1, 2. Eska na xarhatajka erachiri eksperiensia, ¿ambechi jatsiski para úni mándani arhini jucha?

¿JEOBAERI testigueskiksï chíti táticha? Enga ísïka, miá eskari no Jeobaeri amigueska solu jimbokaksï chíti táticha imeri amigueska. Engaksï juchari táticha marhuakujka Jeobani o nómbe, juchachi mándani arhini jatsiska para jánguarhintani Jeobaeri amigueni.

² Ju je exeni erachiri eksperiensia ma enga kʼumanchikuarhu ma tʼarhexeka nani engaksï iáminduecha Testigueka. Enga ima tumbi sapichuepka, no ísï pʼikuarherasïrendi eska Jeobaeri amiguespka. Uandantasïndi: “Marhuakusïrenga Jeobani solu jimbokani uékasïrenga májkueni úni eska juchiti familia”. Peru uénaspti arhintani Bibliani ka eratsintani ambe enga arhintenga ka ístu uénaspti sánderu kómarhini. Erachi uandantasïndi ambe enga jorhenguarhipka: “Kuenta íntskukuarhispka eskani úpiringa juchiti Táti Jeobaeri amigueni solu engani niárapiringa sési míteni”. Ambe enga erachi nitamakuarhika, úsïndi eskachi tsimani ambe kurhamarhikuarhiaka: ¿Andisï no májkueni míteni sánisï Jeobaeri ambe ka meru sési míteni? Ka ¿nénachi úsïni sési míteni Jeobani?

3. ¿Andisï no májkueni míteni sánisï Jeobaeri ambe ka meru sési míteni?

³ Jamberichi eratsijka eskachi míteska Jeobani jimbokachi jorhenguarhiskia na enga arhinhajka o máru ambe enga ima uandaka ka úni. Peru sési míteni Jeobani, sánderu ambe arhikuekasïndi. Jatsiskachi para tiempu arhutani para imeri ambe jorhenguarhini ka imeri sési járhati kualidadicheri ambe. Solu jiájkanchi uáka kurhanguni andisï uandajki ambe ma ka úni. Ka inde ambejtsïni jarhuataati míteni sini ima tsitisïni ambe engachi eratsijka ka úni. Ka engachi na kurhangujkia ambe enga Jeoba uéjka eskachi uáka, jatsiskachi para ísï úni.

4. ¿Nénajtsïni jarhuataa jorhenguarhiani máru Bibliaeri anapu ejempluechani?

 ⁴ Jamberijtsïni máru kʼuiripuecha teresmarhujti jimbokachi uékasïnga Jeobani marhuakuni, ka jamberijtsïni sánderu ójkutaati engaksï exeaka eskachi uénaxakaia nirani tánguarhikuecharhu. Peru engachi mintsikaaka Tata Diosïni, imajtsïni no méni jurajkuati. Ísï úparini, uénakachi ambakiti pájperakua ma jatsini imani jingoni enga jindeuaka para méntkisï. ¿Meruchi ua sési míteni Jeobani? Jo. Ejempluecha komu Moisesi ka rei Dabidi, kʼuiripuecha engaksï no perfektuepka, xarhatasïndiksï eskachi uáka ísï úni. Ju je exeni ambe engaksï úpka imecha ka na engaksï niárapka sési míteni Jeobani ka ambechi uá jorhenguarhini imecheri ambe.

5. ¿Ambe erakuspi úni Moisesi?

⁵ Moisesi ísï úspti eska na jorhenguarhipka. Enga Moisesi ma 40 ísï jatiripka, enbesi de ísï mítekateni “eska rei faraoniri uájperi uájpespka”, ima erakuspti israelitecha jingoni úkuarhini engaksï jindepka Tata Diosiri ireta, ebreuecha (Ebr. 11:24). Moisesi iámindu ambe jurajkuspti para Jeobani marhuakuni. Enga Moisesi jarhuataapka israelitechani engaksï Ejiptu jántspiripka, mítespti eska faraoni kánikua ikiapiringa, rei ma enga kánikua juramukua jatsipka ka enga ísï exenhenga komueska diosï ma. Ísï úparini, Moisesi xarhataspti eska kʼéri jakajkukua ma jatsispka, ka eska mintsikasïrenga Jeobani. Inde jásï mintsinharhikuasï uétarhijti para ambakiti pájperakua ma jatsini Jeoba jingoni enga no méni kʼamakurhiaka (Prov. 3:5).

6. ¿Ambechi jorhenguarhisïni Moisesiri ejemplu jingoni?

⁶ ¿Ambechi jorhenguarhisïni? Májkueni eska Moisesi, iáminduechachi jatsiska para erakuni sinchi marhuakua Jeobani ka imeri ireta jingoni úkuarhini o nómbe. Jamberi para marhuakuni Jeobani jatsiakachi para jurajkuni ambe engachi sánderu tsitijka ka no sési nitamakuarhini engajtsïni ójkutaaka imecha engaksï no míteka Jeobani. Peru engachi mintsikaska juchari Táti auandarhu anapuni, seguruchi jauaka eskajtsïni ima jarhuataaka.

7, 8. ¿Ambe seguirixapi jorhenguarhini Moisesi?

⁷ Moisesi seguirixapti Jeobaeri kualidadicheri ambe jorhenguarhini ka úni ambe enga Tata Diosï uéjka. Por ejemplu, enga Jeoba arhipka eska nipiringa petaantani israelitechani jini Ejiptu, Moisesi no seguru pʼikuarheraspti ka someni arhispti eska no úpiringa úni imani ánchikuarhitani. Peru Jeoba pʼamojperakua xarhatakuspti ka jarhuataspti (Éx. 4:10-16). Indeni ambe jimbo, Moisesi úspti aianguni faraonini ambe enga úkuarhinchapiringa. Tátsekua exespti na enga Jeoba úrapka imeri uinhapikuani enga pʼímutantaapka israelitechani ka mari Charhapitirhu kʼamajkuni faraonini ka imeri ejersituni (Éx. 14:26-31; Sal. 136:15).

⁸ Enga Moisesi petantaapkia israelitechani Ejiptu uératini, imechaksï uánikua xanhari no sési ambe uandaspti. Peru Moisesi méntkisï exespti na enga Jeoba kánikua tekaantskua xarhatakuapka imani kʼuiripuechani enga pʼímutantaapka (Sal. 78:40-43). Ístu exespti na enga xáni kaxumbitika Jeoba, jimboka kurhajchaspka Moisesini enga kurhakupka eska no kʼamajkuapiringa israelitechani (Éx. 32:9-14).

9. Eska na arhijka Ebreu 11:27, ¿nénaksï pájperasïreni Jeoba, Moisesi jingoni?

⁹ Enga na uéakuntapkia Ejiptu, Moisesi niáraspti jatsini ambakiti pájperakua ma Jeoba jingoni enga ísïpka enajki exeni jarheni imeri Táti auandarhu anapuni (arhinta je Ebreu 11:27). Asta Biblia arhinsïndi: “Jeoba kánikua sési uandontskuarhisïrendi Moisesi jingoni, ísï eska kʼuiripu ma na uandontskuarhipiringa máteru kʼuiripu jingoni” (Éx. 33:11).

10. ¿Ambechi jatsiski para úni parachi sési míteni Jeobani?

 ¹⁰ ¿Ambejtsïni jorhendasïni i ambe? Eska para sési míteni Jeobani, nóchi solu jatsiska para imeri kualidadicheri ambe jorhenguarhini, ístuchi jatsiska para úni ambe enga ima uéjka. Ka ¿ambe uékasïni eskachi uáka ini jurhiatikuecha jimbo? Biblia mókuntasïndi: “Eskaksï iámindu kʼuiripuecha pʼímutantskateaka, ka andajkuarhinksï mítini [imani ambe] enga ísïka” (1 Tim. 2:3, 4). Ma ambe para úni ambe enga Jeoba uéjka, jindesti jorhendaani máteruechani imeri ambe.

11. ¿Andichisï niárajki sánderu sési míteni Jeobani engachi jorhendaajka máteruechani imeri ambe?

¹¹ Niárasïngachi sánderu sési míteni Jeobani engachi imeri ambe jorhendaajka máteruechani. Por ejemplu, exesïngachi na enga xáni pʼamojpijka engajtsïni jarhuatajka imani kʼuiripuechani jirinhaantani engaksï ambakiti mintsita ma jukaka (Juanu 6:44). Exesïngachi na enga xáni uinhapika Tata Diosïri Karakata engaksï ima kʼuiripuecha engachi Bibliaeri ambe jorhendaajka, jurajkuajka pʼindekuechani engaksï no sési jaka ka iásïksï uénania ménderueni jámani (Kol. 3:9, 10). Ka exesïngachi eska Jeoba tekaantskua xarhatakuasïnga kʼuiripuechani engachi jucha predikarikuajka jimbokajtsïni uánikua xanhari axasïnga parachi jarhuataani imeri ambe jorhenguarhini ka eskaksï pʼímutantskata uéraaka (Rom. 10:13-15).

12. Eska na arhijka Éxodo 33:13, ¿Moisesi ambe kurhakuspi Jeobani ka andi?

¹² Moisesi kánikua jukaparharaspti imeri pájperakua Jeoba jingoni. Nájkiruka uánikua milagruechani uápkia Tata Diosïri nombrini úraparini, Moisesi janhanharhikua jingoni kurhakuspti eska jurajkupiringa para sánderu sési míteni (arhinta je Éxodo 33:13). Jiánisï, Moisesi jukari 80 jatirisptia peru mítetixapti eska útasï jatsispka para uánikua ambe jorhenguarhini imeri Táti auandarhu anapueri ambe enga xáni uékpitika.

13. ¿Nénachi uá xarhatani eskachi jukaparharasïnga ambakiti pájperakua engachi jatsika Jeoba jingoni?

¹³ ¿Ambechi jorhenguarhisïni? Eskachi méntkisï jatsiska para jukaparharani juchari pájperakua Jeoba jingoni no arhiparini na engachi xáni ióni marhuakukia. Ka ma ambe engachi uáka úni parachi xarhatani eskachi jukaparharasïnga, jindesti kómarhini Jeobani.

14. ¿Andisï xáni jukaparhakue kómarhikua parachi sánderu sési míteni Jeobani?

¹⁴ Nema niárasïndi kánikua sési pájperani máteru nema jingoni engaksï méntku uandontskuarheni jarhajka. Ísï jimbo, ju je andarhierani Jeobani someni kómarhiparini, no sáni chéparini aianguni ambe engachi eratsijka ka pʼikuarherani (Efes. 6:18). Turquía anapu pirenchi ma enga Krista arhinhajka, uandasïndi: “Méni engani aiangukuarhijka Jeobani ambe engani eratsijka ka exeni na engarini jarhuatajka, sánderuni xénchasïnga ka sánderuni mintsikasïnga. Exeni na engarini mókucheantajka juchiti kómarhikuechani, jarhuatastirini parani ísï exeni Jeobani eska juchiti Táti ka juchiti Amigu”.

15. ¿Ambe uandaspi Jeoba rei Dabidiri ambe?

¹⁵ Rei Dabidi ireta ma jimbo andajpenuspti engaksï iáminduecha Jeobani kómarhienga. Peru no jimboka imeri familia kómarhienguia Jeobani, imajtu ísï úpiringa. Dabidisï jánguarhintapti para Jeobaeri amigueni ka Tata Diosï niáraspti kánikua xénchani. Jeoba uandaspti eska Dabidi kʼuiripu máespka enga imeri mintsita jeiapanhintenga (Uku. 13:22). ¿Ambe úspi Dabidi para ambakiti pájperakua ma jatsini Jeoba jingoni?

16. ¿Ambe jorhenguarhispi Dabidi Jeobaeri ambe enga exenga kuerakata ambe?

¹⁶ Dabidi niáraspti jorhenguarhini Jeobaeri ambe kuerakata ambe exeparini. Jiáni enga tumbipka, ióni jámaspti táti jemberi karichichani  kuidarikuani juátarhu ísï. Jamberi jiánipti enga uénapka eratsintani ambe enga xáni úka Jeoba. Por ejemplu, enga eranchenga chúrikuechani, no solu exeasïrendi uánikua jóskuechani, sino exesïrendi na enga jásï kʼuiripu máeka ima enga jóskuechani kuerauaka. Ísï jimbo, karaspti: “Auanda xarhatasïndi Tata Diosïri tʼíntskua; ambe enga iótakuarhu jaka, uandantasïndi ambe engaksï imeri jájkicha úka” (Sal. 19:1, 2). Ístu enga eratsintenga na engaksï úkata jaka kʼuiripuecha, exesïrendi na enga xáni jánhastiika Jeoba (Sal. 139:14). Ka enga jánguarhintenga kurhanguni na enga xáni kʼéri ambe úka Jeoba, ísï pʼikuarherasïrendi enajki ima no ma ambepi (Sal. 139:6).

17. ¿Ambechi uá jorhenguarhini engachi eratsintaaka kueraakata ambe jimbo?

¹⁷ ¿Ambechi jorhenguarhisïni? Eskachi jatsiska para jingontku exeni ambe enga kuerakata jaka. Uákachi jingontku exeni na enga Jeoba xáni sési kueraaka parhakpinini. Ju je pauani pauani eratsintani ambe engajtsïni jorhendajka Tata Diosïri ambe iámindu ima ambe engachi xáni exejka komu: tsïtsïkicha, animalicha ka kʼuiripuecha. Ísï úparini, pauani pauanchi uánikua ambe exentaaka para jorhenguarhini juchari Táti uékpitiri ambe (Rom. 1:20). Ka niáraakachi sánderu xénchani.

18. Eska na arhijka Salmo 18, ¿ambe niáraspi kurhanguni Dabidi?

¹⁸ Dabidi exespti eska Jeoba jarhuatasïrenga. Por ejemplu, jiáni enga kuájpiantapka táti jemberi karichichani enga leoni ka osu ma uékenga auandani, exespti eska Jeobaeri jarhuajperata jimbo úspka uandikuani imani animali ikiminharhichani. Enga uándikupka Goliatini, exespti eska Jeoba jarhuataxapka (1 Sam. 17:37). Ka ístu exespti eska Jeoba jarhuataspka jimboka úspka sïpakuarhikuni rei Saulini (ambe enga arhijka antesi de Salmo 18 uénakuarhini). Kʼuiripu ma enga kʼéramakuarhijka úpirindi eratseni eska imeri uinhapikua jimbosï úpka úni iámindu ambe. Peru Dabidi kaxumbitispti ka jimbosï úpti exeni na enga Jeoba jarhuatapka imeri irekuarhu (Sal. 138:6).

19. ¿Ambejtsïni jorhendasïni Dabidiri ejemplu?

¹⁹ ¿Ambechi jarhenguarhisïni íri ambe? Eskachi no solu jatsiska para kurhakuni Jeobani eskajtsïni jarhuataaka, sino ístuchi jatsiska para jánguarhintani exeni káni ka nénajtsïni jarhuatasïni. Engachi káxumbitiika ka jiókuarhinchi eskachi no úsïnga iámindu ambe úni, sóntkuchi exeaka eskajtsïni Jeoba jarhuatasïnga úni ambe engachi no úni jauaka. Ka méni engachi exeaka na engajtsï jarhuatajka, niáraakachi sánderu sési pájperani Jeoba jingoni. Inde ambe nitamakuarhispti Isaac enga Fiyi anapueka, erachi ma enga iónisï marhuakukia Jeobani, ima uandasïndi: “Engani juchiti ambe míantajka ióntki anapu ambe, exesïnga na engarini jarhuatajka Jeoba desde jiáni uératini engani uénaka jorhenguarhini Bibliaeri ambe. Inde ambe úsïndi eskani ísï exeaka Jeobani eska meru jarhaska”.

20. ¿Ambe úspi Dabidi para ambakiti pájperakua ma jatsini Jeoba jingoni ka ambechi uá jorhenguarhini imeri ambe?

²⁰ Dabidi májkueni járhati kualidadichani xarhataaspti eska Jeoba. Tata Diosïjtsïni ísï kueraasti parachi májkueni ambe xarhatani eska ima (Gén. 1:26). Engachi sánderu mítejka na enga jásï Tata Diosï máeka, úsïngachi sánderu sési terukukuntani imani. Jimboka Dabidi sési mítespka Jeobani, sési kásïrendi máteru kʼuiripuechani ísï eska na kaapiringa imeri Táti auandarhu anapu. Ju je miáni ambe enga úpka ma xanhari i rei. Pekarispti enga ísku jándikua ambe niátapka Bat-Seba jingoni ka tátsekua úni eskaksï uándikupiringa i uarhiitiri uámbani. Peru nájkiruka ísï úpka, Jeoba pʼamojkuspti (2 Sam. 11:1-4, 15). ¿Andi? Jimboka Dabidi májkueni úsïrenga eska Tata Diosï ka kʼuiripu máespti enga pʼamojkuauenga máteru kʼuiripuechani. Ka jimboka Dabidi niáraspka  kánikua sési pájperani Jeoba jingoni, rei máespti engaksï israelitecha kánikua xénchenga ka Jeoba imani úrasïrendi komu ejemplu para máteru reicha engaksï Israeli anapuepka (1 Rey. 15:11; 2 Rey. 14:1-3).

21. Eska na arhijka Efesu 4:24 ka 5:1, ¿nénajtsïni marhuachia engachi terukukuntaska Tata Diosïni?

²¹ ¿Ambechi jorhenguarhisïni? Jatsiskachi para májkueni úni ambe ma eska Tata Diosï. Ísï úni, no solujtsïni marhuachiati, sino uáti eskachi sánderu sési míteaka. Engachi jánguarhintajka parachi ísïni eska Tata Diosï, xarhatasïngachi eskachi imeri uájpeska (arhinta je Efesu 4:24; 5:1).

22, 23. ¿Ambe úkuarhia engachi ísï úska ambe engachi jorhenguarhijka Jeobaeri ambe?

²² Eskachi na exekia, uákachi míteni Jeobani exeparini ambe enga ima kueraaka ka imeri Karakata jimbo enga jindeka Biblia. Bibliarhu, uánikua ejempluechaksï jarhasti Tata Diosïri ambakiti marhuaricheri komu Moisesi ka Dabidi, ka uákachi májkueni úni eska imecha. Jeoba ústia imeri parti. Iásïchi juchasï jatsikia para jánguarhintani míteni imani.

²³ Nóchi méni kʼamaraaka Jeobaeri ambe jorhenguarhini (Ecl. 3:11). Peru ambe enga sánderu jukaparhakueka, no jindesti ambe engachi xáni míteka imeri ambe, sino ambe engachi újka imani ambe jingoni engachi mítekia. Engachi ísï uáka eskachi na jorhenguarhijka ka jánguarhintani májkueni úni ambe ma eska juchari Tata Diosï uékpiti, imajtsïni sánderu andarhieraati juchantsïni (Sant. 4:8). Imeri Karakatarhujtsïni aiangusïndi eska ima no méni jurajkuauaka imechani engaksï jánguarhintajka sési míteni imani.