¿Uájtsï mókuantani arini kurhamarhikuechani engaksï exekuarhika rebistecharhu Aianhpiri 2019 anapu?

¿Ambe arhikuekasïni engajtsïni Tata Diosï aiachejka: “No ma arma enga únhaaka parakini no sési úcheni uáti ísï úni”? (Is. 54:17).

Uákachi mintsikani eskajtsïni Tata Diosï kuájchakuaka jiáni engajtsïni nema uékaaka kʼamajkuni, enga ísïuaka komueska jiáni enga kʼéri janikua jimbo no sési tarhiajka (Is. 25:4, 5). Ambe engajtsïni juchari enemiguecha niáraaka no sési úcheni, no jindeuati para méntkisï (w19.01, pájina 6, 7).

¿Néna xarhataspi Tata Diosï eska jurhimbikua jingoni úsïnga ambe ma jiáni engaksï Kanaani anapuecha ka israelitecha no kurhajchapka?

Tata Diosï kastigariuaspti imechani engaksï ísku jándikua ambe niátapka ka imechani engaksï no sési káapka uarhitiichani ka sapiichani. Ka újchakuraaspti imechani engaksï kurhajchapka ka jurhimbikua jingonksï jámani (w19.02, pájina 22, 23).

¿Ambechi uá jiáni enga no Testigu ma kómarhikua ma uáka juchantsïni japarini?

Uákachi janhanharhikua xarhatani ka no ma ambe uandani, peruchi no uandaaka “eska ísï úkuarhiaka” ni jupijtaani máteruechani. Uákachi kómarhikua ma úni sïpatikuarku (w19.03, pájina 31).

¿Na xáni no sési jarhaski ísku ambe ma úkuani sapiichani?

Enga nema ísku ambe ma úkujka sapini ma no janhanharhisïndi sapini, no janhanhanharhisïndi kúnguarhikuani ni juramutichani ka ni Tata Diosïni. Imani lugaricha jimbo engaksï leicha uandajka eskaksï jatsiska para denunsiariuani imechani engaksï ísku ambe ma úkuajka sapiichani, orhejtsïkutichaksï ísï úsïndi (w19.05, pájina 9, 10).

¿Nénachi uá mójtakuni na engachi eratsejka?

Ambe engachi jatsika para úni jindesti: kómarhini Jeobani, eratsentani parachi exekuarhini ambe engachi eratsejka ka pʼikuarherani ka ambakiti amiguechani erakuani (w19.06, pájina 11).

¿Nénachi uá prepararikuarhini iáiasï para jiáni engachi no sési kánhaaka?

Jatsiskachi para sánderu ambakiti pájperakua ma jatsini Jeoba jingoni, ju je seguru jarhani eskajtsïni Jeoba xénchasïnga ka eskajtsïni no méni jurajkuaka, ístu pauani pauani arhintani Bibliani ka méntkisï kómarhini. Jatsiskachi para seguru jarhani eska ambe enga uáka Tata Diosïri Reinu meru ísï úkuarhiaka ka memoria jimbo jorhenguarhiani Bibliaeri karakatechani ka pirekuechani para kʼéri ambe arhini Jeobani (w19.07, pájina 2-4).

¿Ambechi uá úni para jarhuataani juchari parientichani paraksï pʼímutantskata uérani?

Kánikua jukaparhakuesti eskachi kurhangukuauaka, ambakiti jángua ma xarhatani parachi ambakiti ejemplu ma íntspini ka eskachi tekaantaaka ka sési kámpini (w19.08, pájina 15-17).

Ísï eska na aiatspijka Mateu 11:28, ¿nénajtsïni mintsikuastasïni Jesusi?

Ambakiti orhejtsïkutichanchi jatsiaska, sánderu ambakiti kʼuiripuecha jingonchi ánchikuarhisïnga ka sánderu ambakiti ánchikuarhitachi úsïnga (w19.09, pájina 23).

¿Nénajtsïni jarhuatasïni Tata Diosï parachi uékani úni ambe ma ka nénajtsïni uinhapikua íntskusïni? (Filip. 2:13).

Engachi arhintajka Bibliani ka eratsentani ambe enga jima arhijka, Tata Diosïjtsïni uinhapikua íntskusïndi parachi uékani úni ambe enga ima uéjka ka ístu parachi uinhapikua jatsini para ísï úni. Imeri espiritu santuni úraparini, úsïndi eskachi sánderu sési uáka imani ambe engachi jorhenakia (w19.10, pájina 21).

¿Ambechi jatsiski para úni ante dechi erakuni úni ambe ma?

Ari ambe: Sési inbestigarini, kurhakuni Jeobani jánhaskakua, eratseni andichisï uéjki úni ambe ma, sési míteni ambechisï uá, miántani eskachi no úsïnga iámindu ambe úni (w19.11, pájina 27-29).

Enga Satanasi arhipka Ebani eska no uarhipiringa, ¿jiáni uénaspi uandani eska alma no uarhisïnga?

Péringa nómbe. Noambakiti no arhispti Ebani eska solu imeri kuerpu uarhipiringa. Ambe enga kʼoru arhipka, jindespti eska no uarhipiringa. Iámindu jorhentperakuecha engaksï no jurhimbitipka, jiáni kʼamakurhisptiksï enga Kʼéri Janikua úkuarhipka. Jamberi i no jurhimbiti jorhentperakua, eska alma no uarhisïnga, jiáni uénapti ante de Tata Diosï úni eskaksï kʼuiripuecha engaksï torre de Babeli úni jápka, interu parhakpinirhu etsakuarhipiringa (w19.12, pájina 15).