1. Eska na arhijka Ebreu 12:1, ¿ambechi jatsiski para úni parachi kʼamarani ini karrerani enga jindeeka para tsípikua andani?

 BIBLIA uandasïndi eskachi kristianuecha karrerarhu ma niraxaka. Imeecha engaksï kʼamaraaka, andaatiksï tsípikua para méntkisï (2 Tim. 4:7, 8). Jatsiskachi para jánguarhintani xáni eskachi xáni uaaka parachi seguiriini uiriini, jimbokachi andakueraxakaia ini karrerani. Apostoli Pablu enga úpka kʼamarani ini karrerani, uandaspti ambe engajtsïni jarhuataaka parachi juchajtu májkueni úni. Ima uandaspti: “Ju je támu jurajkuni iámindu indeni ambe engajtsïni estorbu úchijka […], ka ju je tekaantskua jingoni uiriani ini karrerarhu engachi jatsika para uiriani” (arhinta je Ebreu 12:1).

2. ¿Ambe arhikuekaxapi Pablu enga uandapka “ju je támu jurajkuni iámindu indeni ambe engajtsïni estorbu úchijka”?

² ¿Ambe arhikuekaxapi Pablu enga uandapka “ju je támu jurajkuni iámindu indeni ambe engajtsïni estorbu úchijka”? Ima no uandaxapti eskachi kristianuecha no ma ambe jatsiska para páni karrerarhu, sino eskachi no jatsiska para páni imani ambe engajtsïni ójkutajka. Parachi seguiriini karrerarhu, jatsiskachi para exeni ambechi páxaki ka jirejiresï jurajkuni imani ambe engajtsïni ójkutajka. Joperu jarhasti máru ambe enga uétarhijka eskachi paaka ka nóchi jatsiska para jurajkuni indeni ambe. Engachi jurajkuaska, nóchi uaaka andani karrerani (2 Tim. 2:5). Ju je exeni ambe engachi jatsika para páni parachi andani ini karrerani.

3. a) Eska na arhijka Gálatas 6:5, TNM, ¿ambe jatsiski para miákuarhini mándani kristianu? b) ¿Ambechi exeni jaua ini jorhenguarhikua jimbo, ka andi?

³ (Arhinta je Gálatas 6:5, TNM). Ini bersikulu jimbo Pablu uandaxapti eska mándani kristianu jatsiska “para miákuarhini jarhani  ambe enga uaaka”. ¿Ambe arhikuekaxapi? Imani ambe arhikuekaxapti engachi mándani arhini jatsika para úni parachi marhuakuni Tata Diosïni. Ka ini ambe no nema uaati úni juchantsïni jimbo. I ambe ísïisti komueska páni jarhani ambe ma karrerarhu. Ini jorhenguarhikua jimbo, exenchi jauaka ambe ka ambechi jatsiski para páni karrerarhu. Ístuchi exeni jauaka sinchi páxaki máru ambe engajtsïni ójkutajka parachi úni uiriini, ka ambe engachi uaaka úni parachi jurajkuni indeni ambe. Kánikua jukaparhakuesti eskachi no jukari ambe páni jauaka, sino imani ambejku enga uétarhijka. Engachi ísï úska, uaakachi kʼamarani karrerani ka intsïnhani tsípikua para méntkisï.

4. ¿Andisï no kʼuetsapeti ambee, ambe engachi aiakuka Tata Diosïni? (Ístu exea je imajeniichani).

⁴ Ambe engachi aiakuka Tata Diosïni. Jiáni engachi aiakukuarhepka, arhispkachi Tata Diosï Jeobani eskachi imantku kómarhipiringa ka eskachi úpiringa ambe enga ima uékajka ka jatsiskachi para ísï úni eskachi na uandaka. Nájkiruka kʼéri responsabilidadi máeka ambe engachi aiakuka Tata Diosïni, no kʼuetsapiti ambeesti o enga úkua jukaka para úni, ¿andi? Jimboka Tata Diosï Jeobajtsïni kueraaska parachi úni ambe enga ima uékajka (Jaŋ. 4:11). Ima ústi eskachi jucha mintsita jingoni  uékaaka míteni ka kómarhini. Ka ístujtsïni ísï kueraasti eska ima na jásïika, jimbochisï újka andarhierani imani ka tsitini imani ambe úni enga ima uéjka (Sal. 40:8). Joperu ístu engachi újka ambe enga Tata Diosï Jeoba uékajka ka májkueni úni eska imeeri Uájpa, kánikuachi sési pʼikuarherasïnga (Mat. 11:28-30).

5. ¿Ambeksïni jarhuataa kumpliriini ambe engajtsï aiakuka Tata Diosïni? (1 Juanu 5:3).

⁵ ¿Ambeksïni jarhuataa páni ini ambe? Orheta, sánderu xéncha je Tata Diosï Jeobani, eratsenta je iámindu ambe enga ima úkia chánksïni jimbo ka na engaksïni újchakuraaka sánderu orhepatini. I ambe uaati eskajtsï sánderu xénchaaka Tata Diosïni. Ka engajtsï sánderu xénchaaka, sánderu fásiliuati parajtsï kurhajchani. Exeakajtsï eska no kʼuetsapiti ambeeska ambe engajtsïni ima juramuchijka (arhinta je 1 Juanu 5:3). Segundu, májkueni ú je eska Jesúsi. Ima úspti úni ambe enga Tata Diosï uékeenga jimboka kómarhisïreenga para kurhakuni eska jarhuatapiringa ka ístu méntkisï miáni jarhasïreendi ambe enga andapiringa (Ebr. 5:7; 12:2). Májkueni eska Jesúsi, kurhaku je Tata Diosï Jeobani uinhapikua, ka asï méni mirikurhi je eskajtsï uaaka irekani para méntkisï. Engajtsï sánderu xénchaska Tata Diosï Jeobani ka májkueni úni eska imeeri Uájpa, uaakajtsï úni ambe engajtsï aiakuka.

6. ¿Andichisï jatsi para kumpliriuani juchaari responsabilidadiichani familiarhu? (Ístu exea je imajeniichani).

⁶ Responsabilidadichani engachi familiarhu jatsiaka. Ini karrera jimbo, jatsiskachi para sánderu xénchani Tata Diosï Jeobani ka Jesúsini ka eska juchaari familiani (Mat. 10:37). Joperu i ambe no arhikuekasïndi eskachi jatsiska para jurajkuani responsabilidadichani engachi familiarhu jatsiaka, enajki ambe máepirini engajtsïni ójkutajka para marhuakuni Tata Diosï Jeobani. Sánderu sési, engachi uéjka eskajtsïni Tata Diosï Jeoba jaiapanhentaaka, jatsiskachi para kumpliriuani juchaari responsabilidadichani familiarhu (1 Tim. 5:4, 8). Tata Diosï Jeoba mítesti eskaksï familiecha uaaka tsípikua jingoni irekani engaksï temungurhiriicha xénchperaska ka engaksï janhanharperaska, engaksï taatiicha xénchaaska uájpeechani ka sési tʼarhexeraani, ka engaksï sapiicha kurhajchaaska taati jémbeechani (Efes. 5:33; 6:1, 4).

7. ¿Ambeksïni jarhuataa parajtsï kumpliriini chaari responsabilidadichani familiarhu?

⁷ ¿Ambeksïni jarhuataa páni ini ambe? Náki uéjki jindeeni chaari responsabilidadi familiarhu, jánguarhinta je parajtsï úni ambe engaksï uandajka Biblieri ambakiti konsejuecha. Asï imani ambe ú je enga chá eratsejka eska sési jarhaska o na enga pʼindenhaka jima engajtsï chá anapueka o imani ambejtsï úni engaksï i parhakpinirhu anapu kʼuiripuecha uandajka eska sési jarhaska (Prov. 24:3, 4). Úraa je juchaari publikasionichani, jimajtsï exentaaka ambe engajtsï uaaka úni parajtsï ísï úni eskaksï Biblieri prinsipiuecha na uandajka. Pori ejemplu, juchaari pájinarhu jw.org jimbo jarhasti informasioni enga jarhuatauaka temungurhiriichani, taatiichani ka tumbiichani paraksï exeni ambe engaksï uaaka úni engaksï problema ma jatsiaka. b Eratsetini ja je méntkisï ísï úni eskaksï Biblieri prinsipiuecha na uandajka nájkirukajtsï chájkueuaka engajtsï ísï úni jauaka chaari familiarhu. Exeakajtsï na enga inde ambe marhuakuaka iámu familiani, ka Tata Diosï Jeobaksïni újchakuraati (1 Ped. 3:1, 2).

8. ¿Nénajtsïni uaa pʼikuastani ima ambe engachi erakuaka úni?

⁸ Konsekuensiecha ima ambeeri engachi erakuka úni. Tata Diosï Jeobaeri regalu máesti úni erakuni ambe engachi jucha uéjka, peru ima uékasïndi eskachi jucha sési pʼikuarheraaka ambakiti ambe jimbo engachi erakuaka úni. Peru engachi imani ambe erakujka úni enga no sési jaka, imajtsïni no kénditacheasïndi konsekuensiechani (Gal. 6:7, 8). Ísï jimbo, engachi imani ambe erakuaka úni  enga no sési jaka, no eratseparini uandani o jirejiresï úni ambe ma, jatsiskachi para jiókuarhiani konsekuensiechani. Ménichanchi kulpabli pʼikuarheraaka imani ambe jimbo engachi úka ka juchaari konsiensiajtsïni no sési pʼikuastani jauati. Peru responsablichi úkuarhini ima amberi engachi erakuaka úni, jarhuataatijtsïni parachi uandantani ambe engachi no sési újka, parachi mójtakurhini ka parachi jánguarhintani nóteru úni indeni ambe. Engachi ísï úska, uaakachi seguiriini nirani indeni karrera jimbo enga tsípikuarhu pájpejka.

9. ¿Ambejtsï uaa úni engajtsï no sési erakuka úni ambe ma? (Ístu exea je imajeniichani).

⁹ ¿Ambeksïni jarhuataa páni ini ambe? Jiókuarhi je eskajtsï nóteru ambe ma uaakia úni parajtsï kʼuanhaskuntani tiempuni parajtsï ménderueni úni indeni ambe engajtsï erakuka úni. Ístu asï xáni eratsentani ja je indeni ambe, jukari uandanhiani, ojtsï máteruechani kulpariuani ka nijtujtsï kuájpikuarhini uékani. Sánderu sési, jiókuarhi je eskajtsï no sési úska ka jánguarhintani sési peentani indeni ambe. Peru engajtsï kánikua no sési pʼikuarherani jaka, kaxumbikua jingoni kómarhi je Tata Diosï Jeobani, jiókuarhi je eskajtsï no sési úska ka kurhaku je eskaksïni puáchentaaka (Sal. 25:11; 51:3, 4). Engajtsï no sési pʼikuastaka nemani, arhi je eskaksïni puáchentaaka ka ni je orhejtsïkutiicha jingoni paraksïni jarhuatani (Sant. 5:14, 15). Jorhenguarhi je ima ambeeri engajtsï no sési úka ka jánguarhinta je nóteru únia indeni ambe. Uaakajtsï seguru jarhani eskaksïni Tata Diosï Jeoba jarhuataaka ka eskaksïni pʼamojkuaka (Sal. 103:8-13).

10. ¿Andisï kʼuetsapiti ambee afuersa uékani úni imani ambe engachi jamberi no méni uaaka úni? (Galasia 6:4).

¹⁰ Imani ambe uékani úni engachi jamberi no méni uaaka úni. Terukukuarhintani máteruecha jingoni, ísïisti komueska kʼuetsapiti ambe páni jarhani karrerarhu (arhinta je Galasia 6:4). Engachi jucha pʼindeka ísï úni, tátsekuachi niáraaka máteruecha jingoni uékani andaperani ka enbidia pʼikuarherani máteruecha jimbo (Gal. 5:26). Engachi májkueni ambe uékaaka úni eska máteruecha, jamberichi afuersa uékaaka úni imani ambe engachi no uaaka úni. Eratsenta je ini ambe: Biblia uandasïndi eska “enga no niárani jarhajka úkuarhini ambe enga ma erokuarhini jarhajka, mintsita no sési pʼikuarherasïn[ga]” (Prov. 13:12). Joperuchi sánderu no sési p’ikuarheraaka erokuarhini jarhani ambe ma enga no méni uaaka ísï úkuarhini. Inde ambe úpirindi úni eskachi nóteru jatsiakia uinhapikua ka eskachi iátsitakuarhu uiriiuaka karrerarhu (Prov. 24:10).

11. ¿Ambeksïni jarhuataa parajtsï no afuersa uékani imani ambe úni engajtsï jamberi no uaaka?

¹¹ ¿Ambeksïni jarhuataa no ísï pʼikuarherani? Asï sánderu ambe uéka je úni eska ima ambe engaksïni kurhachejka Tata Diosï Jeoba, imaksïni no méni kurhacheati ambe ma engajtsï chá no uaaka úni (2 Kor. 8:12). Asï no sési pʼikuarhera je, imaksïni no méni terukutantaati máteru nema jingoni (Mat. 25:20-23). Tata Diosï jukaparharasïndi ambe engajtsï chá úni jaka, komu engajtsï ísï iámu mintsita jingoni marhuakuni jaka, engajtsï no jurajkujka ka engajtsï tekaantani jaka. Ístu kaxumbitii je ka jiókuarhi je eskajtsï no uaaka iámindu ambe úni jimbokajtsï jatiriiskia, pʼamenchani jarhani o jimbokajtsï nitamakuarhixaka ambe ma jimbo. Májkueni ú je eska Barsilái ka asï jiókuarhi je imani responsabilidadichani engajtsï nóteru uaakia úni (2 Sam. 19:35, 36). O májkueni ú je eska Moisési, jurajku je eskaksïni máteruecha jarhuataaka ka eskaksï máteruecha uaaka ambe engajtsï chá úni jaka (Éx. 18:21, 22). Engajtsï kaxumbitiiska, nójtsï uékaaka imani ambe úni engajtsï no uaaka úni, jimboka inde ambe uaati eskajtsï nóteru xáni uinhapiakia parajtsï seguiriini uiriini.

12. ¿Juchaari kulpeesïni engaksï máteruecha no sési erakujka úni ambe ma?

¹² Kulpabli pʼikuarherani imani ambe jimbo engaksï máteruecha no sési erakuka úni. Juchachi no uaaka uandani ambe engaksï máteruecha jatsika para úni, nijtuchi uaa kuájchakuani imani ambe jimbo engaksï erakuka úni. Enga tataka ma o nanaka ma jurajkujka Tata Diosï Jeobani, taati jémbeechaksï kánikua no sési pʼikuarherasïndi. Peru imeecha engaksï no sési pʼikuarherajka imani  ambe jimbo engaksï uájpeecha erakujka úni, inde ambe ísïisïndi komueska kʼuetsapiti ambe páni jarhani, ka Tata Diosï Jeoba no uékasïndi eskaksï taatiicha ísï pʼikuarheraaka (Rom. 14:12).

13. ¿Ambe uaa úni taati ma enga imeeri uájpa no sési erakuka úni ambe ma?

¹³ ¿Ambeksïni jarhuataa no ísï pʼikuarherani? Miá je eskajtsïni Tata Diosï Jeoba iáminduechani sésikua íntskuska parachi erakukuarhini ambe úni. Ístujtsïni jurajkusïndi parachi jucha uandani sinchi marhuakua o nómbe. Ístu Tata Diosï Jeoba mítesti eska chá no perfektueska, peru uékasïndi eskajtsï jánguarhintaaka sési tʼarhexeraani chaari sapiichani. Enga chaari uájpa jurajkuska jurhimbikuani, imeeri jimbo pakarasïndia ka no chaari jimbo (Prov. 20:11). Perujtsï jamberi útasï méntku eratseni jarhajka ambe engajtsï no sési úka engajtsï tʼarhexerani japka chaari sapini, enga ísïika, aiangu je Tata Diosï Jeobani na engajtsï pʼikuarherajka ka kurhaku je eskaksïni puáchentaaka. Ima mítesti eskajtsï no uaaka kʼuanhaskuntani tiempuni parajtsï ménderuni úni ambe ma. Ístu, Tata Diosï Jeoba no erokuarhisïndi eska chá kuájchakuaka chaari uájpani ima ambeeri enga no sési erakuka úni. Peru asï mirikurhi je ini ambe, enga chaari uájpa jánguarhintaska andarhientani Tata Diosï Jeobani, ima tsípikua jingoni erontaati (Luk. 15:18-20).

14. ¿Andichisï no jatsi para méntku kulpabli pʼikuarherani jarhani?

¹⁴ Méntku kulpabli pʼikuarherani jarhani. Engachi pekadu niátajka, normaliisti kulpabli pʼikuarherani. Peru engachi méntkisï jukari kulpabli pʼikuarherani jauaka, ísïisïndi komueska kʼuetsapiti ambe páni jarhani, ka Tata Diosï Jeoba no uékasïndi eskachi ísï pʼikuarheraaka. Jatsiskachi para jánguarhintani no ísï pʼikuarherani. Engachi uandantakia ambe engachi no sési niátaka, mintsita jingoni moántani ka ístu jánguarhintani nóteru únia indeni ambe, uaakachi seguru jarhani eskajtsïni Tata Diosï puáchentaskia (Uku. 3:19). Engachi na újkia ini ambe, Tata Diosï Jeoba no uékasïndi eskachi seguiriuaka kulpabli pʼikuarherani, jimboka ima míteska eska ióni jamberi ísï pʼikuarherani uaakajtsïni kánikua no sési úchini (Sal. 31:10). Engachi jucha méntku kómu pʼikuarherani jauaka indeni ambe jimbo, inde ambejtsïni chkéraati ka nóteruchi uaakia uiriini karrerarhu enga tsípikuarhu pájpejka (2 Kor. 2:7).

15. ¿Ambeksïni jarhuataa engajtsï jukari kulpabli pʼikuarherani jauaka? (1 Juanu 3:19, 20; ístu exea je fotuechani).

 ¹⁵ ¿Ambeksïni jarhuataa parajtsï nóteru ísï pʼikuarherania? Engajtsï méntku kulpabli pʼikuarherani jaka, miá je eska Tata Diosï mintsita jingoni puátspentasïnga (Sal. 130:4). Enga ma mintsita jingoni moántajka, Tata Diosï Jeoba kumplirisïndi i ambe: “Nóteruni méni miáuakia chaari pekaduechani” (Jer. 31:34). I ambe arhikuekasïndi eska engaksïni Tata Diosï Jeoba puáchentaakia, nóksïni méntku miátantani jauati ambe engajtsï no sési úka. Perujtsï kʼóru jatsiauaka konsekuensiechani ka i ambe no arhikuekasïndi eskaksïni Tata Diosï no puáchentaska. Ka engajtsï iáiasï no uaaka jatsiani máru responsabilidadiichani kúnguarhikuarhu, asï uandanhia je. Tata Diosï Jeoba mirikurhistia ambe engajtsï ióntki no sési úka, ¿andijtsïsï chá no májkueni újki? (Arhinta je 1 Juanu 3:19, 20).

16. ¿Ambechi jatsiski para úni parachi úni andani karrerani?

¹⁶ Parachi andani tsípikua para méntkisï, jatsiskachi para úni ambe enga ari konseju uandajka: “Jánguarhinta je para eskajtsï andajkuarhiaka pʼirani ma premiu” (1 Kor. 9:24). Ambe ma engajtsïni jarhuataaka andani ini karrerani, jindeesti sési mítetini jarhani ambechi jatsiski para páni ka ambe nómbe. Ini jorhenguarhikua jimbochi exeskia máru ejempluechani, joperuksï útasï uánikua jarhasti. Jesúsi uandaspti eska juchaari mintsita sánderu uékapiringa puro tʼirekua ambe tantiarini jarhani, kauini jámani o sánderu tsitini iásï anapu ambe (Luk. 21:34). I Biblieri karakateecha ka máteruechajtsïni jarhuataati exeni ambe engachi jatsika para mójtakuni, parachi úni uiriini ini karrerarhu enga jindeeka para tsípikuani andani.

17. ¿Andichisï seguru jaki eskachi andaaka karrerani tsípikueri?

¹⁷ Seguruchi jarhaska eskachi andaaka ini karrerani, jimbokajtsïni Tata Diosï Jeoba íntskuaka uinhapikua parachi andakuerani (Is. 40:29-31). Ísï jimbo, seguirii je uiriini. Májkueni ú je eska apostoli Pablu, enga jánguarhintapka xáni eska xáni úpka para andani karrerani (Filip. 3:13, 14). Ísïisti, no nema uaati uiriini chánksïni jimbo, peru Tata Diosï Jeoba chánksïni jingoni jauati paraksïni jarhuatani páni ambe enga uétarhijka karrerarhu ka parajtsï jurajkuni imani ambe enga no uétarhijka (Sal. 68:19). Imeeri jarhuajperata jingoni uaakajtsï tekaantskua jingoni uiriini ka andani ini karrerani.