SEMANA 3
¿Ambejtsïni jorhendasïni enga Jesúsi uerapka?
“Ka Jesúsi pʼiáraspti uerani” (JUANU 11:35).
PIREKUA 17 Uékasïnga
AMBE ENGACHI EXEAKA *
1-3. ¿Ambe ka ambejtsïni úsïni uetarani?
¿KÁNI jindeespi últimu xanhari engajtsï chá ueraka? Ménichanisïchi uerasïnga jimbokachi tsípini pʼikuarherasïnga; peru sáno méntkisïchi uerasïnga jimbokachi kómu pʼikuarherasïnga. Pori ejemplu, engachi uarhiranchajka nemani engachi jucha kánikua xénchajka. Pirenchi Lorilei * enga Estados Unidos anapueka, uandaspti: “Ménichani, xáni no sési pʼikuarherasïnga enga juchiiti nanaka uarhika, engani niárenga ísï pʼikuarherani enajkirini no ma ambe úpirini sési pʼikuastantani. Kánikua no sési pʼikuarhenhisïreenga ka ísï pʼikuarherasïreenga enajkini nóteru úpirinia”.
2 Jamberi jati máteru ambe engajtsïni uetarajka. Japón anapu prekursora ma enga arhinhajka Hiromi, uandaspti: “Ménichani no sési pʼikuarherasïnga jimbokaksï kʼuiripuecha no uékasïnga kurhaani Tata Diosïri ambe ka ueparini kurhakusïnga Tata Diosï Jeobani eskarini jarhuataaka exentani nemani enga uékaaka jorhenguarhini jurhimbikueri ambe”.
3 ¿A no eskachi ménichani juchajtu májkueni pʼikuarherasïnga eska i pirenchicha? (1 Ped. 5:9). Juchachi uékasïnga tsípikua jingoni marhuakuni Tata Diosï Jeobani, peru jamberichi ueparini ísï újka jimbokachi uarhiranchasïnga nemani engachi jucha kánikua xénchajka, o jimbokachi chkétakuarhitini pʼikuarherajka o jimbokachi nitamakuarhini jarhasïnga ambe ma engajtsïni no jurajkujka sési marhuakuni Tata Diosïni (Sal. 6:6; 100:2). ¿Ambechi uaa úni engachi ísï pʼikuarherani jauaka?
4. ¿Ambechi exeni jaua ini jorhenguarhikua jimbo?
4 Jesúsiri ejemplujtsïni uaati jarhuatani. Ménichani ima, mintsita jingoni pʼikuarheraspti ambe ma enga jimbo niárapka uerani (Juanu 11:35; Luk. 19:41; 22:44; Ebr. 5:7). Ini jorhenguarhikua jimbochi exeni jauaka na enga jatini uerapka. Ka exeakachi ambe engajtsïni jorhendajka inde ambe imeeri ambe ka Tata Diosï Jeobaeri ambe ka ístuchi exeni jauaka ambe engachi uaaka úni engachi nitamakuarhini jauaka ambe ma jimbo engajtsïni uetarajka.
UERASPTI IMEERI AMIGUECHA JIMBO
Ju je jarhuataani imeechani engaksï uarhiranchaka nemani, májkueni eska Jesúsi na úpka. (Exe je párrafuechani 5 a 9). *
5. ¿Ambejtsïni jorhendasïni ambe enga arhijka Juanu 11:32-36 Jesúsiri ambe?
5 Enga na kʼamarani japkia uéxurhini 32, Jesúsiri ambakiti amigu ma enga Lasaru arhinheenga, pʼamenchaspti ka uarhini (Juanu 11:3, 14). Jesúsi kánikua xénchasïreendi imani ka imeeri pirembeechani Martani ka Maríani. Íchaksï kánikua no sési pʼikuarheraxapti jimbokaksï uarhiranchaspka imeecheri mími jémba. Enga Lasaru na uarhipkia, Jesúsi niraspti Betania imani ireta jimbo enga María ka Marta irekapka. Enga Marta mítepka eska Jesúsi jurhaxapka, uiriipaspti kúmani. Eranhaska je na enga xáni komu pʼikuarheraparini arhipka: “Tata, engari tʼu ixú japiringa, juchiiti mími no uarhipirindi” (Juanu 11:21). Tátsekua, enga Jesúsi exepka Martani ka máteru kʼuiripuechani ueranksï jarhani, imajtu “pʼiáraspti uerani” (arhinta je Juanu 11:32-36).
6. ¿Andisï uerapi Jesúsi enga Lasaru uarhipka?
6 ¿Andisï uerapi Jesúsi jiáni? Libru Perspicacia para comprender las Escrituras, uandasïndi: “Enga imeeri amigu jémba Lasaru uarhipka, ka na engaksï xáni no sési pʼikuarherani japka imeeri pirembeecha, úspti eska imajtu pʼiárapiringa uerani”. * Jamberi Jesúsi eratsepti na enga no sési pʼikuarherapka imeeri amigu jémba Lasaru enga pʼamenchani japka ka enga mítepkia eska no ióni jimbo uarhipiringia. Ka ístu, ueraspti jimboka exespka Maríani ka Martani engaksï kómu pʼikuarherani japka jimbokaksï uarhiranchaspka imeecheri ermanu jémbani. Engajtsï chájtu uarhiranchaka ambakiti amiguni ma o parientini ma, ísïjtsï pʼikuarherapka eska imeecha. Ju je exeni tanimu ambe engajtsïni jorhendajka í ambe.
7. ¿Ambejtsïni jorhendasïni Tata Diosï Jeobaeri ambe enga Jesúsi uerapka imeeri amiguecha jimbo?
7 Tata Diosï Jeoba kurhangusïndi na engajtsï pʼikuarherajka chá. Jesúsi jindeesti enga terukuntajka Tata Diosïni iámindu ambe jimbo (Ebr. 1:3). Enga Jesúsi uerapka, xarhataspti na enga pʼikuarherajka imeeri Taati jémba (Juanu 14:9). Engajtsï chá no sési pʼikuarherani jaka jimbokajtsï uarhiranchaska nemani engajtsï chá xénchajka, uaakajtsï seguru jarhani eska Tata Diosï Jeoba no solu mítesti eskajtsï kómu pʼikuarheraxaka sino ístuksïni pʼamojkusïndi ka uékasïndi eskajtsï sési pʼikuarherantaaka (Sal. 34:18; 147:3).
8. ¿Andichisï uaa seguru jarhani eska Jesúsi tsítantauaka juchaari parientichani?
8 Jesúsi uékasïndi tsítaantani chaari parientichani. Ante de Jesúsi uerani, arhispti Martani: “Chiiti mímiti tsíntaati”. Ka Marta jakajkukuspti (Juanu 11:23-27). Marta kómarhisïreendi Tata Diosï Jeobani jimbosï mítepti eska profeta Elíasi ka Eliseu tsítaantaspka máru kʼuiripuechani ióntki (1 Rey. 17:17-24; 2 Rey. 4:32-37). Ka jamberi kurhaapti eska Jesúsi tsítaantaspka máru kʼuiripuechani (Luk. 7:11-15; 8:41, 42, 49-56). Májkueni, chájtujtsï uaaka seguru jarhani eskajtsï ménderu exeantauaka chaari parientichani engaksï uarhikia. Enga Jesúsi uerapka jiáni enga sési pʼikuastantapka imeeri amigu jémbechani, jorhendasïndijtsïni eska ima iámu imeeri mintsita jingoni uékasïndi tsítantaani imeechani engaksï uarhikia.
9. Májkueni eska Jesúsi, ¿nénajtsï uaa chá jarhuataani imeechani engaksï uarhiranchaka nemani? Uandanta je ejemplu ma.
9 Chájtsï uaaka jarhuataani imeechani engaksï uarhiranchaka nemani. Jesúsi no solu ueraspti Marta ka Maríani jingoni, ístu kurhajchaaspti ka imani ambe arhiaspti enga sési pʼikuastantaapiringa. Juchajtuchi uaaka májkueni úni imeecha jingoni engaksï uarhiranchaka nemani. Dan, orhejtsïkuti ma enga Australia irekaka, uandasïndi: “Enga juchiiti uarhiiti uarhipka, uétarhinchasïreenga eskarini nema jarhuatapiringa. Uánikua temungurhirichajtsïni arhispti eskani úpiringa uandontskuarheni imeecha jingoni na uéjki jatini. Jurajkusïrendijtsïni eskani uénhekuarhipiringa ka eskani uerapiringa. Ka engani chkétakuarhitini jarhenga, jarhuatasïrendijtsïni ambe ma úni, komu juparhintani karruni, nirani piántani ambe ma ka tʼirekua ambe úntani. Ka somenksï kómarhisïreendi jíndeni jingoni. Xarhatasptiksï eskaksï ambakiti amiguespka ka ambakiti erachicha para jiáni enga uandanhiata jarhajka” (Prov. 17:17).
UERASPTI MÁTERU KʼUIRIPUNI JIMBO
10. ¿Ambe uandantasïni Lukasʌ 19:36-40?
10 Jurhiatikua 9 de nisani, uéxurhini 33 jimbo, Jesúsi Jerusaléni niraspti. Enga na niárani japkia iretarhu, uánikua kʼuiripu tánguarhintaspti ka tatsintskasïrendiksï xanharu jimbo imeecheri xukuparhakuechani jimeesïsï enga ima nitamapiringa paraksï xarhatakuni eskaksï jiókuarhixapka paraka imeecheri Reipiringa. Kánikua tsípinhaxapti (arhinta je Lukasʌ 19:36-40). Ísï jimbo, imeeri chúxapatichaksï ísku pakarasti engaksï exepka Jesúsini ambe enga úpka ísï tátsekua: “Enga niárani japkia Jerusaléni, eraaspti iretani ka ueraspti imani jimbo”. Ueparini, Jesúsi uandaspti ambe engaksï xáni no sési úkuarhinchapiringa Jerusaléni anapuecha (Luk. 19:41-44).
11. ¿Andisï uerapi Jesúsi Jerusaléni anapuecha jimbo?
11 Jesúsi kánikua kómu pʼikuarheraxapti jimboka mítespka eska nájkirukaksï sési erokapka, uánikua judiuechaksï no jiókuarhipirindi ambe enga ima aianhpipiringa Reinueri ambe. Indeni jimbo, Jerusaléni kʼamajkunhapirindi ka judiuecha engaksï tsípiti pakarapiringa presuksï pánhapirindi (Luk. 21:20-24). Ka ísï eska Jesúsi na uandapkia, uánikua kʼuiripu no jiókuarhispti. Jima engajtsï chá irekaka, ¿kʼuiripuechaksï uékasïni jorhenguarhini Reinueri ambe? Engajtsï chá jánguarhintani jaka jorhentpini jurhimbikueri ambe ka namunitkuksï uékani kurhaani, ¿ambejtsï uaa jorhenguarhini Jesúsiri ambe enga ima ísï uerapka? Ju je exeni tanimu ambe.
12. ¿Ambejtsïni jorhendasïni Tata Diosï Jeobaeri ambe enga Jesúsi uerapka máteruecha jimbo?
12 Tata Diosï Jeoba xénchaasïndi kʼuiripuechani. Enga Jesúsi uerapka, miátantasïndijtsïni na enga pendienti pájka Tata Diosï Jeoba kʼuiripuecha jimbo. “Jimboka no uékasïnga eska nema tsïncheaka sino eska iáminduecha andajkuarhiaka móantani” (2 Ped. 3:9). Juchajtuchi xarhatasïnga eskachi xénchaasïnga kʼuiripuechani engachi jánguarhintajka paraka ambakiti aianhperakua mintsitarhu niárakuauaka (Mat. 22:39).
Ju je mójtakuni ka jiáni aianhpini enga sánderu sési jauaka ísï eska Jesúsi na úpka. (Exe je párrafuechani 13 ka 14). *
13, 14. a) ¿Néna xarhataspi Jesúsi eska pʼamojkuasïreenga kʼuiripuechani? b) ¿Nénachi uaa juchajtu májkueni úni?
13 Jesúsi kánikua jánguarhintaspti aianhpini. Jesúsi jánguarhisïreendi iápurisï aianhpini jimboka xénchaasïreenga kʼuiripuechani (Luk. 19:47, 48). Ístu, pʼamojkuaspti kʼuiripuechani. Ménichani, uánikuechaksï uékasïreendi kurhaani Jesúsiri uandakuani ka nóksï jurajkusïreendi eska Jesúsi ka imeeri chúxapaticha úpiringa t’ireni (Mar. 3:20). Ka enga achamasï ma nípka exeni chúrikua, Jesúsi uékaspti uandontskuarheni imani jingoni (Juanu 3:1, 2). Ísïisti eskaksï uánikua kʼuiripuecha engaksï kurhajchapka Jesúsini, nóksï niáraspti imeeri chúxapati úkuarhini, joperuksï iáminduecha niáraspti míteni ambe enga ima aianhpienga. Ini jurhiatikuecha jimbo juchajtuchi uékasïnga eskaksï iámindu kʼuiripuecha uaaka kurhaani ambakiti aianhperakuani (Uku. 10:42). Para úni ísï úni, jamberichi jatsiaka para mójtakuni na engachi aianhpijka.
14 Mójtaku je ambe enga xáni uétarhiaka. Engachi méntkisï imani mismu jandora aianhpiska, jamberichi no nemani exentaaka enga uékaaka kurhaani ambakiti aianhperakuani. Prekursora ma enga Matilda arhinhajka, uandantasïndi: “Juchiiti acheeti ka ji, jánguarhintasïngachi mámaru jandora aianhpini. Xarhentku, negosiuecharhisïchi aianhpisïnga. Teruxutinisï, engaksï kʼuiripuecha xanharisï jámani jarhajka karrituecha jingoni aianhpisïngachi. Ka xatinichani, úsïngachi exeantaani kʼuiripuechani imeecho”. Enbesi de ima jandora aianhpini engachi jucha uaaka, ju je aianhpini jiáni engaksï kʼuiripuecha imeecho jauaka. Engachi ísï úska, uaakachi seguru jarhani eska Tata Diosï Jeoba sési pʼikuarheraaka.
JESÚSI UERASPTI JIMBOKA UANDANHIASÏREENGA TAATI JÉMBEERI NOMBRI JIMBO
Ju je kurhakuni Tata Diosï Jeobani eskajtsïni jarhuataaka jiáni engachi uandanhiani jauaka, májkueni eska na úpka Jesúsi. (Exe je párrafuechani 15 a 17). *
15. Eskachi na arhintajka Lukasʌ 22:39-44 jimbo, ¿ambe úspi Jesúsi ima chúrikua ante de uarhini?
15 Iauani chúrikua 14 de nisánini uéxurhini 33 jimbo, Jesúsi niraspti jardini de Jetsemaní jimbo, ka jima mintsita jingoni kómarhispti Tata Diosï Jeobani (arhinta je Lukasʌ 22:39-44). Jiáni, “ueparini ka mískuarhiparini kómarhispti imani” (Ebr. 5:7). ¿Ambe kurhajkuarhispi Jesúsi ima chúrikua ante de uarhini? Kurhakuspti Tata Diosï Jeobani eska uinhaperantapiringa paraka no jurajkupiringa ka paraka imani ambe úpiringa enga Tata Diosï Jeoba uékeenga. Tata Diosï Jeoba kurhajchaspti imeeri Uájpani enga mintsita jingoni kómarhipka ka axaspti ánjelini ma paraka uinhaperantapiringa.
16. ¿Andisï xáni uandanhiani japi Jesúsi enga kómarhini japka Tata Diosïni jardini de Jetsemanírhu?
16 Jesúsi ueraspti enga jardini de Jetsemanírhu kómarhini japka Tata Diosïni, jimboka uandanhiasïreenga eskaksï kʼuiripuecha eratsepiringa eska ima no sési uandaspka Tata Diosïri ambe. Ístu, sési mítetixapti eska kʼéri ánchikuarhita ma jatsispka: kuájpini imeeri Taati jémbeeri nombrini. Engajtsï chájtu no sési nitamakuarhini jaka engajtsï jimbo úpiringa jurajkuni Tata Diosï Jeobani, ¿ambejtsï uaa jorhenguarhini enga Jesúsi ísï uerapka? Ju je exeni tanimu ambe.
17. ¿Ambechi jorhenguarhisïni Tata Diosï Jeobaeri ambe enga ima mókukuntapka Jesúsini enga ima mintsita jingoni kómarhipka?
17 Tata Diosï Jeoba kurhaasïndi engajtsï chá kómarhijka. Tata Diosï Jeoba kurhajchaspti imeeri Uájpani enga mintsita jingoni kómarhipka. ¿Andi? Jimboka ambe enga sánderu jukaparhakuepka para Jesúsi, jindeespka no jurajkuni ka kuájpini Taati jémbeeri nombrini. Enga inde ambejtu sánderu jukaparhakueka para jucha, imajtsïni mókuchintaati engachi jarhuajperata kurhakuaka (Sal. 145:18, 19).
18. ¿Andichisï uaa uandani eska Jesúsi amigu máeska enga kánikua kurhangutspijka?
18 Jesúsi kurhangusïndi na engajtsï pʼikuarherajka. Engachi uandanhiani jarhajka, sésichi pʼikuarherasïnga amiguni ma jatsini engajtsïni kurhanguchiaka ka sánderia enga imajtu májkueni ambe nitamanchaka eska jucha. Jesúsi inde jásï amiguesti, jimboka ima míteska na enga pʼikuarherakuarhijka enga ma chkétakuarhitini jarhajka ka enga uétarhinchani jarhajka eska nema jarhuataaka. Ístu, mítesti na engachi úkata jaka ka uaati eskachi jarhuatanhaaka imani tiempu jimbo engachi uétarhinchaaka (Ebr. 4:15, 16). Májkueni eska Jesúsi na jurajkupka eska ánjeli ma jarhuatapiringa jardini de Jetsemanírhu, juchajtuchi jatsiska para jurajkuni eskajtsïni Tata Diosï Jeoba jarhuataaka publikasioni ma jimbo, bideu ma jimbo, diskursuni ma jimbo o engajtsïni orhejtsïkuti ma o amigu ma pʼorhembiaka parajtsïni uinhaperantani.
19. ¿Ambeksïni uaa uinhaperantani engajtsï uandanhiata ma jatsika? Uandanta je ejemplu ma.
19 Tata Diosï Jeobaksïni íntskuati imeeri pínandikua. ¿Nénajtsïni uinhaperantaa Tata Diosï Jeoba? Engachi kómarhijka, intsïnhasïngachi Tata “Diosïri pínandikua enga no nema újka jánhaskani” (Filip. 4:6, 7). Pínandikua engajtsïni Tata Diosï Jeoba íntskujka, úsïndi eskachi no jukari uandanhiauaka ka eskachi sési eratseaka ambe ma. Ísïsï pʼikuarherapti pirenchi ma enga Luz arhinhajka. Ima uandasïndi: “Ménichani jandiajkuni pʼikuarherasïnga ka inde ambe úsïndi eskani eratseaka eskarini Tata Diosï Jeoba no xénchasïnga. Engani ísï pʼikuarherani jarhajka, jirejiresï aiangusïnga Tata Diosï Jeobani na engani pʼikuarherajka. Kómarhikua jimbo, úsïnga sési pʼikuarherantani”. Ambe enga nitamakuarhika Luzi, xarhatasïndi eska kómarhikuajtsïni jarhuatasïnga parachi pínandikua jatsini.
20. ¿Ambe ka ambechi jorhenguarhiski enga Jesúsi uerapka?
20 Ambe engachi jorhenguarhika enga Jesúsi uerapka, kánikuajtsïni sési pʼikuastantasïndi ka jarhuatani. Ístujtsïni miátantasïndi eskachi jatsiska para jarhuataani juchaari amiguechani engaksï uarhiranchaka nemani ka mintsikani eskajtsïni Tata Diosï Jeoba ka Jesúsi jarhuataaka jiáni engachi uarhiranchaaka nemani engachi jucha xénchajka. Ístujtsïni jarhuatasïndi parachi pʼamojperakua jingoni aianhpini ka jorhentpini jimboka Tata Diosï Jeoba ka Jesúsi ísï uékasïnga. Ka enga Jesúsi uerapka, sésijtsïni pʼikuastasïndi, jimboka xarhatasïnga eska ima ka imeeri Taati jémba kurhangusïnga na engachi pʼikuarherajka ka eskachi no uinhapitiska ka uékasïndijtsïni jarhuatani parachi úni tekaantani. Ju je seguirini ísï úni eskachi na jorhenguarhika astaka niáraaka ima jurhiatikua enga Tata Diosï Jeoba ísï uaaka eska na aiatspika eskajtsïni ‘kutsunharhikuaka iámindu uekua’ (Jaŋ. 21:4).
PIREKUA 120 Ju je kaxumbitiini ka sési pʼikuatspini ísï eska Jesusi
^ Bibliarhuchi arhintasïnga eska Jesúsi ménichani ueraspka. Ini jorhenguarhikua jimbochi exeni jauaka tanimu xanhari enga ima uerapka ka ambe engachi jorhenguarhijka indeeri ambe.
^ Mójtakukuarhistiksï máru nombricha.
^ AMBE ENGAKSÏ XARHATAJKA IMAJENICHA: Jesúsi pʼikuarhinhespti eska jatsispka para sési pʼikuastantani Maríani ka Martani. Juchajtuchi uaaka májkueni úni imeecha jingoni engaksï uarhiranchaaka nemani.
^ AMBE ENGAKSÏ XARHATAJKA IMAJENICHA: Jesúsi uékaspti jorhendani Nikodemuni nájkiruka chúrikuepkia. Juchajtuchi jatsiska para jorhendani nemani Biblieri ambe ima jandora enga ima uaaka.
^ AMBE ENGAKSÏ XARHATAJKA IMAJENICHA: Jesúsi kurhakuspti Tata Diosï Jeobani eska uinhaperantapiringa paraka no jurajkupiringa. Juchajtuchi uaaka májkueni úni engachi tsʼéjkukua ma jatsiaka.