juchari ánchikuarhita kúnguarhikuarhu. Peru, ¿nénachi exeasïni máteruechani? ¿Nénachi uá xarhatani eskachi jukaparharaasïnga? Máteru jorhenguarhikua jimbochi exeaka ini ambe.