1. ¿Andisï Danieli ísku pakataapi Babilonia anapuechani?

 JIÁNI enga Danieli tumbi máepka, Babilonia pánhaspti. Peru nájkiruka sapichku japka, ísku pakataaspti Babilonia anapuechani, jimbokaksï imeecha exespka “ambe enga imeecheeri éskuechajku ueenga exeni”: tumbini ma “enga kánikua sési jáxepka” ka enga ambakiti familiarhu anapu máepka (1 Sam. 16:7). Ísï jimbo, iámu ambeksï jorhendaspti paraka ima ánchikuarhipiringa Babilonia anapu palasiurhu (Dan. 1:3, 4, 6).

2. ¿Néna exesïreeni Tata Diosï Jeoba Danielini? (Ezequiel 14:14).

² Tata Diosï Jeoba kánikua xénchasïreendi Danielini, peru no jimboka sési jáxespka o jimboka ambakiti ánchikuarhita ma jatsispka palasiurhu, sánderu sési, xénchasïreendi jimboka Danieli no méni jurajkuspka imani. Ka míteskachi eska i ambe ísïiska jimboka enga Danieli 20 uéxurhinisï jatiriipka, Tata Diosï Jeoba ístu Danieliiri ambe uandaspti enga ima achamasïicheri ambe uandani japka engaksï no méni jurajkupka, komu Noe ka Jobu, engaksï ióni sési marhuakupka imani (Gén. 5:32; 6:9, 10; Job 42:16, 17; arhinta je Ezequiel 14:14). Tata Diosï Jeoba méntkisï xénchaspti Danielini, ima ióni irekaspti ka sési (Dan. 10:11, 19).

3. ¿Ambechi exea ini jorhenguarhikua jimbo?

³ Ini jorhenguarhikua jimbo, exeauakachi tsimani kualidadiichani engaksï jarhuatapka Danielini paraka Tata Diosï kánikua jukaparharapiringa. Primeru exeakachi nákiiskiksï i kualidadiicha ka exeakachi káni xarhataaspi Danieli. Ístuchi exeaka ambe úspi Danieli para ini kualidadiichani jatsiani. Ka últimu, exeakachi nénachi uaa jucha májkueni úni eska Danieli. Nájkiruka i jorhenguarhikua únhaka para tumbiicha, iáminduechachi uaaka uánikua ambe jorhenguarhini Danieliiri ambe.

4. ¿Káni xarhataspti Danieli eska balori jukaspka?

⁴ Ima kʼuiripuecha engaksï balori jukajka ístuksï chésïndi, peruksï  no jurajkusïndi eska inde ambe ójkutauaka paraksï imani ambe úni enga sési jaka. Danieli tumbi máespti enga kánikua balori jukapka. Ju je exeni tsimani xanhari enga xarhatapka ini kualidadini. Primeru, jamberi jiáni úkuarhipti enga na tsimani uéxurhinisï nitamapkia engaksï Babilonia anapuecha kʼamajkupka Jerusalénini. Rei Nabukodonosori kʼéri estatuani ma tsánharhispti ka inde ambe kánikua uandanhiataxapti. Tátsekua arhiaspti iámindu Babilonia anapu jánhaskatiichani ka ístu Danielini eskaksï aiangupiringa ambe enga tsánharhipka ka ambe enga arhikuekeenga. Engaksï no aiangupiringa iáminduechani uándikuapirindi (Dan. 2:3-5). Danieli jatsispti para sóntku úni ambe ma; jimbokaksï úpiringa uánikua kʼuiripuecha uarhini. Ísï jimbo, “arhispti reini eska tiempu íntskupiringa paraka úpiringa aianguni ambe enga arhikuekeenga imeeri tsánharhikua” (Dan. 2:16). Para ini ambe úni, uétarhinchasïreendi kánikua mintsikani Tata Diosïni ka balori jukani. ¿Andi? Jimboka Biblia no uandasïnga eska Danieli antesi úsïreengia uandantani ambe engaksï arhikuekeenga tsánharhikuecha. Danieli uandontskuarhespti imeeri tanimu amiguecha jingoni, Sadraki, Mesaki ka Abednegu jingoni, b ka arhiaspti eskaksï mintsita jingoni kómarhipiringa auandarhu anapu Tata Diosïni eska pʼamojkuapiringa ka eska aianguapiringa ambe enga arhikuekeenga inde tsánharhikua (Dan. 2:18). Tata Diosï Jeoba mókukuantaspti ka imeeri jarhuajperata jingoni, Danieli úspti aianguni rei Nabukodonosorini ambe enga arhikuekeenga tsánharhikua. ¡Danieli ka imeeri amiguechaksï úspti tsípiti pakarani!

5. ¿Káni ménderu xarhataspi Danieli eska balori jukaspka?

⁵ Sánderu tátsekua, enga Danieli aiangupkia ambe enga arhikuekeenga estatueri tsánharhikua, ima ménderu nitamakuarhispti ambe ma enga jatsipka para balori xarhatani. Rei Nabukodonosori ménderu máteru ambe tsánharhispti, tsánharhispti ambe ma enga kánikua chérapka; iásï kʼéri anhatapu ma exespti. Danieli balori jukaspti ka aianguspti rei Nabukodonosorini ambesï arhikuekeeni ima tsánharhikua, ístu arhispti eska loku úkuarhipiringa ka eska ma tiempu nóteru reiipiringia (Dan. 4:25). Rei Nabukodonosori, úpirindi eratseni eska Danieli imeeri enemigu úkuarhixapkia ka úpirindi uándikutarkuarhini, peru Danieli balori xarhataspti ka iámindu ambe aianguspti.

6. ¿Ambe jarhuatapi Danielini para méntkisï balori jukani?

⁶ ¿Ambe jarhuatapi Danielini para méntkisï balori xarhatani? Seguruchi jarhaska eska desde enga tumbiipka uánikua ambe jorhenguarhispka  imeeri taatiicheeri ejemplu jingoni. Imeechaksï úspti ambe enga Tata Diosï Jeoba arhiapka imani israeliteechani engaksï taatiipka, ka jorhendasptiksï Tata Diosïiri Leini (Deut. 6:6-9). Danieli míteaspti Diesi Mandamientuechani, peru ístu mítespti máteru ambe enga Lei uandeenga. Pori ejemplu ima mítespti ambe engaksï israeliteecha ueenga arhani ka ambe nómbe (Lev. 11:4-8; Dan. 1:8, 11-13). c Ístu, Danieli mítespti ambe enga Tata Diosïiri ireta nitamakuarhipka ka ambe engaksï úkuarhincheenga jiáni engaksï no kurhajchauenga Tata Diosï Jeobaeri juramukuechani (Dan. 9:10, 11). Ambe enga xáni nitamakuarhipka Danieli, úspti eska ima seguru japiringa eska Tata Diosï Jeoba ka imeeri ánjeliicha engaksï xáni uinhapitiika méntkisïksï jima japiringa para jarhuatani (Dan. 2:19-24; 10:12, 18, 19).

7. ¿Ambe máteru ambe jarhuataspi Danielini para úni balori jukani? (Ístu exe imajenini).

⁷ Danieli pʼindespti jorhenguarhini ambe engaksï Tata Diosïiri profeteecha karapka, komu pori ejemplu Jeremías. Ini ambe jimbo, tátsekua niáraspti kurhanguni eska nóteru ióni kuerataxapkia parakaksï judiuecha uéakuntapiringa Babilonia (Dan. 9:2). Danieli exespti eska ambe enga Tata Diosï Jeoba uandapka niáraspka ísï úkuarhini, inde ambe úspti eska Danieli sánderu mintsikapiringa Tata Diosïni. Ka enga kʼuiripu ma kánikua mintsikajka Tata Diosïni, kánikua balori jukasïndi (terukutanta je i ambe Roma 8:31, 32, 37-39 jingoni). Ambe enga sánderu jarhuatapka Danielini, jindeespti eska ima kánikua kómarhisïreenga Tata Diosï Jeobani (Dan. 6:10). Aiangusïreendi imeeri pekaduechani ka ístu na enga pʼikuarhereenga ka kurhakusïreendi eska jarhuatapiringa (Dan. 9:4, 5, 19). Ísï eska na uéjki kʼuiripu ma, Danieli no andajpenuspti balori jingoni. Ima estudiarisïreendi, kómarhini ka kánikua mintsikani Tata Diosï Jeobani para úni ini kualidadini jatsini.

8. ¿Ambejtsïni jarhuataa balori jukani?

⁸ Nájkirukaksï juchaari taatiicha balori jukaaka ka animarintsïni parachi juchajtubalori jukani, imeechajtsïni no uaati íntskuni imeecheeri balori, jatsiskachi para úni ambe ma. Balori jukani ísïisti eska sési jorhenguarhini úni ambe ma. Parari sési jorhenguarhini úni ambe ma, jatsiskari para exeni imani engakeni jorhendani jaka ka májkuendi úni eska ima. Ísï jimbo, parachi balori jukani jatsiskachi para exeani imeechani engaksï balori jukaka ka májkueni úni. Jiájkani, ¿ambejtsïni jorhendaski Danieliiri ejemplu? Eskachi jatsiska para sési estudiarini Bibliani, someni kómarhini Tata Diosï Jeobani ka mintsita jingoni, parachi úni imeeri amigueni, ka mintsikani eskajtsïni Tata Diosï méntkisï jarhuataaka. Engachi iámindu ini ambe úska, jiáni engachi jatsiaka para xarhatani na engachi xáni mintsikajka Tata Diosïni, balorichi jukaaka.

9. ¿Néna marhuasïni engachi balori jukajka?

⁹ Balori jukani, kánikua marhuasïndi. Ju je eratsentani ambe enga úkuarhinchapka Ben d enga Alemania anapueka. Eskuelarhu, iámindu imeeri kompanieruechaksï ebolusionini jakajkusïreendi ka eratsesïreendiksï eska ambe enga Biblia uandajka kueraakateeri ambe ísku kuentu máespka. Ma uelta, jurajkusptiksï eska ima uandantapiringa iámu klaserhu andisï seguru japi eska Tata Diosï kueraaspka tsípikuani ka ima kánikua balori jingoni uandantaspti ambe enga jakajkuenga. ¿Ambe úkuarhispi tátsekua? Ben, uandantasïndi: “Juchiiti maestrurini jingontku kurhajchaspti ka íntsaaspti kompanieruechani kopia ma ima informasioniiri engani ji úrapka”. ¿Ambeksï úspi Beniiri kompanieruecha? Ima mismu uandantasïndi: “Uánikuechajtsïni kurhajchaspti ka arhisptijtsïni eskajtsïni respetarisïreenga”. Ambe enga Ben nitamakuarhika, xarhatasïndi eskaksï kʼuiripuecha respetariuasïnga imeechani engaksï balori jukajka ka  ístu úsïndi eskaksï máteruecha uékaaka míteni Tata Diosï Jeobaeri ambe. Ísï jimbo, kánikua marhuasïndi eskachi jánguarhintaaka balori jukani.

10. ¿Ambe arhikuekasïni no méni jurajkuni nemani?

¹⁰ Bibliarhu, uandakua enga ebreu jimbo tradusirikuarhijka “no méni jurajkuni” o “ambakiti uékperakua”, arhikuekasïndi na enga xáni xénchajka nema máteru nemani ka eska méntkisï jima jauaka imani jingoni. Uánikua xanhari i uandakua úrakuarhesïndi para xarhatani na enga xáni xénchaajka Tata Diosï Jeoba imeeri marhuariichani. Ka i mismu uandakua úrakuarhesïndi para xarhatani na engaksï xáni xénchperajka Tata Diosï Jeobaeri marhuariicha (2 Sam. 9:6, 7). Tata Diosï Jeoba erokuarhisïndi eskachi juchajtu no méni uékaaka jurajkuni imani. Ka tiempu jingoni sánderuchi no méni uékaaka jurajkuni Tata Diosïni. Ka i ambesï úkuarhipti profeta Danieli jingoni.

11. ¿Néna xarhataspi Danieli enga jukari 90 jatiripkia eska no méni jurajkupiringa Tata Diosï Jeobani? (Exe dibujuni enga ueenakuarhu jaka ini rebistarhu).

¹¹ Iámindu imeeri irekua jimbo, Danieli uánikua xanhari xarhataspti eska no méni jurajkupiringa Tata Diosï Jeobani. Peru jiáni enga jukari 90 jatiripkia nitamakuarhispti ambe ma enga kánikua úkua jukapka. Imani tiempu jimbo, meduecha ka perseechaksï juramuxapti Babilonia ka Dariu reiispti. Máru acheetiicha engaksï rei jingoni ánchikuarhienga kurhunhisïreendiksï Danielini ka nóksï janhanharhisïreendi Tata Diosï Jeobani. Ísï jimbo, eratsesptiksï úni ambe ma para Danielini uándikuni. Úsptiksï eska Dariu firmaripiringa lei ma, nani enga Danieli jatsipka para xarhatani néni no méni jurajkupirini Tata Diosïni o reini. Ka para xarhatani eska no méni jurajkupiringa reini ka para no kastigarinhani, Danieli solu jatsispti para 30 jurhiatikua no kómarhini Tata Diosï Jeobani. Peru ima no úspti indeni ambe ka no jurajkuspti Tata Diosïni. Ísï jimbo, kʼuaninhasptiksï posurhu ma nani engaksï leoniicha japka. Tata Diosï Jeoba exespti eska Danieli no jurajkuspka ka pʼímutantaspti (Dan. 6:12-15, 20-22). ¿Ambejtsïni jarhuataa parachi no méni jurajkuni Tata Diosïni ísï eska Danieli?

12. ¿Ambe úspi Danieli paraka no méni uékapiringa jurajkuni Tata Diosï Jeobani?

¹² Parachi no méni jurajkuni Tata Diosï Jeobani uétarhisïndi eskachi mintsita jingoni xénchaaka. Daniel no méni jurajkuspti imeeri Taati auandarhu anapuni jimboka kánikua xénchasïreenga. Ima niáraspti xáni xénchani, jimboka eratseantasïreenga Tata Diosï Jeobaeri kualidadiichani ka na enga xarhatauenga (Dan. 9:4).  Ístu, Danieli eratsentaspti iámindu ambe enga Tata Diosï Jeoba úpka imani jimbo ka imeeri iretani jimbo ka kánikua agradesidu jarhaspti indeni ambe jimbo (Dan. 2:20-23; 9:15, 16).

13. a) ¿Ambeksï nitamakuarhisïni tumbiicha engaksï kristianueka? Uandanta ejemplu ma. (Ístu exe fotuni). b) ¿Ambechi úpirini arhini nemani engajtsïni kurhamarhiaka sinchi Jeobaeri testiguecha apoiariuasïni omoseksualiichani? (Exe bideuni enga jw.org jimbo jaka, enga arhinhajka “Enga jurhimbikua jingoni úkuarhiaka iámu ambe, pínandikua jauati”).

¹³ Májkueni eska Danieli, juchaari tumbiichajtuksï imeecha jingonksï jámasïndi engaksï no janhanharhijka Tata Diosï Jeobani ni imeeri juramukuechani. Jamberiksï inde kʼuiripuecha no sési kaajti imeechani engaksï uandajka eskaksï xénchasïnga Tata Diosïni ka astaksï arhiajti juchaari tumbiichani eskaksï jurajkuaka Tata Diosï Jeobani. Indeni ambesï nitamakuarhipti Gabriel enga Australia irekaka. Enga tumbi sapichuepka, nitamakuarhispti ambe ma eskuelarhu enga kánikua úkua jukapka. Maestra kurhamarhiaspti tumbiichani ambeksï úpirini enga imeecheeri amigu ma arhiapiringa eska omoseksualiska. Ka arhiaspti eskaksï máekandu niárapiringa imeecha engaksï apoiaripiringa imani ka máteru ladu jimbo imeecha engaksï no apoiaripiringa. Gabriel uandantasïndi: “Iáminduechaksï apoiarispti imani, menusi ji ka máteru Testigu”. Ambe enga tátsekua úkuarhipka sánderu úkua jukaspti ka Gabriel jatsispti para xarhatani eska no méni jurajkupiringa Tata Diosï Jeobani. Ima miásïndi: “Útasï kánikua kuerataxapti para klase kʼamakurhini, ka juchiiti kompanieruecha ka maestra jamberi mámaru ambejtsïni arhixapti ka teresmarhuntsïni. Jánguarhintaspka no ikiani ka aianguani ambe engani jakajkujka, perujtsïni no uékaspti kurhajchani”. ¿Na pʼikuarheraspi Gabriel? Ima uandantasïndi: “No sáni tsitispka na engajtsïni kámapka, peruni kánikua sési pʼikuarheraspka jimbokani no jurajkuspka Tata Diosï Jeobani ka úspka kuájpini ambe engani jakajkujka”.

14. ¿Ambechi uaa úni para no méni jurajkuni Tata Diosï Jeobani?

¹⁴ Májkueni eska Danieli parachi no méni jurajkuni Tata Diosï Jeobani, jatsiskachi para jánguarhintani iámu mintsita jingoni xénchani. Ka parachi pauani pauani sánderu xénchani Tata Diosïni, jatsiskachi para sési míteni na enga jásïika, ka ma ambe engajtsïni jarhuataaka ísï úni, jindeesti jorhenguarhini ka eratsentani iámindu imani ambe enga ima kueraaka (Rom. 1:20). Tumbi, ¿ambe ka ambekini jarhuataa parari sánderu xénchani ka janhanharhini Tata Diosï Jeobani? Partirhu “¿Ísku úkuarhiski o nema úski?”, jarhastiksï bideuecha ka artikulu sapirhatiicha engari uaaka exeani. Ísturi uaaka arhiantani foietuechani ¿Es la vida obra de un Creador? ka El origen de la vida. Exe ambe enga uandaka Esther i publikasioniicheeri ambe, uátsï ma enga Dinamarca anapueka: “Kánikua tsitisïnga na engaksï eksplikarijka i foituecha, nóksïni arhisïndi ambe engari jatsika para jakajkuni, sánderu sési exeraasïndiksïni pruebeechani parari tʼu mismu exeni ambe jakajkuni”. Ben, engachi párrafu 9 jimbo uandaka, uandasïndi: “I artikuluecha ka foietuechajtsïni jarhuatasti parani sánderu mintsikani Tata Diosï Jeobani. Xarhatachestijtsïni eska Tata Diosï Jeoba kueraaska tsípikuani”. Engari na jorhenguarhiauakia ini foietuechani, jamberiri májkueni uandaaka eska na arhijka Jaŋaskuecha 4:11: “Tʼu juchaari Tata jukanchaskari tʼíntskua intsïnhani ka arhinhani eskari kʼéri ambeeska ka uinhapikua jatsindi, jimboka tʼu kueraaska iámindu ambe”. e

15. ¿Ambe máteru ambechi uaa úni parachi sánderu sési pájperani Tata Diosï Jeoba jingoni?

¹⁵ Máteru ambe engajtsïni jarhuataaka sánderu xénchani Tata Diosï Jeobani, jindeesti jorhenguarhini Jesúsiiri ambe enga jindeeka imeeri Uájpa. Inde ambesï úpti Samira, uátsï ma enga Alemania irekaka. Ima uandasïndi: “Niáraspka sánderu sési míteni Tata Diosï Jeobani engani jorhenguarhipka Jesúsiiri tsípikueri ambe”. Enga Samira nanaka sapichuepka, úkua jukanchasïreendi kurhanguni eska Tata Diosï Jeoba pʼikuarhenhisïreenga ambe  ma, peru no májkueni eratsesïreendi Jesúsiiri ambe. Ima uandantasïndi: “Kánikua tsitisïreenga Jesúsiiri ambe, jimboka ima xénchasïreenga sapiichani ka no úkua jukaspti imeeri amigueni”. Enga Samira, sánderu sési míteenga Jesúsini, sánderu sési pájperasïreendi Tata Diosï Jeoba jingoni. ¿Andi? Ima uandantasïndi: “Sánhani arhispka kurhanguni eska Jesúsi májkueni ambe úsïnga eska imeeri Taati. Ka kuenta íntskukuarhespka eska ima axaspka imeeri Uájpani Echerirhu paraka kʼuiripu sánderu sési mítepiringa Tata Diosïni” (Juanu 14:9). Tumbi, engari uéjka sánderu sési pájperani Tata Diosï Jeoba jingoni, ¿andiresï no jánguarhintajki sánderu sési míteni Jesúsini? Engari ísï úska, sánderuri xénchaaka Tata Diosï Jeobani ka nóri méni jurajkuaka.

16. ¿Andisï xáni sésii engachi no méni jurajkuska Tata Diosï Jeobani? (Salmo 18:25; Miqueas 6:8).

¹⁶ Engachi no méni jurajkuauaka máteruechani, uaakachi ima járhati amiguechani jatsiani engajtsïni no méni jurajkuaka ka engaksï jindeuaka para méntkisï (Rut 1:14-17). Ístu, engachi no méni jurajkuska Tata Diosï Jeobani uaakachi sési pʼikuarherani ka tsípikua jingoni. ¿Andi? Jimbokachi sési pʼikuarherasïnga míteni eska Tata Diosï aiatspesïnga eska no méni jurajkuauaka imeeri amiguechani engaksï no méni jurajkujka (arhinta je Salmo 18:25; Miqueas 6:8). Tata Kuerajpiri enga kánikua uinhapitiika, uékasïndi juchaari amigueni para méntkisï nájkirukachi jucha xáni sapichitu ambeeka. ¿A no eska kánikua ambakiti ambeeska? No ma juchaari enemigu ni tsʼéjkukua ambe, ka ni sikiera uarhikua uaa úni eskachi nóteru Tata Diosï Jeobaeri amigueuakia (Dan. 12:13; Luk. 20:37, 38; Rom. 8:38, 39). Ísï jimbo, kánikua jukaparhakuesti májkueni úni eska Danieli ka no méni jurajkuni Tata Diosï Jeobani.

17, 18. ¿Ambe máteru ambechi uaa jorhenguarhini Danieliiri ambe?

¹⁷ Ini jorhenguarhikua jimbo, tsimanchi kualidadiichani exeaska Danieliiri. Peruchi uaaka uánikua máteru ambe jorhenguarhini imeeri tsípikueri ambe. Pori ejemplu, Tata Diosï tsánharhitaspti Danielini ka úspti eska bisioniichani exeraapiringa, ka jarhuataspti paraka ima úpiringa uandantani ambe engaksï arhikuekeenga profesiecha. Uánikua inde profesiechaksï kumplirikuarhistia, ka máteruechajtsïni aiangusïndi ambe enga úkuarhiaka sánderu orhepani ka íchaksï jindeesti para iámindu kʼuiripuecha.

¹⁸ Máteru jorhenguarhikua jimbo, exeanchi jauaka tsimani profesiechani, engaksï libru de Danieli jimbo jaka. Sési kurhanguani ini profesiechani jarhuataatijtsïni iáminduechani, tumbiichani ka jatiriichani parachi ambakiti ambee erakuni úni iásï. I profesiecha ístujtsïni jarhuataati parachi sánderu balori jukani ka nóchi méni jurajkuni Tata Diosïni, ka ísïchi preparadu jauaka para ima tsʼéjkukuecha engaksï no ióni jimbo jauaka.