¿Mítespijtsï?
¿Na jásï karru ma jimbo biajariixapi Etiopía anapu achamasï enga Felipi andarhierapka?
Uandakua enga griegu jimbo tradusirhikuarhejka “karru” jimini Bibliarhu Tata Diosïiri Uandakua para imeecha engaksï jimbanhi parhakpinirhu irekaaka uaati mámaru járhati karruechani arhikuekani (Úku. 8:28, 29, 38). Enga Etiopía anapu achamasï biajariini japka, jamberi no ejersiturhu anapu karru máepti nijtu karrereeri, sino karru ma enga sánderu kʼeri máepka ju je exeni andichisï ísï uandajki.
Etiopía anapu achamasï k’eri ánchikuarhita ma jatsipti ka íauani jamberi biajariisïrhendi. “I achamasï kʼéri ánchikuarhita ma jatsispti Kandaseeri kʼumanchikuarhu, enga Etiopía anapu juramutiipka, ka i achamasï exeni jarhasïreendi iámu imeeri jatsikuarhekua ambe” (Úku. 8:27). Imani tiempu jimbo Etiopía ístu jindeespti ima lugari enga iásï jindeekia Sudani ka ima lugariicha engaksï iásï Ejiptu surisï jaka. Najkiruka Etiopía anapu achamasï no májku karru jimbo biajariipka, uanikua ambe pákuarhixapti jimboka iauani jamberi biajaripiringa. Primeru siglurhu mámaru jarati karruechaksï úrakuarhesïreendi paraksï kʼuiripuechani paani. Por ejemplu ma jindeespti karruajiicha engaksï t’amu rruedechani jukaapka ka engaksï iámu onhakata japka. Ka libru ma enga Biblieri ambe uandajka uandasïndi: “Indeni karruajiicha jimbo ma úsïreendi uánikua ambe pákuarhini, agustu biajarini ka sánderu iauani jamberi nirani” (Acts—An Exegetical Commentary).
Etiopía anapu achamasï arhintaxapti enga Felipi andarhierapka. Biblia uandasïndi “Felipi uiriispti andarhierani ka máekandu niárakuspti ka kuraspti eska ima arhintaxapka Isaíasiiri karakatani, enga Tata Diosïiri uandakua páriipka” (Úku. 8:30). Karruajiicha engaksï kʼuiripuni peenga nóksï úkata jarhaspti paraksï uinhamu nirani, sánderu sési paraksï iatsitapani. Inde ambe jarhuataspti Etiopía anapu achamasïni paraka arhintapani japiringa ka paraka Felipi úpiringa andanguni uiriipaparini.
Etiopía anapu achamasï “méntku úntaspti arhini Felipeni eska jatapiringa ka eska imani jingoni uaxakapiringa” (Úku. 8:31). Karrereerhi karru ma jimbo k’uiripuechaksï anhaxurhitini nirasïreendi joperu karruajiru ma jimbo enga jindeepka para kʼuiripuechani paani, kánikua lugari jarhaspti paraka Etiopía anapu achamasï ka Felipe uáxakapiringaksï
Indeni ambe jimbo enga úkuecha kapitulu 8 jimbo uandajka ka ístu ambe enga istoria uandajka, iásï juchaari publikasionicharhu dibujariisïgachi achamasïni Etiopía anapuni sánderu kʼéri karrurhu ma jimbo ka no karru guerreri o karrerheeri ma jimbo.