1, 2. a) ¿Náki juramukuaksï intsïnhaspi tanimu Jesúsiri apostolicha, ka ambeksï úspi? b) ¿Ambechi exea ini jorhenguarhikua jimbo?

ENGA na nitamapkia kʼuínchikua Paskueri uéxurhini 32 jimbo, apostoli Pedru, Santiagu ka Juanu, exesptiksï jánhaskakua ma enga ísku pakataapka. Kʼéri juáta ma jimbo, jimeesïsï enga juáta Ermoni jaka, Jesúsi ménderueni jáxentaspti imeechani japarini. Biblia uandantasïndi: “Tʼíntskua jukanharhispti eska jurhiakua, ka xukuparhakua tʼuputʼupusïntaspti méntku eska tʼíntskua” (Mat. 17:1-4). Enga na kʼamarani japkia jánhaskakua, apostolichaksï kurhaaspti Tata Diosïni uandani: “I jindeesti juchiiti uátsï engani ji xáni uékajka ka engani jimbo tsípikuarhijka, kurhajcha je” (Mat. 17:5). Na engaksï irekapka i apostolicha xarhatasptiksï eskaksï meru kurhajchasïreenga Jesúsini ka juchachi májkueni uékasïnga úni.

² Máteru jorhenguarhikua jimbochi exeska eskachi jatsiska para jurajkuni úni máru ambe parachi kurhajchani Jesúsini. Ini jorhenguarhikua jimbo, tsimani ambechi exeni jauaka enga Jesúsi uandapka eskachi jatsiska para úni.

3. Eska na arhijka Mateu 7:13, 14, ¿ambe uandaspi Jesúsi eskachi jatsiska para úni?

³ (Arhinta je Mateu 7:13, 14). Jesúsi uandaspti eskaksï tsimani puertecha jarhaska ka eskaksï táchani xanharuecharhu pájpisïnga, ma xanharu, ‘kórhurasti’ ka máteru ‘no kórhurasti’. Nóksï jarhasti máteru xanharuecha. Mándani kʼuiripu jatsisti  para erakuni náki jimbo niua. Kánikua jukaparhakuesti eskachi sési erakuaka náki jimbochi niua engachi uékajka irekani para méntkisï.

4. ¿Na jásïiski xanharu enga kórhuraka?

⁴ Uétarhisïndi eskachi sési míteaka andiksïsï no májkueni i xanharuecha. Uánikua kʼuiripuechaksï erakusïndi xanharuni enga “kórhuraka” jimboka no úkua jukaska jimeesïsï nirani. Ka xáni no sési engaksï uánikuecha chúngumaajka indeni xanharu jimbo. Nóksï kuenta íntskukuarhesïndi eska Satanasisi uéjka eskaksï imani xanharu jimbo niuaka enga uarhikuarhu pájpijka (1 Kor. 6:9, 10; 1 Juanu 5:19).

5. ¿Ambeksï úski máru kʼuiripuecha paraksï úni exentani xanharuni enga no kórhuraka ka paraksï ueenani imani xanharu jimbo nirani?

⁵ Máteru xanharu ‘no kórhurasti’ ka Jesúsi uandaspti eskaksï namunitkueska engaksï exentajka. ¿Andi? Máteru bersikulu jimbo, Jesúsi arhiaspti eskaksï jingontku jámapiringa profeta no jurhimbiticha jingoni (Mat. 7:15). Exenhastia eska uánikua relijionicha jarhaska, ka sáno iáminduechaksï uandasïndi eskaksï jurhimbitku jorhentpisïnga. Xáni uánikua relijionicha jingoni, kʼuiripuechaksï chkétakuarhistia ka nóksï mítesti náki jindeeski relijioni jurhimbiti ka niteruksï jánguarhintajkia jirinhantani imani enga tsípikuarhu pájpijka. Peruksï uaati exentani jimboka Jesúsi uandaspka: “Engajtsï chá méntku jauenaska úni eskaksïni ji na arhijka, sési jimbo chá jindeaka juchiiti jorhenguarhiticha. Ka míteakajtsï indeni ambe enga sési jimboeka, ka inde ambe enga sési jimboeka, uaati eska chá nóteru jindeaka jántspiricha” (Juanu 8:31, 32). Xáni sési engajtsï chá jirinhantaka jurhimbikuani. Ueenaskapkajtsï sési jorhenguarhini Tata Diosïri Karakatani parajtsï jorhenguarhini ambe enga ima juramujka ka úspkajtsï ambe enga Jesúsi jorhentpipka. Pori ejemplu, jorhenguarhiskajtsï eska Tata Diosï Jeoba erokuarhisïnga eskachi no jiókuarhiaka ambe engaksï relijioni no jurhimbiticha jorhentpijka ka eskachi no uántauaka kʼuínchikuechani o pʼindekuechani engaksï no Bibliarhu jupindaskuarhijka. Ístujtsï exeska eska ménichanisï úkua jukasïnga imani ambe úni engajtsïni Tata Diosï Jeoba kurhachejka ka no úni imani ambe enga ima no jaiapanhentajka (Mat. 10:34-36). Jamberijtsï úkua jukanchapka jurajkuni ini ambe, joperu jimbokajtsï xénchasïnga chaari Taati auandarhu anapuni ka jimbokajtsï uékaspka jaiapanherantani, úskajtsï orhepani uérani. Tata Diosï Jeoba kánikua sési pʼikuarherajti chánksïni jingoni (Prov. 27:11).

6. Eska na arhijka Salmo 119:9, 10, 45 ka 133, ¿ambejtsïni uaa jarhuatani parachi seguirini nirani indeni xanharuni jimbo enga no kórhuraka?

⁶ Engachi ueenakia indeni xanharu jimbo nirani enga no kórhuraka, ¿ambejtsïni jarhuata seguirini jimini nirani? Ju je exeni ejemplu ma. Máru paisicha jimbo, karreterecharhu engaksï no xáni kórhuraka jukastiksï ambe ma paraksï karruecha no uéjparhukuni o uekanheni. ¿A no eska no ma kʼuiripu uandapiringa eska no sési jarhaska engaksï ísï jatsikuka indeni ambe? Májkuentsïni marhuachesïndi Tata Diosï Jeobaeri juramukuecha engaksï Bibliarhu jaka parachi seguirini indeni xanharu jimbo nirani enga no kórhuraka (arhinta je Salmo 119:9, 10, 45, 133).

7. ¿Nénaksï jatsiski para exeni tumbiicha xanharuni enga no kórhuraka?

⁷ Tumbi, ¿exesïniri eskaksïni Tata Diosï Jeobaeri juramukuecha no jurajkusïnga iámindu ambe úni engari uékapiringa? Indeni ambesï uékajti Satanasi eskari eratseaka. Jánguarhintasïndi parakari exeaka eska imeecha engaksï imani xanharu jimbo nirani jaka enga  kórhuraka, kánikuaksï tsípikuarhisïnga. Uékasïndi eskari eratseaka eskari no xáni tsípikuarhixaka eska chiiti kompanieruecha eskuelarhu anapu ka eska imeecha engari internetirhu exeajka ka eskaksïni Tata Diosï Jeobaeri juramukuecha no jurajkusïnga eskari sési nitamakuarhiaka. * Peru miá eska Satanasi no uékasïnga eskari exeaka na engaksï kʼamarhukuaka imeecha. Joperu Tata Diosï Jeobakini exerasïndi náki kóntperatechandi jatsiaua engari seguiriska indeni xanharu jimbo nirani enga tsípikuarhu pájpijka (Sal. 37:29; Is. 35:5, 6; 65:21-23).

8. ¿Ambeksï uaa jorhenguarhini tumbiicha Olafiri ejemplueri?

⁸ Eratsi ambe engari uaaka jorhenguarhini erachiri ma enga arhinhajka Olaf. * Imeeri kompanieruechaksï méntku arhini jarhasïreendi eska ísku jándikua ambe niátapiringa. Enga  ima arhiapka eskaksï Jeobaeri testiguecha ísï irekasïnga eska Biblia na uandajka, uátsïchaksï sánderu jánguarhintaspti para ima imeecha jingoni apondini. Peru ima no jurajkutakuarhispti. Ka no indeni ambejkusï nitamakuarhipti, ima uandasïndi: “Juchiiti maestruechajtsïni méntku arhini jarhasïreendi eskani unibersidadirhu nipiringa parani ambe máeni”. ¿Ambe jarhuataspi paraka úpiringa orhepani uérani? Ima uandantasïndi: “Ambakiti amiguechani jirinhaaspka kúnguarhikuarhu engaksï niárapka ísïini eska juchiiti familia. Ístu ueenaspka sánderuni jorhenguarhini Biblieri ambe. Engani sánderu sési jorhenguarhienga, sánderuni seguru jarhasïreenga eska í jindeeska jurhimbikua ka sánderuni uékasïreenga Tata Diosï Jeobani marhuakuni”.

9. ¿Ambechi jatsiski para úni parachi imani xanharu jimbo nirani enga no kórhuraka?

⁹ Satanasi uékasïndi eskachi nóteru imani xanharu jimbo niuakia enga tsípikuarhu pájpijka ka eskachi ima kʼuiripuechani chúngumauaka engaksï imani xanharu jimbo nirajka enga kórhuraka ka enga uarhikuarhu pájpijka (Mat. 7:13). Joperu engachi seguiriska kurhajchani Jesúsini ka engachi exeska eskajtsïni inde xanharu enga no kórhuraka kuájchakusïnga, seguiriuakachi jimini nirani. Ju je exeni máteru ambe enga Jesúsi uandapka eskachi jatsiska para úni.

10. Eska na arhijka Mateu 5:23, 24, ¿ambe uandaspi Jesúsi eskachi jatsiska para úni?

¹⁰ (Arhinta je Mateu 5:23, 24). Ini bersikuluecha jimbo, Jesúsi imeeri ambe uandaxapti enga kánikua jukaparhakuepka para ima judiuecha engaksï kurhajchani japka. Eranhaska je eska nema templurhu jarhaskia para kéjtsïtakuni Tata Diosïni animalini ma. Enga jima míjpaapiringa eska jatsiska ambe ma máteru kʼuiripu jingoni, jatsispti para jima jurajkuni animalini ka kéndikuni jima. ¿Andi? Jimboka jarhaspka máteru ambe enga sánderu jukaparhakuepka. Jesúsi uandaspti: ‘Orheta puátanta chiiti ermanuni’.

11. ¿Ambe ka ambe úspi Jakobu para sési pájperantani Esaú jingoni?

¹¹ Ambe enga nitamanchapka Jakobu uánikua ambejtsïni jorhendasïndi ambe engachi uaaka úni parachi sési pájperantani máteru nema jingoni. Enga Jakobu 20 uéxurhinisï páni japkia máteru naniisï irekani, Tata Diosï ánjelini ma axaspti paraka arhipiringa eska kʼuanhatsentanpiringia imeeri iretarhu (Gén. 31:11, 13, 38). Joperu imeeri ermanu jémba Esaú uékasïreendi uándikuni (Gén. 27:41). Jakobu kánikua ‘chésïreendi ka uandanhiani’, jimboka eratsesïreenga eska imeeri ermanu jémba útasï kurhunhisïreenga (Gén. 32:7). ¿Ambe ka ambe úspi Jakobu para sési pájperantani ermanu jémba jingoni? Orheta mintsita jingoni kómarhikuarhispti Tata Diosï Jeobani, tátsekua ambakiti regalu ma axakuspti Esaúni (Gén. 32:9-15). Ka máteru ambe, engaksï na kuperapkia, Jakobu kánikua janhanharhikua xarhatakuspti Esaúni jimboka siete xanhari kʼutitsekuspka. Jimboka Jakobu kaxumbikua xarhataspka ka janhanharhini imeeri ermanu jémbani, úspti sési pájperantani imani jingoni (Gén. 33:3, 4).

12. ¿Ambechi jorhenguarhisïni Jakobueri ejemplu jingoni?

¹² Ambe enga úpka Jakobu ka ambe enga arhipka imeeri ermanu jémbani jiáni engaksï exejperantapka, jorhendasïndijtsïni ambe ma. Orheta kaxumbikua jingoni kómarhispti Tata Diosï Jeobani eska jarhuatapiringa. Tátsekua ísï úspti eska na kómarhipka Tata Diosïni, jimboka jánguarhintaspka úni ambe ma para jiáni engaksï exejperantapiringa sésiksï pʼikuarherapiringa tsimarhani. Ka enga na uandontskuarhepkia imani jingoni, no uandaspti nésï no sési úni japi. Ima solu uékasïreendi sési pájperantani imeeri ermanu jémba jingoni. ¿Nénachi uaa májkueni úni?

13, 14. ¿Ambechi jatsiski para úni engachi no sési pʼikuastaka erachini ma?

¹³ Iáminduecha engachi indeni xanharu jimbo nirani jaka enga tsípikuarhu pájpijka, jatsiskachi para sési pájperani juchaari erachicha jingoni (Rom. 12:18). Jiájkani, ¿ambechi jatsiski para úni engachi no sési pʼikuastaka erachini ma? Májkueni eska Jakobu jatsiskachi para mintsita jingoni kómarhikuarhini Tata Diosï Jeobani eskajtsïni jarhuataaka parachi úni sési pájperantani erachi jingoni.

¹⁴ Ístuchi jatsiska para exeni na engachi jásï kʼuiripueka jucha. Uaakachi kurhamarhikuarhini: “¿Uékasïni ji tsïtani uérani ka kaxumbikua jingoni arhini erachini eskarini puáchentaaka parani sési pájperantani imani jingoni? ¿Nénaksï pʼikuarheraa Tata Diosï Jeoba ka Jesúsi engani ji ueenaska úni ambe ma parani sési pájperantani erachi o pirenchi ma jingoni?”. I ambejtsïni jarhuataati parachi úni Jesúsini kurhajchani ka parachi kaxumbikua jingoni uandontskuarheni juchaari erachi jingoni parachi sési pájperantani. Jakobueri ejemplujtsïni uaati jarhuatani ísï úni.

15. ¿Nénajtsïni jarhuataa Efesu 4:2, 3 parachi sési pájperantani erachi ma jingoni?

¹⁵ ¿Ambe úpirini úkuarhini enga Jakobu no kaxumbikua jingoni nipiringa uandontskuarheni imeeri ermanu jémba jingoni? Jamberiksï no úpirindi sési pájperantani. Májkueni, engachi uandontskuarheska erachi ma jingoni parachi sési peentani ambe ma, jatsiskachi para kaxumbitini (arhinta je Efesu 4:2, 3). Proverbios 18:19 uandasïndi: “Sánderu úkua jukasïndi uandontskuarheni nemani jingoni enga ikiani jarhajka ka eska inchani ireta ma jimbo enga kʼérati bardechani jukajka, ka jarhastiksï arhijperatecha engaksï ísïika eska barrecha engaksï iretani ma kuájchakujka”. Engachi kaxumbikua jingoni arhiska erachini eskajtsïni puáchintaaka, jarhuataatijtsïni parachi sési pájperantani.

16. ¿Ambe ka ambechi jatsiski para eratsentani, ka andi?

¹⁶ Ístuchi jatsiska para sési eratsentani ambe engachi arhiaka ka néna engachi uandontskuarhekuaka. Engachi listu jauakia, jatsiskachi para uandontskuarheni erachi jingoni enga ikiani jaka juchantsïni jingoni parachi sési pʼikuastantani. Jamberijtsïni imani ambe arhiati engajtsïni no sési pʼikuastaaka, peru ju je jánguarhintani no ikiani o kuájpikuarhini, jimboka  inde ambejtsïni no jarhuataaka parachi sési pájperantani. Ju je miáni eska sánderu jukaparhakueska sési pájperantani erachini jingoni ka eska exeni nésï no sési ú (1 Kor. 6:7).

17. ¿Ambejtsï jorhenguarhisïni Gilbertiiri ejemplu jingoni?

¹⁷ Ju je exeni na enga xáni jánguarhintapka erachi ma enga Gilbert arhinhajka para sési pájperantani máteruecha jingoni. Ima uandantasïndi: “Uánikua problemechani jatsiaspka juchiiti familiarhu anapu ma jingoni. Jukari tsimani uéxurhini jánguarhintaspka sési uandontskuarhekuni parani sési pájperantani imani jingoni”. Ístu uandantasïndi: “Ante de uandontskuarheni imani jingoni, kómarhisïreenga Tata Diosïni, prepararikuarhisïreenga parani no jámani ikiakuarhini engareni no sési arhipiringa. Jatsispka parani listu jarhani parani puátspentani. Jorhenguarhiska tsïtani uérani ka kurhanguska eskani jatsispka para úni eskaksï máteruecha sési pájperaaka”. ¿Ambe úkuarhispi tátsekua? Gilbert uandantasïndi: “Iásï sési pʼikuarherasïngia jimbokani sési pájperasïnga iámindu juchiiti familiarhu anapuecha jingoni”.

18, 19. Engachi niáraka no sési pʼikuastani erachini ma, ¿ambechi jatsiski para úni, ka andi?

¹⁸ Jimajkani, ¿ambechi jatsiski para úni engachi no sési pʼikuastaka erachini ma? Sési pájperantani imani jingoni ísï eska Jesúsi na juramupka. Ju je uandontskuarhekuni Tata Diosï Jeobani ka kurhakuni imeeri espiritu santuni parakajtsïni jarhuataaka sési peentani indeni uandanhiatani. Engachi ísï úska, sésichi pʼikuarheraaka ka xarhatanchi jauaka eskachi kurhajchaxaka Jesúsini (Mat. 5:9).

¹⁹ Kánikuachi agradesidu jarhaska Tata Diosï Jeobani jingoni engajtsïni uékperakua jingoni arhistachijka Jesúsini úraparini, enga jindeeka juramuti jakajkuticheri (Efes. 5:23). Májkueni eska Pedru, Santiagu ka Juanu, ju je jingontku kurhajchani Jesúsini (Mat. 17:5). Uaakachi ísï úni engachi sési pájperantaska erachi ma jingoni engachi no sési pʼikuastaka. Engachi seguiriska imani xanharu jimbo nirani enga no kórhuraka ka enga tsípikuarhu pájpijka, uánikua kóntperatechanchi jatsiauaka iásï ka tsípikua jingonchi irekaaka para méntkisï.