SEMANA 5
PIREKUA 108 Jeobaeri ambakiti uékperakua
Kánikuajtsïni marhuachesïndi Tata Diosï Jeobaeri xénchperakua
“Kristu Jesúsi jurhasti parhakpinirhu para pʼímutaantani pekadoriichani” (1 TIM. 1:15).
AMBE ENGACHI JORHENGUARHIAKA
Exeakachi na engajtsïni marhuachejka tata Jesukristueri uarhikua ka nénachi uaa xarhatakuni Tata Diosï Jeobani eskachi agradeserikusïnga.
1. ¿Nénachi uaa sési pʼikuastani Tata Diosï Jeobani?
ERANHASKA JE eskajtsï sési jásï regalu ma íntskusïnga kʼuiripuni ma ka enga marhuakuaka. ¿A no eskajtsï kánikua no sési pʼikuarherapiringa enga ima patsapiringa ka miripakuarhini indeni regaluni? Joperujtsï kánikua sési pʼikuarherapiringa enga ima úrapiringa, ¿a no? I ejemplujtsïni jorhendasïndi eska Tata Diosï íntspiska imeeri Uájpani juchantsïni jimbo. Kánikua sési pʼikuarherajti ka tsípini engachi xarhatakujka na engachi xáni agradeseriijka indeni xáni ambakiti regaluni jimbo, jimboka ima ísï úska parajtsïni euajpintani ka xarhatachentsïni na engajtsïni xáni xénchajka (Juanu 3:16; Rom. 5:7, 8).
2. ¿Ambechi exea ini jorhenguarhikua jimbo?
2 Enga na ióniini jarhajkia, jamberichi niárapiringa nóteru xáni jukaparharania engajtsïni Jesúsi ísï euajpintaka ka inde ambe ísïipirindi komueska patsani regaluni ka miripakuarhini. Joperu parachi no indeni ambe úkuarhinchani, jatsiskachi para pauani pauani eratsentani ambe enga úka Tata Diosï Jeoba ka Jesúsi juchantsïni jimbo. Indeni ambechisï exeni jauaka ini jorhenguarhikua jimbo. Exeni jauakachi nénajtsïni marhuachesïni iásï tata Jesukristueri uarhikua ka nénajtsïni marhuachia sánderu orhepatini. Tata Diosïjtsïni kánikua xénchasïndi, ísï jimbo, ístuchi exeaka nénachi uaa xarhatakuni eskachi agradeserikusïnga ka sánderia jiáni enga niárani jauakia ima jurhiatikua para tata Jesukristueri uarhikuani miántani.
NA ENGAJTSÏNI MARHUACHEJKA IÁSÏ
3. ¿Nénajtsïni marhuachexaki iásï Tata Jesukristueri uarhikua?
3 Marhuachexatijtsïnia tata Jesukristueri uarhikua. Pori ejemplu imeeri uarhikua jimbo, Tata Diosï Jeobajtsïni puácheantasïndi juchaari pekaduechani. Ka no ísï úsïndi jimboka nomasi jatsiska para ísï úni sánderu sési jimboka uéksïnga ísï úni. Pirekua ma jimbo, Dabidi uandaspti na enga xáni agradesidu japka: “Tʼu Tata Jeoba ambakitiiskari ka jingontkuri jarhaska para puátspentani” (Sal. 86:5; 103:3, 10-13).
4. ¿Neechani marhuakuasïni tata Jesukristueri uarhikua? (Lukasï 5:32; 1 Timoteu 1:15).
4 Jarhastiksï máru kʼuiripuecha engaksï ísï pʼikuarherajka eskaksï no jukanchaska eska Tata Diosï Jeoba puákuantauaka, ka ísïisti, no nema jukanchasti. Asta apostoli Pablu jamberi uandaspti: “No jamberini jukanchaska parani arhinhani eskani apostoliiska”, ka ístu uandaspti: “Joperu jimbokarini Tata Diosï kánikua kóndentaska, ji ixú jamberini niáraskia” (1 Kor. 15:9, 10). Engachi sési jimbo móantajka, Tata Diosï Jeobajtsïni puáchentasïndi. ¿Andi? Jimbokajtsïni xénchasïnga ka no jimbokachi andakuarhesïnga. Joperu engachi niáraaka ísï pʼikuarherani eskachi no jukanchaska eskajtsïni Tata Diosï Jeoba puáchentaaka, ju je miántani eska ima íntspiska imeeri Uájpani imani kʼuiripuecha jimbo engaksï sési jimbo moántajka imeeri pekaduecheeri ka no imani kʼuiripuecha jimbo engaksï iámu ambe sési újka (arhinta je Lukasï 5:32; 1 Timoteu 1:15).
5. ¿Andisï no nema uaa uandani eska jukanchaska para Tata Diosï xarhatakuni pʼamojperakua?
5 Nájkirukachi ióni páni jauakia marhuakuni Tata Diosï Jeobani, nóchi méni jatsiska para eratseni eskachi jukanchaska parajtsïni ima pʼamojperakua xarhatacheni. Ísïisti, Tata Diosï kánikua jukaparharasïndi ambe engachi xáni újka imani jimbo, joperu ima no íntspisti imeeri Uájpani parajtsïni maiamuni, sánderu sési, intsïmperata máesti (Ebr. 6:10). Engachi jucha uandapiringa eskachi andakuarheska parajtsïni ima pʼamojkuni ojtsï sési kamani, sáno ísïipirindi komu uandani eskachi no uétarhinchasïreenga eska tata Jesukristu uarhipiringa juchantsïni jimbo (terukutani je Galasia 2:21 jingoni).
6. ¿Andisï apostoli Pablu xáni jánguarhintapi sési marhuakuni Tata Diosï Jeobani?
6 Apostoli Pablu mítespti eska na uéjki xáni jánguarhintani, no úpiringa úni eska Tata Diosï Jeoba puákuntapiringa. Jiájkani, ¿andisï xáni jánguarhintapi sési marhuakuni Tata Diosïni? Jimboka uékasïreenga xarhatakuni na enga xáni agradesidu japka enga Tata Diosï xáni kánikua kóndentapka (Éfes. 3:7). Juchajtuchi tsípikua jingoni marhuakusïnga Tata Diosï Jeobani jimbokachi uéksïnga xarhatakuni na engachi xáni agradesidu jaka imani jingoni ka no parajtsïni ima xarhatacheni pʼamojperakua.
7. ¿Ístujtsïni néna marhuachesïni tata Jesukristueri uarhikua? (Roma 5:1; Santiagu 2:23).
7 Ístujtsïni kánikua marhuachesïndi Jesúsiiri uarhikua jimbokachi úsïnga sési pájperani Tata Diosï Jeoba jingoni. a Eskachi na exekia máteru jorhenguarhikua jimbo, juchachi no úpiringa sési pájperani Tata Diosï jingoni jimbokachi no perfektu andajpenusïnga. Joperu tata Jesukristueri uarhikua jimbo, úsïngachi sési pájperani Tata Diosï Jeoba jingoni ka ístu andarhierani (arhinta je Roma 5:1; Santiagu 2:23).
8. ¿Andichisï agradesidu jaki Tata Diosï Jeoba jingoni engachi újka kómarhini ?
8 Engachi sési pájperajka Tata Diosïni Jeoba jingoni, úsïngachi ini kóntperatani jatsini: kómarhini. Tata Diosï no solu imani kómarhikuechani kurhauasïndi engaksï tánguarhikuarhu únhajka, sino ístu engachi jandiajku kómarhijka. Kómarhini Tata Diosïni, kánikuajtsïni sési pʼikuastantasïndi ka úsïndi eskachi imani pínandikua jatsiaka engachi uétarhinchani jarhajka, joperu sánderu jukaparhakua ambe jindeesti eskajtsïni jarhuatasïnga sánderu sési pájperani Tata Diosï Jeoba jingoni (Sal. 65:2; Sant. 4:8; 1 Juanu 5:14). Pori ejemplu enga Jesúsi Echerirhu jámani japka, someni kómarhisïreendi Tata Diosï Jeobani jimboka mítespka eska ima kurhajchapiringa ka eska kómarhikua jarhuatapiringa sánderu sési pájperani Taati jémba jingoni (Luk. 5:16). Ísï jimbo, kánikuachi agradesidu jarhaska enga tata Jesukristu uarhika juchantsïni jimbo, jimboka inde ambe úsïnga eskachi Tata Diosïiri amigueuaka ka eskachi uaaka kómarhini.
NÉNAJTSÏNI MARHUACHIA SÁNDERU ORHEPATINI
9. ¿Jesúsiiri uarhikua néna marhuakuaua Tata Diosïiri marhuariichani sánderu orhepatini?
9 Ka ístu sánderu orhepatini, Jesúsiiri uarhikua kánikua marhuakuauati Tata Diosïiri marhuariichani. Tata Diosï Jeoba íntsauati tsípikua para méntkisï. Uánikua kʼuiripuechaksï eratsesïndi eskachi no uaaka irekani para méntkisï jimboka iámindu kʼuiripu uarhisïnga, joperu Tata Diosï Jeoba ísï kueraasti kʼuiripuni para irekani para méntkisï. Enga Adáni no pekariipiringa, iáminduechachi úpirindi jakajkuni eskachi uaaka irekani para méntkisï. Ka nájkiruka no fásiliika jakajkuni eskachi uaaka irekani para méntkisï, inde ambe niáraati ísï úkuarhini jimboka Tata Diosï Jeoba kánikua maiampiska para indeni ambe kumplirikuarhini, jo, íntspisti imeeri Uájpani (Rom. 8:32).
10. ¿Naniksï irekaa erakukateecha ka naniksï irekaa máteru karichiicha?
10 Nájkiruka sánderku kueratani jakaia para irekani para méntkisï, Tata Diosï Jeoba uékasïndi eskachi eranhaskaaka nénachi irekaa jima. Erakukateechaksï uékaxatiia Jesúsi jingoni juramuni Echerirhu auandarhu uératini (Apok. 20:6). Ka máteru karichiicha o kʼuiripuecha engaksï Echerirhu irekaaka enga Paraisu máeuakia, uékaxatiksïa eska nóteru nema kómu nitamakuarhiakia (Apok. 21:3, 4). ¿Chá Echerirhu erokuarhixaki irekani para méntkisï? Enga ísïika, asï eratsi je eska ísku ambe máeska jimboka Tata Diosï Jeoba jimbosï kuerauapka kʼuiripuechani paraksï irekani para méntkisï. Jiájkani inde ambesï uaati eskachi meru tsípikua jingoni irekaaka.
11, 12. ¿Náki kóntperateechanchi jatsiaua Paraisurhu? (Ístu exea je imajeniichani).
11 Eranhaska je na engajtsï xáni sési irekaaka Paraisurhu. Pʼamenchakua ambe ka uarhikua nóteru jauatia (Is. 25:8; 33:24). Tata Diosï Jeobaksïni íntskuati iámindu ambe enga chá uékaaka. Pori ejemplu, ¿tsitipirintsï jorhenguarhini animalicheeri ambe, jorhenguarhini kústani, dibujariini o jorhenguarhini máteru ambe? Paraisurhu, uánikua kʼuiripuechaksï uétarhiati engaksï jorhenaaka kʼumanchikuechani uaani, jatsintani ambe, ikarani, áspiti ambe úmantani, ánchitarakua ambe úni o máteru ambe úni para jarhuajpeni (Is. 35:1; 65:21). Kánikuajtsï tiempu jatsiaka parajtsï jorhenguarhini ambe engajtsï chá uékaaka.
12 Kánikuachi sési pʼikuarheraaka eroantani imeechani engaksï tsíntaaka (Úku. 24:15). Ka ístuchi kánikua sési pʼikuarheraaka seguiriini jarhani jorhenguarhini Tata Diosï Jeobaeri ambe ka ambe enga xáni kueraaka (Sal. 104:24; Is. 11:9). Joperu sánderu ambakiti ambe jindeesti eskachi nóteru no sési ambe uaakia. Ísï jimbo, nóteruchi méni kurhakuakia Tata Diosï Jeobani eskajtsïni puáchentaaka, ka uaakachia sési marhuakuni. ¿A no eskajtsï no mójtakupiringa ini xáni ambakiti kóntperatani nomasi parajtsï iásï “ma ratku tsípikuarhini pekadu ambe jingoni”? (Ebr. 11:25). Nájkirukajtsï iáiasï no újka mámaru ambe úni, miá je eskajtsï Paraisurhu sánderu ambakiti ambe jatsiaka. Niáraati ima jurhiatikua engajtsï no solu eranhaskaaka Paraisuni, sino jimajtsï jauakia. Ka i ambe niáraati ísï úkuarhini jimbokajtsïni Tata Diosï Jeoba xáni xénchaska enga íntspika imeeri Uájpani para uarhini juchantsïni jimbo.
¿Ambejtsï sánderu uékaxakiia úni Paraisurhu? (Exea je párrafuechani 11 ka 12).
JU JE XARHATAKUNI TATA DIOSÏ JEOBANI ESKACHI AGRADESIDU JARHASKA ENGAJTSÏNI XÁNI XÉNCHAJKA
13. ¿Nénachi uaa xarhatakuni Tata Diosï Jeobani eskachi agradeserikusïnga engajtsïni xáni xénchajka? (2 Korintu 6:1).
13 Engachi méntkisï jánguarhintaaka marhuakuni Tata Diosï Jeobani, xarhatanchi jauaka eskachi kánikua agradeserikusïnga engajtsïni euajpintaka (Mat. 6:33). Ju je miáni eska Jesúsi iáminduechani jimbosï uarhika “paraksï ima nóteru irekania para imeechajkumindu, sino para ima enga imeechani jimbo uarhika ka enga tsítanhantaka” (2 Kor. 5:15). Tata Diosï Jeobajtsïni kánikua kóndentastia ka puáchentani, ísï jimbo, engachi jucha jánguarhintaaka sési marhuakuni, xarhatakuakachi eskachi kánikua agradesidu jarhaska ambe enga ima úkia juchantsïni jimbo (arhinta je 2 Korintu 6:1).
14. ¿Nénachi uaa xarhatani eskachi mintsikasïnga imani ambe engajtsïni Tata Diosï Jeoba arhistachijka?
14 Máteru ambe engachi uaaka úni parachi xarhatakuni Tata Diosï Jeobani eskachi agradeserikusïnga, jindeesti mintsikani ka ísï úni eskajtsïni ima na arhistachijka. Pori ejemplu engachi erakuni jámaaka nani jamberi nirani eskuela, na jásï ánchikuarhitachi ma jirinhaa o máteru ambe, jatsiskachi para exeni ambesï uéjki Tata Diosï Jeoba eskachi uaaka ka ísïchi xarhatani jauaka eskachi mintsikasïnga (1 Kor. 10:31; 2 Kor. 5:7). Engachi úkuecha jingoni xarhatajka na engachi xáni mintsikajka Tata Diosïni, sánderuchi sési pájperasïnga imani jingoni ka ístuchi sánderu seguru jarhasïnga eska ísï úkuarhiaka ambe engachi erokuarhini jaka (Rom. 5:3-5; Sant. 2:21, 22).
15. Jiáni engachi tata Jesukristueri uarhikuani miántaaka, ¿nénachi uaa xarhatani eskachi agradesidu jarhaska?
15 Engachi jánguarhintaaka uérani aianhpini imani jurhiatikuecha jimbo engachi miántaaka tata Jesukristueri uarhikuani, xarhatakunchi jauaka Tata Diosï Jeobani eskani agradesidu jarhaska jimbokajtsïni euajpintaska ka xénchani. Aparte dechi nirani Jesúsiiri uarhikuani miántani, ístuchi jatsiska para pʼímarhiani máteruechani (1 Tim. 2:4). Engachi pʼímarhiauaka kʼuiripuechani, ju je aianguani ambe enga xáni úkuarhijka indeni tánguarhikuarhu. Uaakachi exeraani bideuechani ¿Andisï uarhi Jesúsi? ka Ju je miántani tata Jesukristueri uarhikuani engaksï jw.org jimbo jaka. Orhejtsïkutiichaksï jánguarhintaati pʼímarhiani imeechani eskaksï nóteru tánguarhijkia. ¿Úsïntsï eranhaskani na enga xáni tsípinhaaka auandarhu ka ístu Echerirhu enga Tata Diosï Jeobaeri karichi ma kʼuanhatsentaaka? (Luk. 15:4-7). Jiáni engachi tata Jesukristueri uarhikuani miántaaka, jatsiska para iáminduechani sési eroani asta imeechani engaksï ióni nóteru nípkia o engaksï apenasi ueenaaka nirani imani tánguarhikuarhu (Rom. 12:13).
16. Jiáni engachi tata Jesukristueri uarhikuani miántaaka, ¿andichisï jatsi para sánderu uérani aianhpini?
16 Jiáni engachi tata Jesukristueri uarhikuani miántaaka, úpiringachi sánderu uérani aianhpini jimbokachi ísï xarhatakuni jauaka Tata Diosï Jeobani ka tata Jesukristuni eskachi kánikua agradesidu jarhaska iámindu imani ambe jimbo engaksï úka juchantsïni jimbo. Engachi sánderu jánguarhintaaka aianhpini, exeakachi na engajtsïni jarhuatajka Tata Diosï Jeoba ka ístuchi sánderu mintsikaaka (1 Kor. 3:9). Ístu, miá je arhintani Biblieri arhintskuani para Jesúsiiri uarhikuani miántani enga foieturhu jaka Karakata ma para mándani jurhiatikua ka ístu Programarhu para ánchikuarhini tánguarhikuarhu jukanharhiasti tekstuechani para imani jurhiatikuecha jimbo arhiantani. Ka asta uaakachi úraani indeni karakateechani para jandiajku jorhenguarhini.
17. ¿Nénachi úsïni sési pʼikuastani Tata Diosï Jeobani? (Ístu exe je rekuadruni “ Nénachi uaa xarhatakuni Tata Diosï Jeobani eskachi agradeserikusïnga”).
17 Ka engachi no úska iámindu ambe úni engachi xáni exekia ini jorhenguarhikua jimbo, ju je no uandanhiani. Ju je miáni eska Tata Diosï Jeoba no terukutantasïnga imani ambe engachi jucha újka, imani ambe jingoni engaksï máteruecha újka. Ima juchaari mintsitanisï exejti ka mítesti eskachi kánikua agradesidu jarhaska imani regaluni jimbo engajtsïni íntskuka (1 Sam. 16:7; Mar. 12:41-44).
18. ¿Andichisï xáni agradeserikujki Tata Diosï Jeobani ka Jesúsini?
18 Enga tata Jesukristu ísï uarhika juchantsïni jimbo, Tata Diosïjtsïni úsïndi puáchentani ka úsïngachi imeeri amigueni ka ístuchi mintsikasïnga eskachi uaaka irekani para méntkisï. Tata Diosï Jeobajtsïni kánikua xénchasïndi jimbojtsïnisï íntskuati iámindu indeni ambe, ísï jimbo, je ju xarhatakuni eskachi agradeserikusïnga (1 Juanu 4:19). Ístu, ju je xarhatakuni tata Jesukristuni eskachi agradeserikusïnga jimbokajtsïni xénchasïnga ka íntspini imeeri tsípikuani juchantsïni jimbo (Juanu 15:13).
PIREKUA 154 Uékperakua no méni kʼamakurhiati
