SEMANA 3
PIREKUA 35 Ju je úni ambe enga sánderu jukaparhakueka
Imani ambe eraku je úni enga Tata Diosï Jeoba jaiapanhentajka
“Para jánhastiini orheta uétarhisïndi janhanharhini Tata Diosï Jeobani, ka engari míteska imani enga sánderu Pímbinhasïtiika niárakari kurhanguni” (PROV. 9:10).
AMBE ENGACHI JORHENGUARHIAKA
Exeakachi eska ima ambe enga jorhenguarhijka ka sési kurhanguntani ka jánhaskani jarhuatasïngajtsïni ambakiti ambe erakuni úni.
1. ¿Ambechi jatsiski para úni iáminduecha ka andisï ménisï úkua jukajki?
PAUANI pauani, iáminduechachi jatsisïnga para erakuni ambe engachi uaaka. Máru ambe no úkua jukasïndi, komu ambe jingonchi tʼirea ochi na jandora kʼuíia. Joperu jarhasti máteru ambe enga sánderu úkua jukajka erakuni, pori ejemplu, ambechi uaa úni parachi no xáni pʼamenchani, parachi tsípikua jingoni irekani o para juchaari familia sési jarhani o parachi sési marhuakuni Tata Diosïni. Uékasïngachi ambakiti ambe erakuni úni parachi jucha ka ístu juchaari familia tsípikua jingoni irekani. Joperu ambe engachi sánderu uéjka, jindeesti Tata Diosï Jeobani jaiapanherantani (Rom. 12:1, 2).
2. ¿Ambejtsïni jarhuataa ambakiti ambe erakuni úni?
2 Ini jorhenguarhikua jimbo, tanimu ambechi exeaka engajtsïni jarhuataaka ambakiti ambe erakuni úni: 1) iámu ambe míteni imeeri ambe engachi uékani jaka úni, 2) eratsentani néna exesïni Tata Diosï Jeoba imani ambe ka 3) eratsentani ambe sánderu sési jaua úni. Ka ístuchi exeaka ambechi uaa úni parachi jorhendani juchaari eratsekuani sési kurhanguntani ambe ma (Prov. 2:11).
IÁMU AMBE MÍTENI IMEERI AMBE ENGACHI UÉKANI JAKA ÚNI
3. ¿Náki ejemplu xarhatasïni eska jukaparhakueska orheta iámu ambe sési míteni ante de erakuni úni ambe ma?
3 Para ambakiti ambe erakuni úni, orheta uétarhisïndi iámindu ambe sési míteni. ¿Andisï jukaparhakue ísï úni? Ju je eranhaskani kʼuiripuni ma enga uinhamu pʼamenchani jaka ka enga doktori jingoni nirajka. Doktori orheta rebisariuati ka kurhamarhini nani pʼameraxaki o máteru ambe, ka no jirejiresï íntskuni tratamientu ma. Sáno májkueni, orhetajtsï jatsiska para sési eratsentani ante dejtsï erakuni úni ambe ma ka ísïksïni sési nicheati. ¿Nénajtsï uaa ísï úni?
4. Eska na arhijka proverbios 18:13, ¿ambejtsï uaa úni parajtsï iámu ambe sési míteni? (Ístu exea je imajeniichani).
4 Mámaru ambe kurhamarhikuarhini kánikuajtsïni jarhuatasïndi parachi úni míteni ambechi uaa. Pori ejemplu, eranhaska je eskaksïni pʼímarhisïnga reunioni sosialirhu ma. Joperu úpiringajtsï eratsentani: “¿Sési jaua eskani niuaka?”. Engajtsï no sési míteka imani enga organisariini jaka o ambe enga úkuarhiaka, uaakajtsï ini ambe kurhamarhini: naniua ka na jatini, namuni kʼuiripuechaksï niua, né exeni jaua eska iámu ambe sési jauaka, né ka né niua, ambe xáni únhaa, jaua kauikua ambe. Míteni ini ambe jarhuataatiksïni exeni sintsï niua o nómbe (arhinta je Proverbios 18:13).
Mámaru ambe kurhamarhikuarhi je parajtsï úni sési míteni iámu ambe. (Exe je párrafu 4). a
5. ¿Ambejtsï jatsiski para úni engajtsï na iámu ambe sési míteakia?
5 Engajtsï na iámu ambe sési míteakia, jánguarhinta je eranhaskani ambe enga xáni úpiringa úkuarhini imani reunioni sosialirhu. Pori ejemplu, ambejtsï úpirini engajtsï mítepiringa eskaksï ima kʼuiripuecha niuaka engaksï no janhanharhiajka Biblieri prinsipiuechani o eska kauikua ambe jauaka ka no nema jarhani para exeni eska no jukari anhaaka. ¿Exesïntsï eska ima reunioni sosiali o kʼuínchikua úpiringa no sési kʼamarhukuni? (1 Ped. 4:3). ¿Ambejtsï úpirini enga jiáni tokariipiringa enga chá tánguarhikua jatsijka o engajtsï uérajka aianhpini? ¿Nipirintsï o nómbe? Engajtsï na míteakia iámu ambe, jarhuataatiksïni sési erakuni ambe engajtsï uaaka úni. Ka nájkiruka chá mítekia ambe enga úpiringa úkuarhini, ístujtsï jatsiska para eratseni na exesïni Tata Diosï Jeoba imani ambe (Prov. 2:6).
ERATSENTANI NÉNA EXESÏNI TATA DIOSÏ JEOBA AMBE ENGACHI UÉJKA ÚNI
6. Ísï eska na arhijka Santiagu 1:5, ¿andichisï jatsi para jarhuajperata kurhakuni Tata Diosï Jeobani?
6 Kurhaku je Tata Diosï Jeobani eskaksïni jarhuataaka kurhanguni na exesïni imani ambe enga chá uékani jaka úni. Tata Diosï uandasïndi eskajtsïni jarhuataaka jánhaskatiini “jimboka ima kánhachani íntsaasïnga ambe ma iáminduechani ka mintsita jingoni ka no jámasïndi tátsekua méntku arhiani jarhani eska intsaspka” (arhinta je Santiagu 1:5). Engajtsïni ima na jarhuataakia, uaakachia kurhanguni sini Tata Diosï jaiapanhentasïni imani ambe engachi uékani jaka úni.
7. ¿Nénachi uaa míteni na exesïni Tata Diosï Jeoba imani ambe engachi uékani jaka úni?
7 Engajtsï na kurhakuakia Tata Diosï Jeobani eskaksïni jarhuataaka, jánguarhinta je exeni nénaksïni mókuchintaa. Eranhaska je arini ambe: chájtsï uékasïnga niárani nani joperujtsï tsïnchesïnga, ísï jimbo, arhisïngajtsï kʼuiripuni ma eskaksïni jarhuataaka ka jingontkujtsï kurhajchasïnga ambe engaksïni arhini jaka parajtsï úni niárani. Májkueni, engajtsï na kurhakuakia Tata Diosï Jeobani eskaksïni jarhuataaka sési kurhanguni ambe ma, jánguarhinta je ísï úni. ¿Néna? Exeparini náki Bibliarhu anapu prinsipiuecha ka juramukuechaksïni uaa jarhuatani imani ambe jingoni enga chá nitamakuarhini jaka. Ju je ménderu miántani engaksïni nema pʼímarhijka reunioni solialirhu ma. Parajtsï míteni sintsï niua o nómbe, jatsiskajtsï para exeni ambe uandasïni Biblia imani kʼuínchikuecheeri engaksï no sési kʼamarhukujka, o imani kʼuiripuecha jingoni jarhani engaksï no kurhajchajka Tata Diosïni ka sési mítetini jarhani na enga xáni jukaparhakueka orhetku peerani Tata Diosïiri Reinuni ka no juchaari ambe (Mat. 6:33; Rom. 13:13; 1 Kor. 15:33).
8. ¿Nanijtsï uaa exentani imani ambe engajtsï uékani jaka míteni? (Ístu exe je imajenini).
8 Jamberijtsï ménisï uétarhinchaaka jarhuajperata parari exentani imani ambe engari uékani jaka míteni. Erachi o pirenchi ma enga ióni páni jakaia sési marhuakuni Tata Diosï Jeobani, uaatiksïni jarhuatani. Joperu sési jauati enga chájtu jánguarhintaaka jirinhantani imani ambe engajtsï uékani jaka míteni. Uánikua jarhuajperateechaksï jarhasti parachi úni jirinhantani ambe ma, komu jarhuajperata paraksï Jeobaeri testiguecha estudiariini ka libru Bibliarhu anapu karakateecha para kristianuecheeri irekua. Miá je eska ambe engajtsï uéjka, jindeesti Tata Diosï Jeobani jaiapanherantani.
Eratsenta je néna exesïni Tata Diosï Jeoba imani ambe. (Exe je párrafu 8). b
9. ¿Nénachi uaa seguru jarhani eska Tata Diosï Jeoba jaiapanhentaaka ambe engachi erakuaka úni? (Éfesu 5:17).
9 ¿Nénachi aa seguru jarhani eska Tata Diosï Jeoba jaiapanhentaaka ambe engachi erakuaka úni? Orheta jatsiskachi para sési míteni Tata Diosïni. Proverbios 9:10 arhisïndi: “Engari míteska imani enga sánderu Pímbinhasïtiika niárakari kurhanguni”. I ambe arhikuekasïndi eskachi jatsiska para sési míteni Tata Diosï Jeobani, pori ejemplu, na enga jásïika ima, ambe enga uéjka úni, ambe tsitisïni ka ambe kurhunhisïni, solu ísïchi uaaka sési kurhanguni ambe ma. Ísï jimbo, kurhamarhikuarhi je: “Ambe engani xáni mítekia Tata Diosï Jeobaeri ambe, ¿ima jaiapanhentaa ambe enga uékani jaka úni?” (arhinta je Éfesu 5:17).
10. ¿Andiksïsï sánderu jukaparhakue Biblieri prinsipiuecha ka eska iretarhu anapu pʼindekuecha o ambe engaksï juchaari familiecha uéjka?
10 Ménichanchi no úsïnga ambe engaksï juchaari familiariichani o amiguechani uéjka parachi úni jaiapanherantani Tata Diosï Jeobani. Pori ejemplu, eranhaska je eskaksï máru taatiicha arhisïnga imeeri nanakani eska uambuchaaka erachi ma jingoni enga jatsikuarheriika joperu no káni sési marhuakuni jarhani Tata Diosïni. Jamberiksï taati jémbeecha uéjti eska uájpa no ma ambe kueratanchaaka, joperu enga inde ambe úkuarhipiringa ¿né jarhuataa sánderu sési pájperani Tata Diosï jingoni? ¿Néna eratsesïni Tata Diosï iiri ambe? Mateu 6:33 jimbo arhisïndi eskaksï kristianuecha jatsiska para “orhetku peerani Tata Diosïiri Reinuni”. Juchachi jánguarhintasïnga janhanharhiani juchaari taatiichani ka ístu máteru kʼuiripuechani, joperuchi sánderu jukaparharasïnga jaiapanherantani Tata Diosï Jeobani.
ERATSENTA JE AMBE SÁNDERU SÉSI JAUA ÚNI
11. Eska na arhijka Filipusï 1:9, 10, ¿ambejtsïni jarhuataa exeni ambe sánderu sési jaua úni?
11 Engajtsï na exeauakia Biblieri prinsipiuechani engaksï imeeri ambe uandajka engajtsï eratseni jaka úni, jatsiskajtsï para exeni ambe sánderu sési jaua (arhinta je Filipusï 1:9, 10). ¿Nénajtsï uaa ísï úni? Eranhaska je ambe úpirini úkuarhini engajtsï ísï úpiringa eskajtsï na uékani jaka. Ménisï úkua jukaati míteni ambe engachi jatsiaka para úni ka ménisï nómbe, joperu engachi sési kurhanguaka iámindu ambe, jarhuataatijtsïni ambakiti ambe erakuni úni nájkiruka ménisï úkua jukaaka.
12, 13. Enga chá sési kurhanguaka iámu ambe, ¿nénaksïni jarhuataa sési erakuni ambe engajtsï ánchikuarhiaka?
12 Eranhaska je eskajtsï ánchikuarhita ma jirinhaxaka parajtsï úni kéndani chaari familiani ka exeantasïngajtsï tsimani. Iámu ambejtsï exeskia, na enga jásï ánchikuarhita máeka, na jandorajtsï inchaa ka uéntani, na xáni iauaniiski ka máteru ambe. Ka Biblia no uandasïndi eskaksï no sési jarhaska inde ánchikuarhiteecha, joperu jamberijtsï sánderu uékaaka ánchikuarhitani ma jimbokajtsï tsitiska o jimbokajtsï sánderu maiamunhaaka. Joperu jatsiskajtsï para ístu exeni máteru ambe ante dejtsï erakuni.
13 ¿Inde ánchikuarhitaksï uaa ójkutani parajtsï nirani tánguarhikuecharhu? ¿Uaa eskajtsï nóteru jatsiakia tiempu parajtsï chaari familia jingoni jarhani? ¿Ójkutaaksïni parajtsï jarhuatani chaari familiani sánderu sési pájperani Tata Diosï jingoni? Ini ambe kurhamarhikuarhini, jarhuataatiksïni parajtsï imani ambe úni enga sánderu jukaparhakueka, komu Tata Diosïni kómarhini ka ambe enga chaari familia uétarhinchajka. Ísï jimbo, i ambeksïni jarhuataati parajtsï imani ambe erakuni úni enga sési jaka ka Tata Diosï Jeobaksïni újchakuraati.
14. Sési kurhanguni ka xénchpeni, ¿nénajtsïni jarhuataa no no sési ambe úraani máteruechani?
14 Engachi sési kurhanguaka iámu ambe, exeakachi nénachi pʼikuastaua máteruechani imani ambe jingoni engachi erakuaka úni ka ísïchi no no sési ambe úrauaka (Filip. 1:10). Ísï jimbo, jukaparhakuesti eskachi sési eratsentaaka na engachi xukuparhaaka ka arreglarikuarhini. Pori ejemplu, jamberichi jucha tsitijka na engachi arreglarikuarhijka, joperu engachi kurhanguska eska indeni ambe no sési pʼikuastaasïnga kúnguarhikuarhu anapu erachiichani o imeechani engaksï no marhuakujka Tata Diosï Jeobani, jarhuataatijtsïni respetariuani, ka xénchperakuajtsïni jarhuataati sési pʼikuastaani ka ístu eskachi kaxumbitiuaka (1 Kor. 10:23, 24, 32; 1 Tim. 2:9, 10). Ísïchi imani ambe erakuaka úni enga xarhataaka eskachi xénchaasïnga máteruechani ka respetariuani.
15. Ante dejtsï erakuni úni imani ambe enga kánikua jukaparhakueka, ¿ambejtsï jatsiski para úni?
15 Engajtsï erakuaka imani ambe úni enga jukaparhakueuaka, eratsenta je iámindu ambe engajtsï jatsiaka para úni. Jesúsijtsïni jorhendasti eska uétarhisïnga orheta kuenta pʼikuni para úni ambe ma (Luk. 14:28). Ísï jimbo, eratsenta je na engajtsï xáni tiempu úraaka, sentabu o uinhapikua parajtsï imani ambe úni engajtsï eratsekia. Ménisï, jatsiakajtsï para uandontskuarheni chaari familia jingoni parajtsï exeni nénaksïni uaa jarhuatani. ¿Andisï sési jaki eskajtsï uandontskuarheaka? Jimbokajtsï ísï uaaka exeni eska jarhaska máru ambe engajtsï uaaka mójtakuni o máteru ambe úni enga sánderu sési jauaka. Ístu, engajtsï kurhamarhiaska chaari familiarhu anapuechani ka kurhajchaantsï, sánderuksïni uékaati jarhuatani paraka sési uéraaka ima ambe engajtsï erakukia úni (Prov. 15:22).
IMANI AMBE ERAKU JE ÚNI ENGA SÉSI UÉRAAKA
16. ¿Ambejtsï jatsiski para úni paraksïni sési uérachini ambe engajtsï erakukia úni? (Ístu exe je rekuadruni “ Néna ambakiti ambe erakuni úni”).
16 Engajtsï úska iámindu ambe engachi exekia, listujtsï jarhaskia parajtsï ambakiti ambe erakuni úni, míteskajtsïa iámu ambe engajtsï xáni uétarhinchani japka míteni ka exeaskajtsïa Biblieri prinsipiuechani parajtsï úni jaiapanherantani Tata Diosï Jeobani. Ísï jimbo, uaakajtsï kurhakuni Tata Diosï Jeobani eskaksïni jarhuataaka paraka iámu ambe sési uéraaka.
17. ¿Ambe uétarhisïni úni para ambakiti ambe erakuni úni?
17 Jamberijtsïni uánikua xanhari sési uérachitia ambe ma. Joperu miá je eska parachi ambakiti ambe erakuni úni, no solu uétarhisïnga uánikua ambe míteni o nitamakuarhini, sino uétarhisïndi méntkisï kurhakuni Tata Diosï Jeobani eskajtsïni jarhuataaka jánhaskatiini. Imajtsïnisï uaati jarhuatani parachi ambakiti ambe míteni, sési kurhanguni ka jánhaskani, ka i tanimu ambejtsïnisï jarhuataati ambakiti ambe úni (Prov. 2:1-5). Jo, Tata Diosï Jeobajtsïni uaati jarhuatani parachi imani ambe erakuni úni enga ima jaiapanhentajka (Sal. 23:2, 3).
PIREKUA 28 ¿Nénachi uá Jeobaeri amigueni?
