1, 2. ¿Ambechi exea ini jorhenguarhikua jimbo?

JU JE eratseni eskachi erokuarhixaka ambe ma engajtsïni nema axachika, ambe ma engachi kánikua uétarhinchajka, joperu eska ióndaxaka janoni. ¿Nénachi pʼikuarherapirini? Jamberichi uandanhiapiringa. Jimbosï Proverbios 13:12 uandajti: “Enga no niárani jarhajka úkuarhini ambe enga ma erokuarhini jarhajka mintsita no sési pʼikuarherasïndi”. Joperu, ¿engachi kuenta íntskukuarhipiringa eska no janoxaka ambe ma jimbo enga kánikua jukaparhakueka? Enga ísïipiringa, tekaantskua jingonchi erokuarhipiringa.

² Ini jorhenguarhikua jimbo, exeakachi máru Biblieri karakatechani engajtsïni jarhuataaka tekaantani (Miq. 7:7). Ístuchi, exeaka tsimani ambe nani engachi jatsika para tekaantskua jingoni erokuarhini eska Tata Diosï Jeoba uaaka ambe ma. Ka últimu, exeakachi náki kóntperatechanksï jatsiaua imeecha engaksï tekaantskua jingoni erokuarhiaka.

3. ¿Ambechi jorhenguarhisïni Proverbios 13:11 jingoni?

³ Proverbios 13:11 jimbo, jarhasti ejemplu ma enga xarhatajka andisï xáni jukaparhakue tekaantstini. Jimini uandasïndi: “Jatsikuarhekua ambe enga ma sóntku tánajka, kʼamakurhisïndi, joperu ima ambe enga ma sánhani arhijka tánani kánikuaksï úkuarhiati”. ¿Ambechi jorhenguarhisïni ini karakata jingoni? Eska sánderu sésiska sánhani arhini úni ambe ma, tekaantskua jingoni.

4. ¿Ambechi jorhenguarhisïni Proverbios 4:18 jingoni?

⁴ Proverbios 4:18 arhisïndijtsïni eska “jurhimbiticheri xanharu” ísïiska “komueska enga jurhiata andarani jarhajka ka sánhani arhini uinhanharhini astaka sési erandiaka”. I uandakuechajtsïni  sési xarhatachesïndi eska Tata Diosï Jeoba, sánhani arhisïnga jorhendani imeeri iretani ambe enga eratseni jaka úni. Joperu ístu, i bersikulu úpirindi úrakuarheni para xarhatani na enga kristianu ma sánhani arhijka mójtakurhini. I ambe jatsisti para sánhani arhini úkuarhini, no uaati mátirku úkuarhini. Engachi sési jorhenguarhiska Tata Diosïri Karakatani ka engachi ísï úska eska jimini na arhijka ka ambe engajtsïni arhijka imeeri kúnguarhikua, sánhani arhiakachi ísïini eska Kristu ka sánderuchi sési míteaka Tata Diosïni. Jesúsi, ini ambe, ejemplu ma jingoni xarhataspti. Ju je exeni.

5. ¿Náki ejemplu úraspi Jesúsi parajtsïni jorhendani na enga kʼuiripu ma sánhani arhijka mójtakurhini?

⁵ Ejemplu ma jingoni, Jesúsi terukutantaspti ambe engachi aianhpijka Reinueri ambe, semiia ma jingoni enga sánhani arhijka kʼéni kʼuiripueri mintsitarhu. Uandaspti: “Peru [ima enga semiia jatsikujka] no sáni mítesïndi aberi nanina uérasïni ka kʼuiripeni inde semiia, jimboka echeri jindeeska enga kʼuiriperajka indeni semiiani, ueenani uitsakueni jásï ka tátsekua espiga jukasïndi, ka sánderu tátsekua jukasïndia trigu espigarhu” (Mar. 4:27, 28). ¿Ambe arhikuekaxapi? Eska ima kʼuiripu engachi aiangujka Reinueri ambe, sáno májkueni kʼuiripesïnga eska planta ma: sánhani arhini. Úsïngachi i ambe exeni engachi jorhendajka nemani Biblieri ambe na enga sánhani arhijka andarhierani Tata Diosï Jeobani ka engachi exejka eska ueenasïnga mójtakuni ambe ma imeeri irekuarhu (Efes. 4:22-24). Joperuchi no jatsiska para mirikurhini eska Tata Diosï Jeobasï újka eska ima semiia kʼuiripeaka (1 Kor. 3:7).

6, 7. ¿Ambechi jorhenguarhisïni na enga Tata Diosï Jeoba kueraaka Echerini?

⁶ Méntkisï enga Tata Diosï Jeoba újka ambe ma, tekaantskua jingoni úsïndi ka xáni tiempu úrasïndi eska xáni uétarhiaka. Ka úsïndi i ambe para kʼéri ambe arhinhani imeeri nombri ka para sési marhuakuani máteruechani. Ju je exeni na enga Tata Diosï Jeoba úpka ini Echerini parakaksï kʼuiripuecha úpiringa irekani.

⁷ Enga Biblia uandajka na enga Tata Diosï Jeoba kueraapka Echerini, uandasïndi eska exespka na enga xáni kʼépiringa, eska sési uaxastaspka, ka eska peeraspka tsakapuni enga jingoni  ueenapiringa (Job 38:5, 6). Asta niáraspti eratsentani na enga pakarani japka imeeri ánchikuarhita (Gén. 1:10, 12). ¿Úsïnchi eranhaskani na engaksï pʼikuarherenga ánjelicha engaksï exeni japka ambe enga kueraani japka Tata Diosï Jeoba? Kánikuaksï sési pʼikuarherapti, jimbokaksï niáraspka “kʼéri ambe arhini uinhachaparini” (Job 38:7). ¿Ambechi jorhenguarhisïni? Eska Tata Diosï Jeoba uánikua uéxurhini úraaska para kueraani Echerini, jóskuechani ka iámindu ambe enga tsípiti jaka, ka enga exepka na enga pakarapka ambe enga kueraapka, uandaspti eska ‘kánikua ambakiti ambeespka’ (Gén. 1:31).

8. ¿Ambechi exea iáiasï?

⁸ Eskachi na exekia ini ejempluecha jingoni, Bibliarhu uánikua ambe jarhasti engajtsïni jorhendajka na enga xáni jukaparhakueka tekaantstini. Iásï, ju je exeni tsimani ambe, nani engachi jatsika para erokuarhini eska Tata Diosï Jeoba uaaka ambe ma.

9. ¿Nanichi jatsiski para erokuarhini eska Tata Diosï Jeoba uaaka ambe ma?

⁹ Engachi ísï exeaka eska Tata Diosï Jeoba ióndaxaka mókuantani juchaari kómarhikuechani. Engachi kurhakuska Tata Diosïni eskajtsïni íntskua uinhapikua parachi úni orhepani uérakuani uandanhiatechani o engachi arhiska eskajtsïni jarhuataaka para nóteru úni imani ambe enga no sési jaka, jamberichi ísï exejka eska ima ióndaxaka mókuantani juchaari kómarhikuechani. ¿Andisï Tata Diosï Jeoba no jirejiresï mókuantajki iámindu juchaari kómarhikuechani?

10. ¿Andichisï jatsi para tekaantstini engachi kómarhiska Tata Diosï Jeobani?

¹⁰ Tata Diosï Jeoba jingontku kurhaasïndi juchaari kómarhikuechani (Sal. 65:2). Ka ísï úsïndi exeni na engachi xáni mintsikajka (Ebr. 11:6). Ístu, uékasïndi exeni sinchi jucha ísï uékasïni irekani eskachi na kurhakujka ka sinchi uékasïni úni ambe enga ima uéjka (1 Juanu 3:22). Ísï jimbo, engachi jucha kurhakuska Tata Diosï Jeobani eskajtsïni jarhuataaka jurajkuni ambe ma enga ima no jaiapanhentajka, jamberi uétarhiati eskachi tekaantstiuaka ka eskachi jánguarhintaaka ísï jámani eskachi na kurhakuka. Jesúsi uandaspti eska Tata Diosï no méntkisï jirejiresï mókuantasïnga kómarhikuechani enga i ambe uandapka: “Kurhajkuarhi je ka intsïnhaakajtsï. Jirinha je ka exentaakajtsï. Tentenasta je ka uéraminhaakajtsï, jimboka nákinterku nema enga kurhajkuarhijka, intsïnhasïnga. Ka ima enga jirinhajka, exentasïndi. Ka ima enga tentenaskajka uéraminhasïndi” (Mat. 7:7, 8). Engachi ísï uaaka eskaksï i karakatecha na arhijka ka engachi no kuatantaska kómarhini, uaakachi seguru jarhani eskajtsïni juchaari Taati auandarhu anapu kurhajchaaka ka mókuchintani (Kol. 4:2).

11. ¿Nénajtsïni jarhuatasïni Ebreu 4:16 engachi eratseaka eska Tata Diosï Jeoba ióndaxaka mókuantani juchaari kómarhikuechani?

¹¹ Úpiringachi eratseni eska Tata Diosï Jeoba ióndaxaka mókuantani juchaari kómarhikuechani, joperu imajtsïni aiachisïndi eskajtsïni mókuchintaaka “imani tiempu jimbo engachi uétarhinchaaka” (arhinta je Ebreu 4:16). Ísï jimbo, nóchi méni jatsiaka para eratseni eska Tata Diosï Jeoba no sési úsïnga engajtsïni no mókuchintaaka jiáni engachi jucha uékajka. Uánikuechaksï ióni páxatia kurhakuni eska jurajkuauaka paraksï exeni jiáni enga Tata Diosïri Reinu kʼamajkuaka ini parhakpinini. Jesúsi mismu uandaspti eskachi jatsiska para kurhajkuarhini eska juuaka Tata Diosïri Reinu (Mat. 6:10). Joperu kánikua no sési japirindi eskachi jucha nóteru mintsikapiringia Tata Diosïni jimboka nótki kʼamakurhixaka parhakpini anapu ambe jiáni engachi jucha uékapiringa (Hab. 2:3; Mat. 24:44). Ambe enga sánderu sési jaka, jindeesti eskachi erokurhiaka eska Tata Diosï Jeoba uaaka ambe ma ka eskachi jucha seguiriuaka mintsinharhikua jingoni kómarhini. I parhakpini anapu  ambe kʼamakurhiati “ima jurhiatikua ka ima ora” enga Tata Diosï Jeoba uaxastakata jatsikia. Ka jiáni ísï úkuarhiati enga sánderu sési jauaka para iáminduecha (Mat. 24:36; 2 Ped. 3:15).

12. ¿Káni úpirini sánderu úkua jukani tekaantstini?

¹² Engachi no sési kánhajka. Iásï, kʼuiripu no sési kaasïndi máteruechani jimbokaksï nanakeska o tatakeni, o engaksï no májkueni jáxeaka, oksï ménderueni uandani, oksï no jima anapueni, oksï máteru járhati pʼindekuechani jatsiani, o jimbokaksï diskapasidadi ma kámasïnga o nóksï úni sési eratseni. Uánikua Tata Diosï Jeobaeri marhuarhichaksï no sési kánhasïndi imani ambe jimbo engaksï jakajku ka engaksï Bibliarhu jupindaskuarhijka. Engachi ma ini ambe jimbo kómu nitamakuarhini jaka, ju je miántani ambe enga uandapka Jesúsi: “Ima enga tekaantaka asta kʼamarhutani jamberi, ima jindeati enga pʼimutantskateaka” (Mat. 24:13). Joperu, ¿engachi míteska eska kúnguarhikuarhu anapu ma kʼéri pekadu ma úska? Engaksï orhejtsïkuticha mítekia, ¿tekaantaachi ka mintsikani eskaksï orhejtsïkuticha ísï uaaka ambe ma eska Jeoba na uandajka? ¿Ambeksï uaa?

13. ¿Néna uékasïni Jeoba eska jarhuatanhaaka nema enga no sési niátaka?

¹³ Engaksï orhejtsïkuticha mítejka eska nema kʼéri pekadu ma úska, Tata Diosï Jeobanksï kurhakusïndi “ambakiti eratsekua enga karhakua uératini jurhajka” paraksï ísï exeni ambe ma eska ima na exejka (Sant. 3:17). Ambe engaksï uéjka orhejtsïkuticha engaksï uaaka ísï úni, jindeesti kʼuanhaskuntani imani enga pekadu ma úka jima enga no sési nirani jauaka (Sant. 5:19, 20). Ístu, jánguarhintasïndiksï ambe engaksï xáni uaaka úni paraksï kuájchakuni kúnguarhikuani ka paraksï sési pʼikuastantani imeechani engaksï no sési pʼikuarherani jauaka ini ambe jimbo enga pekadori úka (2 Kor. 1:3, 4). Engaksï orhejtsïkuticha jarhuatani jarhajka nemani enga kʼéri pekadu ma úka, jatsistiksï para míteni ambesï meru úkuarhi ka para i ambe úni tiempu uétarhisïndi. Tátsekuaksï jatsisti para kómarhini Tata Diosï Jeobani, Biblia jingoni konseju íntskuni ka jurhimberantani nani engaksï jamberi uaaka (Jer. 30:11). Ísïisti, orhejtsïkutichaksï no jirejiresï exesïndi ambeksï uaa imani jingoni enga no sési úka, joperuksï ístu no ióndaati ini ambe úni. Engaksï orhejtsïkuticha ísï újka ambe ma eska Jeoba na uandajka, kánikua sésiisïndi para kúnguarhikua, nájkiruka ísïiuaka, nema úpirindi no sési pʼikuarherani imani ambe jimbo enga úkuarhika. Engachi jucha ísï nitamakuarhini jaka, ¿ambechi uaa úni parachi no ísï pʼikuarherani?

14. ¿Náki Biblieri anapu ejemplujtsïni jarhuataa engajtsïni erachi ma no sési ambe úchiaka?

 ¹⁴ ¿Ménisïksïni niáraski erachi ma no sési úchini kúnguarhikuarhu? Tata Diosïri Karakatarhu uaakachi exeantani ejempluechani engajtsïni uaaka jarhuatani parachi úni tekaantani astaka Tata Diosï Jeoba sési peentaaka ambe ma. José no ikiani pakaraspti imani no sési jásï ambe jimbo engaksï ermanu jémbeecha úkupka. Sánderu sési, seguirispti marhuakuni Tata Diosï Jeoba ka ima újchakuraspti imeeri tekaantskua jimbo ka jimboka no kuatantaspti (Gén. 39:21). Ísï tátsekua José úspti puákuantani ermanu jémbeechani ka exespti na enga Jeoba újchakurapka (Gén. 45:5). Májkueni eska José, juchajtuchi uaaka sési pʼikuarherantani engachi andarhieraska Tata Diosï Jeobani ka engachi jurajkuska eska ima sési peentaaka ambe ma (Sal. 7:17; 73:28).

15. ¿Ambe jarhuataspi pirenchini ma tekaantani engaksï no sési kámani japka?

¹⁵ Ísïisti, jamberichi no méni xáni no sési kánhaaka eska José, joperuchi no sési pʼikuarherasïnga engajtsïni nema no sési kámajka. Engachi problema ma jatsiaka nemani jingoni, nájkiruka no Jeobaeri testigueuaka, sési jauati eskachi ísï uaaka eska Biblia na uandajka (Filip. 2:3, 4). Ju je exeni ambe enga úpka pirenchi ma enga mítepka eska ánchikuarhitarhu anapu kompaniera ma, no sési ambe uandaxapka imeeri ambe enga no ísïipka. Nájkiruka no sési pʼikuarherani japka no ikiaspti, sánderu sési, Jesúsiri ejempluni eratsentaspti, enga no no sési arhiantapka imeechani engaksï no sési arhini japka (1 Ped. 2:21, 23). Ísï jimbo, pirenchi no xáni jukaparharaspti imani ambe enga úkuarhini japka. Sánderu tátsekua, mítespti eska imeeri kompaniera nerbiueri pʼamenchaxapka. Ka pirenchi eratsespti eska ima no uékaspka no sési pʼikuastani. Ísï jimbo, pirenchi no ma ambe úspti ka sési pʼikuarheraspti enga no ikiapka engaksï no sési kámani japka.

16. ¿Ambejtsïni uaa sési pʼikuastantani engachi no sési kánhani jaka?

¹⁶ Engajtsïni nema no sési kámani jaka o engachi máteru uandanhiata ambe jatsika engajtsïni no sési pʼikuastani jaka ka tekaantanchi jarhani, ju je miáni eska Tata Diosï Jeoba imeecha jingoni jarhaska “engaksï no sési pʼikuarhinhijka mintsitarhu” (Sal. 34:18). Imajtsïni xénchasïndi jimbokachi tekaantstiska ka jimbokachi imani jurajkukuasïnga uandanhiatechani (Sal. 55:22). Ima jindeesti Juesi iámu Echerirhu ka iámu  ambe exesïndi (arhinta je 1 Pedru 3:12). Ísï jimbo, engachi jucha jatsiaka problemechani engachi no uaaka sési peentani, ju je miáni eskachi jatsiska para Tata Diosï Jeobani jurajkukuni para ima úni ambe ma.

17. ¿Ambejtsïni aiachisïni Jeoba ixú Isaías 30:18 jimbo?

¹⁷ No ióni jimbo juchaari Taati auandarhu anapu kʼéri kóntperatechantsïni íntskuauati imeeri Reinu jimbo. Isaías 30:18 uandasïndi: “Tata Diosï Jeoba tekaantskua jingoni erokuarhixati paraksïni kóntperatechani íntskuani ka jauaraati paraksïni pʼamojperakua xarhatacheni. Jimboka Jeoba Tata Diosï máeska jurhimbikueri. Tsípisïndiksï iámindu imeecha engaksï mintsinharhikua jingoni erokani jaka imani”. Imeecha engaksï mintsikani jaka eska Tata Diosï Jeoba uaaka ambe ma, uánikua kóntperatechanksï jatsiauati iásï ka sánderu orhepani jimbanhi parhakpinirhu.

18. ¿Náki kóntperatechanchi jatsiaua sánderu orhepani?

¹⁸ Jimbanhi parhakpini jimbo iáminduecha engaksï Tata Diosïni marhuakujka, nóteruchi méni tekaantauakia problemechani ni uandanhiatechani engachi iásï jatsiaka. Nóterujtsïni nema no sési kámaatia nijtuchi kómu pʼikuarheraa (Jaŋ. 21:4). Nóteruchi uandanhiauakia parachi jatsikuarheni imani ambe engachi uétarhinchajka jimbokachi kánikua ambe jatsikuarheakia (Sal. 72:16; Is. 54:13). ¡Xáni ambakiti ambe!

19. ¿Para ambejtsïni sánhani arhixaki prepararini Tata Diosï Jeoba?

¹⁹ Engajtsïni Tata Diosï Jeoba jarhuatani jaka parachi jurajkuani no sési járhati pʼindekuechani ka parachi sánderu ambakiti kristianueni, prepararixatijtsïni para jiáni engachi imeeri Juramukua jimbo irekaaka. Ju je no kuatantani ka ni chkétakuarhini, sánderu ambakiti ambe axuterku jarhastia. Kánikuachi sési irekuarhiaka, ísï jimbo, ju je tekaantskua jingoni erokuarhini eska Tata Diosï Jeoba uaaka imani ambe engajtsïni aiachikia.