Apostoli Pablu arhiasti Tesalónika anapu kristianuechani: “Enga nema no uékaaka úni ambe engaksïni karachini jaka, chájtsï jatsiska para jingontku jámani indeni kʼuiripuni jingoni ka nóterujtsï kúrhinia paraka ima kʼuratseaka.” (2 Tes. 3:14). Ióntkichi ísï eratsesïreenga eskaksï solu orhejtsïkutiichanisï arhikuekani japka, joperu enga nema intsïnhenguia konseju ka ima no uékani ísï úni eskaksï Bibliarhu anapu konsejuecha na arhijka, orhejtsïkutiichaksï arhijtsïkperata ma nitamatarasïreendi paraka kúnguarhikua jingontku japiringa. Jiáni uératini, erachiichaksï nóteru pájperasïndia imani erachini jingoni, solu jiántkuksïsï uandajpeendi komu kúnguarhikuarhu ka aianhpikuarhu.

Joperu iásïchi kurhanguskia eska ambe enga apostoli Pablu uandapka, jindeeska ambe ma enga mándani erachi jatsi para erakuni ambe úni. Ísï jimbo nóteru uétarhisïndia eskaksï orhejtsïkutiicha nitamataraaka arhijtsïkperata ma ¿andi? Ju je exeni apostoli Pablu andisï ini ambe uandapi.

Apostoli Pablu arhiaspti eskaksï kúnguarhikuarhu jarhaspka máru erachiicha engaksï ‘no uékeenga kurhandini’. Ka ima íntsaaspti konsejuechani Tata Diosïiri uandakuani uráparini, joperu imeechaksï no kasu úsïreendi. Pori ejemplu, ma xanhari ima arhiaspti: “Ima enga no uéjka ánchikuarhini, ístu asï tʼiree”. Ka nájkiruka ima ísï arhiapka, máruksï no uékasïreendi ánchikuarhini paraksï kéndakuarhini nájkirukaksï úpiringa ísï úni ka ístuksï méntku inchakukuani jarhasïreendi máteruechani ¿Nénaksï jatsipirini paraksï kamani erachiicha imani kʼuiripuni? (2 Tes. 3:6, 10-12).

Apostoli Pablu uandaspti, karachixakaksïni eskajtsï no jámaaka kurhini imani erachini enga ‘no uékajka kurhandini’. Uandakua griegu jimbo úpiringachi ísï kurhanguni komueska jingontku jámani indeni erachiicha jingoni, parajtsïni no pájtamani. Apostoli Pablu iámu kúnguarhikuanisï arhini japti no solu orhejtsïkutiichani (2 Tes. 1:1; 3:6). Jiájkani enga erachi ma kuenta ínskukuarhipirhinga eska máteru erachi no ísï jámasïnga eska na uandajka Tata Diosïiri karakata, ima jandiajku jatsipirindi para erakuni sini seguiriua pájperani imani erachini jingoni o nóteria.

¿Arhikuekaxapi eskaksï jatsispka para májkueni kamani eska imani enga kúnguarhikuarhu petanhantaajka? Nómbe, jimboka apostoli Pablu ístu uandaspti: “Seguirii je arhistakuni jimboka chaari erachiiska”. Ísï jimbo, mándani erachi úpirindi uandontskuarheni imani jingoni tánguarhikuarhu o aianhpikuarhu. Joperuksï no jatsipirindi paraksï pʼímarhini para máteru ambe úni o paraksï májku kʼéri jarhani. Apostoli Pablu uandaspti andiksïsï jatsipirini para ísï úni: “Paraka ima kʼuratseaka”, engaksï ísï úpiringa ima jamberi niárapirindi mójtakuni imeeri jánguani (2 Tes. 3:14, 15).

¿Ka ini jurhiatikuecha jimbo ambechi jatsiski para úni? Orhetachi jatsiska para sési míteni sini inde kʼuiripu meru no uékasïni kurhandini. Apostoli Pablu no imeechanisï arhikuekani japti engaksï no májkueni ambe erakujka úni eska jucha o engaksï no májkueni ambe tsitijka eska jucha. Ka ístu no imeechanisï arhikuekani japti engajtsïni niárapka no sési pʼikuastani ambe ma jimbo. Sánderu sési apostoli Pablu imeechanisï arhikuekani japti engaksï intsïnhakia konseju Biblia jingoni, joperu engaksï no uékajka ísï úni.

Engachi exeska eska erachi ma no ísï úxaka eska na arhijka Bibliarhu anapu konsejuecha, a mándani juchachi jatsiska para erakukuarhini sinchi seguiriua pájperani imani jingoni o nóteria. Jimbokachi jandiajkusï jatsika para eratseni ambe úni, nóchi jatsiska para imeechani aianguani engaksï no juchaari familieuaka. Joperu uaakachi seguiriini jarhani uandajpani imani kʼuiripuni tánguarhikuecharhu o aianhpikuarhu. Ka enga na mójtakuakia imeeri jánguani, uaakachi ménderu sési pájperani imani jingoni ísï eska antesi.