1. ¿Andichisï tsitijki imani kʼuiripuecha jingoni jarhani engaksï tekaantstiika?

 IÁMINDUECHACHI tsitisïnga imani kʼuiripuecha jingoni jarhani engaksï tekaantstiika. ¿Andi? Jimbokachi respetariuasïnga imeechani engaksï tekaantskua jingoni erokuarhijka ka no sóntkuksï ikiani. Ístuchi jukaparharaasïnga imeechani engajtsïni tekaantskua jingoni kámajka jiáni engachi no újka sési úni ambe ma. Ka ístuchi kánikua agradesidu jarhaska ima erachi jingoni engajtsïni Biblieri ambe jorhendaka, jimbokajtsïni tekaantskua jingoni kámaska jiáni engachi úkua jukancheenga kurhanguni ambe ma, o ísï úni eskachi na jorhenguarhini japka. ¡Ka sánderuchi agradesidu jarhaska Tata Diosï Jeoba jingoni jimbokajtsïni tekaantskua jingoni kámasïnga! (Rom. 2:4).

2. ¿Kánchi úpirini úkua jukanchani tekaantstiini?

² Iáminduechachi jukaparharaasïnga imeechani engaksï tekaantstiika, joperu jamberichi jucha úkua jukanchajka tekaantstiini. Pori ejemplu, jiáni engachi karretera jimbo nirani jarhajka ka jukari tráfiku jarhani, jamberichi sóntku ikiajka ka sánderia engachi sóntku uékani jarhajka niárani nani. Jamberichi ístu sóntku ikiajka enga nema uandajka o újka ambe ma engachi no tsitijka. Ístuchi úpiringa eratseni eska jimbanhi parhakpini engajtsïni Tata Diosï Jeoba aiachijka ióndaxaka niárani. ¿A no eskachi iáminduecha uékapiringa sánderu tekaantstiini? Ini jorhenguarhikuani jimbo, exeni jauakachi ambe arhikuekasïni i kualidadi ka andisï xáni jukaparhakue xarhatani. Ístuchi exeaka máru ambe engajtsïni jarhuataaka sánderu tekaantstiini.

3. ¿Ambe úsïni kʼuiripu ma enga tekaantstiika jiáni engaksï no sési ambe arhijka?

³ Ju je exeni na enga jásïika kʼuiripu ma enga tekaantstiika, tʼámu ambechi exeaka. Orheta, no sóntku ikiasïndi. Kʼuiripu ma enga tekaantstiika, jánguarhintasïndi para no no sési mókukuarhini engaksï máteruecha no sési ambe arhijka, ka no májkueni ambe úkuantaasïndi. Ístu, no no sési kaasïndi máteruechani enga jukari uandanhiani jarhajka. Primeru xanhari enga Biblia úrajka uandakua “no sóntku ikiani” jiáni úrasïndi enga uandajka eska Jeoba, Tata Diosï máeska enga “pʼamojp[ejka], enga sési kámpijka ka enga no sóntku ikiajka  ka enga kánikua uékpijka ka jurhimbitiini” (Éx. 34:6).

4. ¿Ambe úsïni kʼuiripu ma enga tekaantstiika jiáni enga jatsijka para erokuarhini?

⁴ Segundu, kʼuiripu ma enga tekaantstiika, mítesti erokuarhini. No sóntku kuatantasïndi, nijtu sóntku ikiani enga ambe ma ióndani jarhajka úkuarhini (Mat. 18:26, 27). Jarhasti uánikua ambe nani engachi jatsika para tekaantskua jingoni erokuarhini. Pori ejemplu, engajtsïni nema aianguni jarhajka ambe ma, jatsiskachi para tekaantskua jingoni kurhajchani ka no sóntku uékani uandani ambe ma (Job 36:2). Ístu, uétarhisïndi eskachi tekaantstiuaka para jarhuatani jorhenguarhirini ma, kurhanguni ambe ma enga Biblia jorhentpijka o paraka uaaka jurajkuni imani ambe enga no sési jaka.

5. ¿Ístuchi néna xarhatasïni eskachi tekaantstiiska?

⁵ Terseru, kʼuiripu ma enga tekaantstiika no jirejiresï úsïndi ambe ma. Ménichani uétarhisïndi eskachi sóntku uaaka ambe ma. Joperu enga uétarhijka úni ambe ma enga kánikua jukaparhakueka, ima kʼuiripu no jirejiresï ueenasïndi úni indeni ambe, nijtu sóntku uéjki kʼamarani. Sánderu sési, arhutasïndi tiempu para sési eratsentani néna uaa úni indeni ambe ka tátsekua xáni tiempu úrasïndi eska na xáni uétarhiaka para sési úni indeni ánchikuarhitani.

6. ¿Ambe úsïni kʼuiripu ma enga tekaantstiika jiáni enga problemeechani jatsiajka?

⁶ Kuartu, kʼuiripu ma enga tekaantstiika jánguarhintasïndi no uandauandamini jarhani jiáni enga no sési nitamakuarhini jarhajka. No no sési jarhasti uénhekuarhini amigu ma jingoni engachi kánikua mintsikajka ka aianguni ambe engajtsïni xáni no sési pʼikuastani jaka. Peru ima kʼuiripu enga tekaantstiika jánguarhintaati méntkisï tsípikua jingoni marhuakuni Tata Diosï Jeobani (Kol. 1:11). Kristianuechachi jatsiska para tekaantstiini iámindu ini ambe jimbo engachi exekia, ¿andi? Ju je exeni máru ambe.

7. Eska na uandajka Santiagu 5:7, 8, ¿andisï xáni jukaparhakue tekaantstiini? (Ístu, exea je imajeniichani).

⁷ Kánikua jukaparhakuesti tekaantstiini parachi pʼímutanhantani. Ísï eskaksï Tata Diosïiri  marhuariicha engaksï ióntki irekapka, jatsiskachi para tekaantskua jingoni erokuarhini eska Tata Diosï kumpliriuaka, ambe enga aiatspeka (Ebr. 6:11, 12). Biblia uandasïndi eskachi jucha ísïiska komueska tarheri ma (arhinta je Santiagu 5:7, 8). Tarheri uinhamu ánchikuarhisïndi ka itsï jatsikusïndi imani ambe enga ikaraka, joperu no mítesti káni kʼéa. Ísï jimbo, tekaantskua jingoni erokuarhisïndi para pʼikuntani ambe enga jatsikuka. Kristianuechajtuksï uinhamu ánchikuarhisïndi para Tata Diosï Jeoba nájkirukaksï no míteka “na jatini jungua [imeecheeri] Tata” (Mat. 24:42). Ísï jimbo, tekaantskua jingonchi erokuarhisïnga mintsikaparini eska Tata Diosï Jeoba, kumpliriuaka iámindu ambe enga aiatspeka jiáni enga sánderu sési jauaka. Joperu engachi kuatantaska úpiringachi sánhani arhini jarharini Tata Diosï Jeobani. Ístu, jamberichi ueenapiringa imani ambe uékani úni engachi jucha eratsejka eskajtsïni sési pʼikuastaaka. Peru engachi tekaantstiiska, uaakachi aguantariini astaka Tata Diosï Jeoba kʼamajkuaka ini parhakpinini ka pʼímutantantsïni (Miq. 7:7; Mat. 24:13).

8. ¿Nénajtsïni jarhuatasïni engachi tekaantstiijka sési pájperani máteruechani jingoni? (Colosenses 3:12, 13, TNM).

⁸ Tekaantskua, jarhuataatijtsïni parachi úni sési pájperani máteruechani jingoni. Engachi tekaantstiiska, jingontkuchi kurhajchauaka máteruechani engajtsïni arhini jauaka ambe ma (Sant. 1:19). Ístuchi jánguarhintaaka sési pájperani iáminduecha. Ka nóchi sóntku ikiauaka nijtuchi uandaa ambe ma enga no sési pʼikuastauaka máteruechani jiáni engachi jukari uandanhiani jauaka. Ístu engajtsïni nema arhinchaaka, nóchi sóntku ikiauaka, nijtuchi ísï kámaa imani kʼuiripuni eskajtsïni ima na kámaaka. Sánderu sési, seguiriuakachi tekaatsperantani ka mintsita jingonchi puátsperantani (arhinta je Colosenses 3:12, 13, TNM).

9. ¿Nénajtsïni jarhuataa tekaantskua jiáni engachi erakuni jámaaka ambe ma? (Proverbios 21:5).

⁹ Tekaantstiini, jarhuataatijtsïni ambakiti ambe erakuni úni. Enbesi de jirejiresï úni ambe ma ka no eratseparini, arhutaakachi tiempu para exeni ambe ka ambechi uaa úni ka imani ambechi erakuni engajtsïni sánderu marhuacheaka (arhinta je Proverbios 21:5). Pori ejemplu, engachi ánchikuarhita jirinhani jauaka, jamberichi uékaaka jiókuarhini náki uéjki ánchikuarhitani, nájkiruka inde ambe uaaka eskachi méni no niuaka tánguarhikuarhu o aianhpikuarhu. Joperu engachi tekaantstiiska, exeakachi na xáni iauani jarhaski inde ánchikuarhita, na xánchi ánchikuarhia, ka néna jarhuataa o no sési úkuni juchaari familiani ka ístu sintsïni jarhuataa parachi seguiriini jarhani sési pájperani Tata Diosï Jeoba jingoni. Engachi tekaantstiiska, nóchi erakuaka imani ambe engajtsïni uaaka no sési úchini ka ístu na engachi pájperajka Tata Diosï Jeoba jingoni. Kánikuajtsïni sési nicheati engachi tekaantstiiska.

10. ¿Ambechi jatsiski para úni parachi sánderu tekaantstiini?

¹⁰ Ju je kurhakuni Tata Diosï Jeobani eskajtsïni jarhuataaka sánderu tekaantstiini. Espiritu santujtu úsïndi eskachi tekaantstiuaka (Gal. 5:22, 23). Ísï jimbo, uaakachi kurhakuni Tata Diosï Jeobani eskajtsïni íntskuaka imeeri espiritu santu ka eskajtsïni jarhuataaka sánderu tekaantstiini. Engachi nitamakuarhini jaka ambe ma jimbo enga újka eskachi úkua jukanchaaka tekaantstiini, ju je seguiriini kurhakuni imeeri espiritu santu (Luk. 11:9, 13). Ístuchi uaaka arhini Tata Diosï Jeobani eskajtsïni jarhuataaka ísï exeni ambe ma eska ima na exejka. Ka engachi na kómarhiakia, ju je jánguarhintani xáni eskachi xáni uaaka parachi pauani pauani tekaantstiini. Engachi méntkisï kurhakuska Tata Diosï Jeobani eskajtsïni jarhuataaka, ka engachi jánguarhintaska xáni eskachi xáni uaaka parachi xarhatani ini kualidadini, exeakachi eskachi sánhani arhiaka sánderu tekaantstiini.

11, 12. ¿Néna xarhataskia Tata Diosï Jeoba eska tekaantstiiska?

¹¹ Ju je eratseantani Biblieri ejempluechani. Bibliarhu uánikua ejempluechaksï jarhasti ima kʼuiripuecheeri engaksï tekaantstiipka. Engachi  eratsentaska imeecheri ambe, uaakachi jorhenguarhini ambe engachi uaaka úni parachi juchajtu tekaantstiini. Ju je exeani máru ejempluechani engaksï Bibliarhu jaka, joperu orheta ju je exeni Tata Diosï Jeobaeri ejempluni, imeeri enga sánderu tekaantstiika.

¹² Jardini de Edénirhu, Satanási no sési pakataspti Tata Diosï Jeobaeri nombrini ka úspti eska Eba no seguru japiringa eska Tata Diosï ambakiti juramuti máeska ka eska xénchpesïnga. Joperu Tata Diosï Jeoba no jirejiresï kʼamajkuspti Satanásini. Ima pʼíngukuarhispti ka tekaantaspti jimboka mítespka eska tiempu uétarhipiringa para xarhatani eska na enga ima juramujka sánderu sési jarhaska. Enga jamberi erokuarhini jaka, Tata Diosï Jeoba tekaantaxati enga ísï chkuanderakua ambe uandanhani jaka imeeri nombriiri ambe. Ka jimboka Tata Diosï Jeoba tekaantstiiska, uánikua kʼuiripuechaksï niárastia míteni ka uaatiksï irekani para méntkisï (2 Ped. 3:9, 15). Engachi eratsentajka ambe enga xáni úkuarhikia jimboka Tata Diosï Jeoba tekaantstiiska, sánderu fásiliuati parachi erokuarhini imani jurhiatikuani enga Tata Diosï Jeoba erakukia paraka juaaka Armajedoni.

13. Enga Jesúsi Echerirhu jámani japka, ¿néna xarhataspi eska májkueni tekaantstiiska eska Taati jémba? (Ístu exe je imajenini).

¹³ Jesúsi májkueni tekaantstiisti eska imeeri Taati jémba, ka xarhataspti ini ambe jiáni enga Echerirhu jámani japka. Para ima no méntkisï fásiliipti tekaantani ka sánderu úkua jukanchapti fariseuecha ka karariicha jingoni engaksï ísku apariipka (Juanu 8:25-27). Joperu májkueni eska imeeri Taati, ima no sóntku ikiasïreendi. Engaksï imeeri enemiguecha no sési arhini jarheenga ka no sésiksï kámani, ima no májkueni ambe úkuantaasïreendi (1 Ped. 2:23). Sánderu sési, tekaantaspti iámindu ini ambe ka no méni no sési mókukuarhispti. Ísï jimbojtsïnisï Biblia arini konsejuni íntskujti:  “Méntku jauena je miántani imani engaksï pekadoriicha xáni kʼuratsekua ambe arhienga” (Ebr. 12:2, 3). Tata Diosï Jeobaeri jarhuajperata jingoni, juchajtuchi uaaka tekaantani náki uéjki tsʼéjkukuani engachi jatsiaka.

14. ¿Ambechi jorhenguarhisïni enga Abraáni ísï tekaantstiipka? (Ebreu 6:15; ístu exea je imajeniichani).

¹⁴ ¿Ambejtsïni jarhuataa parachi tekaantskua jingoni erokuarhini astaka Tata Diosï Jeoba kʼamajkuaka parhakpinini? Jamberichi erokuarhini japka eska ini jurhiatikuechani jimbo tʼuini úkuarhipiringia inde ambe ka ístuchi jamberi eratsejka eskachi jucha no uaaka exeni enga ísï úkuarhiaka. Engachi ísï pʼikuarherajka, ju je exeni Abraániiri ejempluni. Enga Tata Diosï Jeoba aiakupka eska imani jimbo kʼéri ireta ma japiringa, Abraáni 75 jatirisptia ka no ma sapini kánguarhisïreendi (Gén. 12:1-4). ¿Joperu Abraáni úspi exeni enga kumplirikuarhipka i ambe? No iámindu ambe exespti. Ísï tátsekua enga na parhikupkia riuni Éufratesi, 25 uéxurhini erokuarhispti ka tátsekua milagru ma jimbo, kánguarhispti uájpa Isaakini. Ka 60 uéxurhini ísï tátsekua andajpenusptiksï imeeri nimakuecha, Esaú ka Jakobu (arhinta je Ebreu 6:15). Joperu Abraáni no exespti engaksï imeeri desendientiicha niárapka jindeeni kʼéri ireta ma, nijtu engaksï pʼipka imani Echerini engaksï Aiaminhapka. Nájkiruka ísïipka, i achamasï enga no méni jurajkupka Tata Diosïni, niáraspti kánikua sési pájperani imeeri Kuerajpiri jingoni (Sant. 2:23). ¿Úsïntsï eranhaskani na enga xáni sési pʼikuarheraaka Abraáni enga tsíntaaka? Míteati eskaksï iámindu nasioniicha újchakuranhaspka jimboka ima mintsikaspka Tata Diosïni (Gén. 22:18). ¿Ambechi jorhenguarhisïni? Jamberichi ini jurhiatikuecha jimbo no exeaka iámindu ambe engajtsïni Tata Diosï Jeoba aiachika. Joperu engachi tekaantaska ísï eska Abraáni, seguruchi jauaka eskajtsïni Tata Diosï Jeoba újchakuraaka iásï, ka jimbanhi parhakpinirhu sánderujtsïni újchakuraati (Mar. 10:29, 30).

15. ¿Ambechi uaa jorhenguarhini jiáni engachi jandiajku jorhenguarhini jauaka Biblieri ambe?

 ¹⁵ Biblia ístu uandaasïndi uánikua kʼuiripuechani engaksï tekaantstiipka (Sant. 5:10). ¿Andijtsïsï no jorhenguarhijki ambe enga Biblia uandajka inde kʼuiripuecheeri ambe? b Pori ejemplu, enga Dabidi erakunhapka para Israeli anapu reiini, tumbi sapichu máespti, joperu jatsispti para uánikua uéxurhini erokuarhini para juramukuarhu niárani. Simeóni ka Ana, sésiksï marhuakuspti Tata Diosï Jeobani engaksï jamberi erokuarhini japka eska janopiringa Mesíasi engaksï aiaminhapka (Luk. 2:25, 36-38). Engajtsï jorhenguarhini jauaka ambe enga Biblia uandajka ima kʼuiripuecheeri engaksï tekaantstiipka, kurhamarhikuarhi je: “¿Ambe jarhuataspi ini kʼuiripuni para tekaantstiini? ¿Néna marhuakuspi enga ísï tekaantstiipka? ¿Néna uaa ji májkueni úni eska i kʼuiripu?”. Peru ístujtsï uaaka uánikua ambe jorhenguarhini ima kʼuiripuecheeri engaksï no tekaantstiipka (1 Sam. 13:8-14). Úpiringajtsï kurhamarhikuarhini: “¿Andiksïsï no tekaantstiipi? ¿Ambeksï úkuarhinchaspi engaksï ísï no tekaantstiipka?”.

16. ¿Ambe ka ambe jimbojtsïni marhuachesïni tekaantstiini?

¹⁶ Ju je eratsentani na engajtsïni xáni marhuachejka tekaantstiini. Tekaantskua, kánikuajtsïni jarhuatasïndi parachi tsípikua jingoni irekani ka parachi no sóntku ikiani. Kánikuajtsïni marhuachesïndi parachi no xáni pʼamenchani ka ístu parachi sési pʼikuarhenhini. Ístu, jarhuatasïndijtsïni parachi sánderu sési pájperani máteruecha jingoni ka paraka kúnguarhikua májku kʼéri jauaka. Engachi jucha no sóntku ikiaska enga nema uaaka o uandani ambe ma engachi jucha no tsitijka, nóchi sánderu kʼéri uaaka problemani (Sal. 37:8, nota; Prov. 14:29). Joperu ambe engajtsïni jimbo sánderu marhuachejka tekaantstiini, jindeesti eskachi májkueni úni jarhasïnga eska juchaari Taati auandarhu anapu ka sánderuchi andarhierasïnga imani.

17. ¿Ambechi eratsetixaki úni?

¹⁷ Eskachi na exekia, tekaantskua sési jásï kualidadi máesti ka kánikuajtsïni marhuachesïndi. Nájkiruka no méntkisï fásiliika tekaantstiini, Tata Diosï Jeobajtsïni jarhuataati xarhatani ini kualidadini. Ka engachi jamberi erokuarhini jauaka tekaantskua jingoni eska niáraaka jimbanhi parhakpini, uaakachi seguru jarhani eska “Tata Diosï Jeobaeri éskuechaksï imeechani exeaxa[ka] engaksï janhanharhijka, imeechani engaksï mintsikajka imeeri ambakiti uékperakuani” (Sal. 33:18). Ísï jimbo, iáminduechachi jatsiska para seguiriini jarhani tekaantstiini.