SEMANA 32
PIREKUA 44 Kómarhikua ma
Tata Diosï Jeoba uékasïndi eskaksï iáminduecha móantaaka
‘Tata Diosï Jeoba no uékasïndi eska nema kʼamajkunhaaka, sino eskaksï iámindu kʼuiripuecha móantaaka’ (2 PED. 3:9).
AMBE ENGACHI JORHENGUARHIAKA
Jorhenguarhiakachi ambeeski móantani, andisï uétarhijki móantani ka néna jarhuataskia Tata Diosï Jeoba kʼuiripuechani paraksï móantani.
1. ¿Ambe úsïni kʼuiripu enga sési jimbo móantajka?
Engachi niárajka imani ambe úni enga no sési jaka, kánikua jukaparhakuesti eskachi móantaaka. Biblia uandasïndi eska ima kʼuiripu enga sési jimbo móantajka, úndasïndi kurhunhini ka nóteru úsïndia imani ambe enga úpka (exe je Glosariuni “arrepentimiento”).
2. ¿Andichisï jatsi para iáminduecha sési jimbo móantani? (Nehemías 8:9-11).
2 Jimbokachi iáminduecha Adáni ka Ebaeri uájpeeska iáminduechachi pekarisïnga ka uarhini. Ísï jimbo iáminduechachi jatsiska para jorhenguarhini sési jimbo móantani, jimbokachi pauani pauani no sési ambe úsïnga (Rom. 3:23; 5:12).Iáminduecha niárasïnga no sési ambe niátani. Asta ima kʼuiripuecha engaksï kánikua mintsinharhienga Tata Diosïni, komueska apostoli Pablu, jatsisptiksï para kánikua jánguarhintani ka pʼíngukuarhini paraksï no imani ambe niátani enga no sési jaka (Rom. 7:21-24). Joperu inde ambe no arhikuekasïndi eskachi chúskutaaka no sési pʼikuarherani jimbokachi pekadoriiska. Tata Diosï Jeoba kánikua sési kámpisïndi ka uékasïndi eskachi jucha tsípikua jingoni irekaaka. Ju je eratseantani judiuechani engaksï Neemíasiiri jurhiatikuecha jimbo irekapka (arhinta je Nehemías 8:9-11). Tata Diosï Jeoba no uékasïreendi eskaksï jukari no sési pʼikuarherapiringa imeecheeri pekaduecha jimbo, sino eskaksï tsípikua jingoni marhuakupiringa. Imajtsïni jorhendasïndi nénachi uaa móantani jimboka mítesti eskachi kánikua sési pʼikuarheraaka engachi ísï uaaka. Seguruchi jarhaska eska juchaari Taati enga xáni sési kámpijka, puácheantauaka pekaduechani engachi sési jimbo móantaska.
3. ¿Ambechi exeni jaua ini jorhenguarhikua jimbo?
3 Ini jorhenguarhikua jimbo exeni jauakachi ambe arhikuekasïni sési jimbo móantani. Orheta exeakachi na jorhendaapka Tata Diosï Jeoba ireta Israelini ambe enga arhikuekajka móantani. Tátsekuachi exeaka na enga Tata Diosï jarhuataaka kʼuiripuechani paraksï móantani. Ka últimu exeakachi ambe engaksï jorhenguarhipka Jesúsiiri chúxapatiicha, ambe enga arhikuekajka móantani.
TATA JEOBA JORHENDASÏNDI IRETA ISRAELINI AMBE ENGA ARHIKUEKAJKA MÓANTANI
4. ¿Ambe jorhendaaspi Tata Diosï Jeoba israeliteechani ambe enga arhikuekajka móantani?
4 Enga Tata Diosï Jeoba erakuapka israeliteechani paraksï imeeri ireteeni, pakatperakua ma úpti imeecha jingoni. Tata Jeoba aiakuaspti eska kuájchakuapiringa ka eska méntkisï újchakurapiringa engaksï imeecha kurhajchaapiringa imeeri juramukuechani. Ka arhiaspti: ‘Jimboka i juramukua engakeni íntskuni jaka iásï, no kánikua úkua jukasti para tʼu, ka níjtu iauani jaki’ (Deut. 30:11, 16). Peru engaksï imeecha imani ambe úpiringa enga no sési jaka ka nóteruksï kurhajchania, Tata Diosï Jeoba nóteru jaiapanheantapirindia ka no sésiksï nitamakuarhipirindi. Joperu inde ambe no arhikuekasïreendi eska nóteru puákuantapiringuia, jimboka lei uandasïreenga eskaksï úpiringa kʼuanhatsentani ka andarhierantani Tata Diosï Jeobani (Deut. 30:1-3, 17-20). Ísï jimbo úpirindiksï móantani ka Tata Diosï Jeoba jurajkuapirindi paraksï andarhientani ka ménderu újchakuraani.
5. ¿Néna jarhuataaspi Tata Diosï Jeoba imeeri iretani? (2 Reyes 17:13, 14).
5 Ima ireta enga Tata Diosï Jeoba erakupka, méntkuksï úndaspti no kurhajchani ka máteru diosïichanksï kómarhiasïreendi. Ístuksï uánikua ambe úspti enga kánikua no sési japka. Ísï jimbo, kánikuaksï no sési nitamakuarhispti. Joperu Tata Diosï Jeoba no jurajkuaspti, axaaspti profetechani para jarhuataani eskaksï móantapiringa ka eskaksï kʼuanhatsentapiringa Tata Diosï Jeoba jingoni (arhinta je 2 Reyes 17:13, 14).
6. ¿Néna úraaspi Tata Diosï Jeoba profeteechani para jorhendaani israeliteechani na enga xáni jukaparhakueka móantani? (Ístu exe je imajenini).
6 Engaksï israeliteecha no kurhajcheenga Tata Diosï Jeoba, ima profeteechani axaasïreendi para arhiani ambe engaksï úkuarhinchapiringa engaksï no móantapiringa ka ístu para jurhimberantaani. Pori ejemplu, arhiaspti Jeremíasini úraparini: “Oh Israeli engari xáni no kurhandirajka, kʼuanhatsenta […]. Nóksïni jatanhechiaka jimbokani jurhimbitku jámasïnga […]. Nóksïni ikiacheaka para méntkisï. Joperu exekuarhi eskari no sési úska jimbokari jurajkuska chiiti Tata Diosï Jeobani ka nóri kurhajchaska” (Jer. 3:12, 13). Ka ístu arhiaspti Joelini úraparini: “Kʼuanhatsenta je iámu chaari mintsita jingoni” (Joel 2:12, 13). Ístu úspti eska Isaíasi arhiapiringa: “Juparhikuarhinta je, kénditaa je indeni no sési jásï ambe engajtsï úni jaka juchiiti orhepani jimbo ka ásteru niáta je indeni no sési jásï ambe” (Is. 1:16-19). Ka Esekielini úraparini kurhamarhiaspti: “¿Andi ji sési pʼikuarherasïni enga nema uarhijka nájkiruka no sési úrika? […]. ¿Andi no sánderu sési pʼikuarherasïnga eska jurajkuaka imani ambe enga újka ka eska seguiriuaka tsípikua jatsini?”. “Ji no sáni sési pʼikuarherasïnga enga nema uarhijka […]. Ísï jimbo kʼuanhatsenta je jíndeni jingoni parajtsï sési irekuarhini” (Ezeq. 18:23, 32). Tata Diosï Jeoba kánikua sési pʼikuarherasïndi engaksï kʼuiripuecha móantajka jimboka uékasïnga eskaksï irekuarhiaka para méntkisï. Ima jarhuataasïndi kʼuiripuechani, no ísku erokuarhini jarhasïndi astaka kʼuiripu ma eratseaka kʼuanhatsentani para jarhuatani. Ju je exeani máteru ejempluechani.
Tata Diosï Jeoba uánikua profetechani úraspti para jarhuataani imeeri iretarhu paraksï moántani. (Exea je párrafuechani 6 ka 7).
7. ¿Ambe jorhendaaspi Tata Diosï Jeoba imeeri iretani Oseasiiri ejempluni úraparini ka imeeri témbeeri?
7 Ju je exeni na enga Tata Diosï Jeoba profeta Oseasini úrapka ka imeeri témbani Gómerini para ambakiti ambe jorhendaani imeeri iretani. Gómeri ísku jándikua ambe niátaspti ka tátsekua jurajkuspti Oseasini para máteru acheetiicha jingoni nirani. Enga ima ini ambe úpka, ¿Tata Diosï Jeoba ísï exespi eska Gómeri no méni úpiringa móantani? Ima exesïndi ambe enga mintsitarhu jaka, jimbosï arhipti Oseasini: “Ni ménderu, xéncha imani uarhiitini enga máteru acheeti xénchajka ka enga ísku jándikua ambe niátani jaka, ísï eska Tata Diosï Jeoba na xénchajka ireta Israelini nájkirukaksï imeecha máteru diosïicha jingoni kʼuanhatsentaka” (Os. 3:1; Prov. 16:2). Nájkiruka Gómeri útasï ísku jándikua ambe niátani japka, Tata Diosï Jeoba arhispti Oseasini eska puákuntapiringa ka eska pʼikuntapiringa. a Indeni ejemplu jingoni, Tata Diosï Jeoba exeraspti imeeri iretani eska puákuantapiringa nájkirukaksï imeecha útasï kánikua no sési niátani japka. Tata Diosï Jeoba seguirixapti xénchaani, jimbosï profetechani axauendi para jarhuataani móantani ka paraksï nóteru no sési ambe niátania. I ambejtsïni jorhendasïndi eska Tata Diosï Jeoba, sési mítesïnga kʼuiripuni ma ka eska jarhuatasïnga paraka móantaaka nájkiruka útasï no sési ambe niátani jauaka (Prov. 17:3). Ju je exeni néna jarhuajpesïni Tata Diosï Jeoba.
NÉNA JARHUATASÏNI TATA DIOSÏ JEOBA PEKADORINI MA MÓANTANI
8. ¿Ambe úspi Tata Diosï Jeoba para jarhuatani Kaínini móantani? (Génesis 4:3-7). (Ístu exe je imajenini).
8 Adáni ka Eba Kaíninksï ueenaspti kánguarhini ka imajtu kérikuarhispti pekaduni. Biblia uandasïndi eska Kaíni “no sési ambe niátasïreenga”. Jamberi indeni ambe jimboepti enga Tata Diosï Jeoba “no jaiapanhentapka Kaínini níjtu imani ambe enga ima kéjtsïtakupka” (1 Juanu 3:12). Ka enbesi de mójtakurhini, Kaíni ikiaspti ka no sési pʼikuarheraspti. ¿Ambe úspi Tata Diosï Jeoba enga inde ambe úkuarhipka? Uandontskuarhekuspti (arhinta je Génesis 4:3-7). Tata Diosï Jeoba xénchperakua jingoni arhispti eska ménderu úpiringa sési pájperani imani jingoni ka ístu arhispti eska kánikua no sési nikupiringa enga ima no mójtakurhipiringa. Joperu Kaíni no mójtakurhispti nijtu uékapi kurhajchani Tata Diosï Jeobani. ¿Néna exespi Tata Diosï Jeoba enga Kaíni ísï jámapka? ¿Eratsespi eska nóteru nemani jarhuatapiringuia para móantani? ¡Nómbe!
Tata Diosï Jeoba uékperakua jingoni jánhastaxapti Kaínini, arhispti eska ménderu úpiringa sési pájperantani imani jingoni ka ístu arhispti eska kánikua no sési nikupiringa enga ima ni mójtakupiringa. (Exe je párrafu 8).
9. ¿Néna jarhuataspi Tata Diosï Jeoba Dabidini paraka móantapiringa?
9 Tata Diosï Jeoba kánikua xénchasïreendi rei Dabidini, jimbosï uandapti: “Achamasï máesti enga kánikua sési pʼikuastajka juchiiti mintsitani” (Úku. 13:22). Joperu Dabidi kʼérati pekaduechani uaaspti. Pori ejemplu ísku jándikua ambe niátaspti ka uándikpispti, ísï jatsispti para jatsispti para uándikunhani jimboka Moisésiiri lei ísï uandasïreenga (Lev. 20:10; Núm. 35:31). Joperu Tata Diosï Jeoba enga xáni xénchpetiika no uékaspti eska indeni ambe úkuarhipiringa. Jimbosï profeta Natáni axapti para imani jingoni uandontskuarheni, nájkiruka Dabidi no na pʼikuarherani japka imani ambe jimbo enga úpka. b Natáni ejemplu ma úraspti para mintsitarhu niárakuni Dabidini ka ima kurhanguspti eska kʼéri pekadu ma úspka Tata Diosï Jeobani japarini ka móantaspti (2 Sam. 12:1-14). Tátsekua sési jásï pirekua ma karaspti nani enga xarhatajka na enga xáni no sési pʼikuarhereenga (Sal. 51, encabezamiento). Ka desde iónisïa, inde salmo uánikua kʼuiripuechani sési pʼikuastantastia ka jarhuatani paraksï móantani. ¿A no eskachi kánikua sési pʼikuarherasïnga enga Tata Diosï Jeoba uékperakua jingoni jarhuatapka Dabidini paraka móantapiringa?
10. ¿Chá na pʼikuarherasïni míteni eskajtsïni Tata Diosï Jeoba tekaachintasïnga ka puáchentani?
10 Tata Diosï Jeoba méntku no ma pekaduni jaiapanhentasïndi ima iámindu kurhunhiasïndi (Sal. 5:4, 5). Joperu jimbokajtsïni ima xénchasïnga ka ístu mítesti eskachi jucha pekadoriiska, imajtsïni uékasïndi jarhuatani parachi no niárani pekadu ambe niátani. Ima jarhuatasïndi pekadoriichani, asta imeechani engaksï kánikua no sési ambe niátajka ka uékasïndi eskachi andarhientaaka ka móantani. ¡Míteni indeni ambe kánikuajtsïni sési pʼikuastantasïndi, a no! Engachi jucha eratsentaska na enga xáni tekaantstiika ka puátspentani, inde ambejtsïni jarhuatasïndi parachi no jurajkuni Tata Diosï Jeobani ka eskachi jirejiresï móantaaka engachi pekadu ambe niátaska. Iásï ju je jorhenguarhini ambe enga úpka Jesúsi para jorhendaani imeeri chúxapatiichani ambe enga arhikuekajka móantani.
JESÚSIIRI CHÚXAPATIICHAKSÏ JORHENGUARHISPTI ESKA JUKAPARHAKUESKA MÓANTANI
11, 12. ¿Náki ejempluni uandantaspi Jesúsi para xarhatani eska imeeri taati jémba jingontku jarhasïnga para puátspentani? (Ístu exe je imajenini enga rebistarhu ueenakuarhu jaka).
11 Enga niárapkia tiempu paraka Mesíasi janopiringa Echerirhu, Tata Diosï Jeoba Juanuni úraspti, imani enga itsï atauenga kʼuiripuechani para jorhentpini eska kánikua jukaparhakueska móantani. Ka enga Jesúsi jámani japkia aianhpini, imajtu májkueni ambe jorhentpispi, eska kánikua jukaparhakueska móantani (Mat. 3:1, 2; 4:17).
12 Enga Jesúsi aianhpini jámani japka, jorhendaspti kʼuiripuechani eska Taati jémba jingontku jarhasïnga para puátspentani. Ka ejemplu ma úraspti uájpeeri ma enga tsïnchepka, para jarhuataani kʼuiripuechani sési kurhanguni. Uandantaspti eska ima tumbi nóteru uékaspkia imeeri kʼumanchikuarhu jarhani ka eska iauanisï niraspka ka tsïnchentani no sési jásï ambe niátani. Joperu eska tátsekua “sési eratsentaspka” ka kʼuanhatsentani imeo. ¿Ambe úspi taati jémba? Jesúsi uandasïndi eska enga i tumbi “útasï iauanisï jurhani japka, taati jémba mítentaspka ka eska kánikua pʼamojkuspka uiripaspti kúmuni, kamapchakuspti ka uékperakua jingoni purinharhikuaspti”. I tumbi niraxapti arhini taati jémbani eska imeeri jántspiri úpiringa. Joperu taati jémba mintsita jingoni uékasïreendi puákuntani ka ménderu jióntaspti imeeri familiarhu. Uandaspti: ‘Juchiiti tataka tsïnchetixapti ka exentaskachia’ (Luk. 15:11-32). Ante de Jesúsi Echerirhu jurhani, ima uánikua xanhari exespti na enga Tata Diosï Jeoba pʼamojkuauenga imani pekadoriichani engaksï móanteenga. Jimbosï Jesúsi úpti sési xarhatani na enga xáni pʼamojpejka juchaari Taati.
Jesúsi uandantaspti ima uájpeeri enga tsïnchetini japka enga kʼuanhatsentapka kʼumanchikuarhu ka enga taati jémba uiriipapka kúmantani (Exea je párrafuechani 11, 12).
13, 14. ¿Néna niáraspi jorhenguarhini apostoli Pedru ambe enga arhikuekajka móantani ka ambe jorhentpespi indeeri ambe? (Ístu exe je imajenini).
13 Apostoli Pedru uánikua ambe jorhenguarhispti na enga Jesúsi puákuntauenga kʼuiripuechani engaksï móanteenga. Pedru uánikua xanhari no sési úspti ka Jesúsi méntkisï listu jarhaspti para puákuntani. Pori ejemplu, tanimu xanhari uandaspti eska no mítespka Jesúsini ka tátsekua kánikua no sési pʼikuarheraspti (Mat. 26:34, 35, 69-75). Joperu tátsekua enga Jesúsi na tsíntapkia xarhakuspti Pedruni, péringa jiáni imantku xarhakupka (Luk. 24:33, 34; 1 Kor. 15:3-5). Jesúsi mítespti eska Pedru móantaspkia, ísï jimbo, jiáni enga xarhakupka sési pʼikuastantapti ka arhipti eska puákuntaspkia (exe je Markusï 16:7 ka ístu notani para sánderu ambe jorhenguarhini “y a Pedro”).
14 Pedru kʼóru pʼikuarheraspti na enga jindeeka sési jimbo móantani ka puáminhantani, jimbosï úpti jorhendaani indeeri ambe máteru kʼuiripuechani. Ísï tátsekua, enga na Pentekostésiiri kʼuínchikua nitamapkia, uánikua judiuechani arhiaspti eskaksï uándikuspka Mesíasini, peru ístu xénchperakua jingoni arhiaspti: “Ísï jimbo móanta je ka andarhienta je Tata Diosïni parajtsï nóteru exeminhauakia chaari pekaduechani ka ísï úparini Tata Diosï Jeobaksïni sési pʼikuatantaati” (Úku. 3:14, 15, 17, 19). Ini ambe jingoni, arhikuekaxapti eskaksï imeecha engaksï móantajka, jatsiska para kʼuanhatsentani o ménderueni eratseni, nóteru imani ambe únia enga no sési jaka, sino imani ambe ueenani úni enga Tata Diosï jaiapanhentajka. Apostoli Pedru uandaspti eska Tata Diosï borrariuasïnga pekaduechani ka eska méntku kénditaasïnga. Ka ísï ióni jimbo, apostoli Pedru arhiaspti kristianuechani: “Imaksï tekachintaxati chánksïni, jimboka no uékasïnga eska nema kʼamajkunhaaka, sino eskaksï iámindu kʼuiripuecha móantaaka” (2 Ped. 3:9). ¡Kánikuachi tsípisïnga míteni eskajtsïni Tata Diosï Jeoba puáchintasïnga nájkirukachi kʼéri pekadu ma uaaka!
Apostoli Pedru móantasïndi ka Jesúsi puákuntaspti ka xarhatakuspti en enga xáni xénchajka. (Exe je párrafuechani 13, 14).
15, 16. a) ¿Néna jorhenguarhispi Pablu eska jukaparhakueska puátspentani? (1 Timoteu 1:12-15). b) ¿Ambechi exeni jaua máteru jorhenguarhikua jimbo?
15 Namunitu kʼuiripuestiksï engaksï niárajka ísï móantani eska Saulu Tarsu anapu. Ima xáni no sési kaaspti Jesúsiiri chúxapatiichani, ísï jimbo, uánikua kʼuiripuechaksï uandasïreendi eska ima no úpiringa mójtakurhini. Joperu Jesúsi no májkueni eratsesïreendi. Ima ka imeeri taati jémba ambakiti kualidadichanksï exekuaspti Sauluni. Jesúsi uandaspti: “Indeni achamasïni erakuska para juchiiti ambe uandantani” (Úku. 9:15). Asta milagru ma úraspti para jarhuatani móantani (Úku. 7:58–8:3; 9:1-9, 17-20). Tátsekua enga Saulu kristianu úkuarhipkia ka enga apostoli máepkia, grasiasi íntskuntaspti Tata Diosï Jeobani ka Jesúsini, jimbokaksï sési kámaspka ka pʼamojperakua xarhatakuni (arhinta je 1 Timoteu 1:12-15). Ma xanhari ima kánikua sési pʼikuarheraxapti jimbosï arhiapti erachiicha ka pirenchiichani: “¿Andi nóri exesïni eskakeni Tata Diosï kánikua sési kámasïnga ka eskakeni tekaachintaxaka? ¿Ka andi nóri exesïni eskakeni Tata Diosï sési jimbo jarhuataxaka parari móantani?” (Rom. 2:4).
16 Ma xanhari, apostoli Pablu mítespti eska Korintu anapu kúnguarhikuarhu, kʼuiripu ma jarhaspka enga ísku jándikua ambe niátani japka. ¿Ambe úspi Pablu para sési peentani indeni uandanhiatani? Ambe enga ima úpka, jorhendasïndijtsïni na enga xáni xénchpejka Tata Diosï Jeoba ka na engajtsïni jurhimberantajka, ka ístu na enga xáni jukaparhakueka pʼamojpeni. Joperu máteru jorhenguarhikua jimbochi exeaka ini ambe.
PIREKUA 33 Iámu ambe Jeobani jurajkuku
a Ambe enga úpka Oseasi jindeespti jimboka Tata Diosï Jeoba arhispka. Joperu ini jurhiatikuechani jimbo enga acheeti o uarhiti ma enganiarijka uámbani o témbani, Tata Diosï Jeoba no arhixati eska seguiriuaka imani jingoni irekuarhini. Jimbosï jurajkupti eska Jesúsi jorhentpipiringa eska ima uarhiiti o acheeti enga no no sési úrika, uaaka exeni sini diborsiarikuarhia o nómbe (Mat. 5:32; 19:9).
b Exe je artikuluni “¿Qué significa para usted el perdón de Jehová?”, rebistarhu La Atalaya 15 de nobiembri de 2012, pájineecha 21 a 23, párrafuecha 3 a 10 utusï jimbo.
