Tata Diosï Jeoba arhiaspti israelitechani eskaksï jatsipiringa para pímbinhasïini. Ka para jarhuataani ísï úni, arini juramukua íntsaaspti: “Asï jáma chkuanderakua ambe jauatatspeni chiiti iretarhu. Asï jáma jauarani parari no sési ambe úkuni chiiti ermanueri tsípikuani. Ji jindeeska Tata Diosï Jeoba” (Lev. 19:2, 16).

Uandakuecha jauarani para no sési ambe úkuni sésiksï xarhatasïndi ambe enga arhikuekajka Ebreu jimbo. Peru, ¿ambe arhikuekasïni? Libru ma enga judíu jimbo jaka ísï uandasïndi i bersikuelueri ambe: “I parti bersikulueri úkua jukasïndi kurhangukuarhini, jimboka Ebreu jimbo arhikuekasïnga ‘jima no iauani anhandetini jarhani o jima máekanda’”.

Máruksï uandasïndi eska i karakata terukuntasïnga bersikulu 15 jingoni enga arhijka: “Jurhimbikua jingoni jusgarpi juisirhu ma. Asï menusi ú pobrini nijturi sánderu kʼuetsapeni riku jingoni. Jurhimbikua jingoni jusgarii je chaari ermanuni” (Lev. 19:15). Enga ísïipiringa, juramukua enga bersikulu 16 jimbo jaka para no jámani jauarani para no sési úkuni nemani, arhikuekani japirindi eskaksï israelitecha iámindu ambe jimbo jurhimbitku jámapiringa, juisiuecharhu, negosiuecharhu ka familiarhu. Ka eskaksï no úpiringa ambe ma no jurhimbikua jingoni solu para imeechajku sési uéranchani. Ísïisti, jatsiskachi para indeni ambe úni, peruchi uaaka sánderu sési kurhanguni ambe engaksï arhikuekajka uandakuecha engaksï bersikulu 16 jimbo jaka.

Ueenani jámani i bersikulurhu, Tata Diosï arhiaspi israelitechani eskaksï no jámapiringa chkuanderakua ambe jauatatspeni. Ju je miáni eska chkuanderakua ambe jauatatspeni, sánderu ambe arhikuekasïnga ka eska no sési ambe uandani nemeeri, nájkiruka íjtu ambe újka eska problemecha jauaka (Prov. 10:19; Ecl. 10:12-14; 1 Tim. 5:11-15; Sant. 3:6, TNM). Sáno méntkisï, enga nema chkuanderakua ambe jauatatspejka, jindeesïndi para no sési pakatani nemani. Ima kʼuiripu enga chkuanderakua ambe uandajka nemeeri uaati úni eska ima kʼuiripu uándikunhaaka. Inde ambesï úkuarhinchapti Naboti. Máru kʼuiripuechaksï chkuanderakua ambe uandaspti imeeri ambe ka indeni ambe jimboksï uándikuspti nájkiruka ima no ma ambe no sési niátapka (1 Rey. 21:8-13). Ísï jimbo, eska na arhijka máteru parti Levítico 19:16 jimbo, nema enga chkuanderakua ambe jauatatspejka, jauarani japirindi para no sési ambe úkuni máteru kʼuiripueri tsípikuani.

Ístu, jamberi nema chkuanderakua ambe jauatakuati máteru kʼuiripuni jimboka kurhunhisïnga. Karakata 1 Juanu 3:15 arhisïndi: “Ima enga ikiajka exeni ermanu jémbani [o kurhunhini] uándikpitisti. Ka chájtsï míteska eska ima enga uándikpini jámajka, nómindu jatsi[a]ka tsípikua para méntkisï”. Ístu, enga Tata Diosï na íntspipkia juramukuani enga Levítico 19:16 jimbo jaka, ístu uandaspti: “Asï jáma kurhunhini chiiti ermanuni” (Lev. 19:17).

Jiájkani juramukua enga Levítico 19:16 jimbo jaka, kánikua jukaparhakuesti para kristianuecha. Jatsiskachi para kénditaani no sési járhati eratsekuechani ka nóchi méni jatsiska para chkuanderakua ambe jauatatspeni. Engachi chkuanderakua ambe jauatakuska nemani jimbokachi no tsitisïnga na enga jásïika o jimbokachi enbidiarisïnga, xarhatanchi japiringa eskachi kurhunhisïnga. Ka kristianu ma, no nemani jatsisti para kurhunhini (Mat. 12:36, 37).