1. ¿Ambechi úpirini kurhamarhikuarhini engachi eratsentapiringa iámindu amberi enga Tata Diosï Jeoba kueraaka?

ENGACHI eratsentajka na enga xáni kʼéka unibersu enga Tata Diosï Jeoba kueraaka, úpiringachi ísï pʼikuarherani eska Dabidi enga kómarhikua jimbo kurhamarhipka Tata Diosïni: “Engani exejka chiiti auandani, engari chiiti jájkicha jingoni úka, lunani ka jóskuechani engari tʼu kueraaka, ¿ambeeski achamasï ma enga niárajka uarhini parari tʼu ísï méntku miáni jarhani, ka achamasïri uájpa parari tʼu ísï kuájchakuni jarhani?” (Sal. 8:3, 4). Májkueni eska Dabidi, úpiringachi ísï eratseni eskachi kánikua sapichitu ambeeska engachi exeajka jóskuechani ka ískujtsïni pakatani engajtsïni Tata Diosï Jeoba útasï exeni jarhajka. Joperu eskachi na exeaka, Tata Diosï Jeoba no solu exeaxapti Adáni ka Ebani, sino ístu úspti eskaksï imeeri familiarhu japiringa.

2. ¿Ambe uékasïreeni Tata Diosï Jeoba eskaksï úpiringa imeeri orheta uájpeecha Echerirhu?

² Adáni ka Eba jindeesptiksï orheta uájpeecha Tata Diosï Jeobaeri Echerirhu ka ima jindeespti imeecheri Taati auandarhu anapu enga xénchpetika. Ima uékasïreendi eskaksï imeecha ánchikuarhiripiringa imeeri familiarhu. Ima arhiaspti: “Kánguarhia je sapiichani ka uánikua úkuarhi je ka uinira je echerini ka ánchita je” (Gén. 1:28). Uékasïreendi eskaksï kánguarhiapiringa uájpeechani ka eskaksï kuidaripiringa Echerini. Engaksï Adáni ka Eba kurhandirapiringa ka engaksï ísï úpiringa eska Tata Diosï Jeoba na arhiapka, imeechaksï ka imeecheri uájpeechaksï méntkisï japirindi Jeobaeri familiarhu.

3. ¿Andichisï uaa uandani eska Tata Diosï Jeoba kánikua jukaparharaaspka Adáni ka Ebani enga íntsaapka ambakiti lugari ma imeeri familiarhu?

³ Tata Diosï Jeoba kánikua jukaparharaaspti Adáni ka Ebani enga ambakiti lugari ma íntsaapka imeeri familiarhu. Ísï eska na arhijka Ebreu 2:7, Biblia ini ambe uandasïndi kʼuiripuecheri enga Tata Diosï  kueraaka: “Tʼuri úska eska ima sanititu sánderu sapichitu ambeepiringa ka eska ánjelicha, ka íntskuskari tʼíntskua ka úndi eska kʼéri arhinhapiringa” (Ebr. 2:7). Ísïisti eska Tata Diosï no xáni uinhapiti uaaska kʼuiripuechani eska ánjelichani, ni májkueni jásï jánhaskakua jingoni, niksï újki imani ambe úni engaksï ánjelicha újka (Sal. 103:20). Joperuksï ‘sanititu sánderu sapichitu ambeepirindi’ ka eska ánjelicha engaksï kánikua uinhapitika. ¡Xáni sési! Enga Tata Diosï Jeoba kueraapka juchaari orheta taatichani, sési jásï irekua ma íntsaaspti.

4. ¿Ambeksï úkuarhinchaspti Adáni ka Eba, ka ambechi exea ini jorhenguarhikua jimbo?

 ⁴ Xáni no sési enga Adáni ka Eba nóteru úpkia Tata Diosï Jeobaeri familiarhu jarhani. Eskachi na exeaka sánderu orhepani, í ambe kánikua no sési úkuaspti imeecheri uájpeechani. Joperu Tata Diosï Jeoba no mójtakuspti ambe enga uéjka úni. Ima uékasïndi eska imeecha engaksï kurhajchaaka niáraaka imeeri uájpeeni para méntkisï. Ju je exeni orheta na engajtsïni Tata Diosï Jeoba xarhatachekia eskajtsïni jukaparharasïnga. Tátsekuachi exeaka na engachi uaaka xarhatakuni engachi uékasïnga imeeri familiarhu jarhani. Ka últimu, exeakachi náki kóntperatechanksï jatsiaua Tata Diosï Jeobaeri uájpeecha para méntkisï ixú Echerirhu.

5. ¿Nénachi xarhatakusïni Tata Diosïni eskachi agradesidu jarhaska engajtsïni ísï úka eska ima na jásïika?

⁵ Tata Diosï Jeobajtsïni kánikua jukaparharasïndi jimbokajtsïni ísï úska eska ima na jásïika (Gén. 1:26, 27). Jimbokachi ísï úkata jarhaska eska ima na jásïika úsïngachi xénchpeni, pʼamojpini, no méni jurajpini ka jurhimbikua jingoni jámani (Sal. 86:15; 145:17). Engachi jánguarhintajka ísï úni, kʼéri ambechi arhisïnga Tata Diosï Jeobani ka xarhatakunchi jarhasïnga eskachi agradesidu jarhaska (1 Ped. 1:14-16). Engachi újka ambe enga juchaari Taati auandarhu anapu jaiapanhentajka, sésichi pʼikuarherasïnga ka tsípisïngachi. Ístu, jimbokajtsïni Tata Diosï Jeoba ísï úska eska ima na jásïika, úsïngachi ima jásï kʼuiripueni enga ima uéjka jatsiani imeeri familiarhu.

6. ¿Néna xarhatakuaspi Tata Diosï Jeoba eska jukaparharaasïnga kʼuiripuechani enga kueraapka Echerini?

⁶ Tata Diosï Jeobajtsïni ambakiti lugari ma úchisti parachi irekani. Kánikua antesi de kueraani kʼuiripuechani, Tata Diosï úspti Echerini para kʼuiripu irekani (Job 38:4-6; Jer. 10:12). Jimboka kánikua sési kámpisïnga ka intsïmpitini, mámaru ambe ústi parakachi tsípikua jingoni irekapiringa (Sal. 104:14, 15, 24). Ménichani, eratsentani pakarasïreendi imani ambe jimbo enga kueraapka ka “exespti eska ambakiti ambeespka” (Gén. 1:10, 12, 31). Xarhatakuaspti kʼuiripuechani eska kánikua jukaparharasïreenga, jimboka íntsaaspka iámindu ima sési jásï ambe enga ima kueraapka Echerirhu (Sal. 8:6). Tata Diosï uékasïndi eska kʼuiripu perfektuecha para méntkisï sési pʼikuarheraaka kuidarini sési jásï ambe enga ima kueraaka. ¿Pʼindeskichi agradeserikuni Tata Diosï Jeobani ini xáni ambakiti aiatsperakua jimbo?

7. ¿Néna xarhatasïni Josué 24:15 eskachi kʼuiripuecha úsïnga erakuni ambe engachi uékaaka úni?

⁷ Tata Diosï Jeobajtsïni jurajkusti parachi úni erakuni ambe engachi uékaaka úni. Ini ambe jimbo, úsïngachi erakuni ambe engachi uaaka úni juchaari tsípikua jingoni (arhinta je Josué 24:15). Juchaari Tata Diosï enga kánikua uékpitika, kánikua tsípisïndi engachi erakujka imani marhuakuani (Sal. 84:11; Prov. 27:11). Uánikua ambe jarhasti engachi uaaka sési erakuni úni. Ju je exeni ejempluni engajtsïni Jesúsi jurajkuchika.

8. Uanda je ejemplu ma nani enga Jesúsi jandiajku erakupka ambe úni.

⁸ Jesúsi imani ambe erakuspti úni engaksï máteruecha uétarhinchani japka ka juchajtuchi uaaka májkueni úni. Ma xanhari, ima ka imeeri apostulichaksï kánikua kuataratixapti, ísï jimboksïsï nípti mintsikuarhini jima enga no nema japka. Joperuksï no úspti ísï úni, jimbokaksï uánikua kʼuiripuecha ueenaspka niárani jima paraksï kurhaani Jesúsiri  jorhentperakuechani. Joperu Jesúsi no ikiaspti, pʼamojkuaspti ka “seguirispti mámaru ambe jorhendaani” (Mar. 6:30-34). Engachi úraska juchaari tiempuni ka uinhapikuani ísï eska Jesúsi parachi jarhuataani máteruechani, kʼéri ambechi arhini jarhasïnga juchaari Taati auandarhu anapuni (Mat. 5:14-16). Ka ísïchi xarhatakuni jarhasïnga eskachi uékasïnga imeeri familiarhu jarhani.

9. ¿Ambeksï jatsiski para no mirikurhini taaticha?

⁹ Tata Diosï Jeobajtsïni ústi parachi úni sapiichani kánguarhiani ka arhistijtsïni eskachi jorhendauaka paraksï imani xénchani ka paraksï marhuakuni. Engajtsï chá kánguarhiajka sapiichani, ¿jukaparharasïntsï indeni ambakiti regaluni? Nájkiruka Tata Diosï Jeoba íntsaaka ánjelichani uinhapikua paraksï kʼéri ambe úni, nóksï úsïndi sapiichani kánguarhiani. Ini ambe míteparini, taatichaksï agradesidu japirindi ini xáni ambakiti kóntperata jimbo. Tata Diosï íntsaasti ini xáni ambakiti ánchikuarhitani paraksï ísï tʼarhexeraani uájpeechani, jurhimberantaani ka konseju íntsaani eska ima na uéjka (Efes. 6:4; Deut. 6:5-7; Sal. 127:3). Ka para jarhuataani, Tata Diosïri kúnguarhikua íntsaasti erramientechani engaksï Bibliarhu pʼitakata jaka, komu publikasionichani, bideuechani, pirekuechani ka máteru jorhenguarhikuechani engaksï interneti jimbo jaka. Xarharasïndi eska juchaari Taati auandarhu anapu ka imeeri Uájpa xénchaasïngaksï juchaari sapiichani (Luk. 18:15-17). Tata Diosï Jeoba sési pʼikuarherasïndi enga exejka eskaksï taaticha mintsinharhisïnga ka engaksï jánguarhintajka kuidariuani imeecheri uájpeechani. Taaticha engaksï ini ambe újka jarhuataanksï jarhasïndi uájpeechani parakaksï niáraaka Jeobaeri familiarhu jarhani para méntkisï.

10, 11. ¿Ambe úski úni Tata Diosï Jeoba imeeri Uájpeeri uarhikua jingoni?

¹⁰ Tata Diosï Jeoba íntspisti imeeri Uájpani enga sánderu uékeenga para jucha úni ménderu imeeri familiarhu jarhani. Eskachi na exekia  párrafu 4 jimbo, Adáni ka Eba nóteruksï úsptia Tata Diosï Jeobaeri familiarhu jarhani ka pájtamasptiksï imeecheri uájpeechani (Rom. 5:12). Jimboka Adáni ka Eba nóteruksï uékaspkia kurhajchani Tata Diosïni, petanhantasptiksï Tata Diosïri familiarhu. Ka, ¿ambeksï úkuarhinchapirini imeeri uájpeecha? Tata Diosï Jeoba úspti ambe enga uétarhipiringa para ménderu jiókuarhiantani imeeri familiarhu imeechani engaksï kurhajchapiringa. ¿Néna úspi ísï úni? Tata Jesukristueri uarhikua jimbo enga jindeeka imeeri máechakua Uájpa (Juanu 3:16; Rom. 5:19). Ini ambe jimbo, úspti eska Tata Diosï jiókuarhiapiringa komueska imeeri uájpeechani 144,000 ambakiti kʼuiripuechani (Rom. 8:15-17; Jaŋ. 14:1).

¹¹ Ístuksï uánikua kʼuiripuecha jarhasti engaksï kurhajchajka Tata Diosïni, engaksï úni jaka ambe enga ima uéjka ka engaksï ístu sánderu orhepani uaaka Tata Diosïri familiarhu jarhani enga na nitamakia últimu tsʼéjkukua engaksï na kʼamakurhiakia mili uéxurhini (Sal. 25:14; Rom. 8:20, 21). Ini erokuarhikua jimbo, iásïksï ísï arhisïndia Tata Diosï Jeobani, imeecheri kuerajpirini, komueska “Taati” (Mat. 6:9). Ístu, ima kʼuiripuecha engaksï tsíntaaka, uaatiksï jorhenguarhini ambe enga Tata Diosï Jeoba uéjka eskaksï uaaka. Ka tiempu jingoni imeecha engaksï uékaaka kurhajchani Tata Diosïni, ístuksï uaati imeeri familiarhu jarhani.

12. ¿Náki kurhamarhikuanchi mókunta?

¹² Ísï eskachi na exekia, Tata Diosï Jeoba uánikua ambe ústia para xarhatani eska jukaparharaasïnga kʼuiripuechani. Jiókuarhiastia erakukatechani paraksï imeeri uájpeeni ka imeecha engaksï ‘uánikua kʼuiripuecha’ jingoni kuenta úkuarhijka, erokuarhikua ma íntsaasti parakaksï jimbanhi parhakpinirhu ístu niárani imeeri uájpeeni (Jaŋ. 7:9). ¿Ambechi uaa úni iásï parachi xarhatakuni Tata Diosï Jeobani eskachi uékasïnga imeeri familiarhu jarhani para méntkisï?

13. ¿Ambechi jatsiski para úni engachi uéjka Tata Diosï Jeobaeri familiarhu jarhani? (Markusʌ 12:30).

¹³ Ju je xarhatakuni Tata Diosï Jeobani eskachi xénchasïnga iámu mintsita jingoni marhuakuparini  (arhinta je Markusʌ 12:30). Iámindu regaluecheri engajtsïni Tata Diosï xénchperakua jingoni íntskuka, jamberi ma enga sánderu kʼéri ambeeka, jindeesti eskachi úsïnga kómarhini. Engachi kurhajchaska imeeri juramukuechani, xarhatakunchi jarhasïnga eskachi xénchasïnga (1 Juanu 5:3). Ma juramukua engajtsïni Jesúsi íntskuka jindeesti para imeeri chúxapatichani uaani ka itsï ataani (Mat. 28:19). Ístujtsïni Jesúsi juramuchisti eskachi iáminduecha xénchperaaka (Juanu 13:35). Tata Diosï Jeoba jiókuarhiauati imeeri familiarhu imeechani engaksï kurhajchajka (Sal. 15:1, 2).

14. ¿Nénachi xarhatasïni eskachi xénchaasïnga máteruechani? (Mateu 9:36-38; Roma 12:10).

¹⁴ Ju je xénchaani máteruechani. Uékperakua jindeesti ambe ma enga Tata Diosï sánderu xarhatajka (1 Juanu 4:8). Imajtsïni tʼuini xénchasptia ante de juchachi míteni imani (1 Juanu 4:9, 10). Engachi xénchajka máteruechani, májkuenchi úni jarhasïnga eska ima (Efes. 5:1). Uaakachi xarhatani eskachi xénchaasïnga kʼuiripuechani engachi jarhuataaska paraksï míteni Tata Diosï Jeobani, iásï enga útasteru tiempu jaka (arhinta je Mateu 9:36-38). Ísïchi jarhuataasïnga parakaksï uaaka jarhani Tata Diosï Jeobaeri familiarhu sánderu orhepatini. Enga nema itsï atakuarhiaka, jatsiskachi para seguirini jarhani xénchani ka janhanharhini (1 Juanu 4:20, 21). Pori ejemplu, ju je no sóntku no sési exeni enga nema no sési uaaka, ni eratseni eska uékanisï ísï úka o eska imajku uandanhiakuarhisïnga. Sánderu sési, ju je xarhatakuni eskachi jukaparharasïnga ka eratseni eska ima sánderu kʼéri ambeeska eska jucha (arhinta je Roma 12:10; Filip. 2:3).

15. ¿Neechanchi jatsiski para p’amojkuani ka sési kaani?

¹⁵ Ju je pʼamojkuani ka sési kaani iáminduechani. Engachi uéjka Tata Diosï Jeobaeri familiarhu jarhani para méntkisï, jatsiskachi para ísï irekani eska Biblia na jorhentpijka. Pori ejemplu, Jesúsi jorhentpispti eskachi jatsiska para pʼamojkuani ka sési kaani iámindu kʼuiripuechani, asta imeechani engajtsïni ikiachijka (Luk. 6:32-36). Jamberichi ísï exejka eska úkua jukasïnga. Engachi ísï exejka, jatsiskachi para jorhenguarhini ísï eratseni ka jámani eska Jesúsi. Engachi jánguarhintajka ísï kurhajchani Tata Diosï Jeobani ka májkueni jámani eska Jesúsi, xarhatakunchi jarhasïnga juchaari Taati auandarhu anapuni eskachi uékasïnga imeeri familiarhu jarhani para méntkisï.

16. ¿Ambechi uaa úni paraka no no sési ambe uandanhaaka Tata Diosï Jeobaeri familieri?

¹⁶ Ju je úni eska no no sési uandanhaaka Tata Diosï Jeobaeri familieri. Familiarhu ma, sapirhatichaksï májkueni jámasïndi eskaksï na exeajka ermanu jémba k’ératichani. Engaksï k’ératicha újka ambe engaksï uandajka Bibliarhu anapu karakatecha, ambakiti ejempluksï ma íntsaani jauati sapirhatichani. Joperu engaksï no sési ambe úska, jamberiksï sapirhaticha májkueni ambe uaati. Sáno májkuenisti Tata Diosï Jeobaeri familiarhu. Enga kristianu ma jurajkujka Tata Diosïni ka apostata úkuarhini o ísku jándikua ambe niátani o no jurhimbitku jámani, máteruechaksï úpirindi májkueni no sési úni. Imeecha engaksï ini ambe újka, úsïndiksï eska no sési ambe uandanhaaka imeecheri engaksï marhuakujka Tata Diosï Jeobani (1 Tes. 4:3-8). Ju je no májkueni úni eska inde no ambarhati ejempluecha ka ju je no jurajkuni eskajtsïni ambe ma jarharitaaka juchaari Taati auandarhu anapueri.

17. ¿Ambechi no jatsiski para eratseni, ka andi?

¹⁷ Ju je mintsikani Tata Diosï Jeobani ka no jatsikuarhekua ambeni. Tata Diosï Jeobajtsïni aiachisïndi eska engachi orheta peeraska imeeri Juramukuani ka engachi kurhajchaska imeeri ambakiti juramukuechani, imajtsïni íntskuati tʼirekua, xúkuparhakua ka kʼumanchikua (Sal. 55:22; Mat. 6:33). Ísï jimbo, ju je no eratseni eska i parhakpini anapu jatsikuarhekua ambe uaakajtsïni kuájchakuni ka eskajtsïni uaaka jarhuatani parachi sési pʼikuarherani. Míteskachi eska ambe enga uaaka eskachi meru sési pʼikuarheraaka, jindeeska úni ambe enga Tata Diosï uékajka (Filip. 4:6, 7). Asta engachi uaaka uánikua ambe piáni, jatsiskachi para eratseni sinchi jatsiski tiempu  ka uinhapikua parachi úraani ka kuidariuani. Ju je kurhamarhikuarhini: “¿Jukarini tsitisïni indeni ambe engani jatsikuarheka?”. Ju je miáni eska Tata Diosï Jeoba uékasïnga eskachi ánchikuarhiriuaka imeeri familiarhu. Ísï jimbo, ju je no jurajkuni eska jauaka ambe ma engajtsïni támisï páaka. Méntkuchi no uékasïnga ísïini eska ima tumbi enga Jesúsiri jurhiatikuecha jimbo irekapka enga no uékapka Tata Diosï Jeobani marhuakuni ka ni imeeri uájpa máeni para sánderu orhepani. ¿Ka andisï ísï úpi? Jimboka sánderu tsitisïreenga imani sánititu ambe enga jatsikuarhepka (Mar. 10:17-22).

18. ¿Náki kʼéri ambechi intsïnhaa ka náki kóntperatechanksï jatsiaua para méntkisï imeecha engaksï kurhajchajka Tata Diosïni?

¹⁸ Kʼuiripuecha engaksï újka ambe enga Tata Diosï uéjka, jatsiatiksï ambe ma enga sánderu kʼéri ambeeka: Tata Diosï Jeobaeri uékperakua ka uaatiksï imani kómarhini para méntkisï. Imeecha engaksï erokani jaka irekani Echerirhu ístuksï sési pʼikuarheraati kuidarini Echerini, ini xáni sési jásï planetani enga Tata Diosï Jeoba úka paraksï imeecha irekani. Tata Diosïri Juramukua jimbo, Echeri ka iámindu ambe enga jimini jaka, ménderu sési jáxentaaka ísï eska ueenakuarhu. Jesúsi kʼamajkuati iámindu imani uandanhiatechani engaksï Adáni ka Eba juaapka engaksï Tata Diosïri familiani jurajkupka. Ka Tata Diosï Jeoba tsítantauati uánikua kʼuiripuechani ka uaati eska imeechajtu uaaka irekani para méntkisï ka no ma pʼamenchakua jingoni enga Echeri Paraisu máeuakia (Luk. 23:42, 43, TNM). Enga Tata Diosï Jeobaeri familia enga ixú Echerirhu jaka perfektueuakia, mándani arini xarhataati tʼíntskua ka kʼéri ambeksï arhinhaati, ísï eska Biblia na uandajka (Ebr. 2:7).

19. ¿Ambechi jatsiski para miáni jarhani?

¹⁹ Engajtsï chá imeecha jingoni kuenta úkuarhijka engaksï ‘uánikua kʼuiripuecheka’, sési jásï erokuarhikuajtsï ma jatsiska. Tata Diosïksïni xénchasïndi ka uékasïndi eskajtsï imeeri familiarhu jauaka. Ísï jimbo, jánguarhinta je xáni eskajtsï xáni uaaka parajtsï jaiapanherantani. Méntkisï miáuanta je ka chaari mintsitarhu jatsia je indeni aiantsperakuechani engajtsïni Tata Diosï úchiajka. Jukaparhara je kóntperatani engachi jatsika para kómarhini juchaari Taati auandarhu anapuni enga xénchpetika ka ístu jukaparhara je kóntperatani engachi jatsika para méntkisï kʼéri ambe arhini.