1, 2. Eska na arhijka Salmo 34:8, ¿ambechi jatsiski para úni parachi niárani míteni eska Tata Diosï Jeoba ambakitiska?

JU JE eranhaskani eskajtsïni nema uékasïnga tsʼémutani tʼirekua ma engachi no méni arhani japka. Úpiringachi míteni na enga jámarhajka, engachi sïpiruska, engachi kurhanguarhiska ambe ka ambe jukaski o engachi kurhamarhiska nemani sini anhenchajki. Joperuchi solu uaaka míteni siengachi anhenchaaka engachi tsʼémuska.

² Sáno májkueni, soluchi uaaka míteni na enga xáni sési kámpijka Tata Diosï Jeoba engachi arhintaska Bibliani ka juchaari publikasionichani ka ístu engachi kurhajchaska máteruechani na enga Tata Diosï Jeoba újchakueraakia. Joperuchi solu uaaka kurhanguni na enga xáni sési kámpijka Tata Diosï Jeoba engachi jucha mismu ‘tsʼéjkuska’ (arhinta Salmo 34:8). Pori ejemplu, ju je eratseni eskachi uékasïnga marhuakuni Tata Diosï Jeobani tiempu kompletueri, joperu para ísï úni, jatsiskachi para arisku sáni irekani. Jamberichi uánikua uelta arhintakia eska Jesúsi uandaspka eska engachi Tata Diosïri Reinuni orheta peeraska, Tata Diosï Jeobajtsïni íntskuati imani ambe engachi jucha xáni uétarhinchajka. Jamberichi no méni úka exeni jucha mismu eska inde ambe ísïiska (Mat. 6:33). Joperuchi mintsikasïnga Jesúsiri aiatsperakuani, ísï jimbo, nóteruchi xáni úrasïngia sentabu ka nóteruchi xáni ánchikuarhisïngia parachi úni sánderu aianhpini. Engachi ísï újka, exesïngachi engajtsïni Tata Diosï Jeoba meru kuidarisïnga. Ka juchachi mismu exesïnga eska sési kámpisïnga.

3. Eska na arhijka Salmo 16:1, 2, ¿Tata Diosï Jeoba neechani sési kaasïni?

³ Tata Diosï Jeoba “ambakitisti iáminduecha jingoni”, asta imeecha jingoni engaksï no míteka (Sal. 145:9; Mat. 5:45). Joperu sánderu xénchaasïndi imeechani engaksï xénchaajka ka marhuakuni iámu mintsita jingoni (arhinta je Salmo 16:1, 2). Ju je exeni máru  ambakiti ambe enga Tata Diosï Jeoba úka juchantsïni jimbo.

4. ¿Néna xarhatasïni Tata Diosï Jeoba eska sési kaasïnga imeechani engaksï ueenajka andarhierani?

⁴ Méntkisï engachi újka ambe engachi jorhenguarhijka Tata Diosï Jeobaeri ambe, exesïngachi eskajtsïni kánikua marhuachesïnga. Engachi jorhenguarhini japka imeeri ambe ka engachi niárapka xénchani, jarhuatasptijtsïni mójtakuni na engachi eratsenga ka jámani engajtsïni no jurajkuenga parachi Tata Diosïni andarhierani (Kol. 1:21). Ka engachi aiakukuarhepka ka itsï atakuarhini, sánderujtsïni sési kámaspti jimbokajtsïni jarhuataspti ambakiti konsiensia ma jatsini ka sánderu sési pájperani imani jingoni (1 Ped. 3:21).

5. Engachi aianhpini uérajka, ¿ambe ka ambechi úski exeni enga xarhatajka eska Tata Diosï Jeoba sési kámpisïnga?

⁵ Engachi aianhpini uérajka, méntkuchi exeni jarhasïnga na enga xáni sési kámpijka Tata Diosï Jeoba. ¿Chá ima jásï kʼuiripu máeski enga no xáni uandariika? Uánikua Tata Diosï Jeobaeri marhuarichaksï xásïisti. Jamberijtsï ante de míteni jurhimbikuani nójtsï méni eratsepka eskajtsï kʼumanchikuecha jimbo nipiringa Biblieri ambe aianhpini. Joperujtsï iásï mándani semana ísï úsïngia. Ka Tata Diosï Jeobaeri jarhuajperata jimbo, niáraskajtsï tsitini aianhpini. Ístujtsï exeska na engaksïni Tata Diosï Jeoba jarhuatajka. Pori ejemplu, jarhuatastiksïni parajtsï chá no no sési mókukuarhini engaksïni nema no sési kámaka aianhpikuarhu. Ístuksïni jarhuatasti miántani imani karakatani engajtsï uékeenga exerani kʼuiripuni ma enga uékeenga sánderu ambe míteni. Ka ístuksïni uinhaperantaspti parajtsï no chkétakuarhini engaksï kʼuiripuecha no uékeenga kurhaani (Jer. 20:7-9).

6. Engajtsïni Tata Diosï Jeoba jorhendajka, ¿néna xarhatasïni eskajtsïni sési kámasïnga?

⁶ Tata Diosï Jeobajtsïni ístu xarhatachesïndi eskajtsïni sési kámasïnga jimbokajtsïni jorhendasïnga néna aianhpini (Juanu 6:45). Tánguarhikua entre semana jingojtsïni xarhatachesïndi nénachi uaa uandontskuarhekuani kʼuiripuechani aianhpikuarhu ka pʼímarhisïntsïni parachi ísï úni. Engachi eratsejka imani ambe úni engachi no méni úni japka, jamberichi sánisï chéjka ueenakuarhu, joperu engachi ísï újka exesïngachi eska kánikua sési uérasïnga ísï úni jima engachi aianhpijka. Tánguarhikuecharhu ka kʼéri tánguarhikuecharhu ístujtsïni pʼímarhisïndi parachi ménderueni aianhpini ambe ma engachi no úni japka antesi. I ambejtu uaati eskachi no puro ísï aianhpiaaka eskachi na pʼindekia. Joperu engachi mámaru aianhpiska, Tata Diosï Jeobajtsïni újchakuraati. Iásï ju je exeni máru ambe engajtsïni Tata Diosï Jeoba íntskujka engachi jucha jirinhakuntaska néna sánderu sési marhuakuni ambe uéjki jimbochi nitamakuarhini jarhani. Tátsekuachi exeaka ambe engachi uaaka úni parachi úni ambe engachi eratsekata jatsika.

7. ¿Náki kóntperatechanchi pʼiuasïni engachi jánguarhintajka sánderu aianhpini?

⁷ Sánderuchi andarhierasïnga Tata Diosï Jeobani. Ju je exeni orhejtsïkutiri ejemplu ma enga Samueli * arhinhajka ka enga imeeri témba jingoni Colombia marhuani jaka. Sésiksï pʼikuarherasïreendi prekursorini imani kúnguarhikua jimbo engaksï imeecha anapuepka, joperuksï uékasïreendi sánderu aianhpini ka jarhuajpeni kúnguarhikua ma jimbo enga sánderu uétarhinchani japiringa. Paraksï úni ísï úni, jatsisptiksï para máru ambe mójtakuni. Samueli uandasïndi: “Ísïchi úspka eska Mateu 6:33 na uandajka ka nóteruchi piáspkia imani ambe engachi no uétarhincheenga. Joperu ambe enga sánderu úkua jukapka jindeesti jurajkuni juchaari kʼumanchikuani enga ísï úkata japka eska jucha na uétarhincheenga ka enga iámu maianhperakata japkia”. Jima engaksï mótsipka exesptiksï eskaksï seisi uelta sánderu sánitu  uétarhichasïreenga paraksï úni irekani. Samueli ístu uandasïndi: “Exespkachi na engajtsïni Tata Diosï Jeoba orhechipajka ka néna enga mókuantajka juchaari kómarhikuechani, úsïngachi exeni na engajtsïni jaiapanhentajka ka xénchani, ambe ma engachi no méni ísï pʼikuarherapka”. ¿Uaajtsï exeni néna ka nénaterujtsï uaa sánderu marhuakuni Tata Diosïni? Engajtsï ísï úska, uaakajtsï seguru jarhani eskajtsï sánderu andarhierani Tata Diosï Jeobani ka eskaksïni ima kuidariuaka (Sal. 18:25).

8. ¿Ambejtsï jorhenguarhisïni chá indeeri ambe engaksï uandantajka Iváni ka Viktoria?

⁸ Tata Diosï Jeobani marhuakuni úsïndi eskachi tsípini pʼikuarheraaka. Ju je eratseni ambe engajtsïni aiangujka Iváni ka ViKtoria, temungurhiri ma engaksï prekursorika ka engaksï Kirguistán marhuani jaka. Eratsesptiksï arisku sáni irekani paraksï úni marhuani nani engaksï arhinhapiringa, komu konstruksionirhu. Iváni uandasïndi. “Jánguarhintasïrengachi ánchikuarhitarhu xáni eskachi xáni ueenga mándani ánchikuarhitarhu. Nájkirukachi kuataratini kʼamareenga mándani jurhiatikua jimbo, sésichi pʼikuarherasïnga jimbokachi mítespka eska ánchikuarhita jindeespka para Tata Diosïri Reinu. Ístujtsïni kánikua sési pʼikuastasïndi miántani imani ambe engachi niárapka úni imeecha jingoni engaksï niárapka juchaari amigueni” (Mar. 10:29, 30).

9. ¿Ambe úski pirenchi ma enga no sési nitamakuarhini jaka para sánderu aianhpini, ka néna uéranchaski?

⁹ Tata Diosï Jeobani marhuakuni, uaati úni eskachi tsípini pʼikuarheraaka, nájkirukachi jatsiaka ambe ma engajtsïni uandanhiataaka. Pori ejemplu, África Occidental anapu ma pirenchi enga Mirreh arhinhajka enga tsïndika ka jatiriinia, doktorespti. Enga nóteru ánchikuarhipkia, prekursora úkuarhispti. Artritisi kánguarhisïndi ka méni enga uérajka aianhpini, ma orajkusï újti aianhpini kʼumanchikuecharhu. Joperu úsïndi sánderu aianhpini karrituecha jingoni. Uánikuechani pʼorhembiantaxati ka jorhendaani Biblieri ambe ka máru kʼuiripuechani asta telefonu jimbo jorhendaasïndi. ¿Ambe jarhuataspi para uékani sánderu marhuakuni Tata Diosï Jeobani? Ima uandasïndi: “Kánikua xénchasïnga Tata Diosï Jeobani ka tata Jesukristuni. Méntkuni kurhakuni jarhasïnga Tata Diosï Jeobani eskarini jarhuataaka parani marhuakuni xáni eskani xáni uaaka” (Mat. 22:36, 37).

10. Eska na xarhatajka 1 Pedru 5:10, ¿ambe íntskuasïni Tata Diosï Jeoba imeechani engaksï jánguarhintajka sánderu marhuakuni?

¹⁰ Tata Diosï Jeobajtsïni sánderu jorhendasïndi. Kenny, enga jini marhuani jaka enga Mauricio arhinhajka, exesti eska i ambe ísïiska. Enga jorhenguarhipka jurhimbikuani, jurajkuspti unibersidadini ka ueenaspti marhuani tiempu kompletueri. Ima uandasïndi: “Jánguarhintasïnga ísïini eska profeta Isaías. Ima uandaspti: ‘¡Ixú jarhaska ji! ¡Jíndeni axa!’” (Is. 6:8). Kenny uánikua ánchikuarhitechani uaasti konstruksionirhu ka ístu jarhuajpesti traduksionirhu imeeri idioma jimbo. Ima uandantasïndi: “Jorhendanhaska néna sési úni imani ánchikuarhitechani engani intsïnhauaenga”. Joperu no solu indeni ambe jorhenguarhisti úni. Ístu uandasïndi: “Jorhenguarhiska exeni ambe engani no újka úni ka náki kualidadichani uétarhinchaasïnga parani sánderu marhuakuni Tata Diosï Jeobani” (arhinta je 1 Pedru 5:10). ¿Andisïjtsï no exejki sintsï chájtu uaa mójtakuni ambe ma paraksïni Tata Diosï Jeoba jorhendani máteru ánchikuarhita ambe úni?

11. ¿Nénaksï jánguarhintaspi máru Corea del Sur anapu pirenchicha paraksï úni aianhpini, ka nénaksï uéranchaspi? (Exe je imajenini enga ueenakuarhu jaka i rebistarhu).

¹¹ Asta imeecha engaksï ióni testiguekia, uétarhinchasïndiksï eska Tata Diosï Jeoba jorhendauaka paraksï úni ménderueni marhuakuani. Pandemia COVID-19 jimbo, orhejtsïkutichi engaksï kúnguarhikuarhu ma jaka jini Corea del Sur karasptiksï: “Máru erachicha engaksï iónisï eratsepka eskaksï no úpiringa aianhpini jimbokaksï pʼamenchakua ambe kánguarhisïreenga, iásïksï  úsïnia ísï úni bideokonferensia jimbo. Tanimu pirenchicha engaksï jukari 80 jatirikia, jorhenguarhistiksï néna úrani komputadora ma ka iásïksï sáno pauani pauani uérasïndia” (Sal. 92:14, 15). ¿Tsitipirintsï sánderu aianhpini ka exeni na enga xáni sési kámpijka Tata Diosï Jeoba? Ari ambeksïni jarhuataati parajtsï ísï úni.

12. ¿Ambe aiakuasïni Tata Diosï Jeoba imeechani engaksï imani mintsikajka?

¹² Jorhenguarhi je mintsikani Tata Diosï Jeobani. Engachi mintsikaska imani ka engachi jánguarhintaska marhuakuni, imajtsïni aiachisïndi eskajtsïni uánikua kóntperatechani íntsauaka (Mal. 3:10). Colombia anapu pirenchi ma enga Fabiola arhinhajka, ima mismu exesti eska Tata Diosï ísï úsïnga eska na aiatspejka. Ima uékasïreendi prekursora úkuarhini sánititu tátsekua eska na itsï atakuarhipkia, joperu imeeri uámba ka imeeri sapiicha ístuksï uétarhinchasïreendi imani sentabuni enga ima andeenga paraksï úni nitamakuarhini. Ísï jimbo, enga úpkia jubilarikuarhini mintsita jingoni kómarhispti Tata Diosï Jeobani eska jarhuatapiringa. Ima uandantasïndi: “Sáno méntkisï, ma ióndanhasïndi intsïnhani sentabu jubilasioniri, joperujtsïni jíndeni ma kutsï jimbo arhispti eskani ueenanhapiringia intsïnhani. Ísïispti komu milagru ma”. Tsimani kutsï tátsekua, ueenaspti prekursoreni. Iásï pirenchi jukari 70 jatiristia ka jukari 20 uéxurhini páxatiia marhuani komu prekursora. Ini tiempuni jimbo, jarhuataasti ochu kʼuiripuechani paraksï niárani itsï atakuarhini. Ima uandasïndi: “Ménichani chkéni pʼikuarherasïnga, joperureni Tata Diosï Jeoba jarhuatasïndi pauani pauani parani úni andangutani juchiiti orechani”.

13, 14. ¿Náki ejempluechajtsïni uaa jarhuatani parachi sánderu mintsikani Tata Diosï Jeobani ka exeni nénateruchi uaa sánderu marhuakuni?

 ¹³ Jorhenguarhi je imeecheri ejempluni engaksï mintsikapka Tata Diosï Jeobani. Biblia uánikua ejempluechani jatsiasti imeecheri engaksï jánguarhintapka eskaksï xáni úpka paraksï marhuakuni Tata Diosï. Uánikua xanhari imeechaksï ueenaspti marhuakuni Tata Diosïni ante de ima íntsaani uánikua kóntperatechani. Pori ejemplu, Tata Diosï újchakuraspti Abraánini enga ima na jurajkupkia imeeri kʼumanchikuani nájkiruka no mítepka “nani enga niárapiringa” (Ebr. 11:8). Ístu, Jakobu intsïnhaspti kóntperata ma, asta ísï tátsekua enga na ánjeli ma jingoni uarhiperapkia (Gén. 32:24-30). Ka enga ireta Israeli inchapiringia imani Echeri jimbo engaksï Aiaminhapka, ireta solu úspti parhikuni riu Jordánini ísï tátsekua engaksï saserdoticha inchamipkia kʼéri iórhekuarhu (Jos. 3:14-16).

¹⁴ Ístuchi uaaka jorhenguarhini iásï anapu Testiguecheri engaksï mintsikajka Tata Diosï Jeobani ka engaksï jirinhakuntajka nénateruksï sánderu marhuakuni. Erachi ma enga Payton arhinhajka ka imeeri témba Diana, tsitisïrendiksï erachicheri eksperiensiechani arhiantani engaksï niáraka sánderu marhuakuni Tata Diosï Jeobani, komu imeecha engaksï partirhu jaka “Aiakukuarhistiksï para jarhuajpini”. * Erachi uandantasïndi: “Engachi arhiantauenga, ísïchi pʼikuarherasïreenga enajkichi exeni jarheenga nemani enga kánikua áspimuntani jarheenga tʼirekuani. Engachi sánderu arhiantauenga, sánderuchi uékasïreenga tsʼéjkuni ka exeni eska Tata Diosï Jeoba sési kámpisïnga”. Ísï no ióni jimbo, i temungurhiri mótsispti jima enga sánderu uétarhini japka. ¿Arhiantaskijtsïa ini eksperiensiechani engaksï indeni parti jimbo jaka? ¿Ka exeaskijtsïa bideuechani Aianhpini imani lugaricharisï engaksï iauanisï jaka Australia ka Aianhpini imani lugaricharisï engaksï iauanisï jaka Irlanda, engaksï jw.org jimbo jaka? Iámindu i ambeksïni uaati jarhuataati parajtsï úni exeni na engajtsï uaaka sánderu marhuakuni Tata Diosï Jeobani.

15. ¿Nénajtsïni marhuachea engachi imeechani kúrhiaska engajtsïni uaaka jarhuatani?

¹⁵ Imeechani kúrhia je engaksïni jarhuataaka. Sánderu no úkua jukasti máteru tʼirekuani tsʼémuni engachi imeechani kúrhiaska engaksï anhejchajka imani tʼirekuani. Sáno májkueni, engachi imeechani kúrhiaska engaksï marhuakujka Tata Diosïni, sánderuchi no úkua jukanchaaka jirinhakuni néna engachi uaaka sánderu marhuakuni Tata Diosïni. Ísïksï nitamakuarhispti Kent ka Verónica. Erachi uandantasïndi: “Juchaari amiguecha ka juchaari familiarhu anapuechajtsïni pʼímarhisïreendi parachi mámaru marhuakuani Tata Diosï Jeobani. Úskachi exeni eska imeechani kúrhiani engaksï Tata Diosïri Reinuni orheta peerajka, jarhuatasïrendijtsïni parachi jucha jirinhakuntani néna sánderu marhuakuni Tata Diosïni”. Iásïksï tsimarhani prekursori espesialisti jini Serbia.

16. Seguni eska na arhijka ejemplu enga Lukasʌ 12:16-21 jimbo jaka, ¿andichisï jatsi para jurajkuni imani ambe engachi tsitijka parachi úni sánderu marhuakuni Tata Diosïni?

¹⁶ Jánguarhintsï je sánderu marhuakuni Tata Diosï Jeobani nájkirukajtsï jatsiaka para jurajkuni ambe ma. Parachi marhuakuni Tata Diosï Jeobani no uétarhisïndi jurajkuni iámindu imani ambe engajtsïni sési pʼikuastajka (Ecl. 5:19, 20). Joperu engachi no jánguarhintani japiringa sánderu marhuakuni Tata Diosïni, solu jimbokachi no uékapiringa jurajkuni imani ambe engachi tsitijka. Úpiringachi ísï no sési úni jarhani eska ima kʼuiripu enga Jesúsi uandapka eska sési irekaxapka joperu eska mirikurhispka Tata Diosïni (arhinta je Lukasʌ 12:16-21). Francia anapu ma erachi enga Christian arhinhajka, uandantasïndi: “No xáni sési úraxapka juchiiti tiempuni  ka juchiiti uinhapikuani para Tata Diosï Jeobani marhuakuni ni juchiiti familiani”. Ima ka imeeri témba prekursoriksï úkuarhispti, joperu paraksï úni ísï úni, jurajkusptiksï ánchikuarhitani. Paraksï nitamakuarhini, kʼumanchikuechanksï limpiariuasïreendi ka jorhenguarhisptiksï sési pʼikuarherani sánderu sánitu jingoni. ¿Sésiksï pʼikuarheraspi engaksï ísï úpka? Erachi uandantasïndi: “Sánderuchi sési pʼikuarherasïreenga aianhpini ka exeni eskaksï Biblieri jorhenguarhiricha ka imani kʼuiripuechani engachi pʼorhembiantauenga sánderu ambeksï jorhenguarhixapka Tata Diosï Jeobaeri ambe”.

17. ¿Andiksïsï máru no uéjki ménderueni aianhpini jimbanhi ambe jingoni?

¹⁷ Tsʼéjku je ménderueni marhuakuni Tata Diosïni (Uku. 17:16, 17; 20:20, 21). Estados Unidos anapu ma prekursora enga Shirley arhinhajka, mójtakuspti na enga aianhpienga pandemia COVID-19 jimbo. Ueenakuarhu, no uékasïreendi telefonu jimbo aianhpini. Joperu enga sirkuitueri orhejtsïkuti pʼorhembiapka, jorhendasptiksï néna ísï úni ka jiáni uératini ísï aianhpisïndia. Ima uandasïndi: “Orheta chéxapka, joperu iásï tsitisïngia. Sánderuchi uánikua kʼuiripuechani jingoni uandontskuarhesïngachia eska jiáni engachi kʼumanchikuecha jimbo nireenga aianhpini”.

18. ¿Ambejtsïni uaa jarhuatani orhepani uérakuani tsʼéjkukuechani engajtsïni no jurajkujka sánderu aianhpini?

¹⁸ Jatsikukuarhi je meta ma ka jánguarhinta je ísï úni. Engachi uandanhiatechani jatsiajka, kómarhisïngachi Tata Diosï Jeobani ka eratsesïngachi néna orhepani uérani (Prov. 3:21). Sonia enga prekursoreka grupurhu ma enga romaní uandanhajka jini Europa, uandasïndi: “Tsitisïnga karaani juchiiti metechani ka jimeesïsï jatsiani engani uaaka exeani. Juchiiti tokadorirhu, dibuju ma jatsiska karreterecheri ma engaksï táchani direksionisï nirajka ka engani jatsijka parani erakuni úni ambe ma, exesïnga dibujuni ka eratsesïnga nani engareni paaka inde ambe engani uékani jaka úni”. Ka enga Sonia uandanhiata ambe jatsijka, jánguarhintasïndi ambakiti ambe eratseni. Ima uandantasïndi: “Enga mójtakurhini jarhajka ambe ma juchiiti irekuarhu, úpirindi ísïini eska paredi ma engareni no jurajkupiringa úni ambe engani eratseni jaka úni o úpirindi ísïini eska puenti ma engareni úpiringa jarhuatani imani ambe úni engani ji uéjka. Seguni na engani ji exeaka”.

19. ¿Nénachi uaa xarhatani eskachi agradesidu jarhaska iámindu imani ambakiti ambe jimbo engajtsïni Tata Diosï Jeoba íntskuka?

¹⁹ Tata Diosï Jeobajtsïni mámaru újchakurasïndi. Uaakachi xarhatakuni eskachi agradesidu jarhaska engachi jánguarhintaska na engachi xáni uaaka parachi kʼéri ambe arhini (Ebr. 13:15). Komu jirinhakuntani nénachi uaa sánderu aianhpini. Engachi ísï úska Tata Diosï Jeobajtsïni sánderu újchakuraati. Ísï jimbo, ju je exeni pauani pauani néna engachi uaaka tsʼéjkuni ka exeni eska Tata Diosï Jeoba sési kámpisïnga. Ísï, ísïuakachi eska Jesúsi enga uandapka: “Juchiiti tʼirekua jindeesti eskani uaaka ambe enga jaiapanhentajka ima engareni axaka, ka eskani kʼamakuaka úni imeeri úkuani” (Juanu 4:34).