“¿PʼINDESKI diosmaiamukua íntspintani?”. Iáminduechachi jatsiska para indeni ambe kurhamarhikuarhini. Biblia uandasptia eska ini jurhiatikuecha jimbo kʼuiripu no agradeseripiringa (2 Tim. 3:2). Jamberichi míteaka ima járhati kʼuiripuechani engaksï eratsejka eskaksï máteruecha jatsiska para úni ambe imecha jimbo o íntsaani ambe ma ka eska no uétarhisïnga diosmaiamukua íntspintani. No nema tsitisïndi xárhati kʼuiripuecha jingoni jarhani.

Peru Jeoba arhiasïndi imeri marhuarichani eskaksï agradesidueuaka ka eskaksï diosmeiamukua íntspintaaka iámindu ambe jimbo (Kol. 3:15; 1 Tes. 5:18). Ístu, diosmeiamukua íntspintani marhuachisïndijtsïni. ¿Andi? Ju je exeni máru ambe.

Ma ambe enga jimbo kánikua jukaparhakueka diosmeiamukua íntspintani jindesti jimbokajtsïni jarhuatasïnga parachi jucha mismu sési pʼikuarherani. Ima enga diosmeiamukua íntspintajka ka ístu ima enga diosmeiamukua arhinhajka sésiksï pʼikuarherasïndi. ¿Andi? Ju je arini ambe eratsentani. Enga nema uéjka úni ambe ma juchantsïni jimbo, jindesti jimboka eratsesïnga eskachi ísï jukanchaska ka jimboka uandanhiasïnga juchantsïni jimbo. Inde ambe úsïndi eskachi sési pʼikuarheraaka. Jamberi ísï pʼikuarherapti Ruti. Enga Boasi sési kámapka, seguru eska Ruti kánikua sési pʼikuarherapka enga exepka eska nema uandanhiasïrenga imani jimbo (Rut 2:10-13).

Uétarhisïndi diosmeiamukua íntspintani ka sánderia Tata Diosïni. Jamberichi ménisï eratsentakia ambe enga xáni úkia Jeoba juchantsïni jimbo ka ístu ambe enga úni jaka (Deut. 8:17, 18; Uku. 14:17). Peruchi no jatsiska para sántku ísï eratsentani Tata Diosïri uékperakueri ambe, jatsiskachi para meru arhutani tiempu parachi sési eratsentani na engajtsïni sési kámajka Tata Diosï ka ambe enga xáni úkia juchantsïni jimbo ka ístu juchari familia jimbo. Ísï úparini, sánderuchi agradesidu pʼikuarheraaka ka seguruchi jauaka eskajtsïni Tata Diosï kánikua xénchasïnga ka jukaparharani (1 Juanu 4:9).

Aparte de eratsentani ambe engajtsïni xáni íntskukia Jeoba, jatsiskachi para diosmeiamukua íntskuntani imeri uékperakua jimbo (Sal. 100:4, 5). Uandanhasïndi eska “diosmeiamukua íntspintani kánikua jarhuajpisïnga para ma tsípikua jingoni irekani”.

Máteru ambe enga jimbo sési jaka diosmeiamukua íntspintani, jindesti jimbokajtsïni jarhuatasïnga parachi sánderu sési pájperani máteruecha jingoni. Iáminduechachi uétarhinchasïnga eskajtsïni jukaparharaaka. Engachi mintsita jingoni diosmeiamukua íntskuntajka nemani enga úka ambe ma juchantsïni jimbo, sánderuchi sési pájperasïnga imani jingoni (Rom. 16:3, 4). Ísï jimbo, ima kʼuiripuecha engaksï diosmeiamukua íntspintajka, jamberiksï uáti ambe ma máteruecha jimbo. Exesïndiksï ambe engaksï máteruecha újka imechani jimbo, jimbosï inde ambe újti eskaksï imajtu sési kámpiaka. Ka sésijtsïni pʼikuastasïndi jarhuataani máteruechani, ísï eska na uandapka Jesusi, sánderu sési pʼikuarherakuarhisïndi “intsïmpini, ka eska intsïmbinhani” (Uku. 20:35).

Robert Emmons, profesori ma Universidad de California anapu, ari ambe uandaspti: “Parachi diosmaiamukua arhijpini, jatsiskachi para kurhanguni eskachi iáminduecha mintsikperasïnga, ménisï, jarhasïndi nema enga újka ambe ma juchantsïni jimbo, ka ménisï jucha úsïnga ambe ma máteruecha jimbo”. Ísïsti, parachi seguirini jarhani irekani ka sési jarhani, uétarhinchaasïngachi máteruechani. Por ejemplu, jamberijtsïni máru kʼuiripuecha  íntskujti tʼirekua ambe ojtsïni jarhuatani jiáni engachi pʼamenchani jarhajka (1 Kor. 12:21). Imecha engaksï agradeserijka, exesïndiksï ambe engaksï máteruecha újka imecha jimbo. Ísï jimbo, ¿pʼindeskichi diosmeiamukua íntspintani?

Máteru ambe engachi jimbo jatsika para agradeseritspini, jindesti jimbokajtsïni jarhuatasïnga parachi ambakiti ambe exeni. Ima kʼuiripuecha engaksï diosmeiamukua íntspintajka, sánderuksï imani ambe exesïndi enga sési jaka ka nóksï xáni pendienti páni uandanhiata ambe. Engachi sánderu agradesidu jauaka, sánderuchi ambakiti ambe exeaka ka inde ambe uáti eskachi sánderu agradesidu jauaka. I ambejtsïni jarhuatasïndi parachi úni ambe enga apostuli Pablu uandapka: “Méntkisï tsípi je juchari Tatani jimbo” (Filip. 4:4).

Engachi diosmaiamukua arhijpiska, nóchi eratseaka imani ambe enga no marhuajka. Ma kʼuiripu no úsïndi diosmaiamukua íntspintani ka májku tiempu jimbo enbidiarpini, kómu pʼikuarherani o jatanhetspini. Ístu, ima kʼuiripuecha engaksï diosmaiamukua íntspintajka, nóksï jukari tsitisïndi jatsikuarhikua ambe, jimbokaksï agradesidu jarhaska imani ambe jingoni engaksï jatsikuarhika ka nóksï jánguarhintasïndi sánderu jatsikuarhini ambe ma (Filip. 4:12).

Kristianuechachi míteska eska Satanasi uékapiringa eskachi chketakuarhipiringa ka kómu pʼikuarherani imani ambe jimbo engachi úkua jukanchani jarhajka ini últimu jurhiatikuecha jimbo. Uékapirindi eskachi imani ambe eratsepiringa engajtsïni no marhuachejka ka eskachi iámindu ambe no sési exepiringa. Inde ambe úpirindi úni eskachi nóteru káni sési aianhpipiringuia ambakiti aianhperakuani. Engachi agradesidu jarhajka, xarhatanchi jarhasïnga ambe enga espiritu santu úrpijka. Por ejemplu, tsípenchi pʼikuarherasïnga ka sánderuchi mintsikasïnga Tata Diosïni (Gal. 5:22, 23).

Jucha engachi Jeobaeri marhuarika, jamberichi májkueni eratsijka ísï eskachi na exekia ini artikulu jimbo eskachi jatsiska para diosmaiamukua íntspintani. Peruchi ístu kuenta íntskukuarhesïnga eska no fásiliska agradesidu pʼikuarherani ka iámindu ambe sési exeni. Peru ju je no kuatantani. Uákachi kʼuiripu máeni enga méntkisï agradesidu jauaka. Ísï jimbo, ju je pauani pauani arhutani tiempu parachi eratsentani ambe jimbochi uá diosmaiamukua íntspintani. Engachi sánderu ísï úska, sánderu fásiliuati para jucha agradesidu pʼikuarherani. Ka sánderuchi tsípikua jingoni irekaaka ka eska imecha engaksï sánderu pendienti pájka uandanhiata ambe jimbo. Ju je eratsentani ambe enga xáni újka Jeoba parajtsïni uinhaperantani ka ístu máteru kʼuiripuecha, iámindu ima ambe engajtsïni sési pʼikuastajka. Astachi úpiringa pauani pauani karani tsimani o tanimu ambe engachi jimbo uáka diosmaiamukua íntspintani.

Inbestigadorichaksï uandasïndi eska pʼindeni diosmaiamukua arhijpini, mójtakusïnga na enga ánchikuarhijka juchari serebru ka jarhuatasïndi para ambakiti ambe eratseni. Ima kʼuiripuecha engaksï grasiasi íntspintajka, sánderuksï tsípikua jingoni irekasïndi. Ísï jimbo, ju je imani ambe exeni enga sési jaka juchari irekuarhu, ju je tsípikuarhini engachi sési nitamakuarhini jauaka ka ju je méntkisï grasiasi íntspintani. Enbesi de ísku exeni ambe ma, ju je úni ambe enga Biblia arhijka: diosmaiamukua íntskunta je Jeobani jimboka ima sési kámpisïnga ka diosmeiamukua arhijpi je “iámindu ambe jimbo” (1 Crón. 16:34; 1 Tes. 5:18).