1. ¿Ambejtsï míteski chá Kueraajpiriri ambe?

ENGAJTSÏ familia ma jimbo tʼarhexeka engaksï Jeobaeri testigueka, jamberijtsï desde sapichku ueenaka jorhenguarhini Tata Diosï Jeobaeri ambe. Jorhenguarhiskajtsï eska ima jindeeska Kueraajpiri, eska ambakiti kualidadichani jatsiaska ka eska uékasïnga eskaksï kʼuiripuecha paraisurhu ma irekaaka ixú Echerirhu (Gén. 1:1; Uku. 17:24-27).

2. ¿Ambeksï eratsesïni máru kʼuiripuecha imeecheri engaksï jakajkujka Kueraajpirini?

² Uánikua kʼuiripuechaksï no jakajkusïndi eska jarhaska Tata Diosï o eska ima kueraaska iámindu ambe. Imeechaksï jakajkusïndi eska ísku jatini úkuarhiska tsípikua ka eska tátsekua, imeecha engaksï “arisku sáni járhatipka”, sánhanksï arhispka mójtakukuarhipani astakaksï niárapka mámaru járhatiini. Máru inde kʼuiripuecha engaksï kánikua jorhenguarhika eskuelarhu, úpirindiksï uandani eska siensia xarhataskia eska ambe enga Biblia uandajka, no ísïiska ka eskaksï imeechajkusï jakajkujka Kueraajpirini engaksï no ma ambe míteka o engaksï no nika eskuelarhu ka engaksï iámindu ambe jakajkujka.

3. ¿Andisï xáni jukaparhakue eskachi mándani arhini sánderu jánguarhintaaka jakajkuni Tata Diosïni?

³ ¿Nénajtsïni úpirini no sési úchini ambe engaksï uandajka ima kʼuiripuecha engaksï kánikua míteka? ¿Úpirinksï inde kʼuiripuecha úni eskachi nóteru seguru jauakia eska Tata Diosï Jeoba jindeeska juchaari Kueraajpiri enga uékpitiika? Seguni ambe engachi jimbo jakajkujka eska ima jindeeska juchaari Kueraajpiri. ¿Jindeeski jimbokachi arhinhaska eskachi indeni ambesï jatsi para jakajkuni? ¿O jucha mismu exekuarhiski eska inde ambe ísïiska? (1 Kor. 3:12-15). Na uéjkichi xáni ióni páni jarhania Tata Diosï Jeobani marhuakuni, iáminduechachi  jatsiska para sánderu jakajkuni Tata Diosïni. Engachi ísï úska, nóchi jurajkuaka eskajtsïni ima kʼuiripuecha engaksï jorhentpijka eska no ísïiska ambe enga Biblia uandajka, támisïjtsïni jánhastaaka mámaru járhati “jorhenguarhikuechani jimbo ka chkuanderakua ambe jimbo” engaksï “no marhuajka” (Kol. 2:8; Ebr. 11:6). Parajtsïni jarhuatani ísï úni, ini jorhenguarhikua jimbochi exeaka, andiksïsï uánikua kʼuiripuecha no jakajkujki Kueraajpirini, nénachi uaa jucha sánderu jakajkuni Tata Diosï Jeobani enga juchaari Kueraajpiriika ka nénachi uaa méntkisï jakajkuni Tata Diosïni.

4. Eska na arhijka Ebreu 11:1, ¿ambe uandasïni Biblia eska jindeeska jakajkukua?

⁴ Máru kʼuiripuechaksï eratsesïndi eska mintsikani Tata Diosïni arhikuekasïnga jakajkuni nájkiruka no ma prueba jauaka. Peru Biblia uandasïndi eska jakajkukua no indeni ambesï arhikuekajka (arhinta je Ebreu 11:1). Biblia uandasïndi eskachi uaaka jakajkuni imani ambe engachi no újka exeni, komu Tata Diosï Jeobani, tata Jesukristuni ka auandarhu anapu Reinuni, jimbokaksï jarhaska pruebecha engaksï xarhatajka eskaksï meru jarhaska (Ebr. 11:3). Sientifiku ma enga testigu úkuarhika uandasïndi: “Jeobaeri testiguechaksï jakajkusïndi ambe ma, jimbokaksï jatsiaska pruebechani ka kuenta úsïndiksï ambe engaksï sientifikuecha exentajka”.

5. ¿Andiksïsï uánikua kʼuiripuecha no jakajkujki eska Tata Diosï kueraaska iámindu ambe enga tsípiti jaka?

⁵ Jiájkani, enga jaka ambe ma enga xarhatajka eska jarhaska Kueraajpiri ma, ¿andiksïsï uánikua kʼuiripuecha no jakajkujki eska jarhaska Tata Diosï ma enga kueraaka iámindu ambe enga tsípiti jaka? Jimbokaksï máru no méni jánguarhintaska jirinhantaani pruebechani. Robert enga iásï Jeobaeri testiguekia, uandasïndi: “Eskuelarhu, no méni uandanhasïreendi eska Tata Diosïsï kueraaka ambe ma, ísï jimbo, jakajkusïreenga eska inde ambe no ísïispka. Joperu engani  22 jatiripkia, Jeobaeri testiguechajtsïni exerasti eskaksï jarhaska pruebecha engachi jimbo uaaka jakajkuni ambe enga Biblia uandajka kueraakateri ambe”. * (Exe je rekuadruni “ Jukaparhakua ambe para taaticha”).

6. ¿Andiksïsï máru kʼuiripuecha no jakajkujki eska jarhaska Kueraajpiri ma?

⁶ Máru kʼuiripuechaksï uandasïndi eska no jarhaska kuerajpiri ma jimbokaksï uandasïnga eskaksï imantkusï jakajkujki ambe engaksï újka exeni, joperu no ísïisti jimbokaksï jakajkusïnga ambe engaksï no újka exeni, pori ejemplu, jakajkusïndiksï eska jarhaska tarhiata. Jimbokaksï jarhaska pruebecha. Jakajkukua enga Biblia uandajka, ístu pruebecharhu jupindaskuarhisïndi ima ambeeri engachi no újka exeni (Ebr. 11:1). Para exeni eska inde ambe ísïiska, tiempu uétarhisïndi ka eska ma jánguarhintaaka ka uánikua kʼuiripuechaksï no uékasïndi ísï úni ka jimboksïsï no jakajkujti eska jarhaska Tata Diosï.

7. ¿Nénachi míteski eskaksï máru kʼuiripuecha engaksï unibersidadirhu nika jakajkusïnga eska Tata Diosï kueraaska unibersuni?

 ⁷ Máru sientifikuechaksï niárasti jakajkuni eska Tata Diosï kueraaska unibersuni jimbokaksï exeaska pruebechani. * Májkueni eska Robert, engachi párrafu 5 jimbo uandaka, jamberiksï máru kʼuiripuecha no jakajkujti eska jarhaska Kueraajpiri ma, jimboka unibersidadirhu no jorhentperanhasïnga inde ambe, peruksï uánikua sientifikuecha niárasti míteni ka xénchani Tata Diosï Jeobani. Májkueni eska imeecha, iáminduechachi uaaka sánderu jakajkuni Tata Diosïni no arhiparini asta nani engachi jamberi nika eskuela. No nema uaati úni indeni ambe juchantsïni jimbo.

8, 9. a) ¿Nákichi kurhamarhikua exeni jaua iásï? b) ¿Nénajtsïni jarhuata jorhenguarhini kueraakateri ambe?

⁸ ¿Ambechi uaa úni parachi sánderu jakajkuni eska jarhaska Kueraajpiri ma? Ju je tʼámu ambe exeni.

⁹ Ju je jorhenguarhini kueraakateri ambe. Engachi jingontku exeaska animalichani, plantechani ka jóskuechani sánderuchi jakajkuaka Kueraajpirini (Sal. 19:1; Is. 40:26). Engachi sánderu jorhenguarhiska ícheri ambe, sánderuchi jakajkuaka eska Tata Diosï Jeoba jindeeska Kueraajpiri. Juchaari publikasionicharhu somenksï uérani jarhasïndi jorhenguarhikuecha engaksï uandajka Tata Diosïri kueraakateri ambe. Nájkirukachi sáni úkua jukanchaaka kurhanguani, ju je jánguarhintani parachi arhiantani ka jorhenguarhini xáni eskachi xáni uaaka ka ju je no mirikurhini eska juchaari pájinarhu jw.org, uaakachi ménderu exeani indeni xáni sési járhati bideuechani engaksï kueraakateri ambe uandajka ka engaksï últimu kʼéri tánguarhikuecharhu rejioniri xarhatanhaka.

10. Uanda je ejemplu ma enga xarhatajka eska jarhaska Kueraajpiri ma (Roma 1:20).

¹⁰ Engachi jorhenguarhini jauaka Tata Diosïri kueraakateri ambe, ju je exeni ambe engajtsïni jorhendajka imeeri ambe (arhinta je Roma 1:20). Pori ejemplu, Jurhiata no solu jarhuajpesïndi paraka tsándiaka ka jorheperpintani paraka uaaka tsípikua jarhani Echerirhu, sino ístu, tsánda jukasti ambe ma engajtsïni úpiringa no sési úchini. ¿Nénachi kuájchakukata jarhaski kʼuiripuecha? Ma uirhipandani Echerirhu, gasi ma jarhasti engajtsïni kuájchakujka parajtsïni tsánda no no sési úchini. Enga niárajka sánderu tsándini, gasijtu niárasïndi sánderu úkuarhini parajtsïni kuájchakuni. ¿No ísïiski eska engachi ini ambe exejka, úsïngachi jakajkuni eska jarhaska Kueraajpiri ma enga kánikua jánhastiika ka xénchpetiini?

11. ¿Nanichi uaa exentani sánderu ambe kueraakateri ambe, engajtsïni jarhuataaka parachi sánderu jakajkuni Kueraajpirini? (Exe je rekuadruni “ Máru ambe engajtsïni jarhuatajka sánderu jakajkuni Kueraajpirini”).

¹¹ Engachi jirinhantaska informasioni Índice de las publicaciones Watch Tower ka jw.org jimbo, uánikua ambechi exentaaka kueraakateri ambe engajtsïni jarhuataaka parachi sánderu jakajkuni Tata Diosïni. Úpiringachi ueenani exeani jorhenguarhikuechani ka bideuechani partirhu enga arhinhajka “¿Ísku úkuarhiski o nema úski?”, nóksï kʼérasti ka uandantasïndiksï ambakiti ambe animalicheri ka plantecheri. Ístuksï jarhasti ejempluecha engaksï xarhatajka néna engaksï sientifikuecha sáno májkueni jásï ambe jánguarhintajka úni eska kueraakata ambe.

12. ¿Ambe ka ambechi jatsiski para exeni engachi Bibliani jorhenguarhiaka?

¹² Ju je jorhenguarhini Bibliani. Sientifiku engachi párrafu 4 jimbo uandaka, orheta no jakajkusïreendi eska jarhaspka Kueraajpiri ma, joperu tátsekua niáraspti ménderueni eratseni. Ima uandasïndi: “Ambe engani ji jakajkujka, no solu  siensia jimboesti, sino ístu engani sési jorhenguarhipka Bibliani”. Jamberichi jucha mítekia ambe enga Biblia jorhentpijka, joperuchi jatsiska para seguirini jorhenguarhini parachi sánderu jakajkuni Kueraajpirini (Jos. 1:8; Sal. 119:97). Ju je exeni eska meru ísïiska ambe enga uandajka ióntki anapu ambeeri, eska úkuarhisïnga ambe enga uandajka ka eska iámu ambe terukuntasïnga. I ambejtsïni jarhuataati parachi sánderu mintsikani eskajtsïni Kueraajpiri ma úska enga kánikua jánhastiika ka xénchpitiini ka eska imasï kararkuarhika Bibliani (2 Tim. 3:14; 2 Ped. 1:21). *

13. Uanda je ejemplu ma enga xarhataaka na enga xáni marhuajka Tata Diosïri Karakata.

¹³ Engachi jorhenguarhiaaka Tata Diosïri Karakatani, ju je exeni eskaksï meru marhuasïnga Biblieri konsejuecha. Pori ejemplu, Biblia iónistia enga uandapka eskajtsïni no sési úchiaka sánderu sentabu uékani jatsini ka uaati eskachi uánikua uandanhiatechani jatsiauaka (1 Tim. 6:9, 10; Prov. 28:20; Mat. 6:24). ¿Útasï marhuasïni i konseju? Jo. Ju je exeni ambe enga uandajka libru ma, na engaksï jásïipiringa kʼuiripuecheri ini jurhiatikuecha jimbo, uandasïndi: “Sáno iámindu kʼuiripuecha engaksï jatsikuarherika, nóksï tsípikua jingoni irekasïndi ka kómu pʼikuarherasïndiksï. Ka ima kʼuiripuecha engaksï sánderu sentabu uéjka jatsini, sánderuksï pʼamenchasïndi”. Jiájkani, exeskachi eska ambe enga Biblia uandajka para ma no jámani sánderu tsitini sentabuni, merujtsïni marhuachesïnga. ¿Miáxakichi máteru Bibliarhu anapu karakatani engajtsïni jarhuataka? Engachi sánderu jukaparharaaska Biblieri konsejuechani, exeakachi eska juchaari Kueraajpiri enga xáni uékpitiika míteska ambe enga sánderu sésiska para jucha ka méntkisïchi jirinhantauaka imeeri konsejuechani (Sant. 1:5). Ka ísïchi sánderu tsípikua jingoni irekaaka (Is. 48:17, 18).

14. ¿Ambechi jorhenguarhisïni Tata Diosï Jeobaeri ambe engachi Biblieri ambe jorhenguarhijka?

¹⁴ Ju je jorhenguarhini joperu para sánderu sési míteni Tata Diosï Jeobani (Juanu 17:3). Engachi jorhenguarhini jauaka Bibliani, exeakachi na enga járhati kualidadichani jatsiaka Tata Diosï Jeoba ka enga xarhataajka imeeri kueraakatarhu. Engachi niáraska jorhenguarhiani imeeri kualidadichani, jarhuataatijtsïni parachi jucha seguru jarhani eska Tata Diosï Jeoba meru jarhaska (Éx. 34:6, 7; Sal. 145:8, 9). Engachi sánderu sési míteaka Tata Diosï Jeobani, sánderuchi mintsikaaka, xénchani ka sánderuchi sési pájperaaka imani jingoni.

15. ¿Nénajtsïni jarhuataa engachi uandontskuarhekuaska máteru kʼuiripuechani eskachi jakajkusïnga Tata Diosïni?

¹⁵ Ju je uandontskuarheni máteruecha jingoni eskachi jakajkusïnga Tata Diosïni. I ambe uaati eskachi sánderu jakajkuaka Tata Diosïni. ¿Ka engajtsïni nema kurhamarhiska sini meru jarhaski Tata Diosï ka jucha no míteni ambe mókukuntani? Ju je jirinhantani juchaari publikasionicharhu mókuntskuani enga Bibliarhu pʼitakata jauaka ka tátsekua exerani kʼuiripuni ambe engachi exentaaka (1 Ped. 3:15). Ístuchi uaaka arhini erachini ma enga sánderu mítekia eskajtsïni jarhuataaka. Iá sea enga kʼuiripu jiókuarhiaka ambe enga Biblia uandajka o nómbe, kánikuajtsïni marhuacheati engachi jucha jirinhantaska sánderu informasioni, jimbokachi niáraaka sánderu jakajkuni Tata Diosïni ka inde ambe uaati eskajtsïni no no sési pʼikuastaaka ima ambe engaksï ima kʼuiripuecha uandajka engaksï kánikua jorhenati úkuarhijka ka engaksï no jakajkujka eska jarhaska Kueraajpiri ma.

16. ¿Ambechi úpirini úkuarhinchani engachi no seguiriska sánderu jakajkuni Tata Diosïni?

¹⁶ Na uéjkichi xáni ióni marhuakukia Tata Diosï Jeobani, jatsiskachi para seguirini sánderu jakajkuni imani. ¿Andi? Engachi no ísï úska, uaakachi nóteru xáni jakajkunia. Ju je miáni eska jakajkuni arhikuekasïnga seguru jarhani imani ambe jimbo enga no xarharajka. Ka ambe enga  no xarharajka, ma sóntku mirikurhisïndi. Ísï jimbosï apostuli Pablu uandapti eska enga ma no jakajkujka, ‘pekadueska’ engajtsïni “méntku jauenani jarhajka uékani terungutani” (Ebr. 12:1). Jimajkani, ¿ambechi uaa úni parachi seguirini jakajkuni Tata Diosïni? (2 Tes. 1:3).

17. ¿Ambejtsïni jarhuataa parachi seguirini jakajkuni Tata Diosïni?

¹⁷ Orheta, ju je someni kurhakuni Tata Diosï Jeobani eskajtsïni íntskuaka imeeri espiritu santu. ¿Andi? Jimbokachi espiritu santuni jimbosï újka jakajkukua jatsini (Gal. 5:22, 23). Enga no espiritu santu jimboeuaka, nóchi uaaka sánderu jakajkuni ka seguirini jakajkuni Kueraajpirini. Ju je seguirini kurhakuni Tata Diosï Jeobani eskajtsïni íntskuaka imeeri espirituni ka imajtsïni íntskuati (Luk. 11:13). Uaakachi arhini: “U eskachi jucha sánderu kánikua mintsikaaka” (Luk. 17:5).

18. Eska na arhijka Salmo 1:2, 3, ¿náki k’éri kóntperatachi jatsiski?

¹⁸ Ístu, ju je someni jorhenguarhini Tata Diosïri Karakatani (arhinta je Salmo 1:2, 3). Enga i Salmo karanhapka, nóksï uánikua Israeli anapuecha jatsispti kopia ma iámindu Tata Diosïri Leiri. Joperuksï reicha ka saserdotichaksï jatsiaspti indeni kopiechani ka mándani siete uéxurhini Israeli anapuechaksï, tatakecha, nanakecha, sapiicha ka imeecha engaksï jima irekani japka engaksï uérakisï anapuepka, jatsisptiksï para tánguarhintani paraksï kurhajchani arhintskuani Tata Diosïri Leiri (Deut. 31:10-12). Jesúsiri jurhiatikuechani jimbo, namunitku kʼuiripuechajkusï jatsiaspti karakatechani ka sáno iáminduechaksï sinagoguecharhuksï jarhaspti. Joperu ini jurhiatikuechani jimbo, iáminduechachi jatsiska iámu Bibliani o ma parti. ¿Nénachi uaa xarhatani eskachi jukaparharasïnga ini xáni ambakiti kóntperatani?

19. ¿Ambechi jatsiski para úni parachi seguirini jakajkuni Tata Diosïni?

¹⁹ Uaakachi xarhatani eskachi jukaparharasïnga Tata Diosïri Karakatani engachi pauani pauani arhintaska. Nóchi uaaka jiántku arhintani engachi uaaka o engachi eratseaka eskachi tiempu jatsiska. Engachi orariu ma jatsiska para jorhenguarhini Biblieri ambe, uaakachi seguirini jakajkuni Tata Diosïni.

20. ¿Ambechi eratsetixaki úni?

²⁰ Juchaari jakajkukua no ísïisti eska i parhakpini anapu jorhenaticheri ka engaksï mítekuka, jimboka juchaari jakajkukua Bibliarhu jupindaskata jarhaska (Mat. 11:25, 26). Bibliajtsïni mítetarasti andisï i parhakpini xáni no sési jánhaskuarhipani jaki ka ambe enga uaaka Tata Diosï Jeoba paraka sési peentaaka iámindu ambe. Ísï jimbo, ju je eratsetini jarhani eskachi seguiriuaka sánderu jakajkuni Tata Diosïni ka jarhuataani xáni uánikua kʼuiripuechani eskachi xáni uaaka parakaksï imeechajtu niáraaka mintsikani juchaari Kueraajpirini (1 Tim. 2:3, 4). Ka ju je seguirini tsípikua jingoni erokani imani jurhiatikuani enga iámindu imeecha engaksï Echerirhu irekaaka, k’éri ambe arhiaaka Tata Diosï Jeobani arini uandakuecha jingoni engaksï Jaŋaskuecha 4:11 jimbo jaka: “Juchaari Tata [Diosï Jeoba], jukanchaskari [...] arhinhani eskari kʼéri ambeeska [...], jimboka tʼu kueraaska iámindu ambe”.