1. ¿Andiksïsï uánikua kʼuiripuecha no mintsikajka Bibliani?

 INI JURHIATIKUECHANI jimbo kʼuiripuechaksï nóteru mítestia néni mintsikani. Uánikuechaksï sési exeasïndi politikuechani, sientifikuechani ka imeechani engaksï kʼérati negosiuechani jatsiaka, joperuksï kurhamarhikuarhisïndi sinksï iicha meru uéjki jarhuajpeni. Ístu, nóteruksï janhanharhiasïndia relijioniiri orhejtsïkutiichani engaksï uandajka eskaksï kristianueska. Ísï jimbo, nójtsïni ísku pakatasïndi engaksï no mintsikajka Bibliani, libruni engaksï i kʼuiripuecha uandajka eskaksï kurhajchasïnga.

2. Eska na uandajka Salmo 119:160, ¿ambeerichi jatsiski para seguru jarhani?

² Tata Diosï Jeobaeri marhuariichachi seguru jarhaska eska ima jindeeska “Tata Diosï jurhimbikueri” ka eska méntkisï sánderu ambakiti ambe uékasïnga para jucha (Sal. 31:5; Is. 48:17). Seguruchi jarhaska eskachi uaaka mintsikani ambe enga Biblia uandajka jimboka ‘méntku iámu Tata Diosïiri uandakua jurhimbikua ambeeska’ (arhinta je Salmo 119:160). Ka juchajtuchi májkueni eratsesïnga eska achamasï ma enga karaka: “Iámu ambe enga Tata Diosï uandaka, no chkuanderakua ambeesti, ka iámindu ambe niáraati ísï úkuarhini. Tata Diosïiri ireta uaati mintsikani ambe enga ima uandajka jimbokaksï mintsikasïnga imani Tata Diosïni enga indeni ambe uandaka”.

3. ¿Ambechi exeni jaua ini jorhenguarhikua jimbo?

³ ¿Nénachi uaa jarhuataani máteru kʼuiripuechani paraksï májkueni mintsikani Tata Diosïiri Uandakuani ísï eska jucha? Ju je exeni tanimu ambe engachi jimbo mintsikajka Bibliani: ambe enga Biblia uandajka no mójtakukuarhisti, imeeri profesiechaksï méntkisï ísï úkuarhisïndi ka Biblia úsïndi eskaksï kʼuiripuecha mójtakurhiaka.

4. ¿Andiksïsï máru kʼuiripuecha eratsejki eska ambe enga Biblia uandajka mójtakukuarhiska?

⁴ Tata Diosï Jeoba úraasti ma 40 achamasïichani engaksï sési marhuakuenga parakaksï karaapiringa Biblieri libruechani. Joperu ini jurhiatikuechani jimbo nóteru ma karakata jarhasti engaksï imeecha karaka. Soluchi jatsiaska kopiechani máteru kopiecheeri. Ísï jimbo, máru kʼuiripuechaksï kurhamarhikuarhisïndi sini Biblia májkueni ambe uandajki eska ima ambe engaksï imeecha karapka. ¿Nénachi uaa seguru jarhani eska Biblia no mójtakukuarhiska?

5. ¿Nénaksï kopiarinhaski Karakata Ebreaecha? (Exe je dibujuni enga ueenakuarhu jaka i rebistarhu).

⁵ Para kuájchakuni ambe enga Biblia uandajka, Tata Diosï Jeoba juramuspti eskaksï kopiecha únhapiringa. Israeli anapu reiichani juramukuaspti eskaksï úkuarhipiringa kopia ma Leiiri ka lebiteechani arhiaspti eskaksï jorhendapiringa iretani indeni Leiiri ambe (Deut. 17:18; 31:24-26; Neh. 8:7). Engaksï na kʼuanhatsentapkia judiuecha Babilonia uératini, máru kʼuiripuecha engaksï sési mítekupka néna uaani kopiechani, ueenasptiksï uánikua kopiechani uaani Karaka Ebreaecheeri (Esd. 7:6, noteecha). I kʼuiripuecha kánikua kuidadu jingonksï uaasïreendi kopiechani. Ísï tátsekua, ueenasptiksï kuenta uaani uandakuechani ka asta letrechani paraksï sánderu seguru jarhani eskaksï sési úxapka imeecheri ánchikuarhitani. Joperu jimbokaksï no perfektuespka, máru ambeksï no úspti sési kopiarini. Peru jimboka uánikua kopiecha únhaspka ima mismu karakateeri, úsptiksï exeni nani enga no sési karantskata japka. Ju je exeni nénaksï ísï úspi.

6. ¿Néna úsïni mítenhani nani enga no sési kopiarinhaka Biblia?

⁶ Iásï ima kʼuiripuecha engaksï mítekuka Biblieri ambe mítestiksï néna exentani nani engaksï no sési kopiarika imeecha engaksï Biblieri kopiechani uaaka. Parachi úni kurhanguni, ju je eratseni eskaksï 100 achamasïichani arhiasïnga eskaksï kopia ma karantaaka karakateeri ma, ka ma no úsïndi sési karantani ambe ma. ¿Néna úpirini mítenhani nani no úski sési karantani? Terukutantaapariani iámindu kopiechani. Sáno májkueni, imeecha engaksï sési mítekuka terukutantaasïndiksï uánikua Biblieri kopiechani paraksï úni exeni nani engaksï no úka sési karantani imeecha engaksï Biblieri kopiechani uaaka oksï no jatsikuni ambe ma.

7. ¿Nénachi míteski eska imeecha engaksï Bibliani kopiarika kánikua jingontkuksï ísï úska?

⁷ Ju je exeni ejemplu ma enga xarhatajka eskaksï imeecha engaksï Bibliani kopiarika kánikuaksï jingontku ísï úska. Karakata enga sánderu kompletueka ka enga sánderu ióntki anapueka Karakata Ebreaecheeri, jindeesti Códice de Leningrado enga 1008 o 1009 jimbo anapueka despuesi de Jesúsi. Joperu no xáni ióniisti engaksï exeantaka máru Biblieri karakateechani ka máteru particha engaksï no kompletu jaka, engaksï 1,000 uéxurhini ísï sánderu ióntki anapueka eska Códice de Leningrado. Máruksï úpirindi uandani eska xáni kopiarini ka kopiarini karakateechaní, ma 1,000 uéxurhini jimbo ísï, Códice de Leningrado nóteru xáni terukuntapiringia imani karakateecha jingoni engaksï sánderu ióntki anapueka. Peru no ísïisti. ¿Ambeksï exespi imeecha engaksï sési mítekuka Biblieri ambe engaksï ióntki anapu karakateechani terukutantaapka iásï anapuecha jingoni? Eska, nájkiruka sánisï ménderueni karakata jaka, ambe enga Biblia uandajka no mójtakukuarhiska.

8. ¿Néna jimboksï no májkueniiski kopiecha Karakata Griegaecheri máteru ióntki anapu libruecha jingoni?

⁸ Orheta kristianuechaksï májkueni úspti eska imeecha engaksï kopiechani uaaka Karakata Ebreaecheeri. Jánguarhintasptiksï sési kopiariuani 27 libruechani engaksï Karakata Griegaecharhu jaka ka engaksï tánguarhikuecharhu ka aianhpikuarhu úrauenga. Achamasï ma enga Biblieri ambe mítekuka terukutantaspti kopiechani Karakata Griegaecheri máteru libruecheri  kopiecha jingoni engaksï ima mismu tiempu jimbo únhapka ka i ambe uandaspti: “Uaakachi uandani eskaksï sánderu kopiecha jarhaska [Karakata Griegaecheri] ka sánderuksï kompletu jarhasti”. Libru ma ari ambe uandaspti Karakata Griegaecheri: “Uaakachi seguru jarhani eska ambe engachi arhintajka iásï anapu traduksionirhu ma enga mintsinharhikueka, májkueni ambe uandasïnga eska ima ambe engaksï karapka imeecha engaksï Bibliani karaka” (Anatomy of the New Testament).

9. Eska na uandajka Isaías 40:8, ¿ambeerichi uaa seguru jarhani ima ambeeri enga Biblia uandajka?

⁹ Ambakiti ánchikuarhita engaksï uánikua uéxurhini jimbo úpka imeecha engaksï Biblieri kopiechani uaaka, ústi eskachi iásï jucha uaaka arhintani ka jorhenguarhini Bibliani ma enga jurhimbitku uandajka. b Ísïisti, Tata Diosï Jeoba ústi eskachi iásï jatsiaka imeeri Uandakuani ísï eska ima na kararkuarhika (arhinta je Isaías 40:8). Peru jamberiksï máru uandajti eska nájkiruka Biblia seguiriini jaka májkueni ambe uandani, eska inde ambe no arhikuekasïnga eska Tata Diosïni jimboeska. Ju je exeni iásï máru ambe enga xarhatajka eska Tata Diosï kararkuarhiska Bibliani.

10. Uanda je profesia ma enga niáraka ísï úkuarhini ka enga xarhatajka eska ambe enga uandajka 2 Pedru 1:21 ísïiska (exea je imajeniichani).

¹⁰ Bibliarhu uánikua profesiechaksï jarhasti engaksï ísï úkuarhikia, ka máruksï tʼuini ióntki karakata jarhasptia ante deksï kumplirikuarhini. Istoria xarhatasïndi eskaksï inde profesiecha niáraska ísï úkuarhini ka inde ambejtsïni no ísku pakatasïndi jimbokachi míteska eska Tata Diosï Jeobasï kararkuarhiapka (arhinta je 2 Pedru 1:21). Ju je eratsentani na enga kʼamajkunhapka Babilonia, ireta ma enga kánikua uinhapikua jatsipka. Siglu ochu jimbo ante de Jesúsi, Tata Diosï Jeoba úspti eska profeta Isaíasi uandapiringa eska Babilonia inchakunhapiringa. Isaíasi uandaspti eska ima achamasï enga inchakupiringa, Siru arhinhapiringa ka ístu uandaspti néna enga ísï úpiringa (Is. 44:27-45:2). Ístu, Isaíasi uandaspti eska tiempu jingoni, Babilonia kʼamajkunhapiringa ka eska nóteru nema irekapiringia jima (Is. 13:19, 20). Ka iámindu i  ambe niáraspti meru ísï úkuarhini eska na uandakata japka. Meduecha ka persechaksï inchaakuspti indeni kʼéri ireta jimbo uéxurhini 539 ante de Jesúsi, ka iásï imani lugari jimbo enga xáni sési jáxepka, tsakapu ambeterkusï jatiia (exe je selularirhu o tabletarhu bideuni Biblia uandaspti eska Babilonia kʼamajkunhapiringa, enga puntu 5 jimbo jaka, jorhenguarhikua 3 jimbo librueri Tsípikua jingoni ireka je).

11. ¿Néna ísï úkuarhixaki eska na uandajka Daniel 2:41-43?

¹¹ Peru Biblieri profesiechaksï no solu ióntki niárasti ísï úkuarhini. Iásïchi exexaka eskaksï kumplirikuarhixaka máteru profesiecha. Pori ejemplu, eratsi je na enga úkuarhini jaka iásï Danieliiri profesia enga kʼéri juramukueri ambe uandajka engaksï jindeeka Reino Unido ka Estados Unidos (arhinta je Daniel 2:41-43). Eska na uandajka i profesia, i kʼéri juramukua ma parti uinhapipirindi ísï “eska tiámu” ka “máteru nómbe” ísï eska atsïmu. Ka meruchi indeni ambesï exeni jaka. Íksï tsimani paisiicha niárasti ísï xáni uinhapitiini eska tiámu jimbokaksï jarhuajperaspka paraksï tsimani guerra mundialiichani andaani ka seguirixatiksï kʼéri ejersitu ma jatsini enga kánikua uinhapitiika. Joperu kʼuiripuecha engaksï indeni paisiicha jimbo irekaka, úxatiksï eskaksï nóteru xáni uinhapiakia jimbokaksï sindikatuechani uaasïnga, marcheechani ka máteru ambe parakaksï janhanharhinhaaka imeecheri derechuecha. Ka nótki xáni ióniisti enga achamasï ma enga ma parhakpini anapu politikeeri ambe míteka uandapka: “No ma paisi demokratiku jarhasti iásï ma parhakpinirhu enga xáni arhukurhitini jaka politika jimbo eska Estados Unidos”. ¿Ka ambechi uaa uandani Reino Unidueri ambe, enga jindeeka máteru parti i kʼéri juramukueri? Ini últimu jurhiatikuecha jimbo, kánikua arhukurhitixati jimbokaksï jima anapu kʼuiripuecha no úsïnga pakatperani na engaksï pájperaaka imani paisiicha jingoni engaksï Unión Europea jimbo jaka. Engaksï ísï arhukurhitini jaka, i kʼéri juramukua enga jindeeka Reino Unido ka Estados Unidos kánikua úkua jukanchaxati úni ambe enga uéjka.

12. ¿Ambeerichi uaa seguru jarhani Biblieri profesiecha jimbo engaksï ísï úkuarhikia?

¹² Míteni eskaksï uánikua Biblieri profesiecha niáraskia ísï úkuarhini, úsïndi eskachi sánderu seguru jauaka eska ambe enga Tata Diosï aiatspeni jaka para sánderu orhepatini ísï úkuarhiaka. Ísïchi pʼikuarherasïnga eska salmueri karari ma enga arhipka Tata Diosï Jeobani: “Uékaxakaia eskarini pʼímutantaaka, jimbokani mintsikasïnga chiiti uandakuani” (Sal. 119:81). Bibliani jimbo, Tata Diosï Jeobajtsïni uékperakua jingoni arhisïndi eskachi ‘sánderu orhepatini sési irekaaka ka eskachi erokuarhikua ma jatsiska’ (Jer. 29:11). Ambe engachi erokuarhini jaka ísï úkuarhiati jimbokajtsïni Tata Diosï Jeobasï aiachini jaka, ka no jimbokaksï kʼuiripuecha uaaka ambe ma. Ísï jimbo, ju je seguiriini jorhenguarhiani Biblieri profesiechani parachi úni sánderu mintsikani Tata Diosïiri Uandakuani.

13. ¿Ambe máteru ambe jimbochi uaa mintsikani Bibliani? (Salmo 119:66, 138).

¹³ Máteru ambe engachi jimbo uaaka Bibliani mintsikani, jindeesti jimboka jarhuataasïnga kʼuiripuechani engaksï kurhajchajka imeeri konsejuechani (arhinta je Salmo 119:66, 138). Pori ejemplu, temungurhiriicha engaksï sáno diborsiarikuarhipka iásïksï tsípikua jingoni irekaxatiia ka májku kʼériksï jarhasti. Ka kánikuaksï xénchaasïndi imeecheri sapiichani ka kuidariuani. Ka i sapiichaksï kánikua sési pʼikuarherasïndi tʼarhexeni jarhani familiarhu ma engaksï kristianueka (Efes. 5:22-29).

14. ¿Náki ejemplujtsïni xarhatachesïni eskajtsïni Biblieri konsejuecha jarhuatasïnga parachi sánderu ambakiti kʼuiripuecheeni?

¹⁴ Biblieri konsejuecha jimbo, asta ima kʼuiripuecha engaksï kánikua no sési úriika, úsïndiksï  mójtakurhini. Ju je exeni na enga jarhuatapka kʼuiripuni ma enga Jack arhinhajka enga kárselirhu japka. c Ima kánikua no sési jámasïreendi ka sánderu peligrosuespti iámindu imeecheri engaksï uándikunhapiringa. Peru ma jurhiani, ima jima uaxakaspti engaksï erachiicha Biblieri ambe jorhentpini japka. Na engaksï xáni sési kámpienga erachiicha, mintsitarhu niárakuspti. Ísï jimbo, imajtu ueenaspti Biblieri ambe jorhenguarhini. Enga ueenapka ísï úni eska Biblia na uandajka, úndaspti sánderu sési jámani ka sánderu sési járhati kualidadiichani jatsiani. Ísï tátsekua, úspti aianhpiri máeni ka tátsekua itsï atakuarhispti. Tsípikua jingoni aianguasïreendi máteruechani engaksï kárselirhu japka Tata Diosïiri Reinueri ambe, ka tʼámu kʼuiripuechani jarhuataaspti míteni jurhimbikua ambe Biblieri. Enga niárapkia jurhiatikua para uándikunhani, Jack máteru jásï kʼuiripuesptia. Imeeri abogadu ma uandaspti: “Jack nóteru ima mismu kʼuiripuestia engani 20 uéxurhini antesi mítepka. Ambe enga jorhenguarhika Jeobaeri testiguecha jingoni mójtakuspti imeeri tsípikuani”. Nájkiruka Jack uándikunhaka, imeeri ejemplu sési xarhatasïndi eskachi uaaka mintsikani Tata Diosïiri Uandakuani ka eska uinhapikua jatsiska parajtsïni jarhuatani sánderu ambakiti kʼuiripuecheeni (Is. 11:6-9).

15. ¿Andichisï ménderuenii Tata Diosï Jeobaeri marhuariicha? (Exea je fotuechani).

¹⁵ Jimbokachi pásïnga ambe enga Biblia jorhentpijka, Tata Diosï Jeobaeri marhuariichachi pínandikua jatsiska ka úsïngachi májku kʼéri jarhani (Juanu 13:35; 1 Kor. 1:10). I ambe ísku pakataasïndi kʼuiripuechani jimboka i parhakpini arhukurhitixaka politika ambe jimbo, rasa jimbo ka jatsikuarhekua ambe jimbo. Na engachi márku úkuarhintatini jaka, ísku pakataspti tumbini ma enga Jean arhinhajka ka enga África anapueka. Enga guerra úkuarhipka imeeri paisi jimbo, ejersiturhu inchamukuspti, joperu ísï tátsekua, sïpakuarhispti máteru paisi jimbo ka jima míteaspti Jeobaeri testiguechani. Jean uandasïndi: “Jorhenguarhiska eskaksï imeecha engaksï relijioni jurhimbitirhu jaka, nóksï inchamukusïnga politikarhisï nijtuksï arhukurhitini jarhani. Sánderu sési, xénchperasïndiksï máteru  ka máteruni jingoni”. Ka ístu uandasïndi: “Úraxapka juchiiti tsípikuani parani paisi ma jimbo uarhipeni, joperu engani míteka jurhimbikuani erakuspka aiakuni juchiiti tsípikuani Tata Diosï Jeobani”. Inde tumbi méntku mójtakuspti imeeri tsípikuani. Enbesi de uarhipeni imani kʼuiripuecha jingoni engaksï máteru nanisï anapueka, iásï iáminduechani jorhendaasïndia Biblieri ambe enga pínandikua íntspijka. Engaksï Biblieri konsejuecha újka jarhuataani mámaru járhati kʼuiripuechani, xarhatasïndi eskachi uaaka mintsikani Tata Diosïiri Uandakuani.

16. ¿Andisï uétarhijki eskachi sánderu mintsikaaka Tata Diosïiri Uandakuani?

¹⁶ Parhakpinirhu sánderu no sési jánhaskuarhiati, ísï jimbo sánderu úkua jukaati mintsikani Tata Diosïiri Uandakuani. Jamberiksï kʼuiripuecha jánguarhintaati parachi jucha eratseni eska Biblia no jurhimbikua ambe uandasïnga ka eska Tata Diosï Jeoba no erakuska jántspirini enga mintsinharhikueka ka jánhastiini para orhekupani imeeri iretani. Peru engachi jucha seguru jauaka eska Tata Diosïiri Uandakua méntkisï jurhimbikua ambe uandasïnga, uaakachi orhepani uérakuani indeni tsʼéjkukuechani. Eratsetini jauakachi méntkisï kurhajchaani Tata Diosï Jeobaeri juramukuechani “asta kʼamarhukuni jamberi” (Sal. 119:112). Ka nóchi kʼuratseaka aianguani máteruechani jurhimbikueri ambe ka pʼímarhiani eskaksï kurhajchauaka Biblieri konsejuechani (Sal. 119:46). Ístuchi uaaka “tekaantskua ka tsípikua jingoni” tekaantani kʼérati tsʼéjkukuechani, komu jiáni engachi no sési kánhani jauaka (Kol. 1:11; Sal. 119:143, 157).

17. ¿Ambejtsïni miátantaa karakata uéxurhini 2023 anapu?

¹⁷ Kánikuachi agradesidu jarhaska engajtsïni Tata Diosï Jeoba sésikua íntskuka parachi míteni jurhimbikuani. Nájkirukachi irekani jaka parhakpini ma jimbo engaksï sánderu uandanhiateecha jaka ka kʼuiripuecha nóteru jánhaskania ambe úni, jurhimbikua ambe enga Biblia jorhentpijka jarhuatasïndijtsïni no jukari uandanhiani, seguru pʼikuarherani, parachi irekani ambe ma jimbo ka ístujtsïni ambakiti konsejuechani íntsaasïndi. Ístujtsïni aiachisïndi eskachi uaaka ambakiti irekua ma jatsini enga Tata Diosïiri Reinu juramuni jauakia Echerirhu. Erokuarhisïngachi eskajtsïni karakata para uéxurhini 2023 jarhuataaka sánderu seguru jarhani eska iámu Tata Diosïiri Uandakua jurhimbikua ambeeska (Sal. 119:160).