SEMANA 33
PIREKUA 130 Ju je puátsperantani
Ísï eska Tata Diosï Jeoba na exeajka imeechani engaksï pekadu ambe újka, kúnguarhikuajtu jatsisti para májkueni exeani
“Enga nema pekadu ambe niátaska, jatsiskachi nemani engajtsïni jarhuatajka” (1 JUANU 2:1).
AMBE ENGACHI JORHENGUARHIAKA
Jorhenguarhiakachi ambe engaksï úpka Korintu anapu erachiicha jiáni enga erachi ma k’eri pekadu ma úpka.
1. ¿Ambe uékasïni Tata Diosï Jeoba eskaksï uaaka kʼuiripuecha?
KʼUIRIPUECHACHI jatsiska sésikua para jandiajku exeni ambechisï uaa jimbokajtsïni Tata Diosï Jeoba ísï kueraaska ka pauani pauanchi exeni jarhasïnga ambechisï uaa. Joperu, ambe enga uéjka Tata Diosï Jeoba eskaksï iámindu kʼuiripu uaaka, jindeesti xarhatani eska uékasïnga imani marhuakuni ka imeeri familia jingoni kuenta úkuarhini. Ka Tata Diosï Jeoba indeni ambe uékasïndi jimboka xénchaasïnga kʼuiripuechani ka uékasïndi eskaksï sési irekuarhiaka. Ístu uékasïndi eskaksï kʼuiripuecha sési pájperaaka imani jingoni ka irekanksï para méntkisï (Deut. 30:19, 20; Gal. 6:7, 8).
2. ¿Ambe uékasïni Tata Diosï Jeoba eskaksï uaaka imeecha engaksï no sési ambe niátaka ka engaksï no moántani jaka? (1 Juanu 2:1).
2 Tata Diosï Jeoba no nemani obligarisïndi para imani marhuakuni, sánderu sési, jurajkusïndi eska mándani kʼuiripu erakuaka sini marhuakua o nómbe. Joperu, ¿ambe úkuarhisïni imani erachi o pirenchi jingoni enga k’eri pekadu ma újka? Petanhantasïndi kúnguarhikuarhu enga no móantaaka (1 Kor. 5:13). Ka nájkiruka nóteru kúnguarhikua jingoni kuenta úkuarhijkia, Tata Diosï Jeoba uékasïndi eska ima andarhientaaka. Tata Diosï Jeoba jimbosï íntspiti imeeri Uájpeeri tsípikuani para úni puákuantaani imeechani engaksï moántajka (arhinta je 1 Juanu 2:1). Juchaari Tata Diosï kánikua xénchpesïndi jimbosï uéjti jarhuatani imeechani engaksï no sési ambe niátajka ka arhiani eskaksï moántaaka (Zac. 1:3; Rom. 2:4; Sant. 4:8).
3. ¿Ambechi exea ini jorhenguarhikua jimbo?
3 Tata Diosï Jeoba uékasïndi eskachi jucha májkueni exeauaka pekaduechani ka imeechani engaksï k’eri pekadu ma niátajka ísï eska ima na exeajka. Ini jorhenguarhikua jimbochi exeni jauaka nénachi uaa ísï úni eska Tata Diosï. Orheta, ju je exeni ambe enga úkuarhipka primeru siglurhu. Korintu anapu kúnguarhikuarhu, kʼuiripu ma jarhaspti enga k’eri pekadu ma niátani japka. Tátsekuachi exeaka na enga arhiapka apostoli Pablu eskaksï jatsispka para kámani imani kʼuiripuni enga moántapkia. Ka últimu, exeni jauakachi na enga exeajka Tata Diosï Jeoba imeechani engaksï k’eri pekadu ma niátajka.
AMBE ENGA ÚPKA KORINTU ANAPU KÚNGUARHIKUA JIÁNI ENGA ERACHI MA ÍSKU JANDIKUA AMBE NIÁTAPKA
4. ¿Ambe úkuarhixapi Korintu anapu kúnguarhikuarhu? (1 Korintu 5:1, 2).
4 (Arhinta je 1 Korintu 5:1, 2). Jiáni enga apostoli Pablu ménderu nípka kúnguarhikuechani pʼorhembiani, para tanimu úni jámania, niáraspti míteni eska kristianu ma jarhaspka enga ísku jándikua ambe niátani japka taati jémbeeri uarhiti jingoni. I ambe imani kúnguarhikuarhu úkuarhixapti enga apenasi uaxastanhapka Korintu. Enga apostoli Pablu ini ambe mítepka, uandaspti eskaksï “ni imeecha jamberi engaksï no jakajkutiika niátajka xáni ikichakueni jásï ambe”. Joperu kúnguarhikua peeka no no sési exeenga indeni ambe ka nóksï ambe ma arhini imani achamasïni. Ka jamberiksï máru eratsendi: “Tata Diosï kánikua pʼamojpitiisti ka kurhangusïndi eskachi no perfektueska”. Joperu Tata Diosï Jeoba méntku no sáni jaiapanhentasïndi eska imeeri iretarhu pekadu ambe úkuarhini jauaka. Korintu anapu achamasï kánikua no sési pakatani japti kúnguarhikuani ka ístu máteru kristianuechani pájtamaani japti imani ambe jimbo enga úni japka. Ísï jimbo, ¿ambe arhiaspi apostoli Pablu Korintu anapu erachiichani?
5. ¿Ambe karakuspi apostoli Pablu kúnguarhikuani ka ambe arhikuekaxapi imani ambe jingoni? (1 Korintu 5:13 ístu exe je imajenini).
5 (Arhinta je 1 Korintu 5:13). Espiritu santu jimbo, apostoli Pablu karakuaspti Korintu anapu erachiichani eskaksï petantapiringa kúnguarhikuarhu imani achamasïni enga no móantani japka. Jiájkani, ¿nénaksï jatsispi para kámani imani achamasïni? Apostoli Pablu arhiaspti eskaksï nóteru kúnguarhipiringia imani achamasï jingoni nisikiera para tʼireni (1 Kor. 5:11). Engachi jucha tʼirejka nemani jingoni, sáno méntkisïchi uandontskuarhesïnga imani kʼuiripu jingoni ka májku kʼérichi jarhasïnga. Ísï jimbo, ambe enga apostoli Pablu arhiapka imani kristianuechani, jindeespti eskaksï no jámapiringa imani achamasï jingoni kúnguarhini, ka ísïksï erachiicha no niárapirindi májkueni jámani eska ima achamasï (1 Kor. 5:5-7). Ístu, engaksï erachiicha nóteru kúnguarhipiringia imani achamasï jingoni, jarhuatapirindiksï kuenta íntskukuarheni eska no sési pʼikuastaspka Tata Diosï Jeobani, eska no sési p’ikuarherapiringa imani ambe jimbo enga úpka ka eska niárapiringa moántani.
Espiritu Santu jimbo, Pablu karakuaspti Korintu anapuechani eskaksï petantapiringa kúnguarhikuarhu imani achamasïni enga no moántani japka. (Exe je párrafu 5).
6. ¿Néna jarhuataspi kúnguarhikua anapu erachiichani ima karta enga apostoli Pablu karakuapka ka ambe úspi ima achamasï enga ísku jándikua ambe niátani japka?
6 Ísï tátsekua enga apostoli Pablu na karakuapkia Korintu anapu erachiichani, jamberi kurhamarhikuarhipti sinksï imeecha kurhajchapi o nómbe. Ísï tátsekua, niáraspti míteni eskaksï erachiicha kurhandiraspka ka ísï úni eska Pablu na arhiapka (2 Kor. 7:6, 7). Ístu, ísï sáni tátsekua enga na karakuapkia imani kartani, ima achamasï móantaspti. Mójtakurhispti ka nóteru ísï jámasïrendia eska antesi, ka ueenaspti kurhajchani Tata Diosï Jeobani (2 Kor. 7:8-11). ¿Iásï ambe karakuapirinia apostoli Pablu enga mítepkia eska ima achamasï mójtakurhispkia?
NÉNA JATSISPIA PARA KÁMANI KORINTU ANAPU KÚNGUARHIKUA IMANI ACHAMASÏNI ENGA MOÁNTAPKIA
7. ¿Ambe úkuarhispi enga ima achamasï ísï petanhantapka kúnguarhikuarhu? (2 Korintu 2:5-8).
7 (Arhinta je 2 Korintu 2:5-8). Apostoli Pablu arhiaspti: “Sésku jatiia indeni jingoni engajtsï chá sáno iáminduecha xukaka indeni achamasïni”. Jo, ima achamasï niárasptia moántani jimboka xukanhaspka o petanhantani kúnguarhikuarhu (Ebr. 12:11).
8. ¿Ambe arhiaspi apostoli Pablu Korintu anapu erachiichani?
8 Tátsekua, apostoli Pablu arhiaspti erachiichani na engaksï jatsipkia para kámani ima achamasïni, arhiaspti: “Joperujtsï iásï jatsiska para mintsita jingoni puákuntani ka sési pʼikuastantani”. Ka ístu arhiaspti eskaksï arhipiringa imani achamasïni eskaksï xénchasïreenga. Jo, apostoli Pablu no solu uékasïreendi eskaksï erachiicha jióntapiringa kúnguarhikuarhu, sino ístu eskaksï arhipiringa eskaksï puákuntaspkia ka xarhatakuni eskaksï uékasïreenga. Ka ísï, ima achamasï úpirindi exeni eskaksï erachiicha kánikua tsípixapka enga ima kʼuanhatsentapkia.
9. ¿Andiksïsï máru úpirini úkua jukanchani puákuntani imani achamasïni?
9 Nájkiruka Biblia no arhijka sini máru erachiichaksï úkua jukanchapi puákuntani imani achamasïni, jamberiksï máru kánikua úkua jukanchapti. Ima achamasï iámu kúnguarhikuanisï no sési úkuni japti ka sánderia máru kʼuiripuechani. Jamberi ima erachiicha engaksï kánikua jánguarhintani japka kurhajchani Tata Diosï Jeobani exepti ambe enga úpka ima achamasï ka eratsenksï: “¿Andichisï jatsi para xáni sési jióntani indeni kʼuiripuni enga xáni no sési ambe úka?” (terukutanta je Lukasï 15:28-30). Joperu ¿andisï xáni jukaparhakuepi eskaksï erachiicha xarhatakupiringa imani achamasïni eskaksï puákuntaspkia?
10, 11. Engaksï orhejtsïkutiicha no puákuntapiringa o jióntani imani achamasïni, ¿ambe úpirini úkuarhini?
10 Engaksï kúnguarhikuarhu anapu orhejtsïkutiicha no jióntapiringa imani achamasïni oksï erachiicha no xarhatakuni xénchperakua nájkiruka ima móantapkia, ¿néna pʼikuarherapirini? Jamberi úpirindi kánikua “kómu pʼikuarherani jarhani ka niárani kuatantani”. Jamberi niárapirindi eratseni eska nóteru méni úpiringia marhuakuni Tata Diosï Jeobani ka nóteru uékania sési pájperantani imani jingoni.
11 Joperu ¿ambe úkuarhipirini kúnguarhikuarhu anapu erachiicha jingoni engaksï no puákuntapiringa imani achamasïni enga moántapkia? Jamberiksï nóteru úpirindia sési pájperani Tata Diosï Jeoba jingoni. ¿Andi? Jimbokaksï no májkueni jámani japiringa eska Tata Diosï Jeoba enga listu jarhajka para puákuantani imeechani engaksï moántajka, sinoksï ísï jámani japirindi eska Noambakiti enga no sáni pʼamojpejka ka no sési kámpini. Ístu, Noambakiti úpirindi úraani ini erachiichani paraka ima achamasï nóteru méni marhuakupiringia Tata Diosïni (2 Kor. 2:10, 11; Éfes. 4:27).
12. ¿Néna úpirini májkueni jámani Korintu anapu kúnguarhikua ísï eska Tata Diosï Jeoba?
12 Jiájkani, ¿néna úpirini Korintu anapu kúnguarhikua májkueni jámani eska Tata Diosï Jeoba ka no ísï eska Noambakiti? Imeechaksï jatsispti para májkueni jámani eska Tata Diosï Jeoba ka puákuantani imeechani engaksï sési jimbo moántapiringa. Ju je exeni ambe engaksï uandapka Tata Diosïiri ambe máru kʼuiripuecha engaksï Bibliani karapka. Rei Dabidi uandaspti: “Jimboka t’u, Tata Jeoba, ambakitiiskari ka jingontkuri jarhaska para puátspentani” (Sal. 86:5). Mikeasi karaspti: “¿Jarhaski máteru Tata Diosï enga ísïika eska t’u, enga puátspentajka ka no méntku miáni jarhani enga nema no sési ambe újka?” (Miq. 7:18). Ka ístu, Isaíasi uandaspti: “Eska ima kʼuiripu enga no sési úrika jurajkuaka imeeri xanharuni ka no ambakiti kʼuiripu imeeri eratsekuechani; [ka] eska kʼuanhatsentaaka Tata Diosï Jeoba jingoni, enga pʼamojperata xarhatakuaka, eska kʼuanhatsentaaka juchaari Tata Diosï jingoni, jimboka ima kánikua puákuntaaka” (Is. 55:7).
13. ¿Andisï sési japi eskaksï orhejtsïkutiicha jióntapiringa achamasïni? (Exe je rekuadruni “ ¿Na jatini niáraspi kʼuanhatsentani kúnguarhikuarhu Korintu anapu achamasï?”).
13 Para úni májkueni jámani eska Tata Diosï Jeoba, Korintu anapu kúnguarhikua jatsispti para jióntani ka xénchperakua xarhatakuni imani achamasïni enga moántapkia. Ka engaksï erachiicha puákuntapiringa imani achamasïni, ísïksï úni japirindi eska Pablu na arhiapka (2 Kor. 2:9). Ísïisti, máru kutsïichajkuksïsï nitamapti desde enga ima achamasï petanhantapka kúnguarhikuarhu ka enga ménderu kʼuanhatsentapka. Ísï jimbo, no ma rasoni jarhaspti parakaksï orhejtsïkutiicha no uékapiringa jióntani imani achamasïni enga móantapkia.
AMBE ENGACHI JORHENGUARHIJKA NA ENGA TATA DIOSÏ JEOBA JURHIMBIKUA JINGONI KÁMPIJKA KA NA ENGA P’AMOJPIJKA
14, 15. ¿Ambejtsïni jorhendasïni ima ambe engaksï orhejtsïkutiicha úpka imani achamasï jingoni enga kʼéri pekadu ma úpka? (2 Pedru 3:9; ístu exe je imajenini).
14 Tata Jeoba kararkuarhisti imani ambe enga Korintu anapu kúnguarhikuarhu úkuarhipka parajtsïni juchantsïni jorhendani (Rom. 15:4). I ambejtsïni jorhendasïndi eska Tata Diosï Jeoba no sáni jaiapanhentasïnga enga nema k’eri pekadu ma újka imeeri kúnguarhikuarhu. Nájkiruka Tata Diosï kánikua pʼamojpitiika, no jurajkusïndi eska pekadori ma seguiriini jauaka imeeri kúnguarhikuarhu ka no móantani jarhani. Tata Diosï Jeoba kánikua pʼamojpitiisti, joperu inde ambe no arhikuekasïndi eska ima kénditauaka imeeri juramukuechani paraka ma uaaka ambe enga uékaaka (Jud. 4). Enga Tata Diosï Jeoba jurajkuni japiringa eska pekadori útasï kúnguarhikuarhu jauaka no xarhatani japirindi pʼamojperakua jimboka ima kʼuiripu no sési úkuni japirindi iámu kúnguarhikuani (Prov. 13:20; 1 Kor. 15:33).
15 Enga Korintu anapu achamasï na móantapkia ka mójtakurhini, Tata Diosï Jeoba apostoli Pabluni úraspti para arhini kúnguarhikuani eskaksï jióntapiringa ka puákuntani. Ísï jimbo, i ambejtsïni jorhendasïndi eska Tata Diosï Jeoba no uékasïnga eska nema uarhiaka, sánderu sési, ima uékasïndi eskaksï uánikua kʼuiripuecha tsípiti pakaraaka. Ima pʼamojkuasïndi imeechani engaksï mójtakurhijka ka jánguarhintanksï ménderu Tata Diosïiri amigueni (Ezeq. 33:11; arhinta je 2 Pedru 3:9).
Engaksï kúnguarhikuarhu anapu erachiicha sési eroantajka imeechani engaksï ménderu erachijkia o pirenchiini ka xarhatakuani xénchperakua ka pʼamojperakua, májkuenksï úni jarhasïndi eska Tata Diosï Jeoba. (Exea je párrafuechani 14 ka 15).
16. Engajtsï eratsentajka indeni ambe enga Korintu anapu kúnguarhikuarhu úkuarhipka, ¿ambejtsï jorhenguarhisïni Tata Diosï Jeobaeri ambe?
16 Exeni ambe enga úkuarhipka Korintu anapu kúnguarhikuarhu, jarhuatasïndijtsïni exeni eska Tata Diosï Jeoba xénchpesïnga ka eska jurhimbitku jusgarpisïnga (Sal. 33:5). Míteni na enga jásïika juchaari Tata Diosï úsïndi eskachi jucha mintsita jingoni uékaaka k’eri ambe arhini. No ma kʼuiripu jarhasti enga perfektueka. Ísï jimbo, iáminduechachi uétarhinchasïnga eskajtsïni ima puáchentaaka. Juchachi kánikua agradesidu jarhaska enga Tata Diosï íntspika imeeri Uájpeeri tsípikuani parajtsïni úni puácheantani juchaari pekaduechani. Kánikuajtsïni sési pʼikuastantasïndi míteni eska Tata Diosï Jeoba mintsita jingoni xénchaasïnga imeeri marhuariichani. Ima uékasïndi eskachi méntkisï sési irekuarhiaka.
17. ¿Ambechi jorhenguarhini jaua máteru semaneecha jimbo?
17 Ini jurhiatikuecha jimbo, ¿orhejtsïkutiichaksï néna májkueni úsïni eska Tata Diosï Jeoba para jarhuatani moántani imani kʼuiripuni enga kʼéri pekadu ma úka? Ka ¿ambechi jatsiski para úni engaksï orhejtsïkutiicha uandaaka eska nema jatsiska para petanhantani kúnguarhikuarhu?, o ¿ambechi jatsiski para úni engaksï orhejtsïkutiicha uandaaka eska nema ménderu Jeobaeri testigueskia? Ini ambechi exeni jauaka máteru semaneecha jimbo.
PIREKUA 109 Ju je mintsita jingoni uékperani
