SEMANA 1
PIREKUA 2 Chíti nombri jindesti Jeoba
Ju je k’eri ambe arhini Tata Diosï Jeobani
KARAKATA PARA UÉXURHINI 2025: “Ísï kʼéri ambe arhi je Tata Diosï Jeobani eska imeeri nombri na jukanchaka” (SAL. 96:8).
AMBE ENGACHI JORHENGUARHIAKA
Exeakachi nénachi uaa k’eri ambe arhini Tata Diosï Jeobani ísïi eska ima na jukanchaka.
1. ¿K’uiripuechaksï ambe sánderu tsitisïni úni ini jurhiatikuecha jimbo?
INI jurhiatikuecha jimbo sáno iámindu kʼuiripuechaksï imeecheeri ambe jimbojku uandanhiasïndi. Pori ejemplu, uánikuechaksï redesi sosialiichani úraasïndi paraksï xarhatani ambe engaksï xáni újka ka paraksï k’éri ambe exenhani. Joperu namunitu kʼuiripuechaksï k’eri ambe arhisïndi Tata Diosï Jeobani. Ka ini jorhenguarhikua jimbo exeakachi ambe arhikuekasïni k’eri ambe arhini Tata Diosï Jeobani ka andichisï jatsi para ísï úni. Ístuchi jorhenguarhiaka néna engachi uaaka k’eri ambe arhini Tata Diosïni ísï eska ima na jukanchaka, ka na enga no ióni jimbo, Tata Diosï Jeoba xarhataaka eska imajkusï jukanchaka para k’éri ambe arhinhani.
¿AMBE ARHIKUEKASÏNI K’ERI AMBE ARHINI TATA DIOSÏ JEOBANI?
2. ¿Ambe úspi Tata Diosï Jeoba Sinaí juáta jimbo? (Ístu exe je imajenini).
2 Bibliarhu uandakua k’eri ambe arhini arhikuekasïndi eska nema k’eri ambe exenhaaka. Ísï tátsekua engaksï israeliteecha na uéakuntapkia Ejiptu uératini, Tata Diosï Jeoba xarhataspti na enga xáni k’eri ambeeka. Eranhaska je ini ambe: uánikua israeliteechaksï tánguarhintatixapti Sinaí juátarhu no iauani paraksï kurhaani ambe enga Tata Diosï arhiapiringa. Tátsekua nube ma ójchakurasïndi juátani, ka ueenasïndi jencheni ka sïraani, piritasïndi ka charhancheni ka no sési kurhakuarhini (Éx. 19:16-18; 24:17; Sal. 68:8). Engaksï israeliteecha ini ambe exepka jamberiksï ísku pakarapti na enga Tata Diosï Jeoba xáni k’eri ambeeka.
Juáta Sinaí jimbo, Tata Diosï Jeoba xarhatakuasïndi israeliteechani na enga xáni k’éri ambeeka. (Exe je párrafu 2).
3. ¿Nénachi uaa kʼéri ambe arhini Tata Diosï Jeobani?
3 ¿Ka juchachi néna uaa k’eri ambe arhini Tata Diosï Jeobani? Ma ambe engachi uaaka úni jindeesti aianguani kʼuiripuechani na enga xáni uinhapitiika ka ístu na enga xáni sési járhati kualidadichani jatsiaka, o grasiasi íntskuntani jimbokajtsïni íntskusïnga imeeri uinhapikuani parachi jucha úni ambe ma (Is. 26:12). Pori ejemplu rei Dabidi iámindu israeliteechani japarini ísï kómarhispti: “Oh Tata Diosï Jeoba, t’uri k’eri ambeeska, uinhapitiiskari, kánikuari sési jáxeska, kánikuari meremerejkusïnga, ka jukanchaskari parari janhanharhinhani jimboka chiitiiska iámindu ambe enga auandarhu ka echerirhu jaka”. Ka enga na kʼamarapkia kómarhini, “iámindu kúnguarhikua kʼéri ambe arhispti Tata Diosï Jeobani” (1 Crón. 29:11, 20).
4. ¿Jesúsi néna k’eri ambe arhispi Tata Diosï Jeobani?
4 Enga Jesúsi Echerirhu jámani japka, méntkisï kʼéri ambe arhispti imeeri Taatiini. Pori ejemplu, enga milagru ma ueenga méntkisï arhiasïreendi kʼuiripuechani eska Tata Diosï Jeobaeri uinhapikua jimboesïreenga (Mar. 5:18-20). Ístu k’eri ambe arhisïreendi na enga uandeenga Tata Diosï Jeobaeri ambe ka ístu na enga káuenga máteruechani. Ma xanhari, enga Jesúsi sinagogarhu jorhentpini japka, jima jarhaspti uarhiiti ma enga 18 uéxurhini páni japkia pʼamenchani jimboka no sési jásï espiritu ma incharhitixapka, jimbosï iámu juruparhaptia ka no úni jurhimbintani. Kánikua no sési nitamakuarhixapti jimbosï Jesúsi kánikua pʼamojkupti ka uékperakua jingoni arhispti: “Nana, ambakentaskaria chiiti pʼamenchakueri”. Tátsekua pʼájtsïkuspti ka ima jirejiresï jurhimbentaspti “ka ueenaspti k’eri ambe arhini Tata Diosïni” (Luk. 13:10-13). Ima uarhiiti ambakentaspti ka ménderu sési exenhasïreendia jimbosï k’eri ambe arhipti Tata Diosï Jeobani; ka juchajtuchi uánikua ambe jatsiska engachi jimbo uaaka k’eri ambe arhini.
¿ANDICHISÏ K’ERI AMBE ARHIJKI TATA DIOSÏ JEOBANI?
5. ¿Andichisï respetariijki Tata Diosï Jeobani?
5 K’eri ambechi arhisïnga Tata Diosï Jeobani jimbokachi mintsita jingoni respetariisïnga. Uánikua ambe jimbochi respetariisïnga Tata Diosïni, pori ejemplu, ima iámindu ambe úsïndi úni (Sal. 96:4-7). Ístu kánikua jánhastiisti, jimbokachi exesïnga na enga xáni sési kueraaka iámindu ambe. Imajtsïni íntskusti tsípikua ka iámindu ambe engachi uétarhinchajka (Apok. 4:11). Ima no méni jurajpisïndi (Apok. 15:4). Méntkisï sési uérakusïndi ambe enga újka ka méntkisï kumplirisïndi ambe enga aiatspejka (Jos. 23:14). Jimbosï profetani Jeremíasi arhipti: “Nájkirukaksï jaka jánhastiicha ireteecharhu ka ístu reinuecharhu, no nema jarhasti enga meru ísïika eska tʼu” (Jer. 10:6, 7). ¿A no eskachi uánikua ambe jatsiska parachi respetariini juchaari Taati auandarhu anapuni? Joperu no solu jukanchasti eskachi respetariuaka; sino ístu eskachi xénchaaka.
6. ¿Andichisï xénchajki Tata Diosï Jeobani?
6 Kʼéri ambechi arhisïnga Tata Diosï Jeobani jimbokachi iámu mintsita jingoni xénchasïnga. Tata Diosï Jeoba sési járhati kualidadichani jatsiasti jimbochisï xénchajka. Pori ejemplu, xénchpesïndi ka pʼamojpeni (Sal. 103:13; Is. 49:15). Engachi no sési nitamakuarhini jarhajka, imajtsïni kurhanguchisïndi ka no sési pʼikuarherasïndi engachi ísï nitamakuarhini jarhajka (Zac. 2:8). Ka ístujtsï jarhuatasïndi andarhierani ka imeeri amigueni (Sal. 25:14; Úku. 17:27). Ístu, kaxumbitiisti ka “kʼutitsesïndi para exeni auandani ka echerini, para tʼupurirhu uératini jauatantani kaxumbitini” (Sal. 113:6, 7). Jimbochisï uéjka kʼéri ambe arhini Tata Diosïni (Sal. 86:12).
7. ¿Náki kóntperatanchi jatsiski?
7 K’éri ambechi arhisïnga Tata Diosï Jeobani jimbokachi uékasïnga eskaksï kʼuiripuecha míteaka. Satanási chkuanderakua ambe jórhentpesïndi ka kʼuiripuechaksï jakajkukusïndi (2 Kor. 4:4). Pori ejemplu, uandasïndi eska Jeoba, Tata Diosï máeska enga ikiajka, enga no uandanhiajka juchantsïni jimbo ka eska imeeri kulpeeska enga no sési ambe úkuarhijka parhakpinirhu. Joperu juchachi míteska ambe enga ísïiska ka uaakachi aianguani kʼuiripuechani parakaksï imeechajtu míteaka na enga jásïika Tata Diosï, ka ísïchi k’éri ambe arhini (Is. 43:10). Salmo 96 jimbo exeani jauakachi máru bersikuluechani engaksï k’eri ambe arhijka Tata Diosï Jeobani. Ka ístuchi exeaka na engajtsïni inde ambe jarhuataaka para juchajtu k’eri ambe arhini Tata Diosïni ísï eska ima na jukanchaka.
¿NÉNACHI UAA K’ÉRI AMBE ARHINI TATA DIOSÏ JEOBANI ÍSÏ ESKA IMA NA JUKANCHAKA?
8. ¿Nénachi uaa k’éri ambe arhini Tata Diosï Jeobani? (Salmo 96:1-3).
8 Engachi uandaaka Tata Diosï Jeobaeri ambe, k’eri ambe arhini jauaka (arhinta je Salmo 96:1-3). Íksï bersikuluecha arhiasïndi Tata Diosïiri marhuariichani eskaksï pirekuaka, eskaksï kʼéri ambe arhiaka imeeri nombrini, eskaksï uandantaaka ambakiti aianhperakuani na enga pʼímutaantajka kʼuiripuechani ka eskaksï uandantaaka na enga xáni kʼéri ambeeka. Engachi ini ambe uaaka, k’éri ambechi arhini jauaka juchaari Taati auandarhu anapuni. Pori ejemplu ióntki anapu Tata Diosïiri marhuariichaksï tsípikua jingoni aianguasïreendi máteruechani na enga jásïika Tata Diosï Jeoba ka ambe enga xáni úpka imeecha jimbo (Dan. 3:16-18; Úku. 4:29). Ka jucha, ¿nénachi uaa májkueni úni?
9, 10. ¿Ambeksïni jorhendasïni ambe enga nitamakuarhipka Angelina? (Ístu exe je imajenini).
9 Ju exeni ambe enga nitamakuarhipka pirenchi Angelina enga Estados Unidos anapueka. a Ima no chéspti ánchikuarhitarhu kuájpini Tata Diosï Jeobaeri nombrini. Ánchikuarhitarhuksï arhiaspti iámindu jimbanhiichani paraksï tánguarhintani ka mítperanksï. Ka pirenchi jirinhaantaspti máru fotuechani para xarhatani na enga sési p’ikuarherajka Jeobaeri testigueni. Joperu antesi, imeeri kompanieruni ma tokarispti ka ima uandantaspti eska ísï tʼarhexeranhaspka komueska Jeobaeri testigu ma, ka ueenaspti no sési ambe uandani ambe engachi jakajkujka. Angelina uandantasïndi: “Meru kánikua no sési pʼikuarheraspka ka chéni. Joperuni uandaspka: ‘No jurajkuaka eska chkuanderakua ambe uandaaka Tata Diosï Jeobaeri ambe’”.
10 Enga kompanieru jémba na kʼamarapkia uandani, Angelina kómarhispti Tata Diosïni. Tátsekua, iatsitakuarhu arhispti kompanieru jémbani: “Jíjtuni ísï tʼarhexeranhaska komueska Jeobaeri testigu ma ka útasïni Testigueska”. Ísï jimbo máteruechaksï nóteru agustu jarhasptia, joperu pirenchi úspti iátsitakuarhu uandani ka no ikiani. Ka exeraaspti fotuechani na enga xáni sési pʼikuarherajka Tata Diosïni marhuakuni ka úspti uandantani ambe enga jakajkujka (1 Ped. 3:15). Enga Angelina na kʼamarapkia exeraani fotuechani, imeeri kompanieru jémba nóteru xáni ikiaxaptia ka asta uandaspti eska imajtu ióntki sési nitamakuarhispka. Angelina uandantasïndi: “Tata Diosï Jeoba jukanchasti eskachi kuájpiajka imeeri nombrini. Ka kʼéri kóntperata máesti ísï úni”. Ka ístu para jucha kʼéri kóntperata máesti kómarhini Tata Diosï Jeobani ka kʼéri ambe arhini, nájkirukaksï máteruecha no sési ambe uandani jauaka imeeri ambe.
Uaakachi k’éri ambe arhini Tata Diosï Jeobani juchaari uandakua jimbo. (Exea je párrafuechani 9 ka 10). b
11. Eska na arhijka Salmo 96:8, ¿nénaksï ísï úxaki Tata Diosïiri marhuariicha desde iónisïa?
11 Uaakachi kʼéri ambe arhini Tata Diosï Jeobani imani ambe jingoni engachi jatsikuarheka (arhinta je Salmo 96:8). Ka ísïchi úskia desde iónisï (Prov. 3:9). Pori ejemplu, israeliteechaksï íntspisti sentabu paraksï templuni úni ka paraksï kuidarini (2 Rey. 12:4, 5; 1 Crón. 29:3-9). Máru Jesúsiiri chúxapatiichaksï úrasïreendi “imeecheeri jatsikuarhekua ambe” paraksï jarhuatani Jesúsini ka apostoliichani (Luk. 8:1-3). Ístu, primeru siglurhu anapu kristianuechaksï axakuaspti ambe ma imani erachiichani engaksï uétarhinchani japka (Úku. 11:27-29). Iásï juchajtuchi uaaka kʼéri ambe arhini Tata Diosï Jeobani donasioniicha jingoni.
12. ¿Nénachi k’eri ambe arhisïni Tata Diosï Jeobani donasioniicha jingoni? (Ístu exe je imajenini).
12 Ju je exeni ejemplu ma enga xarhatajka eskachi kʼéri ambe arhisïnga Tata Diosï Jeobani engachi íntspijka sentabu. Uéxurhini 2020 jimbo, uánikua kʼuiripuechaksï úpirindi uarhini Zimbabue jimboka no jarhaspka t’irekua, asta pirenchi ma enga Priska arhinheenga. Ka nájkiruka i ambe úkuarhini japka, pirenchi mándani mierkulisï ka biernesïchani nirasïreendi aianhpini nájkiruka tiempuepkia para tarheni. Jimboksïsï imeeri besinu jémbeecha teresmarhuendi ka arhinksï: “¡T’uri kʼarimani uarhiaka jimbokari sánderu arhisïnga aianhpini ka nóri tarheni!”. Joperu ima arhiaspti: “Tata Diosï Jeoba méntkisï jarhuataasïndi imeeri marhuariichani”. Ísï tátsekua, Tata Diosï Jeobaeri kúnguarhikua axakuspti pirenchini ambe enga xáni uétarhinchani japka. Ka imeeri besinu jémbeechaksï ísku pakaraspti ka arhisptiksï: “Tata Diosïkeni no méni jandiajku jurajkusti. Uékasïngachi sánderu míteni imeeri ambe”. Ka sieteksï ueenasptia nirani tánguarhikuecharhu.
Uaakachi k’éri ambe arhini Tata Diosï Jeobani imani ambe jingoni engachi jatsikuarheka. (Exe je párrafu 12). c
13. Eska na arhijka Salmo 96:9, ¿ambechi jatsiski para úni parachi k’éri ambe arhini Tata Diosï Jeobani?
13 Uaakachi k’éri ambe arhini Tata Diosï Jeobani juchaari jángua jingoni (arhinta je Salmo 96:9). Tata Diosï Jeobaeri saserdotiichaksï jatsisïreendi para limpiu jarhani jimbokaksï tabernakulurhu ka templurhu marhuasïreenga (Éx. 40:30-32). Juchajtuchi jánguarhintasïnga parachi limpiu jámani, joperu sánderu jukaparhakuesti eskachi imani ambe uaaka enga Tata Diosï jaiapanhintajka (Sal. 24:3, 4; 1 Ped. 1:15, 16). Ísï jimbo, jatsiskachi para nóteru ísï jámania eskachi “ióntki na jámeenga” sánderu sési, “jimbanhi kʼuiripu máenia”. I ambe arhikuekasïndi eskachi nóteru ísï jámasïnga eska antesi, eskachi nóteru no sési ambe úsïnguia, sánderu sési eskachi jorhenguarhiskia ísï eratseni ka jámani eska Tata Diosï Jeoba (Kol. 3:9, 10). Tata Diosïiri jarhuajperata jimbo asta ima kʼuiripuecha engaksï sánderu no sési úriika, uaatiksï mójtakurhini ka ambakiti kʼuiripu máenksï.
14. ¿Ambejtsïni jorhendasïni Joeliiri ejemplu? (Ístu exe je imajenini).
14 Ju je exeni Joeliiri ejempluni, achamasï ma enga ónhakuarhetini japka jimboka kánikua no sési jásï ambe niátaspka ka iáminduecha chérhisïreedi, ka astaksï arhisïreendi demoniu. Kárselirhuksï arhispti eska niárapiringa uándikunhani. Joperu ante ísï úkuarhini, ima ueenaspti jorhenguarhini Biblieri ambe erachi ma jingoni, enga kárselirhu nireenga jorhentpini. Ka nájkiruka xáni no sési ambe úpka úspti mójtakurhini ka itsï atakuarhini komu Jeobaeri testigu ma. Ima kánikua mójtakurhispti jimbosï ima jurhiatikua ante de uándikunhani, máru polisiechaksï nípti exeni ka uerasptiksï. Ístu sondaduni ma enga kárselirhu ánchikuarhienga uandaspti: “Antesi, Joeli kánikua no sési jámasïreendi, joperu iásï inde sánderu sési jámasïndia kárselirhu”. Ísï ma semana tátsekua enga Joeli uándikunhapka, erachiichaksï ménderu niraspti paraksï tánguarhikua úni kárselirhu, ka jima jarhaspti acheeti ma enga no méni nirani japka. ¿Andisï nípi? Jimboka ísku pakaraspka enga exepka na enga xáni mójtakurhipka Joeli. Ka uékasïreendi míteni néna úpirini marhuakuni Tata Diosï Jeobani. Ísïisti, juchaari jángua uaati eskaksï máteruecha k’éri ambe arhiaka juchaari Taati auandarhu anapuni (1 Ped. 2:12).
Uaakachi k’éri ambe arhini Tata Diosï Jeobani juchaari jángua jingoni. (Exe je párrafu 14). d
NO IÓNI JIMBO TATA DIOSÏ JEOBA XARHATAATI ESKA IMAJKUSÏ JUKANCHAKA PARA K’ÉRI AMBE ARHINHANI
15. No ióni jimbo, ¿néna xarhataa Tata Diosï Jeoba eska imajkusï jukanchaka para k’éri ambe arhinhani? (Salmo 96:10-13).
15 (Arhinta je Salmo 96:10-13). Salmo 96 kʼamarhukuni jámani uandasïndi eska Tata Diosï Jeoba Reiiska ka eska sési jusgarpisïnga. No ióni jimbo, Tata Diosï Jeoba xarhataati eska imajkusï jukanchaka para k’éri ambe arhinhani. ¿Néna uaa ísï úni? Enga sési jusgarpiaka. Nóteru ióni kuerataxatiia para kʼamajkuni k’éri Babiloniani jimboka chkuanderakua ambe jorhentpisïnga Tata Diosïiri ambe (Apok. 17:5, 16; 19:1, 2). Jamberi máru kʼuiripuecha engaksï exeaka na engaksï kʼamajkunhaaka relijioni no jurhimbitiicha, jamberiksï uékaati juchantsïni jingoni kómarhini Tata Diosï Jeobani. Ka tátsekua, Tata Diosï Jeoba Armajedonirhu kʼamajkuati Satanásiiri parhakpinini ka imeechani engaksï ikiakujka ka engaksï no sési ambe uandaaka imeeri ambe. Joperu pʼímutantauati imeechani engaksï xénchaajka ka kurhajchani ka engaksï kánikua sési pʼikuarherajka jimbokaksï k’éri ambe arhisïnga Tata Diosï Jeobani (Mar. 8:38; 2 Tes. 1:6-10). Enga Kristu na juramuakia mili uéxurhini, ka engaksï kʼuiripuecha na tsʼéjkunhaakia últimu xanhari, iásï kʼóru Tata Diosï Jeoba pímbinhajkuntaatia imeeri nombrini para méntkisï (Apok. 20:7-10). Jiáni kʼória, “ísï eska itsï na jaka marirhu, echerirhu ima kʼuiripuechajkuksïsï jauati engaksï míteaka na enga xáni k’éri ambeeka Tata Diosï Jeoba” (Hab. 2:14).
16. ¿Ambejtsï eratsetixaki úni chá? (Ístu exe je imajenini).
16 Kánikua sésiuati engaksï interu parhakpinirhu kʼuiripuecha k’éri ambe arhiaka Tata Diosïiri nombrini ísï eska ima na jukanchaka. Joperu enga jamberi niáraaka ima jurhiatikua uaakachi seguiriini jarhani kʼéri ambe arhini juchaari Tata Diosïni. Ka para xarhatani na enga xáni jukaparhakueka, grupu enga orhejtsïkuajka iámu kúnguarhikuechani erakusti Salmo 96:8 para jíndeni karakata para uéxurhini 2025 anapu: “Ísï kʼéri ambe arhi je Tata Diosï Jeobani eska imeeri nombri na jukanchaka”.
¡Niáraati ima jurhiatikua engaksï iáminduecha k’éri ambe arhiaka Tata Diosï Jeobaeri nombrini ísï eska ima na jukanchaka! (Exe je párrafu 16).
PIREKUA 12 Juchari kʼéri Tata Diosï Jeoba
a Nombriichaksï mójtakurhisti.
