1, 2. a) ¿Kánchi sánderu miántasïni nemani engachi uarhiranchaka? b) ¿Ambe uaxastaspi Jesúsi ima chúrikua ante de uarhini?

 ENGACHI uarhiranchajka nemani, nájkiruka ióni nitamakia útasïchi miántasïnga ka sánderia enga niárani jarhajka ima jurhiatikua enga uarhika.

² Mándani uéxurhini uánikuechachi tánguarhintasïnga para Miántani tata Jesukristueri Uarhikuani, nema enga kánikua xénchakateka (1 Ped. 1:8). Ísïchi úsïnga para miántani imani enga íntspika imeeri tsípikuani parajtsïni pʼímutantani pekadurhu ka uarhikuarhu (Mat. 20:28). Jesúsi uékasïreendi eskaksï imeeri chúxapaticha miántapiringa imeeri uarhikuani. Ísï jimbo, ima chúrikua ante de uarhini uaxastaspti ambakiti sena ma ka juramukuaspti: “Ú je ini ambe jíntsïni miántsparini” (Luk. 22:19).

3. ¿Ambechi exeni jaua ini jorhenguarhikua jimbo?

³ Uánikua kʼuiripuechaksï tánguarhintasïndi paraksï Miántani tata Jesukristueri Uarhikuani. Peru namunituestiksï engaksï erokuarhini jaka auandarhu irekani ka sáno iáminduechaksï erokuarhixati Echerirhu irekani. Ini jorhenguarhikua jimbo, exeni jauakachi uánikua ambe engaksï jimbo í grupuecha uéjka tánguarhintani mándani uéxurhini paraksï Miántani tata Jesukristueri Uarhikuani. Ístuchi exeni jauaka néna engajtsïni marhuachejka jima jarhani. Ju je uénani exeni andi engaksï tánguarhintajka kristianu erakukatecha.

4. ¿Andiksïsï erakukatecha újki arhani kurhindani ka binuni Miántskuarhu?

⁴ Ma ambe jimbo engaksï tánguarhintajka erakukatecha mándani uéxurhini Miántskuarhu jindeesti paraksï arhani kurhindani ka binuni. ¿Andiksïsï ísï újki? Parachi úni míteni, ju je  miántani ambe enga úpka Jesúsi últimu chúrikua jimbo ixú Echerirhu. Enga na úntapkia Paskuani, Jesúsi uaxastaspti ambe enga ísï mítekateka iásï eska Tateeri Sena. Intsïtaaspti kurhindani ka binuni imeeri 11 apostolichani engaksï no jurajkupka ka arhiaspti eskaksï apiringa ka itsïmani. Ka tátsekua arhiaspti jimbanhi pakatperakueri ambe ka pakatperakua Reinueri (Luk. 22:19, 20, 28-30). * Ini pakatperakuecha jimbo apostolicha ka máteru namunitu kristianuecha úpirindiksï reini ka saserdotini jini auandarhu (Jaŋ. 5:10; 14:1). Erakukatecha engaksï útasï Echerirhu pakarani jaka ini tsimani pakatperakuechani jimboksï jarhasti, ísï jimboksïsï újti arhani kurhindani ka binuni Miántskuarhu.

5. ¿Ambeksï míteski erakukatecha imeecheri erokuarhikueri ambe?

⁵ Máteru ambe jimbo engaksï erakukatecha uéjka nirani Miántskuarhu, jindeesti jimbokaksï úsïnga eratsentani imeecheri erokuarhikuani. Tata Diosï Jeoba ambakiti erokuarhikua ma íntsaasti: nóksï méni niárani uarhini, ni tereni auandarhu, marhuauatiksï tata Jesukristu jingoni ka máteru erakukatecha jingoni, ka sánderu ambakiti ambe, uaatiksï Tata Diosï Jeobaeri orhepatini jimbo jarhani (1 Kor. 15:51-53; 1 Juanu 3:2). Erakukatechaksï mítesti eskaksï pʼímarhinhaska paraksï intsïnhani ini kʼérati kóntperatechani. Joperu paraksï úni auandarhu nirani jatsistiksï para no méni jurajkuni Tata Diosïni asta uarhikuarhu jamberi (2 Tim. 4:7, 8). Kánikuaksï tsípisïndi engaksï eratsentajka ambe engaksï erokuarhini jaka (Titu 2:13). ¿Ka ‘máteru karichicha’ andiksïsï nirajki Miántskuarhu? (Juanu 10:16). Ju je exeni andi.

6. ¿Andiksïsï nirajki Miántskuarhu máteru karichicha mándani uéxurhini?

⁶ Ma ambe jimbo engaksï nirajka Miántskuarhu máteru karichicha jindeesti paraksï exeni ambe enga úkuarhijka ka no paraksï arhani kurhindani ka binuni. Uéxurhini 1938 jimbo ueenanhasptiksï pʼímarhinhani imeecha engaksï erokuarhini jaka Echerirhu irekani paraksï Miántskuarhu jarhani. Rebista La Torre del Vigía abriliri 1938 anapu uandaspti eska ‘sési jarhaspka ka uétarhisïreenga’ eskaksï máteru karichicha “jima japiringa tánguarhitini parakaksï exepiringa ambe enga jima úkuarhijka”. Ka ístu uandaspti: “Jatsistiksï ka tiempuestia parakaksï imeechajtu tsípini p’ikuarheraaka indeni ambe jimbo”. Májkueni eska imeecha engaksï pʼímarhinhajka tembuchakuarhu ma na tsípikua jingoni nirajka, máteru karichichajtuksï tsípikua jingoni nirasïndi Miántskuarhu paraksï exeni ambe enga jima úkuarhijka.

7. ¿Andiksïsï uéjki kurhaani Miántskueri arhijtsïkperatani máteru karichichani?

⁷ Máteru karichichajtuksï eratsentasïndi imeecheri erokuarhikuani. Uékani jarhasïndiksï kurhaani Miántskueri arhijtsïkperatani, jimboka jima imeeri ambe uandasïnga enga Kristu ka 144,000 erakukatecha uaaka kʼuiripuecha jimbo Mili Uéxurhini jimbo engaksï imeecha juramuaka. Í juramuticha ka tata Jesukristu enga Reika ka enga íchani orhekupajka, jarhuajpeatiksï paraka Echeri Paraisu máeuaka ka paraksï ima kʼuiripuecha engaksï kurhajchaaka Tata Diosïni niáraaka perfektueni. K’éri tsípikuarhita máesti para ima xáni uánikua kʼuiripuecha engaksï nirajka Miántskuarhu, jimbokaksï úsïnga eranhaskani ima jurhiatikuani engaksï ari profesiecha úkuarhiaka, Isaías 35:5, 6; 65:21-23 ka Jaŋaskuecha 21:3, 4. Engaksï eranhaskajka  imeecheri parienticha jingoni jarhani jimbanhi parhakpinirhu, sánderuksï mintsikasïndi ambe enga úkuarhiaka sánderu orhepani ka sánderuksï uékasïndi marhuakuni Tata Diosï Jeobani (Mat. 24:13; Gal. 6:9).

8. ¿Ambe máteru ambe jimboksï nirasïni máteru karichicha Miántskuarhu?

⁸ Máteru karichicha ístuksï nirasïndi Miántskuarhu jimbokaksï uékasïnga xarhatakuani erakukatechani eskaksï xénchaasïnga ka eskaksï jarhuataasïnga. Tata Diosïri Karakata uandasptia eskaksï erakukatecha ka imeecha engaksï erokuarhini jaka Echerirhu irekani májku kʼériksï úkuarhintatini japiringa. Ju je exeani máru profesiechani engaksï ísï xarhatajka.

9. Eska na uandajka profesia enga Zacarías 8:23 jimbo jaka, ¿ambeksï pʼikuarherasïni máteru karichicha erakukatecha jimbo?

⁹ (Arhinta je Zacarías 8:23). I xáni sési jásï profesia uandantasïndi na engaksï pʼikuarherajka máteru karichicha imeecheri erachicha ka pirenchicha jimbo engaksï erakukateka. Uandakuecha “judiuni ma” ka “chánksïni” mismu grupuni arhikuekasïndi: erakukatecha engaksï útasï Echerirhu jaka (Rom. 2:28, 29). “Diesi acheetichaksï iámindu idiomecheri engaksï iretecharhu uandanhajka” jindeestiksï máteru karichicha. Uinhamuksï jupikakuasïndi xukuparhakua erakukatechani —i ambe arhikuekasïndi eskaksï no méni jurajkuauaka— ka májku kʼériksï sési marhuakusïndi Tata Diosï Jeobani. Ísï jimbo, ima chúrikua enga Miántskua úkuarhijka, máteru karichichaksï pámbetaasïndi erakukatechani ka ísïksï xarhatakuani jarhasïndi eskaksï májku k’eri jarhaska imeecha jingoni.

10. ¿Ambe úski Tata Diosï Jeoba paraka niáraka ísï úkuarhini eska na uandajka profesia enga Ezequiel 37:15-19, 24, 25 jimbo jaka?

¹⁰ (Arhinta je Ezequiel 37:15-19, 24, 25). Tata Diosï Jeoba ísï ústi eska i profesia na uandajka, jimbokaksï erakukatecha ka máteru karichicha májku kʼériksï ánchikuarhisïnga. Profesia tsimani chkariri uandasïndi. Imeecha engaksï erokuarhini jaka auandarhu irekani, ísïistiksï komueska chkari “para Judá” (ima tribu engaksï erakunheenga reicha para Israeli). Ka imeecha engaksï erokuarhini jaka Echerirhu irekani, ísïistiksï komueska “Efraíniri chkari”. * Tata Diosï Jeoba ini tsimani grupuechani márku uántapirindi parakaksï niárapiringa “májku chkari” úkuarhintani. I ambe arhikuekasïndi eskaksï májku k’éri marhuakupiringa imeecheri Reini, tata Jesukristuni. Mándani uéxurhini erakukatecha ka máteru karichichaksï nirasïndi Miántskuarhu, májku k’ériksï úkuarhintasïndi iáminduecha, máechakua karichi eranguti jingoni ka no komu siengaksï tsimani grupuepiringa (Juanu 10:16).

11. ¿Nénaksï jarhuataasïni tata Jesukristueri erachichani ima “karichicha” engaksï Mateu 25:31-36, 40 jimbo uandajka?

¹¹ (Arhinta je Mateu 25:31-36, 40). “Karichicha” engaksï ini ejempluni jimbo jaka, imani k’uiripuechani arhikuekasïndi engaksï jurhimbikua jingoni jámajka últimu jurhiatikuechani jimbo ka engaksï erokuarhini jaka Echerirhu irekani. Mintsita jingonksï jarhuataasïndi tata Jesukristueri erachichani engaksï erakukateka parakaksï uaaka úni iámu parhakpinirhu arini k’éri ánchikuarhitani: aianhpini ka jorhentpini (Mat. 24:14; 28:19, 20).

12, 13. ¿Nénateruksï jarhuataasïni máteru karichicha Kristueri erachichani?

¹² Mándani uéxurhini enga na niárani jarhajkia Miántskua, máteru karichichaksï xarhatasïndi eskaksï jarhuataasïnga Kristueri erachichani. ¿Néna? Engaksï jánguarhintajka pʼímarhiani k’uiripuechani paraksï nirani Miántskuarhu (exe je rekuadruni “ ¿Eratsexakijtsïa  ambe engajtsï uaaka úni imani jurhiatikuecha jimbo enga Miántskua úkuarhiaka?”). Iámu parhakpinirhu, kúnguarhikuechaksï listu jatsisïndi iámindu ambe paraksï Miántani tata Jesukristueri Uarhikuani, nájkiruka no ma erakukata jauaka kúnguarhikuarhu. Máteru karichichaksï sési pʼikuarherasïndi jarhuataani Kristueri erachichani, jimbokaksï míteska eskaksï Jesúsinisï jarhuatani jarhajka (Mat. 25:37-40).

¹³ ¿Andichisï iáminduecha jatsi para nirani Miántskuarhu, náki uéjkichi erokuarhikua jatsini?

14. ¿Nénajtsïni xarhatacheski Tata Diosï Jeoba ka Jesúsi na engajtsïni xáni xénchajka?

¹⁴ Jimbokachi agradesidu jarhaska Tata Diosï Jeobaeri ka Jesúsiri xénchperakua jimbo. Tata Diosï Jeobajtsïni mámaru ambe jimbo xarhatachesti eskajtsïni xénchasïnga. Joperu sánderu k’eri ambe enga ima úka jindeesti enga axaka imeeri Uájpani para komu nitamakuarhini ka uarhini juchantsïni jimbo (Juanu 3:16). Jesúsijtujtsïni xarhatachesti eskajtsïni xénchasïnga jimboka uékaska uarhini juchantsïni jimbo (Juanu 15:13). Ísïisti eskachi no méni uaaka maiamuantani iámindu ambe engaksï uékperakua jimbo úka juchantsïni jimbo, joperuchi uaaka xarhatakuani eskachi agradesidu jarhaska imani ambe jingoni engachi pauani pauani újka juchaari tsípikuarhu (Kol. 3:15). Engachi nirajka Miántskuarhu, xarhatakuasïngachi eskachi agradesidu jarhaska imeecheri xénchperakua jimbo ka eskachi juchajtu xénchaasïnga.

15. ¿Andiksïsï xáni agradesidu jaki euajpintskua jimbo erakukatecha ka máteru karichicha?

¹⁵ Jimbokachi kánikua agradesidu jarhaska euajpintskua jimbo (Mat. 20:28). Erakukatechaksï kánikua jukaparharasïndi euajpintskuani, jimbokaksï ini jimbosï újti jatsini imeecheri erokuarhikuani ka jimbokaksï mintsikasïnga Kristuni, Tata Diosï Jeoba ísï exeasïndi komueska kʼuiripuecha engaksï jurhimbikua jingoni jámajka ka jiókuarhiasïndi komueska imeeri uájpeecha (Rom. 5:1; 8:15-17, 23). Ka máteru karichichajtuksï májkueni mintsikasïndi euajpintskuani jimboka Kristueri iurhiri jimbo imeechaksï uaati jaiapanherantani Tata Diosïni, marhuakuni imani ka tsípitiksï pakarani “k’éri mískuarhitarhu” (Jaŋ. 7:13-15). Engaksï i tsimani grupuecha nirajka Miántskuarhu mándani uéxurhini, xarhatasïndiksï eskaksï agradesidu jarhaska euajpintskuani jimbo.

16. ¿Ambe máteru ambe jimbochi nirasïni Miántskuarhu?

¹⁶ Jimbokachi uékasïnga kurhajchani Jesúsini. Náki uéjki erokuarhikuachi jatsini, iáminduechachi uékasïnga mintsita jingoni kurhajchani Jesúsiri juramukuani enga imani chúrikua jimbo íntspipka, enga uaxastapka Miántskuani ima uandaspti: “Ú je ini ambe jíntsïni miántsparini” (1 Kor. 11:23, 24).

17. ¿Andichisï sánderu andarhierajki Tata Diosï Jeobani engachi nirajka Miántskuarhu?

¹⁷ Jimboka úsïnga eskachi sánderu andarhieraaka Tata Diosï Jeobani (Sant. 4:8). Eskachi na exeka, engachi nirajka Miántskuarhu jarhuatasïndijtsïni parachi eratsentani imani erokuarhikuani engajtsïni Tata Diosï Jeoba íntskuka ka na engajtsïni xáni xénchaka (Jer. 29:11; 1 Juanu 4:8-10). Seguruchi jarhaska eska isï úkuarhiaka eskachi na erokuarhini jaka ka eska Tata Diosïri xénchperakua no méni kʼamakurhisïnga. Engachi eratsentajka ini ambe sánderuchi xénchasïnga Tata Diosï Jeobani ka sánderuchi sési pájperasïnga imani jingoni (Rom. 8:38, 39).

18. ¿Nénajtsïni marhuachesïni engachi eratsentajka Jesúsiri ejempluni?

 ¹⁸ Jimbokajtsïni jarhuatasïnga parachi májkueni úni eska Jesúsi (1 Ped. 2:21). Imani jurhiatikuecha jimbo ante de Miántskua úkuarhini, arhintasïngachi ambe enga Biblia uandajka últimu semaneri enga Jesúsi Echerirhu jápka, imeeri uarhikueri ka ístu enga tsíntapka. Ka ima chúrikua enga Miántskua úkuarhijka, arhijtsïkperatajtsïni miátantasïndi na engajtsïni xáni xénchajka Jesúsi (Efes. 5:2; 1 Juanu 3:16). Engachi arhintajka ambe enga jimbo xáni no sési nitamakuarhipka ka engachi eratsentajka indeni ambe úsïndi eskachi “ísï jámaaka eska ima na jámapka” (1 Juanu 2:6).

19. ¿Ambechi jatsiski para úni parachi seguirini Tata Diosïri xénchperakuarhu jarhani?

¹⁹ Jimbokajtsïni jarhuatasïnga parachi seguirini Tata Diosïri xénchperakuarhu jarhani (Jud. 20, 21). Engachi jánguarhintajka kurhajchani Tata Diosïni, pímbinhajkuntani imeeri nombrini ka tsíperani imeeri mintsitani, seguirini jarhasïngachi imeeri xénchperakuarhu jarhani (Prov. 27:11; Mat. 6:9; 1 Juanu 5:3). Nirani Miántskuarhu úsïndi eskachi uinhapikua jatsiaka parachi juchaari úkuecha jingoni pauani pauani arhini Tata Diosï Jeobani: “¡Para méntkisï uékasïnga chiiti amigueni!”.

20. ¿Náki ambakiti ambe jimbochi jatsiski para nirani Miántskuarhu?

²⁰ No arhiparini engachi erokuarhini jaka auandarhu irekani o Echerirhu, ambakiti ambe jarhasti engachi jimbo jatsika para nirani Miántskuarhu mándani uéxurhini. Méni engachi nirajka, miántasïngachi tata Jesukristueri uarhikuani engachi xáni xénchajka, ka sánderu jukaparhakua ambe miántasïngachi na engajtsïni xáni xénchajka Tata Diosï jimboka íntspiska imeeri Uájpeeri tsípikuani parajtsïni pʼímutantani. I uéxurhini Miántskua jindeuati biernesï 15 de abrili de 2022. Juchachi xénchasïnga Tata Diosï Jeobani ka imeeri Uájpani. Ísï jimbo, no jarhasti máteru ambe enga sánderu jukaparhakueka ka eska tánguarhintani para Miántani tata Jesukristueri Uarhikuani.