1. ¿Nénaksï exesïni uánikua kʼuiripuecha ánchikuarhitani?

¿NÉNAKSÏ exesïni ánchikuarhita sáno iámindu kʼuiripuecha jima engajtsï irekaka? Uánikua paisicha jimbo, kʼuiripuechaksï jukari ánchikuarhisïndi. Ka ini ambe jimbo, uánikuaksï jukari ánchikuarhisïndi engaksï no jamberi tiempu jatsijka para mintsikuarhini, imecheri familia jingoni jarhani ni para Tata Diosïri ambe jorhenguarhini (Ecl. 2:23). Peruksï jarhasti máteru kʼuiripuecha engaksï ménderu no tsitijka ánchikuarhini ka mámaru ambeksï jirinhakuntasïndi paraksï no ánchikuarhini (Prov. 26:13, 14).

2, 3. ¿Náki ejemplujtsïni íntskusïni Jeoba ka Jesusi ánchikuarhiteri ambe?

² Jarhastiksï uánikua kʼuiripuecha engaksï jukari ánchikuarhijka ka máteruecha engaksï no tsitijka. Peru eratsinta je na engaksï exejka Jeoba ka Jesusi ánchikuarhitani. Míteskachi eska Jeoba tsitisïnga ánchikuarhini. Jesusi sési xarhataspti ini ambe enga uandapka: “Juchiti Táti méntkisï ánchikuarhisïndi asta i jurhiatikueri jamberi, ka jíjtuni jatsiska para ísï ánchikuarhini” (Juanu 5:17). Ju je eranhaskani na enga xáni uánikua ánjelichani kuerauaka ka iámindu ambe enga xáni auandarhisï jaka ka iámindu ambe enga ixú juchari parhakpinirhu jaka enga xáni sési jáxeka. Ini ambe jimbosï Bibliaeri pireri ma uandapti: “¡Xándi uánikua ambe úka tʼu, oh Jeoba! Mímixekua jingondi úska iámindu ambe. Echeri uinindentasti ima ambe jingoni engari tʼu kueraaka” (Sal. 104:24).

³ Jesusi májkueni jámaspti eska imeri Táti. Jarhuataspti Tata Diosïni jiáni enga ima auandani úni japka, ka imani jingoni jarhaspti komu ambakiti ánchikuarhiri ma (Prov. 8:27-31). Ísï ióni jimbo, enga Echerirhu japka, ambakiti ánchikuarhita ma úspti. I ánchikuarhita para ima ísïspti komu imeri tʼirekua, ka iámindu ambe enga ima úpka xarhataspti eska Tata Diosï axaspka (Juanu 4:34; 5:36; 14:10, TNM).

4. ¿Ambechi jorhenguarhisïni Jeoba ka Jesusiri mintsikuarhikueri ambe?

 ⁴ Jeobaeri ejemplu ka Jesusiri, ¿xarhatasïni eskachi no jatsiska para mintsikuarhini? Nómbe. Jeoba no méni kuatarasïndi, ísï jimbo no uétarhinchasïndi mintsikuarhini ísï eska jucha. Peru Biblia uandasïndi eska ísï tátsekua enga Jeoba úpkia auandani ka echerini niáraspka nóteru ánchikuarhinia ka mintsikuarhini (Éx. 31:17). Peekaksï i uandakuecha arhikuekajka eska nóteru ambe ma kueraaspkia ka eska arhutaspka tiempu para tsípikuarhini imani ambe jimbo enga kueraapka. Ka Jesusi, nájkiruka kánikua ánchikuarhipka enga Echerirhu japka, ístu arhutaspti tiempu para mintsikuarhini ka tsitisïrendi imeri amiguecha jingoni tʼireni (Mat. 14:13; Luk. 7:34).

5. ¿Ambeksï úkua jukanchasïni úni uánikua kristianuecha?

⁵ Biblia arhiasïndi imechani engaksï Tata Diosïni marhuakujka eskaksï ánchikuarhiriuaka, no xépitiini (Prov. 15:19). Jamberijtsï kánikua ánchikuarhijka parajtsï chári familiani kéndani ambe ma. Ka iámindu kristianuechachi jatsiska ánchikuarhita ma, aianhpini ambakiti aianhperakuani. Peruchi ístu jatsiska para sési mintsikuarhini. ¿Ménisïchi úkua jukanchasïni tiempu arhutani para ánchikuarhini, para aianhpini ka para mintsikuarhini? ¿Nénachi uá míteni na xáni ánchikuarhini ka na xáni mintsikuarhini?

6. ¿Néna xarhatasïni Markusʌ 6:30-34 eska Jesusi jukaparharasïrenga ánchikuarhini ka ístu mintsikuarhini?

⁶ Uétarhisïndi sésku ísï jukaparharani ánchikuarhitani. Rei Salomoni, espiritu santu jimbo karaspti: “Jarhasti tiempu ma [...] para mándani ánchikuarhita”, ka máru ambe enga uandapka jindesti júskani, kʼumanchikua úni, uerani, tsípini ka uarhani (Ecl. 3:1-8). Sési xarharasïndi eska ánchikuarhini ka mintsikuarhini tsimani ambeska enga kánikua jukaparhakueka juchari irekuarhu. Jesusi sési mítespti néna úni ini tsimani ambe. Ma xanhari, imeri apostulichaksï aianhpikuarhu uératini kʼuanhatsentaspti. Xáni sési nikuaspti engaksï no jatsipka tiempu “ni sikiera para tʼireni”. Jesusi arhiaspti: “Ju je támu niárani jima enga no nema irekaka parakajtsï mintsikuarhiaka sáni” (arhinta je Markusʌ 6:30-34). Ni Jesusi ni imeri chúxapatichaksï uéni méntkisï sési mintsikuarhini eskaksï na uékapiringa. Peru Jesusi mítespti eskaksï imecha uétarhinchasïrenga mintsikuarhini.

7. ¿Nénajtsïni jarhuataa jorhenguarhini sábadu anapu juramukueri ambe?

⁷ Ménisï uétarhisïndi mintsikuarhini sáni o máteru ambe úni. I ambe xarharasïndi juramukua ma jimbo enga Jeoba israelitechani íntsaapka Moisesiri Lei jimbo: jatsisptiksï para mintsikuarhini mándani semana sábadu jurhiatikua. Ísïsti eskachi jucha nóteru Moisesiri Lei jimbo jarhaskia, peruchi uáka ambakiti ambe jorhenguarhini ambe enga uandajka sábadueri ambe. Ambe engachi jorhenguarhiaka, jarhuataatijtsïni parachi míteni nénachi exesïni juchari ánchikuarhitani ka mintsikuarhikua ambe.

8. Eska na arhijka Éxodo 31:12-15, ¿ambeksï jatsispi para úni israelitecha sábadu?

⁸ Tata Diosïri Karakata arhisïndi eska seisi jurhiatikua ísï tátsekua, Jeoba nóteru kueraaxapkia ambe ma Echerirhu (Gén. 2:2). Joperu Jeoba tsitisïndi ánchikuarhini, ísï jimbo, seguirixati máteru ánchikuarhita ambe úni (Juanu 5:17). Jeoba seisi jurhiatikua ánchikuarhispti ka jurhiatikua siete jimbo mintsikuarhispti ka májkueni arhiaspti israelitechani eskaksï mintsikuarhipiringa jurhiatikua siete jimbo. Tata Diosï uandaspti eska sábadu mínda máespka entre ima ka israelitecha. Jurhiatikua máespti para kʼamakʼamasï mintsikuarhini ka jurhiatikua pímbinhasï ma para Jeoba (arhinta je Éxodo 31:12-15). No nema jatsispti para ánchikuarhini, ni tataka sapiraticha ni jántspiricha. Ni animalicha engaksï kʼuiripuecha jatsikuarhiapka  uéni ánchikuarhini (Éx. 20:10). I ambe úsïrendi eskaksï israelitecha sánderu sési marhuakupiringa Tata Diosïni.

9. Jesusiri jurhiatikuecha jimbo, ¿ambeksï eratsesïreni máru kʼuiripuecha sábadueri ambe enga no sési japka?

⁹ Sábadu, ambakiti jurhiatikua máespti para imecha engaksï Tata Diosïni marhuakuenga. Peru Jesusiri jurhiatikuecha jimbo, uánikua relijioniri orhejtsïkutichaksï juramukuechani peeraaspti engaksï kánikua úkua jukapka paraksï sábaduni janhanharhini. Uandasïrendiksï eska no sésikua jarhaspka ni sikiera para semiia ambe pʼitaakuni o kʼuiripuni ma tsinani (Mar. 2:23-27; 3:2-5). Peru no i ambesï uékendi Jeoba, ka Jesusi sési mítetaraaspti ini ambe imechani engaksï kurhajchenga.

10. ¿Ambejtsïni jorhendasïni Mateu 12:9-12 na enga exenga Jesusi sábadu jurhiatikuani?

¹⁰ Jesusi ka imeri chúxapaticha engaksï judiuepka mintsikuarhisïrendiksï sábadu, jimbokaksï úsïrenga ambe enga Moisesiri Lei uandenga. * Peru Jesusi xarhataspti ima ambe jimbo enga úpka ka uandani, eska uétarhisïrenga kurhangutspini ka eska ima jurhiatikua jimbo sésikua jarhaspka para ambakiti ambe úni. Uandaspti: “Sésikua jarhasti para ambakiti ambe úni mintsikuarhikueri jurhiatikua jimbo” (arhinta je Mateu 12:9-12). No ísï exesïrendi eska ambakiti ambe úni jindespka no kurhajchani sábadu anapu juramukuani. Ambe enga ima úpka, xarhataspti andisï xáni jukaparhakuepi no ánchikuarhini ima jurhiatikua. Jimbokaksï israelitecha no úsïrenga imani ambe engaksï pauani pauani uénga, mintsikuarhisïrendiksï ka úsïrendiksï sánderu sési úni imani ambe enga Tata Diosïri ambepka. Jesusiri familia úrasïrendi sábadu jurhiatikuani para Tata Diosïni kómarhini, ísï eska na xarhatajka  ambe engachi arhintajka ima amberi enga Jesusi úpka jini ireta Nasareti. Biblia arhisïndi: “Eska na jindepka imeri pʼindekua, ima mintsikuarhikueri jurhiatikua jimbo niraspti tiostarhu ka jauaraspti para arhintani ma karakata” (Luk. 4:15-19).

11. ¿Né íntskuspi ambakiti ejemplu ma Jesusini na enga jindeka uinhamu ánchikuarhini?

¹¹ Seguru eska Jose jorhendapka Jesusini na enga exejka Tata Diosï ánchikuarhitani jiáni enga jorhendani japka karpinterueri ánchikuarhitani (Mat. 13:55, 56). Ka Jesusi exepti Joseni na enga xáni jánguarhintenga pauani pauani ánchikuarhini para imeri kʼéri familiani kéndani ambe ma. Jukaparhakuesti exeni eska Jesusi arhiaspka imeri chúxapatichani: “Jimboka ima enga ánchikuarhini jámajka, jukanchasïnga eska maiamunhaaka” (Luk. 10:7). Ísï jimbo, ima mítespti nénaespi uinhamu ánchikuarhini.

12. ¿Náki Bibliaeri karakatechaksï xarhatasïni na enga jindeka uinhamu ánchikuarhini?

¹² Apostuli Pablu ístu mítespti na enga jindepka uinhamu ánchikuarhini. Ambe enga sánderu uénga, jindespti Jesusiri ambe aianhpini ka ambe enga ima jorhentpipka. Peru ístu ánchikuarhisïrendi para kéndakuarhini ambe ma. Tesalonika anapuechaksï mítespti eska ima ánchikuarhispka “chúrikua ka jurhiakua asta kuatarani jamberi” paraka no máteru nema maiampikuni japiringa ambe ma (2 Tes. 3:8; Uku. 20:34, 35). Ini uandakuecha jingoni, jamberi imani ambe arhikuekani japti enga jini Korintu úpka. Korintu, Ákila ka Prisila “jingoni pakaraspti ánchikuarhini” “jimbokaksï tsimarhani uapajtsïtakua úrispka” o kʼumanchikua sïkuiriri. Enga uandapka eska “chúrikua ka jurhiakua” ánchikuarhispka, no arhikuekasïrendi eska puru ánchikuarhini jarhasïrenga. Por ejemplu, úrasïrendi sábadu para Tata Diosïri ambe aianguani judiuechani engaksï ístu no ánchikuarhenga ima jurhiatikua (Uku. 13:14-16, 42-44; 16:13; 18:1-4, TNM).

13. ¿Ambechi uá jorhenguarhini ambe enga Pablu úpka?

¹³ Apostuli Pablu ambakiti ejemplu ma íntspispti. Nájkiruka jatsipka para ánchikuarhini, jánguarhintaspti someni nirani uandantani Tata “Diosïri ambakiti aianhperakuani” (Rom. 15:16; 2 Kor. 11:23). Pʼímarhiaspti máteruechani paraksï májkueni jánguarhintani aianhpini. Ísï jimbo, nájkirukaksï Ákila ka Prisila, Pabluni jingoni ánchikuarhipka paraksï kʼumanchikua sïkuiririchani uáni, ambe enga sánderu jukaparhakuepka jindespti eskaksï niáraspka jindeni “jarhuajpiricha Kristu Jesusini jimbo” (Rom. 12:11; 16:3). Pablu arhiaspti Korintu anapuechani eskaksï méntku úni japiringa Tata Diosïri ánchikuarhitani (1 Kor. 15:58; 2 Kor. 9:8). Ka espiritu santu jimbo karaspti: “Enga nema no uékaaka ánchikuarhini nójtu tʼireati ” (2 Tes. 3:10).

14. ¿Ambe arhikuekaxapi Jesusi imani uandakuecha jingoni engaksï Juanu 14:12 jaka?

¹⁴ Ánchikuarhita enga sánderu jukaparhakueka ini últimu jurhiatikuecha jimbo, jindesti aianhpini ka Jesusiri chúxapati uáni. Jesusi uandaspti eskaksï imeri chúxapaticha sánderu uánikua ambe úpiringa eska ima (arhinta je Juanu 14:12). No arhikuekaxapti eskaksï milagruechani uápiringa ísï eska ima, sánderu sési, eskaksï aianhpipiringa ka jorhentpini sánderu uánikua iretecha jimbo, sánderu uánikua kʼuiripuechani ka sánderu ióni eska ima.

15. ¿Náki kurhamarhikuechanchi jatsiski para úkuarhiani ka andi?

¹⁵ Engachi ánchikuarhita ma jatsika, ju je kurhamarhikuarhini: “¿Ísï mítekateski eskani ambakiti ánchikuarhiri máeska? ¿Tiempu jingoni kʼamarasïni juchiti ánchikuarhitani ka jánguarhintasïni sési úni?”. Engachi uandajka eska jo, jiájkani juchari jefijtsïni mintsikajti ka jamberiksï juchari kompanieruecha uékajti kurhaani ambakiti aianhperakuani. Peru iásï juchari ánchikuarhita jimbo enga jindeka nirani aianhpini ka jorhentpini, ju je kurhamarhikuarhini: “¿Ísï mítenhaski eska nema enga kánikua jánguarhintajka? Engani uénaaka pʼorhembini  nemani, ¿sési exesïni ambe engani uandaaka? ¿No ióndasïni nirani pʼorhembiantaani imechani engajtsïni kurhajchajka? Ka ¿jánguarhisïni méntkisï aianhpini úparini iámindu ambe enga xáni uétarhijka para aianhpini?”. Engachi uandajka eska jo, jiájkani ambakiti aianhpirichi máeka ka engachi tsípikua jingoni nirajka aianhpini.

16. Ima ambe engaksï iásï anapu kʼuiripuecha eratsejka mintsikuarhikueri ambe, ¿ambe jimbo no májkueniski ambe engaksï eratsenga Jesusi ka imeri apostulicha?

¹⁶ Jesusi mítespti eska ima ka imeri apostulichaksï uétarhinchasïrenga ménisï mintsikuarhini. Peru májkueni eska iásï, imani tiempu jimbo uánikua kʼuiripuechaksï ísï eratsesïrendi eska acheeti jatsikuarhiri enga Jesusi uandantapka. I achamasï ísï arhikuarhisïrendi: “Mintsikuarhi ka tʼire ka itsïma ka tsípikuarhi” (Luk. 12:19; 2 Tim. 3:4). Ambe enga sánderu jukaparharenga ima acheeti, jindespti mintsikuarhini ka tsípikuarheni. Joperu Jesusi ka imeri apostulichaksï no uékaspti puru tsípikuarhini jámani.

17. ¿Ambechi úsïni engachi no ánchikuarhini jarhajka?

¹⁷ Juchachi jánguarhintasïnga májkueni jámani eska Jesusi, úraparini imani tiempuni engachi no ánchikuarhini jarhajka, no solu parachi mintsikuarhini sino parachi aianhpini ka tánguarhikuecharhu nirani. Xánchi jukaparharasïnga ini tsimani pímbinhasï ánchikuerhitechani engachi jánguarhintajka méntikisï ísï úni (Ebr. 10:24, 25). Asta nirasïngachi tánguarhikuecharhu ka jirinhakuntasïngachi néna uandontskuarhekuani kʼuiripuechani Tata Diosïri ambe, jiáni jamberi engachi uérakua ísï jámani jauaka mintsikuarhini sáni, no arhiparini nani engachi jauaka (2 Tim. 4:2).

18. ¿Ambe uékasïni juchari Juramuti tata Jesukristu eskachi uáka?

¹⁸ Kánikuachi sési pʼikuarherasïnga enga juchari Juramuti tata Jesukristu, nójtsïni kurhachijka imani ambe engachi no újka úni ka engajtsïni jarhuatajka néna uétarhisïni exeni ánchikuarhitani ka mintsikuarhikua ambe (Ebr. 4:15). Jesusi uékasïndi eskachi sési mintsikuarhiaka. Ka ístu uékasïndi eskachi uinhamu ánchikuarhiaka parachi úni jatsini ambe engachi uétarhinchaaka ka eskachi jánguarhintaaka úni xáni sési jásï ánchikuarhitani enga jindeka imeri chúxapatichani uáni. Máteru jorhenguarhikua jimbo, exeakachi ambe úskia Jesusi parajtsïni pʼímutantani ambe máeri enga ísïka enajkijtsïni jupikakata jatsi ka no sésijtsïni kámani jarhani.