SEMANA 52
Táticha, jorhendaa je chári sapiichani paraksï xénchani Jeobani
“Sapiichaksï Jeobaeri intsïmperakua máesti” (SAL. 127:3).
PIREKUA 134 Chíti uájpechaksï kóntperata máesti
AMBE ENGACHI EXEAKA *
1. ¿Náki ánchikuarhita íntsaaski Jeoba tátichani?
JEOBA ísï kueraaspti Adani ka Ebani paraksï tsitini sapiichani kaani. Jimbosï Biblia arhijti: “Sapiichaksï Jeobaeri intsïmperakua máesti” (Sal. 127:3). Parachi úni kurhanguni ambe engaksï arhikuekajka i uandakuecha, ju je eranhaskani eskajtsïni amigu ma kánikua tumina patsarasïnga. ¿No ísïski eskachi kánikua sési pʼikuarherapiringa jimbokajtsïni mintsikasïnga? Peru ístuchi uandanhiapiringa néna sési kuidarini imani tuminani. Iásï, juchari sánderu ambakiti Amigu, Jeoba, tátichani íntsaasti ambe ma enga sánderu jukaparhakueka eska tumina: imechani jurajkukuasti paraksï sapiichani kuidariuani ka eskaksï tsípikua jingoni irekaaka.
2. ¿Náki kurhamarhikuechani mókuantaua i artikulu?
2 ¿Né jatsiski para uandani sini temungurhiri ma kaaua sapiichani ka na jatini? Ka ¿ambeksï uá úni táticha parakaksï imecheri sapiicha tsípikua jingoni irekaaka? Ju je exeani máru konsejuechani engaksï Tata Diosïri Karakatarhu jaka engaksï jarhuatauaka temungurhirichani paraksï ambakiti ambe erakuni úni.
JU JE RESPETARINI AMBE ENGAKSÏ TEMUNGURHIRICHA ERAKUAKA ÚNI
3. a) ¿Né jatsiski para uandani sini temungurhiri ma kaaua sapiichani o nómbe? b) ¿Temungurhiriri familiaricha ka amiguechaksï náki Bibliaeri konsejuechani jatsiski para miáuani?
3 Máru kʼuiripuechaksï ísï eratsesïndi eskaksï imecha engaksï apenasi tembuperaka, jatsiska para jirejiresï kaani sapiichani. Jamberi asta imecheri familia ka máteru kʼuiripuechaksï Gal. 6:5, Táta Diósïri Uandakua Tata Jesukristueri Aiatsperakua). Ísïsti eskaksï temungurhiriri familiaricha ka amiguecha uékasïnga eskaksï ícha tsípikua jingoni irekaaka, peruksï iáminduecha jatsisti para miáni eska temungurhirisï jatsika para uandani sinksï kaaua sapiichani o nómbe (1 Tes. 4:11).
afuersa uékaati eska temungurhiri ma sóntku kaauaka sapiichani. Asia anapu Testigu ma enga Jethro arhinhajka, uandasïndi: “Kúnguarhikuarhu, máru erachicha engaksï sapiichani kaajka, méntkuksï arhiani jarhasïndi imechani engaksï no kaajka, eskaksï kánguarhiakia sapini ma”. Jeffry, máteru erachi Asia anapu, uandantasïndi: “Máruksï arhiasïndi imechani engaksï no kaajka sapiichani eska no nema kuidariuauaka jiáni engaksï imecha jatiriuakia”. Peru temungurhirichaksïsï jatsiti para uandani sinksï kaaua sapiichani o nómbe. Imechaksïsï jatsiti para exeni ambe engaksï uáka (4, 5. a) ¿Ambe tsimani amberiksï jatsiski para uandontskuarheni temungurhiricha? b) Uandanta je káni sánderu sési jarhaski paraksï íri ambe uandontskuarheni.
4 Enga temungurhiri ma uandaska eskaksï kaauaka sapiichani, jatsistiksï para exeni tsimani ambe enga jukaparhakueka: orheta, na jatinksï uékasïni kaani, ka tsimani úni jámani, namunksï uékasïni kaani. Peru, ¿káni sánderu sési jarhaski para íri ambe uandontskuarheni? ¿Ka andisï xáni jukaparhakue ísï úni?
5 Sánderu sésisti eskaksï nobiuecha uandontskuarhiaka íri ambe ante deksï tembuperani, jimboka kánikua jukaparhakueska eskaksï tsimarhani májkueni eratsiaka íri ambe. Ístuksï jatsisti para sési eratsini sinksï listu jarhaskia paraksï sapiichani kánguarhiani. Máru engaksï apenasi tembuperaka, sánderuksï sési exesïndi erokuarhini ma o tsimani uéxurhini paraksï sapiichani kaani, jimboka para i ambe kánikua tiempu uétarhisïnga ka uinhapikua. Exesïndiksï eska erokuarhini, jarhuatauaka paraksï pʼindeni temungurhirini irekani ka paraksï sánderu sési pájperani (Efes. 5:33).
6. Exeparini ini jurhiatikuechani engachi jimbo irekani jaka, ¿ambeksï erakuski úni máru temungurhiricha?
6 Máteru kristianuechaksï jorhenguarhisti Noeri tanimu uájpecheri ka imecheri témbecheri engaksï no sóntku kaapka sapiichani (Gén. 6:18; 9:18, 19; 10:1; 2 Ped. 2:5). Jesusi terokutantaspti ini jurhiatikuechani Noeri jurhiatikuecha jingoni, ka meru ísïsti eska ini jurhiatikuecha jimbojtu kánikua úkua jukaska ka peligru jarhani (Mat. 24:37; 2 Tim. 3:1). Ini ambe míteparini, máru temungurhirichaksï eratsesti nótki kaani sapiichani paraksï úni sánderu marhuakuni Tata Diosïni.
Engaksï temungurhiricha kurhamarhikuarhijka sinksï kaaua sapiichani o nómbe ka namuni, imecha engaksï jánhaskatiika jatsistiksï para “uénani kuenta úntani sentabu”. (Exe je párrafu 7). *
7. ¿Nénaksï uá jarhuataani temungurhirichani ari konsejuecha engaksï Lukasʌ 14:28, 29 ka Proverbios 21:5 jimbo jaka?
Lukasʌ 14:28, 29). Táticha engaksï kʼuiriperaakia sapiichani, mítestiksï eska para sapiichani kaani, no solu tumina uétarhisïnga, sino ístu tiempu ka uinhapikua. Jimbosï jukaparhakueti eskaksï temungurhiricha kurhamarhikuarhiaka: “¿Jatsiachi para tsimarhani ánchikuarhini para úni kéndani ambe enga familia uétarhinchaaka? ¿Tsimarhanchi májkueni eratsesïni ambeski ima ambe enga meru uétarhinchajka familia ma? Engachi jatsipiringa para tsimarhani ánchikuarhini, ¿né kuidariuapirini sapiichani? ¿Né uá arhini juchari sapini na enga jatsika para jámani ka eratseni?”. Temungurhiricha engaksï sési eratsentajka ini ambe, exesïndiksï ambe enga arhijka Proverbios 21:5 (arhinta je).
7 Engaksï temungurhiricha kurhamarhikuarhijka sinksï kaaua sapiichani o nómbe ka namuni, imecha engaksï jánhaskatiika jatsistiksï para “uénani kuenta úntani sentabu” (arhinta jeAcheeti enga xénchajka témbani, jánguarhintaati na enga xáni uáka para jarhuatani témbani. (Exe je párrafu 8).
8. a) ¿Náki uandanhiata ambeksï jatsiski paraksï temungurhiricha antesi exeni? b) ¿Ambe uá acheeti enga xénchajka témbani?
8 Táti ka nándi ma, jatsistiksï para kánikua tiempu ka uinhapikua úrani paraksï sapiicha jingoni jarhani. Ísï jimbo, engaksï sóntku kaaska uánikua sapiichani, jamberiksï sánderu úkua jukanchaati pendienti jarhani mándani sapi jimbo. Máru temungurhiricha engaksï indeni ambe nitamakuarhika, uandantastiksï eskaksï kánikua kuatarasïrenga. Jamberi nándi méntkisï kuataratini pʼikuarherani jauati enga jimbo no uáka estudiarini, kómarhini ni someni uérani aianhpini. Ístu jamberi úkua jukanchaati jingontku kurhaani tánguarhikuecharhu ka jorhenguarhini ambe ma. Peru acheeti enga xénchajka témbani, jánguarhintaati na enga xáni uáka para jarhuatani témbani tánguarhikuecharhu ka kʼumanchikuarhu. Por ejemplu, jarhuataati kʼumanchikuarhu anapu úkua ambe jingoni, jánguarhintaati mándani semana jatsini familiaeri jorhenguarhikua ka pʼindeni imeri familia jingoni uérani aianhpini.
NÉNA JORHENDAANI SAPIICHANI PARAKSÏ XÉNCHANI JEOBANI
9, 10. ¿Ambeksï jatsiski para úni táticha engaksï uéjka jarhuataani imecheri sapiichani?
9 ¿Ambeksï uá úni táticha paraksï jorhendaani sapiichani Jeobani xénchani? ¿Nénaksï uá kuájchakuani no sési jásï amberi enga ini parhakpinirhu jaka? Ju je exeani máru konsejuechani.
10 Kómarhi je Jeobani eskaksïni jarhuataaka. Ju je exeni Manoaeri ka imeri témberi ejemplu. Enga Manoa mítepka eskaksï Sansonini kánguarhipiringa, kómarhispti Jeobani eska arhipiringa néna kʼuiriperani.
11. Eska na arhijka Jueces 13:8, ¿ambeksï uá úni táticha paraksï májkueni úni eska Manoa?
Jueces 13:8).
11 Nihad ka Alma engaksï Bosnia-Herzegovina anapueka, májkuenksï úspti eska Manoa, uandantasïndiksï: “Ísï eska Manoa, kómarhispkachi Jeobani eskajtsïni jorhendapiringa ambakiti táticheni. Ka Jeobajtsïni mámaru jarhuataspti: Bibliani jimbo, publikasionicha, tánguarhikuecha ka kʼéri tánguarhikuecha jimbo” (arhinta je12. ¿Náki ejempluksï xarhatakuaspi Jose ka Maria imecheri sapiichani?
12 Jorhendaa je sapiichani chári ejemplu jingoni. Táticha, kánikua jukaparhakuesti ambe engajtsï arhiajka chári sapiichani. Peru jamberi sánderu marhuakuauati ambe engajtsï újka. Uákachi seguru jarhani eskaksï Jose ka Maria ambakiti ejemplu íntsaaspka imecheri sapiichani, asta Jesusini. Jose no solu jánguarhintaspti kánikua ánchikuarhini para imeri familiani kéndani, sino ístu jarhuataaspti paraksï jukaparharani Jeobani kómarhini (Deut. 4:9, 10). Nájkiruka Lei no meru uandenga eskaksï jatsispka para ísï úni, Jose “mándani uéxurhini” pásïrendi imeri familiani jini Jerusaleni paraksï Paskua úntani (Luk. 2:41, 42). Jamberi máru táticha engaksï Joseri jurhiakuecha jimbo irekapka, ísïksï exendi eska Jerusaleni nirani familia jingoni kánikua úkua jukaspka, iauanini ka kánikua tumina uétarhini. Peru Jose jukaparharasïrendi Tata Diosïri ambe ka jorhendaaspti uájpechani paraksï májkueni úni. Ístu Maria sési mítespti Karakateri ambe. Ísï jimbo, jorhendaapti imeri uandakuecha ka úkuecha jingoni paraksï sapiicha jukaparharani Tata Diosïri Karakatani.
13. ¿Néna májkueni úspi temungurhiri ma ísï eska Jose ka Maria?
13 Nihad ka Alma engachi párrafu 11 jimbo uandaaka, jánguarhintasptiksï májkueni úni eska Jose ka Maria paraksï jarhuatani imecheri sapini xénchani ka marhuakuni Tata Diosïni. Imechaksï uandantasïndi ambe engaksï úpka: “Jánguarhintaspkachi eska juchari sapi exepiringa na engajtsïni marhuachijka úni ambe enga Biblia uandajka”. Ístu, Nihad uandasïndi: “Uétarhisïndi jánguarhintani parachi xásï kʼuiripu máeni na engachi uéjka eska jásïuaka juchari sapi”.
14. ¿Andiksïsï táticha jatsi para míteni né jingonksï kúnguarhisïni imecheri uájpecha?
14 Jarhuataa je chári sapiichani paraksï ambakiti amiguechani jatsiani. Tátichaksï jatsisti para míteni né jingonksï kúnguarhisïni uájpecha ka ambe engaksï újka. Ístuksï jatsisti para míteni nécha jingonksï uandontskuarhesïni telefonu ka redesi sosialicha jimbo. Amigu jembechaksï uáti úni eska chári uájpa ísï jámaaka ka eratsini eska imecha (1 Kor. 15:33).
15. ¿Ambeksï uá jorhenguarhini táticha Jessieri ambe?
15 ¿Ambeksï uá úni táticha engaksï no káni sési jorhenaka úrani komputadorani, tabletani o selularini? Filipinas anapu táti ma enga Jessie arhinhajka, uandasïndi: “Nájkirukachi no káni mítepka teknolojiaeri ambe, uandonskuarhikuaspkachi juchari sapiichani nákiskiksï máru peligruecha para indeni ambe úrani”. Nájkiruka Jessie no jorhenapka úraani imani aparatuechani, jurajkuaspti eskaksï imecheri uájpecha úraapiringa. Ima uandasïndi: “aianguaspka juchiti sapiichani eska computadora, selulari ka tableta, úpiringa marhuakuani para jorhenguarhini máteru idioma, paraksï prepararikuarini para tánguarhikuecha ka paraksï pauani pauani arhintani Biblia”. Táticha, ¿arhiantaskijtsïa ka uandontskuarhini chári uájpecha jingoni imani konsejuecheri ambe engaksï mensajicheri ka fotuecheri ambe uandajka enga pájina jw.org® jimbo jaka, partirhu “Tumbiicha”? ¿Exeaskijtsïa imecha jingoni arini bideuechani: ¿Nori úsïni jurajkuni chíti selularini o tabletani? Ka Mímixekua jingoni úraa redesi sosialichani? * I informasioni uátiksïni kánikua jarhuatani parajtsï chári sapiichani jorhendaani sési úraani aparatuechani (Prov. 13:20).
16. ¿Ambeksï úskia uánikua táticha, ka néna marhuakuaskia imecheri uájpechani?
16 Uánikua tátichaksï kánikua jánguarhintasïndi parakaksï imecheri sapiicha kúnguarhiaka imecha jingoni engaksï ambakiti ejemplu máeka para Jeobani marhuakuni. Ísïksï úspti N’Déni ka Bomine, temungurhiri ma engaksï Costa de Marfil anapueka. Imechaksï pʼindespti sirkuitueri orhejtsïkutini pʼímarhini para imecho pakarani. N’Déni uandasïndi: “I ambe kánikua marhuakuspti juchari sapini. Prekursori úkuarhispti ka iásï marhuaxati komu sirkuitueri orhejtsïkutiri jarhuajpiri”. Táticha, ¿úpirintsï chájtu indeni ambe úni para chári sapiichani jarhuataani?
17, 18. ¿Kánksï jatsiski táticha para uénani jorhendaani uájpechani?
17 Asï iónda je uénani jorhendaani chári sapiichani. Sánderu sési jauati engajtsï no ióndaska jorhendaani chári sapiichani (Prov. 22:6). Ísïksï úspti Timoteueri amamba Eunise ka nanita jemba Loida, engaksï jiáni uénapka jorhendani Timoteuni Jeobaeri ambe desde enga andajpenupka (2 Tim. 1:5; 3:15). Tátsekua, Timoteu niáraspti pámbetani apostuli Pabluni imeri biajicharhu.
18 Máteru temungurhiri engaksï ístu Costa de Marfil anapueka, Jean-Claude ka Peace, jorhendaasptiksï imecheri seisi sapiichani xénchani ka marhuakuni Jeobani. ¿Ambe jarhuataaspi paraksï ísï úni? Májkuenksï úspti eska Eunise ka Loida. Uandantasïndiksï: “Jiánchi uénaspka jorhendaani juchari sapiichani Tata Diosïri Karakateri ambe engaksï apenasi andajpenuenga” (Deut. 6:6, 7).
19. ¿Ambe arhikuekasïni jorhendaani sapiichani Tata Diosïri Karakateri ambe?
19 ¿Ambe arhikuekasïni jorhendaani sapiichani Tata Diosïri Karakateri ambe? Uandakua jorhendaani, arhikuekasïndi úni eska nema imeri eratsikuarhu pakataaka uandakua ma, someni repetiriparini. Paraksï tátiicha ísï úni, jatsistiksï para someni arhutani tiempu para sapiicha jingoni jarhani. Nájkirukaksï táticha niáraaka kuatarani engaksï méntku úndaska repetirikuani ambe ma imecheri sapiichani, uátiksï ísï exeni eskaksï jarhuataaxaka kurhanguni Tata Diosïri Karakatani ka paraksï ísï úni eska jimini na arhijka.
Tátichaksï jatsisti para exeni nénaksï kʼuiriperaa mándani sapini. (Exe je párrafu 20). *
20. Uandanta je néna úpirini jarhuataani tátichani Salmo 127:4 paraksï sapiichani kʼuiriperaani.
Salmo 127 jimbo arhisïndi eskaksï sapiicha ísïska komu flechecha (arhinta je Salmo 127:4). Ísï eskaksï flechecha na no májkueni úkata jarhajka niksï májkueni kʼéni, ístuksï sapiicha mámaru jásïsïndi. Ísï jimbo, tátichaksï jatsisti para exeni nénaksï kʼuiriperaa mándani sapini. Temungurhiri ma engaksï jini Israel anapueka, uandantasïndiksï ambe enga jarhuataapka paraksï úni eskaksï imecheri tsimani sapiicha niárapiringa Jeobani marhuakuni: “Mándani juchari sapiichanchi táchanisï jorhendaasïrenga Bibliaeri ambe”. Peru, tátichaksïsï jatsiti para exeni sini uétarhia ísï úni o sinksï uá ísï úni.
20 Sési mítea je chári sapiichani.JEOBAKSÏNI JARHUATAATI
21. ¿Néna uá jarhuataani Jeoba tátichani?
21 Jamberiksï ménisï táticha úpirindi ísï pʼikuarherani eska kánikua úkua jukaska sapiichani kʼuiriperaani, peruksï sapiicha Jeobaeri intsïmperakua máesti. Jeoba méntkisï listu jarhasïndi para tátichani jarhuataani. Jingontku kurhauasïndi imecheri kómarhikuechani ka mókukuantaasïndi Biblia jingoni, publikasionicha ka máteru ambakiti táticheri ejemplu ka konsejuecha jingoni engaksï kʼuiriperaakia sapiichani.
22. ¿Ambe sánderu ambakiti ambeksï uá táticha íntsaani uájpechani?
22 Máru kʼuiripuechaksï uandasïndi eska ma 20 uéxurhinisï uétarhisïnga paraksï táticha sapiichani kʼuiriperaani, peru ambe enga kʼóru ísïka, jindesti eskaksï táticha no méni kʼamaraaka tátiini. Sánderu ambakiti ambe engaksï uáka íntsaani uájpechani jindesti uékperakua, tiempu ka Bibliaeri ambe jorhendaani. Nóksï iámindu sapiicha májkueni jiókuarhisïndi ambe engaksï jorhendanhajka. Peru uánikuecha engaksï ima táticha tʼarhexeraaka engaksï xénchajka Jeobani, ísïksï pʼikuarherasïndi eska Joanna Mae, Asia anapu pirenchi ma enga uandajka: “Engani eratsentajka na engajtsïni juchiti táticha jorhendaka, jaiapanhikuantasïnga engajtsïni jurhimberantaka ka jorhendani xénchani Jeobani, no solujtsïni íntskusti tsípikua, ístujtsïni jorhendasti tsípikua jingoni irekani” (Prov. 23:24, 25). Uánikua Jeobaeri marhuarichaksï májkueni pʼikuarherasïndi.
PIREKUA 59 Ju kʼéri ambe arhini Jeobani
^ párr. 5 Imecha engaksï temungurhirikia, ¿jatsipirinksï para kaani sapiichani? Ka enga ísïka, ¿namuni? ¿Ka nénaksï jatsiski para kʼuiriperaani sapiichani paraksï niárani xénchani ka marhuakuni Jeobani? Ini artikulu jimboksï jarhasti máru iásï anapu ejempluecha ka Bibliaeri konsejuecha engajtsïni jarhuataaka mókuantani ini kurhamarhikuechani.
^ párr. 15 Ístujtsï uáka exeni “Asï no sési úkuarhincha redesi sosialicha jingoni” enga Programarhu para ánchikuarhini tánguarhikuarhu Kristianuecheri Irekua ka Aianhpikua jimbo jaka juniueri 2018.
^ párr. 60 AMBE ENGA XARHATAJKA IMAJENI: Temungurhiri ma engaksï Jeobani marhuakujka, uandontskuarhixatiksï sinksï kaaua sapiichani o nómbe ka eratsentaxatiksï na engaksï tsípikuarhiaka ka ambe engaksï xáni jatsiaka para úni engaksï kaauaka sapiichani.
^ párr. 64 AMBE ENGA XARHATAJKA IMAJENI: Temungurhiri ma táchani jorhendaaxati imecheri sapiichani Bibliaeri ambe, jimbokaksï no májkueni jatiriska níjtuksï újki májkueni ambe kurhanguni.