Ambe enga arhijka Deuteronomio 22:25-27 no jindespti para xarhatani sini acheeti kulpa jatsispi o nómbe, jimboka ini karakatarhu xarharasptia eska acheeti kulpa jatsispka. Ambe enga kʼóru uékenga xarhatani jindespti eska uátsï no kulpa jatsispka. Ju je exeani máru karakatechani.

Máru karakatecha antesi, acheetiri ma uandasïndi enga iretarhu uátsï ma jingoni apondijka enga kurhajkuarhikata jakaia. Jimboka uátsïchani engaksï kurhajkuarhikata jarhenguia ísïksï exeasïrendia enajkiksï uambuchatini japia, acheeti kulpa jatsispti jimboka ísku jándikua ambe niátaspka. ¿Ka uátsï kulpa jatsispi o nómbe? No uinhachaspti iretarhu. Enga ísï úpiringa, nema kurhaapirindi ka úpirindiksï kuájpini. Peru jimboka uátsï no uinhachaspka, imajtu ísku jándikua ambe niátaspti. Ísï jimbo, tsimarhanksï kulpa jatsispti (Deut. 22:23, 24).

Peru ístu Lei uandasïrendi máteru ambe enga úpiringa úkuarhini: “Joperu enga acheeti juátarhu exentaka uátsïni enga kurhajkuarhikata jakaia ka afuersa úni eska imani jingoni apondiaka, solu acheeti jatsisti para uarhini enga uátsïni jingoni apodika; nóri ambe ma jatsiska para úkuni uátsïni. Ima no ma ambe no sési niátasti enga jukanchaka para uarhini. I ambe májkuenisti eska ima acheeti enga atajka kʼuiripuni ma ka uándikuni. Jimboka acheeti juátarhu exentaska ka uátsï enga kurhajkuarhikata jaka uinhachasti, joperu no nema jarhaspti enga úpiringa kuájpintani” (Deut. 22:25-27).

Ini ejemplurhu, juesichaksï uátsïni jakajkukusïrendi. Niárasïrendiksï jakajkuni eska uátsï ‘uinhachaspka, joperu no nema jarhani enga úpiringa kuájpintani’. Ísï jimbo, uátsï no niáraspti ísku jándikua ambe niátani. Joperu acheeti kulpa jatsispti tsimani ambe jimbo: biolarini uátsïni ka ísku jándikua ambe niátani jimboka afuersa úska eska uátsï imani jingoni apondipiringa.

Jiájkani, nájkiruka ini karakata jimbo ambe enga uékenga xarhatanhani jindepka eska uátsï no kulpa jatsispka, i karakata ístu niárasïndi sési xarhatani eska acheeti meru kulpa jatsispka tsimani ambe jimbo: biolarini uátsïni ka ísku jándikua ambe niátani. Uákachi seguru jarhani eskaksï juesicha sési exenga iámindu ambe ka eskaksï ísïmindu úpiringa ambe enga Tata Diosï uánikua xanhari sési arhistakuapkia (Éx. 20:14; Deut. 13:14; 17:4).