1, 2. ¿Náki uandanhiateechanchi úpirini nitamakuarhiani Tata Diosï Jeobaeri marhuariicha?

 MA REPENTKU úkuarhisïndi ambe ma enga mójtakujka juchaari tsípikuani para méntkisï. Ju je exeani máru ejempluechani. Ma jurhiakua doktorini ma arhispti juchaari erachi Luisini a eska no sési jásï kánseri pʼamenchaxapka ka eska máru mesiichani jimboterkusï irekapiringuia. Ka Monika kánikua sési marhuakuxapti Tata Diosï Jeobani imeeri uámba jingoni enga orhejtsïkutiipka. Joperu ma jurhiatikua mítespti eska uámba uánikua uéxurhini páxapkia enga no sési ambe niátani japka. Ka Olivia enga uátsïika, jatsispti para jurajkuni imeeri kʼumanchikuani jimboka kʼéri urakani ma jurhaxapka. Enga na kʼuanhatsentapkia, imeeri kʼumanchikua iámu xerekuarhentatixaptia. Ma ratitu jimbojku imeecheeri irekua méntku mójtakurhispti. ¿Chájtu ménisï xásï ambe nitamakuarhiski?

² Májkueni eska iámindu kʼuiripuecha, Tata Diosï Jeobaeri marhuariichajtuchi jatsiasïnga uandanhiateechani ka niárasïngachi pʼamenchani. Ístu, jatsiskachi para tekaantani engajtsïni no sési kámajka imeecha engaksï ikiakujka Tata Diosïiri iretani. Ísïisti, Tata Diosï Jeoba jurajkuati eskachi ménisï no sési jásï ambe nitamakuarhiaka, joperu imajtsïni aiachisïndi eskajtsïni jarhuataaka (Is. 41:10). Uaakachi tsípikua jingoni irekani, no méni jurajkuni Tata Diosïni nájkirukachi no sési nitamakuarhini jauaka jimboka ima juchantsïni jingoni jauaka. Ini jorhenguarhikua jimbo, exenchi jauaka tʼámu ambe enga Tata Diosï Jeoba újka parajtsïni jarhuatani jiáni engachi no sési nitamakuarhini jauaka. Ístuchi uandontskuarheni jauaka ambe engachi jatsika para úni parajtsïni marhuacheni inde jarhuajperata engajtsïni ima íntskujka.

 TATA DIOSÏ JEOBAJTSÏNI KUÁJCHAKUATI

3. Engachi no sési nitamakuarhini jauaka, ¿ambechi úpirini úkua jukanchani úni?

³ Engachi no sési jásï ambe nitamakuarhinchani jaka, jamberichi kánikua úkua jukanchaka sési eratseni o sési ambe erakuni úni. ¿Andi? Jimbokachi xáni no sési pʼikuarherani jarhasïnga ka uandanhiani engachi jamberi no mítejka ambe úni. Ísïksïsï pʼikuarhereendi inde tsimani pirenchiicha engachi primeru párrafurhu exeaka. Olivia uandantasïndi: “Enga urakani iámu xerentapka juchiiti kʼumanchikuani, kánikua no sési pʼikuarheraspka ka no jánhaskasïreenga ambe úni”. Ka Monika uandantasïndi: “No solu jindeespti eskarini nema no sési pʼikuastaspka. Ji ísï pʼikuarherasïreenga enajkijtsïni kuchiiu ma jimbo mintsitarhu atapi. No jamberini úsïreenga úni imani ambe engani pauani pauani ueenga. No méni niáraspka eratseni eskani indeni ambe úkuarhinchapiringa”. ¿Nénajtsïni aiachisïni Tata Diosï Jeoba eskajtsïni jarhuataaka engachi niáraska ísï pʼikuarherani enajkichi nóteru uaaia orhepani uérani?

4. ¿Ambejtsïni aiachisïni Tata Diosï Jeoba Filipusï 4:​6, 7 jimbo?

⁴ Ambe enga Tata Diosï Jeoba újka. Bibliarhu uandasïndi eskajtsïni ima íntskuaka pínandikua (arhinta je Filipusï 4:​6, 7). Niárasïngachi jatsini indeni pínandikua jimbokachi sési pájperasïnga Tata Diosï Jeoba jingoni ka ambe máesti engajtsïni sési pʼikuastajka ka nóchi uandanhiani. Xáni kʼéri ambeesti enga “no ma kʼuiripu újka jánhaskani” o kurhanguni. ¿Ménisïjtsï niáraski mintsita jingoni kómarhini Tata Diosï Jeobani ka tátsekuajtsï ísku pakarani engajtsï exepka eskajtsï nóteru no sési pʼikuarheraxapkia? Indesï jindeeti Tata Diosïiri pínandikua.

5. ¿Néna kuájchakusïni juchaari eratsekuani ka mintsitani Tata Diosï Jeobaeri pínandikua?

⁵ Filipusï 4:7 no solu uandasïndi eskajtsïni Tata Diosï íntskuaka pínandikua, sino ístu uandasïndi eska ‘kuájchakuaka chaari mintsitani ka chaari eratsekuani’. Uandakua griegu enga ísï tradusirikuarhika komu “kuájchakuati”, sondaduechani arhikuekaasïreendi engaksï iretani ma kuáni jarheenga parakaksï no niárapiringa no sési ambe úkuni. Jima anapuechaksï úsïreendi sési kʼuíni míteparini eskaksï sondaduecha puerteecharhu jarhasïreenga para kuájchakuni iretani. Májkueni, engajtsïni Tata Diosï íntskujka imeeri pínandikua, kuájchakusïndi juchaari mintsitani ka eratsekuani ka inde úsïndi eskachi seguru pʼikuarheraaka ka pínandikua jingoni (Sal. 4:8). Ka nájkiruka no sóntku sési niántaaka inde uandanhiata engachi jatsika, uaakachi nóteru xáni no sési pʼikuarherani jarhania ísï eska na úkuarhipka Ana jingoni (1 Sam. 1:​16-18). Ka jamberichi uaaka sánderu sési eratseni ka sési ambe erakuni úni.

6. ¿Ambechi uaa úni parachi Tata Diosï Jeobaeri pínandikua jatsini? (Ístu exea je imajeniichani).

⁶ Ambe engachi jatsika para úni. Ísï eskaksï kʼuiripuecha na arhienga sondaduni ma para kuájchakuani, juchajtuchi uaaka kurhakuni Tata Diosï Jeobani eskajtsïni kuájchakuaka. Ju je kómarhini astakachi pʼikuarheraka imeeri pínandikuani  (Luk. 11:9; 1 Tes. 5:17). Indeni ambeksïsï úpti Luis ka imeeri témba Ana engaksï na mítepkia eska ima nóteru ióni irekapiringia. Luis uandantasïndi: “Enga ma ísï nitamakuarhini jarhajka, kánikua úkua jukasïndi eratseni ambe sánderu sési jaua úni o náki tratamientu sánderu sési jaua. Joperu iámu ini tiempu jimbo, kánikuajtsïni jarhuatasti kómarhini Tata Diosïni para sési ambe erakuni úni ka jatsini pínandikua”. Tsimarhanksï uandasïndi eskaksï someni kómarhisïreenga Tata Diosï Jeobani mintsita jingoni, ístu eskaksï no xáni uandanhiapiringa o no sési pʼikuarherani ka eska jarhuataapiringa paraksï sési ambe erakuni úni. Ka pʼikuarherasptiksï eska Tata Diosï Jeoba jarhuataaspka. Enga chá no sési nitamakuarhini jaka, asï jurajku je kómarhini Tata Diosï Jeobani ka exeakajtsï na engaksïni ima íntskuaka pínandikua, ka kuájchakuati chaari mintsitani ka eratsekuani (Rom. 12:12).

TATA DIOSÏ JEOBAJTSÏNI JARHUATAATI SÉSI ANHAXURHITINI JARHANI

7. ¿Nénachi úpirini pʼikuarherani engachi kʼéri uandanhiata ma jatsipiringa?

⁷ Engachi no sési nitamakuarhini jarhajka, nóchi jamberi úsïnga sési eratseni, no nani máruchi pʼikuarherasïnga ka nóchi sési erakusïnga ambe ma jimbokajtsïni uandanhiateecha manamatantasïnga komueskaksï oleecha na kántajka barkuni ma enga marirhu terumikua jarhajka ka enga kʼéri janini jarhajka. Ísïsï pʼikuarherapti Luisiiri témba enga ima uarhipka. Ima uandantasïndi: “Ménichani xáni no sési pʼikuarherasïreenga engani nóteruni uékeengia irekani ka kánikuani pʼamojkukuarhisïreenga. Joperu ístuni ménichani kánikua ikiasïreenga jimboka Luis nóteru jíndeeni jingoni jarhaspkia”. Ístu uandasïndi eska jarhasïreenga jurhiatikuecha enga jandiajku pʼikuarhereenga ka ikiani jimboka iásï ima úsïngia imani ambe enga antesi Luisi sési ueenga. Para ima ísïispti komueska marirhu terujkani jarhani nani enga kʼéri ma janini jarhajka. ¿Nénajtsïni jarhuatasïni Tata Diosï Jeoba engachi ísï pʼikuarherajka enajkichi uarhiaia ka nóteruchi únia orhepani uérani?

8. ¿Ambejtsïni aiachisïni Tata Diosï Jeoba Isaías 33:6 jimbo?

⁸ Ambe enga Tata Diosï Jeoba újka. Imajtsïni aiachisti eskajtsïni jarhuataaka sési anhaxurhitini jarhani (arhinta je Isaías 33:6). Pori ejemplu enga barku ma jimeesïsï jarhajka nani enga kʼéri janini jarhajka, úndasïndi kánikua no sési manakuarhini. Ka paraka barku no jiniani ka jiniani niuaka, mándani jájtakurhini aleteni jarhatiichani jukaasïndi enga jarhuatajka no xáni no sési manakuarhini. Ka i ambe úsïndi eskaksï iáminduecha engaksï jima nirani jarhajka sánderuksï seguru pʼikuarheraaka. Joperuksï aleteecha sánderu marhuasïndi enga barku xanharani jarhajka. Májkueni, engachi uéjka eskajtsïni Tata Diosï Jeoba jarhuataaka engachi kánikua no sési nitamakuarhini jauaka, jatsiskachi para orhepani ísï xanharani, i ambe arhikuekasïndi eskachi jatsiska para seguiriini jarhani sési marhuakuni Tata Diosï Jeobani.

9. ¿Nénajtsïni marhuachesïni jarhuajperateecha engajtsïni Tata Diosï Jeobaeri kúnguarhikua íntsaajka? (Ístu exea je imajeniichani).

 ⁹ Ambe engachi jatsika para úni. Engachi ísï pʼikuarheraaka enajkichi nóteru uaaia uandanhiateecha jingoni, ju je seguiriini kómarhini, tánguarhini ka nirani aianhpini. Ísïisti, jamberichi nóteru uaakia májkueni úni eska antesi, joperu ju je miáni eskajtsïni Tata Diosï Jeoba kurhanguchesïnga (terukutanta je Lukasï 21:​1-4 jingoni). Asï mirikurhi je tiempu arhutani parajtsïni jandiajku jorhenguarhini Biblieri ambe ka eratsentani. Tata Diosï Jeoba, imeeri kúnguarhikua jimbojtsïni uánikua rebisteechani íntsaasïndi ka sési járhati bideuechani engajtsïni jarhuataaka parachi no xáni no sési pʼikuarherani. Parajtsï exentani ambe engajtsï uétarhinchani jauaka, uaakajtsï arini ambe úrani: JW Library^®, Índice de las publicaciones Watch Tower ka Jarhuajperata paraksï Jeobaeri testiguecha estudiarini. Monika, engachi antesi uandani japka, uandasïndi eska ima úraspka ini ambe enga ueeneenga kánikua no sési pʼikuarherani. Pori ejemplu, ménisï jirinhantasïreendi iiri ambe komu ikiatapu, enganiarini o no méni jurajkuni, ka arhintasïreendi informasioni astakani sési pʼikuarherapiringa. Ima uandantasïndi: “Engani ueeneenga karani ambe engani jirinhatapiringa, kánikua no sési pʼikuarherani jarhasïreenga ka juchiiti mintsita uinhamu manarani jarhaasïreendi. Joperu engani na kʼamarengia arhintani informasionini, nóteruni ísï pʼikuarherani jarhasïreengia, ísïisïrendi enajkirini Tata Diosï Jeoba pʼárhipʼárhiteeni. Engani arhintani jarhenga, exesïreenga eskarini Tata Diosï Jeoba kurhanguchisïreenga na engani pʼikuarherani jarheenga ka eskarini jarhuataxapka”. Ístuksïni Tata Diosï Jeoba uaati jarhuatani parajtsï úni sési pʼikuarherantani ka nóterujtsï xáni uandanhiania (Sal. 119:​143, 144).

TATA DIOSÏ JEOBAJTSÏNI JUPIJTAATI

10. ¿Nénachi úpirini pʼikuarherani engachi kʼéri uandanhiata ma jatsipiringa?

¹⁰ Engachi kʼéri uandanhiata ma nitamakuarhijka, jamberichi méni ísï pʼikuarherajka enajkichi iámu chkéia ka kómu pʼikuarherani jarhani. Jamberichi ísï pʼikuarherajka eska ima kʼuiripu enga sóntku uiriijka joperu enga iásï nóteru májkueni jámajkia jimboka atakuarhiska. Jamberichi kánikua úkua jukanchajka imani ambe úni engachi antesi fásili ueenga o nóteruchi únchania imani ambe engachi antesi kánikua tsitienga. Májkueni eska Elíasi, jamberichi no sáni jauaranchani jauaka ka soluchi uékani kʼuíni (1 Rey. 19:​5-7). ¿Ambejtsïni aiachisïni Tata Diosï Jeoba eska uaaka jiáni engachi ísï pʼikuarherani jauaka?

11. ¿Ambe máteru ambe úsïni Tata Diosï Jeoba parajtsïni jarhuatani? (Salmo 94:18).

¹¹ Ambe enga újka Tata Diosï Jeoba. Imajtsïni aiachisïndi eskajtsïni jupijtaaka (arhinta je Salmo 94:18). Májkueni eska ima enga atakuarhijka  ka uétarhinchani jarhuajperata para úni manakuarhini, juchajtuchi májkueni uétarhinchasïnga jarhuajperata parachi úni seguirini sési marhuakuni Tata Diosï Jeobani. Engachi ísï nitamakuarhini jarhajka imajtsïni aiachisïndi: “Ji, chiiti Tata Diosï Jeoba, jupikatixaka chiiti jájkini jurhijkandani anapuni; jíkenisï arhini jaka: ‘Asï ché. Jíkeni jarhuataaka’” (Is. 41:13). Jiáni enga rei Dabidi no sési nitamakuarhini japka ka ístu engaksï imeeri enemiguecha no sési ambe uékeenga úkuni, exespti eska Tata Diosï Jeoba imani jingoni jarhaspka, jimbosï arhipti: “Chiiti jájki jurhijkandani anapu jupikatixatirini” (Sal. 18:35). Joperu ¿nénajtsïni jupikatixaki Tata Diosï Jeoba?

12. Engachi kánikua no sési pʼikuarherani jauaka, ¿néni úpirini úrani Tata Diosï Jeoba parajtsïni jarhuatani?

¹² Ménichani, Tata Diosï Jeoba máteru kʼuiripuechani úraasïndi parajtsïni jarhuatani. Pori ejemplu, ma uelta Dabidi kánikua no sési pʼikuarheraxapti, joperu imeeri amigu jémba Jonatani niraspti pʼorhembini para jarhuatani ka uinhaperantani (1 Sam. 23:​16, 17). Ka Elíasini jingoni, Tata Diosï Jeoba Eliseuni erakuspti paraka jarhuatapiringa imani ambe jingoni enga Elíasi uétarhinchani japka (1 Rey. 19:​16, 21; 2 Rey. 2:2). Ka parajtsïni juchantsïni jarhuatani, Tata Diosï Jeoba uaati úrani juchaari familiani, amiguechani o orhejtsïkutiichani. Engachi kánikua no sési pʼikuarherani jarhajka uékasïngachi jandiajkuni jarhani, ka inde ambe no no sési jarhasti. Joperu, ¿ambechi jatsiski para úni parajtsïni marhuacheni Tata Diosï Jeobaeri jarhuajperata?

13. ¿Ambechi jatsiski para úni parajtsïni marhuacheni ima jarhuajperata engajtsïni Tata Diosï Jeoba íntskujka? (Ístu exea je imajeniichani).

¹³ Ambe engachi jatsika para úni. Ju je jánguarhintani no jandiajku jarhani, jimboka engachi jarhariajka máteruechani sánderuchi arhiaka indeni uandanhiateechani eratseani jarhani engachi jatsiaka. Ka inde ambe uaati eskachi no sési erakua ambe ma (Prov. 18:1). Ísïisti, iáminduechachi ménisï uétarhinchasïnga jandiajku jarhani ka sánderu jiáni engachi no sési ambe úkuarhinchajka. Joperu engachi jukari uékapiringa jandiajku jarhani, nóchi jurajkuni japiringa eskajtsïni Tata Diosï Jeoba jupijtaaka o jarhuatani. Ísï jimbo, nájkiruka sáni úkua jukaaka ju je jiókuarhini jarhuajperatani engajtsïni juchaari familia, juchaari amiguecha ka orhejtsïkutiicha íntskujka. Ju je ísï exeani eska Tata Diosï Jeobasï úraani jaka parajtsïni jarhuatani (Prov. 17:17; Is. 32:​1, 2).

TATA DIOSÏ JEOBAJTSÏNI SÉSI PʼIKUASTANTAATI

14. ¿Ambejtsïni úpirini chérani?

¹⁴ Jamberi jauati jurhiatikuecha engachi kánikua chéni pʼikuarheraaka. Bibliarhu uandasïndi máru Tata Diosï Jeobaeri marhuariicheeri engaksï uandantajka eskaksï manarasïreenga xáni chéni imeecheri ikiatspitiicha jimbo o jimbokaksï uandanhiateechani  jatsiaspka (Sal. 18:4; 55:​1, 5). ¿Ka juchaia? ¿No sésichi nitamakuarhixaki jimbokachi no sési kánhasïnga eskuelarhu, ánchikuarhitarhu, familiarhu o juramutiichani jimbo? ¿No sésichi pʼikuarheraxaki jimbokachi arhinhaska eskachi jamberi uaaka uarhini pʼamenchakua ma jimbo? Engachi indeni ambe nitamakuarhini jarhajka, úpiringachi ísï pʼikuarherani eska sapi ma enga méntku no jánhaskajka ambe úni. ¿Ambe úsïni Tata Diosï Jeoba parajtsïni jarhuatani?

15. Eska na arhijka Salmo 94:​19, ¿ambejtsïni aiachisïni eska uaaka Tata Diosï Jeoba?

¹⁵ Ambe enga Tata Diosï Jeoba újka. Imajtsïni sési pʼikuastantasïndi ka jarhuatasïndijtsïni parachi nóteru xáni chénia (arhinta je Salmo 94:19). Ju je eranhaskani nanaka sapichuni ma enga kánikua chéni jarhajka ka enga no újka kʼuíni jimboka kʼéri ma janixaka ka piritani. Ísï jimbo, jurhasïndi taati jémba ka kamanharhisïndi ka sési pʼikuastantasïndi astaka kʼuíaka. Nájkiruka seguiriini jarhajka kʼéri janini, ima nóteru chésïndia jimboka taati jémbeeri jájkiicha jimbo jarhaska. Sáno májkueni, engachi kánikua chéni jauaka jamberichi uétarhinchaaka eskajtsïni juchaari Taati auandarhu anapu kamanharhiaka astakachi sési pʼikuarherantaaka. ¿Ambechi jatsiski para úni parakajtsïni Tata Diosï Jeoba sési pʼikuastantaaka?

16. Engachi uéjka eskajtsïni Tata Diosï Jeoba sési pʼikuastantaaka, ¿ambechi jatsiski para úni? (Ístu exea je imajeniichani).

¹⁶ Ambe engachi jatsika para úni. Kánikua jukaparhakuesti eskachi pʼindeaka arhutani tiempu para Tata Diosï Jeobani kómarhini ka arhintani Bibliani (Sal. 77:​1, 12-14). Ísï jimbo, engachi uandanhiata ma jatsiaka jamberi ambe engachi orheta uaaka, jindeesti aianguni juchaari Taati auandarhu anapuni. Ju je aianguni Tata Diosï Jeobani ambe engajtsïni uandanhiatajka ka chérani, ka ju je jurajkuni eskajtsïni ima sési pʼikuastantaaka imeeri Karakata jingoni (Sal. 119:28). Bibliarhu jarhastiksï máru karakateecha engajtsïni kánikua uinhaperpentajka jiáni engachi chéni pʼikuarherani jarhajka, pori ejemplu ari libruecha: Job, Salmos, Proverbios ka ístu ambe enga uandapka tata Jesukristu jimini Mateu kapitulu 6 jimbo. Enga chá kómarhiska Tata Diosï Jeobani ka arhintani imeeri Karakatani exeakajtsï néna engaksïni ima sési pʼikuastantaaka.

17. ¿Ambechi jatsiski para méntkisï miáni jarhani?

¹⁷ Asï mirikurhi je: nájkirukajtsï no sési nitamakuarhini jauaka, Tata Diosï Jeoba méntkisï jima jauati paraksïni jarhuatani. Nójtsïni méni jandiajku jurajkuati (Sal. 23:4; 94:14). Ju je miáni eskajtsïni aiachiska eskajtsïni ima kuájchakuaka, uinhaperantani, jupijtani ka sési pʼikuastantani. Isaíasi arhispti Tata Diosï Jeobani: “Kuájchakuauakari imechani engaksï kʼamakʼamasï chíti jarhuajperata jirinhajka, tʼuri íntsaani jauaka pínandikua para méntkisï, jimbokaksïni tʼunguinisï mintsikajka” (Is. 26:3). Ísï jimbo, mintsika je Tata Diosï Jeobani ka sési úra je iámindu ambe engaksïni ima íntskujka paraksïni jarhuatani. Engajtsï ísï úska, jatsiakajtsï uinhapikua para tekaantani iámindu no sési jásï ambe engajtsï nitamakuarhiaka.