SEMANA 4
PIREKUA 18 Diosmeiamu chíti Uájpa jimbo
Ambe engachi jorhenguarhijka engajtsïni Jesúsi ísï euajpintaka
“Ísïchisï exeka jucha eskajtsïni Tata Diosï xénchasïnga” (1 JUANU 4:9).
AMBE ENGACHI JORHENGUARHIAKA
Jesúsiiri uarhikua jingoni, jorhenguarhiakachi na enga Tata Diosï Jeoba ka Jesúsi sési járhati kualidadiichani xarhataajka.
1. ¿Nénajtsïni marhuachesïni miántani tata Jesukristueri uarhikuani mándani uéxurhini?
JUCHACHI úsïnga sési pájperani Tata Diosï Jeoba jingoni ka sánderu orhepatinchi uaaka irekani para méntkisï jimboka Jesúsi íntspiska imeeri tsípikuani juchantsïni jimbo. Jiájkanchi jatsiaska uánikua rasoniichani parachi agradesidu jarhani Tata Diosï Jeoba jingoni (2 Kor. 9:15). Imajtsïni íntskusti indeni regaluni jimbokajtsïni kánikua xénchasïnga, ¿a no eska kʼéri regalu máeska enga Tata Diosï Jeoba íntspika imeeri Uájpeeri tsípikuani? (Rom. 5:8). Ísï jimbo, Jesúsi uandaspti eskachi mándani uéxurhini miántapiringa imeeri uarhikuani ka engachi ísï újka marhuachesïndijtsïni parachi jukaparharani ka agradeseriini ambe enga ima úka juchantsïni jimbo (Luk. 22:19, 20).
2. ¿Ambechi exea ini jorhenguarhikua jimbo?
2 Sábadu 12 de abrili de 2025 jimbo, miántaakachi tata Jesukristueri uarhikuani ka iáminduechachi uékasïnga nirani indeni tánguarhikuarhu. Ísï jimbo, máru semana ante dechi miántaakia Jesúsiiri uarhikuani ka ísï tátsekua, kánikuajtsïni marhuacheati eratsentani a ambe enga xáni úkia Tata Diosï Jeoba ka ístu imeeri Uájpa juchantsïni jimbo. Ini jorhenguarhikua jimbo, exeakachi ambe engajtsïni jorhendajka Jesúsiiri uarhikua Tata Diosï Jeobaeri ambe ka ístu Jesúsiiri mismu ambe. Ka máteru jimbo, jorhenguarhiakachi nénajtsïni uaa marhuacheni Jesúsiiri uarhikua ka nénachi uaa xarhatani eskachi agradesidu jarhaska.
AMBEJTSÏNI JORHENDASÏNI JESÚSIIRI UARHIKUA TATA DIOSÏ JEOBAERI AMBE
3. ¿Andisï solu ma kʼuiripu perfektu úpirini pʼímutaantani uánikua kʼuiripuechani? (Ístu exea je imajeniichani).
3 Jesúsiiri uarhikuajtsïni jorhendasïndi eska Tata Diosï Jeoba méntkisï sési jusgarpisïnga (Deut. 32:4). Ka úsïngachi ísï uandani jimboka jiáni enga Adáni nóteru uékapkia kurhajchani Tata Diosï Jeobani, kéritaaspti iámindu imeeri uájpeechani pekaduni ka uarhikuani (Rom. 5:12). Ísï jimbo, Tata Diosï Jeoba axaspti imeeri Uájpani parajtsïni euajpintani pekadueri ka uarhikueri. ¿Joperu andisï solu ma kʼuiripu perfektu úpirini euajpiantani uánikua kʼuiripuechani? Ju je exeni ambe enga uandapka apostoli Pablu: “Uánikua kʼuiripuechaksï pekariisti” jimboka Adáni no kurhajchaspka Tata Diosïni, ka májkueni, jimboka Jesúsi kʼóru kurhajchaspka, “Tata Diosï uánikua kʼuiripuechani ísï exeauati komueska kʼuiripuecha engaksï sési jámajka” (Rom. 5:19; 1 Tim. 2:6). I ambe arhikuekasïndi eskachi iámindu kʼuiripuecha niáraska jántspiriini pekadueri ka uarhikueri jimboka ma kʼuiripu perfektu no kurhajchaspka Tata Diosïni. Ísï jimbo, ma kʼuiripujku perfektujkusï uétarhiendi parajtsïni pʼímutantani.
Ma achamasï ústi eskachi jántspiriuaka pekadueri ka uarhikueri. Joperujtsïni ma achamasï ústi pʼímutantani. (Exe je párrafu 3).
4. ¿Andisï Tata Diosï Jeoba no jurajkupi eskaksï Adániiri uájpeecha irekapiringa para méntkisï nájkirukaksï kurhajchapiringa?
4 ¿Joperu meru jatsipirini para uarhini Jesúsi parajtsïni úni pʼímutantani? Jamberi para jucha, sési japirindi eska Tata Diosï Jeoba jurajkuapiringa irekani para méntkisï imani kʼuiripuechani o Adániiri uájpeechani engaksï kurhajchapiringa Tata Diosïni. Joperu enga Tata Diosï Jeoba jurajkupiringa eska inde ambe úkuarhipiringa, ísïipirindi enajki Adáni no méni pekariipi ka uájpeechaksï perfektueni, joperu i ambe no ísïispti. Ísï jimbo, Tata Diosï Jeoba jatsispti para imani ambe úni enga sési jaka.
5. ¿Andichisï uaa seguru jarhani eska Tata Diosï Jeoba méntkisï uaaka ambe enga sési jaka?
5 Ju je eranhaskani eska Tata Diosï Jeoba no íntspipiringa imeeri Uájpani parajtsïni euajpintani ka jurajkuni eskaksï Adáni uájpeecha irekapiringa para méntkisï nájkirukaksï no perfektuepiringa, ¿ambe úpirini úkuarhini? Kʼuiripuechaksï nóteru úpirinia mintsikani Tata Diosïni, jimbokaksï úpiringa eratseni: “Tata Diosï no úxati ambe enga sési jaka ka ambe enga no sési jaka, ísï jimbo, ¿kumpliriua ambe engajtsïni aiachini jaka?”. Joperuchi jucha no jatsiska para uandanhiani jimboka Tata Diosï Jeoba méntkisï úsïnga ambe enga sési jaka nájkiruka jatsipka para íntspini imeeri Uájpeeri tsípikuani. Jiákanchi uaaka seguru jarhani eska ima méntkisï uaaka ambe enga sési jaka.
6. ¿Jesúsiiri uarhikuajtsïni néna xarhatachesïni eskajtsïni Tata Diosï Jeoba kánikua xénchasïnga? (1 Juanu 4:9, 10).
6 Enga Jesúsi uarhikua juchantsïni jimbo parajtsïni euajpintani, xarhatasïndi eskajtsïni Tata Diosï meru kánikua xénchasïnga ka eska no solu méntkisï sési úsïnga iámindu ambe (Juanu 3:16; arhinta je 1 Juanu 4:9, 10). Tata Diosï Jeoba axasti imeeri Uájpani para uarhini juchantsïni jimbo jimboka uékasïnga eskachi irekaaka para méntkisï ka eskachi kuenta úkuarhiaka imeeri familia jingoni. Eranhaska je ini ambe, enga Adáni pekariipka, jurajkuspti Tata Diosï Jeobaeri familiani ka jimbochisï jucha nóteru imeeri familia jingonikia. Joperu jimbokajtsïni Tata Diosï Jeoba meru kánikua xénchasïnga, euajpintastijtsïni. Ísï jimbo, ima kʼuiripu enga mintsikaaka ka kurhajchani Tata Diosïni, uaati imeeri familia jingoni kuenta úkuarhini. Ka desde iásï, úsïntsïni puácheantani juchaari pekaduechani jimbochisï újka sési pájperani Tata Diosï jingoni ka juchaari erachiicha jingoni (Rom. 5:10, 11).
7. Engachi eratsentajka na enga xáni kómu nitamakuarhipka Jesúsi ante de uarhini, ¿jarhuatasïntsïni exeni na engajtsïni xáni xénchajka Tata Diosï Jeoba?
7 Engachi exejka na enga xáni maiampika Tata Diosï Jeoba parajtsïni euajpintani, exesïngachi na engajtsïni xáni xénchajka. Noambakiti uandasïndi eskaksï kʼuiripuecha jurajkuaka Tata Diosïni engaksï no sési nitamakuarhini jauaka. Ísï jimbo, Tata Diosï jurajkuspti eska imeeri Uájpa no sési nitamakuarhipiringa ante de uarhini para xarhatani eska no ísïiska ambe enga Noambakiti uandajka (Job 2:1-5; 1 Ped. 2:21). Auandarhu uératini, Tata Diosï exexapti na engaksï kʼuiripuecha teresmarhuni japka Uájpani ka engaksï sondaduecha kʼuikirhini japka ka chkarirhuksï ma cháparhatani, ka ístu exespti na enga xáni kómu uarhipka imeeri Uájpa enga xáni xéncheenga (Mat. 27:28-31, 39). Tata Diosï Jeoba úpirindi na uéjki jatini jarhuatani Uájpani, pori ejemplu jiáni enga kʼuiripu uandapka: “Enga Tata Diosï uéjka jarhuatani, eska juuaka kuájpini” (Mat. 27:42, 43). Joperu enga Tata Diosï kuájpipiringa, Jesúsijtsïni nóteru úpirindia euajpintani ka kʼuiripu nóteru úpirindia mintsikani ambe enga xáni aiatspeka Tata Diosï. Indeni ambe jimbosï Tata Diosï Jeoba jurajkupti eska Uájpa xáni kómu nitamakuarhipiringa astaka uarhipka.
8. ¿Nénachi míteski eska Tata Diosï Jeoba no sési pʼikuarheraxapka enga Uájpa xáni kómu nitamakuarhini japka? (Ístu exe je imajenini).
8 Nájkiruka Tata Diosï Jeoba kánikua uinhapitiika, no úraspti para imeeri Uájpani kuájpini. Joperu inde ambe no arhikuekasïni eska ima no ma ambe pʼikuarherasïnga. Juchachi ísï úkata jarhaska eska Tata Diosï na jásïika ka juchachi xarhatasïnga na engachi pʼikuarherani jarhajka. Jiájkani i ambe arhikuekasïndi eska Tata Diosï Jeobajtu xarhatasïnga ambe enga pʼikuarherajka. Biblia uandasïndi eskaksï jarhaspka kʼuiripuecha engaksï ʻno sési pʼikuastapka’ ka ʻkómu pʼikuastani’ (Sal. 78:40, 41). Ju je exeni ambe enga úkuarhipka Abraáni ka Isaaki jingoni. Tata Diosï Jeoba arhispti Abraánini eska kéjtsïtapiringa uájpani (Gén. 22:9-12; Ebr. 11:17-19). Úsïngachi eranhaskani na enga Abraáni mámaru ambe pʼikuarherani japka ka ístu kómu pʼikuarherani enga preparariini japka iámindu ambe para sóntku kéjtsïtani uájpani. ¿Ka iásï Tata Diosï Jeobaia? ¿Néna pʼikuarherani japi enga exeni japka na engaksï xáni no sési kámani japka Uájpani astaksï uándikuni? ¿Úsïnchi eranhaskani na enga xáni kómu pʼikuarherani japka ka mintsitarhu pʼamenhini? (Incha je pájinarhu jw.org parajtsï exeni bideuni Imeecha engaksï mintsikapka Tata Diosïni: Abraáni [parti 2]).
Tata Diosï Jeoba kánikua no sési pʼikuarheraspti enga exepka imeeri Uájpani kómu nitamakuarhini jarhani. (Exe je párrafu 8).
9. ¿Ambeksïni jorhendasïni Roma 8:32, 38, 39 na engaksïni xáni xénchajka Tata Diosï Jeoba chánksïni ka iámindu imeeri marhuariichani?
9 Enga Jesúsi ísï uarhika juchantsïni jimbo, xarhatasïndi eska ni sikiera juchaari amigu o parienti ma jaki engajtsïni xáni xénchajka eska Tata Diosï Jeoba (arhinta je Roma 8:32, 38, 39). Ni juchachi xáni xénchakuarhijki eskajtsïni Tata Diosï Jeoba na xáni xénchajka. Eratsenta je ini ambe: chájtsï uékani jakaia irekani para méntkisï, joperu Tata Diosï Jeoba mintsita jingonisï uékani jatiia eska chá irekaaka para méntkisï. Chájtsï uékasïnga eskaksïni Tata Diosï puácheantauaka pekaduechani ka ima sánderu uékaxatiia ísï úni. Joperu ima uékasïndi eskachi mintsikaaka imani ka kurhajchani parajtsïni Jesúsiiri uarhikua marhuacheni, ka ima indeni ambejkusï uéjti eskachi uaaka. ¿A no eska tata Jesukristueri uarhikua xarhatasïnga na engajtsïni xáni xénchajka Tata Diosï Jeoba? Ka jimbanhi parhakpinirhu, seguiriini jauakachi jorhenguarhini na engajtsïni xáni xénchajka (Ecl. 3:11).
AMBEJTSÏNI JORHENDASÏNI JESÚSIIRI UARHIKUA IMEERI AMBE
10. a) ¿Ambe jimbo uandanhiasïreeni Jesúsi ante de uarhini? b) ¿Andisï Jesúsi úpi pímbinhajkuntani Tata Diosïiri nombrini? (Ístu exe je rekuadruni “ Jesúsiiri uarhikua pímbinhajkuntaspti Tata Diosï Jeobaeri nombrini”).
10 Jesúsi kánikua uandanhiasïreendi ambe engaksï uandapiringa kʼuiripuecha Taati jémbeeri ambe (Juanu 14:31). Jesúsi kánikua uandanhiaxapti néna pakatapirini Taati jémbani, jimboka ísï uarhipiringa komueska no sési úri ma ka nema enga no janhanharhijka Tata Diosïni, jimbosï uandapti: “Juchiiti Taati, enga uaaka ísï úkuarhini, kénditacherini ini kopani” (Mat. 26:39). Joperu Jesúsi méntkisï kurhajchaspti Taati jémbani asta uarhikuarhu jamberi, ka úspti mátirku pímbinhajkuntani o sési pakatani Tata Diosï Jeobaeri nombrini.
11. ¿Néna xarhataspi Jesúsi eska kánikua xénchaasïnga kʼuiripuechani? (Juanu 13:1).
11 Jesúsiiri uarhikuajtsïni jorhendasïndi eska ima kánikua uandanhiasïnga kʼuiripuecha jimbo ka sánderia imeeri chúxapatiichani jimbo (Prov. 8:31; arhinta je Juanu 13:1). Jesúsi mítespti eska Echerirhu kánikua no sési nitamakuarhipiringa ka eska kómu uarhipiringa, joperu no afuersa jámaspti aianhpini, sino mintsita jingoni ísï úspti, ístu jorhentpispti ka jarhuataaspti máteruechani. Ka ima chúri ante de uarhini, jupandukuaspti imeeri apostoliichani uinhaperaantaspti ka ambakiti ambe jorhendaaspti (Juanu 13:12-15). Ka enga cháparhakata japkia chkarirhu, útasï ambakiti ambe aiakuspti imani no sési úrini enga máekandu tirhipakuarhetini japka. Ka Juanuni arhispti eska kuidaripiringa Maríani enga Jesúsiiri amambeepka (Luk. 23:42, 43; Juanu 19:26, 27). Iámindu inde ambe xarhataspti eska Jesúsi xénchaasïreenga kʼuiripuechani ka asta íntspispti imeeri tsípikuani imeecha jimbo.
12. ¿Ambeteru xáni úxaki Jesúsi juchantsïni jimbo?
12 Kristu “ma ueltajkusï uarhiti ka para méntkisï”, joperu seguiriixati mámaru ambe úni juchantsïni jimbo (Rom. 6:10). Jo, ima seguiriixati uinhamu ánchikuarhini parajtsïni ambakiti ambe íntskuni, ka uaakachi jatsini indeni ambe jimboka ima uarhiska juchantsïni jimbo. Eranhaska je ambe enga xáni újka jimboka Reiiska, sánderu kʼéri saserdoti ka orhejtsïkuxati Tata Diosïiri kúnguarhikuani (1 Kor. 15:25; Éfes. 5:23; Ebr. 2:17). Ka ístu tánaantaxati erakukateechani ka uánikua máteru kʼuiripuechani, ka tʼuini kʼamaraatia ini ánchikuarhitani ante de kʼamakurhini ima tiempu enga kʼuiripu no sési nitamakuarhiaka (Mat. 25:32; Mar. 13:27). b Ka ini últimu jurhiatikuecha jimbo, Jesúsi jánguarhintaxati parakaksï Tata Diosï Jeobaeri marhuariicha méntkisï jorhenguarhini jauaka Biblieri ambe enga ísïika komueska tʼirekua (Mat. 24:45). Ka jiáni enga Mili uéxurhini juramuni jauakia, seguiriini jauatijtsïni jarhuatani. Eskachi na exekia, Tata Diosï Jeoba no solu íntspisti imeeri Uájpani para juchantsïni jimbo uarhini, sino paraka ístu úpiringa uánikua máteru ambe.
MÉNTKU SEGUIRIINI JA JE JORHENGUARHINI
13. ¿Nénajtsïni jarhuataa seguiriini jarhani jorhenguarhini na engajtsïni xáni xénchajka Tata Diosï Jeoba ka Jesúsi?
13 Engachi eratsentaaka jarhuataatijtsïni seguiriini jarhani jorhenguarhini na engajtsïni xáni xénchajka Tata Diosï Jeoba ka Jesúsi. Ini uéxurhini enga niárani jauakia para miántani Jesúsiiri uarhikuani, jamberijtsï uaaka Ebanjeliu ma arhintani o asta máteruechani jamberi. Jánguarhinta je no xáni káni informasioni arhintani, sino iatsitakuarhu parajtsï úni eratsentani andichisï jatsi para xénchani Tata Diosï Jeobani ka Jesúsini. Ka asï mirikurhi je aianguani máteruechani jimbanhi ambe engajtsï jorhenguarhiaka.
14. Eska na arhijka Salmo 119:97 ka nota, ¿ambechi jatsiski para úni parachi seguiriini jorhenguarhini Jesúsiiri uarhikueri ambe ka máteru temecheeri ambe? (Ístu exe je imajenini).
14 Enga chá ióni páni jakaia engajtsï míteka jurhimbikuani, jamberijtsï eratsejka sintsï uaa útasï máteru ambe jorhenguarhini. Pori ejemplu, na enga Tata Diosï sési jusgarpijka, na enga xáni xénchpejka o na engajtsïni euajpintaka Jesúsi. I temecheeri ambe, ma no méni kʼamarasïndi jorhenguarhini. ¿Ambeksïni jarhuataa seguiriini jarhani jorhenguarhini? Uaakajtsï jirinhantani informasioni publikasioniicharhu ka engajtsï tekstu ma arhintaaka ka nójtsï kurhanguni, jirinhantsï je sánderu informasioni. Ka tátsekua, eratsenta je ambe engajtsï jorhenguarhika Tata Diosï Jeobaeri ambe, imeeri Uájpeeri ambe o na engaksïni imeecha xáni xénchajka (arhinta je Salmo 119:97 ka nota).
Na uéjkichi xáni ióni páni jarhani jurhimbikuarhu, útasïchi uaa pauani pauani xarhatani eskachi agradesidu jarhaska tata Jesukristueri uarhikua jimbo. (Exe je párrafu 14).
15. ¿Andichisï jatsi para seguiriini jarhani ambakiti ambe jirinhantani Bibliarhu?
15 Engajtsï Bibliani arhintani jauaka o estudiariini, asï jáma je no sési pʼikuarherani engajtsï no exentaaka jimbanhi ambe o imani ambe enga chá kánikua tsitipiringa jorhenguarhini. Biblia estudiariini ísïisti komueska oru jirinhantani jámani. Uánikua kʼuiripuechaksï chúskutasïndi o asta uánikua jurhiatikuecha jimboksï jámasïndi oruni jirinhani. Joperu engaksï tekaantajka ka jánguarhintanksï, úsïndiksï exentani sanititu oru ka kánikuaksï jukaparharasïndi. Joperu exe je, engachi ambakiti ambe jorhenguarhijka Bibliarhu, i ambe sánderu jukaparhakuesti eska oru (Sal. 119:127; Prov. 8:10). Ísï jimbo, asï kuatanta je, seguirii je arhintani Bibliani ka estudiariini (Sal. 1:2).
16. ¿Nénachi uaa májkueni jámani eska Tata Diosï Jeoba ka Jesúsi?
16 Engajtsï Bibliani estudiariini jauaka, jánguarhinta je exeni nénajtsï uaa ísï úni eskajtsï na jorhenguarhika. Pori ejemplu, engajtsï iáminduechani májkueni sési káuaka, ísïjtsï úni jauaka eska Tata Diosï Jeoba enga méntkisï sési újka iámindu ambe. Ka parajtsï xarhatani eskajtsï xénchasïnga Tata Diosï Jeobani ka kʼuiripuechani ísï eska Jesúsi, uaakajtsï listu jarhani parajtsï úni ambe enga Tata Diosï uéjka nájkiruka ménisï úkua jukaaka ka ístu jarhuataani erachiichani. Ka nirani aianhpini parakaksï kʼuiripuechajtu uaaka marhuatani tata Jesukristueri uarhikuani.
17. ¿Ambechi jorhenguarhini jaua máteru semana jimbo?
17 Engachi sési kurhanguska ka jukaparharani enga Jesúsi ísï uarhika juchantsïni jimbo, sánderuchi xénchaaka Tata Diosï Jeobani ka Uájpani, ka indeni ambe jimbo, imajtujtsïni kánikua xénchaati juchantsïni (Juanu 14:21; Sant. 4:8). Ísï jimbo, ju je marhuatani iámindu ambe engajtsïni Tata Diosï Jeoba íntskujka parachi seguiriini jarhani jorhenguarhini Jesúsiiri uarhikueri ambe. Máteru semana jimbo, jorhenguarhinchi jauaka nénajtsïni marhuachesïni Jesúsiiri uarhikua ka nénachi uaa xarhatani eskachi agradesidu jarhaska engajtsïni Tata Diosï xáni xénchajka.
PIREKUA 107 Jeobajtsïni jorhendasïndi uékpini
a JUKAPARHAKUA AMBE: “Eratsentani” arhikuekasïndi úrani juchaari éjpuni para jánhaskani, sánderu sési kurhanguni ambe ma ka máteru ambe jorhenguarhini.
b Éfesu 1:10 jimbo, Pablu uandaxapti eska iámindu ambe tánanhantaaka enga auandarhu jaka. Ixú Pablu uandaxapti eska Tata Diosï Jeoba espiritu santu jimbo erakuasïnga kʼuiripuechani paraksï imeeri uájpeeni. Ka Mateu 24:31 ka Markusï 13:27 jimbo, Jesúsi uandaspti eska tánaantauaka erakukateechani. Jesúsi jimini uandaxapti eska, imani tiempuni engaksï kʼuiripuecha kánikua no sési nitamakuarhini jauaka, ima erakukateecha engaksï jiánisï útasï Echerirhu jauaka, auandarhuksï pánhantaaka. Ísï jimbo, enga Pablu ka Jesúsi úrapka indeni uandakuani “tánantani” o “tánaantani”, nóksï májkueni ambe arhikuekaxapti.
