1, 2. a) Máru paisicha jimbo, ¿náki kʼuínchekuaksï úntasïni ka ambeski ima Uéxurhini engaksï israelitecha Pʼímutantanhenga? (Exe je rekuadruni “ ¿Ambespi ima Uéxurhini engaksï israelitecha Pʼímutantanhenga”). b) ¿Ambe uandaspi Jesusi jimini Lukasʌ 4:16-18?

MÁRU paisicha jimbo, enga ambe ma enga kánikua jukaparhakueka 50 uéxurhini andangutajka, kʼuiripu pʼindesti kʼuínchikua ma úntani. I kʼuínchikua ísï mítekatesti komueska uéxurhini engaksï pʼímutantspijka. Úsïndiksï ma jurhiatikua kʼuíncheni, ma semana o sánderu jamberi. Peru niárasïndi kʼamakurhini ka kʼuiripu sóntku mirikurhisïndi na engaksï sési nitamakuarhipka indeni kʼuínchikua jimbo.

² Ini artikulu jimbo, exeakachi eska jarhaska sánderu ambakiti uéxurhini ma para pʼímutantspini. Asta sánderu ambakitisti eska ima Uéxurhini engaksï israelitecha Pʼímutantanhenga kada sinkuenta uéxurhini. Imani Uéxurhini jimbo, israelitechaksï kánikua tsípisïrendi jimbokaksï pʼímutantskata uérasïrenga. ¿Andisï inde ambe kánikua jukaparhakue para jucha iásï? Jimbokajtsïni miántantasïnga eska Jeoba ambakiti ambe íntspiska parajtsïni pʼímutantani para méntkisï, Jesusijtu uandaspti eska pʼímutantskua ma japiringa (arhinta je Lukasʌ 4:16-18).

3. Seguni Levítico 25:8-12, ¿néna marhuakuasïreni israelitechani ima Uéxurhini engaksï Pʼímutantanhenga?

³ Uákachi sánderu sési kurhanguni ambe enga Jesusi arhikuekani japka enga pʼímutantskueri ambe uandapka, engachi exeaka ambe enga Tata Diosï arhiapka israelitechani eskaksï úpiringa imani Uéxurhini jimbo engaksï Pʼímutantanhenga. Uandaspti: “Jatsiskajtsï para pímbinhajkuntani uéxurhini 50 ka pʼímutantskueri ambe aianguani iámindu imechani engaksï echerirhu irekani jaka. Uéxurhini máeuati parajtsï Pʼímutantanhani ka mándani arhintsï cha pʼíkuntaaka ambe enga cháriika ka mándani arhintsï kʼuanhatsentaaka chári familia jingoni” (arhinta je Levítico 25:8-12). Jiniani semana jimbo, exeskachi na enga marhuakuauenga  israelitechani mintsikuarhini mándani semana sábadu jurhiatikua jimbo. Ka iásïchi exeaka na enga marhuakuauenga ima Uéxurhini engaksï Pʼimutantanhenga. Por ejemplu, ju je eranhaskani eska israelita ma kántspexapka ka para úni maiampeni, íntspikuarhintasïndi echeri ma. Imani Uéxurhini jimbo engaksï Pʼímutantanhenga, íntskuntasïrendiksï imeri echerini. Ísï jimbo, israelita ménderu pʼíkuntasïrendi imeri echerini ka uájpechaksï no tsïtasïrendi erensiani. O ju je eranhaskani israelitani ma enga no jatsikuarhipka tumina ka para úni maiampintani ambe enga kántspenga, jatsisïrendi para uájpani ma atarantani komueska jántspiri ma o asta ima mismu jántspiri úkuarhini. Imani Uéxurhini jimbo engaksï Pʼímutantanhenga, jántspiri kʼuanhatsentasïrendi “imeri familia jingoni”. Ísï jimbo, iámindu jántspirichaksï erokuarhini jarhasïrendi eskaksï ma jurhiatikua jurajkunhapiringa. Jeoba uandanhiasïrendi imeri marhuaricha jimbo, ¿no ísïski?

4, 5. ¿Andisï jukaparhakua ambee para jucha iásï ima Uéxurhini engaksï israelitecha Pʼímutantanhenga?

⁴ ¿Para ambe máteru ambe marhuasïreni ima Uéxurhini engaksï Pʼímutantanhenga? Jeoba uandaspti: “No nema jatsisti para pobri pakarani, jimbokaksïni Jeoba meru kóndintaaka imani echeri jimbo engaksïni chári Tata Diosï Jeoba íntskuaka komueska erensia ma para cháriini” (Deut. 15:4). Méntku ménderuenisti ambe ma iásï, ini parhakpini jimbo, jatsikuarhirichaksï sánderu jatsikuarhixati ka pobrichaksï sánderu pobrixati.

⁵ Kristianuechachi nóteru jarhaskia Moisesiri Lei jimbo. Inde ambe arhikuekasïndi eskachi iásï nóteru úsïnguia indeni ambe, komu pʼímutantani jántspirini ma, puátspentani kántsperata ambe ka íntskuntani familiani ma imeri echerini (Rom. 7:4; 10:4; Efes. 2:15). Peru jarhasti ambe ma engachi jimbo jatsika para jukaparharani imani Uéxurhini engaksï Pʼímutantanhenga. ¿Andi? Jimbokachi uáka pʼímutantskateni ka i ambejtsïni miátantasïndi imani Pʼímutantskuani engaksï israelitecha úntenga.

6. ¿Andichisï iáminduecha uétarhinchajki pʼímutantskateni?

⁶ Iáminduechachi uétarhinchasïnga pʼímutantskateni jimbokachi jántspiriska pekadueri. Jimbochisï tʼarhepijka, pʼamenchani ka uarhini. Jiánchi kuenta íntskuarhisïnga inderi ambe  engachi espejurhu ma exekuarhijka o engachi jatsijka para doktori jingoni nirani jimbokachi pʼamenchaxaka. Ístuchi no sési pʼikuarherasïnga jiáni engachi no sési ambe niátajka. Apostuli Pablu uandaspti eska jántspiri máespka jimboka sánderu janhanharhisïrenga pekaduni enga imeri kuerpurhu japka. Ka ístu uandaspti: “Lastima jíndeni, ¿nérini uá késtatachini ini kuerpuni engarini ísï uándikuni jaka?” (Rom. 7:23, 24).

7. ¿Ambe uandaspi Isaiasi pʼímutantskueri ambe?

⁷ Xáni sési enga Jeoba úka ambe enga xáni uétarhienga parajtsïni pʼímutantani pekadueri. Jesusini jimbo, úsïngachi pʼímutantskata uérani. Jukari 700 uéxurhini ante de Jesusi jurhani Echerirhu, profeta Isaiasi uandaspti eska sánderu orhepani japiringa sánderu kʼéri pʼímutantskua ma. Inde pʼímutantskua sánderu ambakiti ambe úpirindi eska ima enga imani Uéxurhini jimbo úkuarhienga engaksï israelitecha Pʼímutantanhenga. Karaspti: “Juchari Juramuti Jeoba, íntskuxatirini imeri espiritu, jimbokarini Jeoba jíndeni erakuska parani ambakiti ambe aianguani kaxumbitichani. Axastirini parani sési pʼikuastantaani imechani engaksï no sési pʼikuarherani jaka mintsitarhu, parani aianguani imechani engaksï jupikakata pánhaka eskaksï jurajkunhaaka ka parani petaantani imechani engaksï ónhakata jaka” (Is. 61:1). Ju je exeni néni arhikuekaxapi i profesia.

8. ¿Néni arhikuekaxapi Isaiasiri profesia enga pʼímutantskueri ambe uandajka?

⁸ Inde xáni ambakiti profesia, ísï tátsekua uénaspti kumplirikuarhini enga Jesusi uénapka aianhpini. Nasareti anapu sinagogarhu, ireta nani enga ima tʼarhexepka, arhikuantaspti Isaiasiri profesiani imani judiuechani engaksï jima tánguarhitini japka. Jiájkani, uandaspti eskaksï ari uandakuecha imanisï arhikuekani japka: “[Jeobaeri] espiritu jíndeni jukaratixati jimbokarini jíndeni míndaska para aianguani ambakiti aianhperakuani imechani engaksï pobrika, ka axastirini para mintsita jatsikuantani imechani engaksï mískuarhijka, ka para aianguani imechani engaksï ónhakata jaka, eskaksï libre jauaka, ka ístu para eskataraantani imechani engaksï sigueka ka para kuájpiani imechani engaksï no sési kánhajka, ka para aianhpini eska i jindeska uéxurhini enga Diosï kóntpintajka” (Luk. 4:16-19). ¿Néna kumplirispi Jesusi ini profesiani?

9. Jesusiri jurhiatikuecha jimbo, ¿andiksïsï kʼuiripuecha uékeni eska nema pʼímutantaapiringa?

⁹ Primeru siglurhu, ísï eska na uandapka Isaiasi ka ísï eska Jesusi na arhintapka, kʼuiripu uénaspti pʼímutantanhani. Jesusi mismu ísï aianhpispti enga uandapka: “Inde karakata engajtsï kurhandikia, iásïsï kumplirikuarhitia chánksïni japarini” (Luk. 4:21). Uánikua imecha engaksï  kurhajchapka Jesusini, jamberiksï uékendi eska mójtakunhapiringa politika ambe paraksï pʼímutantanhani ka nóteru Roma juramukuania. Jamberiksï májkueni eratsendi eskaksï ima tsimani achamasïcha engaksï uandapka: “Jucha erokaxapka eska ima jindespkia enga pʼímutaantapiringa Israeli anapuechani” (Luk. 24:13, 21). Peruchi míteska eska Jesusi no méni arhiaspka eskaksï nóteru kurhajchaapiringa Roma anapu juramutichani. Sánderu sési, arhiaspti eskaksï íntskupiringa “Sesarini ambe enga Sesaririika” (Mat. 22:21). Jiájkani, ¿ambe úspi Jesusi para pʼímutantaani jiáni anapu kʼuiripuechani?

10. ¿Ambeeri pʼímutaantaspi Jesusi kʼuiripuechani?

¹⁰ Tata Diosïri Uájpa jurhasti para jarhuataani kʼuiripuechani paraksï úni pʼímutantskata uérani tsimani ambe jimbo. Orheta, Jesusi jarhuataaspti paraksï nóteru jántspirinia imani amberi engaksï relijioniri orhejtsïkuticha jorhentpienga. Uánikua judiuechaksï no jurhimbikua ambe jakajkusïrendi ka ístuksï kʼuiripuecheri pʼindekuechani chúxapaasïrendi (Mat. 5:31-37; 15:1-11). Imecha engaksï seguni jarhuatenga kʼuiripuni para kómarhini Tata Diosïni, nóksï marhuakusïrendi Tata Diosïni, ísïspti enajkiksï siegu japi. Engaksï ísï no jiókuarhipka Mesiasini ka ambe enga ima jorhentpenga, nóksï niáraspti míteni Tata Diosïni, pápkʼanduksï jarhaspti ka seguirisptiksï jántspiriini pekadueri (Juanu 9:1, 14-16, 35-41). Jesusi jurhimbikua ambe jorhendaaspti kʼuiripuechani ka ambakiti ejemplu ma íntsaaspti, ísï úparini, exeraaspti kaxumbitichani ambe úni paraksï nóteru jántspirinia no jurhimbiti jorhenguarhikuecheri (Mar. 1:22; 2:23–3:5).

11. ¿Ambe máteru ambe úski Jesusi para pʼímutantspini?

¹¹ Para tsimani úni jámani, Jesusi úspti eskaksï kʼuiripuecha nóteru jántspiripiringuia pekadueri. Imeri uarhikua jimbo, Tata Diosï úsïndi puákuantaani pekaduechani imechani engaksï jakajkujka indeni euajpintskuani ka engaksï úkuecha jingoni xarhatajka eskaksï jakajkusïnga (Ebr. 10:12-18). Jesusi uandaspti: “Ísï jimbo engaksïni Diosïri Uájpa euajpintaaka, jimajkani kʼóru sési jimbo nóterujtsï jántspiriuaka” (Juanu 8:36). Inde pʼímutantskua sánderu kʼéri ambesti ka eska ima enga jiáni úkuarhienga engaksï israelitecha Pʼímutantanhenga. Por ejemplu, ima kʼuiripu enga jurajkunhenga para nóteru jántspirinia, úpirindi ménderu jántspiri únhani. Ístu, niárapirindi uarhini.

12. ¿Néksï orheta pʼímutantanhaspi ísï eska na uandapka Jesusi?

¹² Pentekostesi jimbo uéxurhini 33, Jeoba espiritu santu jimbo erakuaspti apostulichani ka ístu máteru ambakiti kʼuiripuechani. Ka jiókuarhiaspti paraksï jindeni imeri uájpecha, ísï jimbo, sánderu orhepatini niárapirindi tsítantaani paraksï auandarhu nirani juramuni Jesusi jingoni (Rom. 8:2, 15-17). Íksï orheta  pʼímutantanhaspti ísï eska Jesusi na uandapka sinagogarhu jini Nasareti. Nóteruksï jántspirisptia no jurhimbiti jorhenguarhikuecheri engaksï relijioniri orhejtsïkuticha jorhentpenga ka ni imecheri pʼindekuecheri engaksï no terukuntenga Tata Diosïri Karataka jingoni. Ístu, para Tata Diosï, imaksï pʼímutantskata jarhasptia pekadueri enga uarhikuarhu pájpijka. Ambe enga Jeoba úni jaka para pʼímutantspini, jiáni uénasti engaksï tata Jesukristueri chúxapaticha erakunhaka uéxurhini 33 jimbo ka jiáni kʼamaraati enga na nitamakia Juramukua Mili Uéxurhiniri Jesusiri. ¿Ambe úkuarhiaia jiáni jamberi?

13, 14. Aparti de erakukatecha, ¿néchaksï máteru uá pʼímutantanhani ísï eska na uandapka Jesusi?

¹³ Iásï, uápurisï anapu kʼuiripuecha engaksï kaxumbitika, kuenta úkuarhisïndiksï ‘máteru karichicha’ jingoni (Juanu 10:16). Jeoba no eraskuasti paraksï auandarhu nirani Jesusi jingoni juramuni, sánderu sési, erokuarhixatiksï irekani para méntkisï ixú Echerirhu ísï eska na uandajka Biblia. ¿Juchajtuchi indeni ambe erokuarhixaki?

¹⁴ Juchajtuchi uánikua kóntperatechani jatsiaskia ísï eska imecha engaksï auandarhu niuaka Jesusi jingoni juramuni. Por ejemplu, Jesusiri uarhikua jimbo, úsïngachi kómarhini Jeobani parajtsïni puáchintani engachi no sési ambe újka. Ísï jimbo, Jeobajtsïni jaiapanhintasïndi ka úsïngachi ambakiti pájperakua ma jatsini imani jingoni (Efes. 1:7; Jaŋ. 7:14, 15). Ístu, ju je eratsintani na engachi xáni uáni kóntperatechani jatsiakia jimbokachi nóteru jántspiriskia no jurhimbiti jorhenguarhikuecheri engachi  desde iónisï jakajkuapka. Jesusi uandaspti: “Míteakajtsï indeni ambe enga sési jimboeka, ka inde enga sési jimboeka, uáti eska cha nóteru jindeaka jántspiricha” (Juanu 8:32). Sésichi pʼikuarherasïnga engachi ísï pʼímutantanhaka.

15. ¿Ná jásï pʼímutantskua ma jaua sánderu orhepatini, ka náki kóntperatechanchi jatsiaua?

¹⁵ Sánderu orhepatini, sánderu kʼéri pʼímutantskua ma jauati. No ióni jimbo, Jesusi kʼamajkuati no jurhimbiti relijionini ka ístu juramutichani engaksï no jurhimbikua jingoni újka ambe ma. Tata Diosï kuájchakuauati “uánikua kʼuiripuechani” engaksï imeri marhuarika ka uánikua kóntperatechani íntsauati ixú Echerirhu paraisurhu ma (Jaŋ. 7:9, 14). Ístu, uánikua kʼuiripuechani tsítaantauati, imecha engaksï uékaaka marhuakuni Jeobani nóteruksï pʼamenchaatia, tʼarhepini ni uarhini (Uku. 24:15).

16. Sánderu orhepatini, ¿nénaksï pʼímutantanhaa kʼuiripuecha?

¹⁶ Imani Mili Uéxurhini jimbo enga Jesusi Juramuaka, ima ka imecha engaksï imani jingoni juramuaka, jarhuataatiksï kʼuiripuni paraksï nóteru méni pʼamenchania ka paraksï ambakiti pájperakua ma jatsini Tata Diosï jingoni. Israelitechaksï kánikua sési pʼikuarherasïrendi imani Uéxurhini jimbo engaksï Pʼímutantanhenga, peruksï kʼuiripuecha sánderu sési pʼikuarheraati engaksï kʼamakʼamasï pʼímutantanhaaka jiáni enga tata Jesukristu Juramuni jauaka Mili Uéxurhini jimbo. Iámindu imecha engaksï marhuakuni jauaka Jeobani perfektueuatiksï. Nóteruksï jántspiriuatia pekadueri.

17. Seguni Isaías 65:21-23, ¿nénaksï irekaa Tata Diosïri marhuaricha? (Exe je imajeni enga uénakuarhu jaka).

¹⁷ Isaías 65:21-23 (arhinta je), xarhatasïndi néna irekanhaa paraisurhu ixú Echerirhu. Jeobaeri marhuarichaksï no méni ísku jauati. Sánderu sési, Biblia arhisïndi eskaksï tsípikua jingoni ánchikuarhiaka ka eskaksï uáka ambe enga marhuauaka. Uákachi mintsikani eska jiáni enga na nitamakia mili uéxurhini, kueraakata “nóteru juramuminhaaka uarhikuani jimbo sino jimbanheranhantani, jimajkani engaksï Diosïri uájpecha xarhantaaka tʼíntskua jingoni” (Rom. 8:21).

18. ¿Andichisï uá mintsikani eskachi sánderu orhepani tsípikua jingoni irekaaka?

¹⁸ Jeoba úspti eskaksï israelitecha jatsipiringa tiempu para ánchikuarhini ka ístu para mintsikuarhini ka májkueni uáti imeri marhuaricha jingoni jiáni enga tata Jesukristu Juramuni jauaka Mili Uéxurhini. Ísï jimbo, íchaksï jatsiati tiempu para Jeobani kómarhini. Jimboka inde ambe kánikua jukaparhakueska para úni tsípikua jingoni irekani iásï ka ístu jimbanhi parhakpinirhu. Iámindu kʼuiripuecha engaksï kurhajchaaka Jeobani, sésiksï pʼikuarheraati jimbokaksï tsípikua jingoni ánchikuarhiaka ka jimbokaksï Jeobani marhuakuni jauaka.