▪ Indeni artikulu jimbo jorhenguarhispkachi eska jarhaska ambe ma enga kánikua jukaparhakueka ka engaksï jimbo iámindu kʼuiripuecha ka iámindu ánjeliicha jatsika para úni ambe ma: jindeesti eska Tata Diosï Jeobaeri nombri pímbinhajkunhantaaka. Ka tsimani ambe jarhasti enga uétarhijka para Tata Diosï Jeobaeri nombri pímbinhajkunhantani. Ma ambe jindeesti eskaksï iáminduecha míteaka eska Tata Diosïjkusï újka sési juramuni. Ka máteru ambe jindeesti eskaksï kʼuiripuecha xarhataaka sinksï uékasïni méntkisï kurhajchani Tata Diosï Jeobani.

¿Joperu andichisï iásï uandajki eska sánderu jukaparhakueska Tata Diosï Jeobaeri nombri ka eska jatsiska para pímbinhajkunhantani? Ju je exeni tanimu ambe.

Primeru, jardini de Edénirhu, Satanási no sési pakatasti Tata Diosï Jeobaeri nombrini o na enga jásïika ima. Ambe enga kurhamarhipka Satanási Ebani ísï kurhangutaraxapti eska Tata Diosï no iámindu ambe íntsaaxapka ka eska no jurajkuasïreenga paraksï iámu ambe úni. Tátsekua Satanási uandaspti eska no ísïispka ambe enga Tata Diosï Jeoba uandapka, ka indeni ambe jingoni uandaspti eska Tata Diosï chkuanderaxapka. Ka enga ísï uandapka, uandakua jauatakuspti Tata Diosï Jeobani. Jiáni niáraspti Noambakitiini enga arhikuekajka “ima enga uandakua jauatatspejka” (Juanu 8:44). Ka jimboka Eba jakajkukuspka Satanásini, no kurhajchaspti Tata Diosïni, ísï úparini xarhataspti eska nóteru uékasïreengia eska Tata Diosï Jeoba juramukupiringa (Gén. 3:1-6). Ini jurhiatikuecha jimbo, Satanási seguiriixati no sési pakatani Tata Diosï Jeobaeri nombrini; chkuanderasïndi paraka no mítenhaaka na engamindu jásïika Tata Diosï Jeoba. Ka inde kʼuiripuecha engaksï jakajkuajka indeni chkuanderakuechani, jamberiksï no uékaati kurhajchani Tata Diosï Jeobani. Para Tata Diosïiri marhuariicha kánikua no sési ambeesti engaksï xáni uánikua chkuanderakuecha jauatakuajka Tata Diosï Jeobaeri nombrini enga xáni pímbinhasïika. Inde ambe jimbosï xáni kómu nitamakua ambe jati iámu parhakpinirhu ka kánikua no sési jásï ambe.

Segundu, Tata Diosï Jeoba uékasïndi eska iámu kueraakata sési jauaka, jimbosï uéjti eska mítenhaaka na engamindu jásïika ka ístu uékasïndi pímbinhajkuntani imeeri nombrini. I ambe sánderu jukaparhakua ambeesti para ima. Jimbosï uandajti: “Sési jimbo pímbinhajkuntaaka juchiiti kʼéri nombrini” (Ezeq. 36:23). Jiáni enga Jesúsi jorhentpipka néna kómarhini Tata Diosïni, ísï uandaspti: “Eska mítenhaaka chiiti nombri eska pímbinhasïtiiska”. Ka ísï xarhataspti ambe enga jindeeka sánderu jukaparhakua ambe engaksï jimbo jatsika para kómarhini iámindu Tata Diosï Jeobaeri marhuariicha (Mat. 6:9). Biblia uánikua xanhari uandasïndi na enga xáni jukaparhakueka kʼéri ambe arhini Tata Diosï Jeobaeri nombrini. Ju je exeani máru ejempluechani. “Kʼéri ambe arhi je Tata Diosï Jeobani jimboka ísï jukanchaska imeeri nombri” (1 Crón. 16:29; Sal. 96:8). “Pireku je imeeri nombrini enga xáni kʼéri ambeeka parajtsï kʼéri ambe arhini” (Sal. 66:2). “Kʼéri ambe arhiaka chiiti nombrini para méntkisï” (Sal. 86:12). Ístu, ma xanhari enga Tata Diosï Jeoba uandapka auandarhu uératini, Jesúsi Jerusaléni jarhaspti templurhu ka ísï kómarhispti imeeri Taati jémbani: “Ú eska kʼéri ambe arhinhaaka chiiti nombri”. Ka Tata Diosï Jeoba ísï kurhakuspti: “Úskania eska kʼéri ambe arhinhaaka ka ménderuni ísï uaaka” (Juanu 12:28). a

Terseru, Tata Diosï Jeoba uékasïndi eska imeeri pímbinhasï nombri seguiriini jauaka kʼéri ambe arhinhani ka para méntkisï. Enga na nitamaakia Mili Uéxurhini enga Kristu Juramuaka ka enga na nitamaakia últimu tsʼéjkukua,  ¿ambeksï eratsea kʼuiripuecha ka ánjeliicha ima ambeeri enga uandanhapka Tata Diosï Jeobaeri nombriri, seguiriini jauaksï májkueni exeni? Ju je miántani arini tsimani ambe engachi exekia: ma jindeesti eskaksï kʼuiripuecha xarhataaka eskaksï méntkisï kurhajchaaka Tata Diosï Jeobani ka máteru eska imajkusï újka sési juramuni. Imani tiempu jimbo, ¿kʼuiripuechaksï seguirinhaa tsʼéjkunhani? Nómbe, jimbokaksï perfektueuakia ka xarhataatiksïa eskaksï méntkisï kurhajchaaka Tata Diosïni ka uaatiksï irekani para méntkisï. ¿Ka ambeksï eratsea Tata Diosï Jeobaeri juramukueri ambe? Iáminduechaksï seguru jauatia eska sánderu sési jarhaska na enga juramujka Tata Diosï. Iámindu kʼuiripuecha ka ístu ánjeliicha, tsípikua jingonksï jiókuarhiati Tata Diosï Jeobaeri juramukuani. Peru, ¿ambe úkuarhia Tata Diosï Jeobaeri nombri jingoni?

Imeeri nombri pímbinhajkunhantaatia ka nóteru nema uaatia no sési pakatani Tata Diosï Jeobaeri nombrini. Peru Tata Diosï Jeobaeri nombri seguiriini jauati sánderu jukaparhakua ambeeni para imeeri marhuariicha, xáni auandarhu ka ístu Echerirhu. ¿Andi? Jimbokaksï exeaka eska Tata Diosï Jeoba seguiriini jauaka kánikua ambakiti ambe úni. Pori ejemplu, jimboka Jesúsi kaxumbitiiska ka jimboka íntskuntaaka iámu juramukua imeeri Taatini, Tata Diosï jindeuati juramuti “iámindu ambeeri ka para iáminduecha” (1 Kor. 15:28). Enga na nitamaakia i ambe, imeecha engaksï Echerirhu irekaaka “ísïiuatiksï komueska Tata Diosïiri uájpeecha engaksï no jántspiriika” (Rom. 8:21, TNM). Ka ísï Tata Diosï Jeoba uaatia imani ambe enga eratsekata jatsipka: familia ma jatsini imeecha jingoni engaksï auandarhu irekaaka ka ístu imeecha engaksï Echerirhu irekaaka (Efes. 1:10).

¿Ka na pʼikuarheraa Tata Diosï Jeobaeri familia enga i ambe úkuarhiaka? Iáminduecha, Echerirhu ka auandarhu, kánikuaksï tsitiati kʼéri ambe arhini Tata Diosï Jeobaeri nombrini. Tata Diosï úspti eska Dabidi enga salmuechani karauenga ini ambe karapiringa: “Eska kʼéri ambe arhinhaaka Tata Diosï Jeoba [...]. Eska kʼéri ambe exenhaaka para méntkisï imeeri xáni sési jásï nombri” (Sal. 72:18, 19). Jimbokachi irekaaka para méntkisï, uaakachi jimbanhi ambe exentani ka ambakiti ambe engachi jimbo seguiriuaka kʼéri ambe arhini Tata Diosï Jeobaeri nombrini para méntkisï.

Tata Diosï Jeobaeri nombri xarhatasïndi na enga jásïika ima. Ísï jimbo, engachi eratsentajka imeeri nombrini, jirejiresïchi eratsesïnga na enga xáni xénchpetiika ima (1 Juanu 4:8). Méntkisïchi miántaaka eskajtsïni Tata Diosï Jeoba kueraaska jimbokajtsïni xénchasïnga, eska íntspiska imeeri Uájpani jimbokajtsïni xénchasïnga ka eska uékperakua jimbosï xarhataka eska ambakiti juramuti máeska. Ka exeakachi eska Tata Diosï Jeoba méntku no kuatantaaka sési jásï ambe úni para xarhatakuni imeeri kueraakatani eska kánikua xénchasïnga. Ka para méntkisï, uánikua ambechi jatsiaka parachi pauani pauani sánderu andarhierani juchaari Taatini enga auandarhu jaka ka ístu parachi pirekuni sési jásï pirekuechani imeeri nombrini enga xáni kʼéri ambeeka (Sal. 73:28).