¿Ambejtsï uaa úni enga chaari acheeti pornografia exejka?
-
“Ísïispti enajkirini juchiiti acheeti someni enganiarini japi”.
-
“Kʼuratsesïreenga, ísï pʼikuarherasïreenga enajkini no sési jáxepi ka enajkini no ma ambe jukaparhakuepi”.
-
“Jandiajkuni no sési pʼikuarherasïreenga. No nemani úsïreenga indeeri ambe uandontskuarhekuni”.
-
“Niáraspka eratseni eska Tata Diosï Jeoba no uandanhiasïreenga jíndeni jimbo”.
I ambe xarhatasïndi na enga pʼikuarherajka uarhiiti ma enga uámba pornografia exejka. Ka enga ióni ísï úkia ka témba no míteni, jamberi témba ísï pʼikuarheraati eska nóteru méni uaakia mintsinharhini. Uarhiiti ma uandaspti: “Ísï exesïreenga juchiiti acheetini enajkini no mítepi. Kurhamarhikuarhisïreenga: ʻ¿Ambe máteru amberini jískachini jaki?ʼ”.
¿Chaari acheeti exesïni pornografia? a I artikulu úkata jarhasti para ima pirenchiicha engaksï ísï nitamakuarhini jaka eska chá. Ixúchi jorhenguarhiauaka Biblieri prinsipiuechani engaksïni uinhaperantaaka, engaksïni xarhatacheaka eska Tata Diosï Jeoba chánksïni jingoni jarhaska ka engaksïni sési pʼikuastantaaka, parajtsï seguiriini sési marhuakuni Tata Diosï Jeobani. b
¿AMBEJTSÏ UAA ÚNI ENGAJTSÏ ÍSÏ NITAMAKUARHINI JAKA?
Ísïisti, chájtsï no uaaka arhini chaari acheetini iámindu ambe enga jatsika para úni, perujtsï uaaka úni máru ambe parajtsï no xáni no sési pʼikuarherani. Uaakajtsï arini ambe úni.
Asï eratsi je eska chaari kulpeeska. Jamberi uarhiiti ma úpirindi ísï pʼikuarherani eska imeeri kulpeeska enga uámba pornografia exejka. Pori ejemplu, Alice c ísï pʼikuarherasïreendi eska imasï kulpa jatsispka ka kurhamarhikuarhisïreendi: “¿Andisï juchiiti acheeti sánderu tsitijki máteru uarhiitiichani exeani ka eska jíndeni?”. Ka máru uarhiitiichaksï eratsesïndi eskaksï sánderu kʼéri úxaka problemani jimbokaksï ikiasïnga ka no sésiksï pʼikuarherani indeni ambe jimbo. Daniela uandasïndi: “Kánikua ikiasïreenga jimboka juchiiti acheeti seguiriixapka pornografia exeni. Kánikua no sési pʼikuarherasïreenga ka ísï exesïreenga eskani jiispka engani xereni japka juchiiti familiani engani ísï ikiauenga”.
Engajtsï chá májkueni pʼikuarherajka, miá je eska Tata Diosï Jeoba no eratsesïnga eskajtsï chá kulpa jatsiska imani ambe jimbo enga chaari acheeti újka. Santiagu 1:14 uandasïndi: “Enga ma kʼuiripu terungutanhajka, jindeesïndi jimboka imeeri mismu eratsekuecha engaksï no jurhimbikueka, pájtamasïnga ka kʼaranksï” (Rom. 14:12; Filip. 2:12). Tata Diosï Jeoba no uandasïndi eskajtsï chá kulpa jatsiska. Sánderu sési, ima kánikua jukaparharasïndi engajtsï chá seguiriini jaka sési marhuakuni (2 Crón. 16:9).
Enga chaari acheeti pornografia exejka, no arhikuekasïndi eskajtsï chá no sési jáxeska. Kurhanguni ini ambe kánikuaksïni jarhuataati. Doktoriicha engaksï mítekuka iiri ambe, uandasïndiksï eska pornografia úsïnga eskaksï acheetiicha tsitiaka imani ambe úni engaksï pornografiarhu exejka ka enga no ma uarhiiti uaaka ísï úni para sési pʼikuastaani.
Jánguarhinta je no méntku indeni ambe eratseni jarhani. Catherine uandasïndi eska jurhiakua ka chúrikua eratseni jarhasïreenga andisï uámba pornografia exeeni. Méntku indeni ambe eratseni jarhasïreendi. Frances uandasïndi: “Méntkisï engani no mítejka nani jarhasïni juchiiti acheeti, ueenasïnga kánikua uandanhiani. Chúskutasïnga no sési pʼikuarhiarani”. Máteru uarhiitiichaksï uandasïndi eskaksï kánikua kʼuratsesïnga engaksï imani erachiicha ka pirenchiicha jingoni jarhajka engaksï jamberi míteka ambe enga úni jaka uámba. Ka máteruechaksï uandasïndi eskaksï jandiajku pʼikuarherasïnga, jimbokaksï eratsesïnga eska no nema kurhangukuasïnga ambe engaksï nitamakuarhini jaka.
No no sési jarhasti engajtsï ísï pʼikuarherajka. Peru engajtsï seguiriiska indeni ambejku eratseni jarhani, sánderujtsï no sési pʼikuarheraaka. Sánderu sésiisti eskajtsï eratseaka na engajtsï pájperajka Tata Diosï Jeoba jingoni jimbokaksïni inde ambe jarhuataaka orhepani uérani (Sal. 62:2; Efes. 6:10).
¿Nénaksïni jarhuataa Bibliani arhintani ka eratsentani ambe engajtsï arhintajka? Bibliarhu, jarhastiksï relatuecha uarhiitiicheeri engaksï kánikua no sési nitamakuarhipka, peru engaksï tátsekua nóteru xáni no sési pʼikuarherapkia engaksï uénhekuarhipka Tata Diosï Jeoba jingoni. Nájkiruka ima no méntkisï kénditakuapka imeecheeri uandanhiateechani, jarhuataaspti paraksï sési pʼikuarherantani. Eratsenta je ambe enga nitamakuarhipka Ana, ima “kánikua no sési nitamakuarhixapti”. Ana “ióni sáni kómarhispti Tata Diosï Jeobani” ka sési pʼikuarherantaspti nájkiruka no mítepka ambe enga úkuarhipiringa (1 Sam. 1:10, 12, 18; 2 Kor. 1:3, 4).
Jamberi acheeti ka uarhiiti, uétarhinchaatiksï orhejtsïkutiicheeri jarhuajperata.
Arhia je chaari kúnguarhikuarhu anapu orhejtsïkutiichani eskaksïni jarhuataaka. Imaksï ísïiuati “komueska kuájchakukua ma tarhiata jingoni, kuájchakukua ma kʼéri janikua jingoni” (Is. 32:2). Jamberiksïni arhiati eskajtsï uandontskuarheaka pirenchi ma jingoni parajtsï uénhekuarhini ka paraksïni sési pʼikuastantani (Prov. 17:17).
¿UAAJTSÏ JARHUATANI CHAARI ACHEETINI?
Jamberijtsï kurhamarhikuarhijka sintsï uaa úni ambe ma parajtsï jarhuatani chaari acheetini para nóteru pornografia exenia. Jamberijtsï uaaka ísï úni. Biblia uandasïndi eska para úni sési peentani uandanhiata ma o para úni andani enemiguni ma, “sánderuksï sésiisti tsimani ka Ecl. 4:9-12). Jarhastiksï máru estudiuecha engaksï xarhatajka eska para úni jurajkuni pornografiani ka únksï ménderu tsimarhani mintsinharperani, sánderu fásiliisïndi enga acheeti ka uarhiiti márkuksï jánguarhintajka.
eska máechakuajku” (Ma ambe engajtsï jatsika para exeni jindeesti sini chaari acheeti meru uékaxaki jurajkuni pornografiani ka sini jánguarhintaxaki ísï úni. ¿Chá míteski sini kómarhiskia Tata Diosï Jeobani paraka íntskuaka uinhapikua ka arhiaskia orhejtsïkutiichani eskaksï jarhuataaka? (2 Kor. 4:7; Sant. 5:14, 15). ¿Úskia ambe ma chaari acheeti para nóteru exenia pornografia? Pori ejemplu, ¿nóteru xáni úraasïni aparatu elektronikuechani ka nóteru úsïni imani ambe enga uaaka eska ménderu pornografia exeaka? (Prov. 27:12). ¿Uékasïni eskajtsï jarhuataaka ka iámu ambeksïni aiangusïni? Enga ísïika, jamberijtsï uaaka jarhuatani.
¿Peru néna? Exe je ambe enga újka Felicia. Ima uambuchatixati Ethan jingoni enga desde sapichku ueenapka pornografia exeni. Felicia, jánguarhintasïndi paraka imeeri uámba uékaaka aianguni enga ima uékani jarhajka pornografia exeni. Ethan ísï uandasïndi: “Ji úsïnga uénhekuarhini juchiiti uarhiiti jingoni ka no ma ambe jískakusïnga. Kánikua uékperakua jingondini kámasïndi. Ka jarhuatasïndirini parani ji nóteru exenia pornografia. Ka tátsekuarini kurhamarhisïndi narini nichexaki. Ístu, jarhuatasïndirini parani sési úrani interneti”. Ísïisti, Felicia kánikua no sési pʼikuarherasïndi enga eratsejka eska imeeri uámba tsitisïnga pornografia exeni. Peru ima uandasïndi: “Nájkirukani kánikua ikiani jauaka o no sési pʼikuarherani, míteska eska inde ambe no jarhuataaka juchiiti acheetini para nóteru exenia pornografia. Ísï jimbo, orhetachi uandontskuarhesïnga na enga pʼikuarherani jarhajka ima ka tátsekuachi exesïnga ambe engachi uaaka úni parani ji no xáni no sési pʼikuarherani”.
Uandontskuarheni iiri ambe, jarhuatasïndi acheetini paraka no exeaka pornografia. Peru ístu jarhuatasïndi uarhiitini paraka ménderu mintsinharhiaka uámbani. Enga acheeti ma aiangujka témbani ambe enga úkua jukanchajka jurajkuni, ambe enga úni jarhajka o nani enga jarhajka, úsïndi eska témba mintsinharhiaka.
¿Exesïntsï eskajtsï úpiringa i jásï ambe úni parajtsï jarhuatani chaari acheetini? Engajtsï exeska eskajtsï uaaka ísï úni, jamberijtsï uaaka májku kʼéri arhintani ini artikuluni. Ka, ¿ambe jatsipirini para úni chaari acheeti? Nóteru exenia pornografia ka jánguarhintani para chá ménderu mintsinharhini. No jatsisti para ikiani engajtsï chá ueekaaka uandontskuarhekuni indeeri ambe, sánderu sési jatsisti para jánguarhintani kurhanguni na engajtsï no sési pʼikuarherajka enga ima pornografia exejka. ¿Ka chá ambejtsï jatsipirini para úni? Jarhuatani paraka ima uaaka nóteru exenia pornografia ka parakajtsï uaaka ménderu mintsinharhini. Kánikua jukaparhakuesti eskajtsï tsimarhani inbestigariuaka ambesï újki eska nema tsitiaka pornografia exeni ka ambe enga jatsiski para úni nema para jurajkuni indeni bisiuni. d
Ecl. 7:8; 1 Kor. 13:4).
Engajtsï exeska eskajtsï ikiauaka engajtsï iiri ambe uandontskuarheni jauaka chaari acheetini jingoni, andijtsïsï no eratsejki pʼímarhini orhejtsïkutini ma, paraka ima jima jauaka engajtsï chá uandontskuarheni jauaka. Engajtsï ísï ueekaaka úni, imani orhejtsïkutini eraku je engajtsï tsimarhani mintsinharhijka. Miá je eska, nájkiruka chaari acheeti nóteru exeakia pornografia, jamberi sáni ióni páati parajtsï chá ménderu mintsinharhini. Asï kuatanta je, jánguarhinta je exeni na engajtsï sánhani arhini jaka sési pájperantani. Mintsika je eska tiempu ka tekaantskua jingoni, uaakajtsï ménderu sési irekani temungurhiri (¿KA ENGA MÉNDERU NIÁRAAKA ÍSÏ ÚNI?
Enga chaari acheeti ménderu niáraaka ísï úni, ¿arhikuekasïni eska no móantaska o eska no méni jurajkuaka indeni bisiuni? Nómbe. Jamberi jatsiati para méntkisï jánguarhintani para úni jurajkuni indeni bisiuni ka sánderia enga ióni ísï úkia. Peru jamberi úpirindi ménderu pornografia exeni nájkiruka ióni páni japkia enga nóteru exeenga. Para no ménderu ísï úni, ima jatsiati para méntku jánguarhintani jarhani ka jamberi jatsiati para méntkisï ísï úni jarhani, nájkiruka ísï xarharaaka eska jurajkuskia ini bisiuni (Prov. 28:14; Mat. 5:29; 1 Kor. 10:12). Jatsiati para “mójtakuni imeeri eratsekuani” ka jorhenguarhini kurhunhini indeni ambe enga “no sési jaka”, komueska pornografia exeni ka ambe uéjki enga ikichakueni jásï ambeeka, pori ejemplu, masturbarikuarhini (Efes. 4:23; Sal. 97:10; Rom. 12:9). ¿Chaari acheeti uékaxaki iámu i ambe úni? Enga ísïika, uaati orhepani uérani. e
Jánguarhinta je sánderu sési pájperani Tata Diosï Jeoba jingoni.
Peru enga chaari acheeti no ma ambe uéjka úni para jurajkuni ini bisiuni, normaliisti eska chá mémindu ísï pʼikuarheraaka eskaksïni traisionariiska, no sési pʼikuarherani, kómu pʼikuarherani ka ikiani. Uénhekuarhi je iámindu ambe Tata Diosï Jeoba jingoni ka i ambeksïni jarhuataati sési pʼikuarherantani (1 Ped. 5:7). Seguirii je jorhenguarhini Biblieri ambe, kómarhini Tata Diosïni ka eratsentani indeni ambe engajtsï jorhenguarhijka parajtsï úni sánderu andarhierani Tata Diosï Jeobani ka exeakajtsï eskaksïni imajtu sánderu andarhieraaka. “Tata Diosï Jeoba imeecha jingoni jarhasti engaksï no sési pʼikuarhinheni jarhajka mintsitarhu” ka uékasïndi eskaksï ménderu tsípikua jingoni irekaaka (Sal. 34:18). Jánguarhinta je úni ambe enga xáni uétarhiaka parajtsï ambakiti kristiana máeni, arhia je orhejtsïkutiichani eskaksïni jarhuataaka ka asï méni eratsi je eska chaari acheeti no méni uaaka mójtakurhini (Rom. 2:4; 2 Ped. 3:9).
a Nájkiruka i artikulu uandajka enga acheeti ma pornografia exejka, uánikua Biblieri prinsipiuecha engaksï ixú jaka, ístuksï marhuauati enga uarhiitiuaka enga pornografia exejka.
b Ísï eska na jorhentpijka Biblia, enga acheeti pornografia exejka, uarhiiti no uaati indeni ambe jimbo diborsiarikuarhini (Mat. 19:9).
c Máru nombriichaksï mójtakurhisti.
d Uaakajtsï exentani sánderu informasioni íri ambe jw.org jimbo ka juchaari publikasioniicharhu. Máru artikuluecha engaksïni uaaka jarhuatani jindeestiksï: “La pornografía puede destruir su matrimonio” enga jw.org jimbo jaka; “Usted puede vencer las tentaciones” enga uéraka rebistarhu La Atalaya 1 de abrili de 2014, pájineecha 10 a 12, ka “Pornografia: ¿No no sési jarhaski o no sési útspisïni?” enga uéraka rebistarhu La Atalaya 1 de agostu de 2013, pájineecha 3 a 7.
e Pornografia kʼéri bisiu máesti, jimboksïsï máru temungurhiriicha jirinhati orhejtsïkutiicheeri jarhuajperata, joperu ístuksï doktoriicheeri jarhuajperata jirinhasti.